رواية تائهة بين اروقة الماضي الفصل التاسع والعشرون 29 - بقلم الكاتبة نهى

تائهة بين اروقة الماضي ج٢
بقلم الكاتبة nuha-d-h
مساءاً محملاً بعطر الورد لاعز قراء على قلبي🌹
اعزائي القراء الى كل من طلب مني صفحة القصص الخاصة بية بالفيس 👇👇
وبي راح يتم تنزيل القصة تائهة بين اروقة الماضي وكل قصصي القادمة

‏

(( واقفة في نصف الطريق
يا ايها الحبيب اترقب مجيئك بفارغ الصبر لتأتي وتأخذ بيدي وتطمئن هواجس
قلبي ووتأخذني بين احضانك لأشعر بالامان يحيط بي
احتاج ان اسمع صوت همساتك المسكرة على اذني المشتاقة ))

غمضت عيوني صحيت على صوت ريام تصيحني
انتبهت على روحي ناسية ماي السنك
مفتوح عالصحون واني صافنة بغير عالم
ريام: هيومة نقالج يدك
التفتت عليها جففت ايدي بالمنشفة من زاهي الغسيل وسديت الماي
هيام : بالله شو انطيني
ريام : هاج لزمي هذا عمو احمد متصل
اخذتة منها
هيام: الو هلا عمو شلونك
..احنا الحمدلله بخير
.. هااا!!!
..ان شاء الله هلة بيكم بأي وكت اني ما عندي شي
.. اشكرك عمو ربي يخليك النا
.. ان شاء الله انتظرك
.. مع السلامة الله وياك
نهيت الاتصال واني احس بگلبي يريد يطلع من مكانه
مديت ايدي بالنقال وانطيته لريام
انتبهت لايدي شلون ترجف
ريام : شنو كلج عمو ليش ووجهج انگلب لونه
باوعتلها
هيام: لج ريمة لحكي علية كلبي راح يوكف الولد الي رسله عمو احمد حتى يوصل الرسالة لبيت خالو راضي وصل اليوم
وعمو كلي انا جايكم هسة لان نبراس متصل عليه كله
الولد وصل حضر روحك راح يمر عليك
ريام: لتخافين ان شاء الله خير
هيام بس اريد اسألج سؤال
هيام: شنو كولي
ريام : انتي بعدج تحبين ضرغام ؟؟
دنكت طبعاً هذا السؤال بالذات جنت اتهرب منة واتناساه وبسؤالها حسيت مثل انحشرت بزاوية وانرفعت الغشاوة من على عيوني
ومرت رعشة على طول جسمي
رفعت راسي وباوعت عليها
هيام : ريمة اني مو بس احبه اني اعشقه انا مجنونة بي
واذا اكلج اني كل يوم من يجي الليل اظل اتگلب ادور على دفو حضنه متدرين شكد مشتاقة لحضنه احس مثل الطفلة من تدور على حضن ابوها
ومن يوم الي عرفت بروحي حامل
صرت كل يوم احط راسي عالمخدة اكعد الوم بنفسي
واحس بالندم اكول ليش استعجلت وتركت ضرغام
لو باقية جان عرف بالحمل ويمكن يغير قراره ويترك رنا ويعير تعامله وياي
ليش ما بقيت هناك اقاوم واحارب علموده لحتى يرجع الي ولحضني وما يتركني

ريام: هيومة حبيبتي هذا كلامج نابع من كل كلبج لان انتي بعيدة عن الضغوط
ونفسيتج ارتاحت وهسة صرتي تفكرين زين وتحسين بالندم لان اتخاذ القرارات بساعة العصبية
دائما تكون غير صائبة واحياناً تودي صاحبها بداهية
المشكلة اليحب يصير اعمى بكلشي يخص محبوبه
هيام : اي صحيح كلامج
يمكن البعد والاشتياق خلوني اكتشف اشكد محتاجة ضرغام بهاي الفترة
وزاد حبه بگلبي من عرفت بروحي اني حامل
بالرغم انه هو سبب وجع گلبي
وكل الي اني بي بسببه
بس مو بيدي حبه محتلني ومستوطن
بنص روحي
اشرت على صدري
تدرين هذا من يوم الي وكعت عيني بعين ضرغام
صار ملكه وما يدك لغيره
ونبضه ما يرتفع الا بس لضرغام
تدرين هسة شنو اتمنى ..
اتمنى كون ضرغام يجي لعمو احمد متندم ويطالب بية حتى ارجعله ويكلي بعد ماكو
شي اسمه رنا بحياتنا تعالي رجعي وياي لبيتنا لان البيت من دونج اظلم ترة انتي ام بيتي وام اولادي
ويكذب كل الي سمعته عنه ويكلي انا بس الج ما اصير لغيرج
غمضت عيوني
رجف جسمي حسيت خنكتني العبرة
احس بروحي صايرة كلش حساسة
وبسرعة صايرة ابجي

