رواية تائهة بين اروقة الماضي الفصل الثاني والثلاثون 32 - بقلم الكاتبة نهى

#تائهة_بين_اورقة_الماضي
#بقلم_nuha-d-h
#صفحة_قصص_الكاتبة_nuha-d-h

مساء الخير والسرور عليكم يا احبتي القراء 🌹🌹🌹
(((((((((()))))))))
‏‎.. اااه لك نبراس الطفل
‏‎حسيت بتقلصات والم ببطني لزمتها
نبراس بأرتباك .. لحظة لحظة لتتحركين
خلي اخذج للمستشفى
شفته انخبص وشغل السيارة وحركها
حسيت بتقلص ثاني وعركت كصتي (جبيني)
همست بألم - نبراس ما اريد افقد ابني
التفت علية .. عيون نبراس الج بس انتي اهدأي هسة راح نوصل ما بقى شي بس صبري شوية
جان يحجي ويسوق سريع
انتبهت عليه لزم نقاله واجرى اتصال على عمو احمد
نبراس.. الو هلا بابا عفية جيب الوالدة وتعال
هيام اتخربطت وراح اخذها لمستشفى ال .......
يالله بابا استعجل عفية
سحبت نفس عميق واخذت شهيق وزفير
ربي ما اريد افقد الجنين هو الامل الوحيد الي باقيلي بهالدنيا واخر خيط رجاء يربطني بضرغام
وصلنا للمستشفى لزم ايدي وحاول يساعدني لحتى انزل
صحت بي بألم.. اترك ايدي لتلزمها كله منك
الله لا يوفقك حطمت حياتي
رفع ايديه بأستسلام
نبراس.. يالله هذا هو راح ابتعد بس انتي لا تتنرفزين ولتعصبين
ارجوج مو زين لا عليج ولا عالجنين
ورة فترة وبعدما كشفت علية الدكتورة
وصادف وصول عمو احمد وزوجته واختي ريام الي اجتي وياهم مفزوعة
احمد.. هاي شنو سلامات عمو هيام
اقتربت مني ريام ولزمت ايدي
.. حياتي هيومة من شنو تشتكين
التفت عمو احمد على نبراس
.. بابا نبراس طمنا شبيها بنت عمك

جاي يحجي وقاطعته الدكتورة بدخولها علينا وبيدها نتائج التحاليل والفحوصات الي اجريتهم قبل قليل
هيام بقلق.. هَـا دكتورة بشريني وضع الجنين شلونه
الدكتورة .. حبيبتي الجنين مهدد بالاسقاط
ووضعه حرج هسة راح اكتبلج على مثبتات
وتنامين على ظهرج بدون اي حركة
لا تستهانين بوضعج لان انتي هسة بشهر الخامس
واحتمال تصير عندج ولادة مبكرة
انتبهي
كتبت الوصفة وانطتها لعمي
.. لازم تجيبون هاي الابر من خارج المستشفى لان صيدلية المستشفى مبيها هاي الابر ضروري تاخذهم
احمد.. ان شاء الله دكتوره الله يوفقج
نبراس.. بابا انطيني الوصفة اروح اجيب الدوة واجيكم
الكاكم جاهزين
صحت بصوت واني ابجي ومتأذية
.. نبراس انت بالذات ما اريدك تجيب علاجي لو اعرف اموت ما اخليك تجيبه كله من وراك الي صار بية
من الله لا يوفقك شسويت بيا راح اخسر ابني من وراك
صرت ابجي بخوف وقهر
نبراس.. هيام شبيج مو وكتها هذا الكلام انتي صحتج مو زينة
التفت علية عمو احمد عاكد حواجبه بأستغراب
احمد .. شكو عمو هيام شنوصاير بينج وبين نبراس
ليش تحجين هشكل عليه
نبراس.. هيام كافي لتعصبين مو زين عليج
هيام.. شلون ما اعصب وانت ووجودك بقربي يشكل اكبر تهديد علية وعلى حياتي
نبراس احلفك بأعز ما تملك ابتعد عن حياتي
اني مو الك ما اريدك افهمني والله اذا ما تجوز مني
ارجع للبصرة واتجرع الذل ولا اخليك تقترب مني

