رواية تجبر أحفاد الــ دليم الفصل الثاني عشر 12 - بقلم اسـاور حسين 🦢✨

تَــجــبـر أحفاد الــ دلــيـم🦅
بقلمي : أساور حسين          
المُلْتَقَى _17_

مو مال وداع تونه متلاگين
بعدها عيوننه من المستحة مدنگه
بعدها تشوفنه عيون الشمس ظلين
مالحگنا نكسر عينها بشبگه

<><><><><><><><><><><><><><>
ذَهــب ..

- يا ناس يا عالم بنت داعش بنص بيتنا ..

ملت راسي ؏ تَـــمــوز هو مبهوت اكثر مني
طلع كــانـــون متعجب بصوتهم وبهت من
وجودي : شعندج هين ؟

اشرت على درج إقترب وگف ؏ محجر دنج
راسو وصاح : شكوووووو ؟

ام فراس:  يول طلعت ذَهــب بنت داعش
هساع ابوك خابرني لشتي كلها ترعش .

صعدت الدرج وامهاتهم كلهن وياها
هو أتراجع وتموز صعد : مو احجي وياك عليش رجعتها للبيت ؟

تَـــمــوز : كــانـــون هاي ذَهــب وينو كلامك وين الوعد
مو أملتها تميل عليك لو ضاگت الدنيا بيها .

كــانـــون : غدرتني .

ام فراس : أقبض عليها يولو ابوك ؏ وصول
من البداية گلبي لاعب من هل بنية.

كلهن صارن فوك ودوهان طلع من غرفتو
يفرك بعيونو متعجب : شنو هل سِرب ؟

لطمت امو ؏ وجهه وعاطت : يول حدر ادحك المصيبة
تخزينه بين العالم بيت كلو رتب عسكرية
منومين داعشية بين اهلو .

تَـــمــوز : شنو هل تمضر*** كافي عيب عليكم
كــانـــون احجي كلمة شبلاك يول مكفوخ ؏ راسك  .

تمعنت بعيون كــانـــون ضايع
صافن يتفحص نظراتهم ويركز
بكل حرف ، بعدني اريد اطلع
من مصيبة توالت الطامة الكبرى
وصعد جدهم وفراس ، يدحك
بكل ثقة وتحدي : تَـــمــوز من عرفت هل بنت داعشية
شلون سمحت لنفسك ادخل ارهابية متفق علينا انتَ
تريد تقضي ؏ العائلة .

تَـــمــوز : انتَ دخلت البنية بالبداية وأخذت منكم
كلمة زلم تعيش يمك بأمان وترجع اخوانها بخير
بس الواضح استصعبت شواربك الأمانة لان موووو كفووو .

ابو فراس : يا الله ؏ هل أحفاد غضب الله عليكم
تريدون تهجمون بيتي ، تريدون تهدمون العايلة.

تَـــمــوز : عايلة شياطين انتوا الشيطان يتعجب
؏ عقلكم وما يحتاج يوسوس انتوا توسوسون من گاعكم .

من بين الهوسة قبض ابو كــانـــون ايدي
وسحبني من بينهم : لا تعب نفسك بوية اليوم أسلم
ذهب للدولة تتصرف بموضوعها .

جرني كــانـــون شمرني خلف ضهرو
وسلم المسدس الأبو : صوب گلبي وأخذها ما أسلمها
ما دام گلبي ينبض ادفني حتى أدفن غيرتي مثل ما دفنت غيرتك .

أعجز وصف ملامح فراس بهذهِ الدقيقة
وكأن كــانـــون صوبو برصاصة حارة
شعلت النار بگلبو البارد .

فراس: تتحداني كــانـــون ؟

كــانـــون : من أيدك ، جنيت ؏ نفسك وحاربت
حتى تخسرني الظاهر ما شبعت خسارة بسبب
حبك لنفسك .

فراس : كــانـــون تسلمني ذَهــب ونخلص
من مصيبتها لو أخلص عليك .

كــانـــون : ذَهــب حرمتي بعدهه بـ أسمي وللموت
تظل ذَهــب زوجة كانون ركز بيها واحفظها زين .

هجم عليّ شگ قميص كــانـــون  من الطول للطول
وصاح بهيجان والغضب سيطر ؏ افعالو : خلصت المهمة
وقعت أوراق التنازل وهساع يجي الشيخ وتطلكون
لا وحق حروف القران أتبرأ منك ليوم الدين .

كــانـــون : تتبرا شنوووو عليش تخليني بـهل
مواقف التعبانة ، البنية بحاجة مساعدة وانتَ
تعرف ذَهــب بريئة بس رغم هذا رد فعلك مو منطقية .

فراس : بصفتي ابوك وانتَ ابني أريد أحافظ عليك
من كل نقطة خطر واي اب مكاني يتصرف مثل
تصرفي واحتمال اكثر مني ، واني اعرف الغلط
من البداية غلطي واني متندم أريد أصحح الخطأ
بابا كــانـــون ذهب تموتك والله تموتك هاي تربية
داعش القتل بقاموسهه مباح ،  والموت كالأكل
اسمعني بابا اني خايف عليك والله خايف عليك  .

نظرات كــانـــون بعيون ابو جانت كفيلة
بوصول رسالتو بس أسترسل الرسالة بكلمات تأكيد أخيرة
كــانـــون : تأخرت چثير يابة .

