رواية تائهة بين اروقة الماضي الفصل الرابع والعشرون 24 - بقلم الكاتبة نهى

تائهة بين اروقة الماضي
بقلم الكاتبة nuha-d-h

🌷🌷مساء الخير والطيب عليكم يا احبتي 🌷🌷🌷

ارتديت للخلف خايفة
معقولة الي سمعته يعني شنو
كلام رنا كان صحيح معقولة ضرغام تزوجني بضغط من بيبي خاجية

اي هي كالت اني اريد اطمن على بنات هناء قبل لا اتوفى معقولة ضغطت على ضرغام
وخلته يتعاطف ويانا ويوافق على كلامها
وطمعته بالعمارة وورثنا اني وريام وبعد الله الي يعلم شنو مكافاءات اذا وافق بالزواج مني
حسيت بروحي مجرد سلعة دفعولة ثمنها حتى يقبل ياخذها حسيت بمغص من القهر والاحباط وقلة الحيلة
لزمت معدتي صار عندي شعور بالغثيان
راح اتقيء ما اكدر اتحمل كمية الالم الي توغل لروحي عبالك مثل مرض خبيث
كعد ياكل جميع اجزائي
حسيت راح اوكع مريضة رحت صعدت اركض
اريد اتلاحك لنفسي
دخلت لغرفتي مثل العاصفة وبوجهي دخلت للحمام
صرت اتقيء
كعدت بضعف على ارضية الحمام ووجهي اصفر والعرق البارد يصب من كل جزء في جمسي ونفسي صار ثقيل
كوة اخذ النفس
ليش ليش يا ربي شمعنا ضرغام من دون الناس
يطعني بظهري
يعني هذا كله جان تمثيل
ما دام طلعت بيبي مشترية ضرغام الي حتى يتزوجني زواج مصلحة اذن باقي كلام رنا كله صحيح
ان ضرغام صدك يحبها
يعني معقولة هسة هو سبب تغييره لان يمكن رنا خبرته بسالفة الناس الي اجوها خطابة وهو ضايج من هذا الموضوع ان رنا راح تضيع من ايده
اي لان اني من صعدت هي لاكتني جانت نازلة من فوك شي اكيد جانت عنده واكيد لها يد بتغيير مزاج ضرغام
اي ماكو غير تفسير يوضح تبديل مزاجه اتجاهي
لا ياربي اخذ عمري ولا هالشي يصير

اريد اعرف ليش الدنيا تجمعني بأشخاص
يهتمون بمصالحهم ودائما اني اكون الطرف الخسران بالنهاية
نزلت الدموع على خدودي جانت كل دمعه تنزل جانت بيها حرارة كسرة گلبي
نهضت من مكاني فتحت الدوش ودخلت جواه
واني بكامل ملابسي
سندت راسي على سراميك الحمام البارد
اريد يمتص حرارة الجمر الي داخلي
اتمنى هذا يكون كلة حلم ما اريد اصدك ضرغام يأذيني
ربي ليش شمعنا اني يصير وياي كل هذا
ورة فترة ما اعرف شكد قضيتها جوة الدوش حسيت على الماي صار بارد
طلعت من تحت الدوش
نزعت ملاسي وشمرتهم بارضية الحمام بدون اهتمام
ولبست برنص الحمام
ما اهتميت بتنشيف شعري طلعت كوة امشي احس نفسي مكسورة
اتوجهت للسرير تمددت عليه واخذت وضعية الجنين وكأنما اريد ابحث عن الامان المفقود
الامان الي راح وانفقد وية وفاة بابا وماما
دموعي رجعت تنزل بدون ارادتي
احس بعد ماعندي سيطرة على حزني
عبالك الحزن قرر يصير وسادتي وياخذني لحضنه
ويتبناني لحتى اصير بنته
اي من ورة الي جاي اشوفة احس بروحي صرت
بنت الحزن

غفيت بدون ما احس على روحي واني شعري مبلول ومن دون غطا
ما ادري شكد وقت مر على نومتي بس وعيت على نفسي بردانه صايرة ثلج جريت اللحاف تغطيت سمعت صوت داخل الغرفة كانت ظلمة
وبس ضوة الحمام مشتغل سمعت حركة بالحمام
ضليت على وضعي ما اتحركت
عرفت هسة هو بالحمام
سمعتة طلع من الحمام ريحة الصابون سبق حضوره
غمضت عيوني ما اريد اراقبه ولا اريد اهتم مثل الغبية بأدق تفاصيله متولعة بي
سمعتة فتح الكنتور ورة لحظات حسيت عليه
كعد على السرير وتمدد بدون اي صوت منه
جنت حابسة الانفاس اترقب كل نفس يخرج منه
ما بدرت مني اي حركة وبقيت على هذا وضعي
لحد ما حسيت على انتظام انفاسه وكأنه غط بالنوم
بديت استدير عليه شفته منطيني ظهره ونايم عالطرف

باوعت لظهره هذا منو
هذا مو ضرغام الي اعرفه هذا شخص ثاني غريب علية
شنو سبب بروده المفاجيء وياي يعني معقولة
انتهت المصلحة وطلع وجه الحقيقي من اطمن ان كلشي صار له من شراكتنا وياه بالورث
وضاج من عرف رنا راح تروح من بين ايده
شاف ان بعد مالي دور باللعبة خلص حاجته مني وصرت حجر عثرة بطريقه
غمضت عيوني وحطيت ايدي على حلكي حتى اكتم
صرخة الالم الي كاعد احس بيها تطعن بداخلي مثل الخنجر المسموم
(((((((((((((()))))))))))))

