رواية تائهة بين اروقة الماضي الفصل الثلاثون 30 - بقلم الكاتبة نهى

#تائهة_بين_اروقة_الماضي_ج٢
#بقلم_الكاتبة_nuha-d-h
#قصص_الكاتبة_nuha-d-h
🌹مساء الانوار والسعادة على قلوبكم الجميلة 🌹
((((())))))

هيام
مرت الايام وعرفت ان الحياة تستمر مهما حاولت
اعتكف واحزن واتقوقع على نفسي هذا كله ما
راح يقدم ولا يغير شي من الي صار
سواء اني تركته ورحت او بقيت عنده هو بكل الاحوال راح يتزوجها هروبي منه ما غير شي
بس اني الي اتحطمت حياتي
وانتكست صحتي بسببه
لكن الدنيا ما تعذر ظروفي ولا تنتظرني
اطلع من قوقعتي الي حابسة نفسي بيها هناك هواي امور تحتاج نكملها
وعيت وانتبهت على روحي بيوم الي اجتي ريام وكالت
.. هيام المصرف خلص
بوكتها عرفت ان لازم وحدة بينا تنهض وتقود البيت
والظاهر تقاعد ماما وبابا ما راح يسد طلبات البيت
اني لازم اعتمد على نفسي شنو فائدة هروبي منهم اذا راح ابقى عاجزة ومالي لاحول ولا قوة اني لازم اثبتلهم ان احنا نكدر نعيش
بدون فضل اي واحد
باوعت عليها
.. انطيني نقالي
ريام.. شنو راح تسوين
.. راح اتصل على لجين
وفعلا اتصلت عليها وطلبت منها تجيني ضروري
نهيت الاتصال
.. ليش اتصلتي عليها
.. ماكو غير لجين هي الي تكدر تدبرلي شغل
وتسلفني فلوس
.. ليش ما نطلب من عمو
.. ما اريد اخذ منه ادري بي راح يرفض ياخذهم مني بعدين
ريام احنا لازم نعتمد على نفسنا احنا كبار والشغل مو عيب احنا حالنا احسن من هواي ناس
لذلك راح اطلب من لجين تشوفلي وظيفة بأي مكان
عقد اجور يومية محاسبة اي شي المهم اشتغل
.. بس هيام انتي حامل مو زين عليج خلي اني اشتغل
.. واذا حامل شنويعني ترة عادي هواي حوامل يدامون ويشتغلون وانتي حضري نفسج راح اقدملج عالكلية وتكملين دراستج
.............
ضرغام
اليوم التقيت بواحد من جماعتي بالاستخبارات
وطلبت من عندة يبحثلي عن عم البنات احمد وانطيته
اسمة الثلاثي واسم هذا الخروف نبراس بس طلبت منه
ما يجيب سيرة لاخوي ضرار ولا لأبوي اريد اشتغل
هاي المرة لوحدي
ما راح ارتاح ولا يهدالي بال الا الكاهة
كل ليلة تمر على العالم انا اعيشها بكابوس
ما اكدر انام ليلي اذا ما احلم بيها ضايعة وبيدها طفل جوعان اكعد مفزوع
وصلت لبيتنا ركنت السيارة
ودخلت جوة شفت بيبتي الحجية كاعدة بالصالة تسبح
الحجية خاجية: ياهلة بهالطول شلونك جدة ضرغام
ما صرنا نشوفك هالايام
بست راسها وايدها
: هلة بيج يالغالية طالب منج السموحة وادري بروحي مقصر وياكم بس معذور لا تنسين ترة شغلنا هذا موسمه
فما الحك عالطلبات حتى ما فارغ احك راسي أسألي عني الحجي
دخلت عمتي رحاب وبيدها سلة فواكه
وحطتها عالميز
رحاب: هلة بضرغام عاش من شافك انت شنو سالفتك
صاير كاسبر ما تنشاف هالايام
: هسه جنت احجي وية جدتي عالشغل
الحجية خاجية بصوت ناصي
: اكلك جدة بشر ما مش خبر عن بنات هناء
غمضت عيني وجريت نفس عميق هاي وحدة من الاسباب الي تخليني اتهرب من البيت وما احب التقي وية اي واحد بيهم لان كلما التقي بيهم راح يكعدون يسألوني عنها وخصوصا جدتي الي ما بطلت تسأل عليهن
الرايح والجاي كافي الي صار بينا من ورة ما شردن
الحجية اتخربطت ووصلت للموت من وراهن
ضرغام: لا جدة ماكو خبر جديد لازال البحث عنهن قائم
رحاب: هاك عمة اكل هاي البرتقالة كشرتها الك
ضرغام : عاشت ايدج عمة
اخذتها منها اباوع على عمتي رحاب خطية بعدها صغيرة صحيح عمرها ٤٣سنة
بس مبين عليها اصغر من عمرها
يمكن لان ناعمة ومحافظة على جسمها تبين صغيرة
عمتي هم ضحية افعال اختها انكسرت قسمتها بسببها
مشافت شي من حياتها احس بيها مثل النسمة خفيفة الظل وجميلة مو لان عمتي بس فعلا شايلة جمال رباني
