رواية تجبر أحفاد الــ دليم الفصل السابع 7 - بقلم اسـاور حسين 🦢✨

تَــجــبـر أحفاد الــ دلــيـم🦅
بقلمي : أساور حسين         
المُلْتَقَى _13_

أُحيكت خططٌ بالخفاء
من جهة أُنـاسٌ أقوياء
في مُنتصف كائنات صَمْاء
كان هدفها إنقاذ الأبريـاء
لكِـن ....
هَـل كُل شيءٍ تم التخطيط لهُ ينجح ويُنفذ بإدراك ؟
أم ستعود السَفينة إلى مرساها من جديد لِتُعلن بداية التجبُر والهلاك !؟
•••••••••••••••••••••••
ذَهــب...

دخلوهن جوة يسلمن ؏  نسوانهم
وحدة وره الثانية أخر شي سلمن علية
وجدهم رفع صوتو حتى الكل يسمع : أعرفكم ؏ دجلة
وبناتها الحسناوات سدن وشدن واولادها التوأم
مصطفى وصفاء.

تَـــمــوز: بعد روحـي يا جدي شگد آلك وحشة يابويه
شكثر مشتاقلك جعل محد يسافر ويرجع غيرك
طماطمة طماطة دخيلك ربي تحسست الترافه عن بعد .

الجد : استوه كلشششششش .

تَـــمــوز : كلامهن عربي لو اجنبي .

الجد : عربي مكسر يفتهمن ؏ كلامك يا عارسز .

تَـــمــوز : حدر يمي بس احضنك من اروحلك فدوة .

فراس: دحك السرسري يولو مو قبل شوية تگول
شنو نستقبلو ملك زمانوو لو أنـه متوهم .

تَـــمــوز: متوهم فوفوو متوهم اسكت هساع
لا تخلي روحك بالنص .

عيوني ركزت تدرس تحركات كــانـــون 
ابتسامتو نظراتو وين اتجاهه ، واگف
قريب من تَـــمــوز مكتف ايدو ويضحك ؏
كلامهم، ولا ادري شجاني إقتربت صرت
وره ضهرو من دحكت دجلة تسلم عليهم ابتسمت
وتكلمت بتردد : انتَ ابن فراس مو ؟

كــانـــون: اي نعم
أهلًا وسهلا بيكم والحمدلله ؏ سلامتكم .

برزت ضحكت بتها وبصوت عذب واضح
تكلمت بلا خجل : صدك ماما يعني عمو فراس موجود هين .

دك عمي ابو كــانـــون  صدرو بكل
ثقة بملامح رجولية مرتبة : بعد عمچ أنـه فراس تعرفيني ؟

شدن : ماما هواي تسولف قصص عنك من كنتوا أطفال
وصار عندي حلم أشوفكم .

سحب تَـــمــوز كــانـــون من ايدو
ويحجي بشماته: فضايح من التاريخ مي بارد نزل ؏ گلبي
اليوم فوفو ياكلها بملعقة من ذهب .

كــانـــون : اليوم امي لا تبقيها تبات بالبيت
ولا تعديها الأبوية.

ابو كــانـــون : ولا اتذكر مع الأسف يمكن بسبب العمر
كبرت وصرت أنسى يا عمي .

الجد : ههههههه خطية مايتذكر ...
المهم يلة يا بنوات بسرعة صعدوا هل حسناوات يردن يغسلن
بين ما يجهز الأكل ، بساعج رضية قومي بالواجب .

رضية: البيت بيتهم لا يتقيدون ولا يخجلون كلنا اهل
تفضلي عيوني انتِ والبنوات .

أخذتهم رضية وصعدت تعجبت ؏عاداتهم
عدهم جدهم ياخذونه بالصلوات بحيث
ملابسو يجهزوهن الحمام جاهز بس بعد يسبحوا
رجعن للمطبخ والشباب همه وضحكهم
دخلوا للمضيف اني حالي حال الضايعة
بيناتهم بس أراقب ، أنتبه عليَّ كــانـــون
وقبل لا ادخل للمطبخ وكف باب المضيف
وناداني بأسم : ذهب حدري يمي .

رجعت وگفت بين ممر المطبخ وممر المضيف
عدلت شعري وره اذني ورفعت راسي
تقدم بتجاهي دحكت بعيونو بتركيز وبغباء
وبدون ما احسب احساب الكلامي : حلوات ؟

قوس حواجبو وابتسم بغرور : منو ؟

هساع غير المفروض اخجل وانچعم
كملت بكل صلافة : تعرف منو أقصد.