سحب تيشيرت من الغرفة و
آخذ أيدي بيدو وتعداهم كلهم تحسست
رجفتو من الهضم وهو يمشي منهم
بعدو يريد ينزل سمع كلمات ابو .

_ من اليوم كــانـــون مــات ، اني متبري من كــانـــون
ليوم الدين ، والحاضر يعلم الغايب (انه ماعندي ولد ).

ماتردد وكمل طريقو ونزل ، طلع من البيت
مندهش من نفسو ، صعد السيارة طلع تَـــمــوز
يركض : كــانـــون لحظة بس انتظرني .

فتح الجام وكف تَـــمــوز يلتقط انفاسو
بصعوبة طلع مفاتيح من جيب بنطلونو
واخذ ايد كــانـــون : هاك هذني مفاتيح هذا البيت
استقر بي ولا تدخل بيت العائلة مرة ثانية .

كــانـــون : أريد أبتعد من بيت مليان غل ونفاق
إنتقل غير منطقة بعد ما أريد ادحك شكلهم .

تَـــمــوز : يا الله يا مصيبتي ، يول الله الأوضاع
كل يوم تزيد خطر ، خطورة مو بس عليك حتى ؏ ذهب
هين آمن الكم اسمع مني ابوس راسك .

كــانـــون : معناها نفس المشاكل والتدخلات ما سويت حل .

تَـــمــوز : لا يمعود فراس من تبرأ منك بعد
مايدخل بيك ومو بعيده يمنع أمك من شوفتك
وانتَ اقفل بابك وعيش من جديد .

كــانـــون : بس البيت بيتك .

تَـــمــوز : أنـه وياك واحد ، اليوم انتَ محتاج مساعدة
باجر يفتر الوكت واحتاجك ويايَّ انتَ تعرف ماعندي غيركم
اوكف كافي شنو هل مشاعر لعبان نفس يمكن أنـه مصخن .

كــانـــون : انتَ محتاج الدعاء.

تَـــمــوز : ؏ جرح بعد اخوك وأنت تصلي ادعيلي
الله يكثر الحلوات الحسناوات الفاتنات .

فتح كــانـــون باب السيارة بكل قوة
انضرب تَـــمــوز بي عاط متألم
تركو وفتح بيت بابو صغيرة بصف
بيت العائلة ، رجع بس بين الموافق والمتردد خيرني.

كــانـــون : اختاري بسرعة تريدين البيت
لو نغير المنطقة ونبتعد .

ذَهــب: برأيي كلام تَـــمــوز صحيح
هين امان اكثر من غير مكان .

كــانـــون : عجل انزلي .

دخلت للبيت مساحتو مقبولة لزوجين
بي أثاث قليل ، التراب بكل مكان
نفس البيت الي جابني تَـــمــوز علية
نمت من جنت بالمركز .

أقل الربع ساعة فات كــانـــون عاقد الملامح متصلب
الجسم ، صعد فوك واثناء صعوده خلع القميص
دخل الغرفة صايرة مقابيل الدرج وقفلها
تعجبت منو عافني وحدي ، رحت الباب المدخل
مقفول بمفتاح ، فكيت الشباك دحكت الباب الخارجي
مقفول بقفل ومفتاح ، الأمان عند كــانـــون بيّ معدوم
رجعت للمطبخ وللحظات أفكر اصعد أتفاهم بكل هدوء
بس خفت من رد فعلو لأول مرة ادحك كــانـــون عصبي
وما طايق يشوفني بس مجبور بحمايتي .

دخلت للحمام سبحت صار اكثر من اربع ايام
ما سابحة اخذت حمام دافي هدئت أعصابي
أكو منشفة بس جبيرة لفيت بيها جسمي وغسلت ملابسي
كلهن صايرات خيسه من التراب ، طلعت ركض
للغرفة الآخيرة وسديت الباب ، الجو بارد يضرب بالعظم
والبيت لأن متروك وشبابيكو مفتوحة صاير ثلج تكورت
وكعدت بالگاع افكر بضيم حياتي إلي ماينتهي.

غلبني النعاس بس المشكلة الغرفة فارغة
لا فراش ولا مخدة ، طلعت للاستقبال اخذت
مخدة صغيرة من التخم ، ورجعت ارجف
وسنوني اطكطك شمرتها ونمت بالگاع
برودة الكاشي تضرب بالعظم بس شسوي
ماكو أختيار أفضل ، استحي انام ؏ تخم
لا يروح ينزل ويشوفني ، بس سديت
الباب زين ونمت صح نومتي مو مريحة بس
التعب اله مفعول ، بحيث فقدت بالساعات الطويلة
والواضح كــانـــون مثلي .

الثاني يوم الساعة 6:50 دقيقة تقريبًا
جفلت ؏ صوت قفل الباب ، طلعت
بس ما لحكت ادحك كــانـــون طالع
والبوب مقفولة ، دخلت تلمست ملابسي
رطبات تركتهن ؏ راحتهن ينشفن
وصعدت فوك للغرفة صار مقابيلي
سرير وبطانية والغرفة بيها تدفئة
نمت والفراش بعدو دافي أخذتني
النومة ويومي خلص واني ما واعية .

