رواية تائهة بين اروقة الماضي الفصل الثالث والخمسون 53 - بقلم الكاتبة نهى

#تائهة_بين_اروقة_الماضي
#بقلم_الكاتبة_nuh-d-h
صباح الخير عليكم حبيباتي
شلونكم وشلون النت وياكم
🍀🍀🍀🍀🍀🍀🍀🍀😊اختكم نهى كاعدة بالمريخ والنت معرس ما يقبل يتفعل
يالله اتركم تقرون البارت مع اجمل تحية مني الكم
🌹🌹🌹
هيام
خلصنا الغدة وعلاوي تلف ملابسه رحت نزلتله ملابس من فوك
جان الكل موجودين ما عدا ضرغام ماكو ما اجة عالغدة
كعدت اغير ملابس علاوي يم بيبي وخالو راضي
دخلت خالة رحاب شايلة صينية الجاي
ضرار.. شنو هاي عمة شطالعة جنج العيد
الله عليج جدة هسة اذا اطلع وياها من يكول هاي عمتي
هسة عبالهم اختي الصغيرة
رحاب بأرتباك .. عيب ولك ضرار شنو هذا الحجي
خطية اباوع عليها صارت طماطة
هيام.. خالتو والله لايك عليج اللون الوردي ياكل ويشرب عليج
رحاب .. اي هاي جنت اعزل بكتنوري وجاي اطلع الملابس الي ما احتاجهم حتى انطيهم للناس محتاجين وصارت بوجهي هاي الكلابية عندي قديمة وكلت اجربها واشوف بعدها تكفيني لو صغرت علمود اذا متكفي انطيها اشو طلعت تكفي
هيام.. الصراحة تجنن عليج وحتى اللون فدشي
ميس.. اي عمتو صدك طالعة كيووووت بهاي الكلابية
ضرار.. هي عمتي من يومها كيكة
الحجية خاجية.. خايب ضرير شمالك درت على عمتك شنو ما كافي عليك مريتك درت على عمتك تغازلها بهذا السانك الحيال
ضرار.. هو لو صدك الساني حيال جان كدرت عليج
ووكعتج بحبي بس الساني مابي خير لان ما كدر يوكعج
بهواه
الحجية خاجية.. ولي ملعون انتو كل واحد بيكم الة معزة بگلبي خاصة
ضرار.. الله يطول بعمرج ويخليج خيمة علينا
كملت تبديل علاوي وانتبهت لضاري كاعد ساكت
محجة شي مو من عوايده
ميس.. عمتو امانة بعد لترجعين تلبسين الالوان الغامقة
والله غير اتغير شكلج بهذا اللون حرامات بعدج صغيرة
صحيح انتي ذواقة بأختيار موديلات الملابس بس عيبج شي واحد هي الالوان الي تختاريهم غامقة
لازم تسوين حملة على كنتورج وتغيرين الالوان
رحاب.. لا متسوى اغيرهم ما بقى شي على محرم
وراح نلبس الاسود يعني مو هسة اغير ملابسي خليها
على فرحة الزهرة اشتريلي ملابس جديدة بالوان حلوة
جانت تحجي وتصب جاي وماترفع عيونها
مبين عليها الخجل

راضي.. اي صدك يمة اتذكرت على طاري محرم
قررنا انا وكم واحد من التجار من اهل السوك هاي السنة ما راح نذبح ونطبخ بعشرة عاشور
الحجية خاجية.. يايمة ليش تحجي هيج واحنا اتعودنا كل سنة نحيي ذكرى الامام بيوم عشرةعاشور ونحج للصبح ونطبخ
راضي.. يمة قررنا نجمع مصاريف الذبح والطبخ
ونوزعها على عوائل الشهداء الفقرة هيج احسن
وموبس هيج انا وضرغام ساهمنا بالتبرع لدعم الحشد الشعبي لان شبابنا كلها التحقت بالحشد ويكولون هناك
كوة توصلهم المؤونة والمساعدات
ضاري.. بوية صدك سمعت ضرغام متطوع علمود يوصل المؤونة هناك للحشد ؟؟
راضي .. اي صحيح اتطوع وما نعرف شوكت يوصل سراه حتى يروح يوصل سيارة المساعدات
الحجية خاجية.. والنعم منكم يمة بس ضرغام
شلون يروح لوحده بسيارة حمل اخاف يصير عليه شي

.. لا مو سيارة وحدة لا هنة مجموعة سيارات حمل تطلع وية الرتل حتى يوصلون المساعدات للجيش
ضرار.. اي والله زين تسوون تدري بوية قبل لا يصير