سحبني من أيدي قيد ايدي بيدو
نزل خصلات شعري ؏ وجهي
إقترب من إذني عضها خفيف
ويهمس بصوت يخدر القلب : شعرچ يغريني ، نظراتچ بيها
تحدي لعبتي ، ناوي انزع مستحاچ ، واعيشچ طعم الطيش
وبعد كل بوسة اصيح اووف بوية أفيش ، وابيت روحـي
حدر جفوفچ الترفات الحد ما تختفي النجمات .

حاولت أفتح ايدو ضبها أكثر
من قبل گضب وجهي ثبتو وكمل : شدگولين نعوفهم يولون
ونصعد نعيش لحظاتنا.

قبل لا أرد علية طفرتنا صارت بفلس
حالنا حال البزون من تطفر من المي
من صياح عمي : يولووو كــانـــون هي هاي أمانة المهمة
تطلع من الخطة مو كلت ممنوع ملامسة المشتبه بهم .

تردد بشكل ونحرج يبرر مقابيلي
ابو افتهم حركات ابنو بقه يدردم
ودخل للمضيف ، اول ما دخل طلع
منها تَـــمــوز يضحك بتلاعب : ها يولو يا ذَهــب مقهور عليج
بالخدمة اذا تريدين اخفف عليچ واگعد اغنيلچ
يمه انباگ رجلي أنـه جاهز احب المواساة .

ذَهــب: وليش ينباگ طفل لو ماعندو شخصية.

تَـــمــوز : هو انتِ حاسبتو زلمتچ لو ؏ گد المهمة.

كــانـــون يتفحص تصرفاتي وادق تحركاتي
بدون مايدخل ، خجلت من السؤال لان ما اعرف بالضبط
شنو لازم احجي وعندي حق أطالب بكانون لو حقي سقط
اخذت نفس طويل وابتسامة صغيرة
ورديت : بديهيًا كــانـــون رجل خلوق صاحب
مبادئ ومحافظ ؏ عادات والتقاليد مثل ما عرفت
ومتأكدة ما يتأثر لا بكلام ولا بجمال ، والنقطة الأهم
كــانـــون يغض بصرو عن النسوان
لان يعرف الحياة دوارة وهو صاحب أخوات اذا يدحك
؏ عرض العالم باجر عگبة يدحكون ؏ عرضو .

تَـــمــوز: زين تعرفين الفكرتي تسلمين راسو
صاحب أخلاق وانسان طيب .

دفعوا كــانـــون الممر المطبخ : من عابت هل بچم
امشي ادخل لا بارك الله بيك يول كلك مشاكل .

تَـــمــوز: الغلط مو منك أنـه استاهل ترفع صوتك
عليَّ لان اقلق عليك واخاف يصير بيك شي ونتندم بعدين

كــانـــون : فوت شوفهم كملوا لو بعدهم
ولا تكثر كلام وتستصرم براسي  .

تَـــمــوز :هتلي ترا أضحك الناس عليك .

كــانـــون : روحححححح بابا روحححح صرگعتني .

فات للمطبخ يهز بيدو وراسو ما عاجبو الوضع
كــانـــون : ادخلي جوة ذَهــب.

- ما جاوبتني حلوات عجبتك وحدة منهن
أكيد فكرت بعد ما ننفصل اني وياك
تتزوج منهن مو ؟

كــانـــون : شكو بيها من حقي اتزوج
ويصير عندي اطفال كبرنا بعد هم يلة استقر مو هوبا .

ذَهــب: اي صح عجل استعجل وسلمني وتزوج
اذا اني ؏ ذمتك حتى لو بمهمة ما اقبل تزوج علية.

نعصر گلبي وروحي تصرخ انصدمت من نفسي
وجهي صار عبارة عن جمرة مشتعلة تركتوا
من اجتني النوبة ورجعت اصدر اصوات غصبًا
عني اريد اروح لزمني من أيدي مبتسم بحنان .

كــانـــون : عساهن ينعمن لو التفتن بيوم الغيرچ .

گلبت عيوني ليفوك ومن الخجل بعد
ولا أميز تحركاتي رفعت ايدي ؏
شفايفي كسرت اظفري بدون أحساس: يعني ما تلتفت الغيري
معناها معقولة انتَ صدگ تحبني ؟

كــانـــون: سوالف إكبار لا تدخلين بيها بنتي .

ذَهــب: افتهم منك ماتتركني حتى لو خلصت المهمة .

تحولت ملامحو للجدية وانزعج لدرجة
بين حواجبو طلع خط تجاعيد العصبية
- كلها شهر واحتمال اقبل وكلشي ينتهي
وأول شغله تنتهي انتِ ، الذاك اليوم أتمنى
اسعدج وما تنقهرين بسببي ولا اكون بيوم صعب وياج .

ذهب: عليش .

كــانـــون : حتى تذكريني بالخير .

