رواية تائهة بين اروقة الماضي الفصل الثاني 2 - بقلم الكاتبة نهى

تائهة بين اروقة الماضي
للكاتبة nuha-d-h

🌷🌷مساء الخير والعافية يا احبتي القراء 🌷🌷
اتمنى لكم قراءة ممتعة مقدما

سمعت صوت امي تنادي علية
: يالله هيام استعجلي ترة نبراس ينتظرج بالباب
رحت اركض و بيدي السجلات والملازم
دخلت للمطبخ كان بابا كاعدة على ميز الطعام
يقرة بالجريدة كالعادة وامي تحضر الريوك (الفطار الصباحي)
اتوجهت عليه وطبعت بوسة على خده : صباح الخير يا اجمل اب بالعالم
ابتسم: صباح النور وردايتي شنو اليوم كاعدة توزعين قبلات شكلج تردين تقشمريني حتى ارفض الخطابة
هيام بدلع : عفية بابا اني مو كلت سد الموضوع
ما افكر هسة بالزواج بعدني صغيرة ومشبعت منكم دلال
ام هيام بعدم اقتناع: كلامج غير مقنع ميصير هذا مو سبب حتى ترفضين الزواج انتي مو صغيرة
والولد ما ينرفض واهلة خوش ناس ومو كل مرة تجي هيج قسمة
ابو هيام : يعني شنو هناء تردين نجبرها عالزواج
: لا اني ما كلت تجبرها بس على الاقل اقنعها
ترة انت هواي مطلع عينهن لبناتك
برطمت : عفو عليج ماماتي لهالدرجة مستثقلتني
: لا ماما مو سالفة مستثقلتج بس اني امج واعرف مصلحتج اعرف كلش زين السبب الي من وراه رفضتي الولد
باوعت لساعة ايدي بتهرب : احم احم يالله ماما مع السلامة
اني اتأخرت نبراس ينتضرني بالباب
كدرت اتهرب من تلميحات امي
طبعاً امي الوحيدة الي حاسة اكو علاقة بيني وبين
نبراس ابن عمي مع العلم محد ملاحظ لان احنا نتصرف كدام الكل بصورة عادية

طلعت شفت نبراس واكف ينتظرني بالباب
: يالله شنو نمتي صارلي ساعة انتظر بالباب متكولين هذا خطية
طبعاً كنا نمشي سوية ويحجي
ابتسمت : اولاً كول صباح الخير ثانياً ماما اخرتني
وصلنا للشارع العام ووكفنا ننتظر الكيا
لان احنا متعودين نركب عبرية نفرات
اصرف النا
بأثناء الانتظار التفتت على نبراس
كان لابس زي الكلية الابيض والرصاصي وحامل عدة الهندسة بيد والسجلات بالايد الثانية
كان شكلة وسيم وطويل
عبالك تركي وشعره مائل للعسلي وعيونة عسليات
: نبراس انت لازم تسوي حل لموضوعنا
التفت علية وباوعلي بتسائل : ليش شكو شبي موضوعنا
: يعني عاجبتك حالتنا
: هسة غير تحجي وتكول شبيها حالتنا
: نبراس اتقدمولي خطابة مرة ثانية وهالمرة ماما جاي تضغط علية حتى اوافق عليهم وتكول ما بيهم شي ينرفض وانتي مو صغيرة
: هيام شي اكيد راح ترفضينهم انتي الي وماتصيرين لغيري
: اعرف اني الك بس غير تتقدملي وتحطلهم حد
وتسكتهم
على الاقل حتى لو بس حلقات عادي شبه مو الا ذهب
اهم شي اصير بأسمك واكدر اخذ راحتي وياك
جر حسرة : والله اني مستعجل اكثر منج بالزواج
بس اريد من اتقدملج اكون مستعد ما اريد اقصر وياج بأي شي
فما اريدج من هسة تكعدين تعانين وياي
انتي تستحقين اعاملج مثل الاميرات
تدرين اني بعد كدامي هواي طموح واحلام اريد احققهم
يعني كلش مو وكته ارتبط ودراستي بعدني ما مخلصها
ابتسمت وعيوني لمعت : حبيبي والله اعرف ظروفك وثق بالله ما اضغط عليك لوما اهلي
يضغطون علية حتى اوافق
ولو علية فلا افتح الموضوع واصبر وياك وانتظرك عسى ما العمر كلة
: بس اصبري علية وحاولي ترفضيهم
والله ما بقة شي عالتخرج هانت هانت بس انتي اندعيلي كون الله يفتحها بوجهي