فكيت عيوني بصعوبة طالعة الشمس
ومبين صاير العصر ، ركزت بالساعة
بـ 5:00 كمزت من فراشي نزلت
اكو أكياس اكل ؏ كاونتر ، نزلت عيوني
تذكرت بعدني افتر بالمنشفة ، أخذت ملابسي
لبستهن بالحمام وطلعت ، بابا الغرفة الي نمت بيها
البارحة مقفولة ، كعدت بالمطبخ متعاجزه من نفسي
البيت عبارة عن تراب ، نزل ضوء النهار عدلت گعدتي
من سمعت قفل الباب ينفتح .

ذَهــب: الله يساعدك .

هز راسو وطلع للكراج فتح الباب دخل
دوهان : شنو حركت التلفون عليك وينك ؟

كــانـــون : رجعت من الدوام ونمت دايخ .

دوهان: اليوم مقتنع بكلامك وية ابوك ؟

كــانـــون : حدر نحچي جوة .

فات نكت التخم بيدو وگعد : شنو البيت صاير صحراء .

كــانـــون : بعدنا ما مستقرين يترتب بالتدريج .

دوهان: فهمني وضعكم المخربط شوكت ينتهي
خايفين عليك ، كــانـــون الدولة اذا تعرف انتَ
متزوج داعشية يسحبون الرتبة ويطلكون حرمتك .

سمعت الجداحة وصوت اول نفس من
كــانـــون : يا خوي انتوا مكبرين الموضوع
ويوم بعد يوم تبالغون اكثر من قبل ، قابل أنـه
صغير وما مفكر بيها ، واثق من نفسي وعندي علم متزوج منو .

دوهان : مو حاله انتَ و ...

كــانـــون : رجاءً لا تكمل .

دوهان : يول كــانـــون ابوك تبرا منكم اثنينكم شموازيك .

كــانـــون : هل أسبوع أكتشفت شخصية أبوية المظلمة .

دوهان : ابوك خايف عليك .

كــانـــون : الخوف يختلف عن المنافسة
ابوية تصرفاتو مو طبيعية .

طال حديثهم توجهت للغرفة بديت ارتب بيها
صعدت ؏ شباك نزلت البردات اخذتهن للحمام
ورجعت ارتب : اطلعي من الغرفة .

ذهب : البيت مو نظيف يحتاج تنظيف .

كــانـــون : بلشي مو فوك ، اريد انام يلة .

ذَهــب: عليش تنتر وحتى ماترفع راسك تدحك شكلي
لهل درجة ماخذ موقف مني ؟

كــانـــون : لا تاخذين وتنطين بالكلام چثير تا لا اجرحچ .

غض البصر عني وگعد فار دمي
وكفت مقابيلو وقلدت طريقة النتر : لا تتغاضى عني
وارفع راسك ركز بعيوني من تحچي .

تراجعت للخلف من وكف لزمني من ايدي
وطلعتي خارج الغرفة وقفل الباب : أمشي منا بوية أمشي.

ذَهــب: يعني برأيك تعاملك الجاف ويايَّ حل
عليش تحسسني بالمنية عوفني اولي ولا تشيل همي .

بقيت البيت ؏ حالو وصعدت
مرت الساعة والساعتين سمعت
حركة جوة ، مشيت ؏ أطراف اصابيعي
ادحك من فوك اسمع بس ماكو رجعت
للغرفة صار صوت مي ركضت ادحك
صار قابيلي رفع راسو واشر ؏ گاع
_ حدري ساعديني .

ذهب : اعتقد ماتريد تلمح وجهي لان تكرهو ؟

كــانـــون : براحتج .

ذَهــب: أكرهه برودك .

جاوبني وهو يسحب الماسحة: وبطريقچ اكرهيني .

ذَهــب: منو گال أحبك أصلًا من زمان انتَ ماتعنيلي .

ذب حسرة وكمل شغل بعد ما رفع راسو
بقيت كاعدة ؏ درج هو يفوت ويتعدى
بدون صوت ، استصعبت الموقف
ونزلت مشيت للغرفة كتفت ايدي
وهمست واني ابعد بنظراتي عنو : بشنو أساعدك .

كــانـــون : ارش مي وانتِ امسحي .

ذَهــب: ليش مو اني ارش وانتَ تمسح .

كــانـــون : نفس الخرط ماكو فرق .

ذَهــب: الگاع تزحلگ حدر انتَ امسح .

كــانـــون : ديري بالج لا تروحين بيها كلها زاهي .

ذَهــب: قابل اهمك ؟

كــانـــون : اخر همي .

رديت ببتسامة من تذكرت كلامو بليلة الاعتراف
هو يمسح بالشباك ومغلس ؏ وجودي
ذَهــب: بدون حلفان صدگتك ، قابل انتَ تخاف عليّ
اكثر من روحك .

رفع راسو بدون ما يستدير ارتبك وتحركاتو
صارت عشوائية وحسيت بس قلق اذا جنت سامعه كلامو
استمر يمسح بالفوك من وصل للنص شمر الوصلة
- كملي بين ما اشرب جكارة ونكمل.

كملت مثل ما طلب تأخر الى ان رجع أخذ الماسحة
يمسح واني ارش من الغرفة للكراج أخذناها مسح
وجلف بس المي صار فيضان سديت الصوندة
واخذت ماسحة ثانية اني اطلع للكراج وهو من الكراج
للشارع ، بعدني امسح انفتح باب بيت اهلي
طلعت امي هو سد الباب وفات لزمني من ايدي
ودفعني جوة ، قفل البوب كلها ودخل .