استصعبت موقفي ، وگفتي ، كلامي
وعيوني التتوسل بي بدون ما احجي
لملمت شتات نفسي المنهكة ودخلت
جوة ، المطبخ صاير عبارة عن هوسة وأصوات
الكل تضرب براسي وبكل مكان مواعين
نقلهن تَـــمــوز وتميم للمضيف ، نزلن البنوات
الغرفة جدتهم ورضية وياهن بكل خطوة تساعدهن
طلع جدهم من البيت للمضيف ، وگفت احجي
وياهن بس المطبخ كلو مابي قُــسـم
كملوا واحد وره الثاني وكلها بعدهم ما منتبهين
بس الكبار يتسترون ؏ موضوعها وبالخصوص
ام دوهان وجهه يذب الوان ، برد الجو شميت
ريحة الرارنچ اخذت الزلاطة وگعدت وياهن
ياكلن ببساطة الكل نظراتهم عليهن وبكل دقيقة
يوجهون سؤال الهن ، اكلت شوية وطلعت اغسل
دخل دوهان صب چاي بالاستكان وبيدو جكارة
گلبي محمل علية وموقفو وهو يضرب بقسم
يتراوالي ، طلع بسرعة ، وانه رحت اريد اشرب
مي وما ادحگ غير عمتي لزمتني من أيدي : همزين ذَهــب
هين لا تتحركين وكفي المطبخ كلوووو اريدو يلمع لمع
بس بساعج كملي وحدري گعدي ويانا .

بعد ولا گدرت اراددها استسلمت
وعلى مرض والرضوض
المواعين عشيرة ما شاء الله
اغسل منا ادحك الكاونتر الثاني
بعدني بربع الكمية وام كــانـــون
كل كم دقيقة ترجع ترزل بيَّ تريدني
اخلص شغلي  ركض ، الى ان كملت ايدي خشبت
صبيت كلاص الجاي وبوجهي للصوبة حضنتها
وگعدت بكل ثقة انكر او احارب قلقي من وجودهن
من تعبهن شوية ودجلة أشرت البناتها : أني والبنات
نترخص منكم تعبانين اذا ما تصير زحمة نصعد نرتاح شوية
وهم اشوف بناتي صار هواي ما سولفت وياهن .

الجدة: البيت بيتكم ارتاحوا بنتي ارتاحوا .

اخذتهن وصعدت الجدة طگت العكازة بالگاع
واشرت الهن : بساع الولد يردون يدخلون هين
يگعدون بلغوهم يحضرون يمي اريد اسولف وياهم .

تَـــمــوز : حال المتعودة ؏ سحورة تستلم حياتها
يحضرون ماتگول يجوني .

الجدة: عار أنـه أسوي سحورة.

تَـــمــوز : تهجمين بيوت وتبنيها.

رضية: تَـــمــوز اطلع يمه لا تظل بالبيت .

تَـــمــوز : تمطر ماتخافين عليَّ ؟

الجدة: جلب مايطلع بالمطر .

تَـــمــوز : الخلف ما مات واحنا احفادكم حشى ابوية الله يرحمة .

كــانـــون : يولي قُــسـم عيوني جاي ثلجنا.

ركضت بنية من خطارهم ضربتوا: أنـه بيدي اصب الچاي .

كــانـــون : شلونچ انتِ زوجج شلونو وياج .

- الف الحمدلله شحدو يحچي وانه اخت كــانـــون .

بقيت مبحلقه عيوني عليها يعني نفسها
الگالت وجهه النحس اخت كــانـــون
وتجاوز بدون سبب وهاي عود اني
زوجتو الاخوها وهو مبين زين وياها
شنو هل ناس دخيلك ربي .

كــانـــون : انتِ همات صيري زينة ما اريد بيوم
يشكي منج وتخليني أزعل عليج .

دحك ؏ طريق واجه گعد يمي
اخذ گلاص الجاي من ايدي
شرب منو ويحجي موجهه الكلام للجدة: شلونها الحلوة الزعلانة .

الجدة: خليها بكلبي تاكل بيَّ لا تحجون ويايَّ.

كــانـــون : افااااااااا افااااااا منو وياچ اكص راسو .

تَـــمــوز : ولا تنحملون يالگصاصيب .

الجدة: هيانو ابو الشوارع يگلي ام السحورة.

اجه تَـــمــوز بصف كــانـــون نام ؏ كتفو
وغير صوتو : بربك كلامي صحيح .

كمز كــانـــون دفعوا وعاط بي: لا تنام عليَّ امشي مناااا .

تَـــمــوز: حدر انام ؏ رجلك فرك راسي يوجعني
من وره مصايبك ومصايب ابوك .

كــانـــون : بالطلاگ ما تنام روح مناااااا اكلك
ومحمد اضربك على وجهك اعيد تصنيف هل بجم (الوجهه) .