الانفجار من جنت اداوم بالمقر هناك جنا انا والجنود تجينا ايام حصرة علينة التمرة
مرات نتحاصر وما توصلنا اي مساعدات ولا اكل
بحيث نموت من الجوع والبرد ومن توصلنا المساعدات
والمؤونة ماتدري شلون نفرح بيهن وتفيدنا
رحاب .. اي حتى انا وصاحباتي هم كل فترة نجمع مساعدات وتبرعات ونوزعها عالمحتاجين الفقرة
اكو هواي ناس فقرة بس متعففين يستحون يمدون ايدهم ويكولون محتاجين
كل فترة نروح نقدملهم المساعدات
انا وصاحباتي ام احمد و ام شهد وكم وحدة من البنات
الحجية خاجية.. ام احمد اعرفها عندها حسينية
بس ام شهد منو
.. تعرفيها يمة هاي المعلمة الحبابة الي دائماً تجي بالقراية مالتنة هي وام احمد
.. هاا اتذكرتها اي والنعم من عندها هاي بنت الحجية ام صباح الله يرحمها
.. خطية دائماً اشوفها تاخذ المساعدات بسيارة زوجها
ويرحون يوصلونها للعوائل الفقرة حتى مرات تصير اماكن سكنهم كلش بعيدة عن مركز المدينة اباوعلها ابد ما تتعاجز من خدمة الناس المحتاجة
ومرات تجي مرية محتاجة فلوس عملية او مرات يسمعن بشاب فقير على وجه زواج اشوفها تروح تجمع التبرعات
وذاك اليوم سألتها كلتلها ام شهد انتي شلون تجمعين تبرعات
كالت انا من اريد اجمع فلوس التبرعات اول ما ابدي
بأهلي واخواني واقاربنا
لان اهلي دائماً يخمسون وهشكل
اباوع عليها التفتت على خالو راضي وكملت كلامها
.. فانا كلت اسألك اذا تكدر تساهم بالتبرع
راضي.. هذا هو سجلي اسمي وياكم مو بس انا هم راح احجي وية جماعتنا هناك واشوف منو بيهم يساهم
وانتي ذكريني كل شهر انطيج مبلغ
مثل الراتب وانتي وصاحباتج من يمكم توزعونه
الحجية خاجية.. اي يمة راضي بس خلي ببالك انا ما ابطل احياء ذكرى استشهاد الامام وهاي السنة مثل كل سنة نذبح ونطبخ ووانت شوفها شكد تكلف وانطي بكدهم فلوس مساعدة للفقرة اشو الله شايل حمالتنا ورازقنا عليمن نحرص
ميس.. اي عفية بيبي والله احنا متعلمين كل سنة نحج للصبح ونطبخ وكلنا نتجمع عماتي وعمامي واولادهم وحتى الجوارين يجوون ويانا عفية لاتخلين بابا
يطفي شمعتنا ويحرمنا منها
راضي.. هذا هو يمة التردينه يجرالج
الحجية خاجية.. اي يمة الله يبارك بيكم ويطرح البركة
بوجوهكم
التفتت على ميس
.. ميسة كومي كلي لأمج خلي تسويلنا كهوة عربية من ايدها بس هي تضبطها
ميس.. صار جدة تدللين
جانو يحجون ومندمجين
وانا كوة لازمة علاوي لا يروح يم قوري الجاي
دك نقال خالو راضي
باوع عالمتصل كام من يمنا وراح للاستقبال
الحجية خاجية.. ها يمة ضاري وانت وين صافن
ضاري.. هَـا جدة ما صافن بس تعبان وراسي يوجعني
الحجية خاجية.. ولك خاف صافن جنك متندم على قرارك بالطلاك جدة اذا تريد ارجعلك مريتك لحضنك كول لا تستحي
ضاري.. لا جدة انا ما متندم وبعدني مصر على قراري
رفاه راح اطلكها ومحد الة دخل بالموضوع
الحجية خاجية.. جدة لا تستعجل وتحجي هيج ترة عيونك تحجي عكس ما تكول انا جدتك واعرفك زين جاي تكابر
.. لاجدة النفس طابت منها والله ما كاتبلنا نستمر
سوية بحياتنا
جنا نحجي وسمعنا صوت خالو راضي يحجي بصوت عالي معصب سكتنا كلنا مستغربين شوية
وطلع خالو من الاستقال ووجهه مدخن من الغضب
ظلينا واحد يباوع بوجه الثاني نتسائل شنو الصاير
