رواية تائهة بين اروقة الماضي الفصل الثالث والثلاثون 33 - بقلم الكاتبة نهى

#تائهة_بين_اروقة_الماضي
#بقلم_nuha-d-h
#صفحة_قصص_الكاتبة_nuha-d-h
مساء الانوار والسرور والخير والعافية على قرائي الاعزا
بعد مرور سنة

هيام
.. يالله بنات استعجلو مو تتأخرون اليوم عيد ميلاد علاوي
انتظركم نحتفل سوية
ريام.. هيومة انطيني من يمج الزينة
باوعت على ريام دتعلك بالزينة
ومخبوصة واني دا اسوي كيك
اليوم ميلاد الغالي علاوي احلى هدية اجتني
من ربي
ريام.. اكول هيومة عزمتي بيت عمو احمد على عيد الميلاد لولا
هيام.. والله ما اعرف اعزمهم لو لا لان من بعد دخول
نبراس للسجن وهمة حالهم ما يسر لا صديق ولا عدو
والله خايفة على عمو احمد شلون تعبان من ورة المصيبة الي وكعت فوك راسهم من ورة نبراس
واختلاسه من اموال الدولة بشكل غير قانوني
بس ربج بالمرصاد
يكلج شكلو لجنة نزاهة بالوزارة وطلعو وصخ ضرغام
عمر الحرام ما يدوم لصاحبة وياخذه بتهلكة
وهسة زوجته عند اهلها بس يكلج عمه ابو زوجته خفف العقوبة وسمعت من عمو يكول ابو زوجته راح يدفع كفالة ويتوسطله بعدما يقضي فترة العقوبة بالسجن وتخلص المهلة يالله يكدر يطلعه
ريام.. عساه لا طلع انا بالهوسة هاي كلها كاسر خاطري عمو
هيام.. ما راح اعزمهم احسن خطية هسة همة مو بحال احتفال
ريام.. براحتج
هيام .. يالله استعجلي نزلي
حتى تبدلين ملابسج عزمتي صديقاتج لو بعدج
ريام.. اي عزمتهم
.. مو تنسين وياج تعزمين اخت ابراهيم
جنت احط اللمسات الاخير على كريمة الكيكة
هيام.. ريمة اي صدك اتذكرت عمو احمد اليوم اتصل علية وكال ابراهيم متصل عليه حدد وياه موعد مشية الزلم وكال بعد سبوعين
ريام .. تدرين والله خايفة ما اعرف ليش
باوعت لعيون اختي ما شفت بيهم لمعة او لهفة اوفرحة
بخطوبتها
.. ها هم رجعنا لفقرة الخوف على العموم لتخافين والله من شفت ابراهيم كلش ارتاح كلبي من ناحيته جان مبين عليه من نظرات عيونه كلش يحبج ويحاول بس يرضيج ولوما يحبج ما اجة يخطبج
بس انتي لو بس شوية تتنازلين عن تحفظج باتجاهه
صدكي راح تبدين تتقبلينه
.. تدرين اني ليش وافقت على ابراهيم
.. ليش
.. وافقت لان اعرف بزواجي من ابراهيم راح نكدر نعيش ويكون النة سند بهاي الدنيا وخصوصاً
اهله ناس محترمين ومستواهم زين يكدرون يحمونه
.. انا ما انكر ان هاي وحدة من الاسباب البنية تتزوج من شخص يحسسها بالحماية بس هذا السبب لوحده مو كافي للزواج لازم يكون بينكم حب ومودة
ريمة سؤال
..شنو
..انتي من يمر طاري ابراهيم عليج تتغير دكات كلبج ؟؟
.. لا ماكو هذا الشي متتغير دكات كلبي احس بأتجاهه
عبالك واحد من اقاربنا هيج شي
بس ما انكر اني معجبة بي لان شكله وسيم ومرتب واخلاقه حلوة صحيح الاخ شوية شايف نفسه ودائماً يحب يتفاخر بس كلنا نعرف الحلو ما يكمل وماكو شي بالدنيا كامل
.. حبيبتي صفي افكارج وخليها على رب العباد
جنا نحجي وسمعنا صوت جرس الباب
.. عزة اجوي البنات واني بعدني علاوي ما ملبسته قاطه
رحت اركض
.. روحي بسرعة لبسي علاوي بين ما اشغل البنات
رحت دخلت عليه لكيته يلعب بالمكعبات بسريره
التفت وشافني صار يضحك لزم حافة السرير يريد يوكف بتعثر بعدة ما يمشي الى الان
حبيبي علاوي هذا الكائن الصغير هو كل عالمي وكل حياتي تدور حوله يارب حفظه الي
صحيح هو مريض وابد ما صحة احتمال لان صارت ولادته بشهر السابع تكون عنده المناعة ضعيفة
بس صارله شهر اراجع بي الاطباء علمود لون وجهه الاصفر دكتور كال بي التهاب الكبد الفايروسي لتخافين
وانطاني علاج بس اشو ابني صارله شهر ما اتغير عنده شي لا بالعكس زادت حالته سوء
وهسة راجعت بي دكتور ثاني نصحني بي بلال وحجزلي عنده
وهذا الدكتور طلب من عدنا بعض التحاليل والفحوصات بس عندة تحليل يطلع بعد اسبوع وصارلي يومين من سويتله هذا التحليل حبيبي والله يمرد گلبي
اقتربت منه وشلته من السرير
شميت ركبته وصار يضحك جريت حسرة
يالله بي ريحة ابوه
اباوع عليه هو كلش يشبه ضرغام يعني نسخة مصغرة على البابا ما بي اي شي مني
عيونه حواحبه شفايفه خشمه كلة على بعضه ابوه
ياربي حتى من يزعل عالرضعة نفس عقدة الحواجب
مديت ايدية
.. تعال ياگلب ماما انت
خلي البسك قاطك يوم البسك قاط العرس وافرح بيك
