رواية تائهة بين اروقة الماضي الفصل التاسع 9 - بقلم الكاتبة نهى

تائهة بين اروقة الماضي
بقلمي nuha-d-h

مساء الانوار عليكم يا احبتي 🌷🌷🌷🌷
يوم ثاني الصبح
اتصلت على لجين وريتا
ولجين ضمتنا بمكالمة ثلاثية بنقالهة
وحجيت للبنات كلشي
واتفاجئو بقصة ماما وبابا واهلها
ومن عرفو بموضوع السفر انقهرو
راح نفترق شوية ولجين اتصلت على بلال
ودخلتة ويانة عالخط
وصرنا نتبادل وياه الاخبار وريتا حجتلة عن نبراس
ومواقفة وياي وشلون امي خايفة علية وعلى اختي من عندة
بلال: هيام سمعيني زين
ترة انتو مو تشوفوني اضحك وكاضيها كلة شقة وياكم ترة انا مثل اخوج واعجبج بالفزعة وبساعة الجد حطيني على يمناج اذا تردين احط لنبراس حد واخلي يبطل يعتب باب بيتكم بس اشري والله
لاخليه يمشي ويتلفت
والله ما راح اتعب نفسي بي
ادز عليه كم واحد من الصاعين الي مثلة يكسرون رجليه ويكعدونة على عربانة واسويه عبرة لمن لا يعتبر ويبطل يتعدة على مرية ضعيفة
هيام : لا بلال تسلملي ما تقصر خالتك لوقت العازة
ما اريدك توصخ ايدك بي
ريتا: خرب طلع بلال عندة مشاعر خنب راح ابجي
لجين: اي والله ذكرني ب معتز بباب الحارة
بلال: معتز بس !!! وانا ما يسوى صارلي ساعتين اتوعد واتحلف
وعبالي راح تكولن العكيد ابو شهاب
تالي طلعت معتز يالله اشوه ما شبهتوني
بأبو بدر زوج فوزية
صرت اضحك على كلامهم ومواقفهم
وجريت حسرة هل يا ترى الزمن راح يجمعني بيهم مرة ثانية لو هاي هي نقطة الفراق بيني وبينهم
ختمنا الاتصال بالسلام والوداع ريتا الي كل ساعة تتهرب من الوداع ولجين الي كل ساعة يختفي صوتها وتختنك واعرف بيها دتبجي
اما بلال فكان رجل يكابر ضد الحزن وما يبين عليه
بلال: هيام امانة اذا شفتي نفسج بعازة اخ لتنسيني
انا موجود بس انخيني اجيج لو كنتي باخر الدنيا تلكيني يمج
خنكتني العبرة
هيام: بس كلامك هذا يسوى الدنيا وما بيها حسسني ان الدنيا بعدها بخير
وبعد تبادل كلمات الوداع
نهيت الاتصال
وكعدنا نرتب بالبيت ونعدل ونشد بالغراض للخزن ونغلف الاثاث بالشراشف حتى ما ياكلة التراب
وحضرنا الجنط

وامي اتصلت على عمو احمد وخبرتة بسفرها للبصرة لبيت اهلها
خطية ما كال شي وعرض علينا هو يوصلنا بس امي خافت عليه لان يعتبر اخو اركان وكلشي يصير الدنيا ما تتأمن
رفضت طلبه وشكرتة وكالت اني اتكفل بسالفة السفر واخوي هناك راح يستقبلني
والعصر سمعت صوت الباب اندك رحت افتح الباب
واتفاجئت من شفت ريتا ولجين واكفات يم الباب
وكبل اخذتهم لحظني وصرنا نتبادل الاحضان وكأن هاي اخر لحظات النة مع بعض
صعبة لحظة الفراق
ريتا: بكل عقلج اخليج تسافرين وما اجي اشوفج
لجين: لج سكتي شلون صدفة اني نزلت وشفت ريتا يم بابكم مجنت ادري بيها همين راح تجي تشوفج شلون صدفة لقاء بدون موعد
جانت لجين تحجي وتبجي
دخلنا جوة وصرنا نسولف بكلشي مو عبالك قبل شوية جنا نحجي بالنقال
هيام: اي صدك لجين اتذكرت شنو سالفة محمد
صدك اتقدملج لو بعدة
ريتا: شنو شنو شنو !!!!
تعاي ولج تعاي لزمتج شنو سالفة محمد هاي جديدة واني ما ادري
لجين: لا حٍٍِْــًبٌٍـــِٓېٍٓ انتي لو سائلتني جان سولفتلج
بس مصار موضوع نحجي بي
ريتا: اوك يالله احجيلي اسمعج خلي اشوف شمخبصة
لجين: شوفي حٍٍِْــًبٌٍـــِٓېٍٓ اني ومحمد
من بعد موقف الحادث الي جمعنا مع بعض وتصالحنا اني وياكم
صار بيني وبينه اعجاب متبادل ومن بعد التخرج
بعد ما شفتة وبعدها شاءت الصدف ان يتوظف بنفس الدائرة الي اني متعينة بيها بس هو اتوظف بعقد
وزاد اعجابي بي من بديت كل يوم اراقب تصرفاته واسلوبة
جان شخصية ومرتب ووسيم عجبني صحيح هو حالتة المادية
بسيطة مو مثلنا بس اني مو مهم عندي مستواه اهم شي هو وشخصيتة واسلوبة وطريقة تعاملة مع الناس
وخصوصاً وياي
هو شكلة جريء وواثق من نفسه اجة صارحني بإعجابه والاعجاب تحول الى حب والحب تحول الى وعد بالزواج
وهسة هو كال جاي يبني مشتمل بحديقة اهلة ويريد
يجهزها واشترك بسلفة وبحيل الله بس يستلمها
يكعد يأثثها ويجي يخطبني من اهلي
هيام: ربي يسعدكم ويهنيكم تستاهلون كل الخير حبيبتي
لجين : اي عفية ادعيلنا
ريتا: ببركة الرب يديم عليكم المحبة
بس اريدج توعديني اول بنية تسميها ريتا
على اسمي
لجين: هو بس خلي اتزوج ووعد اسميها رتا والثانية هيام والولد بلال بعد شتردين
هيام: عههههههه عاد اهم شي بلال شيفكنا منة
اذا وكعنا بلسانة
كضيت وية البنات اجمل لحظات اتمنيت الوقت ما يخلص وياهم

