رواية تائهة بين اروقة الماضي الفصل الثاني والعشرون 22 - بقلم الكاتبة نهى

تائهة بين اروقة الماضي
بقلم الكاتبةnuha-d-h

مساء المحبة والخير عليكم يا احبتي القراء 🌷🌷🌷🌷

قربت لحظات اللقاء والانتقال الى ذاك المكان الذي يطلقون عليه بالقفص الذهبي
اصبحت خطواتي معدودة لأسلك ذلك الطريق
طريق فيه الذهاب ولا يجوز لي العودة
))((()))))((
دخلتني خالة رحاب لغرفة النوم واني كعدت على طرف السرير وگلبي يدك مثل طبول الحرب احس بالخوف مااعرف ليش ولا عبالك هذا ضرغام الي اني وياه نسرق كل شوية احضان بغفلة عن الجميع
حسيت محتاجة امي بهاي اللحظة بالذات
اريدها تطمني ان الامور كلها بخير تحضني تاخذ برد الخوف مني بدفاها
اني كلش خايفة وما اعرف شنو ينتظرني
ماانكر رنا زرعت بذرة شك براسي رغم اني نهرتها وما رضيت تكمل حديثها واقنعت نفسي بأن هي مجرد انسانه حقودة لان مكدرت توصل لضرغام وهو ماحبها وحبني الي وهي تريد تخرب فرحتي كل هذا گلته لنفسي بس مامنع ناقوس الشك يدگ براسي
خلصت العرس كلة اباوع على ضرغام
بنظرات الشك معقولة هاي الضحكة وهاي الفرحة
وهاي الكلمات الي ديحجيها الي كلها وهم
حاولت ابعد افكاري وشكي من تفكيري تعوذت من الشيطان الرجيم
هيام اصحي ديري بالج تخلين وحدة مثل رنا تخرب
حياتج هاي وحدة حقودة ما كدرت تحصل على ضرغام
شي طبيعي راح تطلع هيج طلعة بيوم عرسج حتى تخرب فرحتج
حاولت اقنع روحي اني صح وضرغام يحبني وارمي كل مخاوفي وراي وافتح صفحة جديدة بحياتي وياه
اي ضرغام مو مثل نبراس
مستحيل يسوي بية هشكل ويساوم علية لحتى يتزوجني

قطع علية حبل الافكار صوت خالتي رحاب
رحاب: يالله خالة هيومة كومي بدلي ملابسج وخليني اساعدج
حسيت برعشة خوف وسمعت خالتي رحب صوت اسناني وهي تصطك
رحاب: لا حبيبتي لا تخافين صيري قوية ترة ضرغام ابن خالج مو غريب
اباوع عليها جانت تحجي وخدودها حمر
صارت تساعدني بنزع فستان العرس دخلت للحمام وتركتها
وراي تجمع الاكسسوارات والفستان وتعلكهم
دخلت تحت الدوش الدافي اتمنيت اكدر اغسل افكاري
مثلما اغسل جسمي
سمعت صوت خالة رحاب: هيومة
الغسول والزيوت حاطتهم يمج عالرف
استخدميها راح تساعدج على الاسترخاء
باوعت على خانة الغسول كان بيها لوشن
وغسول وكريمات مرطبة ما بعد السباحة
استخدمت الغسول كانت ريحته كلش طيبة
خلصت حمامي ونشفت جسمي وطلعت لكيتها منتظرتني
فرحت لان شكلها القريب جدا من شكل امي خلاني اتخيلها امي تمثلت كدامي كنت حابه
اركض عليها احضنها بقوة اريد اهزم خوفي وشكي بحضنها واغسل افكاري المشوشه بدموعي و اهمسلها من بين دموعي حبيبتي ماما اخذيني بحضنج

كنت اريد امي اسالها على امور تخص هاي الليله
ردت افتح حلكي واسألها بس اترددت بالكلام حسيت نفسي خجلانه الي كدامي مو امي خالتي رحاب
ما اعرف شلون اكلها خالة علميني
شنو اسوي بأول يوم الي وية زوجي
وشلون راح يكون تعاملي وياه وشنو المطلوب مني
اخاف اخطي خطوة وهو يفهمها غلط بحقي
كانت هواي اسئلة ببالي بس الي وياية هي اساسا ماعدها خبرة وما متزوجه
صحيح اني عندي معلومات على علاقة الازواج
لان اني كبيرة ودارسة وافتهم
لكن احتاج من يفهمني ويعلمني
خوالي ما قصرو وياي بأي شي وخالاتي
هيفاء رحاب قامو بالواجب وزايد
بس ما ادري ليش غفلو عن هاي الفقرة بالذات
وبيبي خاجية صاحتني وانطتني قطعة قماش بيضة
وكالت جدة هاي بياضج
وكأن الحجية خاجية مجرد ما ان تنطق هاي الكلمات
اني لازم اكون فاهمة عليها على طول
اني اعرف شنو الغاية من القماش الابيض
بس السؤال شوكت استخدمها وشلون يعني
عندي اسئلة كلش محرجة حتى وية نفسي ما اتجرئ احجيها
انتبهت على حركة خالة رحاب شفتها حضرتلي
سيت نوم ابيض كان موديله ملكي كلش حلو عبالك مال اميرات
شفتها شلون تعدل بي وتحطة عالسرير وتباوع عليه
بحنان كسرت خاطري جانت عيونها تنطق
بالحرمان اي هي امراءة انسرق حلمها وانكسر بختها
وحاسبها الزمن على ذنب لم تقترفه
التفتت علية واني صافنه عليها غركانه بافكاري
رحاب: هَـا هيومة خالة نعيما حبيبتي ان شاءالله حمام الهنا
يالله تعاي خلي اساعدج حتى تلبسين