سحبوا تَـــمــوز من ايدو حيل
دفرو ؏ صدروا وگام
وتموز وره يضحك : المنفوخ .

كــانـــون : عليش انفخ يا خايس شعندي عماير ماتنعد
معرض سيارات ، ذهب فيضان فلوس مشمرات .

تَـــمــوز : حدر ارجع اگعد وين رايح هساع گعدنا
شردت من جدتك ماتحبها ادري ماتحبها تمثل .

طلعوا بره شغلوا نار والشباب كلها التمت
بشكل دائري الكبار دخلوا يمنا جدهم يسولف
؏ سفر وصعوبة تشدد دولتهم وقانونها
بقيت شوية وصعدت فوك توجهت الغرفة
قُــسـم ترددت أدخل من كلامهن واسلوبهم
المعفن ولليوم كلهم مامتعودين ؏ وجودي
وعبالك منتظرين مني الغلطة مايصدگون
يحچون علية وجودي موترهم بشكل .

تراجعت ودخلت الغرفتي اني كلها ايام
واطلع من بيتهم عليش ادوخ نفسي بيهم
غيرت ملابسي وشغلت التلفزيون قللت
الصوت وخليت راسي ؏ مخدة شربت علاجي
وبديت اغفي ، بعدني بين الگاعدة والنايمة
دخل كــانـــون رفعت جسمي من مكاني رفع ايدو
اشرلي: ارتاحي لا تتحركين اخذي راحتج
راح أشتغل ؏ لابتوب.

ذَهــب: تريد چاي .

كــانـــون : شربت لا تعبين نفسج ونامي .

بقيت بمكاني الى ان صدك نمت
وكل شوية اگطع نومتي وهو للصبح گاعد
بمكانو ولا اقترب ولا ارتاح ولا نام
ولا فكر يقترب حتى بعد ما خلص
من الشغل مصر ما ينام ، واحسو حذر
ينام ؏ نفس السرير ويايَّ ماعندو ثقة بيَّ
بس صار الفجر دگ تلفونو مبين منبه
طلع من الغرفة دقايق ورجع يمسح بيدو
وبصوت خافت خاشع يردد : اللهم إنى أسألك علماً نافعاً
ورزقاً طيباً وعملاً متقبلاً .

خطوات قريبة ، صوتو عبارة عن اطمئنان
لمسات ايدو ؏ ضهري وهو يتلفظ
اسمي بـ استرخاء : ذَهــب عيوني تسمعيني.

مثلت النوم ، وفتحت عيوني ببطء: هاا .

كــانـــون : أذن تصلين ؟

بللت شفايفي وايدي ؏ قلبي
سؤال محرج الى درجة أطرافي
جمدت : بس أنـه صار چثير من تركت الصلاة.

كــانـــون : براحتج عيوني براحتج ارجعي نامي
عيونج حمرة مو زين يتعبن ويتعبني.

خجلت من نفسي ومن جوابي
ومن نظرة عيونو بلحظتها
أتبعت خطواتو ، أخذ سجادة
الصلاة من الكنتور ، فرشها
وگف وبكل خشوع يصلي
أول ما كمل وگعد صار يعيد
الكلام بكثرة : اللهم وطني ، اللهم أنصرنا ؏ القوم الكافرين
إلهم القوة ، اللهم أحرس وطني بعينك التي لا تنام يا الله .

رددهااا ورددهاا ، الى ان دك تلفونو
فتح خط يحجي بعصبية بس يحاول
يضبط صوتو : عليش تقفل الباب يا عارسز
طفيت من النعاس أريد انام ساعة وأروح للدوام
أمشي افتح ألباب اريدك اسرع من البرق .

طبگها ، فتح الكنتور اخذ ملابس دوام
والعطر والمشط وطلع بمشيتو الحذرة
طبگ الباب واسمع خطواتو ؏ درج
بهل ثانية أقتنعت محافظ علية وشايل
مسؤوليتي ؏ اكتافو،  بس ما يأمن ولا واحد
بالمية بيَّ ، وحقو الصار مو سهل
والراح ايصير اصعب من الصعب بأضعاف.

هزمتني دموعي غفيت وإنه مكسورة
روحـي تدمر من كــانـــون يكون حذر
مني ، أستغرب عيوني تنام ؏ قهر
بس يمكن ملت مني وتتهرب بالنوم
مثل كــانـــون .

أيامي مجهولة ، هل ياترى اطلع من
مهماتهم بسلام أنـه واخواني لو النار
تاكلنا كلنا ، من التوتر النفسي الصار باليل
بقيت نايمة الوقت متأخر ، فزيت ؏ اصوات
رگع بوب ، صوت قُــسـم اي هو هذا صوتها
دفرت الحاف وركضت للباب فتحتو وطلعت
بابها مفتوح بس لا رجع يضربها ، دخلت الغرفتها
نبضات گلبي تتصاعد .