الحجية خاجية.. هَـا يمة راضي خير ان شاء الله شبي
وجهك مكلوب
راضي.. حجية ماكو شي هيج شغلة
قطع كلامنا صوت الجرس
كعد عالقنفة يكلب بسبحته بعصبية
مبين اكو شي صاير بس يرفض يكوله
دخل علينا ضرغام وسلم وراح دنك باس راس بيبي ورجع يدور بعيونه على خالو شافه وظل واكف يباوع عليه
راح اقترب من خالو وطلع ورقة بيضة من جيبه
وانطاهة لخالو
.. هاك بوية اتفضل هاي الورقة من الجماعة كالو احنا وقعنا بقى بس انت توقع عليها
جان يحجي بالالغاز بس فجاءة نهض خالو راضي من مكانه بغضب وصاح بضرغام
.. انت شلون تتجرء وتسوي هيج منو انت حتى تقرر عني انا جم مرة كايلك جوز مني ولا تتدخل بحياتي
.. مو بيدي بوية غصب عني من اشوفك واكع بشدة ما اكدر اكعد ساكت واتفرج عليهم شلون ياكلونك
.. ولك ضرغام لاتخبلني هو منو الياكلني قابل انا جاهل
ويضحكون علية
الحجية خاجية .. جدة ضرغام شنو شصاير فهمنا ابوك شبي
ضرغام ماكو شي جدة هيج شغلة بيني وبينه
راضي.. لا احجي كول ترة انا ما خايف ولابايك انا ماشي كلة بالصحيح
التفت على بيبي وكمل .. حجية ضرغام اليوم
رايح على مرتي ومطلعها من البيت بالتهديد
وجبرها توقع على ورقة طلاك وهسة جايني يريدني انا هم اوقع عالورقة واطلك
ضرغام.. لا حجي مو هيج الحجي خاف انت فاهم غلط وكبريائك المجروح يمنعك تحجي كلشي
جدة ترة الموضوع وما فيه انا رحت لأخوها وحجيت واتفقت وياه لان هو الي زوجها لابوي متعود يزوج خواته بالسر وابوي مو اول رجال
حجيت وية الولد واقترحت عليه وعلى اخته مبلغ من المال حتى يوافقون عالطلاك
اتصوري بس ذكرت الرقم البنية بنفسها وافقت وكالت هذا هو اني موافقة يطلكني
كلتلهم .. هسة انطيكم نص المبلغ علمود تلمين غراضج وتطلعين من حياة ابوي والنص الثاني انطيج اياه
من يطلكج يعني خلصتك منها ومن جشعها
راضي.. انا ما شاكيلك وفلوسي وانا حر بيهن
مادام ما مسوي الحرام ولا مخليكم بعازة لا انتو ولا امكم مخليكم محتاجين كلشي تردونه يجرالكم خلاص بعد هاي بقت يمي اتزوج اصرف فلوسي مالك حق تتجرء وتعلمني شنو اسوي بحلالي
ضرغام.. لا بوية اعذرني هاي مو حياتك لوحدك
هاي حياتنا كلنا انت ماعايش لوحدك والي يمسك يمسنا
صعبة علية اشوفك تخلي وحدة ما تسوى فلسين
تساويهة وية امي الي تعبت وصبرت عليك
راضي.. ضرغام خليني ساكت وخلي الي بالكلب مستور امك حافظ كرامتها لحد اخر لحظة ولهذا يومك
انا صابر اتحمل اللوم وما احجي والكل يصوجني
وما افتح حلكي بكلمة انتو كبرتوا وعشتو وما يوم حسستكم بالتقصير لا انتو ولا امكم رغم تقصيرها
ظليت حافظ ماي وجهة وبقت هي الامرة الناهية بهذا البيت وحتى من اتزوج اروح اتزوج بعيد عنها وما احسسها رغم هذا من حقي وانا ما مسوي الحرام
فلا تجي انت وتكعد تعلمني شنو اسوي
ضرغام .. بوية انا سويت الي يشير عليه العقل
وكلت خلي اتلاحك اخلصك منها لا تصير الاكبر منها
اليوم سحبت فلوس من البنك بأسمك بدون علمك
الباجر الله اليعلم شتسوي
فانا ما اريد اكعد اتفرج شلون ينهجم بيتنا كدام عيوني وما اسوي شي ولا تنسى انت بديت زواجك عن طريق الفلوس وهي وافقت بيك علمود فلوسك وانا راح انهي
كلشي بالفلوس

