رواية تائهة بين اروقة الماضي الفصل السابع 7 - بقلم الكاتبة نهى

تائهة بين اروقة الماضي
بقلمي nuha-d-h
((مساء الانوار عليكم يا احبتي القراء))
🌷🌷🌷🌷اتمنى لكم قراءة ممتعة

رجعت اني وبابا يوم ثاني لبغداد
استقبلتني امي وريام بلهفة وفرحة عبالك جنت مهاجرة صارلي سنة مو شهرين
وانتبهت لريام تباوع علية وتضحك خطية
فرحانة بسلامتي وكل ساعة تجي تحضني
: لج الله لا يحرمني منج يا اطيب واحن اخت بالعالم
والله اموت بدونج ما تعرفين بيتنا من وراج شلون صار اظلم وماما وبابا شلون وجهم صار فاهي من بعدج

بلحظتها ادركت من هاي الهوسة كلها
ان الانسان بدون اهلة ما يسوى شي
لذلك الواحد من عدنا من يريد يعيش حياته لازم مو بس يفكر بنفسه عليه يفكر ويسوي حساب
للي عايشين حوله ويحاول يطمن كلوبهم القلقة

ومنها اخذت على عاتقي ابذل ما بوسعي لحتى اشوف البسمة والفرحة بعيون ماما وبابا وريام
بديت مشوار جديد بحياتي
وصرت يوم عن يوم ابتكرلهم اشياء تجمعنا سوية
طلبت من بابا يشتريلنا لعبة طاولي
وصرت كل يوم العب وية بابا
ونسوي جو من المنافسة جنت فعلا اتونس
وجانت ريام تطالب تريد تلعب داس طاولي وية بابا
وامي كل ساعة تشحتها من يمنا
وتحجي عليها حتى تروح تدرس للسادس
واتفقنا اني وريام كل خميس نسهر سوية على فلم رعب ههه نحب الرعب
وهذا الاتفاق جان بس يشملنيً ويشمل اختي لكن
اتفاجئنا ببابا وماما جانو مندمجين اكثر من عدنا
من اشوف شكل امي شلون مندمجة تباوع عالفلم
وتكرز حب وشلون كل ساعة تكمز
و اسمعها تهمس
: سلامٌ قولا من رب رحيم
واضحك على بابا من يقلد عليها
ابو هيام : تدرون هاي افلام الرعب اني اكثر واحد مستفاد منها
عرفت شنو قصدة وضحكت عليه
ريام : شلون بابا
ابو هيام : بابا افلام الرعب تقرب الاحبة من بعض
لان امج جبانة والليل كلة تظل خايفة
هيام : هاي شنو ماما حركات علينا
ام هيام : ما عليكم بأبوكم يمكن كبر وصار يخرف
ابو هيام : اه هشكل لعد خوش هذا هوة بس شوفي مو تكعديني بالليل وتكولين اركان خايفة احضني
رياااام : هههههههههه ويلوموني من احبك واتمنى واحد يشبه صفاتك وحنيتك
ام هيام ببتسامة : هو واحد بس ابوج وصار من نصيبي ما يجي منة اثنين
انتبهت على امي تريد تنسيني وتلهيني وجع كلبي
وتحاول تقوي علاقتها بية حتى ما ارجع اتقوقع على نفسي
مرت الايام وقرب الدوام وصارت ريام هالسنة بكلوريا سادس
وبابا اخذنا اني وريام حتى نشتري زي للكلية
لان ملابس العام ما يكفوني
الحمدلله صرت اشبه البطريق من السمنة

طبعا نبراس اتزوج بأثناء ما كنت مسافرة لبيت عمتي صادف عمتي ما كدرت تحضر عرسه بوكتها لان رجلها انشغل وما اخذهم رب ضارة نافعة الله يحبني ما راد انحرج
وبعدها سمعت بنبراس اشترة بيت جديد بمنطقة راقية وطلب من اهلة ينتقلون
وياه بس امة وعمو احمد رفضو وكالو هاي منطقتنا وناسنا منكدر نعوفهم اتعودنا عليهم
طبعاً غصب عني توصلني اخباره عن طريق بنات عمي ويجبون طاريه بصورة عابرة من امي تسألهم عنة من باب المجاملة
جنت احاول بقدر الامكان اتذكر طاريه
مو بيدي شكد ما ادعي بالقوة
بس غصب عني يغدرني كلبي والكة نفسي
مشغولة البال افكر بي واتذكر ايامنا سوية
وبعدين اصحى على صدمة غدره وادخل بعدها بحالة
حزن مفاجيء
((((((((()))))))))
اليوم اول يوم الي بالكلية من بعد غياب
عن الكل وقطعت اي تواصل وية البنات
اليوم بابا وصلني للكلية وطلبت منة لا يجي علية ادري بي مشغول وما يكدر يترك دوامه ويطلع يرجعني
راح اعتمد على نفسي هالمرة وارجع اركب نفرات لوحدي
بلحظتها اتذكرت ذيج الايام من جنا اني ونبراس
نروح سوية للكلية
ابو هيام : يالله بابا مع السلامة ما اوصيج ديري بالج على روحج
هيام: صار بابا حبيبي لاتخاف علية اعجبك
بس واحد يحاول يفكر يتحارش بية ما اتعب نفسي بس اكعد عليه وافطسة واموتة
تدري بية صايرة من الوزن الثقيل
ابو هيام : عفية عليج بنت ابوج اريدج دوم هشكل قوية حتى يكولون صحيح هو ما خلف اولاد
بس عندة بنات يسوون عشر زلم
نزلت ودعتة ورحت دخلت للكلية وجنت مستحية
عبالك جديدة اول يوم الي بالكلية
يمكن لان هالمرة محد وياي وماعندي صديقة ترافقني وتنتظرني مثل كل سنة
وفوك هذا كلة شكلي المبهذل من ورة السمنة
جنت كلش مرتبكة وخجلانة
خاف جنت قبل ما عندي ثقة بنفسي من جان جسمي حلو هسة الثقة انعدمت وية هذا وضعي
هجران نبراس الي تركني وراح اتزوج غيري
قتلت اخر ثقة بالنفس احس صرت ضعيفة الشخصية
جنت امشي ومدنكة راسي احس بروحي
ضايعة
دخلت لقاعة المحاضرات ورحت اخذت مكاني عالاستيج وكعدت واني احس بنظرات الكل يباوعون علية همة نفسهم طلاب وطالبات دفعتي
كانت نظراتهم متعاطفة وياي
اجيت اختنك من هذا الاحساس والشعور من الذلة
اصعب شعور من تشوفين بعيون الناس العطف وكأنها تكول خطية هاي البنية المنبوذة المهجورة
السمينة
وصار هواي كلام وهمس بالقاعة يوصل لاذني ما اعرف همة ديحجون بية او لا بس شخصيتي الضعيفة وصلتني لعدم الثقة بنفسي
وصرت كلما اشوف اثنين يحجون بينهم اتخيلهم ديحجون علية وصارالكلام يهجم على عقلي مثل الوسواس والهلوسة
((خطية هيام تركها حبيبها وابن عمها وراح اتزوج غيرها
والعبارة الثانية
(( الله يعلم شنو شاف عليها وهجرها
(( والثالثة اعوع صايرة شسمنها حقة يتركها ويتزوج غيرها اذا هي صايرة جنها ثلاجة
كانت كلها اصوات داخل راسي الغبي
هي مجرد همسات اسمعها بداخل القاعة
يتكلمون بينهم والجائز اصلا مو اني موضوع كلامهم بس الوسواس راح يقضي علية حطيت ايدية على اذاني
اريد الكلام الي بداخل راسي يتوقف بس ماكو
وخفت لا انهار سحبت نفس عميق حتى اهدىء من روعي شوية
رفعت راسي واجتي عيني بعين اخر شخص جنت اتمنى اشوفة بهاي اللحظة همست بدون وعي
: اسراءشتسوي هنا !!!!!!!!
انتبهت عليها لابسة زي الكلية معقولة حظي الفكر جابهة هنا راح تداوم بنفس الكلية الي اني بيها
لا هاي كلش هواية علية

