رواية تائهة بين اروقة الماضي الفصل الثامن عشر 18 - بقلم الكاتبة نهى

تائهة بين اروقة الماضي
بقلم الكاتبة nuha-d-h
🌹🌹🌹🌹مساء الانوار والخير والسرور عليكم يا احبتي القراء 🌹🌹🌹🌹🌹🌹🌹🌹🌹

وقررت اتحدى نفسي واضعف لانفسي تملك علية الحق ان اعيش حياتي واهتم بنفسي الي هملتها بعد وفاة ماما وبابا
من اخذتني خالة رحاب للدكتورة اخصائية التغذية احس بدة الامل يحيا عندي من جديد
وبديت بالنظام القاسي للرجيم
وكانت اول ايام كلش صعبة وتحتاج صبر واصرار
حطيت امامي مقولة اكون او لا اكون وصممت اكون
كد التحدي واكدر افوز على نفسي
صرت اطبخ الي لوحدي اكل دايت
وخصصت الي باليوم ساعة العب بيها رياضة
طبعاً مو لوحدي جنت العب رياضة بمساعدة
ميس وريام وحتى عمة رحاب كالت اسوي وياكم رجيم بس رياضة ما اكدر
مابية حيل
وصرنا كل يوم نلعب رياضة وبعدها
طلعتلنا ميس بسالفة
كالت الرقص يفيد بتنزيل الوزن
وبعد كل رياضة الاخت تشغل اغاني ونركص شوية
بس هَـا ميس الجنية تاخذنا فوك بغرفة ضرغام
لان هو مسافر حالياً وهي الغرفة الوحيدة بعيدة عن السمع
ونكدر ناخذ راحتنا باللعب والرقص والتصنيف
لان بيبي خاجية ما تقبل نسمع اغاني
بس احنا وين عبالك عصابة مهربين مخدرات
من يصير وقت الرياضة نتسحب وحدة ورة الثانية ونصعد فوك حتى الحجية خاجية ما تحس وتسمع الاغاني وتظل تحجي علينا وتسويلنا فلم
كانت الايام تمشي وكنت محملة بالنشاط
والامل راح اضعف
وخلال هاي الايام
ضرغام كان يتواصل مع خالو راضي وحليمة
يتصل عليهم وعن طريقهم اعرف اخباره
وعرفت ان هالمرة راح يطول بالسفر لان
عندة شغل كلش هواي كان هامله بسسب ضرار
واصابتة والي اخذت من وقته
وكللهم بس اخلص شغلي ان شاء الله ارجع
وانتبهت على خالة حليمة بهاي الايام كثرت طلعاتهة
لبيت اخوها
ومن ترجع لازم تجيب بنت اخوها رنا وياهة للبيت
اي مو جانت عندهم شعندها جايبتها وياها
ما ادري ليش من تجي اني ادخل بالانذار واتقيد لان هي تظل تعلق على كل حركة اسويها
بس اني مرات اردها ومرات اغلس عليها

مر شهر على نفس المنوال وانتبهت لخالة حمدية جياتهة لهنا صارت كلش هواي واكثر الاحيان تجيب ابنها طارق وياهة
عمرة ٢١ سنة تكول يدرس
ادارة واقتصاد
بس ميس كالت هو كسولي شوكت دخل كلية
وهو شهادة ثالث متوسط ما ماخذ
استغربت ليش خالة حمدية جذبت بشهادة ابنها
والي زاد استغرابي
تصرف ريمة ما ادري ليش تختفي من تجي خالة حمدية
بحيث انتبهت عليها اكثر من مرة تحاول تدبر الاعذار حتى ما تتواجد باوقات جية خالة حمدية لاهلها
واليوم هي اتصلت على ام ضرغام وكالتلها سوو حسابي عالغدة اني وعائلتي اليوم نجي نتغدة عدكم
الحجية خاجية: جا يمة اتصلي بعد فد مرة على هناء خليها تجي فد مرة خطية
وراحت ام ضرغام واتصلت على خالة هناء
طبعاً الحلو بام ضرغام ابد ما تضجر من الخطار
وتحب ترحب بيهم
وتقدر حمواتها وتسويلهم حساب الا امي المكرودة

سدت النقال من خالة هيفاء ورجع نقالهة دك
ردت على المتصل
ام ضرغام: يا يمة هلة بهالصوت من رحتلة سبع فدوات
ولك يمة ضرغام ما اشتاقيت لامك
وتكول كافي سفر وخلي ارجع اشوفها

يمة من سمعت بطاريه ما اعرف
شصار بكلبي ولك والله حنيت واشتاقيت الك
شوكت ترجع واكحل عيوني بشوفتك لحضات الحنين والفراق مؤلمة
رحت سرحت فكري بي غصب عني احن واشتاق الة بالرغم من سافر شكد جنت زعلانة ومقهورة منة
ومن تصرفة وياي باخر مرة
بس شكل الفراق والبعد قادر على ان ينسينة الزعل
ظليت اتسمع لحجي ام ضرغام
: يمة ضرغومي ماكلت شوكت تجي ترة انا هالمرة محضرتلك مفاجئة تخبل