ذَهــب : يمكن شافتني ؟

عافني وصعد فوك عطت واني هجست
الاستحقار بتصرفاتو : مو احجي ويااااااااااااااك .

فات للغرفة اخذ مجرات ملابس
وفراش وبطانية وجنطه نزلهن بالغرفة
الجوة : من اليوم هاي غرفتج وممنوع تصعدين بالغرفة
الفوك بيها شغلي واني ما أثق بشخص يتواجد بمكان
بي شغل خاص بيّ .

ذَهــب: كــانـــون بديت افور من تصرفاتك
هذا الاستعباد والتسلط والسيطرة بدت تضايقني .

نظر نظرات الازدراء بطرف عيونو
يتلخصني ، رجع وبيدو ملابس من فوك
اخذهن ودخل يسبح ، ابتعدت من الغرفة
فكيت شباك الاستقبال وبقيت اخذ شهيق
وزفير ، كمل تجاهل من طلع من الحمام
ينشف بشعرو بالمنشفة ويصعد بسرعة
فوك ، قفل الباب وبعد ماسمعت صوتوا
اخذت حمام سريع وخليت قهري بالفراش
ملخت الفراش تملخ الحد ما فرشتو ونمت
ودموعي تنزل ؏ خدي هو بتعاملو مصبرني
؏ فراگ اخواني ، كلامو ينسيني همي وحزني
وهساع هو يزيدها عليّ .

قررت بعد ما أهين نفسي وانزلها اكثر
من هو موجود ما اطلع من غرفتي ومن
اسمع قفل البوب وطلع اخذ راحتي
اكل واشرب وافوت حمام واتابع تلفزيون
وبس اسمع صوت سيارتو اطفي كُلشي وركض
أدخل للغرفة واقفل بابي مثل ما هو يقفل بابو .

أكثر من أسبوع احنا ؏ هل رنة ينفر مني
وبادلتو البعُد ، وبيوم بارد مثلج ، أصوات قطرات
المطر ؏ حافة الشبابيك ، المدفئة وحرارتها وهدوء البيت
دفعوني للنوم ، بين كاعدة ونايمة انفتح الباب الخارجي تقصدت
ما أتحرك من مكاني ثبتت واستمريت أمثل النوم .

دخل مستعجل ومن صوت أنفاسو المتسارعة
وأضح بردان ومستعجل يدخل البيت ، اول
ما استدار للحظات قطع نفسو وبقيت اسمع
صوت بلع ريگ ، بخطوات بطيئة مترددة إقترب
مني ، هجست بي فوك راسي گعد بدون حركة
رجع خصلات شعري المتمردة وره اذني
وهمس بتعب ملهوف : ولهانة عيوني لعيونچ
يا اول جوى بروحي ويا ابهم كذبه بحياتي .

قاوم عقلو ، خالف قلبو ، هاجم تحركاتو
ونهض مستعجل متحسر ، وصل النهاية
الاستقبال استوقفتو بكلماتي إلي ما متوقعها: جنت أتمنى
اترك اثر حلو بگلبك بدل هل وجع والبأس .

ألتفت ونظرات الآسف والندم مرسومة
بعيونو وملامحو : جنتي أكبر اثر مؤلم بحياتي
وجهتي أكثر طعنه موجعة ماتخيلت اواجهه بعمري كلو .

عافني يريد يكمل استرسلت الكلام
واكملت بثقة بس بطريقة غبية
وگت خطآ: قبل المهمة سمعت اعتراف حبك ألي بگلبك .

ماتوقعت هل هيجان والأعصاب
منو والاول مرة كــانـــون يوصل
مقابيلي لهذهِ المرحلة من الغضب : شكثر عيونچ وقحة
وكلامج بلامبالاة يعذبني ، تزيدين الطين بلة من كشفتي
مشاعري اتجاهچ قررتي ونفذتي تريدين تعذبيني
اكيد نفسج سمحتلچ وگلتي هو يحبني حتى
لو أغلط غصبًا ما عليّ يرجعني ويحميني مثل الغبي .

يتحرك بعشوائية وهو يشتاط من الغضب
كمل كلامو وهو ينتفض: شلون تسمحين لنفسچ تتصرفين
هيچ تصرفات ويايَّ ، منو آذن الچ تستغلين مشاعري وتجرحني
تعرفين شنو موقفي من دخلتي بوسط الضباط
وحق محمد ردت امووووووت لو شامريني بنص داعش
ولا هل موقف لو مسلمتني ولا تعذبيني وتستغلين حبي
لمصالحچ الرديئة .

تقرب يريد يحجي عن قرب رفعت اديناتي
احتمي بيهن من اي ضربة نزلهن وهو يزيد
من العصبية ما يقل : اني مو جلاد ولا ابوج أنـه ما إضرب
حرمة لو ؏ مووووتي .

دفعني يريد يطلع من البيت استوقفتو
ودموعي تجري ؏ خدي وبصوت مترجي
توسلت بي : الله يخليك لا تطلع بهذهِ الحالة اني راح ادخل
للغرفة بعد ما اخليك تشوف وجهي .

ثبتني من فكي وطبگني بالباب : ادحكي بعيوني
وركزي بكل حرف مني ، انتَ مو بس مهمة
لان مهمتي وياچ إنتهت اليوم أنـه مجبر بيچ
لان انتِ أمانة وأجب عليّ أحافظ عليج الى ان يتم تسليمچ
الصاحب الأمانة احفظي كلامي غير هل كلام لا تظنين بيّ .

