رواية تجبر أحفاد الــ دليم الفصل الثالث عشر 13 - بقلم اسـاور حسين 🦢✨

تَــجــبـر أحفاد الــ دلــيـم🦅
بقلمي : أساور حسين          
المُلْتَقَى _18_

بَس شلون لو حَنيّت
وبيّن على عيوني ؟
<><><><><><><><><><><><><><>
تَـــمــوز ...

رَهبـة .. بالسِـلاح
الدَمُ في نظامهُم مُباح ، جُـرمٌ يقبـض الأرواح
قوانينهُم تحبس الأنفـاس .

تَـــمــوز : حدد موقعك ؟

كــانـــون : 240 متر بين الفصيل وبين الهدف
مجموع الفصيل 32 فرد .

تَـــمــوز : احترسوا ، خليك حذر دقايق ونصير أمامك .

سديت الجهاز والتفتت ؏ مأمون : يول اريد بطل مي
ريگي يبس صار أربع أيام مزروعين هين خضرت .

مأمون: سيدي هو انتَ خليت ؏ حالنه مي صخام
تكرع وترجع ليوره جنك ما شارب مي بعمرك كلو .

تَـــمــوز : هوووو مي يا فگر قابل طالب منك دليمية
انتَ اذا تعزمني ؏ قوزي شتسوي تمووووت .

مأمون: هو أنـه صاير قوزي من وراكم
ادحك حالي ملبسني الأسلحة كلها وتصيح تعبان
منين تعبان من التحشيش والضحك .

تَـــمــوز : شگد صقيع احسدني ؏ ضحك احسدني
الازرك وين اكو واحد بهل وكت اسمو مأمون
اخر مأمون بالحياة توفة الله يرحمة بعام 218 هـ

مأمون : سيدي يوليو ركز بالطريق .

كــانـــون : نداء توجيه ، طوق المنطقة من اربع محاور
بانتظار تثبيت القناص أسرع ؟

أشرت بيدي للقناص توجهوا كل واحد
بيهم وموقعو المخصص ، تقدمت وبيدي
اسلاحي أنـه وباقي زلم المكافحة تحركت
بأسرع طريق بممرات تحت التأمين نمشي
بكل حذر ، تسللت وثبتت بمحل مكشوف مهدوم
أخذت الجهاز وناديت .
تَـــمــوز : نداء لـ 502 تسمعني ؟

ناديت اكثر من سبع مرات أيست
رجعت أنادي: نداء ألى رائد كــانـــون هل تسمعني ؟

كــانـــون : نعم أسمعك .

تَـــمــوز :502 لا يرد .

كــانـــون : بس جاهز للهجوم ، إستعدادا لمواجهة الارهاب
تقــــدم بحذر أسرع .

حنيت ظهري ونزلت اسلاحي وركضت
بكل سرعتي ، تقدمت مقابيل كــانـــون رفعت
إصبعين ؏ راسي واشرت بعلامة السلام
رد الحركة واشر ؏ عيونو أنتبه ؏ طريق .

تَـــمــوز : رائد كــانـــون ما تهجم شنو تنتظر
دخيل قميص يوزر سيف اهجممممم مصمهر تريد يطلعوووون .

كــانـــون : مأمون اخذ الجهاز من تَـــمــوز
هذا مشهور لا يحچي ويفضحني .

تَـــمــوز : أخرب المهمة ومحمد احترموا نفسكم .

كــانـــون :عجل سد اثمك وركز  .

تَـــمــوز : اهجممم .

كــانـــون : منتظرين إشارة من 502 .

الساعة صارت ساعتين السلاح ثكيل
ولا اكل ولا شرب والبرد يضرب بالعظم
رفعت راسي نزل قطعة حمرة من واجهة البيت
الكل عدل السلاح ، سحبوا أقسام .

كــانـــون : نداء للقناص اريد إبادة جماعية للحرس الخارجي.

_ عُلم الهدف بالمرصاد سيدي .

كــانـــون : آرمي .

واحد بعد الثاني اشتغلهم إبادة ، هجم كــانـــون ومجموعة من الابطال ، نزلت جسمي وركضت دخلت ؏ بيت هو مقابيلي
يفتح طريق وانه أحمي ظهرو ، بعدني اركض طلع واحد
يرمي من فوك ، وگع واحد من فصيلي ، سحبتو أنـه ومأمون
دخلناه ويانه : يولوو يابطل افتح عيونك خليك وأعي
ومركز ويانه ، شاهد انتصارات الزلم الزينة
أنتبه ويايَّ راح تعيش الضربة بيدك .

_ سيدي عوفني وكمل ومن ترجع ارجع اخذني لا تنسوني .

تَـــمــوز : شد حيلك يابطل خلصت معاناة هل مهمة
صار كم يوم مهدود حيلني وحيلك وتعبانين
بس ما ظل غير القليل ونرجع لبيوتنا منتصرين .

هز راسو متألم غلق عيونو ضغط مأمون
؏ ايدي وهمس : سيدي النبض ضعيف تحرك
بس نكمل ، الرائد كــانـــون يحتاج مساعدة .

توكأ ؏ حايط وطبطب ؏ رجلي : توكل سيدي
لا تخرب تعب الأيام انتوا گدها .

رفعت السلاح وهرولت صار ممر امامي بي غرفتين
اريد أمشي ادحك الغرف واحد من الضباط صاح : تَـــمــوز تحرك .

صعدت وياهم فوك ، تركت مجموعة جوة
والمجموعة الثانية على درج اول مانفتح الباب دخلناهم مداهمة
للشخصيات المستضيفين عند داعش ، معروفين
بمساعدتهم للتنظيم وخططهم القذرة ، الكل رافع السلاح بوجهم
كــانـــون دفع واحد منهم بالگاع وضغط ؏ راسو بحذائو .

كــانـــون : اليوم تنامون بضيافة الكابوس الأسود
يا اولاد جهاد النكاح يول صرتوا بيدي.

رفع راسو واحد منهم يتوسل
ونزل يبوس برجل كــانـــون : ابوس رجلك بس احجي وياك .

كــانـــون : اشششش ولا حرف .

_ بس احجي .

كــانـــون : اششش .

احتقن وجهو من رد كــانـــون البارد والتجاهل
بس ما أستسلم اصر ؏ طلب .

تَـــمــوز : هذا شبي ابن السطل .

كانون : يحاول يصير بشر .

تموز : لا حبيبي لا عزيزي ممنوع تنبح
اليوم نلعبهم مصلخخخخخخخ  .

مأمون: سيدي يلة نطلعهم واحد وره الثاني مثل الجرذان
قبل لا ينتهي الوقت بعد چثير شغل لازم نخلصو .