درت وجهي عنها وصارت عيني بعين لجين
جانت تباوع علية وبعيونها نظرات اعتذار وتوسل حسيت بيها تريد تحجي وياي
اختنكت وثقل النفس داخل صدري
ابد ما مستعدة اتواجه وياهن اخاف انهار وما اتمالك نفسي واهجم عليهن واسبب بموقف محرج لنفسي كدام الطلاب
يا رب دخيلك ساعدني ربي الطف بحالي ولا تفضحني بين الطلاب اموت والله واحتمال ابطل وما اداوم
وصارت الاصوات تتزاحم وتتصارع بداخل راسي
وصرت اهز براسي برفض للجانبين معقولة راح انهار
اتمنيت بلحظتها الموت او اختفي من كدامهم
ما حسيت الا على ايد لزمت ايدي وكومتني من مكاني وسحبتني لخارج القاعة جنت امشي
ورة الشخص الي جاي يقودني خلفة لخارج القاعة مثل المخدرة رفعت راسي
وكفنا بحديقة الكلية على جنب
التفتت علية وكانت نظراتها كلها غضب
ريتا: يالله هسة هنا ابجي وكتلي روحج
وبعد اذا تردين اجيبلج سجينة من الكافتريا عندهم هواي ادوات حادة تنفع للانتحار
كتلي روح انتحري وسببي لنفسج بفضيحة كدام الحرم الجامعي وخلي قصتج على كل السان
بس خلي ببالج كم يوم يحجون بسالفتج وبعدين ينسونج
جنت ارمش بعيوني واشوف غضبها بتجاهي
اباوع عليها وجنت محتاجة حضن صديقاتي الي الزمن
غدر بينا وفرقنا
رجفت شفايفي وبدت الدموع تخوني وتنزل بدون
ارادتي
وبدون مقدمات انتبهت لريتا
فتحت ذراعها ثنينهم واخذتني لحضنها الدافي كان طعم حضن المجروح بعد فراق وجفة الة طعم غريب
صرت اشهك وابجي واشتكي مدى الالم والظلم الي اتعرضت له
اني جاي اعاني من الالم لان مصدر الالم موجود كدامي وراح يداوم وياي بنفس الكلية ولازم اتعود اشوفهم سوية يوصلها بصفتة زوجها
رفعت عيوني وباوعت على لجين تباوع علينا من بعيد
وتمسح بدموعها

((((((()))))
باوعت لريتا الي خذلتها واذيتها بالكلام واكفة كدامي مقهورة على حالي وكلبها ما انطاها
تتركني لوحدي بهذا الموقف المحرج
لذلك اتدخلت اتلاحكتلي بالوقت المناسب
همست
: ريتا ليش ساعدتني ليش ما تركتيني اعاني لوحدي اني استاهل كل الي ديصير بية اني نذلة
وغلط وما استحق منج ان تساعديني وتسنديني
ريتا : اعرف هذولي الصفات كلهم بيج وضيفي فوكاهم غبية وعمية وساذجة
وطيبة وحنونة وعزيزة على كلبي وبعد شنو نسيت
هَـا ولفات الفلافل الي جنا ناكلهم سوية جان بيها هواي ملح لدرجة رفعت ضغطي بس بنفس الوكت
غزر بية الملح والزاد الي بينا
لج عوبة صحيح اني وياج اتعاركنا بس بعدني اتابع اخباركم انتي ولجين وبيوم الي وصلني خبر خطوبة نبراس اني اتخبلت افكر بيج وبوضعج وانصدمت من عرفت بان لجين الي جنت اشك بيها مالهة يد بالسالفة جان ضني بلجين مو بمحله واتوقع اني ظلمت لجين من قطعت علاقتي وياهة وما انطيتها فرصة حتى تدافع عن نفسها
كان المفروض
من اول يوم شكيت بيها كان لازم اوجهة واحجي وياهة
على الاقل انطيها فرصة تبرر وضعها وتفهمنا سوء الفهم الي وقعنا بي
بس اني وانتي استعجلنا بالحكم على لجين
تدرين الاشكال الي صار بيني وبينج والتجريح الي بدر مني ومنج لبعضنا خلاني اصير عمية وما اشوف الحقيقة
ومن سمعت بيج اتمرضتي
اتمنيت ادوس على كرامتي واجيكم للبيت
بس جنت خايفة تفهميني غلط وعبالج جاي اتشمت بيج
لان ادري بيج بذيج الفترة انعدمت عندج الثقة بالكل
هيام: كلامج صحيح جانت اسوء لحظات بحياتي
مريت بيها
ريتا : وهاي انتي كلتيها يعني عدة الاسوء وما بقة الا القليل البسيط وان شاء الله
راح تكدرين تجتازين هيج عثرة ولايهمج واني موجودة واياج مستحيل اتركج لوحدج سواء قبلتي او ما قبلتي اني وراج وراج
رجعت حضنتها
: لج ريتا ما تعرفين انتي شلون نقذتيني من موقف محرج والله خفت انهار كدام الطلبة