(((((())))))

ووصل خبر سفرنا لنبراس
واجانة بساعتها بالليل
وحجة وية امي بكل ثقة وكللها انتي وريام تكدرون تسافرون
بس هيام متسافر لان راح اعقد عليها الباجر
جان يحجي بكل ثقة
وامي انفعلت وظلت تحجي وتغلط عليه
وهو كام يهدد ويصيح بالباب كان اسلوبة جدا منحط
مو عبالك بيت عمة واحنا بس نسوان عاد اني بلحظتها ما كدرت اسكت
رحت وكفت بوجهه
هيام: شوف نبراس ابتعد منا ما دام النفس عليك راضية
ماكو والله ادير بانزين على جسمي واحرك روحي وابليك بموتي حتى ترتاح لان لو تبقى اخر رجال بالعالم ما ارضى اتزوجك افتهم انت بالنسبة الي انتهيت من حياتي يا اخي مثل ما انت اختاريت طريق حياتك بالاول وتركتني اني الي الحق اسوي مثلك واشوف حياتي
نبراس: ادري بيج ما تحجين من كل كلبج
هذا كلامج نابع من حركة كلبج لان هجرتج وكبريائج ما يسملحج تتنازلين
هيام: لا نبراس انت غلطان وهذا غرورك الي جاي يخليك تتخيل امور ما الهة وجود
ام هيام: وهسة تكدر تتوكل وترجع لمرتك وعائلتك
وكافي فضايح
سمعنا صوت عمو احمد من وراه
وصار يحجي عليه وهو ساكت ويباوع علية
حسيت بي مجروح والندم باين بعيونة
بس ما ينفع الصوت بعد ما فات الفوت
هو بيدة هدم كلشي واختار يتركني لوحدي بنص الطريق فما يلوم بس نفسه على الي جاي يصير بي
سمعنا صوت واحد من الحماية مالتة
: سيدي اجاك اتصال من المدير وضروري تجاوب
باوعلي قبل لا يتركنا
نبراس: هيام خليها ببالج انتي الي متصيرين لغيري

هيام
ابد ما رف كلبي عليه وصرت اكره طاريه اباوع عليه معقولةاني جنت احب هذا الشخص الواقف كدامي وكنت اتنفس هواه معقولة اني هيج جنت عمية عن تصرفاته وشخصيتة
وساذجة لدرجة مكدرت اميز بين الانانية والطموح اي نبراس كان اناني مغرور
وعقلي الساذج صورها الي طموح وثقة شخصية
واني بالنسبة الة لعبة ما كدر يحصل عليها وظلت بنفسة كون يجربها
لكن نجوم السما اقربله مني
وراها بيوم سافرنا للبصرة وبقت امي باتصال وية خالو
راضي وعلى طول الطريق هو يتصل ويتطمن عليها
وجنت اراقب تصرفات امي

هيام : ماما سؤال شمعنا اختاريتي تلجئين لخالو راضي دون عن اخوانج
ام هيام: لان خالج راضي كان جداً طيب وحنون
احس بس عندة هواي اطباع من ابوي الحجي الله يرحمة
وعرفت ما راح يردني اذا طلبتة
وضيفي فوكاهم جان قبل هو واركان اصدقاء
وبوقتها هو الوحيد الي ما عارض من اتقدملي اركان
ريام: من كلامج عنة بديت احبة قبل لا اشوفة
وبعد فترة دخلنا مشارف البصرة وكانت امي تبجي بلهفة وشوق جان شكلها مثل الطير المهاجر ويرجع الى وطنه بعد غياب دام هواي
انتبهت لعيونها شلون كامت تلمع وكأنها رجعت ذيج البنية الشابة الي عاشت بدلال اهلها
خالية البال والفكر
كعدت اباوع وياهة من جامة السيارة على معالم البصرة من خلال عيون امي
جانت كلما تمر السيارة على مكان تكعد امي تذكر اسم المكان وتشرح النة عنه ساعتها صارت امي معلمة جغرافية على تاريخ
ام هيام : يا محلى بصرتنا اشوفنها زادت جمال اشو حتى جوها الحار صاير خيال
جانت امي تتغزل بمدينتها
خطية تباوع على مدينتها مو بعيونها لا بكلبها وصارت معالمها تشبه الجنة بعيون امي