صحيت يوم ثاني
على صوت ريام تكعد بية
ريام بخوف: هيومة شبيج
فتحت عيوني بتعب وجفوني ثقيلة واحس بحرارة بجسمي
: هَـا ريمةحبيبتي شبيج شكد الساعة هسة شكلي اخذتني النومة
ريام: الساعة ١٠ الصبح اليوم اتأخرتي بالنوم
وانتبهت لضرغام كعد وطلع للشغل بدون ما انتي تنزلين وياه انتظرتج تكعدين بس انتي ماكو ما نزلتي ظل بالي عليج فصعدت اطمن عليج
اشو ادك عالباب ما جاوبتيني خفت فتحت الباب ودخلت
اشوف شبيج
اشو لكيتج تهذين وانتي نايمة اقتربت منج ولمست راسج شفت حرارتج كولش مرتفعة
رحت صحت لخالة رحاب وهي اجتي وسوتلج
كمادات حتى تنزل حرارتج
باوعت لعيون ريام الخايفة
رفعت ايدها ورجعت تتلمس براسي
: هسة شلونج
هيام: ما ادري احس براسي ثقيل
ما اكدر اشيل جسمي من الفراش احس بي متكسر
جانت تحجي وياي وسمعنا صوت جرس الباب
وراها سمعنا صوت حليمة العالي المرحب برجعة
ضرار
باوعت على ريام شلون وجها انخطف وكأنما جانت
تترقب جيته وخايفة منة لان هي ارتكبت اكبر غلطة
بحقه وما تعرف شنو راح تكون ردة فعله اذا لاحظ برودها وياه
شفتها شلون اتهربت من مواجهة نظراتي
ادري بيها تحس بالذنب اتجاه ضرار
بس ما ينفع الصوت بعد ما فات الفوت
الي صار صار وما بيدنا شي نقدمه لحتى نحل هاي المشكلة غير نبقى ننتظر القدر شنو راح يقرر
وبوقتها راح يكون اتخاذ القرار
سحبت نفس عميق
اني واختي اثنينة كاعد نعاني لكن كل وحدة ماخذة
زاوية بعيدة عن الثانية لحتى تلعق الجراح بدون ما احد يحس علينا
ريام: اجيبلج فد شي تاكلينة حتى يسند گلبج
لازم تتريكين
هيام: اذا تكدرين سويلي كوب حليب
ريام: من عيوني لحظات وتلكين الحليب عندج
كامت طلعت من الغرفة وسدت الباب وراها
غمضت عيوني واني افكر بتصرف ضرغام الجاف وياي خايفة ضرغام يتركني ويروح لغيري
مثلما سوة نبراس وياي
لكن هاي المرة احتمال اموت وما اكدر اوكف على رجلي من جديد حياتي راح تتحطم ما اتحمل ضرغام يطلع من حياتي ما مستعدة لهيج صدمة
((((((((((((())))))))))))
عدت يومين
وبهاي اليومين اني جنت شبه غيبوبة لان مريضة والي زاد مرضي برود ضرغام
ما يهتم بية غير مرة وحدة حسيت عليه بالليل جان يمد ايده يتحسس حرارتي هاي العلامة الوحيدة الي
رفعت. عندي الامل بأن هو بعده يهتملي
لكن سرعان ما تلاشى هذا الامل
من اتدهورت صحتي بحيث استدعى الامر لازم دكتور يشرف على وضعي
انتبهت عليه ما موجود كان ضرار وخالو راضي وضاري همة الي انخبصو بية واخذوني للمستشفى الاهلية بيها استشارية وهناك اخذولي فحوصات
وشافو الضغط عندي هابط وفلاونزا بالعظام
انطوني ابر وادوية وبعدها رجعنا
وشفنا ضرغام بالبيت صحيح جنت تعبانة ومريضة
بس جان فكري كله عند ضرغام انتظره يسألهم شلونها شكال الطبيب
او شبيها من شنو تشتكي بس ماكو ما نطق
دخلتني ريمة للغرفة وانطتني علاجي واجتي خالة رحاب وزرقتني الابرة وطلعو من يمي غفيت
لكن فجاءة وعيت على ايد محاوطتني من خصري
حسيت بنبضاة كلبي نهضت من جديد
شكلة نايم وناسي نفسه
اتحركت زاد بحتضانه وقربني منه اكثر عبالك يخاف
ابتعد عنه
عجزت افسر طبعه حيرني امره
يارب لا تبعده عني

اليوم ثالث
احس بروحي اليوم صرت احسن من بعد ما اخذت الابرة والدواء
وبهذني اليومين ريام كابلتني وكعدت
ابد ما تركتني اما ميس وخالة رحاب وخالو راضي والكل اجوي بهاي اليومين صعدولي للغرفة يطمنون علية حتى خالة هيفاء اجتي علمودي من سمعت بية تعبانة الا حليمة ما كلفت نفسها غير مرة وحدة عبالك خطار وبيبي خاجية جانت ماتكدر تصعدلي فوك لغرفتي بس كل ساعة تدز ميس حتى تطمن علية
شفت نفسي شوية احسن فدخلت الحمام اغسلحتى ازيل اثار المرض عن جسمي
طلعت من الحمام واني احس بروحي تجدد نشاطي
لبست وعدلت نفسي وشسورت شعري