ريتا : اهوور يالله عاد سويتني سبايدر مان (الرجل العنكبوت)
ونزلتي بية نقذتيني وما نقذتيني
هيام ابتسمت على تعلقيها
رفعت عيني باوعت للجين واكفة وية بنات من مرحلتنا وتباوع علينا اني وريتا
حسيت بنظراتها حنين الصداقة وخايفة تبادر وتقترب مني خاف افشلها صديقتي واعرفها

بس ما ادري ليش من اشوفها اتذكر غدر نبراس وبنت خالتها قريبتها وكلبي يصد منها
سمعنا صوت بلال
بلال: هاي شنو خيانة في منتصف النهار
لزمتكم متلبسين
ليش ما تسألون علية بذاتات عباتلكم
ماتكولن صديقتنا الثالثة خطية شبيها ما بيها
عايشة ميتة
عقدت حواجبي
: منو الثالثة
بلال ويأشر على نفسه : منو بعد اكو غيري حاتة بالكلية انزوووول عليكم
وصار يرمش بعيونة مثل البنات ويسوي حركات بيدة يهفي على وجههه يقلد البنات
ضحكت عليه
كان بلال يعرف بقصتي وادري بي يسوي هشكل حتى يرفه عني كان بالنسبة الي بمثابة الاخو الي ما ولدتة امي من بعد ما فاجئتني ريتا
بالاخبار الي جنت غافلة عنها
ان بلال متعارك وية نبراس ومتضارب وياه
علمودي لان سمع بي خطب غيري واني وكعت متخربطة بالمستشفى من وراه
والمفاجئة الاكبر من كالت ريتا ان هو بيوم الي سمع بيج بالمستشفى راح هناك واتحمدلج عالسلامة من ابوج وامج وهناك شايف نبراس وصايرة العركة
وكعد يلوم بي
واتذكرت امي كالت اجة وواحد من طلاب القسم مالتج كال لبابا جنت فايت. بالصدفة وشفتكم مخبوصين وعرفت هاي زميلتي واجيت اتطمن عليها خطية
بلال: الله عليكم بنات خلي نظرب اول محاضرة واخذكم للنادي اعزمكم ريوك على حسابي واحجيلكم اخر اخباري
ريتا : اني موافقة اذا على حسابك
بلال : بس مو تفرحين اطلعها منج بغير يوم ترة اني كريم بس كرمي محدود
ريتا : منو قصدك كريم مراد
ضحكت على كلامهم وفعلا كدرو ينسوني محنتي
ورحنا سوية وطلبنا ريوك سندوشات وعصاير
وكعدنا ناكل وبلال يحجي
بلالً: سكتو بنات ما حجيتلكم اخر اخباري
ريتا: شنو كول
بلال: لج دادا نهو علية
شركت بالاكل من وراه جان شكلة يخرب ضحك من يحجي
هيام: لك شنو نهو عليك قابل انت بنية
بلال: اندري اي غير همة
ريتا : منو همة
بلال: سمعي يامحفوظة السلامة
اهل ابوي بالناصرية صارت عندهم فاتحة رحنا انا والوالد هناك خطار
اشوً هذا عمي كعد يلمح لابوي
هاي شنو ما شاء الله ابنك صاير عريس
وكل ساعة يضربني بكتفي
ولزمني من زندي عبالك جاي يعاينلة خروف فاتحة
ويشوفة مربرب لو معصعص
عايز بس يكلي بالله امشي كدامي
اخاف اعرج كدامه
المهم ابوي غلس بس عمي لطش وما تحمل يخلينا نرجع لبغداد الا ونهى علية
وكال قبل لا نسافر
بلال بنتي الك وماتصير لغيرك وهذا انا كلت ما ادري ليش كلبي حبك وبنت العم لبنت العم
ريتا تضحك: وانت شسويت
بلال: اني ضحكت وصارن خدودي حمر وخجلت ودنكت
من سمعت كلمة بنت العم لابن العم نغزني كلبي
ريام : لا بلال عفية عن الشقة شنو سويت
بلال : ظليت اصيح بالسيارة يم راس ابوي
واكول امدة حظج جنان استغفر الله جنان
هاي وين جانتلي لو الله خالقني رجل كرسي ولا هاي الزواجة
هيام : ليش تحجي هشكل شكو بيها تتزوج بنت عمك
بلال : اي هي غير جنها عمي جعفر
وجها جنة ملعب وخشمة عارضة مال الكول
ريتا : هههههه خرب بعد ما اكدر كافي راح اوكع من الضحك حرام عليك صنفت البنية تصنيف
بلال : هي وينها البنية هو غير اكو ابنية بالاول وبعدين احجي
هيام : وتالي شسويت بهاي المصيبة
بلال: كلت لابوي شوف من هسة اكلك
زواج ما اتزوج
وابوي : حلف لو هي ما تبقى هاي ظلتك
بلال: بعد احسن خفتاً وراحة تسوون فضل علية ولا هاي المصيبة