وصلنا للكراج السيارات
وجان خالو راضي منتظرنا هو والسايق مالتة
اول مشافتة ماما نزلت من السيارة وركضت عليه وشمرت روحها بحضنة وصارت تشهك وتبجي بحركة
للمرة الثانية اشوف امي تبجي بصوت عالي وبحركة
اولها بوفاة بابا والثانية هنا هسة بحضن خالو
لمها لحضنه وباسها من راسها وصار يمسح على راسها
حسيت على ريام واكفة بصفي وتباوع لمنظرهم وتبجي ما بجيت بس اكو عبرة اتجمعت بحنجرتي
خلصو السلام وباوع علينا بتسائل وهو يبتسم
راضي: منو بيكم هيام ومنو بيكم ريام
هيام : اني هيام الكبيرة
واشرت على ريام
: وهاي ريام الاصغر مني
راضي: ما شاء الله تبارك الرحمن ولج
خوية هناء شنو هاي جاية وجايبتلي لعابات
چا ما خفتي على اخوج لا يتعارك من ورة هالريحانات
ابتسمت بخجل
هيام: اشكرك خالو عيونك الحلوات
راضي: اااخ وين ابوي الحجي عنجن الله يرحمة من يشوف وحدة حلوة من بزرنا (اطفالنا)
يكول علكولة شذرة زركة عن العين
جا خلي يجي ويشوف بنات بنتة
مو بس يحطلكم شذرة زركة لا واحتمال يلبسكم بوشية
ام هيام: هههههه اي صدك ابوي الحجي يموت على
البنات الحلوات الحدثات على كولتة

باوع علينا بتمعن والتفتت لامي
راضي: عفو عليج هناء ليش ما محجبة البنات
ركبنا بالسيارة وجان التكيف مشتغل اجيت انام لان انسحنت روحي من الحر
ام هيام: والله يا خوية ابوهم الله يرحمة جان يكول ما احب اجبرهم على شي اريدهن يتحجبن بقناعتهن
لا اكراه في الدين
التفت علينا
: اي صحيح كلامة بس انتو المسؤلين عنهم ولازم
تحافظون عليهن وتقررون عنهن بدالهن هنة صغار وما يعرفن الصح من الغلط
كلكم راعٍ وكلكم مسؤلٍ عن رعيته
وكفت السيارة بمنطقة كلش حلوة
سمعت خالو كال هاي المنطقة اسمها مناوي باشا
جانت بيوتها كلها حلوة وضخمة
نزلنا من السيارة يم بيت كلش حلو
نزل السايق وفتحلنا الباب ودخل الجنط
وخالو كعد ينزل وياه
ودخلهن جوة للبيت دخلنا جان البيت بارد ونظيف وكلش مرتب
راضي: طلبت خدامة اثيوبية من المكتب
ودزوهة هنا ونظفتلكم البيت وجهزتة
الكم على حسب الاصول
هناء: يا خوية انعم الله عليك ليش كلفت حالك
بس شنو هاي الخدامة تبقى ويانة
راضي: لا هاي طلبتها لمدة يوم
هناء: اي عفية ترة احنا ثلاث نسوان نعجبك
راضي: والنعم منج هنوة انتي وبناتج شي اكيد يطلعن معدلات على امهن
هناء: خوية ابو ضرغام شخبار امي
راضي: امي الحجية بخير وسلامة وتزهو بالنصر وبعدها نفس ما هي ما اتغيرت السلطانة الحاكمة
متسلطة ولسانها صاير حاد بحد السيف
ويلسع مثل لسعة السوط وبعد ضربيها في اضعاف من كبرت بالعمر
جنت اسمعهم يحجون على امهم واتخيل شكلها
مرية قاسية وقوية

(((((((()))))))

جنت اطلع الملابس من الجنطة مالت السفر اني وريام ونحطهم بالكنتور
هيام بتسائل: ريام شنو رأيج بخالو راضي
ريام : حقيقتاً اني حبيتة من اول ما شفتة مبين عليه طيب وحنون
هيام : تدرين نفس شعوري حتى اني حبيتة
خصوصاً من شفتة حضن ماما كانت الدمعة معلكة بعينة بس رجولتة متسمحلة يبجي الظاهر جان يحب ماما هواي
ريام: اي طبعاً يحبها غير اختة
هيام: بس لتنسين بينهم ماضي وامي حسب عاداتهم تعتبر غلطانة بحقهم لان جابتلهم العار
ونزلت روسهم
ريام: بس يبقى حب الاخوة عامل فطرة الله وهبها للبني ادام
هيام: والله فرحت لماما احس بيها ردت بيها الروح من دخلنا للبصرة
ريام : اي هواي فرحانة بشوفت اخوها
بس عزة الجو هنا شلون حار
عبالك كاعدين بالصومال