يريد يبعدني عن الباب بقيت مصرة مايطلع
استرسل بكلامو الجارح ويزيد بي بدون تفكير
وكأنو يروي غليلو مني : ماتستاهلين أغضب اهلي الخاطرج
ولا تستحقين يتبرون مني بسببج ، ولا يهون عليّ أعذب
امي ؏ حساب وحدة أستغلت شعوري اتجاهه بالعذاب والحيلة.

ذَهــب: من البداية بلغتك أنـه ما استاهلك كــانـــون .

كــانـــون : من اول يوم دحكت ذَهــب بي عجبتيني
وطلبت القرب منج ، ورغم صدمتي بخبر انتِ واهلج من التنظيم
أقترحت عليهم تكونين المهمة الخاصة بيّ ، بدون ما أكشف
عاطفتي اتجاهچ ، حاربت تا تتعدلين وتبقين ملكي بس
انتِ تكافحين تا تبعديني منج للأبد .

ذَهــب: تصرفي خطآ بس ومحمد لمصلحتك
ولمصلحة اخواني .

أشتد غضب وصوتو صار يعلو
هجست گلبو ألتهب من اعترافي  : جذابة بعمرج ما تصرفتي تصرف لمصلحتي ، صيري صريحة مرة وحدة بحياتچ
وبلا لف ودوران اعترفي انتِ أنانية تحبين
تخلصين نفسج واخوانچ وبسسسسسسس .

ذَهــب: أقسم بالله انتَ تهمني .

كــانـــون : ول ومحمد كافي لهنا وما اريد
اسمع حسج ولا ادحگ شكلج عذبتيني بما فيه
الكفاية واني امشي وراج مثل الأبلة بس تا ترضين
وانتِ ما مهتمة يولي آني اخر اهتماماتچ .

رفعت نفسي ؏ اطراف اصابيعي
گضبت قميصو بيدي بس تا أوصل
وأخلي ايدي ؏ شفايفو امنعو يكمل
بنبرة الحقد : الله يخليك افهمني اني ما اكرهك وبنفس
الوقت ما أحبك بس مو معناها أتقصد اسبب مشاكل
بعمري ما فكرت .....

قاطعني وهو يدفعني ومن لاحظ إصراري ما يطلع
من البيت عافني وصعد فوك ، مشيت للحمام غسلت
وجهي اريد اخفف من النوبة اخذت شهيق وزفير
ودخلت للغرفة نشفت وجهي وغطيت نفسي
بفراشي أفكر بالمصيبه اني شسويت بروحي
عليش جرحتو بهل طريقة البربرية .

الساعة 2:00 ليلًا الباب الخارجي تفلش
تفليش طلعت أركض ارعش من الخوف
نزل كــانـــون يركض عطت مفزوعة: شكو شصاير ؟

رمقني بنظرات عدائية عبارة عن بغض
تعداني وفتح الباب دخل كــانـــون بيدو
اوراق وتلفون صغير : صار كم يوم ما متواصل انتَ
و502 .

كــانـــون : صار يومين ما بيناتنا تواصل صاير شي ؟

شمر أوراق ؏ تخم وزعها وسترسل كلامو : خلال هل يومين
لاحظنا تحركات مكثفة من قبل التنظيم عكس المخطط
وصادف ؏ معاكسات بنفس فترة غياب 502  .

كــانـــون : حاولت تتواصل .

أندفع الباب دخل ابو كــانـــون
گضبو من ملابسو غضبان: يول ومحمد يومين اذا
ما اسمع اخبار تسر ؏ 502 راسك افصلو من جسمك
مو محافظ ؏ داعشية وناسي موضوع المشمور بوسط
الدواعش بسببك .

كــانـــون : بسببك انتَ عليش اطلع نفسك
شرد من كلشي بسببببببك وبسبب الأنانية .

فراس : عفية عليك يول ارفع صوتك بوجه ابوك
اسمع كــانـــون يومين وكافة الأخبار يمي حتى لو قاتلي
أريد الجثة ادفنها بيدي .

طلع كــانـــون صعد مستعجل بدل بدلتو العسكرية
ونزل سريع يثبت اسلاحو بحزام البنطلون
- جهزت السيارات العسكرية اليوم نتوجه للهدف .

تَـــمــوز : مداهمة ؟

كــانـــون : اي ولو نرجع ملفوفين بعلم
لو هل حثالة تحت قبضة الجهاز .

<><><><><><><><><><><>
   هَــيـلانـة ...

نكسر مجداف عمري بزحمة الروج
ووكف بيّ الزمن يم اليكرهون
خفت همي تكشفه أسرار العيون
خيطة النظر عن لا يشوفون
وخفت خوفي يحدب يكشف العوز
ظهر شديت صبري الشيل المتون
وخفت شماتي تصرخ ، اي وگع طاح
وكفت رمح على جرحي گبال العيون

هَــيـلانـة : شبح عوف عزيززززز مو وعدتني
ماتنزل دموعي بعد اتركو لا تخليني اضربك .

دفعني منو وسحب سجين من رجلو
_ كم مرة بلغتك تبتعد يول تريد اعدم روحك .

گضبت ايدو وعطت بترجي : ابوس ايدك لا يولوووو لا
تأذي اخوية ، شبح عزيز ينزف عوفووووووووووو .

