رواية تائهة بين اروقة الماضي الفصل الثالث 3 - بقلم الكاتبة نهى

تائهة بين اروقة الماضي
للكاتبة nuha-d-h

مساء الانوار يا احبتي الاعزاء 🌷🌷🌷

ظليت اتلفت وباوعت عالسايق نزل وكم رجال من العبرية نزلو وياه يردون يشوفون ابو السيارة الي كسرت علينا
راحو لعندة اباوعلهم حجو وياه ما افتهمت عليهم شنو يحجون ورة عشر دقايق
ريام: شنو صاير ليش نزل السايق
هيام: صبري شوية هسة يركبون ونفتهم
ركب السايق والشباب
وجان يحجي وية الشباب
السايق: استغفر الله ما اعرف هالعالم شلون مستهانة بحياتها
الولد: طلع الاخ ماخذتة الغفوة وزين ما سوة حادث يا اخي السفر لاحك عليه نعسان ناملك شوية يعني زين ما كلب بينا السيارة وبعائلتة
السايق: طايرين ما ادري وين يردون يولون
جنت اسمع كلامهم وافتهمت منهم صاحب السيارة نايم بأثناء السياقة والسيارة سارحة علينا بس الله قدر ولطف بينا زين ما صار علينا شي
ريام: هيومة اني كلش جعت
هيام: باوعت من الجامة
: اتحملي شوية بلكي يوكف بالطريق ناخذ استراحة
وانزل اشتريلج اكل
انتبهت عليها حضنت ايدي ورجعت حطت راسها على كتفي وهمست: هيام شنو تتوقعين ردة فعلهم من بعد ما اكتشفو احنا مو بالبيت
هيام: عفية لا تذكريني ما اريد اتخيل ردت فعلهم
ولا اريد اعرف على شنو ناوين
اهم شي عندي اوصل لبغداد بامان كلشي ما اريد
ريام : والله حنيت لاهلي
طبطبت على ايدها بأطمئنان
: اوووف يا دنيا ما اعرف شنو مضموم النة وشنو ينتظرنا كلشي اظلم ومجهول بحياتنا

)))))((((

عودة بالذاكرة
هيام : لج ريمة شعندج واكفة ورة الباب
اشرتلي حتى اسكت : اششش بس لحظة خلي اسمع
سكتت وسحبتها من ايدها ودخلنا للمطبخ
: عيب تتسمعين لماما وبابا والله احجي لماما عليج حتى تطيح حظج
: حقج مسمعتي الي اني سمعتة
: حتى لو مهما كان ميصير تسترقين السمع لخصوصيات ماما وبابا هاي اخر مرة احذرج
: اهوووو كافي بس ترزلين
تركتها ورحت فتحت الثلاجة

حجت بحزن : اني ما اتجسس عليهم بس لوما حسيت هاي الايام اكو شي غريب جاي يصير بين ماما وبابا
خلاني اشك اكو مشكلة تواجهم
دخلت امي علينا ووجها اصفر
:اشو كاعدات تبسبسن بصوت ناصي شعدكم
التفتت ريام وانتبهت على نظراتها لامي
بيها ارتباك
جاوبتها ريام : لا ماما ماكو شي هيج هيومة كانت تحجيلي عن صديقاتها
: اهاا على طاري صديقاتها صدك سمعت خبر ان ابو لجين صديقتج
اترفع بمنصب جديد وصار مسؤل ما شاء الله
: اي صحيح البارحة لجين وزعت شوكلا علينا
بمناسبة ترقية ابوها
دخل بابا : ابو لجين انسان محترم يستاهل كل الخير واتمنى ما ينغر بمنصبه ويبقى يحافظ على نزاهتة
: اي فعلاً بابا همة ناس طيبين حتى لجين كلش حبابة ومتواضعة وما يوم حسستني ان همة احسن من عدنا ابد ودائما تتعايش وياي اتخيلي ماما بالكلية شنو اكل هي تاكل وياي
وبنتج كاظيتها لفات فلافل وهي خطية عالواهس
وسحبنا ريتا ويانة
ريام : استغفر الله يعني هاي وهي بس لفات فلافل وشوفي حالج شلون سمنانة الله ستر همزين ما
تاكلين كنتاكي جان يمكن بعد ما تعبرين من الباب
: عاااا ماما صدك اني سمنانة ؟؟
انتبهت عليها تكتم ضحكتها
: تردين الصدك لو ابن عمه
: لا طبعا الصدك
: الحقيقة انتي فعلا سمنانة
ديري بالج لزمي رجيم
: عااا لا لا عفية شلون بعد ما اكل يعني
: اي يكون احسن ترة البنية احلى شي بيها جسمها
لاتكولين اني حلوة وما اعرف شنو لا حٍٍِْــًبٌٍـــِٓېٍٓ اهم شي بالبنية جسمها ترة الشكل مكدور عليه قابل للتعديل بالميك اب بس الجسم اذا خرب متكدرين تسويلة شي
ابو هيام : اي عفية بناتي صيرو مثل امكم مثل الريمة كلما تكبر تحلة وتصير احلى واحلى
هيام : هاي شنو بابا صرت كاظم الساهر وراح تكعد تغني لامي
ريام : تدرون شنو اتمنى
ام هيام : اي شنو تتمنين
: اتمنى اتزوج واحد يكون مثل بابا يعاملني بحب وحنية
ما حسينا الا الخاشوكة طارت بالهوى على ريام
كمزت من مكاني واباوع لامي تخزر بيها
: لج ثولة بعدج بكد الفصمة وكاعدة كبال ابوج وتتمنين الزواج اشو متستحين
اباوع على بابا يبتسم : هناء عوفيها لتحجين عليها
بعدها صغيرة ومتفتهم بس شكلج غرتي لان
كعدت تتغزل بأبوها
ريام تحك براسها من اثر الضربة ومبرطمة شفايفها
: اي بابا احجي وياها حصرة عليه افتح حلكي بكلمة اذا ما كعدت ترزلني
عبالك اني مو بنتها بس ست هيام بتها