نغزني كلبي منها شنو المفاجئة !!!يا حليمة
والله ابد ما ارتاحلهة
ام ضرغام: اي يمة ضرغومي اكو غيرها
لكيتلك عروسة الف من يتمناها
يمة بس تعال واحجيلك عنها
ان شاء الله انتظرك
الله يسلمك يمة يوصل
خلصت المكالمة وسدت النقال
وباوعت علية
وكصتني من فوك ليجوة بنظراتها
ام ضرغام: اي عفية عليج خوش مضعفة
جسمج
علمود من يعرس ضرغام تكدرين تلبسين بدلة بعرسة
بلكت يشوفج الناس ويخطبوج
حسيت مثل الضربة على وجهي كلبي وكع
هيام: شنو ضرغام شوكت راح يتزوج اشو ما سمعت
بيكم خاطبيلة
ام ضرغام: انا اوبوه قررنا بس يجي هالمرة نخطبلة بنت اخوي رنا لان همة من كبل واحد يحب الثاني بس جان منتظر رنا تتخرج يالله
لان اخوي الله يحفظة ما يقبل يزوج بناته الا يتخرجن وياخذن شهادة يالله يزوجهن
وهسة رناوي اتخرجت والحمدلله بعد ماكو عذر لتأخير الزواج
ماكدرت انطق باي حرف كلبي ما انطاني اكول مبروك
كملت كلامها
: ايه يوم الالج تتزوجين وتطلعين من هذا البيت على بيت رجلج

كمت اكمز وحسيت بنار تاكل بكلبي وتوغلت ووصلت لضلوعي والله صخنت
الله ياخذج حليمة منين طلعتيلي
يعني مو بس تريد تزوج ابنها لا وبعد تفكر تزوجني
كمت من يمهة واني معدتي انعقدت
وصارت لويات ببطني
يعني معقولة الحب هشكل يمرض
جانت كلمات حليمة الي مثل الوردة من يكسرون اغصانها ويشلعون اوراقها ويجردوها من رحيقها
هشكل صرت
احس الحياة اتوقفت والامل ضاع
كمت من يمهة ورحت على غرفة ميس سمعت صوت جرس الباب وبعدها سمعت صوت خالة حمدية وخالة هيفاء شكلهم وصلن
ما مستعدة اطلع هسة كلبي موجوع متأذي
ما اعرف شسوي يمكن لو امي هنا جان فهمتني وعرفت شنو اليوجعني يمكن جان قدمتلي النصيحة
اجتاز حب ضرغام رغم ادري كلش زين حبة صعب الحصول بس اريدة ما اكدر اتركة وادور وجهي هشكل بكل بساطة احس ضرغام ملكي
مستحيل وحدة تاخذة مني
زين اني ليش احس بالم وخوف يمكن خوفي نابع من عدم الثقة من حبة الي اي اني ما اعرف شنو شعورة بتجاهي بس اعرف شعوري بتجاهة اني اعشق ضرغام
سمعت صوت خالة رحاب تصيحني
مسحت دموعي وسحبت نفس عميق وطلعت
الهم شفتهم كلهم كاعدين بالهول خالاتي واولادهم وبناتهم
رحت سلمت عليهم كلهم
حمدية: هلة يمة هيومة صايرة تخبلين ولج شمسوية بروحج هواي حليانة
هيفاء: اي صدك هيومة عفية عليج جاي ترشقين
والله الضعف لايك عليج
ابتسمت
هيام:اي والله خالة جاي اسوي رجيم وكلش ملتزمة
حمدية: اكول خالة هيومة ريمة اختج وين اشو ما جاي اشوفهة صارلي هواي
هيام : هسة اشوفها الج وين
رحت ادور على ريمة الي كالعادة اختفت
ودخلت عالمطبخ
ام ضرغام: اي همزين اجيتي بوكتج صيحي ميس
وتعالي
ساعديني خلي نصب الغدة هم يالله
رحت صحت لميس والتهينا نصب الغدة وحضرت الصحون والكوس مالت الطرشي جنت اشتغل
والبيت خبصة وهوسة جهال على اولاد على بنات
ميس : انا راح افرش السفرة
ام ضرغام : اي فرشيها بالهول مكان واسع
حتى كلنا نكعد سوية
جنا نتحرك ونصب
بس فجاءة سمعت صرخة عالية مال وحدة مفجوعة
وكع الماعون من ايدي بخوف
لان كانت صاحبة الصوت اختي ريمة
ركضت مثل المخبلة بتجاه مصدر الصوت
جان الصريخ جاي من فوك
صعدت الدرج اركض من لهفتي سويتة خطوتين ما اهتميت لخالاتي ولا انتبهت منو الي صعد وراي
كل همي اوصل لاختي واشوفها شبيها
كان الصياح جاي من غرفة عمة رحاب
فتحت الباب وجمدت بمكاني من صدمة المنظر
شفت ريمة دشداشتها مشكوكة من الجانب صفح
والشفة جاي تنزل منها دم
وضرار صاعد علىً طارق وخانكة من ركبتة
ما همني اي شي غير اختي الي جانت واكفة بزاوية ولامة نفسها والدموع تنزل بخوف
رحت ركض عليها واخذت عباية خالة رحاب جانت معلكتها عالتعلاكة ولفيت اختي بيها وحظنتها
شلون وشوكت صار هذا الشي
انتبهت على ضرار نازل طن بوكسات على طارق الي وجهة مدمة جان المنظر مرعب
صرت كلني ارجف دخلن خالاتي
وام ضرغام
وصار الصياح وانخبصت الامة
واني ما افتهمت اي شي جان بالي كلة يم اختي الي كانت ترجف مثل ورقة الشجر بين ادية
سحبتها وطلعتها من غرفة خالة رحاب ونزلتها
وصارت بيبي خاجية بوجهنا
خاجية: ها يمة شصاير علمني اختج شمالهة تبجي
ولجن احجن
علة الاصوات
وسمعنا ركضة ومدافع مال الولد وصوت شي اتكسر فوك وعيطة ام ضرغام الي رجت البيت
احس كلبي راح يوكف