كعدت البسه ملابسه عالسرير الكبير وهو جان يدردم بلغة غريبة غير مفهومة ما افتهم منها غيربس كلمة ماما
ويظل يدردم خلصت تبديل ملابسه ولبسته الببيونة على ركبته ودخلو البنات لجين وريتا
وهنة يغنن اغنية عيد الميلاد
التفتت عليهم وشفتهم لابسات طرابيش ولازمات بيدهم
علب هدايا مغلفة والعاب نارية شاعلينها
(عيد ميلاد سعيد تيرررااا .. عيد ميلاد علاوي .. تيرراا)
سديت اذانات ابني وحجيت بتوسل
.. لا عفية كافي شنو هاي الاصوات الرنانة عابتلكم قمة النشاز بالغناء يالله ابتعدو لا ابني يخترع من اصواتكم
اقتربت لجين شالته .. تعال يا بعد دلب خالتو خلي ماما تولي تغار من صوتي الجميل مكهورين من الملكة
ريتا.. لج عوبة ليش تحجين على صوتي
عيني هذا صوتي الما يعجبج عليه طلب تدرين كل اناشيد الكنيسة اني اقوم بانشادهة والاب دائما يثني على صوتي ويكلي
بارك بيكِ الرب
هيام .. خطية هذا ابوكم ضحية احتمال ما لاكي غيرج ينشد للكنيسة فيستحي يصارحج بصوتج التحفة
باوعت لوجه لجين صحيح كانت تتشاقة ويانة وتضحك بس وجهة مبين عليه بيها شي
همست لريتا.. شبيها لجين شكلها ما عاجبني
ريتا.. سكتي الباجر محمد راح يجي يتقدملها وهاي ثالث مرة راح يطلبها من ابوها بس هالمرة اهلة رفضو يرحون وياه كلوله ما دام ابوها ما قدرنا احنا هم ما يشرفنا تكون زوجة ابنا
((((((((((((()))))))))))))

ضاري.. الو هَـا حجي
اي اي انا منتضرهم بالمطار هسة ستوهة وصلت طيارتهم بعدهم المسافرين ما نازلين منها
..اي حجي كوة قبلو يدخلوني جوة بالمطار اتصلت على الملازم صديقنا هو اجة دخلني جوة
.. ابو ضرغام لا يظل بالك بس يوصلون اتصل عليك اكلك حضر الذبايح

ضرار.. اكول باشا شنو رأيك ابوي اذا شافني شتكول
راح يتفاجيء بوجهي لو لا
ضرغام.. لا كول راح ينصدم من المفاجئة لان هو انا اخوك اتفاجئت بيك اشو هناك الجماعة خلصوها علينا
كلة شاش وضماد وكمامات كلشي ما كدرت اشوف من وجهك تصدك خفت عليك بيوم دخلوك لغرفة العمليات
كلت هذا شراح يصخمون بوجهة بس الحمدلله
طلعت من العملية جنك ذبيحة وجهك كله ضماد
من دخلني الدكتور لغرفتك حتى اشوف وجهك بعد ما فتحو الضماد
انصدمت بيك خرب ما اصدك هذا البقلاوة على كولت ميس اختي هاي كلمتها اذا شافت شاب وسيم
بس تدري اتعودت على ذيج جهرتك
على الاقل من اريد اغلط واكلك جهرتك الزفرة
يرتاح كلبي تكون بمحلها بس هسة لا يابة هسة انت وين ما تمشي عيون الصبايا عليك شكلي خرب سوكي وصرت تاخذ مني المعجبات
ضرار.. لك ياخوي خليني استمتع بنظرات الاعجاب
من الصبايا خلي اطلع ايام الجفاف العاطفي
بس خلي اوصل الا كل يوم تلكاني وية وحدة شكل
ضرغام.. ليش ما تتزوج مو احسنلك
شفتة اتغير وجهة وسكت
ضرار.. لا يابوي زواج شنو محد تستاهل اتزوجها واخليها ام بيتي
كول العب اتونس اي بس مال اتزوج مستحيل
هي مرة وحدة
حاولت اتزوج وخربت وخلاص هاي هي
.. بعدك تحبها
.. مو حباً بيها ارفض اتزوج
بس تكدر تكول النفس انسدت يمكن هي صارت سبب
جنا نحجي وندفع بالجنط بالمطار
وسمعنا صوت عالي يصيح بأسمي بصوت عالي
ضاري.. ضرغام .. ضرغاااام
اجة يركض بأتجاهنا وهو يضحك وما مصدك عيونه
وصل لعندي وضمني وعصرني بحضنه حيل
ضاري.. لك باشا ما اصدك عيني واخيراً رجعتلنا تمشي على رجليك الف الحمدلله على سلامتك
والله كلما اتصل عليك واسمع بيك تاخذ جلسات فيزيائية
وترجع منها تعبان اموت قهر عليك بس الحمدلله
الله ما ضيع تعبك صحيح طولت الغيبة بس الحمدلله رجعتلنا سالم
ضرار.. اكول استاذ ضاري شوكت ناوي تلتفت
وتسلم على اخوك لو بس ضرغام اخوك
شفت عيون ضاري اتسعت بمفاجئة بعدم تصديق
.. ضرار!!!!!! لا لا ما اصدك معقولة خرب
هاي شمسوين بيك كالبين خلقتك
ولك صاير حتى احلى من كبل اخ بوية
خرب حضي اثنينكم كاضيها دياحة وسفر وتجميل
وانا ابن البطة السودة عايفيني هنا بس للكراب مكابل امي وبيبتي خاجية وحدة تشمرني عاللاخ
وانتو كاضيها من حاتة لحاتة
ضرغام.. الله لايحوجك وتصير بمكانة
بس ولا يهمك هذا انا رجعت وراح ابدي الزم زمام الامور والشغل وانت سافر وين ما يعجبك مو بس انت انت واصدقائك وتكاليف سفركم كلها على حسابي
باس راسي وكتفي
ضاري.. تسلم ياخوي ورفعة راسي ربي ما يحرمني منك دومك مفرحني والله اشتاقيتلك
سمعنا صوت نقال ضاري
الوالد يتصل اشرتله ما يرد انا ارد