((((((())))))(()
وعدت الايام وبدينا شوية شوية نتعود على المكان
وكعدنا نرتب بالبيت الي جهزة النة خالو
بس امي بهاي الفترة صارت حالتها من سيء الى اسوء ًوخالو راضي اخذها للدكتور مختص بالامراض السرطانية وكان جوابه نفس دكتورها ببغداد
وكلة تاخذ جرعات حتى نخفف انتشار المرض وامي رفضت لكن خالو اصر تاخذ الجرعات لان الدكتور كال اكو نسبة نجاح باستجابتها للعلاج نسبة ٢٠٪؜
وخطية خالو راضي بهاي ابد ما قصر ويانة وحط جوة ايدنا سايق كال
شنو تحتاجون طلبو منة وهو يجيبة الكم
جان اسم السايق حمزة رجال اسمر ضخم
بس حباب
وصار خالو كل يوم يجي عدنا الظهر
يتغدة ويانة ويتشاقة ويسولف وكان من يدخل علينا لازم يكون محمل علاليك بيها اشكال والوان من مسواك مخضر فواكة وحلويات وغيرها
وامي تظل تحجي عليه وتكلة هذا هواي وانت مامقصر والسايق جاي يشتري الي نحتاجة
راضي: اي بس السايق يكول لحد الان ما موصينة غير اشياء بسيطة
وانا ادري بيج اختي واعرفج تستحين تطلبين بلسانج
ام هيام: مو جديدة عليك يا ابو ضرغام والنعم منك ومن كرمك
راضي: هذا مو فضل مني هذا حقج وحق الاخوة الي بينا
ام هيام دنكت وجرت حسرة : ابو ضرغام شنو صار على سالفة امي من طلبت منك
تحجي وية امي حتى اشوفها
راضي: ما اكدر صعب انتي تعرفين امج شكد قاسية
حتى لو تعرف تدوس على كلبها وتعاند نفسها
وانا ما اكدر اعلن عن وجودج كدام الكل راح تفتحين ملفات قديمة وترجع تصير سمعتنا على كل السان
انتبهت علية وحسيت بي اتضايق من الموضوع
لهلدرجة عندهم الموضوع كلش عظيم لدرجة.
يرفضون حتى يجيبون سيرتة
مسحت دمعتها: ادري بروحي جاي اضغط عليك بس ما عندي غيرك اطلب منة اشوف امي
قبل لا اموت وانت تدري بية ايامي صارت معدودة
راضي بتفكير : هذا هو راح ارتبلج الوضع واخليج تشوفين امي من بعيد
ام هيام بلهفة : شلون راح اشوفها
راضي: انتي تدرين بأمي كل سنة تسوي مأتم على الامام الحسين بعاشور والنسوان يتجمعن بي
ام هيام بلهفة: اي عفية
راضي: الي ما تعرفينة امي سوت حسينية مجهزتها
وحاطة بيها مدرسات حوزة
وهمة مسوين فقرة تعليم حفظ القران
وينطونهم محاظرات دينية تخص حياتهم اليومية
وهي دائما تحضر بدروس حفظ القران

فانتي جهزي نفسج اخذج هناك وتدخلين بصفتج
جاية تتعلمين
ام هيام: زين شلون اخاف يعرفوني
راضي: الله يخليج هو انتي المرض لاعب بيج طوبة
وماخذ صحتج وما مبقي شي من شكلج القديم
بس خلي ببالج ما تاخذين بناتج وياج
ام هيام بموافقة : اي هذا هو ما اخذهم وياي اهم شي اكحل عيوني بشوفت امي
جنت اسمع كلامهم واني متعجبة على هذا العالم الي دخلنا بي عجيب
الام تقسو على بنتها وما تنسى جرحها حتى بعد طول هالسنين
ليش همة مو يكولون الزمن كفيل بلعق الجراح والنسيان
بس اشو هنا يختلف طبعهم لا اكو مسامحة ولا نسيان
وورة يومين كدر خالو راضي ياخذ امي امي
لحتى تشوف امها
بس بيومها من رجعت وصار الليل دخلت لغرفتها
كالت اريد انام
كان شكلها ما يطمن بقيت قلقة عليها لان جنت اسمع صوتها الليل كلة بس تبجي
كسرت خاطري شكلها مثل الطفلة الي تبجي تريد حضن امها يمكن الشخص من يوكع مريض يحتاج اهله يمه
ويوم ثاني اجة خالو طلب من امي تنطيه المستمسكات حتى يطلع الهة جواز سفر كال . اخذ امكم اعالجها
بلبنان وصفولي مستشفى هناك مختصة بعلاج مرضها
لكن مع الاسف لاتجري الرياح بما تشتهي السفن
كعدت الصبح مثل كل يوم احضر الريوك لماما. وبعدين اكعدها حضرت واجتي ريام تركض
ريام بخوف : هيام لحكي جاي انده ماما حتى تصحى بش اشو امي مترد علية
جمد الدم بعروكي وصار الي جنت خايفة منة

(((((())))))))

ريام: هيام هيام
صحيت على ايد تندهني من النوم
فتحت عيوني وباوعت عليها
هيام بصوت ناعس : هَـا ريمة حبيتي
شكو
ريام: تعبت شوكت نوصل
هيام: هَـا اوكفي بس لحظة خلي اسأل واشوف
هيام التفتت على المرية الي كاعدة بصفي
: خالة هسة احنا وين وشوكت نوصل بغداد
المرية: خالة هسة راح نوصل للبطحة
هيام: بعد كم ساعة لبغداد
المرية : شوفي اذا وصلنا للبطحة معناهة قطعنا نص الطريق لبغداد يعني بعدة ثلاث ساعات ونوصل لبغداد
هيام: حييل بعد ثلاث ساعات
ريام : اكول هيام سؤال تتصلين على عمو احمد وتنطي خبر بوصولنا لبغداد
هيام بحيرة : ما اعرف خايفة خاف يوصلون لعمو احمد
حسيت على رجفة خوف هزت ريام
احس بيها مثل الغركان الي معلك بكشاية
ريام جرت حسرة : كلة من وراي اني السبب
بكل الي دا يصير بينا
هيام: لا مو انتي السبب ما اريدج تحجين هشكل
اني وانتي واحد يالله سدي الموضوع
تركتها التفتت عالجامة
ما اكدر احط عيني بعينها احس بروحي ضعيفة
وما اكدر اوفر الامان لاختي
تسألني وتشند الامان واني بروحي مضيعة الامان وما اعرف وين ادور عليه
اي يهيام روحي نشدي عالامان هناك بالنجف يم احبابج الي جانو درعج وحمايتج وامانج وحنانج
امي وابوي وينكم احنا بحاجتكم