ام دوهان: بساعچ تگومين لا والله اليوم تموتين ؏ ايدوووو .

ذَهــب: بعد شكبرچ تصيرين عجوز وابنچ متزوج
وبدم بارد تسوين مشاكل بينو وبين مرتو ، والمفروض
لو تريدين الستر ادورين ؏ استقرارهم وتصلحين علاقتهم
المهدومة وأضح مهدومة بسببج انتِ وسبب مرض الحقد البگلبچ .

ام دوهان : امشي ام الشوارع لفيناچ بليلة ضلمة
الله يعلم شنو من مصايب وراج وتستر عليچ الأغبر كــانـــون .

ذَهــب: الله يكفينا شرچ وأخذ حوبتي من بين عيونچ
تطعنين بشرفي باطل واكتفي إدعي ربي واگول حسبي الله ونعم الوكيل لان انتِ تحاولين تكسرين بنية ضعيفة بسببج تحطمت .

ام دوهان : يولي انتِ تتحسبين علية ول اليوم ماتنامي بالبيت .

دفعتني ؏ ميز وطلعت من الغرفة ؏ درج
تصيح بأعلى حسها : ام كــانـــون وينچ
حدري يمي ادحگي جنتچ العرمة ام الشوارع
شلون تتحسب وتجاوز علية .

صعدت اخت كــانـــون رافعة خشمها وتنافخ بوجهي
- شكو عمتي شبلاچ تصارخين منو وياچ امرد راسو والله .

ذَهــب: اني وياها ، عمتج هاي بلا قلب تستغل ضعف وأذية
البنية وبعدها تهدد بيها ، وهي قُــسـم بسببها وصلت الهل حال .

ام دوهان : أريج عمة راضية ؏ هل عرمة تهيني بعد هل عمر .

ذَهــب: احترمي نفسچ ومحد يهينچ .

هجمت أريچ جرتني من ملابسي وتنزل بيهن بالگاع
تريد توگعني ضربت ايدها ردت بس اخلص نفسي
منها بس ضخمة وتحريكها صعب  : تخبلتي عوفيني
يولييييي عوفي ملابسي لا أصرخ صرخة اخلي
المايشتري يتفرج عليچ وعلى عمتج .

أريج : فتحي حلگج بعد يمين علية احشي نعـ****
اطلع مو شريفة اذا اخليچ توصلين للبالچ وتجولين بالبيت وحدج .

ذَهــب: هساع عرفت معنى جملة "نافق تجد ألف مرافق"
يولووو البنية بنت عمچ عادي عندچ تنضرب وتنهان
المفروض تشوفين حل إلها تواسيها
تكلفين نفسج تگعدين وياها اطبطبين وتهونين علية .

أريج : يولووو يا ساقطة مو انتِ تعلميني وتعلمين عمتي
الصح من الغلط نعرف هل نايمة مقابيلج عيارة تتلاعب
بالوانها حتى تطلك وتوصل لغايتها .

ذَهــب: إذا غايتها تخلص منكم حگها لان انتِ وعمتچ
ناس باطلة تستاهلون المووووت حتى العالم تخلص من شرچن.

أريج: العايبة ام الشوارع لعبتي لمن الله دزلچ كــانـــون
وتورط بيچ ولملم شرفچ من بين احضان الزلم لو طاهرة
جان ؏ اقل طالبتي بعرس بس واضحة ماكو شرف ملعوب بي .

ذَهــب: شدعوة هل غل والحقد علية
تعرفين شنو يعني الإناء ينضح بنا فيه
بالضبط ينطبق عليج عبالچ العالم كلها
مثلچ رخيصة متأكدة انتِ جنتي بأحضان الزلم
وشرفچ مشمر بالشوارع يا قليلة الآدب.

نزلتني بالگاع تضغط ؏ ضلوعي
وتصرخ صراخ وحدة يكتلون بيها
صعدت عمتي ام كــانـــون تركض
جرتها مني وعاطت : يمممممهههه صخام بوجهج
تكتلين بزوجة اخوج تضربين زوجة كــانـــون
بنت الـ***** مو راسها مربوط وجسمها مرضوض
يبووي لو يدري كــانـــون يبوي .

طلعت تلفونها من صدرها وبلا احترام
تصررخ وتضرب ؏ وجهه : خلي يعرررف اليوم أنـه اخابرو
انطي علم اريد اعرف يقبل زوجتو تگول ؏ اختو جنتي بأحضان
الزلم تفترين بالشوارع .

