طائر العنقاء الفصل الثاني والعشرون 22 - بقلم جنون كاتبة

قصة # طائر العنقاء
.......
علقو عل فقرات ولتنسون التصويت ⭐⭐
شاركو القصه حبايبي دزوها لأصدقائكم حته تكبر عائلتنه ولتنسون التصويت ⭐⭐
،،،،،
الكاتبة # هدى سامي
....

( أخشى السقوط مجددًا، لازلت أُعاني من كسورٍ لم تُجبر، وندوبٌ لم تُطمس معالمها بعد، أخشى الليل أن يكسر نافذتي، أن يستولي على شيء قد خبأته من وضح النهار، اخاف جداً أن أتعثر أن اجثو على ركبتاي عاجزاً، متوسلاً، وأن أُقبل يد الاستسلام، أخشى أن تنكس رايه صبري، أن تضحك شامتةً في وجهي الايام )

لميس : خايفه من هذا الهدوء حاسه الهدوء ماقبل العاصفه حياتي سلسه وسعيده بس ليش متملكني هذا الشعور
____
مقداد يعشقني مو بس يحبني عيالي زينين عمتي جاي تزن عليه علمود حمل كم مره كالت لمقداد روحو لدكتور اكشفو كالها مامستعجلين خل تخلص هاي السنه وتتخرج والله كريم قابل الخلفه راح طير
____
تسكت كم يوم وترجع تزن عليه وعدتها بس اخلص متحانات اروح اني وياها افحص اشوف ليش مجاي يصير حمل .....؟
____
جنت بالليل اطبخ الغده واشيله بالثلاجه لثاني يوم من اجي من الدوام بس اسخنه ونتغده ومرات عمتي دزنه لو نروح نتغده يمهم والعشه نواشف لو سفري مقداد يجيب ويا من يجي من المكتب خبز نشتري من الخبازه تنضيف البيت واغسل ملابس الضهر بعد الغده والقرايه بالليل ومن اخلص اروح انام بحضن مقداد حيلي مهدود ينقهر عليه يكلي

مقداد : فوك هذا التعب امي تريدج تحملين

لميس : حقها تريد شوف اطفالك حته اني اتمنه اصر أم

مقداد : لعد هو اني ماتمنه اصير أب بس اريدج تتخرجين الاول لان اني وعدت ابوج ها غفيتي يحضني ونام
___
مرت الايام الخوف الي بداخلي جاي يزيد بس احاول اجاهله السعاده والهدوء هذا ممتعوده عليه بالشنه
متحانات اخر السنه وبدء الضغط وحرق الدم
‏___
‏اول يوم امتحان توتر مو طبيعي دخلنه القاعه سلمونه ورق الاساله ايدي ترجف خوف وتوتر جان يدخل صهيب القاعه من شفته نفسيتي رتاحت والقلق خف هو مراقب بس اليوم مو يومه ماعرف حسيته علمودي اجه يباوع عليه اجه وكف يمي شويه وراح مثل الي يريد يطنمي حته ماخاف ورتبك فتر بالقاعه وطلع كل يوم عله هل حاله لحد ماخلصت متحانات
_____
بلشت قلق النتيجه مقداد جان يهدي بيه ويكلي لتخافين انشاء الله امتياز تبارك هم نفس حالتي نكعد اني واياها نضل ناكل برواحنه لحد يوم النتيجه اهلي جانو عدنه وعيالي كلهم مقداد ومهيمن جاي يحاولون يطلعون النتيجه عل نت عله صفحة الوزاره اني وتبارك لازمات ادين بعض متوترات الكل يهدئون بينه مره يضحكون علينه مره يكولون راح تعيدن السنه لحد الليل كتله المقداد

_لميس : لهسه ماطلعتوها ماصارت شهاده هاي .......؟

مقداد : ضغط عل موقع الوزاره

مهيمن : طلعناها من زمان بس منريد نكللجن لان راسبات
لميس : عيوني نملت دموع جذب

تبارك : بداعت امك احجي الصدك

مهيمن : جذب جذب اشاقه هههههه

لميس : خبيث وكفت كلبي رحت اكرص بي
مهيمن : بداعت مقداد كافي جنت اشاقه
لميس : حته بعد متعيدها بس ماطول حفتني بالغالي سماح هل مره الكل ضحك ههههه مقداد غمزلي