ممزوج بالوقار حرامات هيج حياتها
سمعنا طربكة عالدرج وصوت ميس المزعج الحاد مالي البيت جانت تنزل ركض من عالدرج وضاري يركض وراها
ميس: يماااااااااااي يماااااااي لحكو علي
شفت امي طلعت من المطبخ
حليمة : هَـا اسم الله شصار خير

الحجية خاجية: شنو هالثيران الهايجة علينا
خايبة حليمة ردي فروخج
سطرو راسي شمالهم يكمزون
انتبهت على ميس اجتي ولبدت ورة الحجية
ميس: جدة دخليج لبديني عندج
ضاري يريد يضربني
الحجية خاجية: يمة منج خايبة انتي نسرة
منو يكدر عليج
احجي ولج شمسوية من مصيبة
ضاري: حجية سلميني اياها بس اريد امسح بيها الكاع ابرد گلبي بيها
حتى اتـُـــوبها تلعب بغراضي من تنظف الغرفة
ميس واكفة ورة الحجية تحجي
: يالله عاد لا تمصخها هسة اليسمعك يكول مكتشفة
اسرار البيت الابيض هي كم صورة وكم مذكرة مكتوبة
مهدات الى حبيبة القلب
ضاري: وروح جدي اذا ما بلعتي السانج وسديتي حلكج
اكص السانج
االحجية خاجية: خايب يا الاغبر ما تسكت جا انا وين
رحت وانت كاعد تهدد جنك تيس
ضاري: حجية كليلها خلي تسكت
الحجية خاجية التفتت على ميس وشافتها
مطلعة السانها على اخوها وتسوي بيديها حركة حتى تقهره و تغيضه
الحجية : يا يا يا خايبة العوبة شكاعدتسوين
جا انتي صدك فايتج دك هسة من اخليه يكوم عليج
وينعنع عظامج اكو واحد يلومه
ولج انتي شوكت تكبرين مو صرتي حدثة (شابه)
ميس: بيبي ما اريد اكبر خليني هشكل
احسن خليت الكبر لأخوي ضاري
ضاري: هَـا حجية سمعتيها شكالت وتكولين لا تحجي عليها
حليمة: ولكم انتو شوكت تهجدون ولا جنكم كبار
رحاب: هههه اي والله جنهم توم وجيري اربعة وعشرين ساعة يتعاركون
الحجية : خايبة حليمة هاي بنتج عوبة طالعة عليجتنكتل بالعصا يالله تعقل
حليمة : انعم الله عليج حجية. يعني بنتي اذا سوت شي زين كلتي هاي علينا طالعة واذا سوت شي شين كلتي هاي على حليمة
عفية حليمة شنو من حظ اغبر شايلة
الحجية: هَـا يمة حليمة اشو تدردمين شبي حظج حبوبة اشو متزوجة شيخ الرياجيل منو احسن منجومخلفة زين الشباب شتردين حبيبة بعد تشاركين الله بملكه المثلج كون كل يوم تصلي ركعتين شكر لله على نعمته الفضيلة
كمت من يمهم وترخصت
ضرغام: حجية انا اترخص اريد اصعد ارتاح شوية تعبان
الحجية: الله وياك جدة روح ارتاح
وانا خليني اشوف شغلي وية هاي اميسة
لزمت عصتها واجتي تضرب ميس
طفرت من مكانها
ميس: عاااا!!!! اني شلي غرض جا حجية انتي مالج صاحب كل ساعة كالبة على واحد بينا اصفيلج على راي
ابتعدت عنها ووكفت بطرف الصالة
( ويحكِ يا جدتي هل انتي منا ام علينا )
الحجية: خايبة شنو كاعدة ترطنين احجي عدل
ميس: كلشي ما كلت بس اكول جدة لا تبيعيني ترة الدنيا دوراة عودك بالليلصيحي على ميسة تجي تنام يمج وترد عليجالوحشة وتشغلج التلفزيون
تركتهم ورحت جنت جاي اصعد فوك بس
سمعت صوت عكدت حواجبي منو فوك
الكل جوة وضرار ملتحق بالدوام فتحت باب غرفتي ووكفت بمكاني متفاجئ !!! رنا؟؟
رنا: هلا ضرغام شلونك
ضرغام بأستغراب: شتسوين بغرفتي لوحدج
رنا: عمة حليمة انطتني ملابسك وكالت صعديهن فوك لغرفة ضرغام
ضرغام : اهااا شكراً تكدرين تتركيهن هنا وتطلعين
انتظرتها تطلع من الغرفة بس اشو هاي ظلت واكفة بمكانها ما اتحركت
رنا: ضرغام اريد احجي وياك بموضوع
ما اعرف ليش هاي البنية صايرة تصرفاتها بالفترة الاخيرة ابد ما تعجبني
ضرغام: اتفضلي احجي اسمعج
جاوبتني بتردد.. رنا: ضرغام اني ..اني احبك
بقيت واكف بمكاني مصدوم حتى ما كدرت ارمش هاي شكاعد تخربط
ضرغام: العفو شنو كلتي
رنا: اني احبك
فتحت حلكي اريد احجي رفعت ايدها تسكتني
رنا: بس قبل لا تحجي او تجاوبني