راضي.. ومنو كلك هي وافقت تتزوجني علمود فلوسي
ضرغام.. بوية خلينا لا نضحك على نفسنا يعني شنو يخلي وحدة مثلها بنية صغيرة بالعمر تتزوج رجال بكد ابوها غير الفلوس لاتكول بنية تريد تدور الستر
ترة انا خليت حمزة يسأل عليهم وعرفت ان هاي العائلة خبزتهم ورزقهم كلة معتمد على بناتهم يزوجونهم متعة
ويكعدون رجالهم يصرفون عليهن وعلى اهلهن
الا انت الوحيد الي اجيت واتزوجتها زواج قانوني وشرعي بس بالسر بعيد عن امي حتى ما تعرف
وهذا الشي الي خوفني شفتهم شلون جانو مجلبين بيك بأيديهم وسنونهم حتى ما كمنا نشوفك
وانصدمت من عرفت بيك ساحب فلوس من البنج
ومن اجيت سألتك بالاول انصدمت وبعدين سويت نفسك تعرف بالموضوع ومشيت السالفة على عماها
مع الاسف انت استهانيت بية وعبالك السالفة عبرت علية وانا من عهدها ما كعدت ولا هدالي بال الا لحد ما عرفت منو ورة سالفة سحب الفلوس والمبلغ
فحجي خليني ساكت وما اريد اكشف الاوراق البقية
لان ما تعجبك
اباوع على ضرغام وخالو راضي جانو واحد واكف كبال الثاني ويباوعون على بعضهم بغضب
ياربي والله كلبي وجعني عليهم
راضي.. ضرغام مو عبالك انت كبرت وتكعد تتجاوز حدودك وياي ترة انا ابوك واكسر راسك فاهم
ضرغام .. النعم منك يا ابو ضرغام كلشي مقبول منك
بس اهم شي سويت الي يمليه علية ضميري
وسويت الي وعدتك بي كلتلك ما راح اسكت
ما حسينا الا على خالو راضي ضرب ضرغام راشدي كدام الكل سمعت شهكة خالة حليمة
اول مرة يصير هيج شي ضرغام وخالو راضي
يتعاركون
ضرغام بغضب .. ماشي يابوضرغام ما دام هيج صار الحجي انا من تالي عمري انهان خلاص راح اطلع من البيت وتحلم تشوف وجهي
((أ على الخدي هوت يمينك يا ابي
ام جلدت القلب بسياط النار واللهب
أتلك يمينك ذاتها من شاركتني طفلا لعبي
واحتضنت يميني لتريني الدرب صبي
أهنت عليك فبعتني من اجل حمالة الحطب
سأهرب من كل عين رأتك وانت تضرب بي
الى حيث لا اعلم اين المفر والمهرب))بقلم الشاعرة الادمن هدى

انتبهت عليه اخذ سويج السيارة وطلع من البيت
والولد ضرار وضاري ركضو روة ضرغام

حليمة.. هَـا حجي هاي تاليتك تمد ايدك على وليدك
ليش شنو الصار
راضي.. حليمة رحمة على والديج سكتي ترة انا ما ناقصج
باوعت على خالة حليمة كامت تحوم من القهر ما تعرف شتسوي
شلت علاوي كام يبجي من سمع اصواتهم العالية
وشاف خالو ضرب ضرغام كدامه خطية ضل يصرخ
اني انخبصت بأبني وبضرغام الي طلع وما رجع
اباوع لميس كل ساعة تتصل عالولد حتى تتطمن على ضرغام
بس ماكو محد يرد عليها وخالو راضي اخذ سيارته وطلع من البيت
وبقينا اني والبنات وخالة حليمة وبيبي وحدة تباوع بوجه الثانية
حليمة.. والله راح اتخبل قبل شوية جنا كاعدين ما بينا شي اسم شجاهم وهيج صار
خطية اباوع عليها حايرة متدري شنو صاير
كسرت خاطري
ورة ساعتين رجعو ضرار وضاري
حليمة.. هَـا يمة بشروا اخوكم وين
ضرار ماكو ما يقبل يرد على نقاله
ضاري.. لاتخافين هسة هو يرجع بس تهدىء اعصابه
يرجع للبيت قابل وين يريد يروح
بس احنا خفنا عليه اخاف يسوق وهو متعصب ويدعم
جنت ساكتة وما حجيت اي شي الموقف صعب
ووضع البيت كلة متكهرب
كل ساعة اتصل عليه يطلعلي مغلق بدة القلق
يتسرب لكلبي
اجتي ريام .. يالله كومي اتعشي يالله وجيبي علاوي