..........
بالكلية
نبراس: هيام اني كم مرة كلت ماتوكفين وية هذا الي اسمة مثنى
: شنو نبراس ترة عادي مثنى زميلي
ليش منطي الموضوع اكبر من حجمة
: لا مثني مو زميلج هو بغير مرحلة وانتي بغير مرحلة
يعني ماكو شي يربطكم ويستدعي تصيرون زملاء لا دراسة ولا اي شي هسة اني ما عندي اعتراض من اشوفج تحجين وية بلال لان نفس مرحلتج فعادي يكون زميلج بس هذا مكانة غلط
شنو الي يخلي كلما اجي الكاه
زارع نفسة يمكم
: شنو نبراس يعني انت تشك بية وبحبي الك
: لا ما اشك بيج بس ما ارتاح لهذا الولد ترة
نيتة مبينة واضحة بتجاهج
لجين : يا جماعة الخير كافي تتعاركون ترة صوتكم عالي والطلاب بدو ينتبهون عليكم عيب
نبراس: لجين اني ما احجي بالله انتي فهميها
يصير الي كاعدة تسويه
ريتا : على كيفك نبراس ترة هيام ممسوية شي
واصلا ما تنطي للولد اي وجه
يعني شنو تريدها تسوي تكول للولد ابتعد ولاتوكف يمنا اشوف الشغلة واكفة ومو من الاصول
لجين : يالله عاد كافي لا تطولون السالفة ترة مصختوها
اني كنت ساكتة وما احجي اي شي لان اباوع لنبراس صاير احمر من العصبية حقة يغار علية
احب غيرتة علية بس من دخلنا للكلية صاير كلش حساس وعلى ابسط كلمة مني او تعليق
كبل ينفجر بوجهي ما اعرف ليش
سحب نفس عميق وباوع علية
: ليش ساكتة احجيلج كلمة لو عاجبج تشوفيني مقهور
وما تحاولين تبردين ناري
دنكت والدمعة كعدت تلالي بعيوني
: هو انت تخلي الواحد يحجي اشو كبل اتهجمت علية
انت تحجي وانت تجاوب روحك
سمعت ريتا
: يالله لجين خلي نترك عصافير الحب لوحدهم خلي يراضيها
لجين: لا حٍٍِْــًبٌٍـــِٓېٍٓ ما اتركهم لوحدهم شنو
بخيرهم ما خيروني بشرهم عمو علية
لاحبي خلي نستمتع بمنظر الصلح
سحبتها ريتا من ايدها : دمشي امشي كدامي لزكة
ضحكنا على شكلهم شلون يحالون يغيرون علينا الجو
ابتعدو عنا واقترب نبراس مني وهمس بذني
: مو تزعلين مني والله مو بيدي غصب عني اغار عليج ما اتحمل حتى الهوى من يمر عليج
مو اشوف هذا الي جنة لزكة جونسن كاعد يتودد الج
رفعت راسي وابتسمت ما اعرف ليش بحجاية وحدة منه يزعلني وبكلمة منه يراضيني
: لا ما ازعل منك اكو وحدة تزعل من روحها
انت روحي ترة خلي ببالك ما يملي عيني اي رجال غيرك فلا تكعد تحط نفسك بمقارنة وية مثنى
: هيام ادري بيج تحبيني بس انتي متعرفين شي
ترة احنا شباب ونعرف بعضنا من النظرات
واذا سكتت هالمرة عن تصرفاته ههذا راح يتمادة
اكثر واكثر فلازم احطله حد
: عادي تريد اكلة اني مخطوبة لابن عمي حتى لو بس كلام حتى يفتهم ويبتعد عني ويعرف بعد ماكو امل
: اي يكون احسن تكولين هيج مو بس لمثني خلي الكل يعرف انتي محجوزة الي
: لا عاد مو لهالدرجة ترة
ابتسم : اتشاقة وياج يالله امشي اتأخرنا
هم يالله نلحك نرجع عندي شغل كومة
لزم ايدي ومشينا واني احس بروحي اسعد بنية بالعالم
الحلو بالموضوع اني ونبراس
ما نكدر نزاعل بعض حتى لو ساعات
نتعارك منا ونتصالح بالساعة الثانية منا
مانصبر على زعل بعضنا
عدت الايام واني التهيت بالامتحانات
واختى ريام التهت امتحانات ثالث متوسط
وصلت للبيت ودخلت للمطبخ كلش تعبانة
ومابية حيل احجي : هلو ماما بابا شلونكم
: هلة حبيبتي يالله روحي بدلي ملابسج وتعاي اتغدي
تركتهم ورحت دخلت لغرفتنا اني وريام شفتها هي هم كاعدة تغير ملابسها
ومغنتبة وعاكدة الحواجب بالهة مشغول
: خير شبيج ليش ضايجة لتكولين اليوم ممجاوبة بالامتحان
: لا اليوم مجاوبة
: لعد شبيج
: هيام اني خايفة
: شكو احجي من شنو خايفة
: ما اعرف شنو اكلج بس قبل شوية كنت مارة بالصدفة من غرفة ماما وبابا وسمعتهم
قاطعت كلامها
: هَـا ريام رجعنا نسترق السمع انتي ما توبين ابد
: راح تظلين ترزليني لو تخليني اكمل كلامي
ترة الي سمعتة شي خطير
همست بخوف: احجي شنو
: سمعت بابا يكول لماما نتائج التحليل مال الرحم
طلعت
: اي كملي
: التحاليل تكول ماما بيها سرطان بالرحم
ضربت وجهي بخوف : عزة لا لتكولين هيج ماما مبيها شي
: نصي صوتج ترة همة ما يردون نعرف عن مرضها عفية خلي نتصرف كدامهم طبيعي و نراقب حالة امي وندير بالنا عليها
هزيت راسي بالموافقة واني احس بكلبي راح يطلع من صدري ربي دخليك كلشي ولا امي
...............
عدت الايام