عيوني تركز ؏ دم عزيز يوكع ؏ سرير
اسحب بالشبح بس ثگيل الى درجة
من أيست ابتعدت اصرخ والطم ؏ وجهي
فقدت ؏ منظر اخوية ابتعد الشبح
ضربني راشدي شمرني ؏  حايط
عيوني زغللت من قوة الضربة
وگعت بالگاع عزيز ماتحمل الموقف
رجع الراشدي بوكس وسحب السجين
خلاها ؏ ركبتو وعاط وهو منهار : ارجعلك الوجع أضعاف
بس أنتظر الوقت المناسب واضربك الضربة القاضية .

تركو وشمر السجين اجه بتجاهي
حضني وشالني ؏ سرير وهو ينزف
ملابسو صارت عبارة عن دم : بيج شي نور عيوني .

هَــيـلانـة : عزيز تنزف الدم بس خليني اوگف الدم .

طلع شبح وكف بالممر صاح : حرس وينكمممممممم .

سمعت الگاع تنهز من خطواتهم
تركيزي صار بعيون عزيز إقترب
مني وهمس : لاتخافين ولا تنهزين انتِ اخت
عزيز ، مايصير بيّ شي تعودت ؏ راح يصير
أنـه اعرف اطلع منها لا تبجين ولا تصرخين .

الشبح: شيلوا هل قذر اليوم موتو ؏ ايدي .

وكفت مقابيل عزيز أمنعهم : شبح أبوس ايدك كافي
لا تكسر ضهري بأخويه انتَ مو وعدتني ، إذا تأذي
بعمري ما راح اسامحك ، وما أعتبرك زلمة لان ما وفيت
بوعودك .

الشبح : طلعولي هل مرتد برة الغرفة تحركوا .

عزيز : شبلاك ماتگدر اطلعني لو خايف
تريدهم همه يطلعوني .

هجموا ؏ عزيز طلعوا بالضرب والكفخ
انهارت أعصابي بلحظتها وگعت الطم سد الباب
كمت ازكح بصوت بس مقفول : افتححححححح اريد اخوية
ششششبح لا تأذي ابوس ايدك أترك عزيز انتظر لحظة
بس احجي وياااااك عزززززززيززززز .

اخ يمة وينج ماتحسين بنتج وابنج شصار بيهم
لج ذَهــب وينج حدري خلصيني وخلصي عزيزج
من بين ايدهم ، معقولة انتِ هم تتخلين عني وعن عزيز .

بقيت أتوسل واحاول ينفتح ألباب فقدت
الآمل وبقيت امشي بالغرفة الى ان تأخر الوقت
لا ساعة ولا ساعتين أنـه ؏ نفس النحيب والصراخ
أنفتح الباب دخلت عطاء بيدها صينية اكل دفعتها
وطلعت ادحك من الشباك عزيز ماكو رجعت فتت
عطاء تصيح : كيف تسمحين لنفسك ان ...

قاطعتها من دخل السفاح يشرب بكلاص
جاي ويمشي بكل بطئ نظراتو وتحركاتو مستفزة
_اخوية وينو ؟

رد عليّ وهو يكمل طريقو : منو اخوج ؟

اخذت الكلاص منو وشمرتو بالگاع تحول
فتات ضغط ؏ اسنانو وكمل طريقو : اخوية وينو يا مجرمين.

دخل للغرفة الخاصة بي هو وشام وسدها
بقيت افتر بالبيت بس اريد شخص شريف
بيهم يطمن گلبي ماكو كلهم حقراء الخباثة
عنوانهم .

تأخر الوقت بس الساعة تمشي
وتاكل بصبري ، دخل الشبح والأول
مرة بس انتظر اسمع صوتوا : عزيز وينو شبح جاوبني .

گضبني من ايدي ودخلني للغرفة
دفعني ورفع اصبعو يحجي بتحذير : ديري بالج من عزيز
هذا ما ناوي ؏ خير أعرف هو اخوج بس راسو مغسول
ومستعد يبيع اختو بس حتى يوصلهم لغايتهم .

هَــيـلانـة: منو هذولي غاية شنو ، انتَ عليش تخربط
اخوية مستحيل يسترخص بروح اختووووو .

تقرب اكثر تمسك بيدي مسح دموعي
بطرف اصبعو واكمل : بهل مكان كلشي مباح
القتل،  التسليب ، الغدر ، الموت تخيلي الخداع من الكل .

هَــيـلانـة: واكيد انتَ واحد من الخونة والغدارين بهل مكان
لان وعدتني ورجعت اذيتني بأخوي .

الشبح : أريد مصلحتج احاول احافظ عليج منهم .

هَــيـلانـة: وشنو تستفاد من تحافظ علية ؟

الشبح: كلشي بوقتو حلو اسمعي كلامي هَــيـلانـة
وما تندمين ، إي شي يحجي بي عزيز او غير عزيز
تبلغيني حتى اساعدج وأطلعچ بيوم من الايام من هذا
المكان .

آخذ أغراض وطلع ، الأفكار تتضارب بعقلي
معقولة كلامو صحيح ؟ عزيز مستحيل يسويها
بس أحتمال يريد يخرب أفكاري أتجاه اخوية
بس شنو يستفاد أخاف كلامو صحيح واتندم
لأن ما اخذتو بعين الاعتبار.