اعرف راح تكلي انتي مثل اختي ومن هذا الحجي الي اتعودت اسمعه كل مرة من عندك
لكن غصب عني مو بيدي حبيتك
بس انت رحت اختاريت هيام وطلعت وحدة خاينة ما تستاهلك لان ما صانت حبك عافتك وشردت
ضرغام: منو كلج هيام شردت
رنا: لا نضحك على روحنا ترة اني اعرف بموضوع هيام وادري هي ما رايحة زعلانة عند بيت عمها مثلما كلتو لباقي اقاربنا ان هي زعلانة عند بيت عمها
ضرغام: هسة والمطلوب شتردين
رنا: اريدك تعرف بحبي واخلاصي الك وتشوف الفرق بيني وبين هيام
جانت كلما تفتح حلكها بكلمةانا يزيد غضبي منها عقدت حاجبي بتفكير واتذكرت غيرة
هيام من رنا
والله افتر راسي راح اتخبل كل يوم اكتشف شي جديد بحياتي جنت غافل عنه
باوعت عليها شلون تباوعلي بأنتظار جوابي
اتمنيت احط بيها راشدي يصحيها
ضرغام: اكلج اشو انتي ما تستحين
جاية بكل صلافة وداخلة بغرفة رجال ولوحدج ولا وبعد تعترفين
بحبج كدامه اشو انتي حيل زايعة المستحة
زمخت بيها بصوت عالي بتوعد وانتبهت عليها شلون كمزت من مكانها مصدومة من ردة فعلي وياها
: شوفي رنا قسماً بذات الله اذا ما تعدلين نفسج وتنتبهين لتصرفاتج وياي
لا والله احطج بلسان ابوج واخلي هو يشوف شغله وياج ترة مو كل مرة تسلم الجرةولا عبالج فاتت علية سالفة الجذبة مالتج بيوم اتصلتي وكلتي ابوج اتخربط ورحت لبيتكم الكاج لوحدج بالبيت ترة انا فاهم كلشي وبمزاجي عبرتها للسالفة كلت هاي رعنة وحاولت اعبر هذا الموقف لان انتي عرضي وعيب اكعد اشهر بأخلاقج بس اكتفيت بأمي ووصيتها تحجي وياج وترزلج
على طلعتج الناقصة وامي وعدتني تحجي وياج وتحجي وية خالي فاضل بعد
بس الظاهر الوالدة راضية بالي كاعد يصير
شوفي ولج اذا انعاد الموقف مرة ثانية انا اروح بنفسي احجي لخالي
باوعت عليها غركت عيونها بالدموع
احسن خليها تستاهل هاي ما لاكية واحد يردعها ويعلمها الصح من الغلط
ضرغام : انتبهي على روحج ترة حلاة البنية حشمتها ووقارها وخجلها وانتي هذولي كلهم زايعتهم وجايتني بكل وقاحة تحجين وتدللين بنفسج كدامي
ترة لا عبالج من تسوين هشكل راح تكدرين تلفتين انتباهي الج لا مو بس انا اي رجال ما راح يحترم البنية الي ما عندها كرامه وتفرض نفسها
ترة البنية تكدر بالف طريقة تلفت نظر الرجالمن خلال احتشامها اسلوبها ثقلها ادبها خجلها
هذني كلهن هنة الي يلفتن نظر الرجال للبنية
مو مثل حضرتج طالعتلي كل يوم بسالفة
فتحت الباب وصحت على امي بصوت عالي من فوك
متعمد حتى الكل يسمع
ضرغام: يمة ..يمة
سمعت صوت امي جاوبتني وهي جوة ما بيها حيل تصعد
حليمة: هايمة ضرغام
ضرغام: شوفي يا ام ضرغام منا ورايح ممنوع منعاً باتاً وحدة تدخل لغرفتي غيرج انتي وميس وعمتي رحاب اذا اشوف وحدة ثانية داخلة لغرفتي احرك البيت
فاهمة يا ام ضرغام لو اعيد
حليمة الي كام وجها ينطي الوان وفهمت قصد ابنها
: اي يمة فاهمة صار ٺــڊٍلََُلََُؖ
جنت احجي وانا مستند عالمحجر الدرج
رجعت للغرفة وشفتها تبجي فتحت الباب وسويتلها بيدي حركة
(اتفضلي برة من غير مطرود )
(())(())(())(())(())(())

هيام : لج ريمة استعجلي راح يجي الخط
دخلت ريام للمطبخ مستعجلة وشايلة بيدها الملازم
وجنطتها بالايد الثانية
ريام: صباح الخير ياوردة
حطيت ماعون البيض على ميز الطعام بالمطبخ
هيام: صباح النور يا كسولة
يالله تعالي اتريكي قبل لايجي ابو الخط
نزلت كتبها على ميز الطعام وبلشت تاكل عالسريع
صبيتلها جاي
هيام: ريمة مو تنسين اليوم اخذي وياج النسخة الثانية من مفاتيح البيت
ريام: ليش انتي وين راح تطلعين ؟
هيام: هاي شبيج مو البارحة لجين كالت لكت وظيفة الي بالشركة الجديدة الي اتوظفت بيها بالجديد