نبراس بتوسل .. يالله هذا هو راح ابتعد عن حياتج
وكلشي التردي يجرالج بس انتي اهدي ارجوج ولتاخذين قرارات مستعجلة وتندمين شنو ترجعين للبصرة حتى يسحلج رجلج السگط اني ماراح اتقربلج وهاي هية
احمد .. واحد منكم يفهمنا شنو كاعد يصير
ريام .. عمو اني افهمك شنو الصاير بما ان وضع هيام ما يسمح تحجيلك اني اكلك الموضوع وما فيه
ان ابن عمنا وحامي عرضنا يهدد بأختي
انتبهت لعمو رفع حاجبه بأستغراب
احمد.. شنو قصدج
نبراس.. انا طالع وريام كلامج هذا مو وكته أجليه لبعدين
ريام.. لا هذا وكته ما راح تكدر تسكتني تريد تنهزم انهزم بس اني ما راح اسكت
نبراس.. براحتج كولي للوالد ما راح تقدمين ولا تأخرين شي بس انا علمود صحة اختج ما اريدها تتوتر فوك ماهي تعبانة
طلع وتركنا لوحدنا
وصارت ريام تحجي لعمو احمد عن كلشي يخص نبراس حتى عن موضوع علاقتنا قبل لا يتزوج وتهديده
لامي بعد زواجه
بعد ما انتهت ريام من كلامها وية عمو كعد عالكرسي بتعب واني كملت كلامها
هيام.. عمو واليوم حاول يتقربلي بالسيارة وهددني يطلكني من زوجي ويتزوجني بالغصب بعد ما اجيب واني جنت ادفع بي بكل قوتي وراها حسيت بألم وكمت اصيح من بطني يله فك عني
احمد.. معقولة كل هذا يصير وانا مالي اي علم
ليش عمو تسكتون عن الموضوع بدون متحجولي
جان حطيتله حد بس بسيطة حسابي وياه بعدين

هيام.. عمو خفت ماتصدكني وتدافع عن ابنك وتوكف بجانبه
احمد..بابا هيام انتو بناتي وامانة اخوي المرحوم
الي ما ارضاه على نسرين بنتي ما راح ارضاه عليكم

كامت ريام من مكانها
.. عمو اني طالعة اشوف الممرضة حتى تجي تشيل المغذي من ايد هيام لحظة وارجع الكم
ريام
طلعت من غرفة الطواريء
واني احس النار تفور بكلبي يعني شلون الكل صار ينهش بلحمنا يعني اذا يتيمات ومالنة احد هيج يصير بحالنة ومن منو من اقرب الناس النا
اتمنى الزم نبراس واكلة بسنوني
القذر استغل وضعها ورجع يهددها ويتقربلها
طلعت من يمهم واريد اشوفه واحجي وياه
جنت احجي واني فايرة وصار بوجهي نبراس وزوجة عمي جان شايل علاكة مبين من شكلها مال صيدلية
اكيد بيها العلاج
رحت عليه بكل غضب ورفعت ايدي ووجهت صبعي بتوعد بوجه
.. لك والله وامان الله اذا صار على اختي شي صدكني ما راح اتردد ثانية وحدة بقتلك وما راح اخاف تعرف ليش لان اني بالذات ما عندي شي اخسرة لا اب لا ام لا اهل اختي الشي الوحيد الي باقيلي اذا راحت مني صدكني اروحك لعبالك بنيه وضعيفه مراح اسويلك شي اروح ابيع نفسي وادزلك الي يقتلك لذلك دير بالك مني اذا انت صدك رجال
كون بكد وعدك وابتعد عن حياة اختي
ابتسم بأستهزاء.. اي والله وطلعلج السان يا ست ريام من تالي وكت شوفي يا حبابة مو انا الي اتهدد
ولايكون صدكتي راح ابتعد عن حياتها لا حبابة هذا كلامي كان كلة علمود اسكتها لاختج لحتى تهدء كل الموضوع وما فيه انتظرها تولد
وبعدين ارتب وياها الموضوع
هديت عليه ولزمتني امه
.. لك انت واحد قذر وكلب وحيوان وحقير
نبراس.. انتبهي للسانج لا اكصه لاتشوفيني ساكتلج لحد الان ترة سكوتي كله لخاطر اختج يالله ابتعدي من وجهي حبابة
...................