قررت اليوم اواجه ضرغام ما راح اسكت
هو زوجي ما راح ابقى ساكتة واشوف حياتي تتحطم كدام عيني واني ما اتحرك
لازم اليوم احجي وياه
نزلت جوة وجانت الحجية خاجية كاعدة
وخالو حسن جاي لعندها اليوم
حسن: يا هلا بهالطول يا ميت هلا
اكول البيت شبي اظلم هالايام اثاري هيومة مريضة
ابتسمت ورحت لعندهم وبستة من خده ورحت لبيبي خاجية بستها من راسها
الحجية خاجية: هَـا جدة بشرينا شلون صرتي اليوم
هيام: لا اليوم الحمد الله احسن
الحجية خاجية: يمة هاي عين الما صلت عالنبي حسدتج
تعاي كعدي خليني احصنج بالمعوذات وارقيج من عين الحاسد
دخل خالو راضي هو وضاري وراهم دخل ضرغام
بقيت كاعدة بمكاني يم بيبي بس كل ساعة اباوع عليه
واصيدة يباوع علية
كعدو يسولفون بينهم
ميس: يا مرحبا يا مرحبا واخير صحت الاميرة النائمة
ادري خوش شتلتيني شتلة
وعدتيني تاخذيني للمول حتى نشتري ملابس
اشو يوم ثاني صبحتي مريضة
هيام: شسوي حكمني المرض بس ولا يهمج بس اتفقي وية اي واحد يقبل يطلع ويانة ضاري .. ضرار او خالو راضي واخذج ونطلع نشتري ملابس
كمت من يمهم انتبهت على ريام كامت وراي دخلت عالمطبخ جوعانة اريد اسويلي عشا
فتحت الثلاجة واجتي وكفت يمي عرفتها عندها كلام تريد تحجي
شفت اكو ماعون كبة مكلية وطماطة وخيار زايد من العشا طلعتهم ووحطيت ماعون الكبة بالمايكرويف هو والخبز
وحميت الجاي التفتت عليها
هيام: يالله احجي شعندج ادري بيج عندج كلام تريدن تحجينا يلا سمعيني
جنت احجي وياها واحضر بالعشاء
كعدنا على ميز الطعام
وصرت اكل وهي تحجي
ريام: سويت مثلما كلتيلي وصارلي ٣ ايام ما اقترب من ضرار بس هو اليوم سألني
.........
ضرار: ريمة لحظة اريد احجي وياج
ريام بتهرب: اتفضل اسمعك
ضرار: ريمة شنو صاير شي
ريام: ماكو شي صاير ليش تسأل
ضرار: ما اعرف انتي كليلي اشو جاي احس بيج كاعدة تتهربين مني واحسج بعيدة عني هالمرة ليش دتسوين هيج بية شصايرلج
ريام: لا ماكو هيج شي بس تدري بية اني مشغولة بهيام
وبعدين ليش احس بكلامك نبرة اتهام وضايج لان مدتشوفني كبالك وكاني مسوية شي غلط اني ما مجبرة اكون وياك على طول
وما لك حق تحاسبني وتحجي وياية بنتر علمود اني مشغولة عنك ومداحجي وياك اني ما مملزمة بيك
عقد حواجبه: ريمة انتي بيج شي لان هاي مو انتي الي كاعدة تحجي وياي ولا هذا اسلوبج بالكلام اني مكلتلج شي بس سالتج من عشمي لا نترت بيج ولا اي شي من الي انتي كلتي شنو الي صار وغيرج علية فهميني من حقي اعرف شنو الي غيرج
غمضت عيوني مقهورة خطية ضرار ما يستاهل
اجرحه بس خلي اجرحه هسة احسن من ما يتأذه بعدين
بجرح عميق مامنه شفاء
ريام: كافي ضرار ترة اسلوبك يخنكني لا تكعد تستجوبني عبالك عندك جندي تحت امرتك وطالع عن القانون وكاعد تاخذ منه اقواله حتى تصدر الحكم بحقه ترة مليت يا اخي خنكتوني انت تريد من يرفه عنك
ويسليك وبيبي منا تتحكم بية وبحياتي
عتقوني لوجه الله
ضرار: لا انتي ابد مو طبيعية اليوم
ما راح احجي وياج شي ولا راح احاسبج او اعاتبج
خليج لوحدج ترتاحين وتصفين عقلج وشوفي شبيج وبعدين تعالي كليلي من شنو ضايجة
لان انا اعرفج كلش زين انتي بنت گلبي وصرت اعرف كل صغيرة وجبيرة تخصج
لذلك انا باجر راح ارجع التحق لحتى ما تشوفيني
يجوز بعدي عنج فترة يكون عندج بيها الوقت تراجعين نفسج وتفكيرج من جديد
يالله انا رايح ديري بالج على روحج ما اوصيج
...............
انتبهت على ريمة كامت تبجي
ريام: راح التحق يوم ثاني يعني رغم كل هذا هو ما متقبل ولايريد يقتنع اني ما اريده. هيام اني
احس اجرمت بحق ضرار دبريني شسوي
تركت العشا عالنص وشربت ماي ودفعت الصحن من كدامي واتكات على ميز الطعام وباوعت عليها
هيام: هسة الي فهمته من خلال كلامج ان كل هذا
الي سويتي ما اثر بضرار يعني هو بعده ما زعل منج
ولا ابتعد عنج
ريام: اي بعده متمسك بية
جانت تفرك بيدها بتوتر
غمضت عيوني
هيام: خلي الامور على ما هي عليه
وابقي بعيدة عنه واذا ضل متمسك بيج
خلاص مالها غير حل واحد
انتي تسافرين لعند عمو احمد منها تبتعدين عن ضرار ومنها تكملين كليتج اني هم معاجبني حرمانج من الكلية
ريام : المشكله اني مااكدر ابتعد عنج انتي الي باقيتلي من اهلي وعائلتي بس شوفي اذا نزل مجاز مرة ثانية واصر على موقفه وياي اني بوقتها اسافرلبغداد لعند عمو احمد
بالرغم راح يكون تنفيذ القرار صعب لان راح يبعدني عنج بس اني اروح لان ماعندي مشكله وية نبراس او غيره
قطع علينا حديثنا دخول ميس
ميس: هيومة ضرغام يريدج
هيام: وين يريدني
ميس: جان صاعد فوك كلي صيحيلي هيام
ما ادري ليش كلبي كام يدك حيل
صعدت فوك ودخلت للغرفة
جان كاعد عالقنفة ويكلب القنوات بالريمنوت
وعينة عالشاشة
ضرغام : هيام تلكين على ميز المرايا باكيت مال سيم كارت شريحة طلعي وحطي بنقالج منا ورايح هذا خطج الجديد والسيم كارت القديم تلفينة
وبس صديقاتج الهم الحق ياخذون رقمج الجديد
باوعت عليه باستغراب
هيام: ليش شبي السيم كارت مالتي حتى تبدله
ضرغام: ما بي شي بس انا عاجبني تبدلينه
عندج مانع لو عندج شخص يهمج امره وتخافين عليه ما راح يكدر يتواصل وياج لان ميعرف رقمج اذا بدلتي
هيام: مفتهمت قصدك
ضرغام : مو مهم تفتهمين المهم تنفذين الي اكول عليه
هيام: ضرغام انت منتبه لروحك شلون متغير وياي
شبيك فهمني ليش هشكل كاعد تتصرف وياي
اني شنو بدر مني وخلاك تبتعد وتنفر مني
وتتعامل وياية بقسوة صاير شي
ضرغام: ماكو شي يتخيلج بالنسبة الي اني نفسي ما تغيرت بس الظاهر انتي الي عندج شي بحياتج يخليج تعانين من الالم
اباوع عليه يالله شلون نظراتة قاسية هذا ليش هيج يحجي وياي عبالك عدوته
هيام: اني اكلك اني من شنو خايفة
بس خايفة اسألك وانصدم
ضرغام: احجي كولي اني ما عندي شي مخفي بحياتي واخاف احد يطلع عليه
هيام: لعد راح اسألك واريدك تجاوبني
بيبي خاجية سجلت عمارة بأسمك من تزوجتني
ضرغام: اي نعم
شنو الغاية من سؤالج هذا
اتسعت عيوني من الصدمة معقولة اكو هيج بشر بالعالم
منو انطاهم الحق يدوسن على كرامتنا ويذولنا
دنكت خلاص بعد ماكو كلام ينكال الامور صارت واضحة
حسيت بالدموع كامت تلالي بعيني بس مستحيل اخليه يشوف ضعفي
هيام: هذا هو افتهمت وعرفت كلشي
ضرغام : اوكفي لحظة شفتهمتي
هيام: عرفت انا شكد غبية من قررت اربط حياتي وية شخص مثلك
انتبهت عليه كام من مكانه مثل المجرم حسيت بي صار نار
ضرغام: ليش عندج شخص غيري تفكرين بي حتى
تربطين حياتج وياه
هيام: مو شرط عندي بس بعد الي عرفتة عنك لو رجع بية الزمن مستحيل اوافق عليك حتى لو جنت احبك لو اعرف ادوس
على گلبي بس اهم شي ما انطيك الحق حتى تدوسني وتركني على صفحة

