رواية تائهة بين اروقة الماضي الفصل السابع عشر 17 - بقلم الكاتبة نهى

💐💐مساء محملاً بالمحبة والخير والامل اهديه لكم يا اجمل قراء💐💐💐

تائهة بين اروقة الماضي
بقلم الكاتبة nuha-d-h

ورة ساعة من الانتظار بالمطبخ والترقب
والتساؤل والفضول يقرة الف عندي
وعند الكل سمعنا اصوات خوالي وصار صياح
وبعدين يهديء و يرجع يعلة صوتهم

رحاب: ربي الطف بينا
دخل علينا ضاري : صبو جاي
ورجع للهول
كمت حطيت قوري الجاي عالطباخ
ومها حظرت صينية الاستكانات
رفعت راسي واجتي عيني بعين ريام جانت هسه داخلة عالمطبخ
باوعتلي والارتباك مبين على وجها
عرفت اختي ريام ما راح تبطل من عادتها
وجانت تسترق السمع

هيام: مها خلص الجاي صبي
ورحت لغرفة ميس وصحت على ريمة
هيام: ريام تعاي
اجتي وراي وسدت الباب واتجت عليه
وهي تباوع علية
ريام: قبل لاتحجين اي شي علية
خليني احجيلج شنو سمعت وبعدين رزلني براحتج
ما انطتني مجال احجي
ريام: هيام تدرين شنو سبب العركة الي صارت وضرغام ليش متصوب
هيام: اي يالله احجي اسمعج كملي
ريام: هيام هاي الهوسة كلها سببها امي
هيام : هااا!!!
ريام: ولج سمعت خالو
حسن يحجي وية خالو راضي يكلة
حسن : هسة ارتاحيت مو كتلك لاتعلن عن وجود هناء
يعني عاجبك الي صار اخوك مؤيد يتعارك
مؤيد: ياكل تبن واكص السانع الي يجيب سيرة عرضي
الحجية خاجية : هو شكالك وانت هجمت عليه
مؤيد: يمة انا قبل فترة جانت عندي مشكلة وية
هذا حميد ال(....)
رجال بالسوك جان عندي وياه خلاف وديون معلقة
وضرغام يدري بالموضوع
بس اشو اليوم جنا كاعدين بالصيرفة انا والولد
واجاني خضير صاحبي كلي مؤيد عندي حجاية وياك كتلة اتفضل كال خوية جاي اسمع كلام بالسوك مو حلو بحقكم ويمس عرضكم
سمعت حميد يحجي ويكول عليك
((خلي يولي هذا البوخة جاي يبيع مراجل براسي وصاير زلمة هو لو بي خير جان مو اختة نهبت وشردت
ولا بعد الاقوى منها طلعت عايشة وجايتهم تتفاخر ببزرها كدام الناس طلعو بوخة وكل خير ما بيهم حتى عارهم ما كدرو يغسلونة ))
وانا بساعتها اتخبلت ودين ما ظل بعقلي من سمعت كلامه رحت بسرعة عالمكتب اخذت المسدس
وسحبت اقسام ورحتله وهو بنص السوك
وضرغام اجة يركض وراي وانا رميت طلقة بالهوى
وكتلة ولك حميد لو انت صدك زلمة تطلع لي وتواجهني
ولاتلبد مثل النساوين طلع ابنه وحدة بالعلوة وكال ابوي مو هنا لا تظل تصيح
ولزمه ضرغام ونزل بي طن كتل
وكوة فرغوه من جوة ايده رجعت للصيرفة وانا النار تاكل بكلبي اكل
اشو وراهة بربع ساعة ما اشوفلك الا سيارة طبكت عالصيرفة وخرطو واجهة الصيرفة والجام بالرشاشة
عرفت واحد منهم جان من اقرباء حميد
والحجية خاچية ظلت تدك وتلطم : يمة هاي وين جانتلي
سودة بوجهي
راضي: يمة مو هنا القهر جنا كاعدين يم شيخ عشيرتنا الي هو نفسة عمي ابو فاضل
و كلنا متجمعين عندة علمود الطلابة احنا واولاد عمامنا
كال هاي الحجاية عليهة كعدة عشاير وفصل هذا شرف مو هين
اشو هذا فاضل نبص من يمة : بس تعال بوية حاجيتي شتكللهم اذا هي صدك اخته
نهبت وشردت وية رجال غريب
يعني الرجال ما جايب حجي من جيبه
ما اتحملت كلامه وكمت عليه وتعاركت وياه
وعمي هم رزلة وگله اكص السانك اذا جبت سيرة بنت عمك ترة هاي عرضك فاضل
(((((((((((((())))))))))