مر يوم بعد يوم وإني حذره من المحيط الخارجي
التزمت غرفتي ماطلعت منها ، والشبح أختفى
اطلع بس بليل اخذ وجبة من الأكل وأرجع المكاني
وبعد هل هدوء عاصفة صارت من رجعت حركة بالبيت ، وصارت مكثفة بليل ، رجع الشبح وصرت اسمع صوت السفاح من يدخل .

ومن بين هل هوسة دخلت عطاء : ربع ساعة
ويدخل الشبح اليوم تحضرون عدكم التحاق مشتركة بينكم
وبين شخصيات مهمة بالدولة الإسلامية .

شمرت ملابس ؏ سريري فتحتها الزي الإسلامي
بالكامل ، لبستهن اريد ادحگ الشخصيات المهمة
وأوصل للتالي وياهم هل مجرمين ، وفعلًا أقل
الربع ساعة دخل الشبح ركز بعيوني وأبتسم
آخذ ايدي وتوجهت للطابق الأخير ، دخلت الغرفة
عبارة عن رجال كبار بالعمر ، وياهم نساء بالزي الإسلامي
كاعدين يريدون ياكلون، السفاح وشام ماخذين مقاعدهم
واني والشبح جلسنا وما اعرف شنو الغاية بس
اول ما التقت عيوني بعيون السفاح ارتعد گلبي
من شرارة الغضب بعيونو ، حاول يتلافى التركيز ؏
حركاتي وقربي وجودي اني والشبح بس ما تحمل .

السفاح : عن أذنكم اني صار عندي عمل طارئ .

اخذ شام وطلع مستعجل ، بقيت استمع الكلامهم
عبارة عن فصحى لعبان نفس ، وتحريض ؏ قتل
المرتدين إلي هم اسود العراق .

بقيت ربع ساعة وما تحملت إقتربت ؏ الشبح
واصريت : طلعني لو اني اطلع وحدي بعد ما اتحمل
كلامهم الكفار الله يلعنهم .

قاطعهم وطلعني قبل لا ينفضح مقابيلهم
نزلت بالغرفة اجر النفس بصعوبة : الله لا يوفقهم
شنووووو هذولييييي فهمنييييييي اريد اطلع منااااا طلعوني .

شبح : يول الله اطلعج بس بالوقت المناسب بس نصي حسج .

هَــيـلانـة: دمييييي يفور اريد اشرب من دمهم هل
مجرمين كلامهم موتني اختنگت والله .

عافني وطلع مستعجل من دك تلفونو
اخذت مي لمحت السفاح يحجي هو وعزيز
رجعت للغرفة ، شمرت ملابسي انفتح الباب
ودخل عزيز ، ركضت أخذتو بحضني
باس راسي وهمس : اني زعلان منج بس مايعني ما اسئل
عليج .

هَــيـلانـة: عليش زعلان فهمني يا الله من هل مصيبة
ومحمد وصلت المرحلة الخبال .

عزيز : لا تخافين قريبًا تطلعين من هل مكان وتروحين
الذهب ، بس اسمعي كلامي ونفذي بالحرف .

وسعت عيوني وكلبي لأعب بين اثق بي
وبين اثق بكلام الشبح : أخذي هل قطرات خليها
بكلاص الشبح وحاولي يشربها ، من يخلص تطلعين
تغسلين الكلاص وتخلي ؏ كاونتر وفوك الكلاص
تخلين صحن حتى افتهم هو شرب المي واخذ مفعول .

هَــيـلانـة: عزيز أنـه مستحيل أقتل بشر
حتى لو اخوية يطلب مني ، وحتى لو كان المطلوب مجرم .

عزيز : وآني مثلج لو ؏ موتي ما أقتل
حبيبتي هذي قطرات منوم .

هَــيـلانـة: وشنو تستفاد إذا الشبح ينام ؟

عزيز : عندي شغل لازم ينتهي هل اسبوع
وضروري الشبح يكون نايم ، هَــيـلانـة ساعديني وساعدي نفسج .

هَــيـلانـة: صح هو أذاك بس حباب وعدني يطلعني
من المعسكر اني وياك وذهب بأقرب وگت نسافر بمساعدتو .

حضن وجهي بيدو ونتر بعصبية: لا تأمنين ولا تصدگين
حرف من كلامو يولووو هذا مجرم اسمعي كلامي أنـه اخوج .

ضعت بقيت بس صافنه بوجهو
واهز براسي ، اخذت القطرات
وقبل لا يطلع نبهني: مو شرط اليوم بس خلي المهمة
اتم خلال هل أسبوع حاولي تنومي ، واني اراقب
الكاونتر كل يوم من ادحك الكلاص والصحن اخذ منج التم .

باس ايدي وراسي وحضني بقوة وطلع
فكيت الجنطة وشكيت شوية منها وظميت القطرات
بيها وغلفتها ، مسحت ايدي وطلعت للحمام
غسلت وجهي ورجعت للغرفة أريد اطبگ
ألباب اندفر.

السفاح : ول ومحمد مرة ثانية إذا أتواجد اني وياج
بمكان وترفعين عيونج بعيوني .

رفعت عيوني ، وركزت بكل ثقة
وما شلتهن واصريت أتقرب اكثر
هَــيـلانـة: اي شنو تسوي ؟

السفاح : اقلع عيونچ .