حتى توكلينه خطية كضاها اليوم كلة يبجي
كمت غصب عني علمود علاوي رحت للمطبخ شفتها مسوية عشا وصباته عالميز
.. يالله كعدي وجهج صار اصفر من التفكير والقلق
راحت صاحت لميس عالعشا واجتي كعدت يمنا حتى تاكل
ريام .. راح اموت واعرف شنو الصاير
شبي خالو وية ضرغام
ميس.. سكتي لج الله ستر امي ما سمعت الحجي جان
صارت مصيبة
.. ليش خالة حليمة شنو دخلها
.. مو ضرغام اليوم رايح لزوجة ابوي الثانية
ومهددها حتى تطلع من حياة ابوي
وكعدت ميس تحجي الصار لريام وانا اوكل علاوي واسمع وكلبي نار على ضرغام سودة علية هسة هو وين وشنو حاله الله يساعد كلبه هذا ابوه وصديقه
وموقفهم كلش صعب وخالو عنده اسبابه الي خلته هشكل يسوي انا اعرف خالو راضي انسان محترم
ويحب عائلته حتى خالة حليمة يحبها ويقدرها
ريام.. والله عفية عليه ضرغام زين يسوي
لان خالة حليمة ما تستاهل الي يصير وياها
جنا نحجي ودخلت خالة حليمة ومبين من وجهها
ان هي سمعت كل كلامنا
ميس .. ااااا يمة
حليمة.. هنا الحجي اكول ليش محد يقبل يفهمني شنو الصار اثاري راضي اتخبل على ابنه لان طرد مريته
والله عيب عالزلم يضرب ابنه علمود
وحدة ما تسوة فلسين
ميس.. لا يمة مو هيج الحجي بس ضرغام شوية
اتحدة ابوي ووكف بوجهه وصار صياح
يعني ابوي وتعرفين طبعه ما يقبل واحد من الولد يعلي صوته عليه
حليمة.. لايمة ضرغام وليدي واعرفه زين ما تطلع منه العيبة
جانت تحجي وترجف من القهر
بس قطعت كلامها بدخول الولد وخالو راضي
سلمو ودخلو جوة للهول يم بيبي خاجية
تركت العشا مكدرت اكمل اكل احس وية كل لكمة
غصة كمت انطيت علاوي لخالة حليمة اريدها تلتهي بي لان خوفتني صفنتها جانت كاعد تفكر بغير عالم
حتى من دخلو الولد وخالو راضي مردت عليهم السلام
خلص اليوم واجة الليل وضرغام ما منه خبر
وهنا البيت كله دخل بالانذار والولد انخبصو وخالو راضي بدة الخوف والقلق يبين عليه
اشوفهم كلمن اخذ سيارته وطلع
وخالو الي جان قبل ساعتين يكابر وزعلان على ضرغام صار هسة كل ساعة يتصل على واحد من جماعة ضرغام والمصيبة ولا واحد بيهم يعرف مكانه وين
سمعت بيبي خاجية تندعي وخالة حليمة كاعدة يمها دخل خالو راضي وكعد يمهم
وصارت الساعة ب ١ونص بالليل
ورجعو الولد ماكو اي خبر
انا هنا حابسة الانفاس من الترقب والخوف وصلت الدمعة بطرف رمشي
صار عقلي يردد اريد ضرغام وينه
حليمة.. ها يمة ضرار اخوك وين
هذا السؤال انطرح للمرة الالف وكلنا نصيح ضرغام وين دك نقال ضاري
وكام من مكانه بلهفة .. الو هلا ضرغام انت وين ولك
ضل بالنا عليك وماظل مكان يعتب علينا ما دورنا
بي انت وين
جنا كلنا كاعدين ومنتظرين ضاري يكمل كلامه اباوع لخالو رجع لتحفظه بس يسمع ادري بي كلبه نار على ضرغام بس يكابر وما يريد يبين لهفته وخوفه
ضاري.. لك ضرغام انت شكاعد تحجي يعني تروح للنار برجليك علمود مشكلة بسيطة بينك وبين ابوي ولك خوية استهدي بالرحمن واتعوذ من ابليس وارجع للبيت مو مال تعاند
حليمة.. ضاري انطيني اخوك احجي وياه شنو شبي
الحجية خاجية .. ولك يمة ضاري اخوك شبي
اشرلهم يسكتون حتى يسمع ضرغام شيحجي
.. يعني شنو تريد تسكتني قابل هو بكيفك تروح
لا تخ.....
