رواية تائهة بين اروقة الماضي الفصل الرابع والثلاثون 34 - بقلم الكاتبة نهى

#تائهة_بين_اروقة_الماضي
#بقلم_الكاتبة_nuha-d-h
مساء الخير احبتي اعتذر منكم لتأخري بتنزيل البارت
بسبب ظروف طارئة
((((((((((())))))))))))
ضرغام

اليوم مر على زواجنا ثلاثة اشهر انا ورنا وبعد مبين شي لان هي من تزوجت اول مرة من اول ايام العرس حملت يعني ماعدها مشكلة حجزتلها عند الطبيبه بلكي تطلع حامل لان كالت غابت علية يومين بلكي الله وتطلع حامل راحت هي وامها للطبيبة دخلت للبيت متاخر هالايام مااعرف شبية احس اكو شي كاتم على نفسي اظل سهران وية جماعتي لذلك من ارجع مااشوف احد كل واحد بغرفته ... صعدت الدرج دخلت لغرفتي باوعت رنا لاعبه لعب بخلقتها مكياج وملابس نوم شكو هاي شبيها معقوله حامل عقدت حاجبي بتعجب وسالتها
ضرغام.. شنو كالت الدكتورة
رنا.. كالت رحمج نظيف ومهيء للحمل ما بيج شي
ضرغام.. اها معناها مو حامل ... لعد ليش مصار عندج حمل
رنا .. معناها العلاج الي جنت تاخذه بلبنان ما جاب وياك نتيجة
اقتربت مني وانا كاره حتى نفسي
يعني انا عقيم وراح ابقى عقيم وهسة هاي رنا
ما صار عندها حمل لحد الان ياربي رحمتك
احس بروحي اختنكت شكد صعبة عالواحد يملك كلشي اموال وحلال وهو عايش بالحرمان محروم من الاولاد ربي امتحانك صعب ليش تحرمني من نعمتك ورحمتك
جريت حسرة
انتبهت لرنا اقتربت من عندي واخذتني لحضنها
وهمست

.. اترك عنك سالفة الخلفة ما اريد منك اطفال اني اهم شي عندي انت ..ابنيً وزوجي وحبيبي
بعدتها عني ما احب احد يعطف علية شبعت من نظرات العطف واكتفيت منها
نظراتهم تحسسني بضعفي كاسر خاطرهم
ضرغام.. اناً اريد خلفة مو علمودج لحتى افرحج اوتصيرين ام ... انا اريدهم علمودي
رنا اصحي على روحج انتي تعرفين كلش زين شنو سبب زواجي منج
انا اتزوجتج حتى اتأكد من علاجي للعقم ناجح لو لا
وما ينفع اطبق وية اي وحدة الا تكون زوجتي
رنا .. اي اعرف هذا الشي
بس هذا ما يمنع نعيش حياتناً طبيعي مثل اي اثنين متزوجين ترة اني بعدني عروس
ما صارلي غير ٣ أشهر متزوجة منك وبعدها الحياة كدامنا وتكدر تتعالج واني راح اصبر عليك
ضرغام.. لا رنا تعبت بعد ما احاول كافي اكتفيت
من العلاجات والدكاترة خلاص بعد ما اراجع دكتور
رنا انا ما افيدج تكدرين تشوفين حياتج وتتزوجين شخص يكدر يسعدج ويوفرلج عائلة اذا تردين من باجر اطلكج وتصيرين حرة حتى تكدرين تختارين حياتج ما دامج بعدج صغيرة وتكدرين تحملين وتكونين عائلة
لا تهدرين عمرج وياي وبعدين تتندمين من تكبرين وتشوفين نفسج محرومة من الاولاد بسببي انا ما دايملج
رنا.. لا ضرغام انت عندي بالدنيا كلها كلشي ما اريد
اي شي منك غير بس تحبني
ضرغام.. رنا انصحج تشوفين حياتج ولا تترجين مني احبج لان انا نفسي كارهة شلون راح اكدر احبج
رنا.. زين لاتحبني راضية بس شوية خفف من عصبيتك ومزاجك واطباعك الصعبة
احلفك بالله اكو وحدة مثلي عروسة اسوي كولشي حتى انت تتقربلي اتخيل اذا اني ماابادر واهيئلك الاجواء ماراح تتقربلي
اريد اعرف ليش تتهرب مني وصايرة طلعاتك من البيت كلش هواي ليش اريد اعرف السبب
تدري جدتك خاجية تعتب علية وامك ماكلة گلبي تكلي
انتي عوبة ما تكدرين تحوين رجلج مطفشتة من البيت
امك تكلي ابني ما جنة عريس
لو تشوفينة من جان عريس بايام هيام شلون كوة جان يطلع من البيت ولازك كلة وية مريته
ووين ماتروح يروح وراها عبالك طفل مضيع امه
امك تصوجني وتذب العيلة كلها بية ليش تخليهم يحجون علية
ضرغام .. رنا انا روحي واصلة لخشمي وراجع كلش تعبان ولاتكعدين تصدعين راسي امك كالت وجدتك حجت وتاكلين راسي بسوالف النسوان هاي اميً وهاي جدتيً عاجبج تتحملينهم اهلا وسهلا ما عاجبج الباب يوسع جمل ما راح اكعد ادوخ روحي وياج
رنا.. انا ما اريد منك اي شي بس لا تتهرب مني كدامهم وتنطيهم سبب لحتى يحجون علية لاتشمت خالتي وجدتك بية احس بيهم ما يحبوني

