رواية تائهة بين اروقة الماضي الفصل السابع والعشرون 27 - بقلم الكاتبة نهى

🌹مساؤكم مسك احبابي وعيد فطر مبارك
عليكم يالغالين اعتذر عن التأخير بتنزيل الجزء الثاني
كما وعدتكم لكن ضروفي سبقتني وحالت بيني وبينكم
لكن رجعت لكي اكملها لكم وانتم مجتمعون من حولي
فدعوني اترككم
مع ما سيحدث مع ضرغام وهيام وبقية الابطال بعد الهروب تابعونا في الجزء الثاتي من كاتبتكم المبدعه # نهى
#Houda

#تائهة_بين_اروقة_الماضي ج٢
#بقلم_الكاتبة_nuha-d-h
#بيج قصص الكاتبة nuha-d-h
🌷🌷🌷🌷🌷🌷🌷🌷🌷🌷🌷🌷🏇🇮🇶

تركته ورحلت لكي ابحث عن اماني بعيداً عنه
لم يكن بوسعي الانتظار فسهام غدره الخداع اوشكت
ان تعدمني الحياة
#بيج قصص الكاتبه nuha-d-h
🌷🌷🌷🌷🌷🌷🌷🌷🌷🌷🌷🌷

حسيت على ايد تمسح على راسي وصوت هامس يقرة ايات
فز كلبي على همسة هذا الصوت ياربي شكد مشتاقتلهم
رفعت راسي وفتحت عيوني مامصدكة
هيام : يوووم !!!!!! هاي انتي هنا بالبيت عايشة
ليش ما اجيتي اخذتينا من بيت اهلج
سمعت صوت بابا التفتت شفته واكف بباب الغرفة ولابس كلابية منزلية
ابو هيام: بابا هيومة امج جانت يمي وماكدرت تجيكم
#بيج قصص الكاتبه nuha-d-h#
هيام: وانت بابا شلون تقبل نعيش بعيد عنكم اني وريام بابا عفية خلينا نرجع يمكم
عفية روح كللهم انا عايش ما متت وبناتي يبقون عندي
والله ترة همة ديسون ويانا هشكل لان عبالهم ماعدنا احد نشتكيله وياخذ بحقنا
انتبهت عليه اقترب من عندي اني وامي
باوع علية اني جنت كاعدة عالكاع على حطتي
شفتة طلع من جيبه ٣ جكليتات وانطاهم الي
مديت ايدي واخذتهم من عنده وباوعت عليه
حجة بصوت كلش بعيد عني : هيام بابا الصبر مفتاح الفرج بعدين شفتهم طلعو من الغرفة
كمت من مكاني طلعت وراهم ادور عليهم شو ما الهم اثر
بس اسمع صوت امي تصيحني هيام كومي اكلي لكمة
هيام ..هيام..كعدي اكليلج لكمة
حسيت على ايد لازمة كتفي فتحت عيوني
بنعاس متفاجئة وبخيبة امل لاؤل مرة بحياتي احس بمثل هيج خيبة امل لان صحيت من احلى حلم اتمنيت ارجع اكمل حلمي اريد ابقى هناك يمهم
ركزت شفت ريام تندهني حتى اكعد
ريام : هيام كعدي اتعشي ترة صارلج هواي نايمة على لحم بطنج
باوعت على روحي شفت نفسي نايمة متمددة عالسجادة
بالكاع بغرفة ماما وبابا واتذكرت
عمو احمد وصلنا لهنا ببيت بابا بطلب مني
لان هو بالبداية كان يريد يرجعنا وياه عالبيت لكن اني اصريت ان يوصلنا على بيت بابا جان هذا اول قرار اتخذة ومنا ورايح ما اخلي اي واحد يتدخل بقرارتي ويتحكم بينا واول ما دخلت للبيت
فتت بكل لهفة واشتياق لبيتنا الحبيب جنت مشتاقة لكل زاوية بي لان هنا جانت الي بي ذكريات هواي واغلبها ذكريات جميلة صرت اباوع لبيتنا عبالك مزار مقدس من كد المشاعر الهائلة الي غمرت گلبي دخلت على غرفة ماما وبابا وطلبت من البنات يتركوني لوحدي اخذت نفس عميق وباوعت على اثاث غرفتهم البسيط رغم بساطة العيش لكن عشنا احلى حياة بسعادة ووئام وخلال التأمل الظاهر اخذتني الغفوة ونمت ما ادري بروحي