ساعدتني واهتمت بية عبالك بنتها الصغيرة
كعدتني على كرسي ميز المرايا
وصارت تمشط بشعري وعطرتني وباوعتلي بالمرايا
رحاب: ما شاء الله طالعة مثل الكمر ربي يسعدج
ويهنيج انتي وضرغام وما يفرقكم عن بعض
هيام همست : اللهم امين
رحاب: يالله انا اعوفج ترتاحين هسة راح يزفون ضرغام ما اريدج تخافين صيري سباعية
انتبهت عليها
طلعت وتركتني لوحدي وزاد الخوف
باوعت عالغرفة اريد اشغل تفكيري بتصميمها الراقي
جان كلشي بيها مرتب وذوق من اثاث من تحف من ديكور حتى الفرشة كانت ملكية بيضة

اريد انسى الارتباك والتوتر لكن سرعان ما ارتفعت نبضات كلبي وزاد الخوف من سمعت اصوات الشباب والطبل
والهلاهل صارت قريبة على غرفتي احس اطرافي صارت باردة ورجعت اسناني تصطك
من البرد جنت كاعدة عالسرير انتظر دخول ضرغام
سمعت صوت الباب انفتح وصلني ضحك الشباب اخوانه واولاد عمه كانت كلها عبارة عن
عبارات ممزوجة بكلام الاهازيج
(اليوم يومك يابطل
وشايف خير وتستاهلها
وعريس وربعه يزفونه )
سمعت صوت الباب انغلق
بالمفتاح عززززة حانت لحظة اللقاء
راح اموت من البرد والخوف رجعني الى نقطة البداية وصرت اشوفه مجرم الحرب كدامي مثل اول مرة التقيت بي بس الحقيقة مجرم وسيم
دنكت وانتبهت عليه اتقدم علية
صوت انفاسه و ريحة عطره سبقته
وكف قريب عالسرير ومد ايده وكومني
وصرت مقابيله
ضرغام: ما شاء الله طالعة عبالك كمر بليله تمامه
رفع راسي وقرب علية وطبع بوسة على جبهتي
رجف جسمي على لمسة شفايفه
ونزلت شفايفه تطبع البوسات بكل لهفة على كل جزء بوجهي
حس عليه خايفة
ضرغام: بطة هاي شنو وين اللسان وين الحركات
الي جنتي مدوختني بيها
ابتسمت على كلامه
ضرغام : خرب ابتسامتج تدوخ والضحكة كارثة
تتذكرين بيوم صيحت عليج من شفتج تحجين وتضحكين وية ضاري
هيام: اممم
: بيومها اجة كلبي يوكف من سمعت رنة ضحكتج بالبيت
كلت لروحي ولك ضرغام هاي البنية خطر عليك
دير بالك تقترب منها
بس انا اعرف نفسي كل ممنوع مرغوب
وما حسيت بنفسي الا وانا غركان بحب وحدة السانها حاد وعيونها جنها عيون بزونة وترد الكلمة علية بعشرة عنودية وراسهة يابس ملكت الگلب بدون ما تحس
وصار يسمعني كلام جميل حتى يطمني لان عرفتي مترددة منه وخايفة
كدر يحسسني بالامان
خلاني اضحك على عقلي التافه الي سمح لوحدة مثل رنا
تحرك كلبي وتخوفني من ضرغام
ضرغام: هيام شنو وينة صوتج ترة ما يلوكلج تصيرين فقيرة رجعي طلعي هيام الشقية ترة هي الي جننتني بسوالفها واكلت عقلي
هيام: ههههه حسستني عبالك اني قرد بالسيرك وكاعد حضرتك تشوف حركاته حتى يضحكك وتلعب وياه
ضرغام: ههههههه اي هسة هاي بطة الي اعرفها
سحبني من ايدي واخذني عالسرير
هيام بتهرب : ما تتعشا
ضرغام: وانتي شنو بطه مو عشاي
دتعاي خليني اروي عطش انتظاري والصبر
متتصورين شكد جنت منتظر هاي اللحظة
هيام اريد كلشي بيج يصير ملكي حلالي وبس الي
ضحكتج نظراتج گلبج جسدج كلج على بعضج مالتي
اريد اليوم اسمع اسمي بصوتج وانتي بين اديه
اريد اليوم اغفى على صوت انفاسج
وغبنا سويا نتشارك اثمن اللحظات
وبيومها عيشني
اجمل احساس واتبادلنا الوعود وغاب عنا القول وبقت الافعال هي الي تتكلم
وبخبرته وبطريقته كدر يخليني اسلمه نفسي واخذني بدون مقاومة وبليلتها صرت كلي ملكه قلبا وقالباً
وعشنا سوية اجمل ليله بالعمر
....................................
(مرت الايام )
صحيت من النوم
حسيت على ايد ضرغام محوطتني واني ناطيتة ظهري ابتسمت بسعادة ودرت جسمي واني بين ايديه
باوعت عليه كان نايم مثل الطفل صرت اتمعن بمعانيه
ياربي شكد احبه رفعت ايدي صرت اتلمس لحيته
ومررت اصبعي على شفايفه الي مجننتني ومدوختني
انتبهت لرموشه الطويلة شلون نازلات على خده
كملت ايدي طريقها لصدره صرت اتحسس نبضات گلبه المنتظمة
سحبت نفس عميق اشتاقله واني بين ايديه
يارب لاتحرمني منه ولاتخليه يخذلني واجعله الي سند
بهاي الدنيا الجيء اله بوقت الشدة وديم علينا محبتنا