وحياتنا على ماهو عليه واني وريام نراقب ماما وبابا كل يوم يطلعون للطبيب
واشوف امي من ترجع وجها اصفر ويوم عن يوم امي تذبل وعرفنا بعدين امي اكتشفت مرضها عن طريق الصدفة
لان امي كانت دائماً تروح تراجع دكتورة نسائية علمود سالفة الحمل وكانت نيتها تريد تحمل بولد لبابا
بس بابا ما يهتم للموضوع ويكللها اني ما اريد ولد مكتفي ببناتي خير من الله
وحتى اهل بابا الي همة بالموصل ابد ما يدخلون بحياتنا
بس امي هي الي تلح بسالفة الخلفة خطية اتحطمت
من عرفت عندها سرطان بالرحم وحسب الكلام افتهمنا
ان هي لازم تشيل رحمها
وكلبي عليها نار ما اعرف شنو اسوي
نبراس : شنو هيومة احجي وياج وبالج شارد مامنتبهة علية شنو جنت احجي وياج
وين صافنة
لجين : الي ماخذ عقلج يتهنا بي
نبراس عقد حواجبه : منو هذا الي ماخذ عقلها
لجين تباوع لمثني الي كان واكف على بعد مسافة قريبة يم اصداقائه
صحيح كنت صافنة بتجاه كروب مثني بس عقلي وتفكيري كان عند امي خايفة عليها
وافكر بموقفها البارحة انطت ذهبها لبابا وكالت بيعة
سألتها ليش تبيعين ذهبج
بابا كال عندي مشروع واحتاج تمويل
وماما قررت تساعده
بوقتها باوعت لريام وهي باوعتلي اثنينا نعرف
شنو سبب بيعها لذهبها حتى توفر فلوس العلاج الكيميائي الي اخذ منهم كومة فلوس وبعدة الحبل عالجرار يعني السحب لا زال مستمر
وقررنا اني وريام نقلل من مصرفنا و طلباتنا وحتى الملازم كمت بعد ما استنسخهم
صرت اخذ الملازم من ريتا ولجين واكعد الليل كلة اكتبهم بالسجل وبهيج طريقة اكون موفرة على بابا افلوس الاستنساخ
وبقينا اني وريام محافظين عالسر
وما كلنا لأحد عنه لان حسيت امي تنجرح ومتقبل احد يتورج عليها كبريائها مايسمحلها احد يعرف عن مرضها
وحتى نبراس ما كلته لان اخاف يحجي لامه الي هي اصلاً تكون زوجة عمي وشي اكيد راح ينتشر الخبر

لكزتني ريتا : هيام شبيج نحجي وياج وعقلج مو يمنا ونبراس زعل وعافج وراح لان مجاوبتي
جريت حسرة: اووووف ليش زعل والله مو وكتة يتمزعل علية