ماما : دتعاي اكعدي بس تفترين

لميس : ماكدر ماما

بابا : بنتي القلق مراح يغير شي تعاي اكعدي يمي

لميس : رحت كعدت يم بابا وره شويه صاح مقداد طلعت الكل وكف كتله دحجي عاد

مقداد : الف الف مبروك ياروحي ناجحه باامتياز
الكل صاح ياالله الف مبروك

لميس : راسا حضنت بابا وماما كالو الف مبروك كتلهم الله يباركم ركضت لخضن مقداد حضني الف مبروك يروحي كتله الله يبارك بيك

تبارك : واني شو نسيتوني

مقداد : ماعاش الي ينساج الف مبروك حبيبتي ناجحه بجيد جدا
الكل صاح الف مبروك

لميس : تحاضنه اني وتبارك الف مبروك كالت مبروك علينه عمتي كامت طش جكليت ماما كامت تهلهل خلص اليوم بالفرح والسعاده مثل الي قبله خلصت ترتيب البيت رحت سبحت لبست ثوب نوم وكفت كدام المرايه اسرح شعري صافنه بالهاجس الي داخلي والخوف الي منتابني اني وصافنه نحضنت جفلت

مقداد : اسف مجان قصدي اجفلج

لميس : شوكت اجيت مجنت منتبهه

مقداد : من زمان احجي وياج وانتي صافنه بيج شي خاف مريضه

لميس : لامبيه شي بس من توتر النتيجه
مقداد : الله مضيعلج تعب الحمد لله تعاي خل نحتفل ههههه

لميس : اخذني لجربايه وو***
____
ثاني يوم بدينه تجهيزات لحفلة التخرج اجرنه قاعه مشتركه لكل دفعتنه كل واحد يدفع مبلغ والكيك والعصير ومستلزمات الحفله هم كذالك مشترك من كل الدفعه قبل الحفله بيومين رحنه اني وتبارك شترينه فساتين وتاربونات واحذيه وجنط وكسسوارات رجعنه محملين ماخلينه شي ماشترينا بالليل مدده عل جربايه منتضره مقداد جان يتعلل ويه اخوته اخذت موبايلي من الميز فتحته دخلت عل مدونه كتبت

#تخرج 🎓
( ‏بسم الله الرحمن الرحيم
{ يَرْفَعِ اللَّهُ الَّذِينَ آمَنُوا مِنكُمْ وَالَّذِينَ أُوتُوا الْعِلْمَ دَرَجَاتٍ } صدق لله العظيم

#نحنُ لهآ و إن أَبت رُغمـاً عَنهآ أتينا بهآ ❤️

الحمدلله حتى يبلغ الحمد منتهاه
‏اما عن فرحة التخرج فلا اقتباس يصفها ولا كلام يعبر)

اجاني اول احزنني منه اكيد عرفتو من منو
_____

يوم الحفله اخذنه مقداد لصالون صبغنه شعرنه وبدكير ومنكير لااديدنه واضافرنه ماسكات وعنايه للبشره بعدين رحنه غيرنه ملابسنه لبسنه بدلاتنه ختاريناهن يتشابهن بس الون مختلف تبارك عجبتها بدلتي وختارت مثلها كالت حته نطلع كبلل بست فرند ههههه بدلتي لونها صحراوي وبدلت تبارك لونها بنفسجي غامق جانن البدلات قماشهن ستن وفوكا تول كلش حلوات مال محجبات رجعنه كعدنه عل كراسي لبستنه التاربون وعدلته وبدت المكياج خلصنه

تبارك : طلعنه نخبل عين الناس علينه بارده هههههه

لميس : حيل حلوات حيل عجبني المكياج ويه البدله والتاربون ....
دك موبايلي هذا مقداد رديت عليه هلو حبيبي تعال حته ناخذ صور رجع الرد ماشي جاي ..سديت الخط رحنه اني وتبارك نتضرنا بصالت الانتضار شويه واجه لابس قاط رصاصي طالع يجنن ماشاء الله تفاجئ من شافنه كال