ريام
اباوع على اختي اشوفها شلون تحجي ورحها ذبلانة
من وصلنا لليوم وحالها مو على بعضه
احس بيها عايشة بتوتر وترقب وكلما يدك جرس الباب تكمز من مكانها مفزوعة وكلما ادخل عليها بالليل الكاهة كاعدة تفكر
من اشوف حالتها تهون علية مصيبتي
يمكن اني وضعي ومستقبلي واضح صحيح اني وحيدة بس على الاقل اكدر اعيش ببيت اهلي او ببيت عمو واكمل دراستي وما عندي احد يطالبني
ومحد يديني على افعالي
بس هي خطية مستقبلها معلك ولا بعد اكتشفت روحها حامل بأصعب اوقات حياتها وهسة جاي تعاني من الحرب النفسية بين الي متندمة على قرار ترك زوجها
من ورة الضغوط الي اتعرضتلها
وبين الخوف من المستقبل المجهول
اباوع عليها خطية تكسر الخاطر نظراتها فاضحتها عيونها تبحث عن الامان والاطمئنان رحت عليها واخذتها لحضني
ريام: ياعمري لتبجين ان شاء الله كلشي راح ينحل
هسة راح تشوفين ضرغام راح يجي طاير من الفرح
من يسمع انتي حامل لتنسين هذا ولي العهد مو اي واحد على كولت بيبي خاجية (مو ياهو الجان )

ابتسمت على كلام ريام وانرسم الامل بگلبي
: ربي يسمع منج
لان الترقب والانتظار راح يموتني
سمعنا صوت الجرس كمزت من مكاني
باوعت لريام
: ريمة اجوي
صرت افرك بيدية
عفية روحي انتي فتحي الباب والله رجلية ما تعيني
اوصل للباب
ريام: بس اهدئي شوية لا ترتبكين
واني رايحة افتح الباب
سمعنا صوت الجرس مرة ثانية
: لج روحي بسرعة يالله
انتبهت لريام راحت تفتح الباب واني رحت دخلت بالغرفة واتوجهت للكنتور طلعت الي شال ولبسته
وصلت يم باب الغرفة اريد افتحه باوعت على ايدي ترجف
سحبت نفس عميق شهيق زفير
سمعت صوت عمو احمد
انفتح الباب
ريام: يالله هيومة عمو احمد يكول صيحي اختج
خلي تجي
هيام: ريام وين كعدو
ريام: بالاستقبال كعدو
هيام: الولد لوحدة جاي لو ؟؟
قطعت كلامي ما اكدر اطلع الاسم الي بگلبي (ضرغام ). جنت اتعشم يجي وية الولد

ريام: اي الولد جاي لوحده
يالله روحي يمهم اني رايحة اسوي عصير حتى اضيف الولد
دنكت راسي بخيبة امل وطلعت من الغرفة
واحث خطواتي بالگوة
وصلت يم باب الاستقبال لزمت اليدة واني احس
بضربات گلبي تضرب مثل طبول الحرب
سميت بأسم الله وسحبت نفس عميق
ودكيت الباب ودخلت جوة يمهم وسلمت
التفت علية عمو احمد
: هلا عمو هيومة
شاف التردد الي بعيوني اشرلي عالكرسي الي بصفه
: تعالي كعدي لا تستحين
هذا صديق نبراس الي حجة عنه
ونبراس ما كدر يجي وياه كال عندي اجتماع لذلك انا كتله اخذ راحتك وخلي الولد يجينا عادي انا موجود