ظليت واكفة جامدة بمكاني اباوع على ريام
حسيت صدك الدنيا ضاكت بوجهي وعرفت بلحظتها امي ارتكبت اكبر غلطة من جابتنا هنا يم اهلها
لان عمت عليهم وعلينا وشكل الموضوع راح يظل يلاحقها ويلاحقنا
ريام: تدرين هيام انقهرت على خوالي وبيبي
ما يستاهلون الي كاعد يصير بيهم
هيام: ولا احنا نستاهل الي راح يصير بينا
ريام: ليش احنا شعلينا
هيام: يعني اتخيلي اذا وصل الموضوع لام ضرغام ودرت بابنها اتصوب بسبب موضوع امي شنو راح يكون تعاملها ويانة
راح تكعد تسمعنا حجي عالطالعة والنازلة
هاي من غير المشاكل الي راح نتزل عالبيت
وبس الله يستر
هيام: خلي نطلع منا ونسوي نفسنا كلشي ما نعرف
دخلنا للمطبخ وجانت ام ضرغام تولول وتبجي
اشو هاي بس شافتنا
ام ضرغام: لا هلة ولا مرحبا بيجن الفكر لفيتن علينا
انتن وامجن ولفتنا المشاكل والمصايب من الله ياخذجن ويفكني منجن
سمعت شهكة ريمة لان اول مرة تسمع بيها هشكل تحجي بحقد بتجاهنا
لزمت ايد ريمة وعصرتها حتى ما تحجي باوعت علية
باستغراب
ريام: لج هيام هاي تحجي على امنا
هيام: اششش كافي نصي صوتج عوفيها محروك كلبها على ابنها متصوب وخايفة عليه
عوفيهة تحجي لوحدها
رحاب: ام ضرغام انتبهي للسانج ولاتنسين نفسج
ترة الي جاي تحجين عليها اختي
التفتت عليها بحقد
ام ضرغام: المفروض انتي اخر من يدافع عنها شنو نسينا ليش انتي لحد هسة ما متزوجة وليش خطيبج فسخ
خطوبة من سمع باختج شردت من البيت
رحاب : حليمةةةةةةةة بس ما اريد ولا كلمة سدي الموضوع
انتبهت على ام ضرغام سكتت وما حجت شي
بس ظليت جامدة بمكاني من الي سمعته
باوعت لخالة رحاب كانت كاعدة وما بدر منها اي
ردة فعل غير سكتت حليمة ونهت الموضوع
ياربي هاي المرية يوم عن يوم تكبر بعيني ويزيد قدرها بكلبي
صار الليل والعمام كلها اجتي والديوان انترس زلم
وراهة دخل ضاري وسمعتة يحجي وية امة
يكللها اجو شيوخ عشيرة حميد
وجاي بعتذرون ويكولون هو ما حاجي هشكل
وهذا الي نقللكم الحجي يريد يوكع بينا وبينكم
واني صرت بس افتر واشم شم اخبار
احس عبالك اني مسوية المصيبة
وكل ساعة ادعي الله ان يعدي السالفة على خير