(((((((()))))))))
ورجعت اتذكر ذيج الايام المرت علينا

جنت لابسة الاسود وكاعدة وحاطة ايدي على خدي
وصافنة افكر شنو مصيرنا اني واختي من بعد وفاة امي
ما اعرف منين ابدي وشنو اقرر اصلاً هذا اذا كان الي الحق اتصرف بمصيري اني واختي
اباوع على ريام وكعت مريضة من بعد فراق امي
وابتليت بيها وكعدت اواسيها
بالرغم اني احتاج اليواسيني
حتى الحزن مو مثل البشر ما مسموح نعلن عن فاتحة امي ولو هو حتى لو اعلنت الحداد منو راح يجي يدك بابنا ويواسينا
انكسر كلبي على امي اشكد عانت بحياتها
وحتى بوفاتها مو مثل البشر مر على وفاتها ٣٨ يوم
بهاي الفترة عمو راضي ابد ما تركنا خطية كبل يجي من الشغل ينزل يمنا يتغدة ويانة ويحاول يخلينا ناكل
راضي : بوية ريحانتي
اتعود يصيحلي ريحانة
: نعم خالو
راضي: ينعم الله عليج بوية ما يصير هذا الي جاي تسووه بنفسكم حرام وانا ابوكم هذا يسمونة الجزع
والجزع عالميت ما يصلح اذكرو الله
وكعدو اقرو قران واهدو الهة احسن من البجي
باوع لريام وصاح عليها
: تعاي ريومة حبيبت خالج ما يلوكلج الحزن يابعد خالج اريدجن قويات وسباعيات ثبتن انتن صدك بنات هناء القوية
قطع كلامه صوت نقاله رد عالمتصل
راضي: يا هلا وميت هلا بضرغام بأبني العود
:؟؟؟
راضي: ماشاء الله شوكت وصلت للبصرة اشو انا ما عندي خبر برجوعك للعراق
؟؟؟:
راضي: هَـا انا هسة حالياً مشغول من افرغ ارجع للبيت لا يظل بالك ما راح اتأخر
يالله روح ارتاح والحمد لله على سلامتك وليدي
سد النقال والتفت علينا وهو يبتسم
راضي: هذا ابن خالجن ضرغام ابني الجبير وذراعي اليمين ابوي واخوي بعد
ابتسمت على كلامه
ريام بفضول: شنو ابوي واخوي
راضي: شوفي يا محفوظة السلامة هذا ضرغام مميز دون عن اولادي البقية
لان الله رزقني بيه وانا بعدني ماخاطة شواربي(بسن ال١٨)
بحيث رابي وية عمامه الي همة خوالكم البقية
تدرون ليش اسميه اخوي
انا اكلكم
اتذكر بيوم توفى جدكم الحجي الي هو ابوي
مات وهو مطلوب وعليه دين بحيث اضطرينا نبيع ثلثين الاملاك حتى نسدد الديون شلون ووين راحت فلوسه محد يدري بس الديانة اجت وكامو يطالبون
بفلوسهم واضطرت امي تبيع ذهبها الي باسمها وسندتني بذاك الزمن اخوتي كلهم جانو بالكلية وبعضهم جانو بالمدارس
بس انا متخرج ومتزوج وعايش ببيت ابوي
لازم لان انا ابنة العود
فاستلمت الدكان الوحيد الي صفة من حلالنا
وجان كلشي ما عندنا لا مال ولا بضاعة امشي بيها اموري وجدتكم مرية حكيمة وقوية
اجتني فد يوم وسلمتني الفلوس وكالت اخذ هذني
ودبر حالك بيهن وربي يرزقك الرزق الحلال ويبارك بيه
جان ضرغام بذاك الوكت طالب صغير بصف الخامس ابتدائي بس رغم صغر سنة كان فطن وسبع وجسر
بوكتها اخوتي رفضو ينزلون وياي للسوك واستنكفو لان همة بزر دلال وفضلوً الدراسة
على الشغل بدكان ابوهم
بس المشكلة السوك ينراد القوة والعدة والعدد لان بيه حيتان شغلتة مثل الغابة
القوي ياكل الرجيج والسبع يبرز بالميدان فجنت محتاج واحد مني وبيا يوكف وياي واعتمد عليه
فضطريت استعين بضرغام وادخله وياي للسوك واعلمة كاري وكار ابوي وجدي بالبداية شغلنا بالطحين والتمن ونمول البضايع من الميناء ونصرفها وجان خطية بدون ما اكلة تعال هو من يمة بس يحل من المدرسة يجيني كبل
هو وكتبه وبملابس المدرسة وبوجهة للشغل ويكعد يحمل كواني الطحين والتمن حالة حال العمال رغم صغر سنه بس ما شاء الله بوكتة جان اخشن من اصدقائه
وجان يعرفني شنو اريد من نضرة عيوني
شنو اخطط هو كبل ينفذ
ومرت السنين وكبر ضرغام وياي وصرنا عبالك اخوان واصبح يشاركني بكلشي ويعرف كل صغيرة وجبيرة بحياتي ما بينة اسرار وصار مالي غنة عنه هوة ايدي وهو رجلي وعيوني الي اشوف بيها
كبر وشب بالسوك وعودة اصبح قوي وعرف كل حركات وقوانين السوك واتخرج من مدرسة الحياة الي هو السوك مثل ما يسمي البعض
وكمل دراسة واستلم شهادة سادس تجارة وبعدها قرر يلزم شغلنا الي بالميناء وبدة يتطور وصار عندة فروع للشركة مالتنة بدبي والبحرين
وبمرور السنين
صار يملك قساوة وجسارة ابوي الحجي عكسي تماماً اني كلبي حنون وبسرعة ينكسر خاطري عالبشر لان جنت بزر دلال انولدت
وانا كلشي متوفرلي عكس ضرغام
انولد وفتح عينة عالتعب
والكفاح وواتربة بحضن السوك وهاي الظروف كلها
كونت شخصية ضرغام الصعبة
شخصيتة صعبة لدرجة لحد الان
ما جاي يقتنع بَـــأي بنية للزواج
بحيث امة وجدتة ما بقو بنية تعتب عليهن
حتى يقنعونة بالزواج
بس هو من يروح وياهم حتى يشوف البنية يطلع بيها ميت الف عيب
اخر شي امي الحجية وامة عجزو منة
ولجئن للدعاء والنذورة
ههه وابشركم ماظل نذر ما نذرتة امي خاجية
علمود تشوفة ابن ابنها عريس
وبهاي السنين الاخيرة كلش
انشغلنا والله فتحهة بوجهنا ورزقنا من وسعه
بخير الله وبركة دعاء الحجية امي
كدرت استرجع املاكنا والمعمل والبيوت