بلال : الا صدك تعاي كليلي اهلج شنو جانو يوكلونج بالعطلة وهيج صايرة اشو انة اكل ابوي واكوم وما جاي اسمن
هيام: عباتلك والله ما جاي اكل بس اني يمكن سمنت من القهر
بلال غير الموضوع : بس تدرين بعد احسن السمن هيبة وداعتج تفيديني بالفزعة من اريد اتعارك
ادز عليج من يشوفون واحد سمين كبل يشردون هههههه
هيام: خرب حطمت انثوتي وصرت احس بروحي
جاسم ابو المولد مال منطقتنا هههه
بلال : ولا يهمج بعد كلة اصيحلج جاسم ابو المولد
ريتا: احم احم بقيت بس اني انثى بينكم
بلال : لا ليش انثى وانتي عمي جعفر لان تنطينة شبه
كامت ريتا من عالميز ولزمت بطل الماي تريد ترشة على بلال وهو كمز من مكانه وركض
هيام بضحكة : لك تعال وين شارد والحساب منو يدفعة
بلال: عمي جعفر يمج هو يدفعة
جنت اضحك واجتي عيني بعين لجين الي جانت تراقبني ووين اروح تروح الكاهة وراي
حقها مامتعودة بدوني ولا اني اعرف بدونها اثنينا تربينا سوية
خرب مردت كلبي جان شكلها مثل الطفلة الي تريد
تصالح اختها الجبيرة وتظل مبرطمة وتريد حضنها بنفس الوقت خايفة منها
بعدت نظري عنها
ورجعت اكمل كلامي وياهم
مرت ساعات الدوام بسرعة بدون مانحس عليها وبيومها ارتفعت معنوياتي وية بلال وريتا
احياناً يصادف الشخص اصدقاء بمدة زمنية وجيزة تصبح علاقتهم قوية وعميقة بعيدة عن التزيف والرسمية والايام اثبتت ان الاصدقاء يبين معدنهم بالمواقف
(((((()))))))
رجعت للبيت بعد ما ريتا اصرت توصلني واتفقت وياي كل يوم تجي علية
ونروح سوية للكلية
موقفها وياي ابد ما راح انساه وراح يبقى دين بركبتي
دخلت للبيت وجنت كلش سعيدة وفرحانة
سلمت على امي وباوعتلي وشافتني شلون فرحانة حسيت بيها اخذت نفس وكأنها جانت حابسة الانفاس ومتوقعة راح ارجعلها منهارة وابجي
ام هيام: هلة بيج هيومة يالله بدلي وتعاي اتغدي ويانة
ابو هيام: تعاي بسرعة لحكي امج اليوم مسوية دولمة ترة كوة لازمين ريام لا تهد عليها وتخلصها كلها
ريام: احلف والله ليش منو صارلة ساعة كل ساعة يخمطلة صبع دولمة من الجدر جنة حرامي
واني صرت حبابة وما فتنت عند امي عليك
ابو هيام- : لا والنعم منج على الاساس هسة انتي ما فضحتي ابوج كدام امج ً
عفتهم وطلعت اضحك عليهم
بدلت واني ادعي بكلبي ربي احفظهم الي وطولي بعمرهم
(((())))))))(
بعد مرور شهر
جنا كاعدين اني وريتا دنراجع بالملزمة
سمعت اصوات عركة وطلاب متجمعين
ريتا: خير شكو ليش هذا الصياح
هيام: يمكن هجمو علينا المغول
انتبهت لاسراء عبرت من يمي هي وصديقاتها
اتعلمت عليها صرت اشوفها بكل مكان اني بي
واعرف بيها ليش تراقبني وصارت كل ما تعبر من يمي تسمعني كلام بسامير
بس اني ما اهتم لكلام لوحدة زعطوطة معذورة
راح تبقى دائما تباوع علية كمنافسة الهة بحب نبراس
ما تدري نبراس طلع من كلبي وصار ماضي ميت
حتى صارلة كبر مهجور بكلبي
انتبهت على بنية ركضت لاسراء
وكالتلهة : لحكي بنت خالج لجين دتتعارك وية
ولد وهسة كاعدة تبجي
ما اعرف ليش نغزني كلبي من سمعت بلجين
متعرضة لمشكلة خفت عليها وظليت اترقب
وانتظر اسراء تروح تفزعلها وما تتركها لوحدها لكن انصدمت من سمعت جوابها
اسراء: وشنو يعني واذا متعاركة اني شكو خليها تستاهل خليه يطيح حظها اصلا اني وياهة منتحاجة