كمت من مكاني متكسرة لان جانت وضعية نومي غلط
هيام: بيش الساعة هسة
ريام: هسة ب٨ يالله تعالي اتعشي ويانة
ها اي صدك اتذكرت قبل شوية اجتي زوجة عمو احمد وبناتها
يردون يطمنون علينا
بس عرفو بيج نايمة وكالو خلوها ترتاح خطية تعبانة من السفر
طلعت وياها من الغرفة لكيت البيت كلة نظيف
ومعطر خطية شايلات الشراشف البيض من الاثاث
ومنظفات مرت من يمي لجين وبيدها ماعون اكل تريد تحطه عالميز
طبعا البنات ريتا ولجين رجعو وياي للبيت ما تركوني لوحدي
لجين: صحي النوم ياحلو
ريتا: هَـا هيومة بشريني شلون صرتي
هيام: لا شوية احسن
لجين : يالله غسلي وتعالي اتعشي ويانة ترة متت من الجوع
هيام: بنات ما اعرف شلون اتشكر منكم والله احس تعبتكم وياي
لجين : هاي شنو اشو صايرة محترمة وكاعدة تتشكرين
خير هاني ترة ما جاي اعرفك ارجع هاني صاحبنا الاول
ريتا: عفية بدون مجاملات ما تلوكلج احس بيج عبالك وحدة غريبة
لجين: لا ريتا بس شكل الامومة خلتها تتصرف ويانا بأحترام ورسميات
الظاهر تريد من هسة تبيع براس اطفالها مثاليات
هههه بس ها خلي ببالج لو مو تصيرين ام عسى ما تصيرين بيبية هم راح نبقى نتصرف على سجيتنا ونظل وحدة تعيب عالثانية ونبقى نتصرف بشقاوة ونصنف ويبقى لقبنا الشلة التعبانة فخلي الرسميات
لغيرنا
هيام: لعد ما دام هيج منو منكم يا عوبة بيكم سوت العشا
لان ادري انتو الثنين مو طباخات ولا تندلن باب المطبخ منين
لجين : اي هسة هاي صديقتي هيام الي اعرفها
حٍٍِْــًبٌٍـــِٓېٍٓ بما انو احنا ما بينا خير عمج احمد جاب العشا

هيام: اي مو اكول
اجتي ريتا وبيدها الصحون وحطتهم عالميز
بس شعجب باقين البنات لحد هسه لان اعرفهم ميكدرون يتاخرون
.. بنات اليوم شكلكم راح تتأخرون على اهلكم
لجين : لا حبي اني اليوم اترخصت من بابا ووافق ابات عندكم لان يعرفج بنت عم نبراس لذلك قبل
ريتا: حٍٍِْــًبٌٍـــِٓېٍٓ واني اترخصت من ماما وبابا وكتلهم راح ابات اليوم يم هيام
وبما ان همة يعرفون بمعزتج عندي ما عارضو
بس ماما كل ساعة تتصل هي وبابا بحجة يطمنون عليج ويسألوني عنج وشلون صارت صحتج
بس اني اعرفهم البيت صار عليهم وحشة من طلعت
هيام: الله يحفظهم الج ويطول بعمرهم
ريتا: اشكرج هيومة
بس تدرين هوس ماما وبابا بية هو سبب
عرقلة زواجي من كل واحد يتقدملي
هيام: اي صدك نسيت اسألج شنو سويتي بسالفة الولد الي اتقدملج
ريتا: عادي ما سويت شي مثل كل مرة بابا يطفش العريس ويخليه يشرد بليلة ظلمة
بابا لو بيدة يسويني راهبة
حتى يضمن ما اتزوج
ابتسمت
لجين: خرب هذا ابوج مثل بابا هم يطفر العريس
انا محمد هاي ثالث مرة يتقدملي وبابا يرفضه
واني اظل اشيل روحي واركعها بالكاع كدامه وهو ولا يرفله جفن
هيام: عكس بابا الله يرحمه ما يوم جبرنا على شي وحتى من يجوني ناس يخطبوني يسألني ويحترم رأيي
ظلينا نحجي ونسولف بكلشي
الا سالفة موضوعي ما حجينا بيها