واخر عشر سنين سوة شركة صيرفة
وسلم اخوه ضاري الشغل الي بالصيرفة
اما البقية الي همة ضرار وضاري فهذولي
كلمن اتخذ طريقة عندكم ظرار التحق بكلية الضباط وهسة هو ضابط برتبة رائد وضاري اتخرج هالسنة كلية ادراة واقتصاد ونزل للشغل وية اخوه وهسة حالياًً لازم الصيرفة بغياب ضرغام لان ضرغام دائم السفر
كل واحد بيهم الة شخصيتة المستقلة
ريام: خالو عندك بنات؟؟؟
ابتسم : اي عندي بنات ثنين مها وميس
مها متزوجة ابن عمها وعندها اثنين جهال ولد وابنية
وميس تقريباً بعمرج هالسنة راح تتخرج من السادس
ريام : اني اتخرجت العام وكعدت لان صادف وفاة بابا وامي اتمرضت فأجلت الكلية وان شاء الله هالسنة ابدي
راضي: ان شاء الله اكمل اوراق النقل واقدملج على كلية هنا يمنا
باوعلي
وانتي يا بعد خالج ما تامرين على شي
هيام بحنية : يسلم راسك خالو والله ما قصرت ويانة
بس سؤال ولو انت مشغول بس ما بقة على اربعين ماما شي نريد نروح نزورها
راضي: هذا هو يجرالج بس انطيني يومين ارتب اموري واخذكم للنجف تزورن امكم وازوركم كربلاء
حتى تنشرح كلوبكم وترتاح نفسيتكم
ريام : ربي يحفظك النة
ابتسمت ونهض
راضي: يالله يابعد خالكم انا اترخص هسة ضرغام على وصول للبيت وعندة شغل مهم يريد يناقشة وياي
وبس اتأخر عليه راح يكعد يحقق وين جنت وعندمن
هيام : لا عاد مو لهلدرجة تخليه يتحكم بيك
راضي ضحك: مو يا بعد خالج انا وضرغام عندنا اسرار وهو من عهدها صار يدور وراي
وما يتطمن الا يعرف بمكاني لان بعدة يشك بية
هيام : ما اعرف ليش رغم كلامك عن ضرغام جان كلة اعجاب اني ما عجبني بدون زعل احسة مستبد
هواي
راضي: لا لا بالعكس انتي من راح تشوفينة راح تنعجبين بشخصيتة