ريام: صدك هاي شوكت لجين اتوظفت اني اخر مرة سمعت بيها هي تركت وظيفتها من خلصت مدة العقد وياهم وبعد ما جددته
: اي هاي شركة ثانية حتى هي مصارلها هواي من اتوظفت بيها وخطية هسة هي كالت امر عليج واخذج
وياي للشركة علمود اقدم اوراقي لان شافتلي وظيفة بعقد بالشركة نفسها الي تشتغل بيها صحيح هي شركة اهلية بس تفي بالغرض اهم شي احصل شغل
ريام : يارب يوفقج وتحصلين الوظيفة
هيام: اللهم امين ويوفقج بدراستج
ريام : اي عفية اندعيلي محتاجة الدعاء لان اختج غركت بهوسة الكلية ودوختها
هيام: عادي هاي لان ما صارلج اسبوعين بالكلية بعدج بالبداية
بس بعدين راح تتعودين بمرور الايام
ريام: والله يا ريت لان احس بروحي مضيعة الاول والتالي
اتخيلي اول ايام يدخل الدكتور يلقي المحاضرة
احس بروحي عبالك ما لازمة كتاب قبل ولا دارسة
بس اريد اعرف هذا الي جانو يدرسونياه قبل بالمدارس شنو فائدته
اشو يا استاذ يدخل علينا يكعد يخرط علينا بأشياء وقوانين ما انزل الله بها من سلطان
هو يشرح المحاضرة ويريد من عندي الحك عليه واكتب كل كلمة يكولها
فتشوفين اختج كاعدة بالمحاضرة مثل الاطرش بالزفة
ومن يطلع الدكتور من القاعة التفت عالبنات واكللهم افتهمتو شي لحكتو تكتبون لو بس اني مافاهمة
هيام: ههههه هاي اني هشكل جنت بس الله ينطي ريتا ولجين همة اسرع مني بالكتابة واخذ منهم مرات
بعدين راح تكعدون كلة تستنسخون ملازم
سمعنا صوت سيارة الخط اجتي اتلمست بطني
ريام : ديري بالج على روحج من تعبين نفسج
يالله مع السلامة
هيام : في امان الله
اباوع على ريمة شلون بدت تتفتح مثل الوردة صارت تشبه الفراشة من تطلع من شرنقتها
يارب اسعدها ووفقها
كمت انظف المطبخ واحضر الغدة لان وراي طلعة حتى من ارجع بس احميه لان ريمة من ترجع تكون جوعانة
وتعبانة ادري بيها ما راح تسوي لنفسها اكل
خلي اخلص بسرعة حتى اجهز نفسي
لان لجين هسة على جية
واخيرا حصلت عمل لان اتداينت من لجين فلوس ولازم ارجعهم صحيح هي ما تطالبني بيهم بس هو يبقى دين
وخطية ريام بدت تداوم بالكلية واني حامل ومنا ورايح راح يكثر المصرف ونحتاج هواي مصاريف رفضت مساعدة عمواحمد ونبراس بعدما طرحت موضوع الشغل كدام عمو واستأذنت منة صحيح هو كلي عمو انا موجود وان شاء الله ما اقصر وياكم
بس ادري كلش زين هو بنفسه معتمد بمصرف جيبه والبيت على نبراس فمناقصنا
بس كلها بكفة ونبراس الي من سمع بقراري اعترض
وحاول وياي بكل طريقة حتى اغير رأيي وكلي انا اتكفل بمصرفكم لكن اني رفضت واصريت على موقفي
ما اريد اي واحد يصرف علينا بالذات نبراس
اسمع صوت جرس الباب هاي اكيد لجين اجتي تدكه بصورة عجيبه تظل تطنطن بي
(((((((((()))))))))
بالشركة
هيام: والله لجونة ما اعرف شلون اجازيج
لجين: ترة اني مسويت شي انتي قدمتي وهمة وافقوا يعينون حضرتج اني عني بس وصلتج الهمباوعت للساعة مالتها
لجين: يالله خلي ارجع لمكتبي لا يجي المدير ويشوفنا ندك سوالف وتاركين الشغل ويحجي علينا يمة هو شلون مدير غير يخوف
باوعت عليها رجعت لمكانها عالمكتب يصير
ركن هو مثل القاعة بيها مجموعة مكاتب
بيها اربع بنات واثنين ولد
صارلي ٣ ايام من بديت الدوام
بعدني جديدة عالوضع صحيح هي شركة اهلية بس لا بأس الراتب مناسب والمكان محترم والدوام وقته حلو اداوم من الساعة ثمانية لحد الساعة ٣
يخلص الدوام ولجين توصلني للبيت
سمعت لجين صاحتلي بصوت ناصي باوعتلها
كالت انتبهي راح يدخل المدير
عدلت كعدتي ورتبت المكتب وركزت بالشغل العندي وصرت انزل القوائم بالحاسبة بأجتهاد
هدئت الاصوات وعرفت ان المدير دخل
شوية وحسيت على ظل وكف فوك راسي رفعت راسي اريد اشوف منو