وبيومها طلعو الزلم الساعة وحدة بالليل يالله فضت
ودخل خالو راضي ومؤيد وحسن للبيت بالصالة
طبعا خالاتي راحن رجعن لبيوتهم
جنت واكفة لوحدي بالمطبخ افرك بيدي اريد افوت جوة يمهم واسلم عليهمً ومترددة استحي
شغلت ايدي بالمطبخ وحظرت مواد نسكافية كلت اسويلهم نسكافية حتى تصيرلي حجة ادخل عليهم بالهول طبعا ام ضرغام فاتت تنام كالت راسي يوجعني
وميس وريام بغرفتها وخالة رحاب كاعدة يمهم
جنت اتحرك بالمطبخ
سمعت صوت
التفتت
ضرغام: احم
من شفتة ما اعرف شصار بكلبي خفق بفرحة لشوفتة
هيام: ضرغام الحمدلله على سلامتك
ضرغام: الله يسلمج
هيام: شلونها ايدك
ضرغام: هو انا اجيت اريد واحد يعدلي اللفاف مالتها
وينها ميس
هيام: فاتت نامت اذا تريد انا اسوي الك
ترة ما ينرادلهة شي
ضرغام بتردد : هاا لا اتركيها عنج
هيام: بالله شو تعال
لزمتة من زندة وكعدتة عالكرسي
كعد وصار بمستواي الله يحفظة هوكلش طويل
كعد متعجب على طلعتي
هيام: خلي اعدلك اللفاف والشاش وعود بعدين كول احراجات وزحمة وعيب وما يصير جنت احجي واتحرك جبت علبة الاسعافات الاولية
واقتربت منة ولزمت الحامل مالت الايد ونزلتها وكعدت اعدل بالشداد مالتة
حسيت عليه نفسه صار سريع
جنت احس واراقب بكل حركة وكل نفس يخرج منة
حسيت بارتباك حركت ايده بقوة وسمعته
ضرغام : اااااخ بوية
وعض شفتة
هيام: اسم الله عليك
اسفة والله
ضرغام بصوت هامس: لاعادي كلشي منج طيب وحسي بي يباوعلي
وعيني اجتي بعينة انتبهت على روحي واكفة كلش قريب عليه
عبالك راح اكعد بحضنه ارتبكت من القرب واستعجلت بلف الضماد
خلصت وابتعدت بسرعة واني احس بكلبي يريد يطلع من مكانه
هيام: يالله وهاي اني خلصتها بعد شتريد
همس: ما اريد شي سلامتج
لفت انتباهي صوتة الهامس كانت بي نبرة مثل التعويذة
تجذبني الة باوعت عليه يباوع على شفايفي
انتبهت على وضعي وياه ما يصير اطول اكثر واكفة قريب عليه خصوصاً لاحظت على ضرغام كلش متأثر بقربي منة اني مو غبية واعرف ردت فعل الرجل اتجاه المرأه اني دارسة وجبيرة وسامعة هواي مواقف
والمواقف الي كانت تجمعني بنبراس
ارتديت للخلف
هيام: يالله اني راح اصب نسكافية تأمر على شي ثاني
ضرغام : اي اريدً
هيام : شنو تريد
ضرغام: اريدج تكولين اسمي
فتحت حلكي مصدومة من كلامه شنو قصده
رمشت مرتين عبالك جاي احلم واريد اصحى
ضرغام: اريد اسمعج تهمسين باسمي
ما ادري شجاني ونفذت اوامره عبالك منومة مغناطيسيا
وهمست باسمة بصوت ناصي عبالك اذا اعلي صوتي
افز واكعد من الحلم الغريب الجميل
: ضرررغاااام
شفته غمض عيونة وجر نفس
وفجاءة كمزنا اثنيا على صوت
: ضرغاااام
قطع علينا اللحظة الجملية النادرة صوت ضاري المزعج
ضاري: ضرغاااااااااام يا ضرغام ابوي يريدك
ضرغام: ووجعا حتى وجعا انت شنو سالفتك ما تعرف تحم حم او تعلن عن وجودك قبل لا تدخل
ضاري : خير سالمين كاطع عليك ليلة عرسك وهشكل تحجي وياي ضايج
ضرغام: شوف ولك اذا ما رحت من وجهي اجي امسح بيك الكاع
ضاري: على كيفك يابة طالع بس انت لا تضوج
طلع ضاري واني ابتعدت عنة
ورحت احضر اكوابة وصينية
ضرغام: هيام
هيام: نعم
ضرغام: اشكرج
جنت ناطيتة ظهري : العفو ترة عادي ما سويت شي هي لفة شاش
ماسمعت منة جواب
صار المطبخ هدوء التفتت ما شفتة يمكن راح
ما اعرف شنو اترجم ذيج المشاعر الي حسيت بيها بذيج اللحظات الي مرت علية اني وضرغام
كملت صب النسكافية بالاكواب
عدلت شالي واخذت الصينية ورحت دخلت جوة وقدمتلهم وسملت على خوالي
ارتاحيت من شفتهم يسولفون عادي وما متعصبين
شوية رجع الدم بوجهي
مر يومين
وانحلت السالفة بالمصالحة
اجة حميد وعشيرتة ووكع على خالو مؤيد
وخالو مؤيد رفض بس الشيخ ابو فاضل كلة
لازم توافق على المصالحة حفظا لماي الوجوه
ومايصير تجيب اسم اختك بالديوان تراها كلفة عالزلم وصعبة وخصوصاً هي متوفية
الله يرحمها وافق و اتنازل خالو مؤيد
يمة احس ماي بارد نزل على گلبي
من سمعت بالصار
جنت كلش فرحانة اجتي خالة حمدية وكالت راح اخذ البنات اطلعهن وياي للمول
وخالو راضي وافق والله اني طرت من الفرحة جنت كلش مختنكة ومحتاجة اطلع والطلعة اجتي بوكتها
دخلنا لغرفة ميس وكعدت اكلب بملابسي
اشو كمت البس وانصدم
وارجع انزع عزة هاي ليش ملابسي صايرات ضيكات. علية كعدت على سرير وظليت صافنة اباوع
على ميس شلون حلو جسمها جنها غزلة تركض منا وتجي منا متلهفة مثلنا للطلعة اخذت ملابس ودخلت للحمام
رجعت لبست دشداشتي وطلعت ميتة قهر من روحي
دخلت للمطبخ وكعدت عالميز وحطيت ايدي على خدي
داقايق واجوي ميس وريام جاهزات
يباوعن علية بصدمة
ميس: هاي شنو ليش ما مبدلة مو فتت للحمام عفتج جاي تبدلين اشو كاعدة هنا وكلشي ما مسوية
هيام: روحو انتو اني عني ما اروح
ريام: اذا انتي ما ترحين اني هم ما اروح
هيام: انجبي عوبة ترحين بس اني بطني كلش تأذيني ما اكدر اروح وياكم
ما ردت ريام تكعد علمودي بالبيت
ميس : اهووو هسة وكتها بطنج اي مو ردت اراويج معالم بصرتنا الحبيبة واخذج عالكورنيش
واشوفج شط العرب
هيام: يالله خيرها بغيرها عالجايات
جنا نحجي وسمعنا صوت نقال ميس يدك وجانت خالة حمدية المتصل كلتلها احنا بالباب يالله طلعونا
راحو البنات ودخلت خالة رحاب للمطبخً وشافتني
رحاب: ليش ما رحتي وية البنات
حجيت لخالة رحاب كلشي
ما كدرت اضم بكلبي اكثر جنت محتاجة امي الي دائما تتلاحكلي بهيج مواقف
رحاب: كل هذا صاير بيج وانتي ساكتة على نفسج
والله زعلتيني منج واني حسبالي تعتبريني مثل امج طلعتي تستحين مني
هيام: لا والله بس كل مرة اكول اكلج بس الظروف تعوكس وياي والتهي
رحاب: يالله تحضر ين نفسج من باجر
اخذج عالدكتورة حتى تجيكج وتشوف من شنو تعانين
وبعدها اوديج لاخصائية تغذية سمعت البنات يحجن بيها يكولن هواي ضعفانات على ايدها
حسيت بامل جديد
هيام: اشكرج خالة ربي يخليج الي
دخلت ام ضرغام ولابسة عبايته على راسهة
ام ضرغام: يااا هاي شنو رحاب ليش بعدج ما لابسة عباتج مو كلنا نروح نتبارك لبيت ام سامر
رحاب: انا هاي عباتي بس البسها ما عندي شي
بس انتي الي اتأخرتي
كامت من مكانها ولبست عبايتها
رحاب: يالله هيومة احنا طالعين عينج عالبيت وامي الحجية
هيام: صار من عيوني
رحاب: تسلم عيونج
طلعن ورحت كعدت يم بيبي جانت كاعدة بغرفتها
تسبح
الحجية خاجية: هَـا ليش ما رحتي. وياهن
هيام: ما كدرت شوية تعبانة
الحجية خاجية : شمالجن عاًويات بنات هالوكت
كل خير ما بيجن دخانجن يعمي
ابتسمت على كلامها