هيام ابتسمت : عالعموم طرقنا ما راح تلتقي
فلتخاف ما راح اكدر اشوفة واحكم عليه

انتبهت لخالو راضي صفن بوجهي بتفكير
بعدها : يالله بوية انا رايح اي شي تحتاجونة اتصلو علية وهذا السايق راح ابقي برة يم باب الشارع يبقة جوة ايدكم خاف كلشي يصير
طلع وتركنا
وبقينا لوحدنا
ريام: هيام شنو يعني ما راح تنطين خبر لعمو احمد بوفاة ماما
هيام : والله احتاريت خايفة اكلة ويصمم يجي ياخذنا ويرجعنا لبغداد
وانتي تعرفين هنا اهل امي شلون حادين سنونهم على اهل بابا واخاف تصير طلابة من ورانة وخايفة
من نبراس يعرف ويظل يكمز على راسي ويطلع طلعة
رعنة ويجي هنا هو وعمو
ريام: تردين رأي
هيام : اي
ريام : هسة من بعدما سمعت كلامج عن بالموضوع اني رأي نغلس عليهم وما نكللهم
هيام : بس عمو احمد من يتصل ويطمن علينا دائماً يسألني عن ماما واني اجاوبة اكلة ماما تعبانة وما تكدر تحجي وياه
ريام: والله حيرة هاي وين جانت مضمومة هيام تدرين
شنو اتمنى
هيام: شنو
ريام: اتمنى ارجع طفلة صغيرة اعيش جوة ظل امي وابوي ما اعرف احس بروحي تايهة وماكو شي بحياتنا
ثابت وامن يعني كلشي بحياتنا مؤقت
هيام: مثل تفكيري وضيفي عليهم الخوف من باجر شنو مضموم النة
زين الى متى نبقى عايشات بالظل ونبقى سر هناء المدفون
هواي عندي مخاوف واسئلة محيرة ما جاي الكة الهم جواب ووحدة منهم اذا عرفو بوجود بنات هناء شنو راح تكون ردت فعلهم
ينبذونا لو يرحبون بينا وياخذونا بالاحضان
هاي كلها الافكار تزورني كل ليلة قبل لا انام
اقتربت مني ريام وحطت راسها بحضني
ريام: الشي الوحيد الحقيقي بحياتي هو انتي
هيام عفية لا تركيني اموت من بعدج
هيام كعدت امسح على راسها: اهووو كلبتيها علية مناحة واني كلبي متروس وجع
((((((((()))))))
مرت الايام والتهيت بأختي ريام صرت احاول اغير عليها الجو واعتني بيها احس بيها مثل الطفلة متعلقة بية
حتى لو اتأخر شوية بالحمام الكاهة كبل واكفة يم الباب تنتظرني
صرت اطبخ الهة الاكلات الي تحب تاكلها من ايد امي لان هي بالفترة الاخيرة هواي ضعفت عكسي تماما
اني احس بروحي صرت دب من السمن مع العلم اكلي جداً قليل ما ادري ضاعت علية السالفة وهملت دكتورتي وما كمت اخذ علاجي مال منظم الدورة والهرمونات
قطع علية حبل افكاري اتصال من ريتا بس شفت الاسم طرت من الفرح جنت هواي محتاجة احجي
هيام بلهفة: هلو حبيتي رورو شلونج
ريتا: هلة بيج حبي شتاقتلج كومة
بشريني بريام اختج شلون صارت صحتها
هيام : لا هاي الايام زينة بدت تستجاب وية العلاج
بس صار لها يومين تشتكي من المغص من بطنها
ريتا : اخذيها للدكتور
هيام: وين اندل دكتور هنا واني لوحدي اخاف
ما اكدر لازم انتظر خالو راضي يفرغلنا حتى اطلب منة
ريتا: زين طلبي من السايق ياخذكم للدكتور مو خالج تركة الكم حتى بشوفكم شنو تحتاجون
هيام: اي صحيح كلامج بس نوصي على طلباتنا بس مو نطلع وياه هنا عندهم غير مسموح البنية تطلع وية رجال غريب حتى لو جان السايق ما يقبلون
ريتا: اهووو شلون يا ربي راح يظل بالي يمج
هسة لو يمنا هناك ببغداد جان شغلت سيارتي واجيت لعندج واخذتكم للطبيب اوووف زين اتصلي على خالج هسة بلكي فارغ
هيام: هو كلت انتظر ساعة اذا ما بين اني اتصل عليه
لان مثلما تعرفين ما اريد اثقل عليه واحرجة كبال اهلة لان همة ما عندهم علم بوجودنا بحياتهم
فاخاف يحسون عليه مشغول عنهم ويكتشفون وجودنا
ريتا: اهووو هاي انتو شلون مستحملين تعيشون هشكل

هيام: شسوي مجبورة اقبل بهذا الترتيب
خلي روحج بمكاني
عندج ابن عم ارعن يكعد كل يوم يهدد بيج ويضغط عليج علمود توافقين بالزواج منة
هذا الحجي من امي الله يرجمها جانت تشم الهوى
مو هسة بعدما امي اتوفت وما عندنا احد يردعة عنه
على الاقل هنا عايشات بأحترام
جهنم اهل امي ولا جنة نبراس والله اموت اذا لمس شعرة مني اتخبل
ريتا: الحيوان الحقير خلي يطير عايزة ما بقى الا هوة تتزوجينة شنو هي الدنيا سايبة بكيفة قابل يجبرج عالزواج
: شنو تتوقعين من واحد عندة نفوذ وسلطة وما يخاف من اي احد وضيفي فوكاهم مخبل تخيلي لحد قبل يومين
داز رسالة الي شنو الاخبار وشنو جاي تسوين
واريد اسمع صوتج
ريتا: انتي مو كلتي حضرتة
هيام : هو حضرتة بس ميت الف رقم يجيني منة شنو تتوقعين صعبة عليه يشتري شريحة
شبيج انتي
يكلي لو مو تحضريني لو ترحين لجهنم الحمرة وراج وراج
والله صرت اخاف من تهديدة
ريتا: احجي لخالج عنة خلي يحطلة حد انتي مو كلتي اهل امج ناس معروفين وعندهم نفوذ وظهر قوي
هيام: اي صحيح
بس انتي تعرفين بسالفة الماضي مالت امي واهلها واهل بابا مو على توافق
همة من غير كلشي حادين سنونهم وعقلهم يكمز من سيرة بابا واهلة مو نوب اكللهم ابن عمي واحد ادبسز يريد يتزوجني بالغصب
حتى ما يثرمونة بسنونهم
ريتا: ما اعرف شنو اكلج وضعكم صعب وما ينسكت عليه وما اعرف الى متى راح تبقن صابرات ومعلكات
جنت احجي وية ريتا وسمعت صوت ريام دتتقيء بالحمام
هيام بخوف: ريتا اني رايحة هاي ريام اتخربط خلي اشوفها شبيهة
ريتا: يالله يالله روحيلها ومو تنسين بعدين طمنيني عنها
نهيت الاتصال من ريتا ورحت ركض على ريام بالحمام
جانت لازمة بطنها وتبجي
هيام: هَـا ريام اخذج للمستشفى
ريام: بطني كلش تأذيني شوفيلي حل بعد ما اكدر
رحت ركض للباب وفتحتة ومديت راسي
ادور عالسايق ماكو
وين راح
رحت اخذت النقال وكعدت اتصل على خالو راضي بلكي يرد
هيام: الو هلو خالو
راضي: هلة بيج يابعد خالج
هيام: خالو ريام اتخربطت وتشتكي الالم من بطنها
راضي : يالله يالله اني جايكم مسافة الطريق
قطع الاتصال
ورحت على ريام شفتها نايمة
هيام: ها ريمة شلون صرتي
ريام بهمس: شوية صرت احسن
هيام: خالو جاي بالطريق حتى ياخذج للمستشفى
ريام بخوف من طاري المستشفى : لا صرت زينة ما يحتاج
هيام: لا حٍٍِْــًبٌٍـــِٓېٍٓ وضعج ما ينسكت عليه
ولازم يشرف على حالتج دكتور
شوية وسمعت صوت الباب
دخل خالو وشفت بعيونة قلق
لبسيها عبايتها خلي اخذها
للمستشفى
هيام : اروح وياكم
:راضي: يالله بس استعجلو شوية
والله لبستها جبة وشال حطتة على راسها بأهمال
واني لبست عباية ماما بدون شال
وصلنا ودخلنا للمستشفى كانت مستشفى اهلية
جنة نمشي وسمعنا صوت رجال يصيح باسم خالو راضي
؟؟؟؟: ابو ضرغام ابوضرغام
راضي التفتت وحجة بصوت ناصي
: استغفر الله هسة هذا شجابة هنا حظي الفكر
باوعت عليه عرفت بي واحد من معارف خالو
اقترب من عندنا الرجال وعيونة علينا اني وريام