اتفاجئت
هيام: بلال !!!!!!!هاي شتسوي هنا
باوعت منا منا اريد اشوف اخاف يدخل المدير ويلكاني احجي وية بلال
: لك وينك يا رجال اشو مالك خبر شتسوي هنا
بلال: هلا والله شوف الاخت تكلي بلال حاف بدون استاذ
هيام: لا تكولها انت موظف ويانا هنا ؟؟
بلال: اي انا هنا اشتغل الفراش واجيت اشوف حضرتج شنو تشربين كهوة - جاي - نسكافيه
هيام: عابتلك شكد ثقيل لا صدك عن الضحك شتسوي هنا
سمعنا صوت بنية اقتربت من عدنا
وبيدها نقال
؟؟: استاذ بلال الوالد عالخط
بلال: حولي المكالمة على مكتبي وانا جاي
ظليت فاتحة حلكي هاي شنو
هيام: هلة هلة استاذ بلال مرة وحدة
بلال: خرب حظي لج غير انا المدير لعد شتردين ينادوني بلبل لو بلابل
لجين : هههههههههه ها شلون مفاجئة والله عرفت بيج راح تتفاجئين من راح تعرفين بلال هو نفسه المدير
هيام: صدك مفاجئة بس مفاجئة حلوة
باوعت عليه
هيام : يعني منا ورايح اصيحلك استاذ
بالله هاي شلون راح ادبرها اخاف صدك ويفلت الساني واصيحلك بلبل كوم غرد
بلال: علمود الوالد يحرك عشيرتي
يكلي شنو معينلي بالشركة ناس شاخطين مثلك وكاعد تدك سوالف وياهن
هيام: اي صدك نسيت اسألك انت وابوك اتصالحتو ورجعت تشتغل بشركته
بلال: اي والله اتصالحنا لتخافين ترة اني والوالد متعودين نتعارك ونرجع يوم ثاني نتصالح
بس كليلي انتي شلونج صدك الي سمعته من لجين كالت ضرغام اتزوج
اختفت ضحكتي دنكت راسي : اي اتزوج علية
بلال: والله لوما عيب وتحكمنا الاصول والعشاير جان رحت لزوجج ابو راس اليابس اكسر راسه واعلمه الله حق لا تضوجين وداعتج هو الخسران
باوع لساعته وونفخ بغضب: شنو رأيكم اليوم نطلع انا وياج ولجين ونمر على ريتا بالروضة وناخذها ويانا ونتغدة برة
هيام: لا خليها غير وكت لان ريمة عندها موعد وية دكتور الاسنان ولازم اخذها
رجعت الموظفة نفسها بس هالمرة غزرتني بعيونها عبالك عدوتها
؟؟ : استاذ الوالد عالخط ينتظرك
بلال بدون اهتمام وهو يباوع لجين
:هذا هو منار روحي وانا جاي وراج
راحت وسوة حركة الاعدام يقلد عليها
بلال: يالله انا رايح ديري بالج على نفسج مو تعبين نفسج وانتي حامل اذا تشوفين نفسج ما تكدرين
على ساعات الدوام كليلي وانا اقلصهم الج
هيام: لا بل...اقصد استاذ بلال اشكرك ما تقصر خيرك مغركنا
لجين : عمي صدكتي استاذ لا ونوب بعد تكله خيرك مغركنا وكاعد تنفخ بي ترة هذا بسرعة يصدك نفسه
ما ينطي عين
بلال: اي والله صدك ترة انا بسرعة انفخ وانغر ومو بعيد من اطلع منا اسوي حركة التحية الملكية للناس
وااشرلهم بيدي مثلما يسوون رؤوساء العالم
لجين: ههههههه خرب يومك لك دروح ابوك دينتظرك والله هسة يطلعلك من النقال
راح وتركنا
التفتت علية لجين: هَـا شلونها المفاجئة
هيام: والله صدك مفاجئة يعني طلعت الشركة نفسها مالت ابو بلال
واني اكول ليش الشغل الي يكلفوني بي كلش قليل عكس البنات طلع هذا كلة مدبر من حضرتكم
خطية بلال ابتلة بية
لجين: يالله عاد لا تكبرين السالفة
ترة هو مو بس ابتلى بيج حتى ابتلى بية لان اني هم من خلص العقد وية الشركة القديمة كعدت بالبيت
واتذكرت شركتهم واتصلت عليه وعرضت عليه
خدماتي ههههه مشكلتة منو كله يصير صديقتنا الرابعة
هاي احد ضرائب الصداقة
رجعت بيومها واني كلش فرحانة
ربي شكد يحبني ومسهل اموري
يا رب احفظ صديقاتي وبلال واجعلهم ذخر الي وسند
رجعت للبيت ولكيت ريام موجودة قبلي
ومحضرة السفرة
ريام: يالله فوتي بدلي بسرعة خلي ناكل لان ميتة من الجوع
هيام: يالله هياتني ع السريع اروح ابدل وارجع
بدلت وكملت ورحت للمطبخ وكعدنا نتغدة جنت صدك جوعانة
ريام : اليوم شنو سويتي بالوظيفة