ابتسمت وغمضت عيوني اتذكر اول ايام بزواجنة
شلون جان يتبعني بكل مكان بالبيت مثل الطفل كان واضح عليه الولع واني اكثر باين علية من نظراتي جانت كلها لهفة
وخلة الكل الي بالبيت يحجي ويضحك وياه
وهو يجاوبهم بكل جرئة
(حلالي وانا حر بي )
: خلصتي مراقبة لو بعدج تردين تباوعين
رفعت عيوني وصارت بعيونه وضحكت
قربني عليه
: تعاي لزمتج بالجرم المشهود تسترقين النظر بدون علمي
نزل علية وباسني
دفعتة اريد اشرد منة لان ادري بي وين راح توصلنا هاي حركاته
كمت من السرير
هيام: هم يالله تكعد ترة كلش اتأخرت عالشغل
كام وراي وعيونه علية جنت لابسة ملابس نوم
عض شفته
: دتعاي بس احجي وياج اتذكرت موضوع
ابتسمت: لا حبيبي ما اجي لان صارت قديمة
بعد ما تقشمرني صرت اعرف كل الحجج لحتى اجي لعندك
دخلت للحمام حسيت بي اجة وراي
وبسرعة قفلت الباب عالسريع
دك الباب بقبضة ايدة بخذلان: لج هيام فتحي اريد اسبح كلش اتأخرت
ابتسمت : ههههه لا حبيبي ممنوع اسبح اني بالاول وبعدين انت تتفضل وراي مو كل مرة تنجح الخطة وتقشمرني وتدخل وياي بالحمام
يالله حباب روح حضر ملابسك بين ما اخلص
ضرغام بتوعد: بسيطة انا اعلمج
فتحت الدوش
اضحك عليه واني اسمع صوته بالغرفة وصوت باب الكنتور انركع ادري بي
يضوج اذا ما يحصل علية وياخذ الي يريده هسة من اطلع راح اشوفه عاقد حواجبه مثل الطفل
يعجبني مرات احب العب عليه واحرك اعصابه شوية
افرح من اشوفه يبذل ما بوسعه حتى يرضيني
اوووف صحت بصوت عالي بالحمام مثل المخبلة
: يا نااااس شكد احبه
اجاني صوتة الخشن : ولج هذا منو الي شكد تحبينه
جاوبتة بشيطنة : الماي جنت احجي وية الدوش الدافي
ضرغام: مخبلة مو عاقلة والله بلاني بيج
ابتسمت
سمعت صوته : هيام انا طالع راح اسبح بحمام ضرار
لان شكلج مطولة حضرتج كاعدة تحجين وية الدوش وناسيتني وانا عندي شغل مستعجل
سمعت باب الغرفة انفتح وطلع
كملت حمامي الصباحي ونشفت جسمي بالمنشفة
ولبست برنص الحمام
وطلعت شفت الغرفة مهوسة والكناتير مفتوحة
والسرير مخربط ضحكت واني اتذكر خبالاتنا مالت البارحة
رحت طلعتلي دشاشة لونها وردي
وحضرت شال مناسب وياهة
ومشطت شعري ونشفته بالشسوار خلصت ورفعته بالقراصة خلصت واتجهت عالغرفة
انظفها واطلع الملابس الوسخة واخليهم بالسلة صرت اتحرك بالغرف كالعادة اقوم بالتنظيف اليومي قبل لا انزل اتعودت اكمل غرفتي يالله انزل عالبيت