السلاح فوك راسهم يمشون زحف اخذوهم
ابطالنا للسيارات ، كملوا طريقهم بالطابق
فكيت باب اخر الممر عبارة عن بنوات من كل الأعمار
وجنسيات مختلفة: ابوس ايدكم ساعدونا احنا سبايا .

كانون : مأمون اخذهن بالسيارات بسرررعة
وأطلب دعم نحتاج سيارات اركض .

تَـــمــوز : اربعة منكم ينقلوهن والباقي نكمل
ماعدنا وگت استعجلوا .

صعدت الأخر طابق اشرت للقناص يركز ؏ شارع
نريد ننزل بلحظة جسمي نرفع ونرگع بالحايط
وأذني بعد ما أسمع بيها ، صارت روحـي بكانون
لان مطلع راسو من السياج اريد ارفع روحـي
جسمي ثگيل ، دقايق وصحت
_ ياااااااا ربي دخيلك .

كــانـــون مايتحرك والشباب ينظفون التراب منهم
تَـــمــوز : الشضايا لا تتأذون .

حجيتها وزحفت الكانون مسحت الدم من وجهو
كــانـــون : راسي يوجعني وغواش ؏ عيوني .

نزعت البدلة أخذت الفانيلة
لفيت راسو بيها أحاول اوقف الدم : كــانـــون
راسك ينزف ، ساعدني انزلك جوة .

كــانـــون : الشباب وينهم ؟

تَـــمــوز : ما أدري والله أنزل ويايَّ نشوفهم .

رفعتو من الگاع ، نهض بصعوبة
الشباب ويانه نزلوا قبلي ، البيت عبارة عن تراب
بين ما وصلت جوة الف فكرة صارت براسي
النص الدرج الدم جمد بعروگي ثبتت
بمكاني كــانـــون شمر روحو وگع مني
كانون : تَـــمــوز ول ادحك الأبطال دمهم فيض الگاع
راحوووواااا ماتوا يا ربي ليش ياربي دخيلك .

تراجعت من سمعت حركة قوية صارت
ودخول للمكان ، رفعت اسلاحي اني وكانون
وجهنا ؏ باب دخلوا أثنين ملثمين شمروا
الأسلحة وصاح : وياك أنـه وياك لا ترمي .

كــانـــون : صوتك مو غريب سمعت صوت عضيدي .

كشف عن وجهو وصاح بعلو صوتو
دركْان: الـسـفاح بذات نفسو يحميكم عمي محظوظين .

فتح كــانـــون ايدو ؏ وسعها
وصاح متلهف: أخوية عضيدي دركْان الــدربـاس .

حضن دركْان كــانـــون حضن اشتياق
لدقايق ، گعدت على بايات الدرج من نزلت دموع دركْان
وهمس بصوت تعبان : تعبت كــانـــون تعبوني .

كــانـــون : أرجع دركْان كافي الصار بيك
فقدنا چثير ارجع قبل لا تنكشف هذولي مثل النار ياكلون بشر
وما يشبعون ، ادحك ماتوا اربعة من شبابنا يول شلون ارجعهم لعوائلهم لا تفجعني بيك خوية اسمع مني وارجع .

دركْان: عودوني ؏ دم كل يوم ادحك هل مناظر المخيفة
مقابيلي ومجبور أثبت وما اخلي واحد بيهم يحس آني تأثرت.

تَـــمــوز : انتَ سبع أفعالك هاي ما تضيع امسح
دموعك الغالية الــدربـاس ماتنزل ادموعو .

حضني وأبتعد يتفحص المكان
انتبهت ؏ الملثم وياه اشرت وتكلمت : منو هذا ؟

دركْان: هذا العزيز ، ابن عم الجلاد .

تَـــمــوز : أخو ذَهــب يول الله عزيز
إسمحلي انتَ تدري أختك داهية .

كــانـــون : ذيبة اختك أخت ارجال تفديك بحياتها
وكل يوم يزيد اصرارها على رجعتكم .

أتقدم عزيز طبطب ؏ كتف كانون وهمس : انتَ كــانـــون ؟

كــانـــون : اي نعم .

عزيز : مثل ما وعدتني ذَهــب تظل أمانة يمك
الى ان إجتمع بيها وأخذها المكان بعيد عن العراق .

كــانـــون : بعيوني ذَهــب بعيوني .

عزيز : واثق بيك لان اخو دركْان والبطل اخو أكيد معدل .

كــانـــون : عد عيناك أخوية بالخدمة .

دركْان: طلعت شام للسيارة أخذوها تَـــمــوز انتَ
مسؤول عن سلامتها وبيدك تكمل إجراءات رجوعها لدولتهم.

تَـــمــوز : ليش وانتَ شنو ما نويت ترجع لبيتك
امك تريدك دركْان ، حتى ابوك هو آمر نرجعك .

أبتسم إبتسامة استهزاء
رافع راسو مايريد نشوف تأثير كلامنه: ابوية بعد عندو
عين يصدر أوامر ، دمرني هذا الزلمة دمرني والله .

كــانـــون : الله يرمم روحك ويساعد كلبك ويساعدني يا خوية .

تَـــمــوز : قبل لا اروح ما اخليها بنفسي
غير فوفو تبرأ من كــانـــون صار فترة
وگال أنـه ماعندي ولد بعد .

كــانـــون : القالب زلمة ، الهيئة ضابط
الحقيقة عجوز عرب تموت اذا تنام سالفة ابطنهه .

تَـــمــوز : الله اكبر عوفوني براحتي يا ناس
راسي يوجعني اذا ما احجي السالفة اموت تقبل أنـه اموت .

كــانـــون : اي اقبل ، وانتَ دركْان ترجع ويانه
المعلومات ألي نريدها موجودة كلشي صار معلوم
اريدك ترجع تساعدني غادي بالدوام .

دركْان: بعد عندي خطوة اذا تمت أرجع وياكم أنـه وعزيز .

تَـــمــوز : شكو بعد .

دركْان : احمل السلاح ، أسحب اقسام ، حدر ويايَّ .

بقيت كــانـــون كاعد ومشيت بحذر قريب ؏
عزيز ، دخلنا الممر بي غرفتين ، اشر دركْان
أكسر الباب ، دفرتو دخل عزيز رافع السلاح
داهمت المكان ماكو احد ، تفحصت الگاع بيها
اثار دم وجنطه مفتوحة وملابس مرمية ؏ ارض .

عزيز: هَــيـلانـة يولي هَــيـلانـة .

ألتفت موسع العينين مضطرب الحركات
شمر السلاح وضرب ؏ راسو : هَــيـلانـة وين اختي وينها .

دنج السفاح جوة السرير ماكو
فتح ميز صغير يدور بي : شكووو شصاير يا جماعة ؟

دركْان: هَــيـلانـة اخت عزيز ماكو
يول الله بس لا أنكشف موضوعها و ...