ارتاحيت لهذا الشي ما اريد احد يذكرني
اكلنا وكوة جبرت نفسي لحتى اكل وبعدها خلصنا
وشالو مواعين العشا ورفضو اساعدهم
ريام: لا هيوم ما تسوين اي شي وخلي ببالج منا ورايح
كلشي علية فاهمة انتي حامل ديري بالج على نفسج والطفل
انمغصت بطني من اتذكرت سالفة حملي
دنكت اباوع على بطني رفعت ايدي وصرت اتحسسها
غمضت عيوني وسحبت نفس عميق
عبالك اريد اطمنه لتخاف امك موجودة
ما راح تتركك
جابت ريتا صينية الجاي واني سوتلي حليب
اباوع عليها جانت لابسة بجامة قصيرة وشعرها قصير ولابسة
طوق بي كرستال فضي ناعم
ريتا: انتي تشربين حليب وما تقربين للچاي لان الچاي مضر بصحة الحامل ويكسر الحديد الي بالدم
هيام: هاي شنو من هسة راح تكعدون تطبقون براسي قواعد الحمل
لجين: اي حٍٍِْــًبٌٍـــِٓېٍٓ خلي ببالج هذا الجنين مو بس ملك خاص بيج لاحبي هذا ملك للجميع وكلنا نتشارك بي
ابتسمت براحة
اخذت كلاص الحليب وحضنته بثنين ايدية كان حار كعدت انفخ واشرب شوية شوية
اتكأت عالقنفة وغمضت عيوني وجريت نفس عميق
هيام : تدرون بنات صارلي شكد ما كاعدة هيج كعدة واتصرف براحتي بدون قيود
وما اسوي حساب لحركاتي مثلما جنت اسوي يمهم هناك احس عبالك كاعدة اخضع لاختبار وانتظر اترقب نظراتهم اذا همة قابلين علية او لا
هيج جانت حياتي ببيت اهل امي الترقب والعمل للحصول رضى بيبي خاجية علية واطمن مخاوف خالو راضي بتجاهنا
باوعت على ريام طفت ضوة الهول وخلت ضوة خافت عبالك تريد تهيء الي جو الاستقرار والهدوء
جنت كاعدة عالقنفة وريتا بصفي
اجتي لجين جابتلي مخدة وغطى خفيف
وحطت المخدة ورة ظهري وغطتني
عبالك ام تعتني ببنتها
اباوع عليها جانت لابسة بجامة بيها ارانب لون وردي وشعرها اسود سرح شايلته بقراصة باهمال ناطيها هالة من البرائة
وراحت اخذت مكانها يم ريام عالارض مقابيلي
وحطت الكوشة المربعة بحضنها
واخذت كوب الجاي
ريتا: هيومة هسة تكدرين تحجيلنا ليش قررتي تطلعين من حياة ضرغام هشكل بهاي الطريقة لان كلامج بالممستشفى كان مقتضب
غمضت عيوني
هيام: ضرغام غدرني
لجين : شلون يعني
هيام: وهمني انه تزوجني علمود يحبني لكن بعد الزواج او بالاحرى بيوم الزواج اجتي بنت خاله
رنا وحجتلي عن سبب زواجه مني
لكن هيام المغفلة رفضت تصدق كلامها
مثلما سويت بريتا بيوم حذرتني من نبراس
ورفضت اصدقها
تعرفون شنو اصعب شي عالبشر ان ينلدغ من نفس الجحر مرتين
اني سلمت ثقتي للمرة الثانية بيد انسان ايضاً غدر بية
هم رفضت اصدك رنا وكلت تغار مني واتهجمت عليها
كلت هاي جانت تريد ضرغام فشي اكيد راح تسوي
هشكل وتخرب علية فرحتي
وصممت بوقتها اكمل زواجي وما اهليها تأثر عليه ما اهتميت لكلامها
لكن بمرور الايام سمعت بالصدفة كلام الحجية خاجية وخالو راضي يحجون بسالفة الورث والوكالة وتحويل العمارة بأسم ضرغام
بيومها بديت اتعثر بحياتي
لان اذا كان كلام رنا صحيح بموضوع الورث اذن الباقي كلة صحيح بوقتها اتحطمت نفسيتي وصرت اباوع لضرغام ولتصرفاته بشك