انفتح الباب ودخل ضرغام ينشف بشعره بالمنشفة ولاف المنشفة على خصره
هيام: نعيماً حياتم
: روحي وخري عني ما احجي وياج
برطمت : اهااا يعني شنو اطلع واتركك
التفتت وردت اطلع من الغرفة واني اتوعد
ضرغام: شنو على وين تعاي رجعي حضريلي ملابس
: لعد انت مو كلت روحي عني
: واذا كلت روحي يعني انتي شنو ما تصدكين اكلج ابتعدي حضرتج مكيفة على زعلي
رحت للكنتور وحضرت ملابسه وحطيتهم عالسرير
جنت احجي وياه واني اتحرك بالغرفة اكمل تحضير شغلاته فتحت مجر الجواريب
هيام: تدري انت بيك هواي شبه من تصرفات الحجية خاجية عندكم روح الانا والتسلط كلش جبيرة لدرجة من تحجي احس براسك يكبر من الثقة والتسلط
رفع حاجبه: يعني افهم من كلامج عندج اعتراض على شخصيتي
هيام: لا استغفر الله اكو واحد يعقب اويكدر يتجرئ على شخصية حضرتكم الموقرة
ضرغام بكل ثقة: اهاا عبالي
جان يبدل ويحجي وياي ادري بي عنده خيط كبرياء
واضح من كلامه منزعج
الزواج خلاني اكتشفت هواي اشياء ب ضرغام
كانت شخصيتة غريبة ممزوجة بين الهيبة والخشونة والكبرياء
يعني هو رجل قوي بالسوك وعنده مكانته والكل يسويله الف حساب
بس من يكون بين احضاني يتحول لطفل كبير يحب يعيش حياته بدون قيود
كانت تصرفاته مشاكسه وطبعه حنون بس مع كل هذا اكو كبرياء وكرامة رجل متسلط في داخله مستحيل يتخلى عنها او يتسامح بالتجاوز عليها
كرامته وكبريائه خط احمر
يعني هو شكد متساهل وياي ودائما حنون علية بس اذا حاولت اتعدى هذني الخطين رأسا يتغير تصرفه للبرود ويتحول الى مجرم الحرب الي اعرفه وتختفي عن وجهه كل اثار المودة والحنان
رجعني صوته الي اعشق خشونته
: يالله انا نازل تحتاجين شي
: لا سلامتك الله وياك
: احم يالله مع السلامة
انتبهت عليه واعرفة شنو يريد
خرب ما انطاني گلبي اخلي ينزل بدون ما اودعه مثلما اتعودنا على بعض
التفت راد يطلع
: ضرغام لحظة ما نسيت شي
رفع تك حاجب: لا ما ناسي اخاف انتي الي ناسية
ركضت عليه مثل الطفلة وحضنته
ورفعت نفسي وصلت لشفايفه وبسته
انتبهت على شلون تحولت معالم وجه من البرود للشغف
واخذ شفايفي بكل لهفة وكأنما كان منتظرني
قطع علينا اللحظة صوت ضاري
يصيح من اسفل الدرج
ضاري: ضرغااااااااام يالله ترة اتأخرنا وين صرت

ابتعد عني : احتركت عشيرتج هيام چا انتي شنو مصيبتج تجين كله بالوقت بدل الضائع
مسح شفايفه وباوع على روحه بالمرايا وعدل شعره
: يالله مع السلامة
رحت نزلت وراه : ضرغام لحظة شنو ما تتريك (الفطار)
كمل نزول الدرج : لا والله ما عندي وقت اتأخرت اتريك بالشغل
دخلنا للمطبخ وجان الكل كاعد وانتبهت على ميس كاعدة من الصبح صدق اولا تصدق ولابسة ملابس شكلها عندها طلعة