نزل النقال من اذنه وباوع عليه
.. والله اخوي مو بعقله نهة الاتصال وما انطاني مجال احجي وياه
سألته بخوف.. ضاري شنو شبي ضرغام وين رايح
ضاري.. ضرغام راح يوصل المساعدات للحشد واخذ مكان واحد من المتطوعين ما كدر يروح وهو اتبرع يروح بمكانه للموصل حتى يوصل المساعدات
كلام ضاري كان مثل الصاعقة وكعت على راس الكل انتبهت لخالو راضي كام مفزوع من مكانه
وضرار اتصل على جماعته يريد يوصل لضرغام بأي طريقة
لزم نقاله واتصل لحظات نزل النقال وركعه بالكاع بقهر
.. ابن الكلب غالق جهازه
جان يحجي ويرجف
كلنا نعرف الوضوع تعبان والطريق غير مؤمن
حسيت بلحظتها مريت باصعب لحظات بحياتي
صارت روحي بعلاوي
انتبهت لخالة حليمة كامت راحت لخالو راضي ووكفت كدامه
حليمة.. شوف راضي انا كضيت عمري وياك من اتزوجتك لحد هذا يومي ما فكيت حلكي وحجيت
جنت ابلع سواياتك بية واتحمل جنت اسكت علمود الاولاد اكول خليه اهم شي بيتي واولادي بخير
بس مال تأذي ولدي علمود نزواتك التعبانة وبعدين يصير بيهم شي لا لهنا وحدك انا بعد ما راح اسكتلك ولا اكعدلك لحظة بالبيت
راضي بصوت عالي .. حليمة احترمي نفسج وخليني محشمج كدام اولادج وجناينج لا تخليني احجي
حليمة.. هو انت شبقيت للحشمة
هاي انا احجيها كدام الكل ما دام سبب وجودي بهذا البيت راح انا همين مالي كعدة بهذا البيت
كامت من مكانها وراحت على نقالها
ميس.. يمة صلي النبي كولي يا الله شجاكم
حليمة.. كافي يمة مليت وصل حدي وتعبت
ابتليت بأبوكم كل يوم متزوج له وحدة وحارك البيت بيها وولده مبتلين
راضي.. ولج حليمة كافي حجاية ثانية منج والله ابتلي بيج واطلع حركة كلبي كلها بيج
حليمة.. هو هذا الي الله مقدرك عليه
الحجية خاجية.. حليمة كافي واتكفي الشر
حليمة.. هو انا راح اتكفى الشر واعوف البيت واطلع
راضي.. طلعي عنج لا رجعتي ترة الباب يوسع جمل
اتصلت على اخوها مازن ابو ارشد
وميس تركض وراها تهدي بيها وبيبي اخذت خالو راضي ودخلت للغرفة وسدت الباب عليهم
وضرار وضاري واحد يدعم بالثاني يردون يوصلون لضرغام
عشر دقايق واجه ابو ارشد بالباب دك نقال خالة حليمة وردت عليه ميس كللها انا بالباب خلي امج تطلعلي
اباوع لخالة حليمة اخذت جنطتها وباست علاوي ابني ووصتني عليه وطلعت وهي تبجي على ضرغام
يالله خالة حليمة يوم عن يوم تثبلتي هي مجنونة بحب اولادها كسرت خاطري
هدء البيت وضرار لبس زيه العسكري وراح ما كال وين متوجه
وبقينا اني والبنات وحدة مكابلة الثانية اترخصت منهم
وصعدت اني وعلاوي فوك لغرفتي ونغزني كلبي
شميت عطره بالغرفة لزمتني العبرة مثل الطفلة من تريد ابوها نومت علاوي ونمت بحضنه ادور الامان الي ادوره بحضن ضرغام خانتني دموعي بضعف وانهاريت فقدت من البجي حسيت بألم ببطني
اتلمستها واخذت نفس عميق
قهرني موقفه احس ما يفكر بية وبأبنه من فكر يسافر