حسيت روحي اختنكت من الملحة
عطت بيها .. كافي اي مو طلعت روحي من الملحة
راح اعوفلج الغرفة واطلع
من ورة ملحتج وبعدين تلوميني من اهج من البيت
اي هو انا راجع من الشغل مشعول ابو ابوي من التعب
ومن اجي يمج تستقبلني امك واختك وجدتك
ترة محد مسؤل عن راحتي بس انتي واذا ما الكة راحتي يمج شي اكيد راح اطفش منج
تركتها وراي وطلعت
اختنكت صرت اتعمد اتصرف وياها
بقساوة لان رنا هواي تتدلع وما عندها صبر وتريد واحد فايخ وفارغ لسوالفها
وانا بس الله العالم بحالي شنو من نار كايدة بصدريً
رائد. لحد الان ما لاكيهم ويكول اصدقائه الي مكلفهم
بالبحث ببغداد باجر راح يسافرون ايفاد لبغداد
ومناك همة يستغلون الفرصة ويدكون اسمهم بالحاسبة
ما كدرت انطيه اسماء البنات ما احب ادخله بخصوصاتي اكتفيت بس بأسم احمدعمها ووهذا الي مصعب الامور لان هو مو موظف لان بحثو بجميع حواسيب الدوائر لو موظف جان بسرعة لكوه وهذا ابن عمها السگط نسيت اسمه فد اسم مااعرف شلونه عبالك مال بنات وهي مكالته غير مرة وحده من هددها قبل الزواج وبعدين قريت اسمه من دزت لجين الرساله الي قلبت حياتنا وخلت هيام تتغير بس نسيته شكد حاولت اتذكره مكدرت
(((((((((())))))))
هيام صار اسبوع من جابلي بلال الرقم مال خالي راضي واني مترددة اخابرهم حاولت خلال هالايام الاكي حل ملكيت وصار لازم اتصل ماعندي غير حل

لازمة النقال بيدي وريام واكفة فوك راسي بترقب عبالك منتظرين النتائج لا بعد موقفنا اصعب منتظرين
تقرير مصيرنا ووين راح تصفة بينا الدنيا
ريام .. هيام اني خايفة
هيام ابتسمت ابتسامة يأس ذكرتني كلمتها بأول
يوم النة من هربنا من عندهم
احس بروحي اعيد تاريخ امي
امي الدنيا حاصرتها ودفعتها الحاجة حتى تطلب
العون والمساعدة من اخوها
واني هم الدنيا عاندت وياي وحاصرتني بزاوية الحاجة
وخلتني بعازة مساعدتهم وماكو انسان اكدر الجيء له
بشدتي غير خالو راضي
ولو اني حالفة عليهم وماخذة عهد على نفسي
لو اموت ما اطلب منهم شي ولا اخليهم يشوفون ابنهم لان همة نكروه ونبذوني بالبداية عرفت احنا غير مرحب بينا وهروبنا منهم كان راحة بالنسبة الهم
بس شكول عالزمن ماله لاصاحبً ولا صديق خلاني بعازتهم
نقلت الارقام بالنقال واني احس وية كل رقم اضغط عليه عبالك اقترب من اجلي .
اسمع دكات. كلبي.
دست على. زر اتصال وسحبت نفًس عميق
وغمضت عيوني بترقب
رفعت راسي والتقت عيوني بعيون ريام جانت واكفة وشايلة
بيدها ابني علاوي وتهز بي وهو يباوع علية بعيونه الصغيرة عبالك. يعرف امه واكعة بشدة وتحتاج المساعدة
رن طوووط .. طوووط
فجاءة اجاني الصوت من الطرف الاخر
انخطف لون وجهي واجة نقالي يوكع من بين ايدية
وصوتي اختفى
راضي .. الو .. الو منو وياي
اتلاحكت لروحي ربي ساعدني
همست.. الو خالو اني هيام
صار هدوء ماكو رد
بسؤال مامصدك اذنه
راضي.. هيام!!!!!!
.. اي خالو اني هيام
راضي بخوف على عصبية على صدمة
.. اشر للكل الكاعدين داير ما دايره ان يسكتون لان. يريد يسمع عدل
.. خالو هيام وين انتو كلبنا الدنيا عليكم وما كدرنا نندل مكانكم وين اختفيتو ليش هيج سويتي انتي واختج
احنا ما نستاهل السويتو ويانا
.. خالو هسة مو وكت العتاب
.. كليلي انتو وين هسة بيا مكان حتى اجيكم
.. احنا ببغداد يم بيت عمو احمد
عالعموم خالو اني ما اتصلت عليك حتى تعتب علية وتلومني
اتصلت عليك لان ابنكم مريض ومحتاجة اسويله عملية وعمليته مكلفة
عقد حواجبه .. لحظة لحظة شنو جاي تحجين ما افتهمت عليج ابنا منو ؟؟
.. ابنكم الي نكرتوه ونبذتوه ودرتو وجهكم عنه بيوم عرفتو بية حامل بابن ابنك
كمت من مكاني مصدوم ما مصدك اذني
.. خالو هيام انتي شكاعد تحجين معقولة انتي جنتي حامل بابن ضرغام واحنا ما عندنا علم
.. ليش تسوي نفسك متعجب ليش عمو احمد مو دزلكم واحد من طرفه يبلغكم بحملي وبوكتها راد رقم نقالك حتى يحجي وياك وتتفاهمون على موضوعي اني وضرغام بس انتو الحمد لله ماعولتو اطلع اني واختي منكم وتتخلصون من عدنا والله ياخالو اني حالفة ما ادك بابكم لومهما صار من ورة السويتوه بينا اني وابنيً واختي وصدكم النا بس غصب عني الدنيا احوجتني الكم
وجبرتني اجي ادك بابكم
انقطع كلامي واتعجبت
من سمعت صوت خالو راضي يبجيً
ويتحمدلله ويتشكر
راضي .. الف الحمدلله والشكر الك يارب ما اصدك الي كاعدة اسمعه يعني افتهم من كلامج ضرغام عنده ولد من عندج
سمعته يصيح بصوت عالي
حليييييمة ولج حليمة يمة خاجية تعالو
سمعت هوسة وركضة صار قريب عليه والكل يسألونه
شكو شصاير ليشً تبجيً واني مصدومة من ردة فعله شكاعد يصير اريد واحد يفهمني
راضيً ودموعه على خده
.. يمة ابشرج ضرغام عنده ولد من هيام
سمعت صوت خالة حليمة هلهلت وهي تبجي
وكلبيً رفً من سمعت صوت بيبي خاجية
الحجية خاجية.. يارحمتك ياربي ماقصرت ويانا
يمة راضي اسألها وينها واختها شلونها
راضي.. اوكفيً حجية لحظة واللهً من فرحتي نسيت البنية عالخط