ضرغام صبح عليهم كلهم وباس راس بيبي خاجية
وسلم على امه وابوه
واني هم سويت مثله
انتبهت على ضاري كام من الريوك من شاف ضرغام دخل
ضاري والاكل بحلكة: يالله يا اخي وين صرت صارلي ساعة مشغل السيارة وانت ماكو
والله الدنيا دوارة جان ضرغام كلة يكعد من وكت ويكعدني من النوم جلاليق و كوة اكعد
وهسة صرت انا الي اكعد قبلك ولا بعد انا اكعده كوة من النوم
ابتسمت بخجل على تعليق ضاري
ضرغام : يالله اتحرك كدامي بلا حجي زايد
طلعو الولد وبقة خالو راضي متعود دائما يطلع وراهم للشغل وبيبي خاجية تباوع علية
كعدت اتريك وياهم باوعت ريمة بعدها ما كاعدة من النوم
درت وجهي على ميس: شعجب اليوم كاعدة من الصبح
مو من عوايدج
ميس: اليوم عندي تقديم عالكلية
هيام: بالتوفيق ميوسة طبعاً راح تشوفين شلون حلوة الكلية لان تعتبر حياة جديدة بالنسبة الج
درت على خالو راضي
: خالو صدك اتذكرت انت مو وعدت ريمة تنقل كليتها
هنا للبصرة
الحجية خاجية: اي راد ينقلها وانا رفضت
باوعتلها بتوسل : ليش بيبي خطية ريام تحب الكلية وهذا كان حلم امي بان احنا نكمل كليات ونستلم شهاداتنا
الحجية: لا جدة انتن ما تعرفن شي هنا مو الموصل عند امج وابوج وبراحتجن لا انتن يمي بالبصرة
هيام : اي وشنو الفرق يعني ريام تداوم بالكلية حالهة حال ميس
الحجية خاجية : ميس امها وابوها موجودين وهمة المسؤلين عنها ولو علية هم ابطلها
من الكلية بس اختج انا المسؤلة عنها وعمج امنها عدنا
وانا اشوف ان الكلية خطر على البنات واختج حلوة
وصايرة ريانة واخاف عليها من اولاد الحرام
وشوفة عينج هي ببيتنا وما كدرنا نحميها من هذا الكلب ابن حمدية. تردين نوب اعوفها
تروح هناك بوسط الزلم
راضي: شدعوة يمة سويتيها ظلمة عاد مو لهاي الدرجة
رحاب: خطية يمة خليها تداوم حرامات هسة عاجبج حالي وكعدتي بالبيت لو مخليتني مكملة كلية جان هسة انا مدرسة وشاغلة فراغي بدال هالكعدة
عكس هناء الله يرحمها خلصت واخذت شهادتها
الحجية خاجية: هناء لو ما ابوج عنيد و لح الا تكمل دراستها جان هم ما خليتها تكمل كلية ودراستها ما جابت النة بس وجع الراس وطلعت عينها وخلتها تطغى وتتمرد على بيت اهلها وتشرد
جمدت بمكاني وعرفت ان ريمة مستحيل تكمل كلية
ومن كلام الحجية خاجية يعتبر ان الموضوع انتهى وانسد وممنوع النقاش بي
اوف خطية ريمة ادري بيها راح تنقهر ويزيد قهرها اذا
تشوف ميس راح تداوم كل يوم كدامها
اووف
الحجية خاجية : هسة هي شناقصها اشو دلال وكلنا نحبها بعد شتريد خلها هنا يمي وما عليك بيها انت عليك بس ببنتك
راضي: بس ريمة هم مثل بنتي
الحجية خاجية: يمة راضي سد الموضوع هذا هو انا كلت ماكو كلية معناها ماكو كلية بنت هناء ما تدخل كليةً
كمت من الريوك حسيت معدتي انعقدت انقهرت على اختي تتحاسبت على ذنب مو ذنبها
درت وجهي واتفاجئت بوجود ريام واكفة بباب المطبخ ودموعها على خدودها تجري عرفت انها سمعت كل كلام الحجية خاجية
انتبهت عليها مسحت دموعها ودخلت للمطبخ وصبحت عليهم بصوت فارغ خاوي ما بي حياة
وكعدت تتريك
اوووف يا رب عوضها وفرح ريمة
احس بيها جاي تعاني بس ما تكدر تحجي الظروف كلها مو بصالحها
( ابن حمدية وموقفه وامي وماضيها)هاي كلها توكف بوجها وتقيدها وتخليها ما تكدر تحجي وتطالب بحقها
اووف
التهيت اشتغل بالبيت وخالو طلع ورة ساعتين
وبقيت اني وخالة حليمة بالمطبخ اني انظف وهي تطبخ
والحجية خاجية جانت كاعدة تسمع راديو اذاعة القران
حليمة: شنو بشري ماكو شي

عقدت حواجبي : شنو ماكو شي؟
حليمة : شيفهمها هالفاهية
قصدي ماكو شي بالطريق يعني ما كو حمل

استغفر الله
بالله هاي شحجي وياهة
هسة هذا هم سؤال واحنا مر على زواجنا شهرين
هيام: لا خالة ماكو شي بعدنا جدد مو هسة نسوي اطفال ضرغام يكول خلي نتهنا بزواجنا وبعدين لاحكين عالجهال
حليمة: شنو حبيبة انا منتظرة زواج ضرغام يوم يوم علمود افرح بشوفة جهاله مو علمود حضرتج تتهنين وتفرحين
سكتت ما رديت عليها
صحيح يقهر كلامها بس صرت اطبق قاعدة اسمع منا وطلع منا
الحجية خاجية: خايبة حليمة على كيفج وية الفرخة
يعني شنو تردين حبها وحبلت (يعني تحمل من اول بوسة)

حليمة: لا حجية بس تدرين بينا كلبنا شلون نار على شوفة بزر (اولاد) ضرغام
الحجية خاجية: مو مثل لهفتي على شوفت بزره بس
كلشي بالقسمة والنصيب
حليمة: اي صيحيح امنت بالله بس لا تنسين هي هم جانت عندها خربطة بالدورة وما اعرف شنو ما شنو بس الي اعرفة ان هاي السوالف تأثر عالحمل
والتأخير يكون منها
الحجية خاجية: اي خوش خلي رحاب لو انتي تاخذونها للطبيبة وتشوف شنو علتها حتى تنطيها دوة
يعني شكد سامعة بنذالة مثل نذالة حليمة ما شفت
تركت المطبخ وطلعت ادور على ريمة طلعت بالكراج وانتبهت على ريمة كاعدة عالمرجوحة وضرار كاعد يمها وهو يسولف ويضحك وهي مدنكة وتبتسم ما اهتميت كان شكلهم عادي بس ضرار جان يباوعلها بحب واضح من عيونه وهذا الشي خلاني اتردد
ولازم انبه ريام حتى تنتبه على تصرفاتها وياه حتى ما يفهمها غلط