قررت اسأله عن موضوع العماره وورثنا اني وريام وارتباطه بزواجنة
ما نكر الكلام وكال اي صحيح وانتي ليش تسأليني هذا السؤال
ماحجيت شي بس كلتة جوابك هذا عرفني على كلشي
وطلبت منه الطلاك بوقتها اتعصب وصار يلعن
وكعد يحذر وبتوعد اذا اجيب سيرة الطلاق
وهاي من غير علاقته وية رنا كم مرة اسأله
عن الموضوع ويكعد يبررلي ان همة ما بينهم شي
واني متوهمة اكعد اواجهه بالاشياء الي عندي
يضل يصيح وياكلني بلسانه ويكلي انتي كاعدة تلفين وتدورين وتطلعين حجج لحتى اطلكج وتاخذين راحتج
ريتا: اي بس صدك جائز فعلا انتي متوهمة يعني ما عندج شي ملموس
هيام: ما اعرف شلون احجيلكم والله اخجل اكول بس
راح احجي وانتو حكمو
يعني اذا وحدة هي وزوجها بغرفتهم ووحدة تتصل عليه شيصير بيها .. اني بعد على اتعس چنت وياه وبأثناء علاقتنا الحميمة
تتصل عليه رنا وتكله تعال بابا مريض هو هم سحب نفسه وكام يا زوجة ترضاها على نفسها
من يقطع العلاقة ويكوم من عندي ويروح الهة
لجين: يعني حالة طارئة لتنسين انتي كلتي ابوها محتركة املاكه عادي ترة هو خاله
هيام: كلامج صحيح لكن اذا بحالة هو فعلا مريض من نزلت اسأل ميس عن حالة خالها استغربت وكالت خالو ما بي شي مو مريض
باوعت عليهن شلون انصدمن
:اي لا تنصدمون
ومرة شفتها طالعة من غرفتنا وهاي مو اول مرة
اشوف رنا تطلع من غرفة ضرغام وهي بوضع مشبوه
بنات اتخيلو اتعاركنا اني وياه راح ورة يومين سافر لدبي واني اخر من يعلم هل يا ترى هذا تصرف صحيح من زوج أتجاه زوجته مهما كان لو مشاكل الدنيا كلها
هم ميصير يخليني بهيج موقف كدام حليمة والسانها الي استلمتني بالحجي والرزايل
وفوك هذا كله اسمعه يتصل على رنا واني ما عبرني ولا مكالمة هذا كلة واني اخزن بكلبي
يعني شحجي اكللكم ان هو يستعار يعرف جماعته
الي يعتبرهم مثل اخوانه وعشرة عمر بينهم وحتى البنات خواته يعرفونهم ويسلمون عليهم يعني ما بيها مجال اكول هو ما يحب الاختلاط بين الاصدقاء
واهل بيته زين شمعنا اني
لكن عرفت بوقتها هو ليش ما يطلعني وياه مثل كأي متزوجين لان هو يستعار مني ويستحي يكللهم هاي بنت هناء خالتي لان جماعته يعرفون بموضوع امي
اتخيلو بنات طول مدة زواجي وياه ما كلف حاله ويسألني اني من يا كلية متخرجة هو يعرف اني علوم حاسبات لكن وين بالضبط اتخيلي حتى ما كلف روحة يسألني عن حياتي الشخصية
القديمة قبل لا نتزوج او شلون جنا عايشين شنو جنت اسوي مثل هيج اسألة تنطرح بين المتزوجين مثلا شنو تحب شنو تكره
او نحجي مواقف من كنا صغار هشكل يعني
هذا كلة ماكو جان اهماله واضح لكن حٍٍِْــًبٌٍـــِٓېٍٓ اله وولعي بي عماني عن تصرفاته
ريتا: انتي مو تكولين هو مشغول على طول وماعندة
وقت فشي اكيد هو رجل عملي عقله محدود
ما فارغ لهيج اشياء
هيام: المشكلة اشوفة وية غير عادي بس من يوصل يمي الموضوع
يكون ما عندة وقت