عقدت حواجبي
ردة فعله بتلقي الخبر فاجئتني تركتني عاجزة وسرقت مني الكلام بس بقيت مركزة على موضوع مرض علاوي هذا جان كل همي وشاغل تفكيري
.. خالو ابني مريض ومحتاج يسوي عملية
راضي.. دخيلك ربي شبي ليش الولد مريض وشنو علته
من حجة هاي الكلمتين حسيت الجو عنده صار هدوء
وصرت احجي لخالو عن مرض علي والدموع غركت عيوني جنت احجي وابجي من يجي طاري مرض ابني دموعي غصب عنها تنزل
راضي.. يعني سميتي الولد علي
همست .. اي خالو اسمه علي
.. والنعم ما اختاريتي خير الاسماء
وبعدها سألني عدت اسئلة وكلها تخص علي وشكد عمره وشلونه ويشبه منو اهووو كومة اسئلة وكل ساعة اسمع صوت خالة حليمة تتعارك عالنقال تريد تحجي وياي وبعد تبادل الكلام شفته اتجنب يسألني شي عن حياتنا شلون عشنا ودبرنا امورنا بعد الفراق احتمال من تسمحله الفرصة يسالني بعدها
انطيته العنوان و نهينا الاتصال
بكلمة وحدة من عنده حضرو نفسكم انا جايكم
باجر
باوعت لريام شفتها تبجي
.. خالو باجر راح يجي علينا
ريام .. سمعته
جنا وحدة تباوع للثانية والسؤال الغير المطروح
يحوم فوك روسنا شراح يصير بينا اني وريام راح نفترق وتبقى يم بيت عمي لو تجي وياية لان هي روحها معلكة بابني علي وبية
اخذت منها علاوي
لازم اتصل على عمو احمد وابلغه بالصار
ريام.. اي اتصلي عليه ولو هو صارله يومين ملتهي
وية نبراس يكلج صارلة يومين طلع من السجن
وعمتي ام نبراس اليوم الصبح اجتي تعتب علينا
ليش ما كلفنا نفسنا ورحنالهم للبيت نتحمدله عالسلامة
هيام .. ليش هي نست شنو سوة بينا وطلعته الناقصة
اني سمعت من لجين نبراس طلع من السجن لان اسراء بنت خالتها خابصة الدنيا من الفرحة بس اني غلست عليهم ما عليج منها اهم شي عمو احمد عاذرنا ويعرف ليش احنا ما رحنالهم هو لو مثل الاوادم جان اتواصلنا وياهم وفرحنا لفرحهم بس هو ما يستاهل واحد يعذره ويسويله حساب افعاله كلها سودة
..........................
ضرغام .. خير حجي شكو شصاير حركتو النقالات علية
والله اجيت اركض عبالي واحد بيكم صار بي شي وكعتو كلبي
جنت احجي واباوع عالوجوه
ضرار امي جدتي عمتي اختي ضاري كلهم نصهم يبجون ونصهم يضحكون بفرح باوعت بأتجاه رنا جانت الوحيدة واكفة على صفحة جانت ومغنتبة ووجها مكلوب
راضي.. بوية ضرغام تعالي اكعد واخذلك نفس

رحت كعدت يمهم وانا اباوعلهم بتسائل
.. عندي الك بشارة ما راح تصدك
.. احجو فهومني شنو سامعين
راضي.. بوية هيام اتصلت علية
اتبسمرت بمكاني وحبست انفاسي وما بدرت مني اي حركة
.. وين همة بيا مكان وشعجب اتصلت عليك وشذكرها بينا بعد كل هاي الفترة مو جنها جاية متأخرة
راضي.. اتصلت علية محتاجة مساعدة