ريتا : شنو شبيج اشو مو على بعض
: ما كو شي بس عندي ظروف عائلية خاصة
لجين: لا اخاف مثني هو الي ماخذ عقلج
عقدت حاجبي بتسائل: شنو قصدج
: هَـا لا هيج بس اشوفج هاي الايام تراقبين مثني ونظراتج تراقبه وين ما يروح
اشرت على نفسي متفاجئة : اني !!!!
اراقب مثني شبيج لجين هاي وانتي صديقتي وتعرفين كلش زين اني مو ببالي مثني وكلبي المن يهوى
ريتا : ما عليج بيها مخبلة تستفزج
لجين: هههه اي هسة ركزت ويانة الا الواحد ينطيها
صدمة على صعقة كهربائية يالله تركز وياه حضنتني
لج عوبة احب استفزج ما شفتي روحج شلون بالج مو ويانة
ريتا: امشو يالله نروح ترة بدت المحاضرة
انتهى الدوام
وكلشي ما افتهمت من المحاضرات
بالي كلة عند ماما طلعنا للبوابة
وانتظرت نبراس واتأخر علية وخطية البنات ينتظرون
يجي علية نبراس يالله يرحون
بس هذا اشو كلش اتأخر معقولة زعلان علية وراح وتركني هنا لوحدي
لا بس ما يسويها مهما كان ما يقبل ارجع نفرات لوحدي
لجين رفعت ايدها وتباوع لساعتها بضجر
: اووف هذا وين صار ترة كلش اتأخر واني عندي موعد عند دكتور الاسنان
ريتا: لجين انتي روحي اني راح ابقى يمها ما اتركها لوحدها
لجين: لا عادي ننتظر سوية
اباوعلهم خطية ينتظروني وتعبانات
كلتلهم روحو وخلوني لوحدي اني انتظره
لجين : اتصلي عليه
: ما عندي رصيد مصفرة وحتى شركة الاتصال طالبيني رصيد القرض
: ههههه خرب حظي
انطتني نقالها : هاج نقالي واتصلي عليه شوفي وين صار حتى اذا يتأخر اوصلج بطريقي
اخذتة منها واتصلت على نبراس دك شوية ورد جاوبني
: الو هلو نبراس اني هيام وهذا رقم لجين وين صرت ظل بالي عليك
جاوبني بصوت ثكيل من ورة خشمه معناها بعدة الاخ زعلان : جاي جاي انا بالمكتبة اخذت منهم كم مصدر يفيدوني للبحث ونسيت نفسي بالقراءة
ورة خمس دقايق وصل نبراس عاكد حواجبه وينافخ
: يالله امشي
التفتت عالبنات : يالله اني رايحة تعبتكم اليوم وياي
ريتا ببتسامة : ترة ازعل عليج شنو تعبتينا احنا صديقات وما بينا هاي الرسميات
لجين: تعبج راحة كلبي
اقتربت مني وهمست بصوت ناصي: اعوووع الله يساعدج هذا شلون متحملة اطباكاته عابت على شنو شايف حالة
كانت ريتا قريبة علينا ضحكت على كلامها وسحبتها
من ايدها : امشي ثولة ترة همة ما ناقصين تحطين حطب عالنار حتى تشعليها
راحن البنات وتركوني لوحدي وية نبراس
التفتت عليه
نبراس: يالله ست هيام خلصتي كلام وية صديقاتج لو بعد انتظر حضرت جنابج
: شبيك نبراس ترة والله ماجنت منتبهة عليك من حجيت وياي
: اي طبعاً اني مو مهم عندج حتى تنتبهين علية
عقلج جان بغير مكان وية الي ماخذة
: هَـا نبراس رجعنا مرة ثانية لنفس الموضوع
: عفية كافي هيام سدي الموضوع
انتي ابد ما تحسين بية
: نبراس والله اني عندي كومة مشاكل تكفي تشل عقل الواحد
: هيام كتلج كافي سدي الموضوع يالله امشي
خلي نرجع
رجعنا للبيت وكنا نمشي سوية ومنحجي مع بعض وكانت هاي اول مرة يمر علينا اليوم ووننام ليلنا
واحنا زعلانين من بعض
شفاتتي ريام بالليل واني ابجي كعدت يمي وسئلتني
عن الموضوع وحجيتلها عن نبراس حضنتني
: ليش ما تجربين تحجيلة عن موضوع ماما
: لا مستحيل اخاف يفلت السانه عند امة وما يختاج اكلج امة شنو ما تصدك تسمعلها خبر اذا ما نشرتة بالمنطقة كلها
: اووف يالله لعد لتضوجين والله نبراس يحبج وما يكدر على زعلج وشوفي الباجر من وحدة راح يجي يصالحج
: ياريت والله ما اكدر اصبر على زعله اذا الباجر ما جاجة يصالحني اني اروحلهم للبيت واراضيه
نمت وتفكيري كلة نبراس
((((())))))
كعدت يوم ثاني عيوني مورمة
من البجي بدلت ملابسي واني واهسي مكسور
لان نبراس بعدة زعلان علية وحتى ما كلف نفسه يتصل ويصالحني
اخذت سجلاتي وملازمي وجنطتي ودخلت للمطبخ حتى انتظر نبراس يجي علية
دك نقالي وشفت المتصل نبراس جاوبتة بلهفة
: الو هلو نبراس صباح الخير
: هلو هيام صباح النور اليوم ما راح اكدر امر عليج واخذج للكلية اتصلي على لجين تمر عليج تاخذج وياهة
كنت اسمع كلامه واني الدمعة بطرف عيني يعني هذا سواها صدك مجرد اني ما جنت منتبهة وياه هشكل يسوي
: اكدر اعرف ليش انت ما توصلني
: مشغول وماعندي وقت يالله بَـــاي راح اتأخر
انهى الاتصال وصرت اباوع عالنقال اجيت اكسر النقال من ورة حركة كلبي
اتصلت على لجين وطلبت منها تجي تاخذني
وفعلا ورة ربع ساعة اجتي علية لجين هي والسايق واخذتني وياهة للكلية
اول ما ركبت : شعجب لعد نبراس ليش ما وصلج وياه
اليوم لايكون بعدكم على خلاف
سمعت كلمات لجين واني كبل نزلت دموعي
وما اتحملت اسكت : احنا بعدنا متزاعلين
واليوم اتصل علية وكوة يحجي وياي من ورة خشمه
: اني ما اعرف انتي على شنو متحملتة وانتي ميت الف واحد يتمنى اشارة منج اشو انتي كلشي ما شايفة منة بس يعرف يزاعل ويصيح عليج
: صحيح هو عصبي بس ادري بي يحبني ويموت علية
واني هم احبة بس هو شوية حدي
: لج انتي اكبر ثولة دشوفي مثني شلون كاتل روحة عليج ويتمنى بس اشارة منج
: لا لجين انت متعرفين شي عن الحب ان شاء الله من توكعين بالحب راح تعرفين ليش اني هشكل اتنازل
واسامح
: اوووف لعد ابقي ابجي وانعي حظج
وصلنا للكلية وشفنا ريتا واكفة تنتظرنا كدام البوابة
الرئيسية
ريتا: هلو بنات صباح الخير
: هلو ريتا صباح النور
ريتا: هاي شنو عيونج مورمة ليش هشكل
لجين : حبيب القلب والروح ضاربها بوري وما مراضيها واليوم كمل الزعلة وشتلها وما اجة عليها
يوصلها للكلية والاخت اكلت راسي بالبجي