عزيز : ووو شنووو ووو يموتوهاااا والله يموتوهااا
مو جنت برة منين طلعت وين اختي وعدتها اساعدها
ول الله يعثرني شكد أنـه فاشل لا أنقذت ذهب ولا هَــيـلانـة .

نفضو دركْان بعصبية : يول صحصح كلنا نريد نواجه
ونحاول نخلص اكبر عدد من الأبرياء منهم ، بس همَّ
شياطين يتلافون الضربات شد حيلك وخلي ايدك بيدي
ما تخسر ومحمد ما تخسر نطلع بنوات العالم من ايدهم
ونرجع العراق بخير مثل قبل وبعد أحسن .

تهاوى وقع بالأرض يبچي بطريق
تبجي العدو بعلو صوتو صار ينتحب :أنـه ومحمد تعبت
عندي امل أخلص وحده من خواتي من شرهم وأوصل
رسالة الذهب ماتسمع منهم حتى لو ؏ حساب موتي
جنت متأمل وخابت آمالي ، ربي اختبارك صعب ربي
وانه ضعيف والله أنـه ضعيف ومو حمل هل ثقل ؏ ظهري .

دركْان: لا تهضمني عليك يولو شد حيلك
اذا مو هساع الهجمة القادمة يصيرون بقبضة العدالة .

صار رمي برة دخل كــانـــون : تحركوا عددنا قليل
شيلوا الجثث نرجعهم لأهاليهم .

عزيز : توكلوا بالله خوية أنـه راجع أدور آراضي اختي
وين صارت ، هل مجرمين اخاف يموتونها .

دركْان: افااااااااا تريد اعوفك بنص الطريق
يول الله تراك اخوي والعزيز مالتي ايدي بيدك
ورجلي ؏ رجلك ، اذا ما تطلع من هل مكان أنـه ما اطلع .

عزيز : العذاب الصار وياك والخطور إلي تعرضت إلها
بسببي كافي ، أنـه والله ما أريد اتعبك اكثر ، ارجع
أخوانك يريدونك وأهلك بحاجتك .

دركْان: وحق لوعة گلبي ما أتحرك من هين اذا مو
انتَ ويايَّ وبعد لا تكثر كلام .

نهض دركْان حضني وهمس بصوت
منهك من تعب الأيام والموقف : اخذ اخوي وأرجعوا أنـه
شغلي ماخلص هين ، راح أبقى وياكم ؏ تواصل .

كــانـــون : دركْان الوضع يوم عن يوم يزيد خطورة .

دركْان: ما متوقعها منك يا أخوي تريدني اترك
ناس تحتاجني وياها ، وبرأيك ارد وياكم مرتاح القهر
وتأنيب الضمير يبقن ياكلن بروحي .

كــانـــون : يحميكم الله خوية ، بحفظ الرحمن أستودعكم .

تقدمت ؏ كــانـــون استند عليَّ وطلعت أنـه
وعزيز ودركان ينقلون جثث أبطال الجهاز بالسيارات
بس كملوا نريد نحرك ونزلت بنية من سيارات
أبتسم دركْان وتقرب : وفيت بوعدي وياچ وكلمتي نفذتها
اخوتي راح يشتغلون ؏ موضوعچ الى ان ترجعين بسلام
لبلادچ .

حضنتو وشددت أيدها حول جسمو
جانت تشهگ وتحجي مخنوگه : بعمري ما راح أنساك
انتَ كنت الملاك الحامي بوسط هل عديمين الشفقة
الله ينصرك عليهم وترجع بالسلامة .

طبطب ؏ ظهرها وابتعد خجلان
من نظراتي ونظرات كــانـــون : شام أختي النقية انه خادم
ربي يحرسچ وأتمنى الچ بكل خطوة سلامة .

استعدت تمسح بدموعها ورجعت للسيارة ودركان دنج راسو
وتخصر وهو يتنفس براحه : شبلاك يولو فكيت حلگك
جنك ما شايف شگد سرسري دخيل ربك .

تَـــمــوز : لطمتني ؏ وجهي بكلمة خوية
ولكم انتوا صدگ ولد فراس معقولة ما تخش عگلي .

دركْان: بـ هاي أنـه وياك مانشبه أبوية بتصرفاتو ولا اطباع
واذا اشبهو اجتل نفسي ، بس يمكن ماخذين حنان امي .

تنهد وكمل وخاطرو متكدر : كــانـــون بوس راس امي
وايدها وبلغها اشتياقي أنـه روحـي تلوب ؏ امي .

كــانـــون : اريدك صلب ، متحكم بيهم وبمشاعرك
اريد يظل اسم السفاح يرن ويجول ويذكر بكل مكان وزمان
عشت قوي واذا متت موت رافع الراس شجاع مو خاضع .

دركْان: أنـه اخوك يا كــانـــون .

كــانـــون : تاج راس أخوك بأمانة الله يالـدربـاس .

اجه عزيز يركض صاح
بعلو صوتوا: توكلوا يا إبطال الطريق أمان .

تحركت السيارات واخر سيارة سيارتنا
قبل لا ينسد بابها هتف عزيز بنظرات
رجاء : الأمانة كــانـــون .

كــانـــون : مخيطة بروحي .

الطريق صار طويل والسيارات بطيئة
تفكيري بدركان شلون يرجع وياهم
واذا انكشف مايرحمون حالو
كل شوية عيوني تغفو وافز ؏ أنين
كــانـــون ، النزيف ما وگف لحظة
بين ما وصلت روحـي طلعت فكيت الباب
صار فراس مقابيلي من التعب والمناظر والموت
الأحمر الصار ويانه ردت اهجم علية وأخذوا
بالأحضان .

تَـــمــوز : صحصح كــانـــون ، يولووو صحصح ردت
اتهور واحضن ابوووك .

كــانـــون : عمك عادي اشبع منو أحضان .

تَـــمــوز : غير اطشر رأسي بطلقة ، تخيل أحضن فراس .

كــانـــون : يولووو انتَ أعمى ما تدحك حالي بالويل
تريد اتخيل تحضن أبوية ، يالمعثور حاليًا اتخيل روحـي
ميتتتتتتت من الوجعععع يالهتلي مووانزززل انزرزف .

تَـــمــوز : من الجوع تخيلت الدم كجب .

خزرني بعيونو تقدموا اثنين من الحماية دخلوا كــانـــون
فراس دحك من بعيد حال ابنو ولا اهتز دار وجهو وراح
يمشي بخطوات ثقيلة السيارة الشهداء أمرهم ينزلوهم محضرين توابيت عليها العلم العراق نزلوهم وأصدقائهم موجودين صوت البچي والنحيب هلكني دخلت جوة بعدني ما كاعد
دخل فراس : أمشي انتَ تسلم الشهداء .