: ان شاء الله ربي ييسر امورك ويسهل طريق زواجنا
: الله فديت هذا الدعاء وصاحبة الدعاء الي يفتح النفس
ان شاء الله يفتحها بوجهي واصير متمكن
الله اشكد حلو اتخرج واتعين واترقى ويصير عندي فلوس واشتري احدث سيارة واوصلج بيها واشتري ارقى بيت وننتقل من هاي منطقتنا التعبانة
: اني هذا كلة ما يهمني اهم شي نتزوج ويجمعنا بيت واحد حتى لو غرفة فوك السطح هم قابلة

وصلت الكيا وركبنا وكالعادة نبراس يرفض ادفع الكروة ميقبل يكلي واصلة
: شنو اني مو بعينج
: يمة فديت ابو الغيرة
وصلنا للكلية وكل واحد راح للقسم مالتة
مع اتفاق انتظرة هنا بهذا المكان
ورحت مباشرتاً على صديقاتي
شفتهم ينتظروني : هلو صباح الخير
لجين: بعد وكت ليش هالتأخير
هيام : والله ازدحام ومثلما تعرفين عبرية من كيا لكيا
لحد ما تقبط يالله يطلعون فتأخرنا
لجين: اني مو كلتلج خلي اجي عليج بسيارة بابا عندي سايق يجيبني لبيتكم واخذج وياي بدال ما هاي البهذلة
والمضايقات الي تتعرضيلها من الركاب