اخذته منه وحجيت
راضي.. الو هَـا بوية ضاري اخوانك وصلو لو بعدهم
ضرغام.. ابشرك يابو ضرغام ضرغامك وصل بالسلامة
سمعت صوت ابوي الي صار يرجف من البجي
.. هلا ومية هلا بعضيدي شلونك يالحبيب توهة نورة البصرة بجيتكم
ضرغام.. بصرتنا منورة بيكم يالغالي والله مشتاقلك بمد رحمة الله
يالله يابة وصلنا نريد نختم الجوازات ونطلع من المطار
راضي.. يالله بوية اخذو راحتكم انا وعمامك وخوالك واصدقائك وجماعة السوك كلها منتظرين وصولكم
بعد فترة طلعنا من المطار وانا اتذكر شلون سافرنا
قبل عشرة اشهر سافرت وجنت شبه انسان محطم نفسيا وجسديا ماكو شي صاحي بية رحت منا على كرسي متحرك عاجز والحمدلله هسة احس بروحي انولدت من جديد وانكتبلي عمر جديد ورجعت امشي على رجلية
بعدما سافرت للبنان سويت هناك اقامة بالمستشقى
وبدة الكادر الطبي للمستشفى يشرفون على حالتي ووضعي وصرت اخضع لجلسات علاج فيزيائية معقدة وصرت مثل الطفل من يتعلم يعتمد على نفسه بالحركة والمشي صرت كلما اخطي على رجلية خطوة اطير من الفرح صحيح الجلسات تعبتني
وحطمت اعصابي وتلفت نفسيتي منها
وغيرها من الفحوصات والعلاجات
بس ربي ما قصر كدرت اتحامل على نفسي واجبر نفسي واذكر روحي لازم انهض وارجع من جديد
لان وراي ثار وحق ينتظرني هناك بالعراق جنت كل خطوة اخطيها بالعلاج وانا حاط براسي هدف واحد هو العثور على هيام جنت من اتعالج اتخيلها واكفة كدامي واستمد قوتي من حقدي عليها
(((((((((((())))))))
هيام.. عفية ريمة ديري بالج على علاوي
ريام.. هَـا راح تروحين للجين
هيام.. اي والله خطية اتصلت علية اليوم من الصبح كالت
(اليوم محمد راح يجي يتقدملي كلش محتاجتكم يمي راح اموت من التوتر)
فهسة ريتا راح تمر علية وتاخذني وياها
.........
وصلنا اني وريتا لبيت لجين جان بيتهم كلش فخم بمنطقة راقية
ريتا: هيام شنو تتوقعين ابوها يخضع امام اصرار محمد ويوافق لو يعاند ويطرده
.. والله يا اختي ما اعرف شنو نية ابوها وبشنو يفكر
دكينا الجرس وطلعلنا الحارس
الحارس.. نعم اختي اتفضلي
ريتا .. احنا صديقات لجين انطيها خبر هي تعرف احنا جايين
باوع علينا بتفحص وكال
.. انتظرو لحظة انطي خبر الهم
دخل جوة
وداس دكمة مثل الجرس وحجة وجاوبه صوت كلة دخلهم جوة
جنا منتظرين بالباب وبهاي الاثناء طبكت سيارتين مظللة
نزلو منها خمسة جنود بيدهم رشاشاتهم ولابسين مرقط وفتحو باب الكراج للسيارة الثانية حتى تدخل
ريتا.. لج هاي شنو متأكدة احنا جايين على بيت لجين
هيام.. اي متأكدة هذا بيتهم الجديد الي انتقلوله هي مصورته وراوتني اياه بالنقال من جنا بالدوام
ريتا: لج لعد ليش احس روحي بفلم مافيا شعجب هشكل متشددين بالحراسة مجنت اتوقع ابوها ماخذ مسألة الحماية بصورة متشددة
جنا نحجي وسمعنا صوت ام لجين جانت مرأة بعمر ال ٤٥سنة معتنية بنفسها وجانت لابسة كلابية فخمة وشال مرتب
ام لجين .. اتفضلو خالاتي لويش واكفين بالباب
قابل انتو خطار
ريتا بصوت ناصي غير مسموع بس الي
.. والله ما ادري سألي جون سينا الي خالينة بالباب
اشو كعد يخزر بينا ويسألنا عايز بس يفتشنا خاف شايلين ممنوعات
دخلتنا ام لجين تمشي كدامنا حتى تدلينا الطريق

ام لجين .. ياهلا بصديقات لجونة نورتونا
خالة هيومة ابنج شلون صارت صحته
.. الحمد لله بعد يومين ونستلم نتيجة الفحص
.. يارب تكون ايجابية
بس تعرفين والله لايكة عليج الامومة صايرة حلوة مثل التفاحة
.. اشكرج خالة عيونج الحلوات
طبعاً اني وريتا هاي اول مرة نزور لجين ببيتهم الجديد
جنا كلة متعودات نلتقي برة حتى ناخذ راحتنا وباخر ايام صارو كلة يجوني للبيت حتى ياخذون راحتهم بالكلام وماعندي احد بالبيت يقيدهم
بس ما شاء الله بيتهم كلش حلو اظلمة اذا كلت عليه بيت هذا قصر طبعاً من سافرت للبصرة وشفت بيوت خوالي واهل امي كلت بعد مستحيل اشوف بيوت ارقى منها
بس ما شاء الله هذا البيت اثبت خطائي
ريتا.. تبارك الرب لج هيام بعدما شفت بيتهم
الفخامة الي لجين عايشة بيها اني من هسة اكلج
محمد طريقه مسدود ومستحيل ابوها يرضى يزوجها
لشخص كاعد بأيجار او مشتمل وبمنطقة تعبانة
هيام: اشششش نصي صوتج منا امها يمنا لتسمعج
دخلنا ورة ام لجين لصالة مستديرة تطل على درج مستدير
جانت لجين دتنزل بهرولة وعينها علينا اقتربت من عدنا وحضنتني وحضنت ريتا