هيام: جدة ما ادري شنو صاير
طبعاً جنت احجي وابجي
اخذت ريمة الي رجفتها صارت مو طبيعية
وعبرت بيبي ورحت على غرفة ميس وقفلت الباب علينا اني واختي واخذتها للسرير ولميتها لحضني
اريد احميها من الي صار
اريد ابعد عنها الالم خايفة اسألها وخايفة اسمع جوابها وصرت ابجي ما اعرف ليش ابجي وعلى شنو ابجي ومن شنو بس كل الي اعرفة احنا بحاجة امنا وابونا
همست بصوت ناصي
منو بيهم اتجريء يمس طهارتج
همست بعد فترة صمت : طارق
حسيت النار صارت تفور بكلبي
سمعت اصوات العركة ارتفعت شكلهم نزلو جوة
وصوت ضرار رج اركان البيت
اسمعة يكول اليوم الا ادفنك يا عار
انتبهت لاختي حطت ايدهة على اذانهة
ولمت نفسها لحظني عبالك تريد تدخل بصدري تطلب الامان
رفعت البطانية. واتغطيت بيها اني وياها حتى روسنا صارت تحت الغطا صرت ما اسمع بس صوت ضربات كلوبنا
سمعت الباب يندك علينا وحليمة حمدية يطالبنا حتى نطلع
غمضت عيوني مستحيل اخليهم يوصلون لاختي
ويحطمونها
ام ضرغام: لج ساقطة حية طلعي اليوم الا اخلي خوالج يدفنوج
ريمة بصرخة مكتومة
ريام: يمة لا لا عفية ما اريد اموت
والله ماسويت شي هو هو الي .......