وصدگ خابرت بكل ثقة عبالك اني
تجاوزت وضربت: خوية كــانـــون انتَ وين خوية اريدك
اريد اعرف ترضاها ؏ اختك تنهان بنص بيتنا ومن وحدة
ذاك اليوم دخلت حياتنا ، معقولة تنقص غيرتك وتسمح
لزوجتك تجاوز ؏ جبير بينا والصغير .

سحبت عمتي التلفون منها ونبهت: عوفك منها يمههه هاي
ادب شز كمل شغلك لا تهتم .

لطمت ؏ خدها من تسمع كلامو ورجعت ترد : لا يمهه وداعتك
سوالف نسوان معليك بيهن أنـه موجودة كافي عليك شغلك
وهل عصابات الخطرة الفوك راسك .

عضت اصبعها وجرتني من ايدي
وگفتني : هاي گدامي والله كلشي مابيها ، اي يا يمه قابل غبية
أنـه ما ادري بيها مريضة ، عايفيها والله ، اي هساع هاي
تسمع كلامي ، امشي ذهب فوتي الغرفتچ بعد لا طلعين منهااا
امشي بساااعججججج ، ولك يمههه بس لا تصيح والله نحلت
سوء تفاهم من الله يعثرچ يا أريج يا بنت فراس ؏ هل مشكلة .

سد التلفون عفتهن وطلعت من الغرفة
وهاي بعدها تسب بيَّ وعمتي تلطم
ماتريد مشاكل تتستر عكس ام دوهان.

حرگت گلبي الخايسة الله يحرگ گلبها
هل عطلات تتشمر فوگ راسي كل يوم
عطل جديد ، التهيت غسلت وبدلت ملابسي
عدلت شعري صاير مگرطف وشكلو يلعب النفس
رتبت السرير شلون ماكان وگعدت الى ان صاحتني
عمتي نزلت وابد ولا ترددت لان اعرف بنفسي ما غلطت
وسويت واجبي أتجاه قُــسـم ، نزلت بسرعة عمتي تعض بشفايفها
وتأشر ؏ باب حجره جدتهم : ذَهــب حدري ساعديني
نصب الآكل.

وگفت وياها تطلب مني مواعين تصب واني اعدلهن
؏ كاونتر : عجل وين دجلة وبناتها ؟

ام كــانـــون : گاعدات وياهم غادي بغرفة الحجية .

ذَهــب :كــانـــون موجود ؟

ام كــانـــون : أي اجه شايط من وراچن .

ذَهــب: اني شكو هاي اريج دخلت نفسها وگعدت تجاوز
وانه حتى ولا اعرفهاا ، كلامي وجهتو الام دوهان
گتلها المفروض ادورين الستر مو تهددين بالبنية وهي مكسورة .

ام كــانـــون : كون اليوم ينهون موضوع هل دوهان وقسم
ونخلص منهم ومن مصايبهم ، وانتِ تسدين حلگج نفس
ما اسمع منچ خلي اليوم يعدي على خير .

ذَهــب: ساكته قابل شعندي وياكم .

دخت بالمواعين فرشت سفرة بالديوان وانه
وعمتي نرتب بالأكل ، من كملنا راحت عمتي انطتهم علم
من طلعوا چنت اغسل ايدي بالحمام عبالي خلصت
انوب عمتي استقبلتني بوجبة جديدة للنسوان تصب وانه ارتب
؏ سفرة ، اريج گاعدة بعيد تخنزر علية وانه مطيتها جو لا عيون
تشوف ولا اذن تسمع متجاهلتها ؏ تمام التمام .

گعدت أكلت وياهن وبعدني ما مخلصه صاحت
عمتي : گومي ذهب طفي الچاي مخدر ، وحضري
الاستكانات وخلي بيهن السكر قليل مايحبون الكثرة .

دحكت ؏ ايدي وعليها مستغربة
گمت وبكلبي ادردم ؏ أسلوبهن
وتعاملهن ويايَّ ، كملت الچاي
وعلى جاهز اخذتو الهم
دجلة وبناتها ما يحبن الجاي بس كملن
اكل صعدوا البنات بس دجلة بقت
تريد تساعدنا بالمواعين عمتي قفلت
ولا قبلت ، بقيت اغسل بيهن وساعدتني
عمتي ، دجلة صعدت وكانون شافني
اغسل المواعين صعد فوك رجعوا
الزلم بحجرة جدتهم ، اصواتهم عالية
يتناقشون بالشغل وبالخطوات الصارت .

الجد سلطان: يولووو هاي زوجتو الكانون شسمهاا فضة
يول الله فضة چاي حار ركض ..

فراس: ذَهــب يابه ذَهــب.

الجد سلطان:فضة ذهب نفس الشي اريد چاي .