احس دمي كام يفور من ورة حجيها صدك لايكة لنبراس خرب جدر ولكة غطاه
باوعت لمكان الهوسة
كمت من مكاني ما اتحملت
هيام: كومي ريتا
ريتا : شكو وين نروح
هيام: تعاي وياي واني اكلج
رحت اتجهت على مكان الهوسة وشفت لجين دتتعارك هي وولد
الشاب: انتي فد وحدة مغرورة وشايفة نفسج مااعرف على شنو على الاقل اعترفي بغلطج
انتبهت للجين جانت تبجي وتمسح بدموعها
: احترم نفسك انت هواي تجاوزت والله اذا اخليك بلسان بابا يطيرك ورة الشمس
الشاب: ههه والله يالله واذا ابوج مسؤل وشنو يعني
ترة ثقي بالله ما يشيل الراس الا الركبة
ويأشر عالسما
اقتربت منهم : لحظة اخوية على كيفك ترة ميصير تفرض عظلاتك على بنية
الشاب وهو متنرفز : انتي ما عليج لا تتدخلين بشي ما يخصج
هيام : لا لجين تخصني وهي صديقتي اكدر اعرف على شنو خابص الدنيا ولام الناس
عليها
الشاب: صديقتج المصون دعمني السايق مال بابا
يقلد صوتها
وتكول ما صار شي بيك لتكبر السالفة
يعني فوك حكة دكة هاي بدال ما تعتذر مني صارت تهددني بأبوها
وصار يفر بيدة بستهزاء
والله يالله ابوج جبير على نفسج مو علينا سامعة
اباوع عالولد يحجي باعصاب
جان شكلة مبين عليه من ملابسه بسيط
بس يملك قوة شخصية ملفتة للانتباه
لجين بصوت يرجف من البجي: والله ما جنت متقصدة
بس هو ما عندة اسلوب
هيام باوعت للجين وهمست الهة لا اراديا
نسيت نفسي: لج عوبة اعتذري منة وفضيها مو دتشوفينة صاير نار وكاعدة تخوفينا بابوج
مسحت دموعها
ورفعت راسها تلقائيا وحجت وية الولد
: اخي اني اعتذر عن الحادث
باوعت للولد فلت وجهة لان مجان متوقع تعتذر من عندة
شفتة اتغير اسلوبة لوفة بالتسعين من عصبي نار
الى انسان عطوف
مسح وجهة بارتباك : احم احم مصار شي اني المفروض اعتذر لان جنت معصب ودايخ
وانتي اجيتي وصرتي بوجهي ووكعت الحركة كلها براسج
والله يا ادم كدرت حواء بكلمة وحدة تمتص غضبك بلحظة كدرت تغيرك من نار الى ثلج
اباوع للجين ابتسمت ابتسامة خجولة
ودنكت
وهو ظل صافن عليها
شكلهم نسو نفسهم خرب
لكزتها بحركة تلقائية وهمست يم اذنها
: شنو هذا الخجل معقولة هذا حب من اول هدة
لجين باوعتلي وهي تضحك بفرحة ممصدكة احجي وياهة : اي يمكن اختج وكعت بالحب من اول عركة
الشاب : احم انا اترخص واعتذر مرة ثانية اذا سببتلج باحراج بس انتي هم بطلي سالفة بابا وبابا
وخزرها
نقلت نظري بينهم : احم ما اعرف طلعت مني سهواً
واعتذر منك شنو كلت اسمك
الشاب: اسمي محمد
ريتا همست : شنو خير ست لجين اشو صار تبادل اسماء وبعد واكفة وشاكة الحلك من الاذن للاذن بعد فد مرة طلبي رقم نقاله
لجين بسذاجة وعيونها عالولد : لا عيب استحي
هيام: عزة بعينج يعني بيج مجال تتبادلين الارقام

محمد: انا اترخص عن اذنكم
وابتسم للجين وراح
من راح الولد وبقينا اني ولجين وريتا
انتبهنا على نفسنا ووضعنا وصرنا نتبادل نظرات الاحراج والتوتر وحسيت على روحي
درت وجهي واجيت انسحب لكن وقفني صوت لجين المتوسل
لجين: هيام لحظة اوكفي لا تتركيني بعدما
علكتيني بامل رجعوج لحياتي
والله اتحطم
بجت وحطت ايدها على وجها
: ما تعرفين حياتي من بعدج شلون جانت خاوية
لج هيام انتي اقرب الي من خواتي ارجوج انطيني فرصة ابررلج موقفي احلفج بصداقتنا وعشرتنا انطيني فرصة افهمج الصار
حن كلبي عليها مو بيدي
ريتا : يالله عاد هيام فضيها احجيلج كلمة جنج ابوالهول مصنمة
ابتسمت على كلام ريتا : موافقة بس بشرط
لجين بلهفة : كولي شنو شرطج
: تشتريلي لفة فلافل على حسابج
لجين: لج مو بس لفة فلافل اشتريلج حتى ابو الفلافل بكبرة اجيبة الج
ظلينا نضحك ورحنا كعدنا سوية بالنادي
احس جنت فاقدة شي مهم بحياتي وبرجعة علاقتي وية لجين ادركت اني جنت افتقد عشرتنا وصداقتنا
رحنا كعدنا بالنادي
وصارت لجين تحجيلي عن بنت خالها وشلون صارت علاقة بينهم
لجين : تدرين اني مثلج متفاجئة ومصدومة بنبراس لان
اني اكثر وحدة عاشت وياكم والشاهدة على حبكم وزعلكم ومصالحتكم
لتتوقعين راح اقبل اشوف نبراس وية وحدة غيرج واسكت لا ونوب منو البنية تطلع قريبتي وبنت خالي
بس شكلة نبراس عرف يلعبها صح
لان من رحت واجهت اسراء وصرت احجي عليها وسألتها شلون وصلت لنبراس
((كالتلي من طلعنا اني ووياج وخواتج للمول صادف هو وصلنا
حبيتة وظليت المحلة بس هو بالبداية جان ما منتبه علية
بس بعدين من اخذت رقمة من نقالج
وصرت كل يوم اتصل عليه ونكعد نسولف ونحجي وصار يعرف عني كلشي وصرت اعرف عنة كلشي واعترفتلة بحبي وهو اعترفلي بحبة
وكال اريد اتقدملج بس اختف اهلج ما يوافقون لان اني فقير مو من مستواكم
لكن اني وضحتلة ان بابا ما يرفضلي طلب
وفعلا اتقدملي وهسة انتي ليش جاية تتهجمين علية
لجين : لج ثولة هذا يضحك عليج ورايدج علمود مركز ابوج
اسراء: انتي تغارين مني
لجين : اذا متصدكيني روحي سألي منو هيام وشنو دورها بحياتك لح غبية هذا جان يحب بنت عمة ويموت عليها
اسراء: ادري اعرفها حجالي عنها كال عندة بنت عم تحبة وكاتلة روحها عليه
وتصير صديقتج وادري بيج هسة هي دزتج حتى توكعين بيني وبين نبراس ويصير بس الهة )))
لجين: لج هيام احيت اتخبل من سمعت كلامها ورحت اتعاركت وية نبراس
وجنت بنفس الوقت خايفة اكلج خاف تفتهميني غلط
تدرين اخر فترة حتى كمت ما اخلي يوصلني للكلية لان زعلانة منة عالسواه
بس شكلة عرف شلون يلعبها صح
هيام: انتي مالج ذنب بس تكدرين جان الشيطان شاطر وجنت امر بمرحلة اشوف الكل خيانة وغدر
لجين : تدرين من اجتي ريتا وحجت وياي واعتذرت مني على سوء التفاهم الي صار بينج وبينها شكد انقهرت من سمعت بيج زاعلتيها علمودي وطردتيها
وما صدكتي اخونج
لكن من سمعت عرفت كل اصابع الاتهام راح تتوجه علية بصفتي بنت خالهة واعرف وساكتة
يعني راح اثبت كلام ريتا صحيح بصورة او بأخرى
هيام: ما ينفع الكلام وعوفج من المعاتب اهم شي انتو رجعتولي وبعد ما يهمني لا نبراس وعشرة منة
يوصلون لمعزتكم بگلبي
ومن هاي اللحظة شمرنا كل خلافتنا ورانة وصرنا نشق طريق الامل من جديد
((((((()))))