حمدية : الله ياخذج ولج شلون تسوين هشكل
بابني يا ادبسز ولج انتي كتلج حلال
سمعت صوت ضرار: هي هاي الي الله قدركم عليها
راح تشمرون بلاكم عالبنية
شوفي عمة حمدية ما اريد اتجاوز عليج
بس وحق الحق الي يقترب من ريمة لكون شارب من دمة وما يرفلي جفن
انتبهت لريمة صارت ترجف بالزايد
ريام: هيام اني خايفة اريد امي اريد بابا
يردعهم عني
رجعن يدكن باب الغرفة حيل وحسيت الباب راح ينخلع
ام ضرغام: ولج بنت هناء طلعي اليوم الا اربيج
سمعت صوت بيبي القوي
الحجية خاجية :حليمةةةةةة
الظاهر نسيتي نفسج شوفي ولج وحق الي رفع السما
وبسط الارض اذا اليوم ما خليت راضي
يحرك البيت على راسج ما اتسمة خاجية
وانتي حمدية هسة تاخذين فروخج وتطلعين ومالج محط رجل بهذا البيت
ما ترجعن للبيت الا تتربين من جديد يالله
هدءت الاصوات
غمضت عيوني اتمنيت اكعد والكة هذا كلة حلم كابوس
واكعد منة صرت ابجي وخايفة على اختي منهم
ورة ساعة انتبهت لريمة بدت تهدء شوية
همست بصوت هاديء
هيام: هسة مستعدة تحجيلي شنو صار فوك ؟؟؟
ريام بخوف: هيام اني ما سويت شي والله هو الي اجة صعد وراي يدور علية
هيام: اخذي نفس عميق واحجيلي على كيف شنو الصار بدون خوف اني واثقة بيج
ريام: تتذكرين بيوم العزيمة علمود سلامة ضرار من الكل حضر
هيام: اي اتذكر
ريام: بيومها الكل جان موجود بالبيت ومن ضمنهم
طارق ابن خالة حمدية بيومها جنا كاعدات انا والبنات بالهول وهو دخل وسلم وطلب من عدنا جاي
انا كمت ورحت عالمطبخ اسوي جاي وهو اجة وسلم علية
وانا هم رديت السلام من باب الاخلاق
خلصت الجاي وانطيتة صينية الجاي
اشو هذا يكلي انتي حلوة
وماجنت اتصور عندي بنت خالة هيج حلوة
ووين ضاميج عني
ومرة ثانية بيوم اتصوب ضرغام
هم هو اجة وية امة لهنا
وصادف جنا كلنا واكفات بالكراج
اشو هذا هذا كام يصيح علية شعندج طالعة بالكراج ودخلي فوتي جوة واني هم ما رديتة رحت دخلت جوة حالي حال ميس
بس بيوم الي خالة حمدية اخذتنا للمول
جنا نفتر بالمول واني امشي حالي حال البنات
سمعت خالة حمدية صاحتني
ريمة روحي وية طارق اشتريلنا عشا بين ما نشتري حذاء لريتاج
باوعت لميس جانت ملتهية ردتها تجي وياي
وخالة حمدية حرجتني وعجلتني حتى اروح وياه
طلعنا من المول وصعدت وياه بسيارتة
اشو هذا اول ما صعدت بالسيارة لزم ايدي
وكلي حضري روحج امي راح تخطبج الي
سحبت ايدي منة
ريام: اني بعدني صغيرة وما افكر بالزواج واريد اكمل دراستي وادخل كلية
طارق: ههه عن يا كلية تحجين هذا يا زوج يخليج
تكملين كلية بابا انتو بنات خالة هناء حمدو ربكم
وشكروه من لكيتو واحد يقبل بيكم ويتزوجكم
نرفزني كلامه وحسيت بي عبالك مسوي براسي فضل
من جاي يخطبني
اتمنيت اني ولد واحط راسة بالجامة
وبيومها ما اكتفة بس بالكلام انتبهت عليه ركن السيارة بشارع فرعي اظلم واقترب مني يريد يبوسني
واني صرت ادفع بي واضرب واصرخ عليه واغلط
والله حابني من اتصلت خالة حمدية تسال علينا وين صرنا
ومن عندها قررت ما اطلع وياهم ولا التقي بخالة حمدية
وصرت كلما تجي لهنا ببيت جدي اني اروح ركض والبد بغرفة خالة رحاب عبالك رايحة يم امي احس بالامان هناك
بس اليوم هو فاجئني من دخل علية الغرفة
طارق: هلة يا حلوة وين مختفية
عفية عليج والله جنت محتار شلون اختلي بيج
لان اريد احجي وياج انتبهت عالكل موجود وانتي الوحيدة ماكو كلت هي هاي فرصتك يطارق ريمة لابدة ومنتظرتك تدور عليها وتلبد وياهة
ريام: طارق اطلع برة شعندك تدور علية
طارق: خطيبتي وادور عليج شلون بالله تمنعيني عنج
ريام: طارق مستحيل اوافق بيك
طارق: ليش عيني لا يكون عندج واحد من ورانة حتى اطين عيشتج وعيشتة
ريام: لا ما عندي واحد مو شرط يكون عندي واحد ثاني لحتى ارفضك
بس اني ما اريد اتزوج ورافضة فكرة الزواج حالياً فاهم
اشو هذا اقترب مني
طارق: واذا اخليج هسة تغيرين رأيج وانتي بنفسج تكولين عفية استعجل بالزواج
اقترب مني وهو يحجي وعيونة على جسمي صرت كلي ارجف من الخوف ونيتة جانت واضحة من عيونة وعرفت شنو راح يسوي بية اجيت انهزم من يمة واطلع برة الغرفة بس جان هو اسرع مني ولزمني من دشداشتي وظليت ادفع
بي وانشكت الدشداشة رفستة على منطقتة الحساسة
وضربني على حلكي ودفعني على السرير وصار فوكي اجيت اختنك اتخبلت كام يتلمس بية
هيام اجيت اموت من الخوف ردت اخلص نفسي من عندة
وصرت اصرخ واريد واحد يلحكني
فجاءة وما حسيت الا على طارق طار بالهوى ونركع بالكاع
وشفت ضرار هجم عليه مثل الوحش لج هيام جان منظرهم ثنينهم يخوف
ضرار جان كل ضربة يوجهة على وجه طارق ينثر دم على ايدة ووجه طارق اختفت معالمه من ورة الدم
خفت منهم اثنينهم
ضرار وطارق يخوفون
انتبهت عليها جانت تحجي وتضم راسها بحضني عبالك بهاي حركتها راح تكدر تدفن الخوف والالم الي ماعد تحس بي
هيام: يعني طارق ما كدر يتمكن منج
ريام: لا ضرار لحك علية باخر لحظات
كمت من يمهة ولزمتني
ريام: وين رايحة عفية لا تعوفيني لوحدي والله اموت
اخاف يذبحوني
هيام: لتخافين ما راح اخليهم يلمسون شعرة منج لو على جثتي
انتي ارتاحي واني راح اطلع اشوف الوضع شنو
والله بس اشوف نظرة الاتهام بعيونهم اني كبل لامة غراضي واخذج واطلع وما اعيش يوم واحد بالذلة والمهانة الا كرامتنا
طلعت وسديت الباب وراي او بالاحرى قفلت الباب
جنت خايفة منهم ما اعرف شنو موقفهم من السالفة ردت فعلهم شراح تكون اذا عرفو
طلعت واني ادور بعيوني عليهم
انتبهت لميس مرت من يمي بدون ما تنتبه علية
هيام: ميس ميس لحظة
اجتني ميس تمشي بلهفة
ميس: هَـا بشريني ريمة شلون صارت
هيام: والله اختي مو زينة
بس انتي بشريني شنو الاوضاع
ميس: والله ما ادري شنو اكلج بس بيبي اتصلت على بابا ودزت على عمامي وكلتلهم هسة تجون
كلبي كام يدك حيل
هيام: شراح يسوون ليش دزت عليهم
سمعت صوت الجرس وكمزت من مكاني وباعت لميس
هيام: منو اجانة
ميس: اتوقع لو بابا لو واحد من عمامي
راحت اتوجهت للباب المطبخ حتى تفتح الباب الرئيسي
واني جمدت بمكاني
صارت ام ضرغام بوجهي
حليمة: اوي لا هلة ولا مرحبة بيجن
شسويتن بينا هجمتن البيت وخليتن الزلم تتعارك من وراجن من الله لا يفوقجن بعد امجن منو عليمن تطلعن هجامات بيوت
ما كدرت اجاوبها مو خوفاً منها بس الموقف ما يتحمل
عرايك اكثر الي احنا بي كلش كافي
سمعت صوت خالو راضي وصل وهي عافتني وراحت للمطبخ
راضي: شكو شصاير ليش امي اتصلت علية وانا بالشغل صاير شي وانا ما ادري
ام ضرغام: روح فوت يم الحجية وهي تكلك انا ما افتح حلكي لان بس احجي يم امك اصير مكروهة وجابت بنت
كبل تهجم علية احسن شي خليني ساكتة
جنت اسمع كلامها
الله ياخذج حليمة وهاي انتي ساكتة وما ترضين تحجين لعد لو تردين تحجين شتصخمين وتسوين
طلع خالو من المطبخ وراح على غرفة بيبي خاجية
سلمت عليه وراهة بخمس دقايق اجوي خالو مؤيد وخالو حسن وراح على غرفة بيبي وجانت خالة رحاب يمهة
وانسد الباب وراها صاحو لضرار
وبدة الاجتماع المغلق
ما اعرف بس حدسي يكول ان ورة هذا الاجتماع شي مهم وهذا الشي يخص اختي ريمة
اتمنيت اعرف شنو يحجون
ورة ساعتين من الهدوء طلع خالو راضي ودخل للمطبخ خزر ام ضرغام وطلب منها
تصبلهم غدة
انتبهت عليها كامت من مكانها بارتباك
وكعدت تحمي الاكل
صاحتني خالة رحاب على صفحة
واخذتني فوك لغرفتها
رحاب: هيومة ريمة حجتلج الي صار
هيام: اي
رحاب: بس سؤال ولو ما اعرف شلون اسألج هيج سؤال وانتي ما متزوجة بس غصب عنا الظروف خلتنا
بهيج موقف محرج
حسيت خالة رحاب كلش مرتبكة
هيام: كولي خالة اسمعج
رحاب: طارق من اتهجم على ريمة خو ما سوالهة شي
يعني قصدي اقترب منها
هيام : افتهمت قصدج خالة قصدج طارق مغتصب اختي وماخذ عذريتها
انتبهت على خالة رحاب كامت تمسح بالعرك من الخجل خطية خالتي من اهل الله على نياتها
رحاب: اي يعني هو خو ما سوالهة شي من هذا الي كلتي عليهم قبل شوية
هيام: لا خالة هو اتهجم عليها وهي ظالة تصرخ وضرار لحك عليها وبعدة عنها
رحاب :لعد هذا الناقص طارق يكول اخذتها
هيام: ياكل تبن لا خالة ماكو هيج شي اختي بعدها بنية
هذا يحجي هشكل حتى يتزوجها لان هي رفضتة
من درت يي يريد يتزوجها
راحت خالة رحاب نزلت جوة لبيبي
شوية وطلعت من يمهة
هيام: هَـا خالة شنو مالت بيبي
رحاب: كالت ناخذها للدكتورة ونفحصها
ونشوف كلام منو بيهم صحيح
ظليت اكمز من القهر والله اختي تتحطم بالزايد اذا انعرضت على طبيبة نسائية علمود يكشفون عليها
ياربي الدنيا شكد صعبة