رافد: اهلا وسهلا اختي
التفت عليه عمو احمد
: اي عمو رافد هسة اتفضل احجي شنو كالو لك بيت الحجي راضي
رافد: والله ياعمو ما اعرف منين ابدي والله مستحي منكم
احمد: كمل عمو احجي لتستحي ان شاء الله احنا اهل
رافد: عمي انا رحت لبيت الناس الي كلت عليهم
من وصلت لعندهم صادف جان عندهم عرس ومخبوصين سألتهم عن الحجي راضي
وصاحوله واجوي وياه اثنين رياجيل اثنين ينطونه شبه شكلهم اخوانه المهم

بلغتهم برسالة حضرتك وكلت للحجي راضي
: اذا متصير زحمة اريد رقم نقالك لان عم البنات يريد يتواصل وياكم بموضوع مهم يخص بنت اختكم و
وزوجة ابنكم وهسة هي حامل
وبأثناء ما جنت احجي وياهم . اقترب من عدنا واحد لابس قاط
هد علية ولزمني من صدر القميص وظل يصيح ويتوعد
وكلي اليوم ما اعوفك الا تكلي وين مكانهن احجي كول هسة هنة وين بيا مكان
دفعته وكلتله انا ضيفكم ولازم تحشمني هي هاي الاصول
وابوه وعمه كوة لزموه وبعدوه عني الي افتهمته منهم ان هذا الي هد علية زوج بنتكم
رجعت كملت كلامي وياه وكلتله
اخي كول يالله ولا تتعصب كلشي ينحل بالتفاهم وخصوصاً . هسة زوجتك حامل
شفته اتصنم بمكانه وصار يباوع علية عبالك يريد يموتني
وكال لأبوه : بوية من هسة اكلك انا هاي العار مستحيل اخليها تربي ابني
والله اذبحها واخذ ابني منها
ونوب رجع دار علية وسألني كلي هسة همة وين ساكنين
خفت من كلامهم لان كانت نيتهم واضحة يردون يأذونكم وظليت اتهرب من الجواب وطلبت منهم كلاص ماي هذا الحجي كلة صار واحنا واكفين بباب بيتهم والناس محضرين نفسهم الظاهر عندهم عرس
.. جان الولد يحجي واني جسمي كام كلة يرجف من الخوف يمكن لو يذبحوني ما يلكون قطرة دم بية همست خايفة : عرس منو ؟؟
رافد: والله ما ادري بس من سألت كم واحد من الاولاد يمهم بالمنطقة عن بيت الحجي راضيً وكالو هذا البيت اهل العرس
كلتلهم عرس منو
كالو هذا عرس ابنهم ضرغام
فدخل واحد منهم يجيب كلاص ماي واستغليت انشغالهم
وسحبت نفسي واختفيت بين المعازيم بدون ما يحسون علية حتى اتهرب من الجواب على سؤالهم خفت لا يجبروني على الاعتراف بمكانكم ويندلون بيتكم ويأذونكم
احمد: يعني شنو قصدك زوجها اتزوج عليها
رافد : ليش هو اسم رجلها ضرغام
احمد: اي اسمة ضرغام
انتبهت لعيون عمو شلون يباوع علية بحزن عبالك يحس بروحه خذلني
حجة بصوت تعبان : لا حول ولا قوة الا بالله صدك ناس ماعندها مخافة الله
هذولي شنو ووحوش عمي حقة اخوي بيوم جان شارد منهم وما يقبل يتواصل وياهم اثاري يعرفهم كلش زين همة من ياطينة
هذولي ناس الشر متربع بكلبهم كسروا بخت البنية
ويوم ثاني عرسو لابنهم ولاجنهم عدمو حياة هاليتيمة
رجع عمو وهو يجر حسرة قهر على حالي وكمل كلامه وية الولد
: مشكور وليدي تعبناك ويانا والله يبارك بيك
رافد: العفو عمو تعبكم راحة هذا واجبي ونبراس اخ عزيز علية وافضاله مغركتني يالله عمي انا اترخص منكم
كام من مكانه وكمل كلامه
.. ستوني واصل من السفر ووراي شغل
وطلع الولد ووراه عمو احمد