باوعت عليه ومااعرف شلون طلعت الكلمة مني
: ضرغام طلكني
الظاهر انت بعد ما تحتاج لهيام لان كلشي تريده تحقق وبقت بس رنا وتكمل حياتك

اقترب مني بغضب وجرني عليه
: شوفي ولج ادري بيج على شنو صارلج ساعة تلفين وتدورين وكاعدة تدوريلج حجج على متغير وبيبي مسجلتلك عمارة هدية زواجنا وكلام ممترابط علمود توصلين لهاي النتيجه بس تحلمين يوم اخليج تطولين الي تردينه
والله وامانته اذا جبتي سيرة الطلاك على السانج مرة ثانية ادفنج سامعةةة
كمزت من صياحه دفعني وابتعد عني وطلع
وكفت بمكاني مرعوبة منه
ورة فترة دخلت علية
ميس: هَيومة حجيت وية بابا كال عادي حظرو نفسكم وانا اخذكم للمول
جاوبتها بصوت خاوي ما بي حياة بس لازم ابين كدامهم ماكو شي واتصرف طبيعي ما اريد احد يعرف بمشاكلنا اني صرغام
هيام: يالله اوك بس خلي خالو يتصل على ضرغام
وينطيه خبر اني راح اطلع وياكم بين ما اني ابدل
ميس: يالله راح اجهز روحي واكل لبابا
هيام: وريام تروح ويانا لو لا
ميس: لا ما راح تجي راح تبقى يم بيبي لان كلنا رح نطلع ومحد بالبيت
هيام: يالله لعد طلعي خليني اجهز نفسي
لبست ملابس مرتبة وشال راهم وياهن وحظرت جنطة بلون الملابس ورتبت وجهي ميك خفيف
ونزلت
لكيت ميس وخالو جاهزين
حليمة : مو تنسون ترحون على رنا تريد تطلع وياكم
للمول
ميس: ان شاء الله بس انتي اتصلي عليها كلليها احنا
رايحين الها خلي تجهز
...........
طلعنا للمول
بعدما مرينا على رنا واخذناها ويانا
التهينا نختارالملابس البناتية من بجايم واكسسوارات
على كم قطعة ملابس طلعة
اختاريت الها تنورة
ميس: يا اختي ما اگدر اتخيل نفسي البس تنورة اتعودت كله بناطير جينز ولوما الكلية تفرض علينا لبس التنورات جان تلكيني هم البس بنطرون
هيام: انتي وعدتيني راح توافقين عالتغيير
انتبهت عليها راحت اخذت بجامة بناتي بس تصير مرقطة عسكرية باوعت عليها
هيام: رجعيها بسرعة ما تاخذينها
برطمت : شبيج بس هذا
: لا ممنوع
رحنا عالاحذية اشوفها تروح كله عالاحذية السبورت
المريحة
هيام: لا هالمرة راح تلبسين احذية بناتية موديل
كعب
ميس: ما اعرف البسهم والله اخاف تنلوي رجلي
اوكع على وجهي وتعالي يا ميس
لمي ماي وجهج كدام الطلاب
ولا بعد تكمل اكثر اذا كدام استاذ ايمن الي ما يعول يلزم علية الزلة ويكعد ينصب علية
خالو راضي: استغفر الله وتكول ليش تحجون علية
وتعيبون اي هو غير بالاول انتي تتقبلين التغيير