حسيت بنار تفور بداخل صدري
كمل ابوي
.. بوية ضرغام هيام اتصلت علية حتى تكلي ابنك محتاج مساعدة
عكدت حواجبي يمكن ما سمعت زين او يمكن ابوي
غلط بالحجي
.. ابني؟؟
انتبهت على ابوي نزلت دموعه على خده
.. اي بوية ضرغام عندك وليد اسمه علي هناك ببغداد بحضن امه وهسة هو محتاج مساعدتك
اجاني كلام ابوي مثل الصاعقة ونزلت على راسي
حسيت بعاصفة عاثت بداخلي الدمار وراحت وتركت وراها بس الانقاض هذا حالي من عرفت انا عندي ولد من هيام ولا بعد ضامته عني وصارلهة سنة
صار جسمي كلة يرجف
جان الكل يباوع علية بس انا كنت بغير عالم
ما صدر مني اي ردت فعل
غير كمت من مكاني ورفعت النقال
وهمة يراقبوني
اتصلت .. الو حمزة حضرت السيارات هسة نسافر لبغداد
حمزة.. صار باشا
غلقت النقال وباوعت لابوي
راضي .. شنو شراح تسوي شوف ضرغام لا تتصرف
لوحدك هذني بنات اختي
واذا لمست شعرة منهن انا الي اوكف بوجهك هالمرة
.. لتخاف حجي ما راح اسويلهن شي ماعندي شيً وية بنت اختك غير ابني اخذة من عندها
.. شلون ما راح تسويلهن شي وانت الشر مبين من وجهك
مشيت من يمهم اريد اطلع
راضي .. لحظة ضرغام ما تسافر لوحدك رجلي على رجلك
حليمة .. اخذوني وياكم تحتاجون مرة وياكم بالطريق حتى تاخذ بالها من الصغير
راضي .. لاً انتيً ظلي هنا بالبيت لان الناس راح يجون
وينترس اللبيت بعدما سمعو بخبر ابن ضرغام
ولازم واحد بينا. يكون موجود
راح ناخذ ويانا. اختي رحاب
جان ابوي يحجي وانا واكف
مااعرف صرت مثل امشي مثل الحلم بين المصدك وبين المامصدك وبين الفرحان عندي. ولد وبين الغاضب حسيت بالغدر من هيام طلعتها وياي ما تتسولف زاد حقدي بأتجاه هيام وزاد صارت مديونتلي كلش هواي حرمتني من ابني وخسرتني احلى ايام من عمره سلبت مني حق الابوة بدون اختياري
(((((((((()))))
كعدت يوم ثاني الصبح
واني الليل كله ما نايمة من التفكير
خايفة حضرت تقارير وعلاج علاوي
اباوع عليه شلون يناغي كاعد بالكاع
البارحة كعدت ريام تعلمه المشي خطية شوية شوية يخطي ويرجع يكعد
ياعمري رغم هو مريض بس مدنفش
وخدودة مستديرة
لبست شالي وجاكيتي
وشلت علاوي .. ريمة اني راح اخذ علاوي
اضربه ابرة عند جارتنا المضمدة
ريام .. مو تتأخرين ابراهيم يريد يجي علية هو وامه واخته حتى ياخذوني نشتري الحلقات
هيام.. ان شاء الله ما اتأخر
اجيت اطلع سألتني ريام
.. اكول هيومة خالو راضي بعد ما اتصل عليج من البارحة؟؟
.. لا ما اتصل
يالله اني طالعة تعالي سدي الباب وراي
اخذت علاوي. الي ظل يصيح ويضحك
خطية يطير من الفرح اذا يشوف الشارع
بس ما يدري ماخذته علمود يضرب ابرة هسة يحرك الدنيا. على راسي. وصلت لباب الشارع
وريام قتحت النة الباب
خطيت خطوتين بالشارع
وماحسيت الا سيارتين اجتي من بعيد وخلت منطقتنا
وحدة عالية والثاني صغيرة
كلبي اهتز من مكانه وبهت لوني
اتوقفت السيارتين يم بابنا بادت رجلية
بلحضتها لويذبحوني قطرة دم ما يلكون بية
من هول الموقف ضرغام وخالو راضي
كلبي اجة يطلع من صدري
عيوني جمدت على ضرغام الي نزل. من سيارت جان لابس نضارات عيونه ما مبينة بس حركة شفايفه القاسية تعبر عن مدى الغضب الي محمله بأتجاهي
ارتديت للخلف من نزع نظارته الشمسية
وباوع بعيوني
يا يمة اجانة هولاكو. غمضت عيوني
رجعت للخلف اريد اشرد من كدامه
نظراته بيها وعود بالتعذيب والانتقام
حضنت ابني علي لصدري. بخوف
رفع حاجبه
لا لا هيام مو وكتج تنهزمين قوي روحج وواجهي
لا تخليهم يخوفونج انتي صاحبة الحق وهمة الغلط
اني هواي انظلمت من عندهم واولهم ضرغام
الي واكف فوك راسي مثل قباض الارواح ما اعرف
بس هواي متغير وشكله صاير اكثر قساوة وصرامه
راضي .. شلونج خالو هيومة
بعدت انظاري من على ضرغام وحولتها على خالو راضي جان يباوع علية
غصب عني حن كلبي عليه اتمنيت ارتمي على صدره وانشد منة الامان
بس الموقف محرج صعب
راضي وعيونه على علاوي ابني والدموع بانت بعيونه
اتقدم من عدنا. ومد ايديه على علاوي
وهمس بصوت يرجف .. جدو علاوي تعال خليني
اشمك واصدك عيوني تعال يابعد جدك
حسيت بصوته اللهفة
بس خطية علاوي ابني استغرب ودار وجه علية وضم راسه بصدري ما يبقل يروحله