بعد مرور اسبوع
ضرار.. الو هلا يابة اي اي هو انا راح اذبح خروف واوزعه عالفقرة علمود سلامة ضرغام
.. ان شاء الله اخلص واجيك للمستشفى اشوف شنو يكول الدكتور على وضع ضرغام
سديت النقال
طبعا خلال هذا الاسبوع سوة ضرغام عملية لعظام الحوض ترميم لان اغلبية الحادث عالحوض
ودكتور الكسور اقترح على الولد ان يشرف على حالة
ضرغام دكتور اختصاص الجهاز التناسلي خمنو قبل اجراء الفحوصات احتمال يأثر الحادث على المنطقة الحساسة وعيت على صوت الحجية خاجية
وباوعت عليها
الحجية خاجية.. يمة راية الله بيضة الف الحمدلله والشكر من سلم ابنا
رحاب تمسح دموعها.. الف الحمدلله واخيرا صحى ضرغومي من الغيبوبة
بعدما كنا كلنا ننتظر لان الدكتور كال كلما يتأخر كلما تزيد نسبة الخطورة على وظائف الدماغ
ضرار.. الو ضاري هسة تروح كبل بوجهك تشتري خروفين تذبحهم وتوزعهم على الفقراء لا تبقي اي منه كله وزعه واحد مني والثاني من ابوي
على سلامة ضرغام
ضاري.. صار ٺــڊٍلََُلََُؖ يستاهل الباشا
سديت النقال من ضاري
ضرار.. يالله جدة انا رايح ما اوصيج بعد لا تنسينا بالدعاء
الحجية.. لا يمة ما تطلع الا تاخذني وياك
ضرار.. حجية وين اخذج يكلج المستشفى مخبوصة خبص بجماعتنا اهل السوك واقاربنا
وين اوديج
الحجية خاجية.. ولك خايب جا هي مستشفى الخلفوك وبكيفك تقرر ما يقبلون يدخلوني
لاتخليني اكوم عليك بالعصا
ضرار.. استغفر الله امري لله اذا الحكومة تقرر ما على الشعب الا التنفيذ
الحجية.. ولك شكاعد ترطن
ضرار.. لا هيج حجية اكول اذا ما تشيلج الكاع اشيلج على راسي واوديج لعند ضرغامج
...........
رحنا للمستشفى انا وامي وعمتي رحاب. هم اجتي ويانا والبنات وعدتهم غير مرة اجيبهم وياي للمستشفى