هيام: لج سكتي ما تصدكين منو طلع صاحب الشركة والمدير
ريام: منو ؟
هيام: لج طلع بلال هو المدير ههههه وطلعت هاي شركة ابوه وخطية هو الي دبرلي الوظيفة
ريام: يالله هذا الولد شكد حباب ودرة مالت الله ربي يحفظه لشبابه
هيام: ههه صرتي تدعين مثل بيبي خاجية
انتبهت لريام شلون اختفت ضحكتها ودنكت
واني هم انتبهت على نفسي
طبعا من وصلنا لبغداد ولهذا يومنا ابد ما جبنا سرية بيت خالي
راضي بهذا البيت وكأنما نتهرب من مواجهة الامر
ريام : تصدكين اشتاقيتلها هي وخالة رحاب وميس وضاري ولخالو راضي ووووو ل
قطعت كلامها عرفت اختي بعدها دتعاني من الي صار
حاولت اغير السالفة
هيام: اكول ريمة اليوم شلونج بالكلية
باوعت عليها شلون رجعت لمعة عيونها للحياة من جديد اي نعم الكلية هي حياتها
ريام : لج سكتي اليوم صار موقف وياي كلش محرج
هيام: شنو
ريام : تتذكرين الشاب الحلو الملقب ببوراك التركي بقلاوة
هيام : اي اتذكر عليه هذا الي كلتي عليه وياكم بنفس القسم بس مرحلة ثالثة
وكلتي البنات كاتلات روحهن عليه
ريام : عفية عليج هو نفسه
هيام : اي وشبي العندليب
ريام : لج اليوم اجاني بذات نفسه
جنت واكفة وية صديقاتي
اجة وطلب مني ان يحجي وياي بموضوع خاص
هيام : اي
ريام : كلتله اتفضل اخي اسمعك
كلي اذا متصير زحمة اكدر اعزمج على كوفي وقطعة كيك بين ما احجي وياج بالموضوع وافقت ورحت وياه لنادي الكلية وكعدنا على ميز وهو طلبلنا عصير وكيك
........
ابراهيم : ريام اني صارلي فترة اراقبج لان اول ما شفتج عجبتيني ومن راقبتج وعرفت اخلاقج زاد اعجابي بيج بس اريد منج رقم نقالج حتى نتعرف على بعضنا زين لان نيتي شريفة وياج واريد اتقدملج
ظليت اباوعله مصدومة من كلامه اتذكرت
اعتراف ضرار المباشر بحبه الي بدون لف ودوران
وتذكرت بلحظتها دكات گلبي شلون نهضت وية همساته ونظراته عكس شعوري هسة حاليا وية ابراهيم
باوعت عليه جان كلش مرتب وستايل فرحت ان هذا الشاب الوسيم جاي يعترفلي بأعجابه
صحيح اني فرحت بس لكل شي اله حدود
ريام: ابراهيم حقيقتاً انت فاجئتني بكلامك
وبطلبك الغريب بس اني اعتذر ما راح اوافق على اقتراحك اني بنية الي حدودي ومحترمة
هو صحيح عادي ما بيها شي البنية والولد يتبادولون ارقام النقال ويحجون سوية ويتعرفون على بعض
لكن تكدر تكول لكل شخص وجهة نظره
واني اشوف هذا الشي ما يليق بية وينزل من احترامي لنفسي
كمت من مكاني : لذلك اني اعتذر من عندك واكلك طلبك مرفوض
.............
ريام : تدرين ليش حجيت هشكل وياه وادري بروحي بالغت شوية بصده
لان ما اريد ينعاد الموقف واسكت واستحي احجي لان اني هسه ريام الجديدة. الواثقة من نفسها الي ما تحتاج العطف من احد ولا تحتاج ان تتعلق بحب وحنان شخص ثاني
ريام القوية تحتاج بس لأختها ونفسها فقط
لذلك وكفت بوجهة ورفضته
ما اجذب عليج واكلج اترددت للحظات لتنسين اني مو ملاك هو فعلاً شاب انيق وسيم وتتوفر بي جميع الصفات الي تحبها كل بنية
لكن لكل شي حد واحترام واني اشوف ان هو فعلا اذا كان
كد كلامه وهو صدك نيتة شريفة راح يبقى متمسك بية
اما اذا كان خلاف ذلك اذن قراري كان بمحله
هيام: عفية عليج زين سويتي
ترة همة كلهم يبدونها هشكل انا معجب بيج ونيتي شريفة وياج ويكبل وية البنية المكرودة ويمطرها بالوعود ويطبق عليها كل انواع احكام الزوج لا تطبين لا تطلعين وويامن جنتي تحجين وبعدين ورة كل هذا تسمعين بيهم انقطعت علاقتهم وكل واحد صار يطلع عيوب الثاني
وتبدي الاشاعات والاقاويل تنتشر بالحرم الجامعي
يحسسونة عبالك عايششين بحياة المشاهير والفنانين
فيا اختي ديري بالج لا تثقين بإي رجل
واخذيني اني خير مثال
(((())))