ريتا : لا على شنو تروحين عليها انتي بس دليني بيتكم اني اجيج بسيارتي
هيام : لا حبيباتي متقصرون بس بيتنا بعيد عنكم وراح يصير عليكم مشوار طويل خلينا هيج ولتخافون علية من المضايقات اني وياي نبراس ابن عمي
لجين : لج عوبة ابن عمج نبراس هنا ويانا بالكلية وما تحجين غير تعرفينا على حبيب القلب ايا بذاتة
: اي صدك ذكرتيني ان شاء الله اليوم من يخلص الدوام تعاي وياي للبوابة واني اعرفج عليه فديت الحب مال اني
ريتا: هاي شنو احجولي گلب وحب شكو
لجين: شوفي يامحفوظة السلامة هنا عدنا الاخت عايشة حالت حب مع ابن عمها التحفة الي لحد الان ما حصل النا شرف التعرف عليه
طبعا اني اتذكر شايفتة من جنا صغار جان شكلة ابيض وكلش ضعيف
هيام : الله على ايام زمان تتذكرين من جنا نطلع نلعب
بالباب احنا البنات نلعب تكي طاك والاولاد يلعبون طوبة
عبالك مو دربونة مسوينة نادي رياضي وترفيهي
لجين : اي سكتي ونكعد نفرش يم بابكم وناكل لفات.
ريتا : الله شكد حلوة طفولتكم بسيطة وحلوة
هيام : يالله بنات شكلنا مثل العجايز واكفات نتذكر ايام زمان وناسين المحاضرات امشو فوتو كدامي
جنت كاعدة عالستيج وكعد بصفي شاب منتبهت عليه كانت لجين كاعدة بصفي وهو كعد من الجهة الثانية
سمعتة يحمحم التفتت عليه
وصارت عيني بعينه
كان شاب كلش مرتب وحلو ابتسملي
؟؟: مرحبا اعرفج على نفسي وياج بلال علوم حاسبات
اول مرحلة وان شاء الله نكون زملاء وحيد لاهلي وما عندي اصدقاء واشعر بالوحدة وهسة اني لوحدي لا صاحب ولاصديق
كان يحجي ويبرطم ابتسمت على كلامه ادري بي كان يصنف حتى اقبل صداقته
: اتشرفت بيك اني هيام وياك بنفس القسم والمرحلة
وعندي صديقات مو وحيدة مثلك التفتت على لجين وريتا
بلال: حيييل بكل عقلي جنت منتظرج تحجين تركي
كلت هاي متقبل غلط تركية
لجين : ليش عيني شبينا بس تحجون على العراقيات
ترة احنا اصل الجمال والرقة
ريتا بتصنيف وهي تهفي على وجها
: اكول بنات مو جنها احترت الدنيا
بلال: عمي نعتذر اختنا العزيزة بس من باب المجاملة اني اتكلمت هشكل
واصبح من بعد هذا الموقف بلال زميل من ضمن دائرتنا
وعدة اليوم وما كدرت اعرف البنات على نبراس لان بوقتها هو اتأخر وكان عندة محاضرات
وعدت الايام على نفس المنوال والنشاط
كنت كل يوم اتعرف على زملاء من باب انو كلنا
طلاب مرحلة اولى لكن مع توخي الحذر بعدم التمادي مع اي زميل
وبلال فقط الي نضحك ونتشاقة وياه لان كلش حلو المعشر وخفيف الظل وشكله معجب بلجين
ولجين صديقتي واعرفها ابد بالهة مو يمة
يارب كون تبادله الاعجاب وتحبة حتى اشوف شكل لجين
من توكع بالحب شنو راح يكون شعورها وتصرفاتها
اما ريتا فكانت فعلاً صديقة صدوقة
بخلال الايام عرفت هواي اشياء عنها الي يشوفها يكول هاي بنية سهلة
لان اهلها منطينها حرية مطلقة
بكلشي بس رغم ذلك ما يوم شفتها اتصرفت بطيش
وكانت بنية جداً رزنة. وصاحبة شخصية قوية
وبعد هاي الفترة بدينا اني والبنات نقسم طلاب مرحلتنا حسب الكروبات الى عدة اقسام
قسم السجاجة هذولي شوكت متجينهم يقرون بالملازم
واذا عندج شي يصعب عليج روحي بس كعدي يمهم وهمة يكومون بالواجب ويشرحولج
اما كروب اضحك تضحك لك الدنيا ابكي تنعل والديك
وتسحل امك الدنيا
هذولي سالفتهم تضحك لو عندك هموم الدنيا بس مجرد تكعدين يمهم وتسمعين مغامراتهم تشبيعين ضحك وتصنيف
اما كروب الانسة العانسة
هذني مجموعة بنات تحسين بيهم حيل متزمتات
وما تعجبهم اي بنية عندهم بس نفسهم هم المثل الاعلى
والقدوة الحسنة وما يتقبلون صداقة اي بنية
غير مجموعتهن عبالك فد نمونة
طبعاً اني كلما توكع عيني عليهن ينطني نظرات
يحسسني عبالك اني هيفاء وهبي مو من ثوبهم
ادري بيهن شنو يقصدن بهاي نظراتهم
لان اني سافرة بينما اكو بنات عسل على گلبي ميهمهم شنو اني وشنو البس ومن اي عائلة او مستواي الاجتماعي شنو كلنا سوية
ها واكو شاب صارلة اسبوع اشوفة بالقسم مالتنا
نبهتني عليه لجين
: شوفي هذا الولد طبعا صارلي يومين الاحظة يراقبج
التفتت : وينة بالله شو راويني خل اشوف
: لج عوبة صوتج فضحتينا هسة ينتبه علينا وراح يعرف احنا نحجي عليه
: ها هذا لج اي صحيح انتبهت عليه فعلا يراقبنا
بس منو يكول جاي
يراقبني الي ليش متكولين يراقبج الج
لا حٍٍِْــًبٌٍـــِٓېٍٓ نظراته كلها عليج
انتي المقصودة
جنا نحجي واجة ولد شاب جان يمشي سريع
وانضرب بريتا ووكعت كتبها
؟؟: عمة حتى عمة خسفتي صدري شبيج متشوفين
جان يحجي ويفرك بصدره
ريتا: انت الاعمى مو اني
لجين وهي تهدي بيهم: يالله مصار شي اثنينكم عميان
اني نزلت للارض حتى اجمع السجلات لان الاخت
التهت تتعارك ست ريتا محد يدوسلها على طرف
بايعتة امة الي يوكع بالسانها
بهاي الاثناء لكزتني لجين بكوعها بخاصرتي
:لج هيام هذا جاي بتجاهنا
جنا واكفات منتظرين نبراس يجي قرب البوابة
انطيت الغراض لريتا
: منو منو
: لج هذا الولد الي جنا نحجي قبل شوية عنه