وراهة خالو راضي اتعارك وية حليمة وظل يصيح عليها
اتفاجئت من سمعتة
يغلط عليها
راضي: هَـا حليمة نسيت اهلج الحرامية لو اذكرج بيهم
حليمة: عيب عليك تعيرني باهلي وهمة عمك واولاد عمك
راضي: جا ما تكولين لروحج بيوم هادة على بنات اختي وتعيرهن بامهن جا شعبالج ما يوصلني الحجي
شوفي ولج اذا ما انعدلتي والله ما راح تكلفيني غير
روقة طلاك تروح وراج لبيت اهلج
وهاي حمدية ابنها اليوم الا احرك بيتهم على روسهم واشوف هذا السكط شلون يتجرء يتعدة على بنت هناء
حليمة: ليش ما تكول هي بنت هناء الي غرتة واتبلت عليه
شهكت وضربت على صدري من الخوف
راضي: من انعل ابوج لابو العرفني بيج
ركض ضرار ولزم ابوه الي كام يريد يهد على حليمة
ويضربها وهي راحت لغرفتها وسدت الباب
وهي تدعي علينا وتتحسب
ضرار : صلي على محمد حجي شوية هدي اعصابك
كلبك مو زين عليك العصبية
راضي: خليها تعرف حدودها وما اريدها تتحاوز
هي كلرت وعقلها ما كبر
والا تنهان يالله تسد حلكها
رجع كمل كلامه
تحرك جيب سويج السيارة خلي اروح لبيت حمدية
اليوم الا اطين عيشتهم هي وابنها
(((((((((((()))))))))
مرت الايام
وخلال هاي الايام اختي ريمة انتكست حالتها واتمرضت
واخذتها خالة رحاب بطريقتها الخاصة للدكتور وفهمت ريمة ان هاي الدكتورة مراجعة روتينية عادية علمود تشرف على صحتها
واختي ريمة واتقبلت كل الاجراء تتخذة الدكتورة
من الفحوصات جانت تسمع كلام الدكتورة بكل سهولة