دخل علينا ضرار
جان يمشي على عكازات خطية والله كلما اشوفة اموت قهر عليه الوجه صاير التشوه بالزايد لان صار بي مناطق مطكعة تخوف
ضرار: هلة ةةةةةةة بحجية خاچية
طحت عليج وين لابدة
الحجية خاجية : ما لابدة انتو الي مدري وين
تخورون وعايفيني لحالي
ضرار: يمة منج يمة
تتغدين بية قبل لا اتعشا بيج بس ما علينا
ما النة غنى عنك ياحلو انت ياكمرانت
الحجية خاجية: اي اكل عقلي بهالكلمتين
ولك شنو عدالك انا مريتك وتقشمرني
ضرار: تروحجلج فدوة مريتي واولادي وبناتي كلهم الي ماحصلي لحد الان شرف التعرف عليهم
اي بس همً ميخالف تبقين انتي الاول والاخير
ضحكت عليهم شلون يحجي هو وياهة
شفتة مدد ساقة وحط العكازات على صفحة
كعد يتلمس رجليه وعبس وجهة بألم
ضرار: اااخ بوية رجلية موتتني من الوجع
احس بيهن يابسات خشب
الحجية خاجية : يا يمة ضوري ينراد تحطهن بماي دافي وملح وكون واحد يفركهن الك حتىً الدم يمشي بيهن ويتحرك
هسة كون انت عندك ام مثل الامهات
بس شكول وشحجي امك خارمة ومضيعة الاول والتالي
لا الهة غرض بولد ولا الهة غرض برجال
التفتت علية
الحجية خاجية: يمة هيام كومي على حيلج وروحي جيبي لخوج طشت ماي دافي وملح بحر يمكن تلكينة حاطينة بالكاونتر
رحت دفيت الماي وحطيتة بالطشت ودورت على ملح البحر ولكيتة
ورحت دخلت وحطيتة يم رجلين ضرار
واجيت ارجع اكعد يمها
الحجية خاجية: خايبة وين رايحة غير تحطين رجليه
بالطشت
استحيت وباوعت عليها
: خايبة شمالج تصنمتي جنج تمثال
روحي صبي على رجليه الماي ترة هو بحسبة اخوج