انتبهت عليه نزل من سيارته
وكان نوع سيارته كمارو حمرة
ريتا: يبووو اخرب على هيج سيارة
والله لوما عيب اروح اخذ يمها صورة
هيام : انتي مخبلة مو عاقلة بس شفتي السيارة نسيتي العركة والولد واكف خطية يفرك بصدره

اقترب من عدنا وابتسم النا وكانت عيونة علية

؟؟؟: مرحبا بنات شلونكم التفت على الولد الي بعدة كاعد يدردم على ريتا ويرتب بكتبه
: خير شبيك اشو ما عندك اسلوب من تحجي وية البنات
رجاءاً احترمهن وبدون تجاوز
رفع راسه الولد : وانت شكو شنو الدادا مالتهم وكاعد تسأل عنهم
ابتسمت على كلام الولد
لجين بصوت هامس هذا شكلة يريد يستغل الموقف
حتى يحجي وياج
هيام : لا مصار شي حادث بسيط
: ا ها مو شفتج متضايقة عبالي مقلل احترامه
: لا مشكور
همستلي ريتا : هذا شبي احول هو اني الي اندعمت اشو يسألج الج عبالك انتي صاحبة الحادث

: ليش واكفين هنا تحتاجون اوصلكم
لجين لكزتني بخاصرتي
كمزت جنت اباوع لساعتي منتظرة نبراس اشو اتأخر
لجين : لا منحتاج اني عندي سايق بابا راح يوصلني وريتا عدها سيارتها
التفتت علية وكملت
بس هيام ماعندها خط
وصحيت على لكزة كوع لجين : هَـا احم لالا هسة راح يجي علية ابن عمي
ابتسم الولد: اسمج هيام عاشت الاسامي اسمج حلو
على صاحبتة
نبراس: هلو هيام اعتذرلان اتأخرت عليج بس المحاضرة الاخيرة طولت جانت تطبيقي
ابتسمت بوجهة : لا عادي يالله نروح اباوع لنبراس صاير نار ويباوع للولد بغيض
لجين بهمس: لا تكولين هذا الحلو هو نفسة نبراس ابن عمج
: اي هو نفسه
: نبراس اعرفك على صديقاتي لجين الي احجيلك عنها دائما وريتا اتعرفت عليها بالجامعة
نبراس وعيونة عالولد. يباوعلة بتحدي وهذا الولد
شكلة بعدة واكف ما يتزحزح
نبراس: اتشرفت بيكم. بس مكلتي هذا منو
يأشر عالولد
: اني مثنى زميلهم بنفس القسم بس بمرحلة ثالثة
نبراس بعدم رضى : اهااا تشرفنا
يالله احنا نترخص التفت علية
: يالله هيام خلي نروح هم يالله نلحك عالكيا
مثنى بتسائل متفاجيء : شنو راح تركبين فورتات
جاوبة نبراس: اي نعم عندك مانع
: لا ماعندي مانع بس اذا تحبون اوصلكم بطريقي بسيارتي وهو يأشر على سيارته
اباوع لنبراس اجتي تطلع عيونة من مكانهم
: لا مشكورين ما نريد نزاحمك
ما انطى مجال. لمثنى حتى يجاوبه
لزم ايدي وسحبني وراه
اركض وراه : لحظة على كيفك نبراس راح اوكع شنو ليش هيج لازمني قابل طفلة ترة ما احب هذا التصرف
التفت عليه : اي حقج طبعاً ما يعجبج تصرفي اي مو شفتي الاستاذ فصار ميعجبج اي شي من نبراس
: شنو نبراس ما حبيت كلامك انت اليوم ابد مو طبيعي
اقتربنا من الكيا وصعدنا واني قطعت الكلام