جهزت الچاي ورحت العمتي : اخذي انتِ عفية استحي اروح .

ام كــانـــون : هو طلب الچاي منچ بالاسم عيب ماتروحين
عدلي ملابسچ ستري روحچ خلي كبوس التراك على راسج .

عدلت ملابسي بس ما لكحت الكبوس
دخلت هو مندمج يسولف قدمت الچاي ؏
طبلة مقابيلهم وكلها گاعدة تَـــمــوز
ودوهان وابو وتميم وابو وعمي فراس
ونسوانهم ، وصلت للباب اريد اطلع
دخل كــانـــون رفع ايدو وصفگ
بيها بكل قوتو وصاح بيهم : صفگوا ويايَّ صفگوا .

فراس: شبلاك سالمين عليش انصفگ .

تَـــمــوز :يهووووووو وصلت بزماني يصيحوني تَـــمــوز
تصفيق فنااااااان الله وكيلك فنان تصفيق .

ثار غضب كــانـــون وضرب الحايط بيدو
نظرات التعجب احتلت ملامحهم وبعد
ما كثروا كلام كلهم رفعوا أيدهم هو يصفق
وهمَّ وياه .

كــانـــون : تدرون هل تصفيق للزلمة الزين دوهان .

وكف دوهان يريد يطلع دفعوا بكل قوتو
من صدرو رجعو المكانو : اگعد لا تتحرك خلي الكل محتفلين
بكمية الرجولة العندددددك خلي ابوك يعرف بنفسووو عرف يربيك
بس تربية عوووووجه .

دوهان: الموضوع بكبررررو لا تدخل بي ما اسمحلك أنـه
ما مدخل بحياتك حتى تجي حضرتك تدخل بحياتي
؏ اي اساااس تحشرر خشمك .

كــانـــون : بصفت المعنفه الفووووك بنت عمي
ومثل ما تعرف علمونا اهلنا ندافع ؏ عرضنا
خواتنا بنوات عمامنا لو نسيت يحتاج أذكرك
يااااااااااا زلمة .

دوهان: لا تدخل كــانـــون وصلت وياك حدهاااا
اطلع منها ابوها وأخوها ما يدخلون بيناتنا انتِ شكوووو .

تُــمــيم: ول ومحمد من البارحة لليوم محمل عليك غل الدنيا
ومابيها ، بس انتظرت احچي الموضوع الكانون ونگعد
أنـه وياه نتفاهم وية جدي وابوي وابوك .

هجم دوهان ؏ تُــمــيم گضب قميصو
وصاح بتحذير : تتفاهمون ؏ شنووووو هااا ؏ شنوووو .

تُــمــيم : تنزل ايدك وتحترم نفسك لا ومحمد
أنسى انتَ اكبر مني وتغاضى ؏ عشرة
وهين امددك انعل خيرررك .

دوهان: صوتك لا ترفعووو بوجهي
ولا تستشرفون براسي عركة وصارت
بيني وبين حرمتي كلكم تدخلون شنو
سينما فاتحين كل من هب ودب ينبص .

سمعت صوت اصابع ايدو التميم تتكسر
من قوة ضربتو الدوهان ، لثواني عم
الهدوء بالمكان ولا واحد بيهم نطق بحرف
بس دوهان لازم وجهو متألم : كل عقلك يول الله تُــمــيم
تضرررربني .

تُــمــيم : وأكسر راسك اذا تفكر أختي چيس ملاكمة
وافلشششش وجهك إذا تظن انجعم وابلعها من ادحگ
اختي عبارة عن حطااااام .

كــانـــون : وازين شاربك وتسقط رجولتك من تمد
ايدك ؏ حرمة لا حول ولا قوة وتاخذ ضعفها
نقطة قوة وتحطمها .

وگف جدهم بنصهم وهمَّ وآحد يخزر بالثاني
وبنظراتهم كل انواع الوعود الغاضبة
- كافي يا عديمين التربية لا تحترمون جد ولا تحترمون
ابهاتكم تتصارعون مثل ثيران لا خجل ولا حياء .

تَـــمــوز : أستلم الجلطة ؏ أصولها جدي ويانا
جنت تسمععععع الكلام الصاررر احلفك بقميص
يوزرسيف ركز عوف التربية بس انتَ شاطر بيها
والخجل والحياء متنازلين منهن الك حل الصخاام
بوجهييييييي .

سلطان: هستوني گلت يا الله هذا ابو دروب ما حشر
روحووو وغثني بكلاموووو ، يول من كون صدگ
صخام بوجهكككككك شبلاك تعدد وتصف حالك حال العجوز .

تَـــمــوز: حل مشكلتهم لا تصير گاتل ومگتول
وذنبهم كلهم برگبتك حلهاااا وعوفني اعيش شبابي لا تجلطني
بسوالفككككككك .