هَــيـلانـة: شوفني شطارتك شبعت من الكلام .

تنهد بخشونة ، عاقد حاجبو
مسكني من عكسي وبقهر صاح : لا تستفزيني
واسمعي الكلام لا تجبريني أسبب ألج أذية وادوخ راسچ .

هَــيـلانـة: اني ما منتبهه شوكت ادحك بعيونك
ولا متعمدة بس لان الموضوع يقهرك ويشيط غضبك
راح ألتزم النظر بعيونك بكل مرة اصادفك بيها .

باع ريگو وعضلات فكو من الغضب
اصطكت ، للحظات دنج مخنوك
وتراجع عن التحدي : يول الله لو ما عزيز بعيوني
چان عرفت أتصرف وياج يا متمردة .

طلع وطبگ الباب بقيت
أخذ وانطي بالأفكار الى ان صار اليل
ما دخل الشبح ، اخذتني النومة الثاني يوم
طلعت للمطبخ صايرين هوسة بقيت اساعد
البنات بس أكو أصوات صراخ فوك
خفت اصعد لا يصير موقف مقابيلي صعب أتخطى
أكلت واني اقلي البيض ، دخل الشبح ابتسم من شافني
بالمطبخ: ساعة واريد الأكل جاهز والسفرة ممدودة
الضيوف ؏ نزول ، عطاء أعتمد عليچ .

عطاء: ؏ وقت كل شيء جاهز يا امير .

أومأ براسو وطلع دخلت شام اخذت من البيض
وضربتني بطرف كتفها ، اخذت شاي دخل السفاح
أقتربت تحچي وياه هو مدنج المستوى طولها
مركز بكلامها ، بس خلصت رجعت للغرفة
هو رفع راسو تقربت ؏ كاونتر وبقت عيوني
تدحك عيونو صار مايعرف شلون يطلع حركتو
رغم الخوف والرعب الصار ويايَّ من نظراتو
وقبضت ايدو بس ما رفعت عيوني ، حاول يسيطر
؏ انفعالو ، بعد مني وصاح : عطاء استعجلي .

رجعت اطبخ هو طلع ، ضحكت هجست نفسي
انتصرت على هل أرهابي ، كملت اخذت حصتي
ورجعت الغرفتي ومن يومها رديت أنعزل عنهم .

كل يوم وكل دقيقة اسمع صوت صراخ
يهد روحـي هد ، توسلات وتعب وقهر
كل يوم ، صارت بيه حالة اكل ب أظافري
تعجبت باليوم الخامس من الأسبوع المحدد
ومن دون الأيام دخل الشبح للغرفة كل يوم
مايرجع وما اعرف وين يخلصها ، وما يهمني
المهم عندي يبقى بعيد عني وما يقترب .

الشبح: شلونج .

هَــيـلانـة: زينة .

الشبح : تعبان أريد أسبح وانام ساعة
جهزي ملابسي قبل لا أخلص سبح .

هزيت راسي اخذ منشفة وطلع
طلعت القطرات وخليت بكلاص المي
ورجعتها ، طلعت غسلت ايدي ورجعت أحضر
الملابس بس أيدي فضحتني ترعش وما أعرف
كم قطرة لكحت بالكلاص .

طلع يتنهد مو ؏ بعضو ، آول مرة ادحك الشبح
تعبان لهل درجة ، طلعت من الغرفة بين ما يبدل
بقيت افتر بالمطبخ ، انتبهت ؏ عزيز يسولف
هو والسفاح ، اكيد السفاح غسل عقل عزيز
ليل مع نهار يسولف وياه بس اخاف يقلب اخوية
ضدي وصدك تصير ويضحي بيّ .

رجعت اطكطك اصابيعي دخلت للغرفة
بسرعة صارت عيوني ؏ ميز ، الكلاص فارغ
سديت الباب ورجعت ظهري قلقانة : هَــيـلانـة بيچ شي ؟

هَــيـلانـة: لا بس تعبانة أريد انام .

رجع جسمو ؏ جرباية وخلال ثواني
نام بعمق ، غطيتو بلحاف واخذت الكلاص
غسلتو وخليت الصحن فوك مثل ما وصاني
عزيز ، بس گلبي ناغزني وما مطمئنة
رجعت للغرفة ، ساعة وسمعت صوت
طقطقة ، وخطوات سريعة ؏ درج
أخذت سلاح الشبح وبقيت امثل النوم بمكاني
لحظات أشبه بكابوس مرت ، اشتد الصوت
وتحول رمي ، ومواجهات ، عطت خايفة
أريد أستوعب ، ختلت جوة الجرباية أحتمي
من مطر الرصاص الصار ؏ بيت ، اصوات
صراخ وكلمات غير مفهومة بس ركزت
بكلمات أخيرة غير واضحة : مداهمات دواسين الظلام .

_ مواجهات بين الدولة و الغربان السود .

_ إنتبهوا إنذار إنذار إنذار
جهاز المكافحة اصحاب البدلات السوداء هجموا .

يتبع ...

- الرساله ؛ ‏ثقل ميزانك بذكر اللّٰـه:

- سُبحان اللّٰـه
- الحمد للّٰـه
- لا إله إلا اللّٰـه
- اللّٰـه أكبر
- سُبحان اللّٰـه و بحمدهِ
- استغفر اللّٰـه
- اللهُم صلِ على محمد وعلى آل محمد ..