طلعو وتركوني كاعدة لوحدي محد حاس بحالي
جانت كلمات الولد تتردد على اذني مثل الصدى بداخل راسي
حسيت بروحي عبالك واكفة على منصة الاعدام ومنتظرة شوكت ينفذون بية الحكم
كان الحبل ملفوف حول ركبتي وصاعدة على الكرسي
حابسة الانفاس ومنتظرة كلمات الولد الي اجتي مثل الاوامر بتنفيذ حكم الاعدام واندفع الكرسي من تحت رجلية
هيج كانت معاناتي بعد سماعي لخبر زواج ضرغام
كمت من مكاني واني مختنكة اريد اخذ انفاسي
صرت اطالب بالهوى
صرت اشهك اريد هوى
دخل عمو احمد للاستقال وانتبه علي ووصل لعندي
بعدما استوعبت الخبر صرت افر براسي مثل المخبلة
انتبهت عليه اخذ كلاص ماي من عالميز وقربه علية
احمد: بسم الله الرحمن الرحيم عمو هيومة هاج لزمي شربي شوية ماي

دفعت اكلاص الماي من كدامي وصديت عنه وجهي
هيام همست بصوت استغاثة
: عمو دخيلك كلي الحجي الي سمعته كله جذب
عفية گلي ضرغام ما تزوج رنا
لزمت عمو من قميصه
:عمو اروحلك فدوة والله امًوت
شهكت ونزلت دموعي بدون ما احس بيهم وكملت كلامي
: يعني شنو ضرغام صار لغيري يعني راح اتزوجها
وصار الجنت خايفة منه
حسيت بگلبي عصرني لزمت صدري اريد اوصل لگلبي لكن هيهات شلون راح اوصله واني احس بروحي ضايعة
اي ضعت زواج ضرغام ضيعني وقضى على اخر
قطرة امل عندي بالحياة
صرخت بصوت عالي
: لاااااااااااااااااااااااااا
ضرغام الي ما يصير لغيري
شفت الدنيا بعيوني غيمت وصارت ظلمة
ما حسيت على روحي الا اني واكعة بالكاع
جنت اسمع ريمة تبجي وعمو احمد يرش ماي على وجهي واني بين الغايبة عن الوعي وبين الصاحية

سمعت عمو يحجي وية ريام ويكللها جيبي عباية اختج
خلي اخذها للمستشفى بسرعة
رفعت ايدي بضعف
وكوة كدرت اطلع الكلام
: لا عمو ما يحتاج تاخذني للمستشفى
جنت ابجي واحجي
احمد: لا عمو خلي اخذج وجهج ما يطمن

جنت ما اريد اي شي بس يتركوني لوحدي
رفعت راسي بتوسل لعمو
: عمو عفية بس خلوني لوحدي اني مابية شي لتخاف علية ما راح يصير بية شي
المثلي اتعود عالصدمات گلبي
اجتي ريمة لازمة بيدها عباية
احمد: تعالي عمو ريمة اخذي اختج لغرفتها
انا رايح اجيب ام نبراس وارجعلكم
.. لاعمو ميحتاج والله محتاجة ابقى لوحدي صدكني ما يوجعني شي
اقتربت مني ريمة وسندتني ومشيت وياها
همستلها
: ريمة اخذيني لغرفة ماما
ريام: لا عفية هيومة لتكولين راح تحبسين نفسج مرة ثانية بغرفة اهلي عفية والله محتاجتج ترة محد يستاهل دموعج وقهرج
هيام: ريام مابية حيل احجي وية اي واحد اريد بس ابقى لوحدي
دخلت لغرفة امي اتجهت لسريرها
نمت بنص السرير احس بروحي ما اعرف بس احس عبالك نمت بحضن امي
انتبهت على ريمة سكتت وما حجت اي شي وطلعت من الغرفة وسدت الباب وراها
حضنت نفسي وجسمي صار يرجف وصرت اعاتب الروح
ضرغااااااااااام ليش كسرتني
من الله لا يوفقك اذا جانت نيتك تتركني وتتزوج منها ليش ظلمتني وياك واتزوجتني وعلقتني بيك
شهكت بحسرة والم
لج يووووووووووووم
تعالي شوفي بنتج كسرو بختها
بجيت بحركة من كل گلبي
كورت ايدي على صدري
: ربي اخذ عمري شلي بعد بي اشو الدنيا عاندت وياي
وشكلي ما راح اكدر اكمل
الي كاعد يصير وياي هواي علية ما اكدر اتحمله
ربي طلع حبه من كلبي
بس مو بيدي جاي اتخيله شلون يعاملها مثلما مجان وياي ويهمسلها
يعني شنو ياخذها لحضنه وتتوسد على ذراعه
صرخت بصوت مكتوم
الله لايوفقك ضرغااااااااام
ما اعرف شكد مر علية من الوقت
يمكن نمت او اغمى علية من القهر والالم احس حرارة تطلع من كل جسمي
سمعت صوت ريام تكعدني حتى اكل
بس اتذكر كلتلها طلعي ما اريد اكل اي شي
وتسوين فضل اذا عندج سم اكله وارتاح
وبعدها رجعت نمت
((((()))))))((((