جنا نحضر لحفلة التخرج لهاي السنة
وخلال هاي السنة
وادركت من خلال تجربتي ان الحياة لاتتوقف على شخص وانما تستمر وتصير اقوى
لغيت شي اسمة نبراس من حياتي صحيح اسمع اخبارهم غصب عني ينفتح موضوعهم يمي
عن طريق ام نبراس من تجي تسير علينا
او خواته تلقائيا امي تسأل عنه وعن زوجتة من باب المجاملة ومن خلالها توصلني اخبارهم
فسمعت منهم بأسراء صارت حامل
وعرفت بنبراس صار مسؤل
وحالتة صارت تـوب
اما اني فبقيت نفس وضعي ما اتغيرت

باوعت لريتا جانت تفتر على الطلاب وبيدهم ورقة وقلم وتسجل
تجمع منهم الفلوس والقياسات لان هي اتكفلت بخياطة زي التخرج
ووصلني السرة وانطيتها الفلوس والقياسات
ريتا: انتي ياحلوة شنو سالفتج ما ناوية تضعفين وترشقين شوية
هيام : والله كاتلة روحي العب رياضة بالبيت وملتزمة بالرجيم بس يا اختي الله يحفظها الدكتورة انطتني علاج مال هرمونات وكالت ترة ديري بالج راح
تسمنين بالزايد عالاساس اني ناقصة
لجين : اي صدك هذا النوع من العلاج يسمن عندي اختي مثلج هم دتعاني
بس رغم ذلك تبقي حلوة
((((())))))))

وبيومها رجعت للبيت كالعادة خطية ريتا وصلتني بسيارتها مرات لجين توصلني وياهة يعني صار مثل الجدول يوم على لجين ويوم على ريتا
دخلت لبيتنا وشفت ريام
سلمت عليها وسألتها
: لعد ماما وين اشو ماكو
ريام: راحت لبيت عمو احمد لان خطية وكع من الدرج جان يريد
يبدل كلوب المطبخ ووكع وانكسرت ايدة
هيام: يا خطية ما يستاهل وهسة هو وين
ريام : ما ادري بيهم شي اكيد لو بالمستشفى لو بالبيت
دخلت لغرفتي وبدلت وقبل لا ابدل
باوعت لجسمي بالمرايا
خرب بالحظ اني هواي سمنانة وينراد اتعب على روحي واقسى وية نفسي والزم رجيم بلكي منا ليوم حفلة التخرج منزلة كم كيلو
بدلت وكملت ونزلت يم ريام
كعدنا نسولف ننتظر ماما وبابا وما اتغدينا
ورة ربع ساعة دخلو علينا
رحت سلمت عليهم ونزعت امي عبايتها الجبة
وركضت على بابا نزعتة حذائة وجواريبة
جنت متعودة اسويلهم هشكل من يرجعون من برة البيت
ابو هيام: الله يبارك بيج بنتي
هيام : بابا بشرنا بعمو احمد شلون صارت ايدة
ابو هيام: اخذناه للمستشفى وهناك نقلوه لشعبة الكسور
وكتبولة ورقة ودخلناه وجبسو ايدة وعلكوها الة بحامل يد وانطوه ابرة مسكن الالام كالو لان بالليل راح تكوم تأذي فاحسن شي ياخذ ابر
وهاي جيتنا من المستشفى
اجتي ريام وبيدها دولكة الماي وكلاص وزعت الهم ماي
ابو هيام يباوع لام هيام
: هناء انتي اليوم هواي تعبتي روحي اتمددي وارتاحي شوية
ام هيام : لا تخاف علية يا رجال بس انت تحب توهوس
كلشي ما بية ما تعبانة
وهسة راح اكوم اصب غدة حتى ناكل سوية
وشي اكيد بناتك ما مكلفات نفسهن ومتغديات
هيام: لا والله ضجت اكل اي لكمة وانتو مو هنا
دخلت وية امي اساعدها بصب الغدة وطلعت الطرشي بكاسة جنت اتحرك واسولفلها عن يومي بالكلية وشنو صار وكعدت اوصفلها اجواء التخرج والفيكات الي ناوين نسويها بالحفلة والخطط وغيرها