تَـــمــوز : فراس تروح من وجهي لا ومحمد
أعيد الصار بالدواعش ويااااك وانت بكيفك قرر .

فراس : اخر مرة أنبهك تحترمني وبالأخص بالواجب
كل ضباطي موجودين إذا يسمعوك تقلل من احترامي
شنلون راح تكون رد فعلهم .

رفع حاجبو وأسترسل بالكلام : سكتت ماتعرف رد فعلهم
بس أنـه اعرف شنو رد فعلي ، أقدم بيك تقرير يوديك
وره الشمسسسس تعرف شنو وره الشمس .

تَـــمــوز : صعب أقدم الشهداء لعوائلهم
بلحظتها گلبي ما مات مثلك حتى ..

قاطعني وهو يرفعني من ملابسي
ضاغط ؏ اسنانو : انتَ تسلمهم يعني انتَ تسلمهم
اطلعععععع يلة اطلععععع .

جريت اسلاحي ضربت المير وسحبت أقسام
فراس: اي شوفني شتسوي تضربني مثلًا .

تَـــمــوز : لو أريد اضربك لو اموتك
من زمان اخطي هل خطوة وتحديدًا
من حرمتني من طفولتي وشبابي .

فراس : سويتك زلمة والناس تاخذلك تحية من تفوت
بس طلعت مووو كفووو واحد يرفعك ويخلي آلك مهابة .

تَـــمــوز : هيج مهابة ما اريدها وبالخصوص منككككك
يا فراسسسسسسس ، أنـه اسلمهم احسن ما اكعدي بسدك
وادحك وجهك .

فراس : اطلع برة لا بارك الله بيك
والله لو ما امك بعيوني .

رجعت عليَّ وانه منتهي من التهب : شنوووو تسوي
تعذبني ، انتَ معذبني ، تقهرني ، كل يوم الصبح
تگعد من نومك وما تموت يااا فراس أنـه انقهر واتعذب
تستغلني ، انتَ استغليتني واخذت كل ما املك
شنو تسووي بعد تموووتنييييي موتني وخلصني
انتَ همات تمنن علية بحياتي التعبانة وياكممممم.

أندفع الباب دخل دوهان مستعجل
يوزع نظراتو بيني وبين فراس
دوهان : خيركم أصواتكم طالعة بنص الدوام ؟

فراس : شعندك هين ؟

دوهان : سمعت بالشباب رجعوا واجيت اسلم .

دفعتوا وطلعت من الغرفة
رمض دوهان صار قريب مني : الحمدلله ؏ سلامتك ابن العم .

تَـــمــوز : الله يسلمك شلونك .

دوهان: عايش .

تَـــمــوز : وقسم شلونها ؟

دوهان : زينة ، اليوم راجع للبيت .

تَـــمــوز : بس اسلم الشهداء ارجع اخذ كــانـــون .

دوهان: گلبي نمرد مرد عليهم ، كــانـــون منهار
؏ شهداء كلهم جماعتكم .

تَـــمــوز : راسي يريد ينفجر بس من القهر
بعدهم شباب كلشي ما شافوا من حياتهم
شنو ذنبهم ينهدر دمهم .

دوهان : وَلا تَحْسَبَنَّ الَّذِينَ قُتِلُوا فِي سَبِيلِ اللَّهِ أَمْوَاتًا بَلْ أَحْيَاءٌ عِنْدَ رَبِّهِمْ يُرْزَقُونَ ، صدق الله العظيم .

هزيت راسي هلكت، مشيت مشيت متعوب
وصلت للسيارة روحـي طلعت من جسمي
صعدت افكر شلون ارتب الكلام ، الولد
بصفي يحجي وياي أنـه فقدت رحت
الغير عالم ، ؏ إسماء وعناوين الشباب
وصلت أنـه ويايَّ مجموعة آول ما نزلت
الصراخ رج المنطقة رج ، التفتت اريد
اعرف هذا الصوت منين ، اجت عيوني
؏ بنية صغيرة شايلة علاج بيدها وراجعه
للبيت صاحت : هذا اخوي الملفوف بعلممممممم .

لطمت ؏ وجهه وركضت للباب تضرب
بكل قوتها وتصرخ : وينكممم يولووووووو
يمممممه ابنج رجع اخوية رجع سابح بدمووووو .

جنت أتمنى أتحمل الموقف واصمد مقابيل
كسرتهم ، بس رجلي ما شالتني من الهبطة
نزلوا الولد أنـه وكل واحد عسكري لابس
البدلة أخذنا تحية مقابيل التابوت .

نزلوا جماعتو المقربين بالدوام
واحنا صعدنا للسيارة نكمل
توجهنا البيت ثاني جانت المنطقة هادئة
_ سيدي انزل هيانو بيتهم .

نزلت بخطوات متردد خايف
بوقتها خفت والكلمات ما ترتبت بعقلي
بس جبرت نفسي ادك الباب طلعت
امو أعرفها ابتسمت بخوف : هلا ابني تَـــمــوز نورت
بيتنا والمنطقة ، بس لا دور ؏ ابني تره بالواجب
طلع وياكم مووو ؟

نزلت دموعي هزت راسها أخذت
أيدها وبستها ، سحبتها شوية وهمست
وصوتي إنهار: رجع ابنج ، هلهلي يمه رجع شهيد
ملفوف بعلم بلدو ، ابنج راح فداء للوطن .

صرخت صرخة زرفت گلبي بيها
عافت ايدي وضربت التابوت
صاحت بعلو صوتها : نزلوووووا ابنييييي اريد ابوسووو
نزلوووااا اريد اشم عطروووو يولووووو مو خابرتني
وگلت يمه تعبان بس اجي انام بحضنج وينكككك
رجعت عيونك نايمة رجعت عيونك مسدودة
بعد ما ادحك عيونك الحلوات ولككككك يممممهههه
حاجيني يمممهههه اطفالك يريدوك يمهههههههه .

گعدت مقابيلها اگضب بيدها بقت أدك وتلطم
؏ وجهه الى ان طلعت مرتو وجهالو أنـه هين
انتهيت وضاق النفس بصدري ، ركضت اريد
ابتعد بعد ما اتحمل گلبي راح يوكف ، تخيلتها
امي وتبچي علية ، وكفت سيارة وصعدت بيها
ما تحملت اكمل باقي الشهداء ، ما اعرف شلون
وصلت للبيت ولا اتذكر دخلتي بس لمحت امي
صعدت الدرج سريع وهي تصيح تريدني اوكف
بس استصعبها انهار مقابيل البيت كلوو .

بس دخلت الغرفة ودخلت سحبتها من ايدها
وگعت بحضنها ، صرخت وبصدري أشتعلت
ناررر : ماتوا وسلمتهم بيدي يمممهههه
صدري اختنكت والله اختنكت .