صحيت من النوم لكن استغربت
اني مو بغرفة ماما باوعت عدل هاي غرفة
بيضة همست بضعف اريد احجي
لفت انتباهي حركة بصف السرير
ريام: حبيبتي الحمدلله على سلامتج
لجين: هَـا حبيبتي شلونج لج ليش هيج سويتي بروحج
هيام: ليش اني شنو سويت
ريتا : بنات مو وكتها اسألتكم دتشوفونها شلون
تعبانة
هيام: اني ليش بالمستشفى
ريام: اتخربطتي وارتفعت حرارتج وكمتي تهلوسين وتهذين
خفت عليج واتصلت على عمو احمد
واضطرينا ننقلج للمستشفى
لجين: خوفتينا عليج
رجعت اتذكرت كلشي
حسيت بالدموع بدت تنزل تلقائيا
وكأنه اشتكي وجع گلبي للجين وريتا
صرت ابجي واحجي وياهن بأنهيار
: ها بنات شفتو شلون غدر بية
شكد لمتوني من تركت ضرغام وشردت وشكد حجيتو علية
تعالو شوفو ضرغام اتزوجها لرنا
وصار الجنت خايفة منه
من الله لا يوفقهم ولا يهنيهم شردت من وراهم وما ردت اتأذة واشوفه يتزوجها كدام عيني اثاري الالم راكض وراي ولازم اتجرع سم بخبر زواجه من غيري
بس والله وامان الله
اذا ما احرك گلبه مثلما حرك گلبي ويحلم اخلي يشوف ابنه
جنت احجي وابجي احس نار بصدري مو راضية تنطفي

لجين: لج هيام يعني شنو راح تكضيها علينا
بجي ولطم والله شنو استاذ ضرغام اتزوج علية
عليه واتغرب خير ياطير
لج المفروض تنهضين وتوكفين على رجلين وتتحدين الكل
وتثبتين لنفسج قبل ما تثبتين للكل
اان زواج ضرغام ما كدر يكسرج
جانت تحجي واني الدموع تنزل تلقائياً والله يا ناس مو بيدي
لجين : لج لا تصيرين ضعيفة وتكعدين تندبين حظج وتبجين
كومي وبيني للناس ان حياتج ما متوقفة عليه لازم تقوين نفسج لأجل الي ببطنج
حتى من يجي عالدنيا يلكة ام قوية
ريتا: كلام لجين صحيح فعلا انتي لازم تكومي وترمين الماضي وراج وتبدين حياتج من جديد