اجة ابوي بتجاهنا وباس راس الحجية خاجية
ضرار.. هَـا حجي بشر شلونة ضرغام شفتة حجيت وياه
راضي.. اي شفته بس اشو كل شوية يرجع يغط بالنوم عبالك يغمى عليه بس سمعت صوته يون من الالم ويرجع يغفة بس الدكتور طمني وكال لتخاف
هذا مو اغماء هذا نوم لان انطيناه مسكنات علمود يرتاح وما يحس بالالم
وهسة الدكاترة جوة يم اخوك من الصبح لحد الان خلصوها علية كلة فحوصات وتحاليل يجيكونة ويشوفون وضعهة بعد ما فاق من الغيبوبة ويحكمون عليه
بس راح يوكف كلبي من الترقب اريد اعرف شنو وضعه
اباوع على ابوي خطية هواي تعب وخبص المستشفى خبص
راضي.. انا بس خلي يطمني الدكتور على اخوك ويسمح لضرغام بالسفر ما ابقيه كبل اسفره للخارج
يتعالج هناك جان ابوي يحجي وطلع الدكتور
وطمنا على ضرغام وطلب من عدنا بعض التحاليل
وهسة مرت شهرين واحنا خلصناها بين المستشفيات والعيادات والفحوصات
واخوي ضرغام ساعة يحس علينا وساعة ينام
وشوية شوية بدة يستجاب ويانة وصار يتبادل ويانة الكلام حتى لو قليل بس لفت انتباهي من ضمن كلامه لما كان يهذي
اسم هيام
جان يهمس بصوت موجوع لج هيام تعالي
بسيطة انا اعلمج وين ترحين مني الا احطمج
لج بطة تعالي نامي بحضن ضرغامج اريدج احتاجج يمي ))
بوقتها متت قهر على اخوي شكد شايل قهر بگلبه
وما يبين كدامنا انه متأثر بفراك هيام لكن الظاهر غيابها اصبح نار تسعر بگلبه
وهذيانه خير دليل على گلبه المكسور
بعدها
نلقناه لمستشفى اهلية خاصة والوالد اتكفل بجلب جميع الدكاترة الاخصائيين حتى يشرفون على حالته
وبعدها صارو الدكاترة يتناوبون عليه
كل واحد يشرف على ضرغام وينطي علاج حسب اختصاصه ويطلب مجموعة تحاليل او اشعة ومفراس
وغيرها من الفحوصات لتشخيص حالته ووضعه
وانا اتابع وية كل دكتور
ومن خلال الفحوصات اقترح علينا دكتور الكسور ان ضرغام
لازم يشرف عليه دكتور اختصاص مسالك بولية وتناسلية
لان اكثر منطقة متضررة هي منطقة الحوض لذلك
أقترح ان من الافضل ان يشرف على حالته دكتور اخصائي حتى يجيكه
بعدها ابوي اتفق وية صديقه الدكتور ان يرسل النة دكتور اخصائي مضبوط
اجة الدكتور واشرف على حالة ضرغام
وطلب من عدنا نسوي له عدة تحاليل
وفحوصات ومنها راح يعرف شنو النتائج
سوينا جميع التحاليل بعض انواع التحاليل تستغرق يومين وبعضها ساعات
وبدة ضرغام يستوعب وضعه لكن مع الاسف بصعوبة
لان الاخ جدا صعب واعصاب نار احس بي
يريد ينتفض عالوضع الي هو بي هذا مو ضرغام اخوي ولا اطباعه جان حيل عصبي وجامد مرات
يظل يصيح
ويضطر الدكتور ينطي مهدئات تهدي اعصابه لان الاعصاب مو زين عليه بهاي الفترة
جانت ردة فعله علمود التحاليل الي طلبها اخصائي الجهاز التناسلي جداً عنيفة ومانع وصار اعصاب
ضرغام بألم .. ما اسوي اي تحليل وين تردون توصلون
شنو قابل انا طفل كل ساعة ماخذيني بمكان زين شنو الغاية من التحاليل
راضي بطول بال : وليدي ترة هذا تجييك من ضمن الفحوصات العامة لازم نتطمن عليك
ضرغام بصوت موجوع : بوية رحمة على والديك والله مليت ولعبت نفسي ماصارت هاي كل يوم بمكان وكل ساعة فحص وكل ساعة دكتور وكل دكتور يريد مني كومة فحوصات وانا مثل الرجل الالي ظال بهذا الكرسي وهذا السرير لا اكدر احرك جسمي ولا اكدر ارتاح
......