لجين .. واخير اجيتو
ريتا.. خفي علينا ترة خنكتيني
لجين.. لج سكتي ما تعرفين شلون متوترة وخايفة
جنت حيل محتاجتكم يمي خصوصاً هسة
لزمت ايدي والتفتت على امها
.. ماما عفية اني راح اصعد لغرفتي اني والبنات
خلي سنايا تصعد العصاير والكيك فوك
اخذتنا فوك لغرفتها وجانت كلش حلوة ومرتبة
وبيها لمسات انثوية تجنن
كعدنا
هيام.. شوكت كلج محمد راح يجي
لجين.. مظل شي هسة هو على وصول
جانت تحجي وتفرك بأيدها
هيام.. لتخافين ان شاء الله ابوج يوافق
ريتا.. اكول لجونة هالمرة محمد منو راح يجيب وياه
ذيج المرة جايب شيخوخ معكلين وابوج رفضهم
لجين.. هو اني هذا الخايفة منة
هيام.. شكو ليش تحجين هشكل
لجين.. لان هالمرة محمد اهلة رفضو يجون وياه
وكلولة بعد ما نروح ولا نعتب لبيته ما دام ابوها ما قدر الشيوخ والعكل وما سوالهم خاطر اذاً بنته ما تصلح زوجة الك لو تبقى اخر وحدة بالعالم ما تتزوجها
اذا تريدها روح اخطبها لوحدك
احنا ما نروح وياك
واخوانه اتعاركو وياه وضغطو عليه
وكلولة اتركها ترة الخلقها خلق الاحلى منها والاحسن بس هو بقى مصر وعاند اهله وقرر يجي اليوم لوحده يواجه بابا ويطلبني منه
ريتا.. يا اختي اذا جايب العشيرة وابوج رفضهم جايني لوحدة شيسوي مستحيل ابوج يوافق
لجين.. لا هالمرة غير اني قررت ادخل واحجي وية بابا
واواجهه اني ومحمد ان احنا نحب بعض
هيام.. يبوو خطوة جريئة وينرادلهة كلب جامد
موقفكم صعب ويتطلب شجاعة منج لحتى تواجهين ابوج
لجين.. هيام ماعندي شي اخسره واني احب محمد واليحب مستعد كلشي يسوي لأجل محبوبه
قررت احارب واوكف بوجه بابا علمود حٍٍِْــًبٌٍـــِٓېٍٓ
مثلما محمد حارب اهله علمود حبنا
لان هاي مشكلتنا احنا الثنين مو بس لوحده

ريتا.. سؤال محيرني خالج ابو اسراء هم حالته المادية زينة ومتمكن
زين شعجب وافق يزوج بنته لنبراس
هو هم جانت حالته تعبانة وفقير شمعنا هذا وافقو عليه
لجين.. اني اكلج ليش اولاً
ابو نبراس يصير صديق بابا واحنا جنا قبل بنفس المنطقة
هاي وحدة وثانياً خالو ابو اسراء يختلف هواي
عن بابا
ما يهتم للمكانة الاجتماعية مثل بابا
وخالو عندة اهم شي سعادة بناته ابد ما يرفضلهن طلب
واسراء جانت تحب نبراس بجنون
لذلك خالو وافق عليه
جنا نحجي وفجاءة اتصل محمد على نقال لجين
وكال ان هو واكف بالباب انتبهت على لجين كامت من مكانها مفزوعة ولون وجها انخطف
عرفت بلحضتها ان ان الكلام اسهل منة ماكو لكن عند تنفيذه بالافعال راح تلكة اغلبنا مرتدين عن الوعود
وهسة لجين دتعاني

لجين.. بنات اقتربت ساعة الصفر ادعولي
رايحة افتح الباب اخاف يرفضون يدخلونه
نزلت لجين واني وريتا رحنا نباوع على محمد من شباك غرفتها خطية جان واكف ويباوع على بيتهم
شفنا لجين فتحت الباب واقترب منهم الحارس
وبعدها ابوها طلع
ما اعرف شنو دار بينهم من كلام بس طال وقوفهم بالكراج
ريتا.. اهووو هذا ابوها شكد حقنة حتى ما كلف نفسه
ودخله جوة للبيت خلاه واكف بالكراج
هيام.. وهاي يسموها قلة احترام وهاي احد علامات الرفض بس الله يستر
جنا نحجي ونراقب
بس فجاءة صار صياح وابو لجين التفت على لجين وضربها راشدي وسحبها من زندها
ريتا.. لج عيني هاي شنو
هيام.. يايمة علكت امشي خلي نلحك عليهم
نزلنا ووصلت لعند لجين جانت كاعدة بالكاع ومفرفحة من البجي
رحت عليها وكومتها وخذتها لحظني

ابو لجين.. شوف ولك اذا اتجرئت وعتبت باب بيتنا
اكسر رجليك
محمد.. اعتب بابكم ما خايف لان انا رايد بنتك بالحلال
وحرامي ما اصير من حاكم ما اخاف
وانا ولجين واحد يحب الثاني اجيت وجبت ناسي واهلي وطلبتها منك حسب الاصول بس انت رفضت
ابو لجين.. لك امشي زعطوط تتحداني
لعد بسيطة خلي انطيك درس بسيط لحتى تصير عبرة لغيرك وما تتطاول على اسيادك وترفع نظرك فوك وتنكسر ركبتك لان ما راح تطول ظفر بنتي لو على جثتي
محمد.. ما يشيل الراس الا الركبه والموت بيد الله
انتبهت على ابو لجين انطة اشارة
للحرس وعرفت بلحظتها محمد بخطر
وما راح تعدي السالفة على خير
اقتربو منه اثنين وجتفوه من ايديه وهو صار يتدافع وياهم
وواحد منهم ضربه بكعب السلاح على راسه ووكعه بالكاع واغمى عليه سمعت صرخة لجين
ركضت لعند ابوها تتوسل
ابو لجين .. اسمعني زين زاهر تاخذه وتسويله كرصة اذن