وبيني وبين نفسي اكول والله ياحجية عدج سوالف
اقتربت وكعدت يم رجله بالكاع ورفعتهم على كيف
وحطيتهم بالطشت وصرت اصب عليهم الماي الموجود بي الملح
ضرار: اخاف اسوي عليج زحمة
هيام: لا بالعكس ماكو اي زحمة ماعندي شي
كعدت بس اصب عليهم الماي
ما فركتهم ما قبل ضرار رفض
والتفت عالحجية .. وهو والحجية خاجية التهو يسولفون
جنت مندمجة بسوالفهم
وكل شوية اضيف الماي الدافي على رجليه
وقطع علينا الحديث دخول ضرغام

صايرة من اسمع صوته گلبي يكوم يدك سريع
عبالك جنت اركض
باوعت عليه كانت نظراتة علية وعلى الطشت

الحجية خاجية : ها يمة ضرغام كواك الله اجيت
ضرغام وعينه على ضرار
ضرغام: الله يكوي حيلج حجية
جان يحجي وعيونه على اخوه عبالك يريد يگلب الطشت على راسه اهووو هسة يكعد يبيع براسي مثاليات ويصير وما يصير
ضرغام: هيام كومي سويلي جاي
كمت من مكاني اريد اطلع اسويلة جاي
ضرار: مشكورة خيتي الماي برد اذا ماتصير عليج زحمة تكدرين تاخذين الطشت
واني واكفه دنگت اريد اشيل الطشت
ضرغام بصوت متنرفز عدلي روحج عوفي ا
كام من مكانه ودفعني شوية
: وخري انا اشيل انتي روحي سويلي جاي