خلت ايدها ؏ صدري بقت تقرأ قران
شوية وسحبتني بكل هدوء من ايدي ؏
سرير گعدت وانه نمت ؏ رجلها
سكتت ياريت اگعدر ابچي ياريت
بس تعودت الدموعي تجمد ماتنزل .

ما اعرف شگد مر وگت ، نمت والنومة طويلة
بقيت الثاني يوم بليل فزيت ؏ صوت تلفوني
بجيب بنطلوني ، فتحت خط وهمست بصون ناعس : نعم .

_ بلغ ابن عمك الموت الاحمر قريب منو .

<><><><><><><><><><>
هَــيـلانـة ...

تَفاصيل وَجهُكِ ، رِصاصةٍ الفَوز فَي حرب سرمّدية.

ظلام دامس ، أصوات بعيدة
حركات مستمرة ، محاولات فاشلة
صرخت وبعلو صوتي فاقدة الصبر: أنـه وين ساعدوني .

بقيت أتحرك بس اريد إرفع الغطاء عن عيوني
اريد ادحك المكان مو راح افقد عقلي
وين اني وين ودوني اخوية وين وشنو الصار
الاسئلة كثرت براسي ، تعبت بقيت بمكاني
دموعي تنزل ما اعرف شكثر مر وگت
سمعت صوت قفل الباب ينفتح : بعدچ تتنفسين وصوتج طالع .

فتح عيوني بعدني ما مستوعبه
حذفني بنهاية الغرفة ، ذبيت لحم بطني
من ريحة المكان الكريهة تلمست الگاع
أريد اوكف بس الگاع تزحلق
رجفت من رفعت أيدي وشفتها تقطر دم
ركزت اكثر بالغرفة بيها أدوات جلد وتعذيب
شهكت خايفة دحك علية وعطت مرعوبة : جلاد حرام عليك
راح اموووت روحـي طلعت عوفني الله يخليك .

رفعني من شعري وضربتي بوكس
عيوني طفت : يولو اعترفي منو انطاج المخدر
ويامن تتعاملين هااا منوووو غسل عقلج .

هَــيـلانـة: بلغتك أنـه عندي النوم مـ .

رجع يضربني بصورة وحشية
رفعت ايدي اريد أتصدى ضرباتو
بس ما اعرف أحمي جسمي لو
وجهي من الوجع : وهسسسسسساااع تحجين لو اكمل عليج .

ذبيت دم من شفايفي بقيت اناشغ
واستنجد: موتني خلصت طاقتي بعد موتني .

قبض ايدو اثنينهن ورفعن ليفوك
ونزلهن بكل قوتو ؏ راسي ؏ جسمي
يصعدهن وينزلهن متجاهل صرخاتي
وتوسلاتي ، رفع شعري وشمرني ؏
حايط سحب سوط وصاح : يول أنـه جلاد ما ينلعب
ويايَّ ، يوليييي ضباط عليهم العتب يفترون يريدون
يقبضون علية وانه فارهم فر تجين انتِ تلعبين وتتفقين
وتسلمين قادة كبار بالتنظيم للمكافحة والصدفة القوية
تسلميهم الفراس والكانون .

هَــيـلانـة: ما اعرفهم منو هذولي والله ماعندي معرفة بيهم .

رفع السوط وضربني ضربة ؏ ضربة بدون
توقف ، صرخت الى ان تگطعت حبالي الصوتي
وفقدت الوعي من كمية الوجع والأذية .

ما اعرف شكثر وگت مر بس وعيت ارفس
مخنوگه اريد اجر النفس المي بارد ثلج
يدخل الخشمي وراسي ينضرب
ضربات تسطر سطر بقطع الثلج
عطت رفست بس اريد أتحكم
بتحركاتي حاولت إرفع ايدي
ردت امسح وجهي بس اخلص
من المي البارد بس مقيدة بحبال
بقيت أون بمكاني الى ان رجعت
أفقد بس رفض الجلاد قرار عقلي
وانتفض لزمني من شعري بإثنين
اديناتو ورفعني من الأرض لمستواه
جلاد: افتحي عيونج دحكي علية .

فكيت طرف عيوني أعصابي تشنجت
شايل سرنجة مال إبره بيدو وعلى وجهه
ابتسامة جانبية حقيرة مليانة خبث : هاي تسبب موتج
اذا تاخذينها أقضي عليج وتكونين انتِ اول وحدة
تم إقصائها من عائلة عمي ابو ذهوب .

أهتز جسمي مرعوبة غصب عني تنزل دموعي
شكثر أحاول أبين أنـه قوية وما يهمني تهديدو
بس أضعف والخوف يتمكن مني ، اصير حالي
حال طفل خاف من يسمع صوت ابو عالي بالبيت
الرعب يتغلغل بقلبي يعلن انهزامو ، بس بكل هذهِ
المتاهة أعرف شي واحد بس اسم عزيز يبقى بعيد
وما ينذكر حتى لو ؏ حساب حياتي عزيز ذهب
أسمو بالحفظ والصون : أنـه بنت عمك يا گبحي
خدمتك ايام وأشهر جنت وحيد منبوذ وانه وامي تخدمك
هاي جزاتها ، تخليني بهل موقف الهزيل الضعيف
اطلع قوتك ؏ أمرآة أنـه لا حول ولا قوة بس .

فر وجهي براشدي ركع راسي بالأرض: لا تكثرين حجي
يا اخت العاهرة يول أنـه المفروض ما انصدم من الخيانة
لا منج ولا من اخوج لأن اختكم ذَهــب اخخخخخخخخخ ذَهــب

نام فوك جسمي يضرب بوكسات بهسترية
فاقد وكأن ذهب مقابيلو هجم هجمة الثور
- اذا تصير بيدي اشررررب من دمهاااااااااااااااااا
هيج الزمهاااااا واشرب دمهاااااااااا هل عااااااهرررررة
غددددرتني وراحت تتفق هي والضباط خلوها لعبة بيدهم
كل يوم تدخل بيت جديد وية واحد منهمممممممممممم
يعجبها التنوع ام الزلم بسسسسس أحساب ذَهــب ثگل عندي
اذا ما اخليها مخبلة تمشي وتحجي اذا ما اندمج ياااااااا ذهب .

على صوتي وصوتو دخل الشبح سحبو مني
لزم ايدو ودفعو ليوره ؏ حايط : تخبلتتتتت راح تموت بيدك
جلاد اطلعععععع برة .

جلاد: خليني أروي غليلي منها اريددددد ارجععع
اربيهن هل حيووووانات يغدرني خانن ابن عمهن
المفروض يسندوني الغريب احسن منهمممم هل
عائلة لو يموتون ولا هل عذاب بسببهم .