لكن بعد طول عناء وتوسل من ابوي وافق ضرغام يسوي التحاليل

المهم فهسة احنا كاعدين منتظرين التحاليل تطلع
حتى ناخذها للدكتور ونشوف شنو يكول
طبعا مضى على الحادث شهرين وضرغام مطلع من المستشفى وبهاي الفترة بدة شوية شوية يتحسن صحياً لكن نفسياً صفر
وبدة الورم يخف. عن وجهه وبقة بس اثار زراك
بالبداية جان هواي يتضايق من قصة التحاليل
واغلب الوقت عصبي ونفسيته زفت
وكل واحد يقترب منه يبتلي على عمره
اعرف ليش هشكل يتصرف لان ضرغاام ما متعود عالعجز ويعتمد على غيره يساعده على قضاء حاجته
جنت صافن افكر بضرغام
وسمعنا الموظف يصيح باسم ضرغام راضي
كمت من مكاني وباوعت لأبوي راد يكوم من مكانه
ضرار: بوية انت خليك كاعد بمكانك انا راح اجيب التحاليل
رحت واخذت الظرف كان يوجود بداخله نتائج التحاليل
سألت ابو المختبر
: بشر خوية شنو النتيجة ايجابية لو سلبية
: اخذ التحليل للدكتور وهو يفهمكم احسن
اخذته منه ورحنا انا وابوي
للدكتور طبعا تركنا ضرغام وجماعته يمة بالمستشفى
طبعاً اصداقائه فراس وحازم ومصطفى ابد ما فاركو المستشفى
اشوفهم كلة وياه
مرات اشوفهم يصنفون عليه بعز الشدة ومرات
اشوف بعيونهم نظرات الحزن على حال صاحبهم
فعلاً ضرغام كاعد يمر بأصعب مرحلة بحياته
ويحتاج لكل ذرة تشجيع ودعم لحتى يكدر يجتاز
مرحلة الالم ويرجع يوكف على حيله
...............
دخلنا عالدكتور انا وابوي وسلمته ظرف التحاليل
فتحه ولبس نظارته وكعد يقرة بالتقرير المكتوب
لحظات ورفع راسه ونزع نظارته وباوع على ابوي
الدكتور: حجي انت مبين انسان مؤمن وتأمن بقضاء الله وقدره
راضي: والنعم بالله
الدكتور: شوف حجي نتائج التحاليل
سلبية وايجابية
راضي عقد حواجبه بتسائل
: شلون يعني ما افتهمت
الدكتور: انا اكلك
من ناحية ايجابية ان الجهاز التناسلي للمصاب
سليم والحمدلله وقادر على ان يمارس حياته الزوجية بصورة طبيعية
اما الجانب السلبي بالتحاليل
ان الحادث سبب ضرر ادى الى حدوث عقم عنده
بنسبة ٨٠٪؜
اباوع على ابوي انخطف لونه
راضي : شنو. قصدك دكتور يعني ابني عقيم
وما يخلف ولا راح بعد يصير عنده اطفال
الدكتور: تكدر تكول هيج بس لا تنسى عندك النسبة الايجابية ٢٠٪؜ً
يعني احتمال هاي النسبة قابلة للارتفاع او لا
راضي: لاحول ولاقوة الا بالله
كعد ابوي عالكرسي بوهن وقلة حيلة
اقتربت منه ولزمت كتفه
همس بصوت مكسور بي البجية
: الحمدلله على كل حال قدر الله وما شاء فعل
اهم شي هو سالم
ضرار بحزن : والنعم بالله
كتب الدكتور عالورقة وصفة الدوة
الدكتور : هذا العلاج يستخدم لمدة ٦ اشهر وراها يراجع مرة ثانية ونشوف مدى تطور حالته
ترة خلي ببالكم شغلته يحتاجلها طول بال وصبر
فلازم انتو تعاونوه وتساندونه
راضي: ان شاء الله ربي يكتبله الي بي خير
طلعنا من الدكتور وانا شغلة وحدة شاغلة تفكيري شلون راح يتقبل ضرغام خبر عقمه اذا عرف