انتبهت على ريتا ابتسمت : اهووو يالله ولا يهمج
يا وردة ما تستاهل هاي العيون الحلوة تذرف الدموع
تعاي خلي اعزمكم اليوم عالريوك بالنادي
لجين : شعجب مو من عوايدج تصيرين كريمة
: احم احم حتى اراضي هيام خطية كسرت خاطري
سحبتني من ايدي
واخذتنا للنادي
واول ما دخلت شفت الكل لازم نفاخات ملونة وكلهم
صاحو بصوت واحد سنة حلوة ياجميل سنة حلوة ياجميل
وجان نبراس واكف بالنص ويبتسم
اتذكرت اليوم عيد ميلادي
كانت مفاجئة كلش حلوة بجيت من الفرحة
خطية نبراس مناسي عيد ميلادي
اقترب مني وجان لازم بيدة علبة صغيرة
نبراس بصوت هامس: كل عام وانتي حبيبتي

اتفضلي ولو هاي مو من مقامج
فتحت العلبة وكانت الهدية سوار كلش حلو
: اشكرك حبيبي اجمل هدية
: ان شاء الله السنة الجاية تصير ذهب بدل الشبه
: مو مهم اهم شي عندي انت اتذكرت عيد ميلادي
وكلفت نفسك وسويت هذا كلة علمودي
اقتربت مني ريتا وانطنتي علبة مغلفة بورق الهدايا
حضنتني : كل عام وانتي صديقتي
ههه تقلد نبراس
واجتي لجين وانطتني علبة جبيرة مغلفة بورق الهدايا
لجين : كل عام وانتي بالف الف خير يارب العمر كلة واشوفج اسعد وحدة بالعالم
اقتربت مني وهي تضحك على شكلي
: هاي شنو يعني انتي تعرفين بالمفاجئة وكاعدة تحركين بأعصابي حرام عليج يا شيخة اني اليوم اجيت انجلط
واقترب بلال وانطاني دبدوب كلش حلو وضحك علية
: كل عام وانتي بالف خير
: شكرا بلال
: لج سكتي امي متعجبة من تصرفي هذا تكلي شعجب اشو صاير محترم
وتعرف الواجب عمي والله خوش
ارتاحي انفضحت بين اهلي من وراج بعد محد يخاف مني
ريتا : اي مو حقها امك ملت من عندك ما تعرف تتعامل بحنية مع الجنس اللطيف كاضيها كلة شقاوة حقها تتعجب
نبراس: تعال ادخل دورة عندي واني اعلمك شلون تتعامل مع حواء
فاجئنا مثنى من اقترب من عدنا
وبيدة علبة صغيرة
: كل عام وانتي بالف خير هيام يارب التخرج واشوفج بأعلى المراتب
انتبهت على حركة نبراس يرفع ايدة ويرجع شعره للخلف اعرف هاي حركته
تدل عالتوتر والانزعاج
: اشكرك مثني ليش كلفت نفسك
: لا بالعكس اصلاً جنت انتظر عيد ميلادج بفارغ الصبر
نبراس : ليش
: شنو ليش حتى اعايدها حالي حالكم
سمعنا صوت نقال مثني رد عالمتصل
مثنى : الو هلة حجي
ابتعد عن مجموعتنا حتى يكمل اتصاله
لجين : بالله شو فتحي الهدية خلي نشوف
شنو هدية مثني
: لا ميحتاج افتحها مومهمة خلينا نروح نلحك
عالمحاضرة
نبراس: ليش خلينا نشوف لو تحبين لوحدج تفتحيها بجو خاص
رفعت عيني بعينه وخزرتة : لا ميحتاج تحجي هشكل
راح افتحها
فتحتها واتفاجئت كانت ساعة نوع رولكس ماركة كلش غالية
ذاك الاسبوع كانت لجين تحجي بيها وتكول وصيت بابا عليها وراح يجيبها الي
لجين بشهكة: يا بختج ياشيخة منو كدج رولكس مرة وحدة وهي تضحك
لكزتها ريتا بكوعها حتى تسكت لان نبراس صار طماطة من القهر رجعت الساعة بالعلاكة بأهمال
وفتحت علبة السوار واقتربت منة
: نبراس لبسني السوار
حسيت بي شوية جر نفس عميق مثل الي كان داخل
بصراع لبسها الي وكعدت اهز بيها بمعصمي
: عاش ذوقك كلش حلوة ربي يخليك الي وتجيبلي هدايا
ابتسم بخجل
رجع شعره للخلف: يالله اني رايح نلتقي بعد الدوام
: اوك
التفتت على البنات
شفت ريتا مسوية وضعية العزف على الكمان
ولجين لازمة كلينكس وتسوي روحها تمسح دموع وهمية
ريتا : تيرراررا تيرررا
لجين: يا اختي حسو بينا ترة احنا حدايق
ختية
ضحكت: سخيفات خجلتوني
ضربتها على كتفها ورحنا نبلش بالمحاضرات
بوقتها كدرو ينسوني ولو للحظات مرض ماما
خلص الدوام وطلعنا اني ونبراس
واجر تكسي
التفتت عليه : هاي شنو ليش تكسي
: اريد احتفل اني وياج بعيد ميلادج
لوحدنا
اخذني لشارع ابو نؤاس عالكورنيش
لزم ايدي : امشي اليوم اغديج بارقى مطعم
سحبت ايدي منة ووكفت بمكاني واباوع على المطعم شكلة كان كلش فاخر وشي اكيد اسعار الطعام نار
: لا نبراس لحظة ما ادخل
: ليش
: بربك هذا مطعم غالي مستحيل اخليك تصرف فلوسك وتعبك علمود غدة وهو كلة حشو بطن
نبراس: فديت الي تحرص على جيبي
بس هالمرة حتى نظل نتذكرها
خلينا نحتفل ونتخيل روحنا مثل اولاد الاكابر
ولو للحظات
: لا نبراس ترة هي السعادة مو بالمكان
سحبتة من ايدة ومشيت بي للكورنيش جان هناك بالنهاية اكو كشك يبيع لبلبي وصادف الوقت جان شتا
اشرت على ابو الكشك : اشتريلي لبيلبي
وصمون وتعال خلي نكعد هناك يم الكورنيش
: صدك تحجين
: اي صدك احجي لو عليك ادخل هذا المطعم اموت من القهر على الفلوس الي راح ابذرها عليه والله حتى حرام
عليك وخلي ببالك منا ورايح
مبقى شي عالتخرج مالتك اريدك تبدي تجمع لعرسنا
اتوقع انتظرتك هواي وصار وقت تفكر بية
كعدنا عالثيل بالارض وحط الصينية بيني وبينة
وصرنا ناكل سوية