دخلت ريام وصارت تنقل الصحون على ميز الطعام
ريام : الله شكد حلو شوكت اخلص من العلة السادس
وادخل كلية واعيش هاي الاجواء الي جاي تحجين عنها
ام هيام: ان شاء الله تتخرجين من السادس وتلحكين عالكلية بس هسة روحي صحي ابوج عالغدة بس بيج تحجين
دخل بابا : هناء على كيفج وية ريمة ابوها
ام هيام: انت ابقى هيج خربهن علية
واني اكعد اصلح بيهن
ريام : عفو عليج يوم قابل لعابات
ام هيام: يالله هاك استلم بالله هاي شنو تحجي وياهة
كعدنا كلنا عالاكل وصرنا ناكل
ابو هيام : بنات حضرو روحكم العصر ترحون وياي لبيت عمكم احمد حتى تتحمدولة السلامة
باوعت لامي وامي باوعتلي
هزيت راسي بالموافقة يعني عادي اروح ما علية شي لا تخاف علي
ام هيام: اني اروح وياكم
ابو هيام : براحتج
وفعلا صار وقت العصر وبدلنا واخذنا بابا
لبيت عمو احمد
دخلنا وسلمنا عالكل عمة عتاب وبناتها كلهم موجودات
وشفت عمو احمد كاعد وايدة مجبسيها
رحت لعندة وبست راسة
هيام : الحمد لله على سلامتك عمو ما تشوف شر
رحت كعدت يم امي
وشفت البنات كامن للمطبخ ورحت كمت وياهن متعودة
احجي واسولف وياهم لان علاقتي بالبنات حلوة
وصرنا نتبادل اخر الاخبار
جنا نحجي وسمعنا دك الجرس الباب
نسرين: هيام بالله روحي شوفي منو بالباب
رحت وفتحت الباب وصار بوجهي نبراس
اجتي عيني بعينة
جان شكلة هواي متغير والخير مبين عليه وصاير هيبة
بس الغريب بالامر كلبي ما رف عليه مو مثل ما جنت متوقعة
دنكت راسي ودرت وجهي
اريد ارجع
نبراس: هيام لحظة اريد احجي وياج
هيام: اسفة نبراس ماعندي اي كلام بيني وبينك
نبراس: هيام اني بعدني احبج وما كدرت انساج
حبج مو راضي يطلع من راسي وكلبي
حاولت انسى واعود نفسي بدونج لكن فشلت
باوعتلة ورفعت حاجب
: حضرتك جاي كلش متأخر
يعني هسة انت جاي تكول ندمان
نبراس ويجر حسرة عميقة
: اجذب عليج اذا كلت ما متندم
: هاي مشكلتك مو مشكلتي ما مجبورة اوكف واسمعك
تكمل كلامك وياي
يالله اني اترخص
نبراس: هيام لحظة بس حجاية وحدة ورد غطاها
سمعت جاييج خطابة
: وانت شكو
: انا ابن عمج
: وشنو يعني واذا ابن عمي
: هيام خلينا لا نضحك على بعض ادري بيج تحبيني وتموتين علية والدليل وكعتج بالمستشفى من بعد خطوبتي وبقائج لحد الان بدون زواج هاي كلها تثبت
ان حب نبراس بعدة بكلبج ومتكدرين تبدين حياة جديدة ونبراس بكلبج
باوعتلة بستهزاء وضحكت: انت صدك تحجي لو تجذب ترة اني مو لان ما متزوجة لحد الان معناها
اني بعدني احبك لا متوهم بالعكس
سوايتك وياي قتلت وقضت على كل ذرة حب جنت احملها الك بكلبي وصرت بالنسبة الي ماضي اسود وعدة وراح فلا نتغر وتكعد توهم نفسك باشياء لا وجود لها اصلاً
تركتة وما انطيتة فرصة يكمل كلامه
ودخلت للمطبخ وفتت عالصالة وكعدت يم امي وراها بلحظات دخل نبراس وسلم عالكل
نبراس: يالله بابا كوم حجزتلك عند احسن دكتور كسور
ابو نبراس: لا حبيبي ما يحتاج رحت للمستشفى وجبستها
نبراس: لا يابة مستحيل اخيلك تبقى على شغل المستشفيات الحكومية منو يكول معتنين بيها ومجبسيها عدل بصورة صحيحة
ام هيام : ابو هيام يالله هم يالله نرجع للبيت اني تعبت
عرفت امي اريد تجنبني الموقف
وفعلاً بعدها طلعنا من بيت عمو