ضرار
دخلت للصالة وشفت ضرغام اخوي كاعد يدخن
ولحيتة طولانة وحالته حالة
ضرار: كواك الله ابو الشباب
ضرغام: كوة حيلك
شنو ليش اتصلت علية تسألني عن مكاني
ضرار: اتصلت عليك علمود اجتني اخبار جديدة
عن البنات
ضرغام بتركيز طفيت جكارتي وعدلت كعدتي
: شنو هاي الاخبار
ضرار: جماعتي بعد البحث اتوصلو لطرف بلغهم ان
عمهم احمد مسافر لوحدة من المحاافظات
صارله هواي عايش خارج الموصل
ضرغام نهضت من مكاني : كول والله عمهم ما ساكن بالموصل
ضرار: والله عمهم مو بالموصل ليش تحلفني
ضرغام: يا اخي تحطمت اعصابي وصارلي كم يوم عايش على اعصابي من ورة الاخبار الي سمعتها عن الموصل من كالو سقطت اجيت اتخبل
ما اريد اتخيل الي راح يجري عليها وعلى اختها اذا وكعت بيدهم
ما تدري بية الكوابس خبلتني
مرة احلم بيها سبية بيد هذولي الانجاس ومرة احلم بيها
مذبوحة ومرة تبجي خايفة
ياخي ما ظل عندي عقل من ورة التفكير
ضرار: لا تخاف هي بأمان
دخلت امي علينا ضايجة وتنافخ
ضرغام: ها خير يا ام ضرغام ليش ضايجة منو مزعلج
حليمة : ابن بطني مزعلني وشالع كلبي
ضرغام: انتي بس كولي منو منهم وانا اشلع اذاناته منو بيهم ضرار لو ضاري
ضرار: خير سالمين اصغر عيالك انا وتشلع اذاناتي
حليمة: لا يمة انت الي شالع گلبي
ضرغام: خير يمة شسويت اشو اروح بدربي وارجع بدربي ما ضار احد
حليمة: انت شالع كلبي لان ما ناوي ترتاح وتريحيني وياك
ضرغام: ليش يمة تحجين هشكل الحمدلله مرتاح وما ناقصني شي
حليمة: ترة انا امك واعرفك كلش زين مهموم وحياتك متخربطة ومو على بعضك كلة من وراها الما تتسمة
والله لو بس تسمع كلامي وتوافق على الي اريدة جان هسة انت بخير ومرتاح
ضرغام: يمة الله يخليج كولي من الاخير شنو تردين
حليمة: يمة رنا بنت خالك فاضل اجوها خطابة
وانا نفسي بيها اريدها الك واخاف تروح من عدنا حرامات
ضرغام: الله يمهدلها ويوفقها انا ما افكر اتزوج
وانا اصلاً متزوج
كمت من مكاني اريد اطلع لان اعرف نفسي اذا طولت بعد شوية اتعارك
ضرغام: يالله يمة انا اترخص راح اطلع عندي شغل
حليمة : هو انت دومك هيج كلة عكس الوادم
روح خلي تفيدك بنت هناء من الله لا يرضى عليها
ضرغام: يالله مع السلامة انا طالع وية صاحبي واصلتني حوالة راح استلمها وارجع
حليمة : روح يمة في امان الله مو تتأخر انتظرك
حتى نحجي بالموضوع

باوعت عالساعة جانت ساعة ب٩ بالليل
شغلت السيارة وطلعت
رحت للمكتب لعند صاحبي منذر هناك جان ينتظرني
كملنا شغلنا واستلمت الحوالة جانت بحدود ٧شدات
اخذتهم وحطيتهم بالسيارة
منذر : ضرغام وصلني وياك بطريقك
لان سيارتي اخذها اخوي
ضرغام: يالله استعجل اصعد خلي اوصلك بطريقي
حركت السيارة ومشيت
منذر: اكلك ضرغام انت شنو سالفتك صاير هواي تتهرب منا انا والولد كلما نعزمك على كوفي لو طلعة انت تتحجج وما تطلع شنو سامع شي علينا
ضرغام: لا والله ما سامع شي عنكم بس ياخوي الدنيا ضايكة بعيني وما لي خلك حتى نفسي
ادري بيكم ماخذين على خاطركم مني بس
صدكو لو تعرفون الي انا عايش بي راح تعذروني
منذر: يا خوي هونها وتهون صدكني ماكو شي بالدنيا ماله حل ما دام ربك موجود
فخلي ايمانك بالله واتوكل عليه
ضرغام: والنعم بالله
جنت احجي وية منذر ومرينا من شارع محلات وجنط
ولفتت انتباهي بنية بيها روعة من هيام
حسيت بگلبي انخمط

وكفت السيارة مثل المخبل ونزلت اسمع صوت منذر
: شكو شبيك ضرغام وين رايح

تركتة يحجي مجاوبته وركضت عليها احس كلبي يرد يطلع من مكانه
اقتربت منها ودارت علية وكفت مصدوم
بخيبة امل طلعت مو هي
ارتديت للخلف هي هم البنية ظلت تباوع علية مستغربة
اعتذرت منها ورجعت ركبت بسيارتي