اباوع على نهر دجلة جان المنظر كلش حلو

نبراس: اذكر يوم انا وخلي على دجلة تلاكينا
هيام : كعدنا هناك الشاطي يا محلا ليالينا
شيخلص الليل وضنوني على جيتك على باجر
: وانا صابر على جيتك على باجر الي سنتين انا صابر
كالولي يجي باجر
جر حسرة : اااااخ يابة
التفتت عليه : ليش هاي الحسرة
: هيام انتي ما تحبيني
اشرت على نفسي بتعجب: اني !!!
: اي انتي
: ليش تحجي هيج وانت تعرف بية احبك واموت عليك
: لا انتي انانية تفكرين بس بمستقبلج وما تفكرين بية
: بالله كول شلون استنتجت ما احبك
: يعني بذمتج تردين اجمع للعرس
واسويلج الاشياءالي تحبيها وتعجبج
مكلتي هذا المكرود شلون ومنين راح يجيب كل هاي المصاريف
: اي شي اكيد طبعاً من تتخرج راح تتعين
: هههه صدك ضحكتيني حلفي والله مرتين خليني اصدك
يعني شباب قبلي اتخرجو صارلهم قرن ما لاكين تعيين
اجي اني ابن منو حتى اتعين عالجاهز
: ليش تحجي هشكل عند الله مو بعيدة
كلشي بيد ربي
: تدرين عندي هواي احلام وامنيات اريد احققهن
: مثل شنو يعني عندك امنيات اكبر من زواجنا وننجمع سوية
اني بالنسبة الي هاي اغلى امنية على كلبي
: زواجنا جزء من الامنيات الي اريد احققهن
اتمنى اعيش مثل
الشباب اتمنى اتعين بمركز مرموق والناس تنادي
لي استاذ نبراس
واركب احدث سيارة والبس ارقى الملابس
واسافر كل يوم ببلد حالي حالهم
وانام عالمخدة مرتاح وما افكر الباجر شلون راح ادبر فلوس الملزمة والبنطرون والقميص
اتمنى اودي امي وابوي للحج
واخوتي ادخلهم احسن مدارس ونغير بيتنا
اااااخ امنيات هواي
اباوع عليه يحجي ويباوع عالنهر كدامه
نبراس كضة عمره ما راضي على عيشتهم
هو من نوع الشباب الطموحين وهذا النوع يرفض الاستسلام
: نبراس تدري بية اني احبك ومن محبتي واشتياقي الك
اكلك تجمع لزواجنا يعني شي اكيد نهاية علاقتنا زواج واحلامك تكدر تحققها واحنا متزوجين نتعاون اني وياك سوية ونبني حياتنا سوية حبة حبة
: لا بالعكس اذا نتزوج راح اركض عالعيشة والتهي
حتى اوفر لكمة العيش الج ولاطفالي وهذا الشي مستحيل اسمح بي يصير
اريد اطفالي من يجون عالدنيا يكون كلشي متوفرلهم وما اريد عليهم عازة
: حيييل يعني حضرت جانبك حاط فقرة زواجنا باخر خانة من امنياتك والله زعلتني
: شفتي شلون تزعلين من اكول انتي ما تحبيني وانانية
الي يحب لازم يصبر عالحبيب ويساعده حتى يحقق احلامه مو يكعد يضغط عليه
: بالعكس هذا يثبت مدى حٍٍِْــًبٌٍـــِٓېٍٓ الك يا استاذ
: الله اشكد حلوة كلمة استاذ بحلكج
اوووف شوكت يجي هذا اليوم الي اسمع بي هاي الكلمة
(((((()))))))
مرت الايام وانتهت الامتحانات وعطلنا
وبقيت اتواصل مع البنات بالوات
ونبراس اتخرج هاي السنة وسحب اوراقه وصار يقدم بجميع الدوائر والشركات عسى ولعل يحصل على تعيين ولازال يشتغل عامل بالكوفي بالليل
وبالنهار يشتغل محاسب عند علوة بالسوك
هو شاطر وشاغول
واني على نفس وضعي لكن شوية سمنت
ما اعرف ليش وماما صارحتنا اني وريام بموضوع مرضها وكالت راح يجرولها عملية استأصال الرحم
ولاحظت السمنة مالتي مو طبيعية واخذتني وياهة للدكتورة وكالت هاي خربطة هرمونات الهة يد بالسمنة المفرطة