:

:
وصلنا لبيتنا ابوي كال اخذني للبيت ما اكدر اروح للمستشفى واواجه ضرغام صعب علية اتحمل اضم عليه الخبر خلي يتشافة ويطيب جرحه وبعدين نكله
وتعال كولي امي الحجية وامك شلون راح اعلمهم بالخبر وهسة هن منتظرات نتيجة التحاليل بفارغ الصبر
دخلنا للبيت واستقبلتنا امي تسألنا
وابوي خبرهم هي وجدتي عن موضوع عقم ضرغام

حليمة: يمة صخام الصخمني شلون يعني ضرغام صار عقيم يعني بعدما يصير عنده اولاد يشيلون اسمه
يارب سترك
وكامت تلطم على وجها وتبجي على حال ضرغام
اقتربت منها وحضنتها اريد اهديها ماكو واجو عمتي رحاب وميس يركضون على صوتها مفجوعين
الحجية خاجية : اتعوذي من الشيطان يا مرة مايجوز الجزع
الحمدلله اهم شي هو بخير ويشم الهوى
جانت تحجي وخانكتها العبرة
راضي: حليمة كافي لا تبجين واذا عقيم وشنو يعني
ترة هذا ما ينقص من رجولته هو الدكتور كال
لازم يخضع للعلاج لفترة طويلة يعني اكو امل وانا راح اسفره للخارج يتعالج
بس انتي لا تكلبيها مناحة