الحلو بخالو عنده طولت بال ويانا وخطية حتى كام يختار ويانا للست ميس
اباوع لرنا شنو اختار تعلق وتعيب عليه
بس الحلو بميس ما تهتم لكلامها وتدخل لغرفة القياس تلبسه وتصيحني اشوفة عليها
طلعت رنا ويانا اشوفها عبالك متقصدة لحتى تخرب
علية ميس
يالله عاد هي بقت على هاي
اخذني التفكير لعند ضرغام
جنا نمشي بالمول
وملتهين
وفجاءة التقينا بضرغام هو وجماعته بالمول
كان يتمشى ويسولف ما منتبه علينا
رنا : هذا ضرغام وية اصدقائه شلة الانس اندارت علية تشرحلي
ميس: اي هذولي جماعته فراس ومصطفى وحازم
خرب شكد تكولين توائم اربعتهم مثل الاخوة يعني يجون لبيتنا ياكلون ويشربون ويانه حالهم حال اخواني وضرغام نفس الشي يروح يمهم ببيوتهم اخوهم ياكل ينام يمهم عادي اخواتهم يكعدون وية ضرغام
هذولة وياه من اول ابتدائي
باوعت على اصدقائه يشبهونه من ناحية الثكل والمشية وشكلهم الجدي
جانو يمشون ويحجون برزانة
انتبهت عليهم راحو دخلو بكوفي يصير بداخل المول
ما حسيت الا على رنا صاحته قبل لا يدخل هو جماعته للكوفي
رنا: ضرغااام
التفت على الصوت وجماعته وكفو راحت لعندهم وخالو وميس هم راحو وراها واني اتمشيت على كيف ووصلت لعندهم شفتها سلمت على جماعته وميس كذلك سلمت عليهم وخالو واني واكفه
بس انتبهت عليه وجهلي نظرة وباوع على ملابسي
جنت مستحية ومنتظرته يصيحني ويعرفني على اخوته الروحيين
بس شكل الاستاذ ما مفكر اصلا ولا اقترب مني
انتبهت على واحد من جماعته باوعلي ورجع يكمل كلامه وية خالو
اما الاستاذ كل ساعة يوجه نظره باتجاهي ويرجع يسولف وية خالو البنات واصدقائه
راضي: يالله بوية انتو اخذو راحتكم احنا راجعين للبيت
سلمو كلهم على خالو وراحو واحنا كملنا طريقنا نشتري شغلات