#بيج قصص الماتبة nuha-d-h
وفوك هاي الضغوط كلها وماعندي احد اثق بي واشكيله مشكلتي بيبي خاجية كدامها ضربني ودفعني
علمود حجيت حجاية عابرة حالي حال اي مرية من تعصب تهدد رجلها وتكله اطلع واعوفلك البيت
لكن هو ضربني واخذني كدام اهله
يهددني ويتوعد وخلة امه تتشمت بية وتحجي على امي
بنات شنو تتوقعون مني انتظره يتزوج علية رنا واني اكعد اندب حظي مثلما سوة بية نبراس ابن عمي حب سنين وياه وتالي كسرني
واستاذ ضرغام راح يوم ثاني طلب من امه تحجيلة وية رنا حتى يطلب ايدها
وفوك صدمتي اجتي رنا
وكملت السبحة عبالك كلهم اتعاونو علية لحتى يخبلوني
بأتصالها
كان الخيط الاخير الي بيني وبين ضرغام وانقطع
حسيت بالخيانة وعماني الغضب
من شفتهم سوية بيومها اجة كلبي يوكف من القهر اجيت اموت اتمنيت
ااذيه مثلما اذاني اتمنيت اخونه ملثما خاني
اتمنيت كون النار الي بية تصير بگلبه اتشمت بي
ريتا: ليش ما واجهتيهم وهمة بالمطعم هاي لو اني احرك المطعم على راسه واخلي الناس كلهم يشهدون على خيانته
هيام: حقج انتي ما تعرفين ضرغام شنو من يا طينة
هذا يتبع قاعدة حلال علية وحرام على غيري
عندة عادي هشكل يسوي لكن اني لا ما يجوز لازم اشوف وابلع
اعرفه كلش زين
اذا بوقتها وواجهته بخيانته راح يكلب الموضوع علية
ويطلعني اني الغلطانة وساعتها الكل راح يكعد يلوم بية مثل كل مرة يصوجوني الي
وراح يكولون
(انتي شلون تطلعين من ورة رجلج وتراقبيه وشلون تطلعين بدون علمه وشلون وشلون)
اعرفهم كلش زين راح يعوفون سالفت ضرغام ورنا ويجلبون بية واطلع اني الغلط
اما عن موضوع الاستاذ ورنا راح يكولون عنه عادي هو وبنت خاله ليش مكبرة الموضوع ترة همة متعودين على بعض من همة وصغار
لكن الما يعرفونه ان هو يحب بنت خاله ويريد يتزوجها

لذلك اني ما انتظرت يحطني امام الامر الواقع ويتزوجها كدام عيني
فقررت احرك گلبه مثلما حرك گلبي
اهرب واترك كلشي وراي لان حضرته رافض فكرة
يطلكني
واني الموت اهون علية ولا اشوفه يتزوج كدام عيني واسكتله
جنت احجي وخانتني دموعي بنزولها ونبرة صوتي المهتز شهدوا على وجع گلبي ومعاناتي
ريتا: اوووي حياتي لتبجين
اخذتني لحضنها
ريام : خليها تبجي البجي هواي احسن من الكتمان تعرفون بنات امي شنو اكبر غلطة سوتها بحقنا ؟؟
من دخلتنا بحياة اهلها من جديد وهي تعرف كلش زين
ان ماضيها وياهم راح يكون اكبر عائق بحياتنا
صرنا اني وهيام نعاني من حصاد غلطة امي
على كلٍ حال احنا هسة كبار وان شاء الله ما نحتاج اخذ وما علينا شي والعيشة كافلها الله وعمو احمد هياتة يمنا مو بعيد علينا
كان كلام ريام الي مثل التشجيع بأن الحياة لا زالت امامنا والله موجود

هيام : صحيح كلامج على الاقل هنا محد يحسسنا مسوي براسنا فضل محد يعصب ويكعد يحاسبنا على كل حجاية
ريتا: بس هيام لا تنسين هسة الامور اتغيرت والخيار انسحب منج وانتي هسة حامل ما معقولة
ما راح تبلغبن ضرغام على حملج