رحت يمهم

هيام : هلاو شلونك ضرار
انتبهت عليه انخبص وارتبك
ضرار: هلا بيج هيومة تعاي كعدي
كام من مكانه
هيام: لا لا تكوم من مكانك بس ردت اسأل ريمة على شغلة
ضرار: لا اخذو راحتكم اني اصلا عندي موعد عند الدكتور ولازم اطلع
يالله اشوفكم بعدين مع السلامة
كان يحجي ويباوع على ريام
كعدت عالمرجوحة وباوعت على عيون ريمة تباوع عليه وتبتسم
هيام: ريمة شنو بينج وبين ضرار
ريام : ماكو شي بيني وبين ضرار ليش تسألين
هيام : ريمة انتبهي اتوقع ضرار يحبج
ريام: اي صحيح يحبني حالي حال البقية كلهم يحبوني مثل بيبي وخالو وضاري وميس
شمعنا ضرار بالذات جاي تنبهيني منة
بالعكس اصلا اشوف ضرار اكثر واحد حباب وياي ويفهمني احس بي مثل صديقي
كلما اتضايق من موضوع اجي احجي الة اتعودت عليه
هيام: اني افتهمج بس اخاف هو ما راح ياخذها بهيج نظرة
ريام: لا عفية هيام لا تخربين الشي الوحيد الحلو بحياتي هو صداقة ضرار دتشوفين شلون بيبي محاربتني عالكلية والطلعة احس بيها خانكتني
بس ضرار الوحيد بيكم يحس بية ويفتهمني ودائما يحاول يغير علية الجو ويسعدني
تتذكرين من شافني ضايجة ذاك اليوم
شفتي شلون طلعنا كلنا وونسنا وما خلة شي ما اشتراه النة اني وياج وميس

سكتت ما عرفت شنو اجاوبها صعبة على ريام تفهم
ان ضرار يحبها حب الرجل للمراءة
هاي شلون راح افهمها وهي جاي تمر بفترة
وحرب نفسية من ورة كليتها
وتحتاج شخص تحجي وياه
فعلاً استغربت من طلعت للحديقة وشفتها تبتسم وية ضرار
اذن فعلا ضرار الة تأثير على حياة ريام بس وبعدين
(اللهم افعل بي ما انت اهله ولا تفعل بي انا اهله
فانك عالم الغيب وتعلم ما تخفيه الانفس )
سلمت امري وامر ريام بيد مدبر الامور رب العباد
دخلت جوة وسمعت حليمة تحجي بالنقال
خلصت المكالمة والتفتت عليه
جهزي روحج حجزتلج عند الدكتورة اليوم اخذج
ونشوف شنو علتج مو عبالج عبرت علية سالفة ضرغام ما يفكر بالاطفال
لا عيني هاي سوالفج قشمري بيهن الحجية
يالله خلينا نخلص الغدى وورة العصر نروح
هيام: بالاول اشوف ضرغام شيكول
حليمة: شوفي حبيبة الي اكولة انا يتنفذ وابني ضرغام ما يكلي لا وجوابه وياي كله. ( تم )
يالله روحي على شغلج كمليه

احس بكلبي كام يفور من وراها اخخ يا حليمة العلة
راح تموتني ناقصة عمر بسوالفهة ما اعرف منين تخترع المشاكل يعني هاي المرية ما يعدي عليها يوم اذا ما تنغص علية حياتي وكأنما همها الشاغل شلون تسود عيشة هيام
يمكن اول ما تكعد الصبح اتوقعها
تكعد تبحث بالكوكل (كيف تنكد على هيام في الصباح الباكر )
سمعت صوت نقالي رحت اشوف منو
اقتربت شفت حليمة ردت
حليمة: اي يمة صاير تتصل كلة على مريتك وناسي امك ما تعرف بية بيا حال
شتريد منها متصل
اي كول انا اكللها
هَـا جا كلي من الاول تريدها تحضرلك القاط
بعد شنو تلف وتدور اي خوش ما انسى اكللها
سدت النقال
والتفتت شافتني
حليمة: رجلج اتصل عليج وكال خلي تحضرلي قاطي
عندة طلعة رسمية يريد يستقبل الوفد والكادر الصيني

هيام : ان شاء الله ما كلج شوكت يجي عالغدة لو لا
حليمة : ما ادري ما كلي
تحجي وياي من ورة خشمها
صدك عجزت اعرف شلون اتعامل وية هاي المرية
لا طيب ينفع لا اللسان ينفع لا التغليس ينفع وياها جربت كل الطرق ردت اصادقها ما كو ما يفيد