مقداد : شنو هل جمال طالعات تشابهن تعالن لحضني

لميس : اخذنه بحضنه كل وحده من صفحه باس جبينه كال يله خل نتصور تاخرنه دخلنه بالستوديو اخذنه كم صوره

طلعنه صعدنه بالسياره الطريق كله مقداد مشغل مسجل ومعلي الصوت يطك اصبعتين ويهز هو وتبارك هههه وصلنه القاعه نزلنه دخلنه بالهلاهل من اهلي واهل مقداد عبالك عرس ثاني شكد حلو الاجواء تجنن ندمجت وياهم حسيت اكو عيون مراقبتني من اول مادخلت بس من كثرت الناس الي بالقاعه ماكدرت اشوف منووو كلما التفت الناس صير مقابيلي ..

زملائنه كلهم جانو موجودين همه واهلهم اجتي منضمة الحفله كالت يله تحضرو لدخوليه رحنه اني وتبارك وزملائنه وكفنه وره البوابه المغلقه القت منضمة الحفله كلمه بعدها نفتحت البوابه ويه موسيقى جنه واكفين سراوين البنات سره والشباب سره كل شويه يفوت للقاعه مره ولد مره بنيه مع موسيقى وتصفيق وتصفير وكلام منضمة الحفله لحد مايوصل لدكاتره الجامعه يسلم عليهم وينطو شهادت التخرج كل شويه يدخل زميل لو زميله لحد ما صل السره الي جنت لازمه ايد تبارك عاصرتها ميته خوف

تبارك : اخ مردتي ايدي

لميس : خايفه ..خايفه

تبارك :لتخافين كولي بسم الله ودخلي

لميس : صاحو اكثر من مره بااسمي جريت نفس كلت بسم الله ودخلت الاضواء والكامرات والانضار كلها صارت عليه باوعت مقداد يااشرلي تقدمي لتخافين...

مشيت باوعت ماما وبابا مفتخرين بيه ببتسامه مليانه حب...

مشيت مهيمن ولمى فرحانين ويصفكون

ياربي ليش هذا الاحساس داخلي ليش اكو خوف داخلي ليش حاسه اكو شي ناقصني سارحه بتفكيري وامشي لحد ماوصلت الدكاتره رفعت راسي اجتي عيني بعين صهيب هو جان من مجموعه من الدكاتره الي يقدمونه الشهاده ويباركولنه مادري بي موجود ولا اعرف هو من ضمن الدكاتره هسه عرفت منو جان مراقبتي من اول مادخلت سلمت عل دكتور وسط التصفيق والهلاهل سلمني شهادتي كالي مبروك كتله الله يبارك بيك مشيت سلمت عل بعده مشيت وصلت لصهيب سلمت عليه باوع بعيوني بنضرة فخر كالي مبروك يااحلى معلمه تفاجات كتله الله يبارك بيك رحت سلمت عل بعده خلصت توجهت عله ماما وبابا اخذوني بحضنهم وسط الدموع والتبريكات ااخذت شهادتي نطيتها البابا نزعت طاقيت التخرج لبستها الماما بوست اديهم حضنوني وباسوني توجهت لمقداد حضنته طبعا كل هذا كدام كل الموجودين حضني بقوه مبروك يروحي كتله الله يبارك بيك نزعت صدرية التخرج حطيتها عله اكتاف مقداد تفاجئ اخذت المايك حجيت
_____
_اشكرك يااروع زوج تحملتني صار سنه تحملت انشغالي وعصبيتي وقلت تواجدي وياك اشكرك ع مساندتك الي ياحبيبي ........