عبالهة مثلي اني جنت اراجع عند الدكتورة
وخطية بيومها سألنتي انتي هم هشكل الدكتورة تطلب منج هيج فحوصات
جذبت عليها وكلتلها اي واصلا حتى مرات يسحبون مني دم علمود الهرمونات
ريام: لا اني اشوه منج بس فحوصات عادية
صحيح تخجل بس ولا سحب الدم اخاف منة
وراحت لغرفة ميس
انتظرت خالة رحاب تطلع من يم بيبي خاجية
لان الظاهر راحت تكللها شنو كالت الدكتور عن ريمة
طلعت وصحتلها
هيام: هَـا خالة بشريني شكالت الدكتورة
رحاب ببتسامة اطمئنان: لا الحمد لله اختج بعدها بنية وكلامها طلع صحيح هذا القذر ابن حمدية ما مسويلهة
شي مثل ما كال حسيت بكلامها بماي بارد نزل على كلبي
((((((((((()))))))))
وعدت الايام وصار الشهر الثاني واني نسيت نفسي
وحتى ما حسيت بروحي من ضعفت
جان كل همي ريام الي من بعد الحادث انطوت على نفسها
ولاحظتها صارت كلما تشوف ضرار تشرد
من عندة ما اعرف هل يا ترى هذا خوف من عندة لو خجل
لكن بمرور الايام ثبتتلي ان ريمة تخاف من ضرار
ما ادري ليش بالعكس هو انقذها
ومرة من المرات لفت انتباهي تصرفها الغريب
من دخل ضرار وسلم علينا واقترب منها وسألها عن صحتها جانت نظرات عيونة كلش واضحة ومفضوحة
شفتة طلع علاكة بيها باكيت
وسلمة الهة
ضرار: شلونج ريمة جبتلج هدية
مد العلاكة الهة
بس ما فاتتني حركة ريمة من كمزت من عندة
كان واضح عليها ان هي كلش تخاف من ضرار
انتبهت لضرار حس على حركتها
وارتد للخلف
ضرار: ريمة لاتخافين مني انا ما ااذيج والي شفتي بذاك اليوم جان غضب موجه بتجاه طارق
انا مو متوحش مثلما انتي تعتقدين
ريام: اني شفتك خنكتة بديك الثنين وهو جواك لاحول ولا قوة صرخت اني يالله انت وعيت على نفسك
ضرار اني اخاف منك لان انت ما تتحكم بغضبك
انسحب ضرار بدون ما يدافع عن نفسه
وانتبت عالعلاكة حطاهة على ميز الطعام وطلع
هيام: ريمة ليش حجيتي هشكل وية ضرار
ريام: هيام انتي ما شفتي الي اني شفتة
ضرار وحش مو بس بالشكل بس حتى بالگلب.والطباع
يخوف
هيام: بس هو كل هذا سواه علمودج من ضرب طارق
ريام: اعرف بس طارق اغمة عليه جوة ايدة وصار لا حول ولا قوة الة بس ضرار فقد وبقة يضرب بي
هيام : هذا الي دتحسين بي حالة صدمة
وضرار حباب ويالله هاج اخذي الهدية الي جابهة الج ورحي اتشكري من عندة
راحت ريام وشكرت ضرار
بس الغريب بالامر ضرار يوم ثاني التحق ورجع لدوامه حتى ام ضرغام صارت تتوسلة وتكلة بعدها اجازتك ما خلصت ليش قطعتها
عدت الايام وخلصت العطلة وبدة الدوام

ريام على بيبي خاجية تريد تكمل كليتها و
والحجية خاجية: شوفي يمة هسة اجلي سالفة
الدوام جاي تشوفين خوالج مشغولين وما عندهم وكت
ريام: بس اني اريد اكمل كلية واخذ شهادتي
خاجية: البنية شهادتها زوجها وبيتها
انتبهت لريام انتفضت
ريام: انا ما افكر هسة بالزواج
الحجية خاجية : ومنو كلج تعاي اتزوجي بس انا كلت ماكو كلية
انتبهت لريمة ضاجت وكامت من يم الحجية خاجية وطلعت
دخلت ميس : اي واخيرا لكيتج عندي الج مفاجئة
هيام: شنو
ميس: اليوم معزومين عرس بالنادي وامي كالت حضرن نفسجن انتي والبنات ترحون وياي
هيام: شلون ما عندي ملابس
جرتني ميس من ايدي

ميس: لج شنو ما عندج ملابس لعد انا وين رحت
هيام: وين يصيرون ملابسج علية
ميس تباوع علية : انتي شايفة روحج شلون ضعفانة لو يكلولج
هيام : لا ما اتصور
ميس : بالله شو دتعاي خلي نشوف
دخلنا وشفنا ريمة عافسة وجها بزعل
ميس: ولج ريمة اليوم احنا معزومين حفلة عرس بقاعة اعراس نسائية
وانتي عافسة الوجه ولج كومي عوبة
خلينا نبدل ونتونس
كدرت ميس باخبالاتها وحركاتها
ان تسحبنا لعالمهة المفرح
فتحت كنتورها وصرنا ننزع ونبدل كل ساعة
اني ما مصدكة الي كاعد تشوفة عيوني معقولة اني
لهالدرجة ضعفانة وملابس ميس يصيرون علية
لبست فستان احمر قصير يوصل لنص الفخذ