هيام : ريتا ما اعرف اقرر اي شي
احتاج ارتاح عقلي متشتت احس بروحي عبالك واكفة عارية بنص الطريق احس بعدم الامان
ريتا: براحتج حبيبتي بس اهم شي لا تستعجلين
بأتخاذ اي قرار لازم تفكرين زين
وانتي هسة ارتاحيلج كم يوم من الضغوط
وبعدين قرري من تشوفين نفسج هديتي شوية
(((((((((((()))))))))))))))))))))))))))))))))))
ضرار: والله راح اتخبل ادري وين اختفو
فص ملح وذاب
صارلنا اسبوع بالموصل وماكو الهم اي اثر
ضرغام : والله كلشي ما اريد
بس اريدها توكع بين ادية ااااخ
والله الا اجرم بيها
تعال كلي شنو جاي يصير هنا اشو الوضع ما عاجبني ما اعرف ليش گلبي ما متطمن
ضرار: ما ادري بس سمعت جماعتي يكولون
اذا خلصتو شغلكم ننصحكم باسرع وقت تطلعون من الموصل لان هاي الايام يردون يسقطون النظام ما اعرف اتوقع سمعتهم يكولون راح تصير اعمال شغب
#بيج قصص الكاتبه nuha-d-h
ضرغام: هسة غير نوكع على عنوانهم اشو رحنا لبيت جدهم كالو محد بي واصلا همة بايعين البيت من زمان
زين بيت عمهم احمد وين اختفى استغفر الله
باوعت على ضرار اتمدد عالسرير الي بصفي
جنا حاجزين غرفة بفندق
احس كل يوم يعدي علية مثل العداد الي يلعب بعمري
من الترقب
جنا نايمين وسمعنا صوت نقال ضرار يدك
شفتة كعد وسحب نقاله من على الميز
وحجة وية المتصل وشفتة كعد على حيلة
ضرار: الف رحمة الله والديك والله تعبانكم ويانا
انهى الاتصال وباوعلي
ضرار: هذا صديقي اتصل علية وكال لكيت عنوان
اختهم اسمها سولاف
ضرغام: يعني شنو قصدك عمة البنات
ضرار: اي عمتهم انطاني عنوانها وكال انا اجي وياكم باجر حتى ادليكم
ضرغام: يالله هانت ما ظل شي باجر راح توكع هيام بين ايدية
(((((((((((()))))))))))))))))))))))))))))))))))
قصص الكاتبه نهى
ريام : هيومة كعدي شنو سالفتج والله ظل بالي يمج لاتخوفيني عليج من وصلنا لبغداد لحد هذا يومج انتي
كاضيتها كله مريضة بالفراش
هيام بدوخة: ما اعرف شبية ما اكدر اشيل راسي من المخدة احس بروحي دايخة والدنيا تفتر بية
ريام: شلون مو خطية عمو. احمد وزوجتة اجوي يردون يطمنون عليج كومي سلمي عليهم
هيام: خلاص راح اكوم بس انطيني لحظة ريومتي
ريام : مديت ايدي علمود اكومها خطية من يوم الي وصلنا صارلنا اسبوع وهي على هذا الحال كوة تاكل وصحتها ماخذة بالنزول
لزمتها وكومتها احس بيها جسد بلا روح خاوية
والله خايفة عليها
ربي الگلب ماعاد يحمل فقد الاحباب صعب ربي ما اريد افقد اختي هي الوحيدة البقت من ريحة اهلي
ريام: تعالي غسلي وجهج صاير اصفر كركم
اخذتها للمغسلة وغسلتلها وهي ما شالت حتى ايدها ترفع شعرها الي التصق على وجهها
كسرت خاطري الحمل ماخذ منها كل حيلها
نشفت وجههاودخلنا على عمو وزوجته ونسرين الي جاية خطار لاهلها واجتي وياهم حتى تتطمن على هيام
سلمت عليهم بصوت هامس
احمد: اهووو هاي شنو شصاير بيج عمو
ام نبراس: لج عيني هيومة باجر لازم اخذج لدكتورة نسائية تشرف على صحتج ووضعج وتجيكج