انتبهت لخالة رحاب نزلت من السيارة وعدلت عبايتها مالت مال الراس
اتقدمت علية وسلمت علية وراحت على ريام وحضنتها
كل هذا الموقف وضرغام ابد ما نزل عيونه من علية
انتبهت. على وكفتنا بالباب
.. تعالو اتفضلو ليش واكفين بالباب
ضرغام.. احنا ما جايين نكعد اجيت اخذ منج ابني وارجع بي للبصرة بسرعة جهزي وحضري اوراقه والتقارير الطبية مالته
شهكت بخوف
.. مستحيل ما اخليك تاخذ علاوي من عندي
راضي.. بوية ضرغام هذا الحجي ما يصير ينحجي بالباب احنا اهل ندخل جوة ونتفاهم
ضرغام.. اهل بالنسبة الك انا هاي الانسانة ماكو شي يربطني بيها غير ابني وراح اخذة منها واحرمها من عنده مثلما حرمتني من عنده اريدها تضوك لوعة الحرمان شلون تصير
.. لا لا ضرغام انت اكيد اتخبلت شنوً اسلمك ابني
ما تاخذه الا على جثتي
بسيطة هاي اسهل منها ماكو جان حلمي امصع ركبج
وارتكب بيج جريمة
فاحسنلج سمعي الكلام وانطيني ابني
راضي.. شبيك ضرغام انجنيت مو جاي احجي وياك
شلون تريد تاخذ الولد من حضن امه وهو مريض
ضرغام.. هاي حلها عندي اشتريله ميت الف ام بدال امه واسفره للخارج يتعالج
حجي رحمة على والدك اذا تحبها خليها تسلمني الولد
لان انا ما راح اكون مسؤل عن تصرفاتي وما اضمن نفسي اذا هسة حطيتها وخنكتها
ترة والله كوة لازم روحي
.. انت شنو من بشر ما عندك مخافة الله كضيت عمرك وياي كلة تهديد ووعيد تركتك ورحت وبعد هاي المدة
كلها وبعدك تهدد انت شنو شايف نفسك
جنت احجي بصوت عالي خايفة منه اخاف ينفذ تهديده
وياخذ ابني مني
ضرغام.. بوية اذا بنت اختك تدور الستر خليها تسلمني ابني لا تخليني اشوف شغليً وياها جان يحجي وعيونه نار
فجاءة سمعنا صوت
نبراس.. خير سالمين منو انتو
دار وجهه علية وسئلني
هيام هذولي منو وشنو يردون منج وانتي ليش. خايفة منهم
راضي.. انا خالها اخو امها وهذا زوجها انت منو
نبراس .. انا ابن عمها
هيام.. نبراس انت ليش اجيت منو دز عليك شسوي هنا
حسيت وجود نبراس راح يزيد الطين بلة
لان انتبهت لضرغام شلون ضيق عيونه
وبدة يقترب على كيف من نبراس
عزة والله اعرف هاي الحركة مالته من يكون ناوي الشر على واحد
جاوبني نبراس.. جنت جاي لبيت اهلي وشفت السيارات يم بابكم وجيت لعندكم اشوف منو هذولي
وشنو يردون منكم
هيام.. هذا ضرغام وخالو جايين يشوفون ابني علي
ضرغام.. لا اجيت لحتى اخذ ابني منج
هيام.. مستحيل ما اخليك تاخذ ابني مني
ضرغام.. انا ما طالب رأيج اخذه ما غصبن على خشمج