ميس: ولج شنو انتي غير طالعة تخبلين بهذا الفستان والاحمر ياكل ويشرب عليج
هيام: اشكرج خجلتيني يعني صدك حلو علية بس مو جنة شوية قصير
ميس: لا عيني شنو قصير حقج ما شايفة البنات بالحفلات شنو يلبسن
هسة يالله استعجلن خلي نكمل بسرعة قبل لا امي
تكول يالله لان امي ما تنتظر ماعدها مانع تطلع وتعوفنا
عدلت الفستان وكعدت اشسور شعري ونزلتة على طوله وهو واصل لاسفل ظهري
انتبهت على ريمة لبست فستان چويتي كلش حلو عليها شكلها نست سالفة الكلية مؤقتا
جنت مقررة اكعد وية خالة رحاب واخليها تحجي وية بيبي خاجية وتقنعها علمود ريام تكمل كليتها
خلصت شعري وحطيت ميك اب خفيف
حطيت كحل وبرز لون عيوني
دخلت خالة رحاب وشافتنا جاهزات : ما شاء الله تبارك الرحمن اقرن المعوذات قبل لا تطلعن
باوعت علية
:لج هيومة طالعة كمر بس خالة جنها بدلتج كلش قصيرة
هيام كعدت انزل بيها بلا امل : اني هم كلت لميس بس هي كالت
عادي البنات كلهم يلبسون هشكل
رحاب: لا خالة انا علمود العين من يشوفن هيج زرور تلج من البياض اخاف يضربنج بعين
هيام : ههه لا تخافين الحافظ الله
رحاب: يالله قبل الا انسى امي خاجية تريدج
كالت صيحي لهيام
رحت لبيبي خاجية ودخلت لغرفتها
شفتها كاعدة عالسرير وبصفها صندوق
صغير مفتوح وبي ذهب
اقتربت منها وشافتني وصارت تصلي وتهلي بصوت ناصي ما تريدني اسمعها
الحجية خاجية : تعاي جدة اقتربي مني
رحت لعندهة مدت ايدها بالصندوق وطلعت مثل السوار بس جبير وبي سلاسل ناعمة نازلة من عندة
الحجية خاجية: هاج اخذي لبسي هذا خلخال هنا......
قطعت كلامها وغيرتة
: بالله شو لبسي برجلج
ظليت اباوع للخلخال جان شكلة قديم بس كلش حلو
عرفت هذا راجع لامي
اخذتة منها وعيوني تلمع من الفرحة
وحطيت شعري على صفحة
جنت مندمجة البس الخلخال برجلي
فجاءة انفتح باب الغرفة
الحجية خاچية : صلوات على النبي ضرغومي جدة شوكت اجيت
الف الحمدلله عالسلامة يمة توة نور البيت
ضراغام: هلة بيج يالغالية منور بوجودج
ستوني اجي..........
وانقطع كلامه
يمة كلبي كمز من مكانه من شفتة دخل الغرفة وعيونة على بيبي خاچية ويحجي جنت مدنكة عالخلخال
من شفتة عدلت وكفتي وكلبي كام يدك الف بالدقيقة
لفتت انتباهة بحركتي
اتوقف عن الكلام وضل فاتح حلكة متعجب علية
ارتبكت يبووو وانا شلابسة
ظل يباوع علية وما شال عيونة مني ولا غض النظر مثل كل مرة
الحجية خاجية : خايب ضرغام وين سهيت
مو جاي احجي وياك
ضراغام وعيونة بعدهم علية : هاااا احم هَـا جدة
يحجي وية بيبي ويباوع علية
هذا شبي اشو صاير ما يستحي هسة غير يشيل عنة والله خجلت
رحت اتعديت من يمهم واني رجل تطك برحل ردت اوصل لعباية بيبي عالتعلاكة
بس هو ابد ما حاول يداري بنظراته كدام بيبي
الحجية خاجية: ولك ضريغم شمالك فاتح حلكك
وواكف جنك صنم نزل عينك خايب جنك نسيتني انا هنا
ضرغام : احم هَـا جدة احم شنو ما سمعتج شنو كلتي
الحجية خاجية: اي يمة حقك ما تسمع شي مو انسطرت
ضرغام: هيااااام!!!!شلونج

عزة هذا شجاه عينك عينك كدام بيبي يسألني متفاجيء بية
هيام كوة طلع الحجي مني : الحمدلله على سلامتك
ضرغام: هاي شمسوية بروحج ووين طالعة
دخلت ميس: يالله هيومة امي تكول راح تنأخر عالعرس
انتبهت على وجود ضرغام
ميس: عاااااا ضرغومي هنا في بيتنا يا مرحبا يا مرحبا
راحت عليه وحضنهاوهو يضحك على خبالهة
ميس: الحمد لله على سلامتك هاي شوكت اجيت انت ما تبطل جياتك المفاجئة
ضرغام: بعد معروف من اخلص شغلي ارجع ما انتظر اكثر
بس ماكلتو وين طالعين والتفت علية باوعلي ورجع يباوع على ميس
ميس: معزومين على عرس
باوعت على ضرغام اجت تطلع عيونة من مكانهم وحجة وية ميس
ضرغام: ماكو روحة للعرس
رجعي بدلي ملابسج
ميس: لا ضرغام عفية ليش ما نروح

ضرغام: انا اليوم عازم ربعي كلهم راح يجون عالعشا
يالله روحي بلغي امي ماكو روحة
ظليت اتكلب اتكلب اريد اروح بس المشكلة هو ما وجهلي اي كلمة جان كلامه كلة وية ميس
وانتبهت على روحي جان شكلي غلط واكفة يم الاستاذ
انسحبت ومشيت من يمة اشو هذا قطع الكلام ولف راسه وظل يباوعلي كصني من فوك ليجوة واني عباية بيبي مفتوحة من امشي تبرز سيقاني منها
طلعت ورحت ركض على غرفة ميس وسديت الباب واتكأت عليه وكلبي يريد يطلع من مكانه
رفعت ايدي وحطيتها على صدري اريد اهديء دكات
گلبي
عجيب امره خرب موتني بنظرات عيونة
اشو كل مرة من يلتقي بية يدنك وينزل عيونة بس هالمرة هذا غير حتى ما حاول يدنك اشو صاير جريء الله يلعن بيلسك اووووف