((((())))
ضرغام
راجع لبيتنا وانا كاره الدنيا مالي خلك نفسي ما اريد اعرف شلون راح اواجه الناس
احس الدنيا ضايكة بعيني
ضرار: واخيراً وصلنا لبيتنا
ضرغام: راح اركن السيارة يم البيت وانت بعدين دخلها للكراج
ما بية حيل اتكسرت اتكسر من السياقة
جنت احجي ورحي واصلة حدها
ضرار: مو كلتلك خليني انا اسوق بس انت عاندت
ضرغام: يالله ماصار شي الحمدالله على سلامتنا
: الله يسلمك
ركنت السيارة وطفيتها ونزلنا
انطيت السويج لضرار
جان باب الشارع شوية مفتوح
دفعته ودخلت سمعت صوت الوالد يحجي بغضب
ويغلط ما افتهمت على شنو يصيح
دخلت للمطبخ
ضرغام: الله يساعدكم
التفتو علية مصدومين
حليمة : هلة يمة ضرغام كواك الله الحمدلله على سلامتك
رحت اتقدمت عليها بتعب حضنتها وبستها من راسها
: الله يسلمج يالغالية
حليمة: سودة علية وجهك صاير اسود مطعون
باوعت لأبوي وسلمت عليه
جان وجهه ما يتفسر
ضرغام: يابة ليش تصيح
التفتت عليهم ميس جانت تبجي وعمتي رحاب تسكت بيها
: شكو شبيكم وجوهكم مظلمة صاير شي
راضي: هاي اختك الغبية اندك الباب الصبح واحنا طالعين للشغل
فطلعت للباب وشافت ولد
سائلها علية
وكلتله ابوي ما موجود فالولد كايللها
وصلي الرسالة للحجي راضي وضرغام
وكليلهم البنات وصلن لبيت عمهن احمد
والاستاذ نبراس ابن عمهن المسؤل عنهن
يبلغكم ويحذركم ويكول اكسر رجليه الي يقترب من بنات عمي

ارتديت للخلف مصدوم من الي سمعته
حسيت مثل الواحد الي انكفخ على وجهه
لاا يالله انا هذا الي ما جنت حاسب حسابه
غمضت عيوني وعصفت بيا الافكار وصارت تتضارب
التفتت على ميس وحجيت بصوت حاد
: ولج احجي شنو كلج بعد
ميس: كلي نبراس يكول انسو عندكم بنات ولاتحطون راسكم براسي ترة انتو مو بكدي
وهيام راح اطلكها من رجلها غيابي واريد زلمة يفتح حلكه
كملت كلامها بخوف مني
ميس: ضرغام والله كلتله خوية بس انتظر شوية خلي اصيحلك امي بس هو كال خوية ميحتاج انتي وصليلهم الرسالة انا مستعجل اريد اروح
وتركني وراح حتى ما انطاني مجال احجي شي
ضرغام: يعني ما كلج همة وين ساكنين هو منين جاي
ميس: لا ماجاب سيرة مكانهم
جانت كل كلمة تحجيها ميس احس يزيد عندي الغضب
لميت ايدي بقبضة اريد اكسر شي اتعارك ما اعرف بس اريد افرغ غضبي بأي شي قبل لا انجن
لان حاس راح انفجر من القهر والغيض

درت وجهي وانطيتهم ظهري وطلعت من المطبخ
حليمة : يمة ضرغام لا تضوج وداعتك ازوجك الاحسن منها خلي تولي تروحلك فدوة هالعايقة ما تستاهل تضوج عليها
غمضت عيوني
وتركتها تحجي وراي وصعدت الدرج
سمعتها : يمة روح اسبح وانزل حتى اصبلكم غدا
جاوبتها وانا اصعد الدرج
: يمة ما مشتهي اكل
رجعت حليمة للمطبخ
حليمة: الله لا يرضى عليها ولا يوفقها بنت هناء وين ما جانت خبلت الولد
وسودت حياته اريد كون حوبته تسود عيشتها