_ابتسم ورفع ايدي باسها كدام كل الموجودين كال اشكرج يااحلى نعمه بحياتي
___
عيني اجتي عله صهيب الي راح يموت عاقد وجهه بعصبيه وفاتح عيونه الكبار خازرني بيهن تجاهلته تابعت كلامي اشكر ماما وبابا الي مهما شكرتهم ماوفيهم حقهم ....
اشكر اختي واخويه عله دعمهم المعنوي ....واشكر صديقت عمري تبارك .....واشكر اهل زوجي ودعمهم الي وبختام كلامي ربي لايحرمني منكم وربي يديم المحبه والسعاده اشكر وجودكم نورتونه .........
خلصة الكلمه مالتي نطيت المايك لمنضمة الحفله توجهنه لمكاناتنه كعدنه
حته زملائي يكملون حفلتهم وفعلا الكل حتفل وجانت اجواء تجنن بين فرح واهلاهل واغاني ورقص خلصت الحفله وكل واحد راح لبيته رجعنه لبيتنه تعبانين سبحنه ونمنه

ثاني يوم رحنه لبيت عيالي عمتي تريد تاخذني افحص علمود الحمل تكول انتي مو كتيلي من اتخرج

مقداد : يمه انطي مجال للبنيه خل ترتاح كم يوم

لميس : عمتي عقجت وجها
كتله شوكت متحبين نروح

عمتي : باحر نروح

مقداد : ماكدر اوديجن باجر مشغول خلنها غير يوم

عمتي : مو مشكله نروح بتكسي

مقداد : ليش مستعجله يايمه اصبري افرغ نفسي واوديجن

عمتي : كلت باجر يعني باجر شبينه احنه منعرف نروح ناجر تكسي يودينه ويجيبنه

مقداد : .......

تبارك : ماما شمدريج العيب مو من ابنج يجوز هو الي ميخلف

لميس : تفاجانه بكلامها عمتي شالت النعال وضربتها كالتلها

_تفولين عله اخوج

تبارك : طفرت من النعال شبيج ياماما يعني اليحجي الحق بهذا البيت ينضرب اذا ماطلبته الدكتوره يسوي فحوصات حاله حال لميس عود تعاي عاتبيني بس انتو هيج المجتمعات الشرقيه دائما تحطون الصوج بالمرأه ماحسيت اله جايني نعال ثاني ركضت لغرفتي وعفتهم
___
لميس رجعنه البيتنه القلق باين علينه من كلام تبارك اني صافنه وهو صافن معقوله يطلع بينه واحد ميخلف

صار سنه مزوجين مصار حمل بس مجنه حاطين بالنه هاي السالفه جنه مرتاحين اريد اتخرج بالاول ولا رحنه فحصنه ولا وصلنه دكتور ضلينه طول الليل نفكر بالكوه غفينه

ثاني يوم اخذتني عمتي ورحنه دخلت يم الدكتوره كامت تسال بيه شكد صارلج مزوجه والشهريه منتضمه لو لا وفحصت قبل لو لا تسال واني اجاوب بعدين سوتلي سونار وجها نعقد لان اني من توتري اباوع بوجها اريدها طمني كالت سويلي تحاليل كتبت بالورقه اخذتها طلعنه رحت للمختبر سويت التحاليل المطلوبه انتضرنه التحاليل تقريبا نص ساعه صاحو عله اسمي رحت اخذت التحليل ورجعنه لدكتوره كالت تفضلن اكعدن كعدت عله كرسي وعمتي عله كرسي مقابيلي الخوف تملكني رجفه بكلبي اباوع بوجها اريدها بس تنطق طولت تقره وتكلب بالحاليل تباوع عليه وترجع تقره الخوف تملكني اكثر ملامحها حزينه كتلها اترجاج دكتوره احجي طمنيني جان تنزل دموعي

جرت نفس حزين كالت ....اسوء خبر سمعته بحياتي لو ميته جان اهون عليه ....

الدكتوره : اني اسفه بس انتي عقيمه متخلفين

لميس : وكفت اريد استوعب شنو دكتوره الله يخليج خاف متوهمه هزت راسها بااسف.....
عمتي ضربت ايد باايد كالت ياعيني عليك وعله حضك ياابني هاي الكلمه اخر شي سمعته وكعت مادري بالدنيا وين
_____

علقو عل فقرات ولتنسون التصويت ⭐⭐
شاركو القصه حبايبي دزوها لأصدقائكم حته تكبر عائلتنه

.......
الكاتبة هدى سامي
.......
ولتنسون التصويت ⭐⭐
اريد اشوف تعليقاتكم الحلوه وتفاعلكم ولتنسون التصويت ⭐⭐⭐
،،،،،