اريده كون يمشي على عكازات
باوعت للجين نزلت على ايد ابوها تتوسل
.. بابا ابوس ايدك عوفه لا تأذيه الله يخليك
دفعها .. سكتي ولج عار اليوم الا اربيج الظاهر الدلال
طلع عينج
لجين.. بابا اقتلني اذبحني بس لا تأذي محمد
واوعدك بعد ما افتح سيرته بالبيت ولا اخليه
طرقنا تتلاكة بس تركه الله يخليك
باوعت للحرس
شالوه وهو مغمي عليه وحطوه بالصندق مالت السيارة وشغلو السيارة وطلعو
عرفت بلحضتها اكو عالم غريب عجيب مختلف كل الاختلاف عن عالمنا االبسيط هذا العالم حيل معقد
ابو لجين لزمها من زندها وبصياح
.. والله ثم والله اذا سمعت او لمحت هذا الجربوع يم بابنا
راح يكون اخر يوم بحياته
دفعها وطلع برة وقبل لا يطلع حجة وية امها
ابو لجين .. راح اطلع ما اريد من ارجع اسمعلها اي نفس
لزمي بنتج وربيها
راح وترك لجين متحطمة
مردت كلبي والله خطية
ام لجين.. لج ليش هيج سويتي راح تعمين عالولد وتعرفين ابوج ما راح يرحمه والله اليعلم شراح يسوي بي
(((((((((()))))))))

ضرغام
رجعت لحياتي الطبيعية واستلمت ادارة الشغل احس روحي رجعت للحياة من بعدما جنت محبوس لان جان عجزي هو سبب سجني
طول هاي المدة جنت شبه عايش
وصلت للبيت راجع من الشغل
وببالي شغلة مهمة ضروري اسويها
من افرغ
دك نقالي ضرار يتصل
.. الو هلا باشا وينك
.. هلا بيك ضرار انا بباب البيت
.. يااخي شبيك انت مو تدري ابوي عازم عماتي وعمامي عالغدة وكلهم منتظرين يشوفونك
دخلت وشفت البيت مخبوص خبص
بعماتي واولادهم وبناتهم
اجتني عمتي حمدية وهيفاء
وسلمن علية واخذني بالاحضان
وبعد السلام الطويل الي عقلي يتخبل منة
ما اعرف شلون اعبر بالعواطف
هاي اللحظات جداً عسيرة علية اتذكرت هيام من تبجي
تتخربط كل احوالي واعجز كدامها ما اعرف شلون اوكف دموعها
جريت حسرة وابتعدت عن عمتي
وداخلي يهتز
شنو ضرغام اشو جنك حنيت لالا مستحيل احن لهيام
بس احتمال شكلي الغريزة تطالبني
ان حان الوقت احتاج مرة انا بشر مو معصوم وعندي احتياجاتي هذا كل ما بالموضوع
هزيت راسي اريد اطرد الافكار منة
صحت لميس
.. ميس اريد اسلم على جدتي خاجية سويلي طريق
.. فوت ادخل محد غريب يمها بس عماتي وامي
دخلت
وسلمت على جدتي وبستها من راسها
.. شلونج يالغالية
الحجية خاجية.. يمة بخير ما دامك انت بخير
جنت كاعد يمها
الحجية.. اكول يمة عيونك بيهم لمعة شوك وهاي اللمعة
صارلي هواي ما شايفتها بعيونك
ابتسمت.. حجية رحمة على والديج لا تسوين افلام
كلشي ما بية يالله مو درتي علية ادري بيج وين تردين توصلين
الحجية بصوت ناصي
.. اكول يمة مامش خبر عن بنات هناء
جريت حسرة
.. هانت حجية ما ظل شي واجيبلج بنات هناء لعند رجليج صارت كلها مسألة ايام
الحجية خاجية.. ولك يمة ضرغام فز كلبي شنو سامع
خبر عن بنات خالتك وانا ما ادري
ضرغام.. جدة خليها بوكتها انا اشرحلج لكل حادث حديث بس هَـا ما اريدج تجيبين سيرة بالموضوع
لا تخليني اتندم حجيتلج السالفة
ادري بيج انتي الحكومة ولازم ابلغ حضوري عندج
جنا نحجي
وقاطعتنا امي
حليمة.. شعندك انت وجدتك تتهامسون وتضحكون
ضحكونا وياكم
الحجية خاجية.. جنا نكول نريد نزوج راضي
ونفرح بي لان شكلج كبرتي وخرفتي واخاف على
وليدي خاف يهج من البيت
حليمة .. جا بدال ما تزوجين راضي خو زوجي اليمج استاذ ضرغام اولى من ابوه ما تشوفينه
وحيد كاعد بلا مرة لا هو لله ولا هو لابن ادام
ضرغام.. ههههه لاتضوجين يالغالية ترة الحجية خاجية
تحب تنصب عليج
اباوع على امي شلون تكلب بعيونها جنها ما عجبها
الحجي
حمدية .. اكلج حليمة اتذكرت صدك رنا بنت اخوج فاضل اتطلكت من رجلها
حليمة.. اي والله خية يكول اخوي طلع رجلها مو خوش ولد ويشرب
يكول راجع بالليل سكران متعارك وياها وضاربها وهي حامل ومطرحها ويومين نايمة بالمستشفى
وتالي الطفل مات وهو ببطنها جبير بشهر الخامس سولها عملية كورداش وسحبو منها الطفل جان الطفل جبير حتى بيومها رنا وصلت للموت
وهسة هذيج هي زعلانة يم اخوي
بس اللهم لا شماتة شكد اتمنيتها لضرغام هاي حوبتي طلعت بيها
الحجية خاجية.. هاي بنت اخوج خارمة طالعة عليج
ما تسلك عند الرجال تلكينها مسودة عيشتة وعيشت الخلفوه هلحطها وكتلها
حليمة .. حتى هاي طالعة علية
اشكرج حجية انتي شكو واحد مخربط تكولين طالع علية والله ياحليمة الج الله