طلعت للمطبخ وجاي اسوي الجاي وسمعت صوتة اجة وراي للمطبخ
ضرغام: هيام سؤال
من نبرة صوتة حسيت اكو شي صاير
هيام: اتفضل اسمعك
ضرغام: انتي بيوم العركة الي صارت طالعة
لواحد من ربعنا
هيام: هَـا ما اتذكر والله
ضرغام: يعني حضرتج ما تتذكرين طالعة للولد مفرعة وحاجية وياه بيوم العركة
هيام : هااا اي اتذكرت صحيح جنت مخبوصة وواحد دخل للكراج وكال صيحي ضرار بسرعة
وانا سألت شنو صاير وهو كال خوية عفية صيحي ضرار ماعدنا وكت
ضرغام: هيام انتي شنو سالفتج ما ناوية تحشمين نفسج
ترة مايصير هيج والله راح تخبليني
انا ما اتذكر بحياتي عانيت وية وحدة مثلما جاي اعاني وياج ما ادري ليش
دائما اذا كنتي موجودة بالمكان الي انا بي لازم احس بالانذار واحضر نفسي لعركة سواء اتعارك وياج
او اتعارك وية الي يقترب منج

هيام: ليش تحجي هشكل اني شنو سويت هالمرة
ضرغام : الولد الي شافج طلب ايدج من عندي
لان شايفج ومنعجب بيج وسئلني عليج
حسسني عبالك انا مكرن
جنت مدنكة بس من سمعت كلامه كمز كلبي
ورفعت راسي بخوف معقولة موافق علية
هيام: وانت شنو جاوبتة
ضرغام: طبعا رفضتة
لان بعدج جديدة وما ماخذة علينا اشوفها واكفة
كبل نزوجج لاول واحد يتقدملج
ترة احنا ما مستعجلين
باوعت عليه
هيام : زين تسوي رفضتة
بعد تأمر على شي ثاني قبل لا اروح
حسيت عليه عندة كلام يريد يحجي بس
متردد
ضرغام : لا ماعندي تكدرين ترحين
طلعت من المطبخ ورحت كبل على غرفة ميس
وسديت الباب ميتة قهر
حسيت ظلمت روحي من وكعت بحب شخص اصلاً ما
اخطر على باله والدليل كان متقبل فكرة زواجي من واحد ثاني اشوفه ما مهتم
بس رفضه كان علمود اني جديدة هنا وما يصير يزوجوني هسة
هيام انتي اكبر غبية
لان كلبج لثاني مرة يختار الشخص الخاطيء
اني مالي حق ازعل عليه وانقهر من عنده
هو اصلا ما واعدني بشي ولا لمحلي بحب ووعود
هذا كله تخيل من عندي اني الي جنت اتمناه بكلبي
مو ذنبة اني غبية وحبيتة
هيام اصحي على حالج انتي ما جاية هنا علمود تحبين وتنحبين هو انتي ابن عمج الي ربيتي وياه ويحبج من الصغر طعنج وغدرج وراح اتزوج وحدة ثانية
يعني اشوفها واگفة تجين وتصيرين طماعة
وتردين تحبين شخص بعيد عنج كل البعد
مثل نجوم السما
بس هو الحب مو بيدي حبيتة يا ناس
والمشكلة احس بكلبي جاي يوجعني هذا الاحساس ما مريت بي من جنت احب نبراس
انصدمت على فكرة وحدة واكتشفت بلحظتها
ان حٍٍِْــًبٌٍـــِٓېٍٓ لنبراس جان مجرد حب مراهقة
اما هسة هذا الشعور الي جاي احس بي
بتجاه ضرغام عجيب حب نار سهر خفقات قلب هاربة
كلما اسمع صوتة
هذا كلة ما مر علية من جنت اعيش وهم حب نبراس

((((((())

رجعو البنات وكعدت ميس تسولف شنو سوو
بس ريمة جانت ساكتة وماتحجي اي شي
حسيت اختي بيها شي
انتظرت نكون لوحدنا واسألها ما شفتها فرحانة بالطلعة ليش شكو شصاير وياهة
سمعت خالة رحاب اجاهة اتصال
رحاب: هاي حمدية جاي تتصل علية صارلها ساعة
واني عند الناس ما كدرت احجي وياهة
بالله هيومة انطيني نقالي بالجنطة
فتحت الجنطة وانطيتها النقال
وصدك طلعت خالة حمدية
تركتها وطلعت

(((((((())))))))
مرت الايام واني اختي ما تقبل تحجيلي شنو صاير بيها
ومتأكد اكو شي بالطلعة هو الي مغيرها
مرت الايام ونظرات ضرغام صارت تلاحكني بكل مكان
ما اريد اوهم النفس واعشمها واضل اتخيل الحب
واعيش بامل وبعدين انصدم