صعدت فوك لغرفتي ودخلت للحمام قررت اشغل الغسالة الاتوماتيكية واغسل ملابس
ما دام خلصت شغلي جوة واسويلي كم فيكة بالغرفة
نزعت دشداشتي ولبست شورت كابو وتيشرت قصير
تبين منها البطن باوعت لشعري رافعتة بالقراصة فتحتة وسيتة ذيل حصان عالي
دخلت للحمام وحطيت الوجبة الاولى ملابس بياضات وشغلتها
وطلعت شغلت اغاني بالنقال
اباوع لجسمي بالمرايا جسمي صاير مرتب
كعدت عالكرسي احط ميك اب
جنت مندمجة ادن دن وية الغنية
كمت اتجهت للكنتور حتى احضر قاط لضرغام
فاتحة الكنتور واباوع
شهكت متفاجئة على ايدين ضرغام حوطتني من خصري
درت بين ايديه حتى اشوفه
ضرغام: هاي شنو ناصبتلي فخ
لو كاعدة منتظرتني تسويلي اغراءات
ابتسمت : لا جنت احضرلك ملابسك
ضرغام: ااااه يعني هاي وانتي تردين تحضرين ملابسي وهشكل لابسة جا اذا تردين تلبسيني شتسوين
عوجت حلكي بدلع: مو علمودك لابسة هشكل
جنت اريد اشوف جسمي اخاف سمنانة يعني اخذ قياسات
ضرغام بشيطنة: ليش تعبين نفسج ودايخة اذا علمود القياسات كليلي انا اخذهم الج
رفع ايديه بحركة
اشو انا اعرف قياس كل جزء بجسمج انتي بس كولي وانا اكوم بالواجب

هيام: بالله شو وخر خليني اكمل شغلي ادري بيك انت
ما تقدم خدمة مجانية لله
الا وبيها منفعة الك
دفعتة على كيف وانطيتة ظهري وطلعت القاط من الكنتور
سمعت صوتة وهو يصفر بتعجب
ضرغام بخباثة: حيييييل هاي شنو ولج بطة
ال....... كلش بارز خرب هاي شنو ونوب لابستلي شورت بنت الاوادم
درت مفزوعة : لا لا عفية كول والله صدك سمنانة
ضرغام: ما ادري بالله شو تعالي خلي اتأكد
جان يحجي وحابس الضحكة
عرفت عليه يريد يستدرجني
حطيت القاط عالسرير وسحبت المخدة وشمرتها عليه
: اياااا جذاب عرفتك ناصب علية
اقترب مني وهو خربان ضحك
حضني ووكعنا ثنينة عالسرير
وصار يدلعني ويراضيني واني امثل الزعل
والممانعة
وبعدها كدر ضرغام كالعادة ينتصر ويراضيني
و احمممممممم احمممم
((((((((()))))))))
طلعت من الحمام وشفتة جاهز ولابس قاطه وكاعد يمشط بشعره الرطب
هيام: هَـا حبيبي يعني راح تطلع من هسة ما راح تتغدة ويانة
ضرغام : لا ما راح الحك اتغدة وياكم عازم الجماعة عالغدة برة
ولازم اخذهم بعدين عالفندق
هيام: لعد لا تتاخر اليوم بالليل ما راح اتعشا انتظرك نتعشا سوية
ضرغام: ان شاء الله بطة نبقى على اتصال واكلج حضري روحج اذا ارجع من وكت
شفتة اتجه عالباب يريد يطلع
هيام: ضرغام لحظة اوكف
اليوم خالة حليمة تريد تاخذني للدكتورة
عقد حواجبه : ليش شبيج متأذية من شي مريضة؟؟
هيام: لا تريد تاخذني حتى اراجع علمود الحمل
رفع تك حاجب: خير يا طير ومنو شاكيلهم
خلينا نتونس وعودك الحك بعدين ابني ياخذج مني
ونعيش حرب الاعصاب
ابتسمت على كلامه : اني هم كلتلها كافي علية ضرغام
الطفل الكبير خلي يكبر بالاول وبعدين اسوي اطفال
شفتة رجع سد الباب واقترب مني بتوعد
ضرغام: هاي عليمن الطفل الكبير