نبراس.. خير ابو الشباب هيام ما تريد تنطيك الولد معناها ما راح تاخذه منها اخذ اهلك وراوينة عرض اكتافك يالله حباب
وصار يطبطب على كتف ضرغام
هنا شفت شياطين العالم كلها ركبت ضرغام
ما حسيت الا ضرغام لوة ايد نبراس
وحجة بتوعد
.. جيت والله جابك منا انا شكد احبك وانت كاعد تدوس بمصاريني من الصبح دتعال
ما حسينا الا وضرغام ضرب نبراس بكلة براسه وخلة الدم يصب من خشمة
شهكت بصوت مفزوع من المنظر ولطمت على خدي
.. عزة لك ضرغام اتركه لا يفطس الولد بين ايديك جنت احجيً وارجف
وصار المضارب وكبت العيطة بين الزلم وصارت عركة
انتبهت على نبراس طلع مسدسه
من حزامه ووجهة على ضرغام
.. يمة صخام الصخمني راح يقتله
حضنت ابني بخوف ربي دخيلك اباوع على نبراس
قميصه دكمه كلها مكطعة ووالدم. تارس وجههوحلكه
رافع المسدس بوجه ضرغام
نبراس .. الولد يبقى عند هيام سامعني زين لو تحب
افرغ هذا براسك
اباوع على ضرغام ملابسه مهوسة بس ابد ما غيرت
بهيبته شعرة
ابتسم بستهزاء بوجه نبراس
.. بالله شو اخذ ابني من امه وراويني شراح تسوي
اقتربت مني خالة رحاب
رحاب.. خالة هيام انطي الولد لابوه وكسري الشر
ترة جاي تشوفين الزلم حدة سنونها وراح تصير دم للرجاب
.. خالة اموت اذا اخذ ابني من حضني ما اكدر ابتعد عنه
.. هسة بس انطي ابنه وسكتي مؤقتا والله ياخذج وياه لو يرجعه الج احجيلك كلمة هدي بيها ابن عمج شايل
سلاحه والشيطان شاطر
مشى ضرغام بأتجاهي
ومد ايدة يريد ياخذ علاوي
رمى نبراس طلقة بالجو
صرخت بخوف عبالي رمة ضرغام صار الجو سكون
نبراس.. اتقدم منها خطوة الطلقة الثانية براسك
ضرغام.. شمنتظر ارمي
مد ايدة على علاوي
واني صرخت
وصرت كبال ضرغام
.. نبراس لحظة انت مالك دخل اني راح انطي ابني
لابوه اني موافقة
نبراس.. لتخافين منهم انا موجود اذا ما تردين ياخذون ابنج احجي
هيام.. نبراس اطلع من الموضوع انت عقدت الامور فوك ما هي متعقدة اني راح اسلم ابني الهم وانت ما عليك ابني واني حرة بي
جنت احجي وابجي غصب عني راح اسلمه الهم
مو بيدي لو انطي ابني لو تصير مصيبة
وتوكع فوك راسي والقرار راجع الي
ربي دخيلك
مديت ايدي بعلاوي وغمضت عيوني بحركة گلب والدة وسلمته بيد ضرغام
اباوع على ابني كام يتلاوة وهو بيد ابوه ومد ايدة علية
يريد يرجع لحضني جان يبجي بخوف
حسيت بلحضتها اندليت مكان كلبي