الشبح: هذا مو أستجواب هي إنتهت هساع شلون تعرف
منو وره هل لعبة ومنو متفق وياها ، أكو جاسوس
بيناتنا ولعب لعبتو وإستخدم بنت عمك وسيلة
حتى يوصل الغايتو ، ادحك حالنه خسرنه
الحرس، والبيت ، والأسلحة ، والقادة بيدهم
وراح تنذكر إسماء مهمة بالتنظيم ، تخليت
عن هل مصايب وكاعد تضرب شنو تستفيد .

جلاد: ربع ساعة بس ربع ساعة
اذا ماتعترف عليهممممممم وتذكر
إسماء أنهي عليها واگطع مصارين بطنها .

الشبح: لا تتهور وأطلع نتفاهم لا تغلط وتتندم بعدين .

هجست بخطواتهم تبتعد عني ، انيت بوجع تكورت
كالطفل ، ياريت اكو مكان اضم بي روحـي منهم
احتاج معجزة حتى اخلص من تعنيفهم المستباح
وهدر الدم المتاح ، جسمي ينهز بكثر الألم والبرد
صعب أدرك كم فات من الوقت بس بعدني ألتقط
انفاسي المرهقة رجع دخل جلاد رفعني من حنكي
ضرب ظهري بالحايط : أخر محاولة تعترفين لو
تروحين بقائمة عداد الموتى .

عيوني ثكلت الجفن منفوخ استصعبت
افتح عيوني بس شهكت بجيت ؏ حالتي
وعلى ضعفي وقلة حيلتي ، زاد غضبو
ما نقص ضغط ؏ عظام فكي وعاط : اختاريتي موتچ
يا هَــيـلانـة افتحي حلكج اليوم ابجي عليج ملائكة السماء.

قاومت ايدو بس من الضرب ضعفت
واستسلمت ضخ الإبرة بداخل حلگي
الطعم مر يشبه طعم طلع الروح
خرجت روحـي بلحظتها من حرارتو
وكأن نزل تيزاب ؏ امعائي : حاولت اساعدج من عذابي
وحذرتج وتعرفيني أنـه الجلاد أوعد واوفي ، انتِ انتهيتي
تبقى اختچ ذَهــب انتظريها باب جهنممممممم .

<><><><><><><><><><>
قُــسـم ...

الطَعنة التوجِعك مو مِن بَشر مكروه
مِن ذاكَ العزيز الروحَك تريده .

قُــسـم : يمه أعتقد وعلى ما أظن البنية من تتزوج
وتصير وياها مشاكل ، ويشكون اهل زوجها منها
الام تصير بصف بنتها صح لو أني غلطانة ؟

تغسل بالتمن بكل هدوء تدحك علية بطرف عيونها
تجاهل كلامي مثل كل مرة: اي عفية أبقي هيج
ومن ادافع ؏ نفسي من كلامهم ما ترضون
والكلمة والثانية تلقبوني ام السان البرنو .

صوت التششش مال الطبخ رجعني ليوره
ضربت السجين بالكاونتر من جوابها البارد .

_ زلمتچ لقبچ ام السان البرنو أنـه ياهو مالتي .

قُــسـم : هذا هرقل ابو الشوارع علاجو عندي بس يرجع .

ام دوهان: سدي اثمج لا اجي اسدو بطريقتي
وبعد خليني اسمعچ تجاوزين ؏ ابني وتلقبي
هرقل اذا ما اخلي الكلمة بأذن دوهان وهو
يعرف وانتِ تعرفين شلون يتصرف وياج يا ..

ام قُــسـم: لا تجاوزين عيني لا تجاوزين اطلعي من الموضوع .

قُــسـم : صلوات طلع صوت امي اهلهل بهل ظهرية
وبعدين انتَ عليش تدخلين وشنو من تهدديني أخاف
لحظة بس لحظة وينو تلفون امي .

رفعت دشداشتي ومشيت مستعجلة الغرفة امي
اخذت التلفون ورجعت للمطبخ وعليت الصوت
يسمعن الرنين ثواني ورد بصوتو الخشن : هـــاا .

قُــسـم : اسمع عود امك من تجي راح تگعد وياك تسمم
عقلك من هساع اكيد راح تضيف بهارات بعد معروفة
امك بالعائلة سيدة البهارات ، انه ما حجيت شي بس
لقبتك هرقل وحدة بوحدة انتَ مو تلقبني برنو .

ماسمعت صوتو بس صوت غلق المكالمة
بقت وحدة تدحك بوجهه الثانية ضحكت
عمتي وهمست : اي كون يرجع ينعنع اعظام راسچ .

كملت  وراحت الغرفة بيبي امي رفعت
ايدها وغمتني : من كون جيره وخفت الهل وجهه
ينلام من يگول برنو هو مو زين منو متحمل
أنـه امچ ادوخ منج راسي يصدع .

شمرت التلفون حيل ؏ ميز
تغيرت نبرة صوتي همست: هساع هو عليش غلق المكالمة
بدون ماينطق ولا حرف عود شنو قصدو.

سدت قبق الجدر ودارت تغسل بيدها: أدعي ما يعوف الواجب
ويجي يسوي بيج فلم ويضحك الشماته عليج وعلى امچ .

قُــسـم : هو أنـه ما أخاف منو بس راح اصعد أرتب الغرفة
تحسبًا اذا رجع هرقل عصبي ينتبه ؏ غرفتو نظيفة شوية .

ام قُــسـم : روحـي بلكي يرأف بحالچ .

قُــسـم : ياااااااااا خيولي هل متغطرس .

صعدت مثل السهم وطلقوا لملمت الغرفة
البرق ما يلحگني ، نزلت من سمعت صوت سياراتهم
عرفت رجعوا ، أنوب يستفرد بيَّ بالغرفة ما بلحيف
اصير طعم سهل ذليل الهرقل المتكبر .

دخلت للمطبخ وطلعت المواعين اساعد امي
دخل ابوية عاقد الحاجب ، متصلب الملامح
ما يدحك بوجهي سلم ؏ امي بعدو ماخذ موقف
لان حجيت حقيقية مشاعري اعتبروها اهانة
بس من توصل الاهانة والتجبر عند بنتهم
ما يفكرون تصرفاتهم تسبب إساءة ألي.

شوية وفات تُــمــيم ودوهان يسولفون
وياهم عمي فراس : لو مقتنع وداخل ويانه للبيت
هساع عمتي بس تسمع بكانون مجروح تتخبل .

لطمت ؏ وجهي وعطت : شنوووو شبي كــانـــون
تُــمــيم وينو كــانـــون وينو بي شي هو عايش .

طلعت عمتي ام كــانـــون تركض من الغرفة
تلطم ؏ راسهه : وتعوفووو هيج يروح شنو
هذا گلبك حجررررر مايحسسسس ، ابنك يا زلمة ابنك
عليش تعامل ولدي معاملة عبالك همَّ دخلوا داعش ؏ عراق.