ورجعت للخلف
هيام: لا لا مو عليك على مجرم الحرب
اقترب مني وسحبني عليه
ودك نقاله سمعتة كعد يلعن ويسب
ضرغام: احتركو نار ونفط
دار وجهة علية: بسيطة انا الج
مو عبالج انسى زلة السانج الا اعاقبج عليها
بختج بالنقال
طلع وهو يتوعد ويتحلف بية
جنت اضحك على ردت فعلة
يا ربي حتى وهو عصبي اموت عليه احبة بكل حالاتة
ضايج فرحان حزنان عصبي مريض نايم صاحي
اعشق كل صفاته
اووووف
سمعت اصوات البنات بغرفة ضاري فوك
سديت الباب
ودخلت للحمام اكمل غسل الملابس
((((((((((()))))))))))
طلعنا من الدكتورة اني وخالة حليمة
خلصنا الفحوصات والسونارات
والتحاليل وانطتني علاج طلع عندي خربطة بالهرمونات وتكيس بسبط بالمبيض
وكالت استمري عالعلاج ٦ اشهر وان شاء الله يصير خير
بس منين يجي الخير وحليمة طول طريق الرجعة اكلت كلبي بس تدردم
بالقران حصرتي البجية ولوما عيب من السايق حمزة جان طكيتها بجية بصياح
سمعت صوت نقالي دك
شفتة ضرغام
جاوبتة بصوت يرجف بي البجية: الو هلاو حبيبي
ضرغام : هلة بطة ما تكليلي وين صرتي اشو كلش اتأخرتو
هيام: راجعين بالطريق ما ظل شي ونوصل
ضرغام: شبي صوتج شنو جنتي تبجين
هيام: لا ما بية شي
ضرغام: يالله انتظرج ما اتعشيت
ابتسمت وغمضت عيوني: اوك حبيبي اني اجي واعشيك
سديت النقال وباوعت للساعة كانت الساعة ٨
حليمة: اي خبلي الولد بهذني سوالفج
عفتها تحجي لوحدها مجاوبتها لان احس راسي
يريد يطك من ورة النكة مالتها
وصلنا للبيت ودخلنا جوة
جان الكل متجمع بالصالة وشفت خالة هيفاء وابنها ايمن وبنتها جود موجودين سلمت عليهم
وكعدت يمهم جنت لابسة عباية خليجية وجواها بنطلون جينز وبدي
فتحت دنبوس الشال وضل الشال على راسي
لان حسيت بروحي اختنكت من الحر
الحجية خاجية: هَـا حليمة بشري
شكالت الدختورة على هيام ان شاء الله خير
حليمة : حجية منين يجي الخير وهي كلها امراض
ومخربطة
هيفاء : شلون يعني فهمينا
جان ضرغام والولد اخوانه ضرار وضاري وايمن يصير بعمر ضاري مرحلة رابعة بكلية الصيدلة
كاعدين على صفحة مندمجين بالسوالف
بس حليمة اتعمدت تحجي بصوت عالي حتى يسمعها ضرغام التفت باوع عليها وعقد حواجبه مستغرب
فعلها
حليمة: الدكتورة تكول فعلا عندها خربطة
وهاي الخربطة تأثر عالحمل
هيام: اي بس شغلة عادية انطتني علاج اخذة
وانظم وضعي بي
حليمة: اي هذا العلاج تستمرين عليه ٦ اشهر
وعودك لو يصير حمل لوما يصير
وانا راح امعد انتظر هاي الفترة كلها علمود حضرتج عاوية
هيفاء: حليمة عيب عليج تحجين وياها هشكل مو عندج بنات يعني متدرين كل البنات معرضات لهيج امور
لو تسوين روحج ما تفتهمين
حليمة : لا تسويها دراما ترة انا ما حجيت شي وهي مثل بنتي وعادي احجي عليها واعصب شكو بيها
حالها حال ميس من احجي عليها
سكتت ما كدرت احجي شي بس وجهي اتكدر
من ورة كلامها
ضرغام: اكول يمة رحمة على والديج سدي الموضوع
بعدني عريس واريد بطة تفرغ بس الي تكدرين تسميها انانية مني ما اريد احد يشاركني بيها
ولاحكين على هوسة الجهال وركضتهم
التفت علية
: بطة سويلي عشا ترة كلش جوعان
هيام بصوت ناصي: من عيوني ثواني اصعد ابدل ملابسي وانزل اسويلك عشا
رحت صعدت فوك فرحانة لان ضرغام وكف لجانبي
وسكت امه ولحتها
الله ياخذج حليمة هنة شهرين ماكو حمل كلبت دقلة واحتارت شتسوي
دخلت للغرفة نزلت الشال ولحكته العباية
ونزعت.التيشرت وفتحت سحاب الكابوي
دخل ضرغام وكف يباوع علية
ضرغام : ابقي مثل ما انتي لا تتحركين
انا جايج
غمضت عيوني وضحكت خرب هذا ابد ما يضيع اي فرصة يستغل جميع الظروف
واني هسة بوضع مو مال اشرد منة

اتقدم علية وعيونة اكلتني اكل
صار قريب علية وحوط خصري وهمس
: وامي حليمة تريد جهال
حتى ياخذون بطتي مني واظل مشتول
حضنتة ما عاش الي يبعدني عنك
وغبنا ثنينا باحلى لحظات
((())))؛؛))
لبست شالي وحجيت وية ضرغام من ورة باب الحمام
: ضرغام اني نازلة اسوي عشا
ضرغام: خوش مو تتأخرين انتظرج
نزلت واني جميع فكرة مزعجة انزاحت واتبخرت
بتصرفات ضرغام ما خلاني انزعج
نساني كلش يخص نكدية حليمة
نزلت وشفت الكل كاعد بالصالة
جانت ميس كاعدة
تكلب بالنقال باوعت ريمة ماكو لان اتعودت اينما تكون ميس توجد ريمة مثل التوم
دخلت للمطبخ اسوي عشا الي ولضرغام لان الظاهر الكل متعشي
طلعت الكبة من الثلاجة حتى اكليها وقطعت الطماطة والتهيت اسوي بالعشا
سمعت خطوات واحد يركض بالكراج
التفتت حتى اشوف منو
اتفاجئت بدخول ريمة ووجها اصفر مخطوف لونة
باوعتلي ووكفت بمكانها بصدمة

يتبع