ما حسيت على روحي من نمت
كعدت الصبح على لويات خفيفة ببطني
نزلت جوة ولكيت خالو راضي كاعد وبيبي
كاعدة خطية جانو متعودين كل يوم الصبح خالة حليمة تكعدلهم وتسويلهم ريوك
هالمرة كاعدين مصفصفين
سلمت عليهم وكعدت اسويلهم ريوك ونزلت خالة رحاب والبنات كعدو
ريام.. خالو عفية اتصل على ضرار البارحة كلة اتصل عليه ماكو رد بالله شوفه وين راح
دخل ضاري .. يالله بوية انا طالع للشغل ما محتاج شي
راضي.. لا بوية سلامتك اتوكل على الله
طلع ضاري بدون ما يتريك
الحجية خاجية.. هايمة راضي ماكو خبر عن ضرغام
راضي.. لايمة ماكو اندعليه حجية يرجع سالم
والله كلشي ما اريد
الحجية خاجية.. هايمة راضي شفت النعمة الي جنت عايشها وماحاس بيها ولا حمدت ربك لا انت الي صرت حليم وصبرت على مريتك وكعدت وسكتت
ولا انت الي عفتها ورحت شفت حياتك
كام من يمنا بدون ما يجاوب بيبي
ميس.. والله حرام عليه ابوي بعد كل هذا العمر صار عمرة ٥٠سنة
يسوي هشكل والله اني كلش مصدومة بيه
امي خطية ما تستاهل يتزوج عليها

الحجية خاجية.. ميسة لاتحجين عن شي ما تعرفينه
ابوج مو بطران يتزوج امج واهمالها الة هي الي دفعته يتزوج عليها
سمعي مني ابوج
من اتزوجها وهي صغيرة اتذكر اجوها بيت خالتها يردون يخطبونها بس اتفاجئنا براضي نهة عليها وكللهم بنت عمي وانا اريدها وصدك جدكم راح خطبها من ابوها
وزوجناهم جان راضي يموت عليها وهي حلوة وصغيرة وهواي تتدلل عليه وتتمزعل لان جانت صغيرة اخوانها وابوها مدللها

فجان راضي حسرة عليه يحجي وياها كلمة اذا مو يوم ثاني لبست عبايتها وراحت زعلانه عند ابوها
هاي بداية زواجهم وبعدين صارت تهمل راضي وتهتم
بس بالجهال وهو صبر عليها وسكت
بعدها صارت سالفة الورث بين ابوها وابو راضي
جدكم ابو راضي باع حلاله وامنه عند اخوه ابو حليمة
لان صارت الضربة والحرب كامت بالعراق والكل صار يصفي املاكه غبنا عنهم فترة ما نكدر نوصللهم لان احنا جنا عايشين بالاطراف عدنا حلال ومزارع فما علينا شي امان بس ابو حليمة جان ساكن بمركز المدينة فالضرب والصواريخ كلها عليهم
ليش ما وصلنا الخبر ابو حليمة ماخذ اهله ورايح وجانت حليمة بوكتها زعلانة وعايفة ضرغام وضرار يمنا وابوها اخذها وياهم
وراحو للكويت واحنا ماعدنا اي علم بمكانهم
ولا جان اكو اتصالات حتى نعرف همة وين وراضي
بذيج الفترة اتخبل ماخلة مكان يعتب عليه جوارينهم كالو مشو لكويت وراضي كبل راح وراهم
واندل مكانهم وراد يرجعها رفضت ما قبلت ترجع وياه
رجع راضي ايد ورة وايد كدام وحليمة ماكو
هدأت الحرب ومات ابو راضي ورجع ابو حليمة للعراق واتفاجئنا من كال حلالي وحلال اخوي راح
فرهدوه
شوكت وشلون ما نعرف بس كل الي افتهمته
ان جدكم ابو راضي وابو حليمة حطو فلوسهم عند شيخ بالكويت امنو عليها وبعدها