؟؟؟: شنو يا رجال اصيح عليك وانت تسوي نفسك
ما تسمعني شدعوة بوية على كيفك شنو صارت بينا كخة وما تجاوبنا
راضي بأنزعاج: لا والله جنت مشغول جايب وياي الاهل متخربطين وتعرف بالي مشدوه
؟؟؟ وعيونة عالبنات: اي يا بختك يا رجال كل يوم صايدلك صيدة ومسميهم الاهل
انتبهت لخالو شلون غمض عيونة وكأنه يطلب الصبر وجر نفس عميق
مثل الي كوة لازم نفسة وما يهد عليه
راضي: يالله ابو فلاح انا اترخص شوفت عينك ما عندي وكت اسولف وياك
بس احب اكلك الي جاي تشوفة كدامك مو مثل الي ببالك لا يروح فكرك بعيد
يالله مع السلامة
مشة وتركة واكف وراه يباوع واحنا نمشي ورة خالو اسمع خالو
يدردم ويحجي بغيض
: هسة وكتة يطلع سامي كبالي هسة راح اصير علج بحلوكهم وتعال شيقنعهم انا ماعندي شي
والله يالله تجيك التهايم وانت نايم
دخلنا عالدكتور
وكتبلها على على مجموعة تحاليل لازم تسويها
بس جان الوقت ليل فكال خالو الباجر بحيل الله وقوته
نسوي التحاليل
الدكتور: هسة حاليا راح انطيها
ابرة مسكن الالم والباجر تجون وتكملون اوراق التحاليل ونعرف شنو سبب المغص
((((((((())))))

يوم ثاني انتظرت خالو راضي يجي علينا حتى ناخذ ريام للدكتور
جهزنا نفسنا ومنتظرين
بقينا ننتظر خالو
بس هواي تأخر عاينا ظل بالي عندة
رحت عالنقال وكعدت اتصل على خالو ما يجاوب
خفت عليه بس لا صاير شي مو من عوايدة
يبطي علية بالرد
ورة ساعتين من الانتظار ومحاولات الاتصال
يالله رد علية
بس يمة كلبي وكع من سمعت صوتة يبجي اجيت اتخبل
حجيت بصوت خايف: خالو شكو شصاير يا ستار
عفية كلبي راح يوكف طمني عليك خو بيك شي
راضي: ولج خالو هيام ابني ضرار
داخلة عليهم سيارة مفخخة للمقر ومتفجرة وهسة ما ندري بوضعه شنو ومنتظرين الاخبار توصلنا ادعيلة خالو ادعيلة ربي يلطف بحاله

((((ملاحظة الى قرائي الاعزاء
الكل يسألني عن سبب وفاة ابو هيام
انتو مؤمنين وتأمنون بقضاء الله وقدره
رب العالمين ميحتاج اذن حتى ياخذ امانته
اما عن الي يسألني ليش ما انطيتي صورة او نبذة
عن وفاة ابوهم توفي وكالو بخستي حقه لان كان رجل عظيم
وطيب فاحب انوه على شغلة اني احاول اجنبكم
المواقف الحزينة بقدر الامكان
وايضا وفاة امها هم حاولت اتجنب هذا الموقف الحساس
يعني احنا يكفينا عايشين بالعراق العظيم الي مليان احزان وهموم اشوفها مو منصفة اكعد اوصف
مواقف الموت وشلون ياخذونة للمغيسل وشلون تشمر روحها عالتابوت وتكعد تحضن بي
مجرد وصف وذكر هيج مواقف مواقف احس بيها تعصر الگلب
اني بأستطاعتي اوصللكم الصورة واخليكم بعد تتعايشون وحتى تبجون وياها بس ما ينطيني كلبي اقسى عليكم
ولكم مني جزيل الشكر كاتبتكم المخلصة ))
Nuha-d-h

يتبع