وكتبت لي على علاج حتى استمر عليه وتنتظم الدورة الشهرية والهرمونات
وصادف بنت عمي سيرين اخت نبراس راح تتزوج
واليوم حنتها
واني وريام حضرنا نفسنا حتى نروح للحفلة
واتمنى اشوف نبراس لان صارلي كومة مشايفتة
اوووف
لبست فستان اسود بسيط قصير
وبي حزام ذهبي عريض عالخصر
وحذاء عالي ذهبي وشعري سرح فتحتة واصل لخصري وحطيت ميك اب خفيف
مرحنا صالون خطية بابا وماما ما ناقصين مصاريف
صحيح الفستان الف مرة لابستة وكلهم شايفيني
بي بالمناسبات بس هالمرة الشي الجديد
صاير كلش ضيق على جسمي حاضني حضن
سمعت صوت ريام وهي تصفر
: حيييل طالعة قمبلة بنت الاوادم صحيح جسمج تارس بس ما شاء الله زايدج جمال
: سكتي ياجميل والفستان راح يطك علية
وخايفة لا تصير مصبية ويطك السحاب وانفضح ومنين اجيب فستان
: اي هم صدك حقج كطعي النفس حتى ما يطك
ام هيام : يالله بنات ابوكم ينتظركم بالباب
عماتكم وزوجة عمكم اذا سئلوكم عني كللولهم ماما
تعبانة مالهة خلك ما اوصيكم مو تحجون
: لا ماما لتخافين سرج ببير ولو اني
اشوف ما بيها شي ان يعرفون
السبب بس ميخالف براحتج هذا شي خاص ييج
بستها وطلعنا واخذنا بابا ولبست
فوك ملابسي عباية كتف مفتوحة بس تتطبق
وطلعت
ابو هيام : بابا هيومة لو لابسة شال على راسج كان احسن تدرين بية ما احب اجبركم على شي
بس اخاف عليكم من العين
: صحيح كلامك بابا بس هياتة بيت عمو احمد هنا قريب مو بعيد
وبهاي الاثناء وصلنا لبيت عمو ودخلنا جوة وبابا سلم على عمو واولاده وطلع وكلي اتصلي علية من تريدون ترجعون
: اوك بابا
دخلت جوة وعيوني تدور على نبراس وينة
سلمت على عماتي والبنات والكل سئلني عن ماما وجاوبتهم مالهة خلك
جنت مارة من يم الدرج وسمعت صوت ناصي يهمس باسمي
رفعت راسي شفت نبراس يأشرلي بيدة ويكلي تعاي صعدي
باوعت منا منا بكلا الاتجاهات وماشفت احد كبل استغليتها فرصة وصعدت لعنده
سحبني من ايدي ووكعدنا عالدرج كان قريب على باب السطح جانو بيت عمو مسوين البيتونة مخزن للغراض الزايدة
نبراس بصوت لاهث: لج شطالعة بنت الاوادم تفاحة
خرب بالحظ منين ابدي بيج اكلج كلج وما راح اشبع قرب الهمسة
على ركبتي واني صار جسمي وكلبي كلة
يرجف اول مرة بحياتي اصير بهيج قرب من نبراس
وهو اول مرة يتصرف وياي بجراءة
شفتة قرب شفايفه على شفايفي
دفعتة من صدره وكمزت من مكاني
: اة اة هاي ششنو نبراس شتريد تسوي
: شبيج جبانة عادي ترة انتي باعتبار خطيبتي
عادي اذا ابوك من خدج بوسة وشوية ازور شفايفج اضوك طعمهن عالواهس
: لا بعدنا مامخطوبين وعيب مايصير ترة لتشوفني اني وياك اتصرف بتلقائية وماخذة راحتي وياك بس كلشي الة حدود ولهنا وحدك اذا انت كلش مستعجل ومتلهف علية ذاك هو بابا روح احجي وياه حتى يصير
كلشي بالاصول ومنخاف من شي
حسيت بي صار عصبي وسحبني من ايدي وقربني عليه فقدت التوازن وكعدت بحضنه صرت ادفع بي واهمس بصوت ناصي
: نبراس ابتعد ما اسمحلك
: لج بس شوية احجي وياج مراح اسوي شي
بس هو جان دايخ بغير عالم حبس ادية بين ايديه وراد يوصل لشفايفي حتى يبوسني بس اني درت وجهي واجتي البوسة على خدي
شهكت من حسيت بيدة الثانية صارت تتلمس بجسمي