وبيوم من الايام جنت كاعدة
بالمطبخ وحاطة نقالي على ميز الطعام
جنت ملتهية احجي وية ميس
دخل ضرغام وهو مبتسم وعيونة علية
ضرغام : هيام عندي موضوع اريد احجي وياج
ممكن تجين لحظة
كمز كلبي من مكانه
جانت نظراتة فاضحتة وتنطق بوعود ولوما خوفي وترددي جان ابصمت بالعشرة ان هو يحبني

حسيت كلبي راح يطك معقول الي ببالي راح يصير
لا لا اوكفي لحظة لا تستعجلين هيام انتظري وشوفي شنو يريد
كمت من مكاني وردت اروح وياه ودك نقالي جان قريب عليه
جان مبتسم وفرحان
لكن فجاءة اختفت الابتسامة من وجهة
ضرغام : منو نبراس
هيام كلبي خمطني من ذكر الاسم
رحت اتقدمت عليه واجيت اخذت النقال
وانطيتة رفض
ضرغام: ردي علية منو نبراس وليش رفضتي
هيام : هذا ابن عمي
ضرغام : وليش انطيتي رفض
لحظات سمعت نغمة الرسائل
ما حسيت الا عالنقال انسحب مني
وشاف رسالة نبراس
كان مكتوب بيها
((( لج هيام خبلتيني اريدج ليش ما تردين على اتصالي
خليني اسمع صوتج مو راح اموت حتى اسمع صوتج )))
باوع علية والنار بعيونه
خمطت النقال من عنده
هيام: منو سمحلك تاخذ النقال بدون ما تستأذن مني
ضرغام ببرود : ما راح احجي اي كلمة والكلام وياج
ماكول خيرة ما بي اي فايدة جنت متخيلج غير شي بس مع الاسف
مواقفج تثبت انتي انسانة منحطة
دار وجهة وطلع
عشت لحظات اتكلب بناري
لا بية احجيله عن نبراس ولا اكدر اسكت
بس شكل ضرغام غير رأيه واتراجع عن الكلام الي كان ناوي يحجي وياي
ورة الموقف الي صار بيني وبينة
ضرغام سافر يوم ثاني لدبي
فجاءة حسب كلام ضاري كال عندة شغل هواي تاركة ومتراكم عليه واحتمال يتأخر

وبهاي الايام
صارت رنا بنت اخو حليمة هواي تجي عالبيت
الي قهرني حليمة هواي تكعد تحمد بيها كدامي
وخصوصاً اذا اكون لوحدي تكعد تلمحلي
ان رنا جنتها وتريد تخطبها لضرغام
هاي من غير الحرب الي شنتها رنا وياي
رنا: هاي شنو انتي ليش هشكل سمينة اني اتعجبت
عليج من كلتي عمري ٢٤سنة
والله عبالك اكبر من عمرج
واتكعد تتباهة بجسمها كدام عمتها حليمة
عبالك طاووس
حليمة: اي هيام ضعفي نفسج بلكي يجي واحد يدك بابج
ويطلبج للزواج
محسسيني اني هرقل
يعني هو صحيح سمنت بس مو ذاك الزود
الي يخليهن يحجن هشكل علية
ريمة تكلي ما عليج بيهن يغارن منج وما لكن شي
يجرحنج بي فاختارو جسمج حتى يكعدن يعلقن عليج
بلحظتها قررت ان انهض ورحت لخالة رحاب
وذكرتها عالدكتور وهي هم ما قصرت

اخذتني للدكتورة وكعدت اراجع عندها
وانطتني علاج
واخذتني بعدها لاخصائية التغذية
وهم اخذتلي بعض التحاليل
وانطتني نظام غذائي حتى امشي عليه
وبديت مشوار جديد من حياتي
يعبر عن الامل
حسيت بروحي اني واكفة امام تحدي لازم اضعف لازم
اهتم بحالي اني بنية شابة ماكو شي مستحيل
ما راح اسمح لرنا او حليمة يضحكون علية
وصرت يوم عن يوم اخطو نحو باب الامل
حتى انجح بالتحدي
يمكن صارت رنا بالنسبة الي سبب علمود اتفوق عليها
او كلبي صار يكلي رنا راح تاخذ ضرغام منج
اتلاحكي لروحج

يتبع