ضرغام.. يالله انا اترخص رايح فوك لغرفتي اسبح
وانزل يم عمامي
حجية خاجية.. روح جدة اخذ راحتك
صعدت فوك لغرفتي وبالي كلة مشغول بالخطوة الجاية
واتصلت على رائد
رائد .. يا هلا باشا شلونك وين هالغيبة بعد ما شفناك من بعدما سافرت للعلاج
ضرغام.. هلا بيك ابو الشباب والله التهيت
بالسفر والعلاج وخلصتها كلة جلسات علاج الفيزيائي وترميم وغيرهم من المراجعات الطبية
اكول ابو الشباب
رائد.. كول باشا امرني ركبتي الك سدادة
ضرغام.. تتذكر اسم الشخص الي قبل فترة طويلة كلفتك بالبحث عن اسمه
رائد .. لا والله باشا ما جاي اتذكر ارجو منك المعذر بس انا باليوم استلم الف قضية ويمر علية الف اسم
ضرغام.. انا اكلك تتذكر بيوم الحادث
بيوم كلفتك تدور عن عنوان شخص اسمه احمد
وبيوم الحادث صادف اتصلت بية وبلغتني بمكان اسمه
رائد بتذكر.. هااااااا اي صحيح اتذكرت باشا
اي وبوكتها كلتلك موجود هذا الاسم من دكيناه بالحاسبة شفناه من سكنة اهل بغداد بس ما كدرنا بوكتها نحدد عنوان السكن بالضبط وانت صار الحادث مالتك
ونسيت الموضوع
ضرغام.. وهسة انا راجعلك اريدك تحددلي
عنوان ومكان هذا الشخص واكون ممنون اذا حافظت على السرية
رائد.. اعرف باشا بس هذا الاجراء يحتاجله وقت
علما نبحث
ضرغام.. اخذ وقت العالم كلة الك وبراحتك
اهم شي تلكاه
رائد.. اكول باشا بعدك على وعدك بتكاليف زواجي عليك تصير اذا دبرتلك العنوان
ضرغام.. من عيوني انت بس طيحلي على العنوان
مو بس زواجك علية حتى زواج ابوك على حسابي
رائد.. لا على بختك باشا كلشي ولا الوالد شتريد تطردنا امي من البيت بليلة ظلمة
(((((((((()))))))))
هيام بخوف
.. دكتور يعني شنو ابني يحتاج عملية وهو بهذا العمر
الدكتور .. نعم ولازم تستعجلون يحتاج زراعة كبد
قبل لا تتأزم حالته بالزايد
بس من هسة اكلج عملية زراعة الكبد مكلفة وتحتاج متبرع يطابق دم ابنج
فلازم انتي وابوه او واحد من الاهل نفحصكم ونشوف منو بيكم الي راح يكدر يتبرع بجزء من الكبد وخلي ببالكم ترة العملية راح
نسويها باربيل هناك يتوفر مركز متخصص بزراعة الكبد
جان الدكتور يحجي وانا احس بكلبي انخمط
وصار جسمي كلة يرجف
نزلت دموعي بدون ما اتكلم اي حرف
صرت اباوع على الدكتور
وهمست.. العملية شكد تكلف
الدكتور.. العملية جداً مكلفة
بس راح يفرق الكم هواي اذا يسويها بداخل العراق اما اذا تسون العملية بالخارج فتكلفكم بحدود ٥٠مليون اذا مو اكثر
لازم تعرفين ان العملية احتمال تستغرق حدود ال٢٠ساعة ولازم ولي امره يجي يوقع موافقته لاجراء العملية
ورة فترة طلعت من عند الدكتور وانا جسمي كله يرجف احس الدنيا ظلمت بعيوني يعني شنو حياة ابني بخطر ليش ياربي
جنت امشي وابجي بالشارع والناس تباوع علية
ارجف بخوف ربي دخيلك كلشي ولا علاوي ابني يصير بي شي والله اتخبل اموت ما اتحمل
ياربي لا اعتراض على حكمك
وصلت للبيت واني خاوية من البجي وراسي صدع
ريام .. هَـا هيومة بشري شنو كال الدكتور على نتيجة التحاليل مال علاوي
كعدت عالكرسي وصرت ابجي مفزوعة وخايفة على ابني
وسالت بخوف شنو شبي علاوي
.. علاوي عنده تلف بالكبد ويحتاجله عملية زراعة كبد
ومو هنا باربيل ومو بس هيج العملية خطرة ومكلفة
ما اعرف منين وشلون ادبر فلوس العملية
جنت احجي وابجي احس بروحي مثل الغركانة ادور
ع الامان وفوك هذا كله لازم يحضر ولي امره ويوقع
موافقته بأجراء العملية يعني شلون شسوي دبريني
والله الدنيا ضاكت بوجهي
.........................
ضرغام
اليوم راح نسوي مشية زلم لبيت خالي فاضل نطلب ايد بنته رفاه لضاري
جنت كاعد يم ابوي بالصالة وسمعنا امي تهلهل وتهوس
فرحانة نزل ضاري من الدرج كاشخ وفرحان
والكاع ما شايتله من الفرحة
الحجية خاجية .. اللهم صلي على محمد وال محمد يايمة
شايف خير وتستاهلها
يمة ضوير كبرت وصرت عريس
ضاري اقترب منها وباس ايدها
.. ربي يحفظج النة جدة وتزوجين البقية
جان يحجي ويباوع على ضرار
ضرار.. فال الله ولا فالك بيمن طالبني خليني هيج حر مثل الطير براحتي اتنقل ومحد يقيدني
حجيت بصوت ناصس وياه
.. قصدك تتنقل من حضن لحضن
.. مو احسن ما اصير مثلك زاهد
.. منو كلك انا زاهد
.. اعتكافك بالبيت وظلتك لحد الان بدون مرة هو اليثبت
.. متوهم اليوم راح افاجئك من يجي السيد ويعقد لضاري
....