دست على رجله بكعب حذائي العالي اطلق سراحي ولزم رجلة موجوع
: اخ ايا مخبلة هاي شسويتي
: انت مخبل ما ابقى يمك ولا لحظة وحدة
عدلت فستاني وايدية ترجف
: اهووووهاي شنو انتي كارثة عمي روحي ما اريد منج بوسة سويتيها علية ظلمة
بس هَـا خليها ببالج ترة كومة بنات كاتلات نفسهن علية
حتى انطيهم وجه وبشرط البوسة بالمجان
من سمعت كلامه صدك انقهرت
وعرفت يريد يستفزني حتى ارجع عن كلامي واطاوعه واخلي ياخذ راحتة وياي بتصرفاته الجريئة
: اعرف ليش انت تحجي هيج حتى اسلمك نفسي وتبطل تروح لغيري
بس غلطان مراح اسمح بهذا الشي اذا هنة يرخصن نفسهن حتى يوصلن الك
فاسفة اني مو مثلهن ما راح انزل نفسي وارخصها لحتى اضمن تكون الي وماتروح لغيري
سمعت صوته خلفي يطلب مني ابقى احجي وياه
تركتة ونزلت جنت كلش مقهورة من تصرفه وياي لان قلل احترامة وعاملني مثل بنات الهوى والليل حسيت بنفسي رخيصة
وهذا الشي مستحيل اخلي يوصله
انقهرت لان المفروض هو يكون حريص علية
بس ما اعرف ليش احس نبراس متغير هاي الفترة
اكو شي ديصير بحياته واني غافلة عنه صحيح اني هاي الفترة التهيت عنه بمرض امي بس لازلت على تواصل وياه شوكت ما تسمحلي الفرصة
ريام : شنو وين جنتي اشو فجاءة اختفيتي وعمة سولاف سئلت عليج
: جنت جوة هناك يم البنات
شفتها ما اقتنعت بجوابي
بعدها انشغلنا بالحفلة ولديجي والبنات وكانت نسرين كلش حلوة اتزوجت واحد من قرابة بابا وعمو من اهل الموصل
واهلة كلهم جايين وكلش حبابين ويعرفوني اني وريام يكولون من جنتو صغار جنتو كلة تجون عدنا
خلصت الحفلة واني ما طلعت من الصالة ابد كلة يم البنات شوية اجتي روان اخت نبراس بصف الاول ابتدائي وشاورتني كالت : نبراس يكول خلي تجي اريد احجي وياهة
جاوبتها كلتلها : كليلة متجي مشغولة
فتحت جنطتي وطلعت النقال حتى اتصل على بابا
جان صامت وشفت عشر مكالمات من نبراس ورسالتين جان يتوعدلي بيهم ومبين عليه صاير نار
بس رغم ذلك ما فرق عندي وما اهتزيت وبقيت مصرة على موقفي
اتصلت على بابا وكال : اني طالع بمشوار ساعتين واجي عليكم اخذكم
وفعلاً كانت الحفلة بعدها ممخلصة والبنات كلهم مشغولات بالركص والضحك
وعمتي كل ساعة تجي تكعد يمي وعينها علية
: ما شاء الله هيومة صايرة كيكة عين الحارة باردة عليج
ابتسمت : اي بس شنو الفايدة جاي اسمن ههه
: اي بس هم حلوة كليلي امج شبيها ما اجتي للحفلة

: والله عمة تكول راسي يوجعني
: مسكينة امج هواي تعبت وعانت بحياتها ابد ما ارتاحت عكدت حواجبي بتسائل
: شنو قصدج عمة شبيها حياة ماما ترة ماما وبابا حياتهم حلوة ومناقصهم شي
جان كل ضني ان عمتي تلمح على عدم انجاب امي
للمزيد من الاطفال لبابا وحظها كعد فقط على ثنين بنات
سولاف: لا مقصدي شي بس من شفتها وشافتني تعبانة
عكدت حواجبي بتسائل
:

واتأخر بابا يالله اجة ورمش علية
لبست عباتي وطلبت من روان شال وجابتلي واحد من امها
لبستة بأهمال على راسي وطلعنا اني وريام بباب الشارع حتى نركب بسيارة بابا
وبهاي الاثناء سمعنا ولد يحجي وية عمو احمد وصار بعدها صوت صياح
: الحك عمو احمد ابنك نبراس لزموه الاستخبارات

يتبع