ريام: عيني ياحلو اشو دتحجين وية روحج
شبيج اتخبلتي
هيام : اي مجنونة بالحب
ريام : لا لا الظاهر اكو شي فايتني وانا ما منتبهة
دخلت ميس مطنكرة وزعلانة
تنزع بملابسها وتدردم على اخوها
ميس: دومة يخرب الطلعات لا انطيك ولا اخلي رحمة الله تنزل عليك لا هو يقبل يطلعنا ولا يخلينا نطلع
اوووووف منك ضرغام هسة وقتك ترجع
هيام: يالله هاي بدال ما تكولين الحمدلله على سلامته
شفتها ابتسمت ورجعت دارت علية وباوعتلي بنظرات
غريبة
ميس: اي حبيبتي هيومة شنو فلمج انتي واستاذ ضرغام
اشوانتي تكولين اتحمديلة عالسلامة
وهو يسألني هيام شمسوية بروحها
ههههههه بس والله شكلة تحفة خرب لو تشوفينة
شلون كل ساعة يسأل بيبي خاجية عليج
وكللها حجية شلون تخليها هشكل تطلع ونص السيقان طالعة شعدنا عرض ازياء جدة عودك هاي انتي الي ما تقبلين عالغلط
بس شنو جدتي استلمتة حجي وبسامير من هاي الحلوة
خلتة ما يندل حلكة وياهة اخر شي عافلهة الغرفة وطلع
(((((((((((())))))))))))
جنت طايرة من الفرح على رجوع ضرغام من السفر وكلام ميس زاد فرحتي يعني معناهة هو لاحظ التغيير
لبست دشداشة سبورت تركية بيها من الاسفل فتحة جانبية يطلع شوية من الرجل
ورحت عالمطبخ ردت اسويلة عشا ولجماعتة لكيت خالة ام ضرغام سابقتني وكاعدة تلف كبة
وتحجي وية رحاب
ورة ربع ساعة نزل من غرفتة وراح للصالة
وصاح
ضرغام: ميس اريد جاي
استغليت الفرصة و سويتلة الجاي
واخذت صينية الجاي
هيام: اتفضل الجاي
التفت علية يباوع علية مستغرب حطيت الصينبة كدامه
رجعت كررت كلامي: ضرغام الجاي
ضرغام: هااا اي شكرا خلي هنا
حطيتة يمة واجيت اطلع
واخذ الجاي جاي وبدة يشرب
انتبهت لروحي واكفة مثل الخبلة
اريد احجي وما اعرف شنو احجي وهو نظراتة اكلتني
هيام: احم يالله اني رايحة محتاج شي
ضراغام : احم لا سلامتج
درت اريد ارجع للمطبخ
ضراغام: لاااا يالله
كمزت من صوتة باوعت عليه
لكيت الجاي مكلوب بالكاع

هيام : يالله فدوة مصار شي
ضرغام: يا مصار شي
اكو وحدة تحط ملح بالجاي
شهكت : لا عليك الله
ضرغام: اي والله وداعت خلخالج الي كاعدة تتباهين بي
عقدت حواجبي بستغراب
الخلخال شنو دخله واتذكرت بعدني لابستة دنكت اباوع
جانت الدشداشة بيها جاكة صفح صغيرة
ومبين ربع من رجلي والخلخال
رجعت اباوع عليه باحراج كانت نظراته على رجلية
اجيت اروح للمطبع
ضرغام: وين رايحة
هيام: راح اجيب وصلة وامسح الجاي
ضرغام: انعل ابو الجاي لا ابو عشيرتي
دروحي بدلي دشداشتج
هيام ظليت مصفصفة بوجهة هذا شبي
ضرغام: تعرفين تبدلين الدشداشة لو انة اجي اعلمج شلون تبدليها
هيام: لا ما يحتاج رايحة بس كافي هواي تأمر حضرتك بعدك ما وصلت ونزلت علية بالاوامر عبالك جندي عندك وكأنما جنت مجمعهم الي طول هاي الفترة
ما انطيتة مجال يحجي درت وجهي وطلعت
دخلت لغرفة ميس ادردم واحجي بدلت الدشداشة بوحدة ثانية جانت عادية وزينة عريضة وبالعناد ما نزعت الخلخال
رحت عالمطبخ وكلت لميس تمسح الجاي الوكع
والتهينا نسوي عشا لجماعة الا ستاذ
دخل للمطخ ضاري
ضاري: يماااا جوعان
صبيلنا عشا
ام ضرغام: انتظر جماعة ضرغام على وصول
ضاري: ياجماعة
ام صرغام: اخوك عازم ربعة عالعشا
ضاري : جا شلون عازم وشلون كلي خليهم يصبون عشا جوعان
دخل ضرغام يضحك: يمة صبي عشا
ام ضرغام: جا يمة وربعك
ضرغام: احم ها اي اتذكرت جماعتي ما راح يجون صار عندهم شغلة طارئة وما كدرو يجون
جان يباوع علية وعلى ملابسي درت وجهي ورحت يم السنك اسوي زلاطة
اقترب من يمي واخذ خيارة من من الكاسة وهمس قريب على اذني
: نزلي اردانج ايدج نصها طالعة ندري ايدج حلوة
هي هسمة واني رحت بغير عالم يمة حتى بحة صوتة
تدوخني
قطع علينا الجو الي جنت عايشة بي دخول خالو راضي
وخالو حسن
انتبهت عليه بسرعة ابتعد عني وراح سلم عليهم
جنت ناطيتهم ظهري
ام ضرغام : خير ابو ضرغام شبي وجهك
مكلوب صاير شي
راضي : ماكو شي
حسن: عوفي جان يتعارك

باوعت عليهم جانت وجوهم ما تتفسر
رحت سلمت عليهم
راضي : بوية هيومة جبيبي اختج وتعاي
ما ادري ليش انقبض كلبي
رحت صحت لريمة ودخلنا عليهم بالصالة
جان الكل موجود ضاري ضرغام خالو حسن خالو
راضي وخالة رحاب وخالو مؤيد هم لكيتة جاي
وبيبي خاجية كاعدة: خير يمة راضي شنو صاير
راضي: يمة عم البنات هيام وريام داز علينا ناس
ويكول راح اجي واخذ بنات اخوي
لان انا ما ادري بوفاة امهم وبنات اخوي يرجعن يعيشن عندي

يتبع