صفنت واتذكرت قبل اسبوعين
جانت تجيني اتصالات من رنا بنت خالي فاضل
بالبداية غلست عليها بس ظلت تلح بالرسايل
اخذني الفضول حتى اقرة وحدة من رسايلها قبل لا امسحها وقريت
(( ليش هيج متكبر وشايف نفسك على بنت خالك
لك ضرغام رد علية والله راح اموت
محتاجتك ضروري
عقدت حواجبي هاي شتريد مني
اتصلت عليها وردت علية بسرعة
رنا.. الحمدلله على سلامتك ضرغام
اتمنيت اجيك للبيت واتحمدلك عالسلامة بس مثلما تعرف ابوي هواي متشدد علية لا طلعة ولا مشية لان مطلكة والله اختنكت
.. انا شكو متصلة علية وتحجيلي مشاكلج شنو تردين اونسج لو متصلة حتى تغيرين جو
.. لا بس حبيت اكلك انا اتطلكت من وراك
بأستغراب.. من وراي انا شكو
.. اي ما كدرت استمر بزواجي من واحد ما احبه
وانت حبك بعدة محتل گلبي اتخيل صرت ما اتقبل منة اي تصرف زين جان او شين وفوك هذا كله
هو شراب وما ينطيني مصرف
.. ليش جاية تسولفين حياتج شنو المطلوب مني
لحد الان ما افتهمت شي منج
رنا.. ضرغام محتاجتك
.. بشنو
.. ابوي يريد يزوجني لرجال شايب ويتخلص مني لان مطلكة عبالك انت عار عليه ويريد بكل طريقة يتخلص مني
.. رفضيه
.. ما يقبل يريد يزوجني غصب عني
ضرغام اروحلك فدوة اكسب بية ثواب
اني سمعت بيك انت صرت عقيم وما يصير عندك اطفال
رفعت حاجبي بأستغراب
.. شنو الربط موضوعي بسالفتج
.. والله ما تلكة وحدة تحبك وتموت على تراب رجليك مثلي صدكني والله ما راح اخليك تتندم اذا اتزوجتني
ما راح تلكة وحدة تصبر عليك حتى لو ما يصير عندك اطفال انا ما احتاجهم اهم شي عندي انت
تعرف شكد اتمنى حضنك ولو اعرف ادفع نص عمري
حتى اكسب يوم واحد بأحضانك
وصارت تحجي كلام مثل العسل ثارتني وهاجت عندي الغريزة

.. سدي النقال وبعدين نحجي بالموضوع
خفت لا اطمع اكثر بيها والشيطان يتربعلي
وهي مرية وانا رجال وهاي السوالف ما تجوز تدور بينا
سديت النقال منها ورحت بغير عالم دار راسي بكلامها وانا مو ملاك رجال وعندي احتياجاتي
اي صدك فعلاً هي اولى وحدة بالزواج
جنت متردد اتزوج ما اريد اورط بنات العالم وياي
بس هسة كلامها خلاني اكتشف عندي احتياجات
يالله هي الي طلبت بلسانها على الاقل من راح اتزوجها انا راح اكون صاحب فضل عليها
وبيومها فتحت الموضوع وية ابوي وامي وجدتي
واتفاجئت بأعتراض امي
حليمة.. لا يمة جا انت ما لكيت الا رنا بنت اخوي تريد تعقد عليها
راضي.. وشبيها بنت اخوج اشو مطلكة ومحد مكلبها لا يكون تستعارين من ابنج
حليمة.. انت ليش دومك تفهم كلامي كلة بالعكس
انا مو قصدي هشكل قصدي بنت اخوي واعرفها حامضة وما راح تتحمل عصبية ضرغام واطباعه الصعبة اخاف ما تسلك وياه وتسويله مشاكل
يمة اختار غيرها وازوجك اغاتها والاحلى منها بعد

ضرغام.. لا ما اريد الا رنا على الاقل راح اتزوجها وانا ضامن ماكو واحد مسوي براسي فضل ومتحمل

علتي هي مطلكة وانا عقيم واثنينا لايكين لبعض ما اريد تجي مرة وتسوي براسي فضل متحملتني وتالي تكعد تعيرني وهذا الشي مستحيل اقبل بي
حليمة.. ليش تحجي هشكل جا انت مو سافرت هناك للبنان وكعدت تتعالج هناك
ضرغام .. اي انطوني هناك بلبنان هواي علاج وداومت عليه بس شلون اعرف نفسي اتعالجت اي غير اجرب بالاول وماكو احسن من رنا اعقد عليها واشوف نفسي وياها
ولا تنسين هي حبلت من زوجها الاول وطرحت
راضي.. يعني انت تشوف هشكل ودارس الموضوع
ومقرر قبل لا تجي وتحجيلنا
ضرغام.. اي يابو ضرغام انا قررت واجيت ابلغكم
ما اريد لا عرس ولا هوسة اعقد عليها بنفس يوم عقد اخوي ضاري على اختها رفاه
............