جان هواي ناس ويانة ما اكدر احجي وياه وظليت ساكتة مبرطمة عليه ودايرة وجهي عالجامة
سمعت نبراس يصيح : نازل هنا يمك
وكفت الكيا ونزلنا عالشارع العام الرئيسي مال منطقتنا
نزلت
ومحجيت اي كلمة وياه
نبراس: هيام
مجاوبتة :
: هيومتي
ظليت معندة مرديت
: حبيبتي لا تزعلين اسف لان عصبت عليج
والله جنت تعبان والبارحة منايم
اشتغل بالكوفي وللوحدة يالله عزلو ورجعت
للبيت هلكان من التعب وكعدت اكتب البحث مالتي بالكوة
التفتت عليه ونسيت زعلي: نبراس كول والله حصلت شغل
نبراس ببتسامة: اي حصلت شغل عامل بالكوفي اسويلهم نركيلة وهيج شي
فرحت من سمعت كلامه
: الحمد لله يارب والله فرحتلك تدري البارحة اندعيتلك
: هههههه هسة الي يسمعج يكول متعين مدير بنك
هو كلة خلك عامل
: لاتكول هيج كلة نعمة من الله اهم شي
انت تعتمد على نفسك وتبدي تكون نفسك
: حيييل لاتكولين حضرتج تريدن من شغل عامل افتحلج بيت
بابا انتي وين عايشة لا يكون تردين تطبقين اغنية كاظم الساهر حلوة واميرة وترضى بحصيرة
بابا اصحي اصحي احنا عايشين بالحضيض
المثلنا هواي عليه يحلم يعيش ببيت ويتزوج
: ليش تحجي هشكل شكو بيها بيت ابوك موجود
: يا بيت ابوي كولي المشتمل مال ابوي
هذا ما يسمونة بيت هذا يسمونة كن مال دجاج
هاي من غير كومة اللحم الي عايشين بالبييت اخواني
وين اوديهم ههههه انتي شكلج مأثرة بيج المسلسلات التركية تحب كبل تتزوج
بابا احنا بالعراق كلش كلش و انتي بنت عمي يعني ما راح تكلفيني بس حلقة وعرس وغرفة وصالون
وبدلة الي والج وعشا حسبي التكاليف راح تطلع بذاك الشي الفلاني
: اهووو سديتها بوجهي انت بس اتكسر جناحاتي
هسة خليني احلم
جنا نمشي ونحجي
: هَـا نحلم اااخ الله وعض شفتة
على طاري الحلم
البارحة شبعتج بوس بالحلم واخذتج بحضني
لج حتى اخذت عضة من خدودج التفاحة
هيام بخجل :عابتلك خجلتني انو
: هلة هلة صارت بيها انو امشي كدامي ياحلو لا تخليني اتهور هنا بالشارع
انتبهت عليه جر حسرة
(((((((()))))))))))
جنت صافنة وفكري وبالي مشغول
وفجاءة شهكت بخرعة من صوت صياح السايق
والعبرية و حركة السيارة المضطربة : يا ستار دخيلك يالله
خرجت السيارة عن الطريق وزلفت عالطريق الترابي
كان السايق يصارع بالتحكم بالسيارة
باوعت من الجامة شفت سيارة سودة جانت كاسرة على سيارتنا
واتوقفت السيارة بالشافعات كلبي اجة يوكف باوعت من
من السيارة شفت سيارة اتوقفت يمنا
جان جسمي كلة يرجف من اثر الهبطة
ريام: يمة كلبي شنو يارب دخيلك شصار
جانت تحجي وحاطة ايدها على كلبها
باوعت للسايق نزل
ووثنين من العبرية يحجون مع بعض : هذا شبي شفتة شلون كسر علينا

يتبع