ما كدرت ابقى محافظة على كبريائي وكرامتي
وقوتي انهاريت وصرت ابجي مثل الطير المذبوح جان الموقف كلش صعب علية عبالك راح ياخذون وصلة من كلبي اذا فصلوها عني اني بساعتها افقد الحياة
واموت
حجيت بتوسل
.. ضرغام اخذني وياك
باوعلي .. مستحيل اخذج وياي عاني شوية من احرمج من ابنج
راضي.. بوية هيام حضري جنطكم انتي واختج وتعالو
وياي
ضرغام.. بوية اذا اجتي هيام تعم عليها
والله اسوي كارثة اذا تحبها خليها هنا
راضي.. شبيك انت اتخلبت تكسر حجايتي
.. ما عاش اليكسرحجايتك بس
مو على حساب حقي وانا عندي حساب وياها واريد اصفي التفت على خالة رحاب
.. هاج خالة اخذي الولد وركبي بالسيارة
وحجة وية ريام.. ريام فوتي جيبي غراض واوراق علي والتقارير الطبية
ريام.. لك ضرغام خاف الله بينا احنا يتامى
ليش تنتقم من اختي بأبنها ولك والله تموت
ضرغام.. ريام انتي طلعي من الموضوع
روحي جيبي الغراض والا اكلج خليهم ما احتاجهم
اسافر بي للخارج واسويلة فحص عام
اباوع عليه اشكد قاسي
وبلحظتها ادركت ابعاد علي ابني عن ضرغام بدون علمه ارتكبت اكبر غلط بحياتي
وما سويت حساب لعاصفة غضب ضرغام
جنت حيل مستاهنة بي من اتخذت هيج قرار
دخيلك ياربي
شفتة صعد سيارته
وصاح
.. حمزة يالله اتحرك
من شفت السيارة الراكب بيها ابني وضرغام اتحركت
اجيت اتخبل وعقل ما ضل عندي
.. لااااا ربي دخيلك الا ابني
ركضت على خالى راضي
جان يريد يصعد بالسيارة الثانية
ركضت على ايدة
.. خالو اروحلك فدوة اخذني وياك
عفية خالو حتى لو خدامة راضية ابني مريض ويستغرب ويرضع من صدري والله يموت اذا ما شافني يمه
مسح على راسي وغمض عيونه
.. هيومة خالو اوعدج انا اجيبة الج وارجعه لحضنج
بس خلي اشوف هذا المخبل على شنو ناوي
اوعرفه كلش زين مايكول شي اذا ما ينفذه وهسة جاي يحجي بحركة كلب لاتنسين انتي هم جنتي ضامه عنه
ابنه طول هاي المدة بدون علمه ترة هاي السالفة موهينة
بس اوعدج ابنج يرجع لحضنج لتخافين بس اصبري
((((((((())))))))
ريام
مرت ثلاث ايام واختي لا اكل ولا شرب
انتكست حالتها وعايشة فقط عالمهدئات
ما بيدي شي اسويلها غير اراقب موت اختي
من اشوفها تكعد مفزوعة بالليل وتصيح باسم علاوي
ينعصر كلبي عليها ياربي دخيلك اختي راح يصير بيها شي وافقدها
دخل عمو احمد علينا بالمستشفى
ريام.. هَـا عمو بشر شنو كلك خالو راضي من حجيت وياه
احمد.. يكول ضرغام معند ويرفض هيام تشوف ابنها
ريام .. شنو وين كاعدين اكو دولة واكو قانون
والطفل من حق امه هو ليش هشكل كلبه اسود
احمد..ما عندي غير حل واحد اسافر بنفسي للبصرة
واحجي وياه بلكي الله ويحن كلبه ياخذها عنده تشوف ابنها لو ينطيني الولد ارجعه لحضن امه
ما تدرين اختج شلون كسرت ظهري احس بيها مثل الشمعة وانطفت
جنا انا وعمو احمد نحجي ونباوع على هيام نايمة
بغير عالم ما تحس على احد
الله يساعد كلبها اني من يمي كل ساعة اسمع صوته وافز عبالك يصيحني علاوي قطعة من كلبي
اتذكر اني اول وحدة شلته وهو لحمة حمرة حتى قبل امه حضنته بين ايدية
شلون بيج يهيام انتبهت لعمو راد يطلع
احمد.. يالله عمو انا اترخص راح اطلع والباجر ان شاء الله اسافر للبصرة لبيت خوالج
ريام.. لحظة عمو اخذني وياك اسافر لان محد يعرفلهم غيري اني حتى اذا وافقو ينطونا علاوي ادير بالي عليه بالطريق
احمد.. زين واختج شلون بيها
ريام.. هسة اتصل على نسرين ولجين وريتا ما يكولون شي يجون يبقون يمها
(((((((((((((((()))))))))
ضرغام
اخذت ابني من بين ايديها
وانا القهر والحقد عاميني احس بنار تفور بصدري
حقدت عليها وعلى رجفة كلبي بيوم شفتها
اشو الامومة زايدتها جمال وصايرة جنها جمارة
لعنتها بكلبي شنو من قوة تملكها على كلبي لحتى تخليني
اتلهف لوصلها
بس مع الاسف من شفت نبراس شلون يحجي وياها وهي تحجي وياه انا دين ما بقة بعقلي اتمنيت احركهم اثنينهم بنار غضبي
رجعت للبصرة وابني بيدي بس يبجي على امه
اهلي انخبصو بي وانكلبت الامة علينا
كلها تجي تتبارك النة اباوع لأمي ولحجية خاجية الكاع ما شايلتهم من الفرحة والولد ابد ما يطيح من ايديهم
بس مع الاسف بنت اللذين معلمته يرضع من صدرها مجرد ذكر صدرها
احس كلبي اهتز وعرك جبيني من اذكر تفاصيلها
الله يلعنج ياهيام شمعنا هي تملك السلطة على كلبي
اتصل علينا عمها وكال هيام اتخربط
واخذناها للمستشفى تريد ابنها
وانا الوكت جاي ينفذ من بين ايدية الولد حالته خطرة وجاي اطلعله جواز حتى اسافر بي للخارج
سمعت صوت نبراس يصيح ويطالب يم عمها اتخبلت
وكلتله مستحيل اخليها تشوف ابنها
كبريائي يمنعني اعترف انا وابني بعز الحاجة الهة
اقتربت مني امي ووجها تعبان البارحة الليل كله
كاعدة وية علاوي بس يبجي

حليمة.. ولك يمة ضرغام الولد فرفح من البجي راح يموت ما يرضى يرضع من الممية
ارحم بحاله وجيبله امه
اعتبرها خدامة وانا اتكفل ما اخليك تشوفها
سحبت نفس عميق وغمضت عيوني
سمعت صوته داخل غرفة ميس يبجي
رف كلبي
.. خلاص هذا دزو عليها خليها ترجع بس لابنها ما اريد اشوفها كدامي
حليمة.. اي يمة الله يرضى عليك
رنا .. لا عفية شنو يرجعها انطوني الولد اني اربيه
حليمة .. انتي سدي حلكج وسكتي شبية شفتيني غمة واسلمج حفيدي ولج هذا جنت متمنيته من الله امنية
اجة على حشف ونشف
الطفل يرضع من صدر امه ومفرفح عليها
اذا ضرغام ما اتحرك وما سوة شي انا من باجرالبس عباتي واروح اجيبها
كلشي ولا حفيدي يصير عليه شي
رنا.. واني والله ما ابقالكم دقيقة وحدة بالبيت انا ما ارضى وحدة تدخل وتشاركني بضرغام
حليمة.. خابية عليج وتغرب هذاك هو الباب
يوسع جمل روحي لبيت ابوج
انتبهت لرنا بلعت السانها
وسكتت