وبيومها من رجعنا بالليل اجتني رسالة بنقالي
فتحتها واتفاجئت هذا نبراس
جان كاتب (هيام انتي اليوم ما انطيتيني فرصة اكمل كلامي وياج بس خلي ببالج لا تستهانين بيا
ترة انتي مو بكدي ولا تتحديني
اني احبج وادري بيج بعدج تحبيني بس تكابرين
لج هيام اني ما اكدر انساج اريدج
عدة الرسالة مرتين
ممصدكة الي جاي اقراه هذا مو بعقلة اكيد اتخبل
الحمدلله هي بقت بس هاي انزل من كرامتي
واسوي علاقة وياه بالظلمة والله نجوم السما اقربله
لزمت النقال وانطيتة حظر من كل البرامج
ونمت واني احس بنار تسعر بگلبي لان احس بي هواي مصخها وياي ومستهان بية وشايفني بعينة سهلة ورخيصة لحتى يتجراء ويفاتحني بهيج موضوع
اي هيام صوجج انتي بيدج خليتي يتحكم بيج ويسيطر عليج مثل المنومة مغناطيسيا
بس هذا كان زمان مو هسة ترة الضربة الما تموتك تقويك واني قويت بطعنة نبراس
وصارت عندي مناعة
نمت
وحلمت حلم غريب
جنت امشي بطريق وية ماما وبابا
وريام استمريت بالمشي ولازمة ايد اختي ريام
بس التفتت ضيعت ماما وبابا صرت ادور عليهم
وبهاي الاثناء شفت اسد من بعيد يركض ويريد يهجم علية اني بالذات وفعلاً اقترب مني وهجم علية وترك
ريام بس هيام لاحهة من عندة جرح بخدها من مخالبه
كعدت مفزوعة وعركانة من هذا الحلم الغريب
وصرت اقرة ايات واتعوذ من الشيطان الرجيم
باوعت للساعة شفتها وقت صلاة الفجر
نهضت اتوضيت وصليت وقريت شوية قران حسيت بروحي اطمأنيت مرجعت نمت حضرت ملابسي
للكلية ونزلت اسوي ريوك وشفت بابا طالع من الحمام وعلى راسه منشفة
ابو هيام: هلة بهيومة صباح الخير
ابتسمت : صباح الانوار يا وجه الخير
ام هيام: هاي خيانة غزل من الصبح ومن وراي
ابو هيام يحوط كتف امها بأيدة: لك انت الاول والاخير
ام هيام: اي قشمرني بكلمتين حتى اعفو عنك
هيام: فديت الي يغارون
دخلت للمطبخ وحطيت الجاي عالطباخ وطلعت بيض وكعدت اسوي الريوك كملت وحطيتة عالميز
ورحت بدلت ملابسي وجهزت نفسي
دخلت للمطبخ شفت ماما وبابا وريام كاعدين يتريكون
ابو هيام : هناء قدمت الي والج عالحج اندعيلنا بلكي يطلع اسمنا بالقرعة
ام هيام: ان شاء الله يكتبلنا نحج سوية ونشوف بيت الله الحرام
هيام وريام :: امين يا رب
ابو هيام : يالله اني طالع تأمرون على شي
باوعلية
: هَـا بابا هيومة اوصلج بطريقي
: والله ياريت لان خطية ريتا ولجين طاح حظهم من الطريق
راح اتصل على لجين حتى ما تمر علية
وصلني بابا للكلية
ابو هيام: يالله هيومة
حاولي ترجعين من وكت اليوم وصيت على سمج مسكوف
هيام: الله سمج مسكوف اموت عليه
وبرطمت : بس حرام عليك بابا تدري بية مسوية رجيم
ابو هيام: بس اليوم غلسي. عالرجيم
هيام: هو اني راح اخلص الرجيم بس اليوم وبس اليوم
واكول ليش ما دا اضعف
ابو هيام: هههه يالله باباتي مع السلامة وديري بالج على نفسج
دخلت للكلية وشفت ريتا كاعدة ومتجمعين عليها ا
الطلاب والطالبات وصلت الهم
لحين : واخيرا شرفتي دتعاي ساعدينا
راح اغرك اتورطت استملت فعاليات التخرج
بلال : حل تستاهلين منو كلج صيري حاتم الطائي
ريتا: اسكت انت اخر من يحجي اكبر دايح
اكلك تعال ساعدني تكلي سيارتي عطلانة خوش حجة
سمعت صوت يصيح بأسمي التفتت
شفتها اسراء
رفعت حاجبي باستغراب هذولي شنو من صلافة شايلين هي ورجلها
لجين : هيام ممجبورة تحجين وياها تركيها بنت خالي واعرفها نذلة
ريتا: لا بالعكس هيام ما عندها شي حتى تتهرب منة
خليها تشوفها شتريد
اقتربت من عدنا
اسراء: هيام اريد احجي وياج بكلمة ممكن تجين وياي
حسيت بحركة
بلال شلون كعد ينافخ بضجر وقلة صبر
اما ريتا فكانت تراقبها ورافعة حاجبها بستهزاء
لجين: شتردين من هيام
اسراء: اعتقد اني محجيت وياج
اني كلت هيام انتي شنو اسمج هيام

باوعت للجين صارت نار عبالك راح تكوم تخنكها

هيام: اتفضلي احجي ماكو احد غريب هنا
باوعتلها انزعجت من كلامي
وما حبت اسلوبي وهو المطلوب
اسراء: براحتج بس حبيت ابلغج ان تبتعدين عن طريق نبراس ترة هو رجال متزوج وعيب عليج تكعدين تزحفين يا اختي استسلمي ترة هو مو الج صار ملك غيرج
ظليت اباوعلها مصدومة من كلامها
بلال: احترمي نفسج واحجي لاتظلين تمسلتين بالحجي
هيام: لحظة بلال خليني اني احجي الظاهر الاخت صاير عندها اشكال وفاهمة السالفة غلط
باوعت عليها
: شوفي اسراء اذا جنتي تحسين بالتهديد من ناحيتي وماعندج ثقة بحب زوجج فهذا من ذنبي
روحي شوفي زوجج واتأكدي من عندة
يالله تجين تهجمين علية
وخلي ببالج نبراس اخر شخص افكر بي وبعد لو يصوغونة ذهب ما اريدة لان نبراس كلب وعمرذيل الكلب ما بنعدل
اسراء: انتي بس ابتعدي عن حياتنا واحنا بخير
ادري بيج بعدج تحومين على نبراس والدليل كثرت
زياراته لبيت اهله

ابتسمت بستهزاء :حقج اني عاذرتج تبقين تحسين بالتهديد والخوف من الخيانة لان الي يخون مرة كادر يخون الف مرة
تركتها واكفة ورحت واجتي ريتا ولجين وبلال وراي
خلص اليوم بسرعة بسرعة وكلشي ما افتهمت من المحاضرات ريتا بالسيارة
التفتت علية : يالله عاد فرديها
لا تظلين قافلة
هيام: ريتا خوف وشك اسراء بزوجها بمحله
ريتا: شلون يعني فهميني
: نبراس صدك جاي يحوم علية
ويريد يرجع علاقتة وياي
ريتا: ايا كلب يا حقير وانتي شنو ردج
: البارحة شافني ببيتهم لان ابوه وكع وانكسرت ايدة فرحنا نتحمدلة السلامة وهناك التقيت بي وحجة وياي
والظاهر سامع من اهلة جايين ناس يخطبوني
ويكلي بكل صلافة ارفض لان حضرتة بعدة يحبني ويريدني
ريتا: حبتة حية وانتي شكو
هيام : اني بيومها رفضتة ورزلتة بنزاكة
بس العجيب بالليل رسل رسالة اشبه بالتهديد
وبيها كلام انتي موبكدي
واني اريدج ومن هذا الحجي
ريتا: اني لو منج اراوي رسالتة لابوج واخلي يلعب بي طوبة حتى يتوب ما يعيدها
هيام: لا ما يحتاج اكبر الموضوع واقهر بابا وعمو
واضوج خلكهم
انطيتة حضر من كلشي هو نكرة ما يستاهل اكبر راسة
وانطي قيمة اكثر مما يستحق
وصلنا للمنطقة مالتنة وبراس الفرع
شفت هوسة وصياح وناس ملتمة يم باب بيتنا
اني هنا وكع كلبي
ريتا: شنو صاير يم بيتكم
هيام بصوت هامس خايف : ما ادري
وصلت ونزلت واحس رجلية بادت
وهنا انصدمت صدمة عمري

يتبع

يتبع