منذر : خير ضرغام شبيك ليش وكفت السيارة
جان منذر يسألني وانا حركت السيارة وعقلي مشدوه

وبهاي الاثناء دك نقالي صديقي بالاستخبارات الموكله بالشغلة اتصل
جاوبته
: هلا بيك رائد هَـا بشرني
رائد.. لك باشا ابشرك كدرت اوكعلك على مكان اسم الرجال الي انطيتني اياه
ضرغام.. لك رائد نذر علي اذا صدك وطلع مكانه احمد هو نفسه الا اخلي تكاليف عرسك كلها علية بس كلي هو وين بالضبط
رائد.. تسلم باشا كلك خير وبركة واجتني اخبارية ومعلومات اكيدة
تأكد ان احمد ساكن ببغداد بس لحد الان ما محددين اسم المنطقة بالضبط بس الجماعة متأكدين ان هو حالياً من سكنة اهل بغداد

جنت اسوق واحجي وية رائد والفرحة ما سايعتني ما مصدك واخيراً كدرت اوكع على مكانهم ماظل شي
.. لك رائد الباجر راح اسافر لبغداد واكلبها شبر شبر
رائد .. ان شاء الله اروح وياك باشا حتى اخذك هناك وياي على جماعتي وهمة يكومون بالواجب

وبهاي الاثناء بين ما جنت احجي وية رائد وما منتبه عالطريق
فجاءة كسرت علينا سيارة بيضة تريد تحاول تقطع علينا الطريق وصارت تزاحمني حتى اضطر اوقف سيارتي
نهضت دكات گلبي للحنجرة ادركت ان وضع السيارة مو طبيعي
وبلحضتها عرفت هذولي منو وشنو غايتهم مني صحت بصوت عالي على صاحبي
: ولك منذر دنك راسك ليجوة هذولي سلابة
منذر : لا يالله دخيلك ولك هذولي بس لا جانو مراقبينا
ولك ضرغام شراح تسوي
جنت احجي وية رائد
رائد.. خير باشا شكو شصاير
حجيت بصياح
.. لك رائد هذولي سلابة
رائد بستعجال .. باشا بسرعة انطيني عنوانك وكلي انت وين هسة حاليا
اجيت افتح حلكي واحجي ما حسيت الا على سيارتهم
دعمت سيارتنا من الخلف ووكع من ايدي النقال جوة الكشن وحسيت ما عندي وقت لحتى اقرر وبسرعة دست بانزين بكل قوتي
ضرغام : ولك خايب منذر هذولي ناوين علينا
والله ما راح اخليهم يسلبونة
هيج بسهولة هينة لينة
التفتت على منذر وباوعت عليه ووجهة انگلب لونه
: شوف ياخوي هي لو بالهدف لو بالنجف بالحالتين
يقتلونا فما راح اوكفلهم لو يموتون
انت دنك راسك بسرعة
طلعت مسدسي من تحت كرسي السايق
واني اسوق بسرعة جنونية دست بانزين قوي
وطلعت ايدي شايل مسدسي من جامتي وصرت ارمي عليهم
سمعت صياح منذر : ضرغام اوكف لا ترمي احنا مو بكدهم
شفتهم طلعو رشاشاتهم
ضرغام بهت لوني : لااااااااااا يالله دخيلك
وجهو الرشاشات على سيارتي
منذر بصياح : ولك ضرغام دنك راسك راح يرمون علينا
ما حسيت الا وانا
مدنك راسي وبقيت دايس بانزين وسقت بسرعة بدون ما اشوف وفجاءة ما حسيت الا بالسيارة اصطدمت بشي مثل العامود هذا الي حسيت بي بعدها
صرت اسمع صوت الصياح المفزوع لمنذر صاحبي
و انگلبت السيارة بينا وكل مرة تنكلب بينا
السيارة تنعقج وينطعج علينا حديد السيارة عبالك كاعدين بقوطية كل هذا وانا حابس انفاسي عبالك جاي اباوع فلم اكشن جنت احس بروحي صرت مثل اللعابة
اعظامي كلها اتفككت وية كل گلبة احس برگبتي انخلعت من على كتفي
من حلات الروح ما عرفت شنو اسوي صارت روحي بصديقي منذر صرت بس اصيح بأسمه
هي جانت مجرد دقايق لكن مرت علينا جنها. دهر
فجأة اتوقفت السيارة وهي مقلوبة بينا شميت ريحة بانزين صدر مني انين بصوت موجوع وحسيت بحرار سائل نزل من راسي لخلف اذني
سمعت صوت منذر يهمس بألم
: ضرغام ..ضرغام ..
ماكدرت اجاوبه احس شي كابس على نفسي مخنوك ما كدرت اطلع صوتي اطمنه
حركت روحي بس رجلية ما احس بيهم
ردت اتحرك ما كدرت جنت محشور
سمعت صوت طكطكة بالسيارة
بس فجاءة سمعت صوت عالي
وصرخة منذر
وبعدها ماحسيت بروحي الا وانا بأحضان الموت

يتبع

(ملاحظة التكملة بالصور 👇👇👇)

مع تحيات كاتبتكم المخلصة نهى