حليمة : والله ياحجي مو بيدي ممرود گلبي على وليدي

ضرار : يمة كولي الحمد لله هاي ولا غير شي لا تبجين لا ربي يغضب علينا
والله انا لحد هسة ما مصدك الله كتبله عمر جديد
حليمة: والنعم بالله بس يمة صعبة والله صعبة
سودة علية يمة ضرغام ما لحكت تتهنة بشبابك تشوف بزرك يايمة
جانت تبجي وتحجي
راضي : كافي بجي لا تفاولين عالولد
عودك ما اوصيج من تدخلين عليه هم كعدي ابجي ونوحي يم راسه
..............
هيام .. دكتورة راح اموت من الوجع والالم
الدكتورة.. شوفي ماما انتي هسة حالياً بشهر السابع
والمايات عندج قلت ولازم اكتبلج هسة ورقة وتدخلين
بيها كبل للمستشفى حتى اسويلج عملية لانخسر حياة الطفل اذا يبقى ببطنج اكثر
جنت كاعدة بالبيت كالعادة
طبعاً بهاي الفترة طبقت تعاليم الدكتورة بنتظام
وكعدت من وظيفيتي وخطية بلال كال الراتب مستمر لان انتي وحدة من موضفاتنا والج حقوق علينا وراح اعتبرج مجازة بهاي الفترة
اعترضت فقرر ان ينطيني شغل مكتبي كتابة قوائم
ونقل الوصولات يوصلهم بيد لجين ومرات بيد السايق اني اخلصهم ويوم ثاني ارسلهم بيد السايق
وبهاي الطريقةكدرتً احفظ سلامة ابني واشتغل
بس اليومً واني كاعد على ميز الطعام واكتب ما حسيت الافجاءة بماي دافي غزير من جوة وبلحضتها
عرفت ان هاي احد علامات المخاض بس اني
بشهر السابع شلون اتصلت على عمو والبنات
وريام خطية انخبصت بية وما عندها اي معلومة بهيج مواقف
((((((((((((())))))))))
راضي.. شوف ضرار هسة تاخذ جوازك وجواز اخوك تروح تفيزهم لحتى اسفره للعلاج بعد ما بيها مجال
استشاريت صاحبي بلبنان وراح اخذ تقارير ضرغام
للمستشفى الجامعة الامريكية والدكتور هناك كال
الاحسن يستعجل بالحضور للعلاج لان كلما يمر الوقت عليه كلما تتعقد الشغلة وهو اساسا صارله شهرين على الحادث
رحت للبيت حتى اجيب الجوازات
شفت سيارة خالي فاضل بالباب
دخلت وشفت ميس واكفة يم باب الهول تتسمع وسمعت صوت
امي تحجي وية رنا بنت خالي معصبة
حليمة .. ولج ليش هشكل تسوين ما جان اتفاقنا هذا
رنا.. اسفة عمة ما اكدر اوافق على طلبج
يعني بخيرهم ما خيروني بشرهم عمو علية
يعني هو من جان صاحي وما بي شي ما تزوجني
هسة من اتضرر وافق الاستاذ واتنازل يتزوجني لا عمة اني اعتذر ارفض اربط حياتي وية واحد عقيم والله اليعلم لو يمشي بعد لولا
حليمة بقهر.. ليش ولج عشمتيني خليتيني اهجم بيت ابني واتمنيتج عروسته تالي بنت اخوي انتي باول شدة بين معدنج وخذلتيني
فاضل.. ام ضرغام هذا كلامج مالة داعي انا احتراما. للخوة اجيت اترخص منكم حتى اكلكم ابن صديقي اتقدم
وطلب ايد رنا بنتي وانا وافقت
يعني انتي ما ترضيها اوكف قسمة بنتي علما ضرغام
يكوم ويتشافة وضيفي فوكاها هو عقيم يعني هاي لو وحدة من بناتج تقبلين تزوجيها لهيج واحد
جان خالي وية كل كلمة يحجيها بحق اخوي انا احس وياها مثل الطعنة
قررت استعجل بالسفر واشرف على علاج اخوي بنفسي وما راح ارجع والا ضرغام مشافة معافة
(((((((((())))))))
هيام
بديت افتح عيوني بتعب شوية شوية
جانت الرؤية مغوشة
باوعت شفت ريام ولجين وريتا وزوجة عمو احمد واكفين فوك راسي
همست
.. ابني
ريام بفرحة.. الحمدلله على سلامتج هيومة وسلامة علاوي
ابتسمت ودموعي تصب من ذكرت الاسم لان هذا الاسم جان ضرغام دائما يكول اذا يصير عندي ولد اسمي علي
تلفت يمنه يسرة ماكو يمي لعد وينه اشو ماكو جاوبتني ريام بضحكة مخنوكه بقهر
ريام:حبيبي صغير غير يخلو بالخدج هسه الى ان يكبر شوية
.. اروح اشوفه حاولت اكوم وحسيت بوجع خلاني اصيح
:ااااااه ياربي رحمتك شنو هذ الوجع
الكل كمزو عليه لزموني حتى مااتحرك
ريام:حبيبتي هاي شبيج وين رايحة يمعودة عمليتج ليصير بي شي بس يومين تصيرين زينه تكدرين تكومين تتمشين وتشوفين احلى ولد هو بعده صغيروني خطيه مثل الارنوب الصغير
تمر عالبشر لحظات ثمينة والمفروض يقدرها ووحدة من هاي اللحظات ولادة ابني جنت اتمنى بهاي اللحظة اشوف ضرغام من يشيل ابنه بين ايديه لكن
ليس كل ما يتمناه المرء يدركه
جنت احجي وية البنات ريتا ولجين وكاعدين يشوفوني صورة علاوي بالنقال فجاءة دك نقال زوجة عمو احمد
ردت عالمتصل
وبعدها سمعت صرختها ولطمت على خدها
.. يمة كلشي ولا نبراس ابني دخيلك ياربي

يتبع

اتمنى لكم قراءة ممتعة مع الوعد بالمزيد بأقتراب لحظات اللقاء بين ابطالنا وما يخبئه القدر لهم