طلعت بدون ماتسمع جوابو تركض
وعماتي يلبسنها العباية ، جريت عباتي
وياها اريد اطلع ، أنسحبت من أيدي
كفخني ؏ رأسي بخفه وصاح : اوكفي يلمصرع اوكفي
بس البس الحذاء أنـه اطلعچ .

رحت للباب فتحتوا وصحت : يولوو استعجل مزوجيني سلحفاة .

وصل يمي خفت منو طلعت للشارع
صدمني ساكت ما رد فكيت باب بيت كــانـــون
ودخلت ، بقيت جامدة بمكاني نزلت دموعي
من دحكت عمتي ام كــانـــون بالارض
تلطم وكانون نازل لمستواهه يهدي بيهه : لا تعبيني
والله كلشي مابيَّ صرت زين وعيونچ .

رفع وجهه بيدو وهمس
بصوت يادوب ينسمع : الـدرباس يسلم عليچ وصاني
ابوس ايدج .

ظميت وجهي بيدي كتمت صوت شهگاتي
بذكر اسمو ، گلبي حسيتو راح يطلع من مكانه
ام كــانـــون : زين هو زين عليش ما رجع وياك
أهون عليكم تموتوني من القهر والخوف عليكم
بشرني جرح گلبو ما طاب .

كــانـــون : ما طاب يمه ما طاب .

رفع راسو تركزت نظراتو بيني وبين
دوهان كمل بسرعة مغير الموضوع : راد يرجع ويايَّ بس
عندو مهمة أخيرة يكملها ويرجع أدعي يمه
ادعي دركْان يرجع من غابة الوحوش بسلام .

ام كــانـــون: ماعندي غيركم وأدعي آلو
تحملت الخاطركم وجرعت المر في سبيل
احافظ عليك وعلى أخوك .

بلعت الغصة ودفنتها بداخل صدري
تحمحمت وهمست خجلانة: الحمدلله ؏ سلامتك
كــانـــون خوفتني عليك ، اول ما سمعت اجيت ركض .

؏ الصوت العالي نزلت ذَهــب واضح ؏ ملامحها
الصدمة ، مبين ماتدري بكانون راجع ، ولا تعرف
مجروح ، خافت من رد فعل عمتي تراجعت ودخلت
للمطبخ تعديتهم ودخلت: ذَهــب شلونج .

رجعت خصلات شعرها وردت
بصوت هادئ عذب : شصاير بكانون ؟

قُــسـم: اثناء المواجهات بينو وبين التنظيم
صار جرح براسو ، انتِ بيج شي وجهج لونو مخطوف .

نفت كلامي بهز راسها : زينة اني بس منظر كــانـــون خوفني .

قُــسـم : حقج ، ذَهــب آني أسفة الأيام الفاتت ما اجيت
اطمئن عليج واعرف شنو محتاجه حاولت بس كلها رفضت
اجي عندچ تعرفين اسمج حاليًا يكهرب بيت جدي كلو .

ذَهــب: عندي علم بوضعج وياهم وادري حالج وياهم
مو احسن من حالي هاي وانتِ بنتهم فما بالچ وية الغريبة.

قُــسـم : تعودت ؏ وجودج بالبيت فرحت من اجت بنية
بعمري تفتهم افكاري كلامي ، ويا فرحة ماتمت .

تُــمــيم : قُــسـم وينج .

ذَهــب: روحـي ركض لاتكثرين كلام ويايَّ
ديري بالج من الداعشيه.

حكيت وجهي بخجل وانسحبت
من المطبخ گعدت وياهم بالاستقبال
ابتسم كــانـــون بوجهي وهمس : شلونج .

قُــسـم : زينة ، وانت ؟

كــانـــون : برأيج شلوني ؟

قُــسـم : صاير هبيط هههههههه .

ضحك بصوت وبانت أسنانو
صدت عيوني بعيون دوهان
لزم ركبتو وطگها بقوة بحيث
الصوت وصل يمي وهو مقابيلي
من يمي توجعت .

دوهان: يلة عمة كــانـــون تعبان نرجع للبيت
ومن يگعد هو يجي للبيت يسلم عليچ .

ام كــانـــون : تغديت يمه ؟

كــانـــون : توني دخلت للبيت يمه هساع اكل وانام لا تخافين .

ام كــانـــون : هل ارهابية لا تسممك ، يمه اخاف تموتك
حدر وياي وقفل الباب حتى لا تشرد ، ومحمد گلبي نار عليك .

أرتعد كــانـــون وكف ؏ طولو يدحك
؏ باب الفاصل بين الاستقبال والمطبخ : بطلوا تكسرون
خواطر دخيل ربج ول ومحمد مليت من تصرفاتكم
عيب خزي البنية بالمطبخ لا تحجون بهل طريقة احترموني .

ام كــانـــون : يولوووو من خوفي عليك احجي
يول يا كــانـــون اذا تسوي بيك شي هل داعشية
أنـه شسوي وشنو موقفي ما فكرت بيَّ .

فاتت ذَهــب بنص الاستقبال وكفت بكل
عزة نفس : يعني مع كل إحترامي الج والابو كــانـــون
اني وياكم اعذركم انتوا خايفين ؏ ابنكم واي اب وام
مكانكم يسون مثلكم واحتمال واكثر ، بس ماكو داعي تخافون
؏ شخص مثل كــانـــون تره مو صغير ضابط يحلفون بأسمو
ابنچ صاحب ذكاء ، وحكمة ، ودهاء هل من المعقول اني
بهذا جسم الهزيل وقوتي ألي ما تعادل ربع قوتو
اقتل شخص او اضحك ؏ إنسان مثل كــانـــون
انتِ تعقلين الموضوع !!!

ام كــانـــون : ما أستبعد تتفقين انتِ وهذولي
المجرمين يدخلون للبيت وتموتون ابني هو نايم .

ذَهــب: ديلة بالله ومحمد تراكم فاهمين الموضوع
بالمقلوب تره أنـه هذولي جماعتي المجرمين
كابوس بحياتي وخاطفين اختي واخوية عدهم
يهددوني بيهممم انتِ تسولفين بدون ما تفهمين الموضوع
يعني اتفق وياهم هذولي اخابر من الريموت ، انتِ تعرفين
حياتي بخطر حتى تحكمين عليَّ .

زادتها عمتي ودارت تلطم ؏ كــانـــون : يول يمههههه
أهلها كلهم عند داعش يعني تبيعك وتبيع عشرة منك علمودهم.

كــانـــون : دوووووهاااااااااان تُــمــيم اخذوووووووووهااااااا
طلعوووووا امي لا تخبلوني ما بيَّ اشيل راسي تعباااان
اريد اناممممممم .