صاير هناك فرهود بالكويت وماخذين الحلال كله حتى الشيخ بكبره ماخذين حلاله
ومن رجعو وصار الحصار ابوها قرر يرجعها لراضي
وراضي وافق بس بشرط ماله غرض بيها تبقى بس لاولادها بس جان الزمن كفيل بنسيان الجرح
وكدرت حليمة ترجع لحضن رجلها
بس ما كدرت تنسي راضي عملتها وياه وهجرها الة
وكبرو وهمة واحد شايل بكلبه عالثاني هو رجعلها الضربة بزواجه من وحدة بالسر وهي رجعتله الضربة
بأهمالهة الة وصارو وكبرو على هذا الحال راضي
فضل يسكت على تقصيرها وياه وما يحجي
وهي فضلت تصيحه كلما تسمع بي متزوج عليها وتمثل دور المظلومة اتعودت عليهم مادام السفينة تبحر خلاص نتحمل الربان مالنة غير حل
وهسة من كام يتزوج بهذا العمر حليمة تصيح جان استحيت على عمرك عندك احفاد وتدور هيج سوالف وتتزوج
هي نست ان الرجال مهما كبر يبقى بشر وعنده مشاعر حاله حالهة هسة من حمت الحديدة وحست بالتهديد انهارت وطلعت زعلانه
ريام.. يعني شنو. قصدج
.. انا اكلج حليمة عجينتي ادري بيها ميتة قهر من راضي شلون اتزوج عليها هو كل مرة من يتزوج ما يطول هالكد بسرعة يطلك بدون ما احد يحس عليه
بس هاي المرة طول بزواجه وهي دخلت بالانذار عبالها مثل كل مرة تسلم الجرة
ريام
جانت بيبي تحجي واني دك الجرس عندي وصار لازم اتحرك واحاول اغير من خالة حليمة لان اني الوحيدة الي اكدر اأثر عليها
دخل علينا ضرار مبتسم
الحجية خاجية .. هايمة بشر
دخل خالو راضي يباوع عليه متلهف يسمع شي عن ضرغام
ضرار.. لا جدة الحمدلله ضرغام وصل المساعدات لحدود الموصل ما يدخلونها اما توصيلها للمقر فهاي شغلة الجيش همة الي يتكفلون بيها ويوصلونها بطريقتهم
وهسة هو والجماعة الي وياه راجعين بالطريق
احتمال بحدود العصر يوصلون للبصرة
هيام.. الله يطمنك يا ابو راضي ويبرد كلبك
ريام
كمت ركضت عليه وحضنته
.. خير ام راضي سالمين ترة مو انا المسافر للموصل ضرغام
ريام.. لك ليش اتصل عليك متجاوب
.. انا جم مرة اكلج من اطلع بمهمة نقالاتي اتركهم بالمقر فلا تعبين نفسج وتتصلين
والله تاليتي اوكع بيد العصابة من ورة ملحة اتصالاتج
الي الهة يوم فاضحتني ومشتهر
.. عابتلك غير خايفة عليك
عفية وصلني للكلية
.....................
بالكلية
ريام اول ما وصلت صرت ادور بعيوني على رفاه
جان بالي كلة يمها وبهاي اليومين خطية اتصل عليها
مغلق خالة حليمة متصلة على امها وكالت ابوهن اخذ
النقالات منهن ورنا بطلها من الكلية وحابسها بغرفتها واكلها يصعدلها بس رفاه اكتفى بأنكسارها بترك ضاري الهة وسالفة طلاكها
امتحنت وخلصت الامتحان وشفتها كاعدة لوحدها
وجهة ذبلان تكسر الخاطر رحت يمها
ريام.. هلا رفاه شلونج
شافتني وكامت وشمرت روحها بحضني وصارت تبجي وتشهك بحركة كلب
ياربي متت قهر عليها لميتها لحضني وصرت اسكتها
وكعدتها وانطيتها ماي
.. كافي لا تبجين

يتبع

..