جنا نمشي
ميس: بابا عفية بس شوية هذا محل مال حافظات واطارات للنقالات اريد اشتري واحد لنقالي موديل حلو واريد سماعات كلش محتاجتهم
راضي: عفية طلبات الما تخلص
التفت علينا اني ورنا
: اوكفوو هنا انتظرو بس خلي ادخل وية هاي الخبلة اشوفها شتريد تشترتي
بقينا ننتظر اني ورنا وهمة راحو دخلو جوة بالمحل
اانتبهت على رنا ابتسمت واقتربت مني
رنا: انتبهتي على تصرف ضرغام
هيام: عن اي تصرف تقصدين
رنا: اقصد من سلمنا على اصدقائه شفتي شلون غلس عليج وما عرفهم عليج
هيام: اي وشنو يعني عادي ترة
جنت احجي واني ما مقتنعة بس المهم ما اريد انطيها مجال تتشمت
رنا: ما سألتي نفسج هو ليش سوة هيج وغلس عليج
هيام: ممكن تدخلين بالموضوع بدون لف ودوران
اذا عندج شي كولي لا تظلين مثل الحية تحومين
علية
رنا: اهاا اني اكلج ليش لان ضرغام يستعر منج
هيام: يستعار مني ليش عيني وهو متزوجني شكو
رنا: حبيبي مشكلتج غبية وادري بيج راح تكولين علية انتي تحجين هيج لان اكرهج واغار منج
بس صدكي ضرغام ما يحبج
وموقف اليوم اثبت هذا الشي
ما عرفج عليهم لان هذولي اصدقائه من ايام المدرسة الابتدائيه ويعرفون كلشي عنه وعن عائلته ويكعدون وية خواته عادي لان هو يكعد وية خواتهم هذولة اخوانه الروحيين متشوفين شلون اني اعرفهم وسلمت عليهم عادي وميس هم سلمت عادي مثلهم مثل ضرار او ضاري بالنسبة النا بس انت استحة يكوللهم. هاي زوجتي هي نفسها بنت خالتي هناء الشردت هسة عرفتي ليش هو يستعار منج
لان انتي تعتبرين نقطة سودة وعار بالمجتمع وما يتشرف بيج كدام اصدقائه وضحكت
رنا: ااووووف هذولي وين صارو اشو اتأخرو اي اتذكرت خلي اشتريلي اكسسوار للنقال مالتي
راحت وتركتني لوحدي واكفة مصدومة من كلامها
احس كلبي انعصر والدمعة وصلت بطرف عيني
على الاساس اني ناقصة تحطيم اعصاب واجتي رنا كملت على مشاكلي وية ضرغام
اي بس فعلا كلامها هو ليش ما عرفهم علية
افترت بية الدنيا واحس يوم عن يوم الضغوط صارت تزيد علية
جنت واكفة مرت مجموعة شباب من يمي بس اني مجنت منتبهة عليهم
واحد منهم كعد يغازلني
ما اهتميت بي ودرت وجهي عنه اني بيا حال
بالي ووتفكيري كلة يم كلام رنا السم
فجاءة سمعت صوته الخشن التفتت شفت الولد انسحب من ياخته
وصوت ضرغام: خير سالمين عينك وين
الولد انخبص: ااااا وانت منو يمك
ما انطاه مجال يكمل انطاه كلة على راسه
واجوي شباب فكوهم بسرعة واخذو الولد بعيد عن ضرغام الي جان يغلط ويسب
اتوجه علية بغضب
ما حسيت الا على ايدة لزمتني من زندي
ضرغام بصوت ناصي غاضب
: انتي شتسوين واكفة هنا لوحدج
باوعت عليه وكلبي مليان غيض منه
هيام : انتظر خالو وميس هسة بالمحل يشترون
شغلات للنقال
سمعته ظل يسب ويلعن ويدردم
واتصل على ابوه وكلة انا طالع وراح اخذ هيام والغراض وياي انتو كملو براحتكم
واحس بي يريد يكسر النقال براسي وكوة لازم نفسه
ضرغام: يالله تحركي كدامي امشي
جانت سيارتة مركونة بالبارك مالت المول
فتح صندوق السيارة وحط الغراض وسدة حيل بحيث كمزت من مكاني شكله راح يفلش السيارة
صعد بالسيارة وشغلها وطلع بينا
ضرغام: طلعة للمول بعد ماكو حتى لو وية ابوي نفسه
هيام: اكدر اعرف ليش
ضرغام: ما يعجبني اشوف مرتي طالعة للعرض وياهو اليجي يباوع عليها وانتي حضرتج تدرين بية كم مرة نبهت عليج تلبسين عباية اسلامية بس شكلج ضاربة كلامي بعرض الحايط
هيام: لعد ويامن اطلع اذا انت حضرتك ما تكلف نفسك وتطلعني
ضرغام : هيام سدي الموضوع وكافي رحمة على والديج راح تخبليني كل يوم طالعتلي بسالفة
احس بيج مو هيام عبالك وحدة ما اعرفها ولا احزر تصرفاتها ويوم عن يوم تصدميني
بسوالفج ولا عبالج انا ناسي طلبج للطلاق
وخلي ببالج ما دام انتي زوجتي فمعناها تكبرين وتعجزين وتموتين وانتي على ذمتي
فاهمة باوعت عليه هذا مجرم الحرب يحجي مو ضرغام
وصلنا للبيت وركن السيارة بدون ما يدخلها للكراج
ونزل ونزلت وراه ودخلنا للبيت
شمر مفاتيح السيارة على ضاري
ضرغام: نزل الغراض من صندوق السيارة ودخلها للكراج
وعافنا وصعد فوك جانت الدمعة بطرف عيني اريد ابجي اريد اصرخ اريد اعترض على معاملته وياي
اريد اطالب برجوع ضرغام حبيبي الي اتعودت على حنانه وطيبته هذا الشخص الجديد ما اريده
يخوفني بس اني لازم اتحرك لازم واحد بينا
يتنازل
عقدت النية وصعدت وراه
للغرفة
دخلت شفته مشغل التلفزيون ويباوع على لعبة كرة قدم
بين الاندية الاسبانية
رحت فتحت الكنتور واختاريت ملابس نوم كان لونهم اسود بي فتحات من الجوانب وقصير جان هذا الثوب المفضل عند ضرغام
قررت البسه
دخلت للحمام جهزت نفسي ولبست وتعطرت
وطلعت كدامه بطرك الثوب
انتبهت عليه رفع عيونه علية ضل صافن
لكن بقة كاعد بمكانه وما عبرني
صدك انقهرت لان جنت من البس هذا الثوب جان ما ينطيني مجال حتى امشي على رجلية جان كبل يشيلني
وياخذني للسرير
صرت اتحرك كدامه اريد الفت انتباهه
صرت اسمع بي كام ينافخ بضجر ويمسح العرق من وجهه اخير شي
كام طفة التلفزيون واتجه للسرير ونام
ضرغام: هيام
فز كلبي من مكانه واخيرا ضعف وراح يحجي وياي
هيام: نعم
ضرغام: طفي الضوة اريد انام باجر عندي كعدة من الصبح
اتمنيت اشيل المزهرية واحطها براسه من القهر والخذلان
طفيت الضوة
ورحت نمت عالسرير وصرت اتكلب ما اكدر انام
مقهورة منة اخذت الغطة كلة منه وهو ولا يمه
واخير شي انسطرت ونمت
....................
جنت نايمة وحسيت على ايدين تتلمس بجسمي
فتحت عيوني بنعاس شفت ضرغام حاضني
اقترب علية وصار يشمني من ركبتي ويتلمس
همست بأمل صدك مشتاقة لحضنه ولانفاسه
هيام: ضرغاااام اشتاقيتلك
كانت كلماتي الة مثل الي جان منتظر الاشارة لحتى يهجم
ما حسيت بروحي والا اني جواه
اخذني مثل العاصفة كان يعالمني بخشونة
احس بي يريد يأذني صارت لمساته بقوة تعصرني عبالك متعمد يترك اثر على جسمي
واني بالمقابل اتفاعلت وياه بكل غضب كانت هاي ردت فعلي اتجاهه من ورة
الخذلان الي جنت احس بيه
لكن انتبهت عليه مغمض عيونه وما سمعني الكلام الي اتعود يسمعني اياه مثل كل مرة
.........................
بعدين راسا كام من السرير عبالك كان عنده مهمة وانتهت انتبهت للساعة كانت
ب٦ الصبح
راح دخل للحمام بدون ما ينطق اي حرف غسل وبدل وطلع من الغرفة
حسسني وكأنما اني لعبة بين ايديه
اخذ وشبع حاجتة منها وراح
نزلت دموع الخذلان والالم على تصرفه وياي
وزاد قهري وغبضبي منه
((((((((((()))))))))))
كنت كالعادة اشتغل جوة وميس اليوم اوف
وخالة رحاب يم بيبي خاجية بالحديقة
وريام عند ميس بالغرفة تعلمها شلون تمشي بالكعب
واني بالمطبخ اساعد خالة حليمة
مر يومين على موقف ضرغام وياي وطبعا ثاني يوم كرر نفس الشغلة حسيت عليه واني نايمه دياخذني هذا شبي شديحس لا وفوكاها
صاير هَـا الايام ما يرجع للبيت من وكت
اصبحت حياتي اني وضرغام ما تنحزر
سمعت نقال حليمة دك جاوبت كان المتصل ضرغام
حليمة : اي يمة جيبهم هلة بيك عندنا خير من الله وزايد
التفتت علية ورفعت حاجبها
حليمة: شنو انتي وضرغام متعاركين
انقبض گلبي
هيام: لا خالة الله لا يكولها زعل شنو ان شاء الله اليكرهنا
حليمة: چا ليش متصل علية ويسألني شنو غدانا
وكال راح اجيب وياي ثنين ولد يتغدون عدنا
هيام ضربت على كصتي : اهووو نقالي ناسيتة فوك
هسة الكاه حارك النقال علية بالاتصالات
جذبت عليها ما اريد احد يتورج على مشاكلي اني وضرغام وخصوصاً حليمة
ادري بيها اول الشمات والفرحانين
وصل ضرغام عالغدة هو وجماعته
وحضرنالهم الاكل والتهينا بعدها بالجايات
جنت حيل زعلانة منه وهو هم ما كلف نفسه حتى يخليلي قيمة كدام اهله يتثرف ويايه كأني ماموجودة
اباوع على حليمة شلون تراقب حركاتنا اني وضرغام
انتبهت عليه دخل للمطبخ
وطلب من ميس تسويلهم جاي ما كلي الي
واني احس بالنار تسعر بكلبي
وحليمة ابتسمت ابتسامة عارفة
طلعو بعدين والتهيت وية البنات وصار الليل وقررت
اليوم ما راح انتظره مثل كل مرة هالمرة راح انام واعوفه