ام كــانـــون : ما اطلع اسمعني موتك ؏ ايدها يا هتر .

إقترب باس راس امو وأكد ؏ كل
حرف نطقو : اختصرها الج يمه ؟

ام كــانـــون : ريحني يمههه گلبي اشتعل نار .

كـانــون:اريد اموت ؏ أيد ذهب ، أنـه ما أريد منها بس أريدها.

بهتت عمتي ونخطف لونها ، اخذتها من ايدها
وطلعنا من البيت ، طبك كــانـــون الباب
مشيت بعمتي تمشي ومصدومة وتكرر كلمة
(ابني يريد موتو ، ابني اختار يموت )

دخلتها للبيت فاتت الغرفتها نسمعها تلطم وتبچي
عمي فراس فات من المضيف عليها .

ام دوهان: شبلاها رجعت تحاجي نفسها
شنو هل ذهب خبلتهم كلهمممم عمي گويات .

رفعت حاجبي وتعديتها اريد اشرب
مي دحكت دوهان خازرني وشرايين
رگبتو بارزة مخيفة ، اريد اشر الو بعيوني
شبلاك بس خفت حتى المي عفتو ركضت الغرفة
امي وابوية فكيت الباب بدون احممم لكيتهم
منومين تُــمــيم ؏ سوير ويسولفون وياه

قُــسـم : اي أنـه بنت البطة السودة منبوذة منكم .

صدمني أبوية برد فعلو عاط بعلو صوتو : امشي اطلعي
يولوووو يالمصگوعه لا اور جسمج ور وحق محمد.

قُــسـم : يابه شبلاك ويايَّ يعني أنـه طولت لساني
؏ زوجي وعادي تصالحنا ويمزح ويايَّ و....

شلطت اعصابو گام من مكانو بلحظة فر وجهي فر
رفعني من شعري وصاح : زلمتج ما بي خيييييير
أنـه حرمتي تگلي كرامتك مداس أحذية الربعة واخليها
عايشة للصبحححححح .

دخل دوهان سحبني من ايدو
رفع ابوية ايدو وغمو : امداك يا عااااررررر
الزلم وامدها للرتبة ؏ أكتافك تهينك وخليتها تستهين بيك
ومستمر تحچي وتضحكها ، اطلعوووا اخذهااااا الغرفتك
ما اريدددد ادحك شكلها اخذذذذهاااااا .

دوهان: بنظركم يعني اذا أضربها ترجعلي كرامتي
لو ازيد الطين بلة، مو تُــمــيم ضربني لا ضربتهه
المشكلة مو صارت لان ضربتهه .

قُــسـم : المفروض ترفع من أحترام بنتك وترفع قدري
تزيدها تهيني مقابيلهم تقلل مني وتحرض زوجي يضربني.

فراس : مصيبة وصابت هل بيت لمصخم
لعنة وضربتو يوووولووو ما نرتاح بالبيت نهج .

دوهان: اذا واحد يطلع عن الطريق واتجاوز ؏ كل
واحد يطول السانووووو علية هم احددددد يلومني
يعني شنووو كلمة والثانية حرمتك تجاوزت عليك
والمفروض تضربها ، لازم تهين وتضرب وتجاوز وتسب
تا تگولون علية زلمة ، تريدون اخلص حياتي
مشاكل في مشاكل بهل حال شوكت ارتاح .

فراس : لا تفسرون كلامنا ؏ مرامكم ، احنا ننصحكم
اخذوا النصيحة ، ربوهن لا يتجاوزن عليكم .

دوهان : هو يعرف بنتو ماتحبني ولا تريدني
وتجاوز لأن مجبورة ؏ زواج مني .

فراس : من طيح الله حظك أنـه حرمتي تگول ما أريدك و ...

شاط غضب دوهان عيونو تشع غضب
فقد وصار يشمر بيدو : تريدون نصير استنساخ
مثلكم من تضربون أمهاتنا ، تغرسون تفكيركم
؏ حريم بروسنا تريدون نقلل منهن ونضرب
اني عتبي مو عليكم ؏ أمهاتنا يريدن بناتهن
يعيشن نفس الذل والإهانة يتكررر الماضي .

فراس : لا تضربون ولا تنصحون ولا تحاولون وياهن
علموهن الرعونة ، والطيش ، والاحتقار هو أنـه
غسلت ايدي منكم انتَ وكانون والله يستر من ذولاك الإثنين .

نزل تَـــمــوز التلفون بيدو
بعدو بالبدلة ما مبدل : الاثنين تقصدني أنـه وتُــمــيم ؟

رد علية بعدم مبالاة: اي .

گعد ؏ درج وشغل جكارة ورد ببرود: والله يا فراس
مقرر اخذ حرمة اذا ما تسيطر علية اطلك .

البيت صار هدوء الكل دخل بحالة صدمة
فراس : شلون يعني ؟

تَـــمــوز : يعني اذا تگول نام انام
تأمرني اكل ، اروح اكل بأمر منها
اريد اطلع بموافقتها ، اشوفكم من تقبل .

فراس : خروف .

تَـــمــوز : احسن من الثور .

فراس : ادخلوا خلصت المشكلة هذا الغضب گعد ركبه
ونص ؏ درج اليوم ما يفوتها اذا ما تذابحو .

دفع ابوية وتميم وامي للغرفة
وسحب دوهان وسحبني ؏ درج : اصعدوا للغرف اصعدوا .

تَـــمــوز : مرتعب مني مسبب الك قلق نفسي .

فراس : دروح بابا روح دور ؏ شجرة وتسلق  .

تَـــمــوز : أنـه تموز مو فراس هاي التسلق والزحف لعبتك .

ضاق نفسي كل كلامهم ما همني
بس ابوية صوبني بكلبي ، دوهان عافهم يسولفون
وصعد ، تسللت للمطبخ اخذت علبة العلاج من الكاونتر
شربت حبة وجع راس وفريت راسي شربت مي ورحت
اغسل الكلاص ، تراجعت من دحكت شي أسود وگع
بالكراج آول ما طخ الأرض صدح صوت هز الگاع
وكأن صار زلزال ، ظلام ، حرارة ، أشياء تتساقط
علية ، فكيت عيوني بثقل صار السقف أمامي
نزلت عيوني كزاز الشباك نابت بجسمي وحرارة
غطت جسمي ، فقدت الوعي وآخر كلمات سمعتها
وركزت بيهن : قُــسـم لا تمووووووووتين .

يتبع ...

- الرساله ؛ ‏ثقل ميزانك بذكر اللّٰـه:

- سُبحان اللّٰـه
- الحمد للّٰـه
- لا إله إلا اللّٰـه
- اللّٰـه أكبر
- سُبحان اللّٰـه و بحمدهِ
- استغفر اللّٰـه
- اللهُم صلِ على محمد وعلى آل محمد