رحت للصالة وكعدت يم جدتي خاجية وجان ضرار نايم بحضنها وهي تلعب بشعره
باوعتلي وعيونها بيهن عتاب ووجها ثكيل علية اشو الكل زعلان علية
وضايجين مني ووجوهم كلها ثكيلة عبالك انا الي جنت ضام ابني عنهم مو هي
هو منو المفروض يزعلون منه انا لو هي
اجيت احجي واتفاجئت بدخول ابوي وكال
بنات لبسو حجاباتكم
ميس ورنا ركضو دخولو يلبسون حجاباتهم
باوعت لابوي واتفاجئت بدخول ريام ووراها عمها
احمد دخل وسلم علينا
الكل دخل بحالة صدمة
(((((((((((((()))))
ريام
دخلت لبيت خالو راضي واني كلبي يدك مثل دك طبول الحرب احس كلبي راح يطلع من صدري من الترقب والمواجهة
اول ما دخلت للصالة اجتي عيني بعيون بيبي خاجية
حن كلبي لحضنها
حسيت العالم كلة وكف وصرت بس اني وياها
بالصالة وحدة تباوع للثانية هي تباوعلي بعتاب
واني اباوعلها بأشتياق
حنيت لدعائها وخوفها علية ياربي
احمد.. ابو ضرغام اني اليوم جايكم متعني من بغداد للبصرة طلبتكم لا تردوني
بنت اخوي سكنت المستشفيات وصحتها انتكست من ورة ابنها ترة هي ام واخذو ابنها من حضنها
يعني اترجاكم تعطفون على بنت اخوي
ريام.. على شنو عمو تترجاهم هذا حق اختي
وابنها تاخذه من ضرغام ما خصبن عليه

ضرار
دخول ريام للصالة كان صعقة كهربائية لكلبي
همست بصوت مبهوت ناصي
.. ريمة !!
ضرغام .. اي ريمة بس سد حلكك فضحتنا
وكملت كلامي
.. اي استاذة ريام بالله فهميني شلون تاخذين ابني مني غصباً عني
وكفت كبالهم بكل قوة
.. اخذة بالقانون والقانون وية اختي ابنها رضيع وهو من حقها مو تشوفونة يتيمات وتكعدون تقررون مصيرنا مثل الجلاد
لا احنا كبرنا واتعلمنا
فاحسنلك وافق وانطينا علاوي ولاتخليها توصل السالفة للمحاكم
ابتسمت بستهزاء.. شوفي حبابة هذا كلامج ما يوكل عندي خبز ولا يقدم ولا يأخر
انا الحكومة كلها احطها بجيبي فلا تكعدين تساوين راسج براسي وخلي القانون يفيدج انا ما عندي شي اسمه قانون ابني يربى بحضن ابوه

ريام
حسيت الدنيا شكد قاسية ويانة
صحت بي بصوت عالي
.. لعد ما دامك تكول ماكو قانون خلاص وحق الحق اختي اذا صار عليها شي
اني هم ما عندي شي اخسره ابن اختي وصلت كلبي
صفة عندك واختي راح تروح من ايدي واخسرها صدكني ما
اتردد لحظة وحدة اذا ما احط السجين بكلبك
وعادي من بعدها اموت
احمد.. ريااام عيب شنو هذا الحجي لاتعلين صوتج على ابن خالج

ضرغام.. عمي عوفها عوفها براحتها
خلي نشوفها شنو عندها بعد تحجيه
خطية حالها يشبه حال العصور طالعله ريش
ويريد يجرب يفرد جناحاته ويجرب يطير ما يدري اذا وكع تنكسر ركبته
بس هَـا خلي ببالج ديري بالج على جناحاتج لا اكصهم الج
ريام.. ما اخاف منك حتى لو حاولت متكدر تهددني
اني صاحبة حق وجاي اطالب بحق اختي

انتبهت عليه صفن وصار يمسح على لحيته بطرف حنكه عبالك واحد كاعد يدرس خطة براسه
.. هااا كلتي اختج
شوفي حبابة مثلما انتي جاية وتطالبين بحق اختج
انا هم عند اخوي يمج حق واريد اطالب بي
عقدت حواجبي .. شنو اخوك شبي!!
ضرغام.. اخوي الي عشمتيه بالحب وبعدين درتي وجهج وشردتي
ريام.. شنو المطلوب من هذا كله
سكتت وطالت لحظات الترقب والهدوء
.. ترجعين وية اختج وتتزوجين ضرار
جنت اباوع عليه هذا اكيد اتخبل مو عاقل
فز ضرار من مكانه
.. شنو ضرغام سالمين شنو قابل انا شاكيلك
والله لو يصوغونها ذهب ما اتزوجها
ضرغام .. انا هذا العندي
مصير هيام وابنها بيدك وانت تقرر
.. عودك ليش هيج تربطها
عقدت حواجبي بأستغراب بهذا الي ظل يصيح على ضرغام جنت مامنتبهة على وجوده لان جان كل تركيزي على ضرغام وبيبي خاجية حتى اتفاجئت بوجود هذا الشخص
ريام .. وانت منو اصلاً وشنودخلك بالموضوع

باوع علية وعيونة تجدح نار
.. حقج ما تعرفيني انا ضرار يريام
بقيت واكفة مصدومة ما جاي اصدك عيوني
هذا الواكف كدامي هو نفسه ضرار
معقولة
كدرت اتمالك نفسي من الصدمة
.. ومنو كلك اني موافقة اتزوجك
ضرغام.. هذا الشي راجع الج مصير اختج وابنها
بين ايديج
حسيت انحشرت بزاويا
فجاءة سمعت صوت عمو احمد
احمد.. لحظة ضرغام ترة ريام مخطوبة

يتبع