اجيت اصعد صاحتني بيبي خاجية
ورحت لعندها
الحجية خاجية: جدة شنو صاير بينج وبين رجلج
حالكم هالايام ما عاجبني شنو انتو متعاركين
دنكت : لا بيبي ماكو شي ممتعاركين
الحجية خاجية : عفية عليج بنيتي هي البنية الزينة
تثبت بنت اصول اذا صانت رجلها وما طلعت سر غرفتها ولا تحجي بمشاكلها
بس انا ربيت ضرغام من هو لحمة حمرة على ايدي
واعرفة من يضوج ويكون مقهور من شي يعفس الدنيا
احجيلي بلكي اكدر اضبه الج اذا جان مخشن خاطرج بشي
هيام: لا بيبي لا تشيلين همنا كلشي ما بينا بس هو تعبان هاي الايام من الشغل وماله خلك
باوعت علية بعدم اقتناع وسكتت ما علقت
الحجية: الله يهدي سركم انا شريد منكم غير اشوفكم متهنين وانتي يمة هم كبري عقلج وصبري عليه ترة الدنيا يوم الك ويوم عليك
هيام: ان شاء الله بيبي ربي يطولنا بعمرج
ويخليج النة
الحجية خاجية: بشريني بعدج تاخذين دواج
حتى اذا خلص وماكو شي وما فاد العلاج اخذج انا
للعلوية ام حسين تقرة عليج وتسويلج دعاء حرز
اخاف تطلع عندج تابعة
ظليت فاتحة حلكي ما افتهمت شي من حجيها
طبعا بيبي خاجية الله يحفظها ثلثين كلامها يحتاجله قاموس يترجم بعض المصطلحات لحتى افتهم عليها
ابتسمت
الحجية خاجية: خايبة العوبة عليمن تضحكين شنو مسولفتلج نكتة وكاعد تتبسمين كومي ولي كومي
من ضحكتي بلية ضروس (بلا اسنان ) كولي امين
كمت من يمها ميتة ضحك يعني خاجية صدك فلم
هي وحفيدها من نفس الطينة ثنينهم بسرعة يكلبون عالواحد ويطنكرون
رحت صعدت فوك
دخلت لغرفتي بدلت ملابسي ولبست
دشداشة نوم قصيرة
اتمددت عالسرير ميتة من النعاس
احس بروحي هاي الايام مكسرة من اثر الفلاونزا الي صابتني بعدها اثارها مبينة بية
اخذتني النومة
ورة فترة ما اعرف شكد مضى من الوقت
حسيت على ايد تتلمس سيقاني فزيت من مكاني
وكوة افتح عيوني من النوم
هيام: ضرغام شكاعد تسوي
اقترب مني وبصوت خشن
ضرغام: ما جاي اسوي شي
بس شفتج نايمة ومقدمتلي عرض مغري كلت حرامات يروح كل هذا تعبج واللبس على خالي بلاش خلي استفاد منه