راضي: شوفي ولج حليمة اتسدين حلكج لا اجي اطلع حركة كلبي بيج ترة احنا ما ناقصين النكة مالتج
البينة مكفينا يالله امشي كومي من وجهي
حليمة: هو ماكو غير حليمة بالبيت تطلع حركتك بيها
ترة حلوة هاي بنات اختك يشردن وانا اكلها
رحاب: خية ام ضرغام اتعوذي من الشيطان مو جاي تشوفين اخوي شلون شايط من القهر لاتكعدين تجملين الحطب عالنار
حليمة : يالله سكتنا هو احنا شعدنا غير نباوع بعيونا ونسكت عالضيم والقهر
خاجية .. شنو يمة راضي شصاير عليمن هذا العياط والصياح شصاير
جانت تحجي وتمشي على كيف
همس راضي بصوت ناصي
.. ما اريد امي تعرف بالموضوع ترة تموت من القهر
كافي الي صار بيها من ورة ما شردو البنات
اباوع على ايدها شلون معوجة بسبب الشلل الي صارلها من اثر الجلطة
كملت صعود الدرج وانا كلبي نار كل يوم وكل ساعة وكل دقيقة تمر علية تزيد حقدي وانتقامي من هيام
دهيل الله شكد جاحدة وانانية ما فكرت بالي يصير من بعدها اهم شي نفسها وبس بس دخيل الله انا شلون جنت
اعمى عنها

دخلت للغرفة
وانا النار تاكل بصدري
يعني شنو معقولة انا لهدرجة غبي وغافل
عنها معقولة رسالة صديقتها لجين بذاك اليوم الهة دور بتصرف هيام وهروبها
اي والله صحيح هي اتغيرت من يوم الي قرت الرسالة
مسحت وجهي بغضب ونفخت انفاسي الحارة
من الغيض يعني شنو شردت لحضنه وراحتله
ولا وبعد تدز النة تهديد عن طريقه
لميت ايدية بقبضة عضيتها بغيض صحت بصوت عالي من القهر
اااااااااااااااخ الله ولج هيااااااااااااام كون الزمج
الا اخليج تتوسلين الرحمة
باوعت لميز المرايا جان كله عطورها وبرواز صورة زواجنا وبضربة وحدة من قهري طشرتهم كلهم
وما ارتاح گلبي احس بعدها النار تفور بصدري
صرت اكسربالغرفة بدون وعي
جنت اتخيل وجه هيام بكل قطعة احطمها
ما خليت شي بالغرفة صاحي
انفتح باب غرفتي ودخل ابوي وامي واخوتي
راضي: هاي شبيك ضرغام اتخبلت شجاك
اتعوذ من الشيطان
ضرغام: ياريت متخبل ولا هذا الجاي يصير بية
عساني كون ميت ولا السوته بنت اختك بية
جنت اصيح واكسر بغراض الغرفة وبغراض هيام بالذات واشيائها
وتحفياتها حسيت بضرار قيدني
ضرار: ولك ضرغام كول يالله شنو السالفة
لاتخلي واحد ناقص مثل هذا المخنث يهزك
وداعتك يا خوية اذا ما اطلع هذا الناقص من جوة الكاع
ما اكون انا الضابط ضرار راضي وشوف الامهات شتجيب بس اصبر علية اذا ما اجيبه جوة رجليك
وهو يتوسل الرحمة منك وانا عند كلمتي
ضرغام نفضت ايديه الي مقيدتني عن الحركة
: عوفني رحمة على والديك وانا شنو مو رجال واخلي واحد غيري ياخذ بحقي
والله وحق الحق ما دام النفس بية يا هيام اوصلج اوصلج
وبوكتها راح اخليج تشوفين وجهي الثاني الا اخليج تتمنين امج ما جابت عالدنيا
تركتهم واكفين بالغرفة وطلعت
راضي: بوية ضرغام وين رايح
ضرغام: بوية طالع ارض واسعة
اختنكت ما اكدر اظل لحظة وحدة بالبيت
درت على امي
: يمة انا طالع ما اريد من ارجع الكة غرفتها موجودة
كل الغرفة تتبدل ما اريد اي شي يذكرني بيها
طلعت من يمهم وانا احس بكلبي يريد يطك
شغلت السيارة ومشيت وما اعرف وين رايح بس كل الي اعرفه ما اريد اتواجه وية روحي ما اريد اعترف
ان هيام حطمت حياتي وداست على گلبي اتمنيت اطلعه من صدري وادوس عليه لان احس گلبي غدرني بيوم اختارها ووكع بحبها
ولك يا گلب كلة منك شلون تضعف وتحب هيج وحدة جا انت ما تـُـــوب
ضربت المقود
بيدي وصحت بصوت عالي
: ولج هيااااااااااااااام حسابي وياج بعدة ما خلص وستوة بدة وين ترحين مني

يتبع