قاطع افكاري اصوات الهلاهل والهوسات لعماتي ولأمي
ضرار.. خير باشا وين صافن احجي وياك وانت ما تجاوبني
.. شكو شبيك
.. ما افتهمت عليك شنو اليوم راح تفاجئنا بعقد ضاري
راح تفجر المهر لو تخطف العروس
ابتسمت .. لا راح اعقد على اخت العروس
انسحبت الابتسامة من وجه ضرار
.. شنو تحجي صدك لايكون تقصد رنا
.. اي رنا وشبيها رنا
.. لك هاي شيطانة شمعنا هي تتزوجها انت ما تعرف عنها اي شي يا خوي هاي ما تفيدك
صرت افور ما اريدة ياخذها لحد هسة كلام خالي فاضل
وكلامها يرن بأذاني
.. ليش شبيها سامع عنها شي مو زين شايف عليها شي مو راحة كلي
ضرار.. تعرف امي خطبتها الك من خالي فاضل قبل سنة وهو ورنا رفضو وصارو يعيرون امي بيك وبعقمك وفضل ابن صاحبه عليك وزوجها لغيرك
.. واذا اكلك هي اتصلت بية وطلبت مني بتوسل استر عليها وانقذها من ابوها يريد يزوجها لواحد شايب بكد ابوها
ياخوي ترة انا مو كامل خليني اجرب حظي وياها بلكي
يكعد ولك انا عقيم
ضرار .. وهيام
ضرغام من جاب طاريها حسيت بنغزة بكلبي
ااااخ يا هيام باوعت عليه
.. وشبيها هيام
.. شنو راح يكون موقفها من زواجك اذا درت
.. هو بالاول خلي اوكع على مكانها والله كريم
كمت من مكاني ورحنا لبيت خالي فاضل
وصارت الخطوبة وعقدنا لضاري وتالي عقدت على رنا حسب الاتفاق ماكو عرس بس عقد واخذها وياي لبيتنا
وصارت الزفة وبيومها
صعدتها امي فوك لغرفتي قبل لا اصعد
كلت خليها تاخذ راحتها اخاف تستحي مني
بعدها رحت لجدتي عبالك اريد منها تطمني قراري بالزواج صحيح وما راح اتندم عليه
باوعت علية والتقت نظراتي المفضوحة وية نظراتها العارفة
الحجية خاجية.. جدة ضرغام بالمبارك منك المال ومنها
العيال الله يهدي سركم
ضرغام.. ليش احس بيج تحجيها مو من كل كلبج
الحجية خاجية.. ما اكدر اكول شي كل الحجي انكال وصحيح حجيك شلون راح تعرف بروحك اتعالجت اذا ما تتزوج وتجرب وماكو احسن من هاي بنت اخو حليمة تتزوجها وتشوف نفسك
ضرغام.. ادعيلي يالغالية
الحجية خاجية.. روح يمة مهنة بيها
رحت صعدت ووكفت كبال باب غرفتي
سبحان نفس الموقف بس شكد فرق بين دكات كلبي
بزواجي من هيام ولهفتي وفرحتي بيها عكس هاي اللحظات الي كاعد امر بيها
حسيت بالنفس ثكل على صدري وعرك جبيني
اتوكلت على الله ودخلت
شفتها كاعدة عالسرير ولابسة ملابس شفافة سودة
ومنتظرتني بكل لهفة ظليت واكف متصنم بمكاني
ما اعرف ليش حسيت اكو غلط بالموضوع
انتبهت عليها كامت من السرير واتقدمت مني
ورفعت روحها وهمست بصوت ناصي
رنا.. الف مبروك عليك اني
اقتربت مني وحوطت ركبتي بيديها وطبعت شفايفها على شفايفي ما حسيت بأي شي
ولا اتفاعلت وياها كرهت حركتها حسيت بيها هواي جريئة هو حلاة البنية خجلها يعجبني انا اعلم زوجتي واكون القائد بهيج لحظات اشو هاي هي البادرت
رنا.. احبك ضرغام ما مصدكة انت صرت حلالي
نزلت ايديها من على ركبتي
وابتعدت عنها
باوعت بأتجاه الحمام
.. راح ادخل اسبح وارجع
ما اعرف ليش ادور عذر حتى اتهرب منها
دخلت للحمام وفتحت الدوش ودخلت جواه
شنو شبيك ضرغام مو هذا الي ردته ليش ما تتوكل
وتشوف شغلك وياها هي هاي سنة الحياة
ضربت على صدري
اي بس احس هذا الحضن ما انخلق بس لوحدة
وهاي الوحدة شاردة من احضاني
لا لا مستحيل اخليها تتحكم بية وهي بعيدة عني
ما اخليها اتأثر علية هيام حالهة حال اي مرية
اكدر اعوض حضنها بحضن رنا كلهم يشبهون بعض ماكو فرق وهسة راح اثبت هذا الشي لنفسي
سديت الدوش ولفيت المنشفة على خصري
طلعت من الحمام شفتها نايمة بنص السرير منتظرتني
غمضت عيوني
وطفيت الضوة واتجهت عليها
وبليلتها امتلكت رنا واخذتها وصارت حلالي
بس ما حسيت بَــإي ~ احساس وياها
مجرد اشبعت غريزتي عندها صارت بالنسبة الي
جسد اخذت منها حاجتي وابتعدت عنها ورحت لبست ملابسي
وانا النار كايدة بصدري
طلعت بليلتها من البيت بكبره
ظليت الليل كله اسوق بسيارتي ما اعرف وين اريد اروح بس ما اريد ارجع للبيت
ركنت السيارة مقابيل الشط ونزلت
جان الكورنيش فارغ والدنيا ليل اسود مثل حالي
الله ياخذج يا هيام الله يلعنج
ليش ما جاي اشوف حالي بحضن رنا ليش ما كدرت انام بحضنها ليش معقولة حبج بكلبي صار مثل اللعنة
وما جاي اتقبل بحياتي اي مرة
(((((((())))))))
بعد مرور شهر
بلال .. دبرتلج رقم خالج راضي
كمت من مكاني وكلبي كلة يرجف
.. صدك شلون كدرت تحصل عليه
بلال.. ما عليج عندي واسطات ومعارف بكل مكان
هسة شنو راح تسوين
هيام.. ما عندي غير حل مجبورة الجيء لبيت خالو واتصل على خالو راضي
واطلب منة المساعدة
وشي اكيد راح يقبلون يساعدوني
بلال.. بس هيام خلي ببالج ترة بهذا اتصالج راح تفتحين على نفسج ابواب نار جهنم
.. مستعدة اروح للنار برجلية في سبيل انقذ حياة ابني حتى لو اعرف اموت من بعدها عادي

يتبع