جان يحجي وياي وعيونة اكلتني اكل
اي طبعا يقتربلي لان صارله يومين ما اتقربلي شي اكيد
يريد ياخذ حقوقه مني
شافني ساكتة وصافنة بوجهة دفعني على كيف على ظهري واقترب مني وانفاسه الحارة لفحت خدي
قرب شفايفه علية وبصوت هامس
ضرغام: هيام اريدج كلج
احس بي ديعاني من شي من يقترب مني ليش هو مصعب الامور علية وعليه
اقترب راد يبوسني دفعتة من صدره
هيام: لا ضرغام اني ما اريدك تقتربلي
اني مو لعبة عندك تشبع نفسك وتاخذ حاجتك منها شوكت ما يعجبك اني انسانة من دم ولحم وعندي احاسيس لا تحطمني وتعاملني هشكل تصرفاتك وياي
تموتني
ضرغام: انتي زوجتي وانا شوكت ما بعجبني اقتربلج
ليش تمانعين اكو شي يخليج تصديني
رجع يفرض نفسه علية من جديد
جمدت جواه وما بدر مني اي استجابة
حس على ردة فعلي
هيام: تكدر تاخذ التريده مني بس ما راح تكدر تاخذ مني اي استجابة
كام من يمي وهو قطعة تلهب من الغضب
ضرغام: شوفي ولج لا انتي ولا عشرة مثلج تذلني
شنو عبالج من تمانعين تذليني بنومتج
عليج وتغرب ترة اكدر اخذ الي اريده من مية وحدة لا عبالج كاتل روحي عليج
شفتة راح عالكنور وطلع له ملابس وركعة حيل ومشة وراها سمعت شي اتكسر بالحمام
كمزت من مكاني وصرت ارجف جان حيل عصبي
احس بروحي كلش اتماديت هالمرة وياه واستفزيتة
ووعيت مجرم الحرب الي بداخله بس ماهمني لازم يعرف مثل ماعنده حقوق عنده واجبات
طلع من الحمام يسب يلعن ويدردم بينة وبين نفسه
بدل وطلع
احس عبالك جان اعصار بالغرفة
مو رجال حشة
كمت من مكاني اريد اشوف شنو كسر بالحمام
فتحت الباب شفت مراية المغسلة مكسورة واكو نقاط دم كالمغسلة والسيراميك
انخمط كلبي عليه هذا بس لا مأذي روحه
ضرغام راح يخبلني
يريد يتعامل وياي بقسوة ويريد يصدني ويزاعلني
وبعدين اذا اني عاملته بالمثل يعصب ويغضب
صدك حيرني
.................
ورة يوم من بعد الموقف
صار ضرغام ما يتحاجة اخاف ذيج الفترة كنت اكدر احجي وياه
بس هسة صار ما ينطاق ومسوي البيت كلة جحيم وما بقى واحد بالبيت ما اتعارك وياه حتى الحجية خاجية اتعارك وياها
وكلها تصيح هذا شبي مخبل مو عاقل
ضاري: جدة ما عليج منة لا تضوجين الزلمة هاي الايام طابكة فيوزاته حتى بالسوك كل ساعة مرزله عامل
او متعارك وية تجار عفية خاجية اتحملي مو ترحين زعلانة عند بيت اهلج ترة احنا ما عدنا بنات يرحن لبيت اهلهن زعلانات كعدي ببيتج وسكتي
ها شفتي مو كتلج ابقي على ضاري الحباب ماكو انتي عندتي وحبيتي ضرغام شفتي ما اجاج منة غير وجع الراس
الحجية خاجية: خايب يالاغبر دحجي عدل لا اكوم اكسرك بالعصا
اخوك ما اعرف شبي انت كاعد تتمضحك عليه
ولك خايب تعال كلي اخوك شجاه وشغيره صاير جنة ثور هايج بس بنطح ويدرعم
ضار وهو يضحك : وانا شمدريني والله جدة ما اعرف شبي صارله مدة ما يتحاجة
باوع علية وحجة وياي
: عمي هاي اذني الج اذا بعد كلت اخوي خوش اخو
غمضت عيوني وسكتت
بس دقني كلام حليمة
حليمة: شوف الله اليعلم منو منغص حياته سودة علية ضرغام
الحجية خاجية: باجر عكبة يصير عنده جهال ويعقل
ويبطل طناكير
جانت تباوع علية وتحجي وكأنما تصبرني
حليمة: منين ياحصرة اشو زوجناه وماكو لاخلفة ولا هو متهني ومرتاح بزواجه
باوعت عليه
هيام: خالة ليش تحجين هشكل هو مشتكيلج علية حتى انتي كاعدة تحجين وتقررين هو ما متهني بزواجه
حليمة: موشرط يجي يحجيلي انا امه واعرف ابني
كلش زين من يكون ضايج من شي
كمت وعفتها لوحدها وصعد فوك لقبري
اي صرت اسمي غرفتي القبر لان اول ما ادخل احس بالحيطان عبالك تريد تكبس علية وتخنكني
صرت حتى اكره الغرفة وحتى ما تحمل اشم عطرها تلعب نفسي منها
كلة من وراك ضرغام احس كلشي طلع من عيني
نمت وكعدت يوم ثاني الصبح
ماكو ضرغام طالع
نزلت واني كارهة نفسي
صرت اتحرك واشتغل بالبيت بدون واهس
صار وقت الغدا وشفتهم كلهم كعدو عالغدة لعد ضرغام وين سألت ضاري
هيام: ضاري شنو ضرغام اليوم ما راح يجي عالغدا
عقد حواجبه مستغرب
ضاري: شنو شبيج هيام ضرغام اليوم سافر الصبح لدبي
ضليت مصنمة بدون اي حركة متفاجئة من طلعت ضرغام شنو يعني سافر بدون ما يكلي
حليمة: يا صلوات عالنبي كرة عيني اكو مرية ما تعرف برجلها مسافر
والله عرفت انتي مسودة حياة ابني ومتعاركين وهو هسة هج من البيت وسافر من وراج
الله لا يرضى عليج خبلتي الولد
راضي: حليمةةةة سدي حلكج اشو انتي ما تحشمين احد صايرة تتجاوزين بالحجي ولا عبالك انا موجود
وكادرة عالبنية وصايرة خوش مرية براسها ما دامج انتي هشكل
جا ما تكولين لروحج هذا الحجي وتكعدين تجنين رجلج وتصلحين حالج
كامت من الاكل
حليمة: ترة ما كفرنا انا جاي احجي الصدك
ابني هج من ورة هاي الفاهية ولاتكعد تدافع عنها وتكلب الحجي علية
عالاقل انا اعرف بيك وين تروح وشوكت ترجع
بربك اكو مرية ما تدري برجلها مسافر لعد هاي شكد
هاملة ابني والله اليعلم شنو بعد مسويتلة وخلاه يعوف البيت ويسافر

طلعت من المطبخ وهي نار من الغضب
حسيت بالذنب وصرت اراجع بنفسي
منو الغلطان بينا
بس ما دام اني بهذا البيت شي اكيد اطلع اني الغلطانة
..............
مر اسبوع وضرغام ما رجع
من السفر ولا حاول يتصل علية واني هم بالعناد رفضت اتنازله اسمعة شلون يتصل على خالو وخالة حليمة
ويسلم عليهم وابد ما يسألهم عني
احس اتمرضت على بعاده وكمت انام يم ميس بغرفتها
ما احب ادخل غرفتي وهو مو بيها
هاي اول مرة يبتعد بيها عني
صحيح احنا متزاعلين بس جنت انام عالمخدة مرتاحة لان جنت اغفى على صوت انفاسه
لكن هسة هو ماكو وفراشه بارد
ما كدرت ابقى لحظة وحد بالغرفة
كبل نزلت فراشي ونمت يم ميس
....................
جنت كالعادة
بالمطبخ لان حليمة قسمت الشغل بالبيت
وكالت اني وياهة علينا المطبخ وميس وريام عليهن البيت
جنت كاعدة امسح المطبخ وهي تطبخ وتحجي بالنقال
وست رنا الي ما اعرف الله ذبها علية انتقام
لازكة هنا ببيتنا اربعة وعشرين ساعة
ادري هاي ما عندها اهل يسألون عنها ويكلولها. شعندج رايحة كل يوم لببيت عمتج
والله صرت انذر وادعي كل يوم كون الله وتتزوج واخلص منها
كملت مسح الكاع و غسلت ايدية
ورحت للبراد اريد اشرب ماي

سمعت نقال رنا دك انتبهت عليها ارتبكت
وجاوبت المتصل بصوت ناصي بس كدرت اسمعها
رنا: هاا هلو ضرغام
ااااااا اقصد هلو باباتي شلونك
ها اي لحظة انتظرني بس اكوم اطلع من المطبخ واحجي وياك بالكراج لان هنا الكاع محضورة
يمي ما اكدر احجي
شركت بالماي وصرت اكح
ووكع الكلاص من ايدي
لان ايدي كامت ترجف

لا لا مستحيل ضرغام

يتبع