هيام: اشكرج عمة اخاف اسوي عليج زحمة
ام نبراس: لا عيني بالعكس رحمة
قابل شنو مسويتلج هي دكتورة بالمستوصف الرعاية الصحية هاي بس نروح عندهم يسولج فايل
و يجيكون صحتج كل شهر
ريام: اي والله ياريت تاخذيها لان كلشي متاكل
وكاضيتها كلها نوم
جان عمو وزوجته يحجون واني احس براسي فارغ ما اركز وياهم بالكلام بس خطية ريام كعدت تحجي وياهم
سمعنا صوت الجرس
كامت ريام تشوف منو
كام عمو احمد: خليج عمو كاعدة اني راح افتح الباب واشوف منو
لحظات ودخل عمو احمد وسمعت صوت من وراه
حسيت انخطف لوني من سمعت هذا الصوت
رفعت راسي واجتي عيني بعين اخر شخص جنت اتمنى اشوفة واني بهذا الوضع
ماحبيت يشوفني واني مكسورة
اباوع عليه ابد ما متغير بس مبين عليه الخير
بملابسه وجسمه التارس واكتافه العريضة
جان يباوع علية وعيونة تريد تاكلني
عيونه فاضحتة واصلا حضرتة ما يحاول يداري الموجودين همس
نبراس: هيام!!!! ما اكدر اصدك عيوني
ما تتصورين فرحتي من يوم الوالد اتصل علية وكلي بنات عمك اجوي من البصرة وحجالي شنو صاير وياكم
بيج قصص الكاتبه nuha-d-h
جان يحجي وعيونه بعيوني عبالك محد موجود بالهول اتضايقت من نظراته انتبهت على روحي ما لابسة حجاب اتذكرت ضرغام وحرصه علية
هيام بصوت ناصي : ريام جيبي شالي نبراس هنا ما يصير ابقى بدون حجاب كدامه
راحت للغرفة وسمعت صوت نقالي
جابتلي الشال وحطيته على راسي هذا كله كدام عين نبراس الي اتضايق من موقفي
وهو المطلوب ارضاءه اخر همي
اجتي ريام وبيدها نقالي
ريام: هيومة هاي لجين تتصل عليج
انتبهت عليه اتوتر من سمع بأسم لجين
استغليت الفرصة واخذت النقال منها وكمت رحت لغرفتي على كيف امشي لان الدوخة بعدها براسي
جانت لجين تريد تطمن علية وكالت باجر تحل من الدوام وتنزل يمي هي وريتا اتفقو
كلش افرح من تجيني هي وريتا احس نفسيتي ترتاح
خلصت الاتصال وطلعت للهول والنقال بعده بيدي جنت دا اغلقه
حسيت رجعت افتر راسي عبالك صاعدة بمصعد
واختل توازني همست
: عمو عفية اخذني للمستشفى كلش متأذية
كام نبراس هو وعمو واقتربت مني ام نبراس
: تعالي عمة كعدي
نبراس: يوم راح اشغل السيارة جهزيها حتى ناخذها للمستشفى وجهة ابد مايطمن
وصلنا للمستشفى وهناك جيكو الضغط مالتي وسألني الدكتور بعض الاسئلة بعدها كتبلي ورقة كال لازم تسوي بعض التحاليل اخذها نبراس من عندة
نبراس: يالله هيام كومي خلي نسويلج تحاليل
قصص الكاتبه نهى
ما اريدة يكون صاحب فضل علية حتى لو كان يريد
يقترب مني حتى ولو كان عن طريق مساعدتي لان قربه يوترني وغير مرحب بي
كمت من مكاني اريد امشي اطلع من غرفة الطواريء
سمعت نقالي دك انطتني ريام النقال
ريام: هاي ريتا دتتصل عليج
اخذتة منها واني واكفة بس ما لحكت ارد عليها
ما حسيت الا النقال وكع من ايدي بالكاع
الظلام عتم على عيوني وكعت من طولي
لساني ثكل واسمع اصواتهم تحجي وياي

#بيج_قصص_الكاتبه_nuha-d-h

يتبع