سلطان: ول ومحمد حالو حال الگحـ*** القرچ
من يحچي يضيع الاول والتالي علينا .

تَـــمــوز : مدوخكم فارض حضوري
وكل هذا توفيق من الله .

كــانـــون :سد بوزك لا اطلعك من البيت دفرات
جدي حلهاااا اخصمهااااا مثل ما بديتها تنهيها.

سلطان: وينهاااا قُــسـم أريدها تجي مقابيلي فورًا.

فراس: ول دوهان أصعد خليها تنزل .

دوهان : دزلها احد غيري أنـه ما اصعد .

فراس : اولها وتاليها تصعد امشي يلة .

كــانـــون : ما يگدر مكسورة عينو صار
يومين ما صاعد صعبة يدحك وحشيتو .

گعد دوهان دنج وايدو ؏ راسو
صعدت رضية وصعد
وراها كــانـــون ، مرت
دقايق ونزل وقُســم تمشي وراه .
>>>>>>>>>>>>>>>>>
قُــسـم ...

مُخطط تَجبر ، حياكة مستقبل
سَلبوني ضماناتي ، سلبتُ روحَهم
عقلياتهم أدت بي إلى التهلُكة
مُستَهينين بقدراتي وبِحَجم خطورتي
واجهتهم بمكر وخداع وقلب من فولاذ
رسمت لهم كنوز في حفرة وعندما
اقتربوا دفنتهم ودفنت ما تبقى من
اجنحتي السوداء واحلامي المحطمة معهم
وثبتُ أن نظرياتهم وتجبرهم يحطم
على أيادي الترياق قُــسـم ...

ذبلت ، عيوني جفت ، توسلات
وتوسلت الى آن هلكت وبعدهم
مصرين فترة وتأقلم ، اخخخخخ
يا اهلي ، يا برودكم ويا حرارة
ناري منكم ، أمقت من يجبروني
اوگف مقابيلهم واسمع كلمتهم
المعتادة: شنو أخرتها وياچ يا قُــسـم .

كــانـــون : صدگ تحچي جدي أنتبه الحالها
الصاير بيهااا جريمة تعرف شنووو جريمة .

سلطان: وين تريد توصل انتَ وياهااا كــانـــون ؟

قُــسـم : للطلاگ جدي للطلاگ .

سلطان: مو عدنا لعبة عبالكم الطلاگ سهل بـ يا
حظ وبخت تطلگين اطلبي التردي بس سالفة الطلاگ گطنة
وتشيلها من اذنچ .

قُــسـم : وانه ما اريد غير تفكون قيود رگبتي من
حبل المشنقة اعتقوني في سبيل الله .

دوهان : حبل المشنقة ؟

قُــسـم : آلك عين تخلي عينك الحقيره بعيني
بعد ما كسرتني وهديتني هدد ، عليش مستغرب
عبالك انتَ حبل نجاة ، للعلم بالنسبة الي الموت متلبس بيك ؟

دوهان: عليش أنـه بشنووو غلطت ضربتچ لان تجاوزين
حدودچ ، لو تنكسر عيني لان اخذت حقي كرجل صار سنة
متزوجين سنة صابر عليچ وانتِ تزيدين بعنادچ ورفعت
خشمج تعلى ما تقل ، السانچ يطول ما يقصر

سلطان: ول يا ابوهاااااا ادحگ صلافة بنتك
ول طلع دوهان مو زلمة وما كاسر عينچ من زمان .

قُــسـم : الصلافه يمكم وتموووووت جدي
من تزوجوني الأنسان أنـه اكررررهووووو
وما أطيق اسموووور ولا أطيق اسمععع صوتووو
واخر انسان افكر ارتبط بي وتجبروني
أتعايش وياه وتلاحظون حالي مدمر ضحكتي
انتهت احلامي تحطمت وبعدكم مصرررين
تحطموني أكثر رغم حقدي وكرهي وأضح الووو
بس تغلقون عيونك ؏ حقيقة هين اعتبروها صلافة
ومن تعتبر الرجولة بالفررراشش هين حقكم اهانة
ومن تعلموهم اذا الحرمة ما تنضرب من زلمتها تطلع
عن الطريق ما اعتبرررركممممم زلمم واعاند واطلع
عن الطريق لان بعمرررو الضرب ما يجيب نتيجه بس
يزيد كرهي الكم واحد واحد .

سحبني كــانـــون من أيدي حشرني بزاوية الغرفة
وهو وگف مقابيلي ماد ايدو يدفع بأبوية هجم بكل
ثقة يريد يضرب بنتو بدل ما ينقهر ؏ حالي .

ابو تُــمــيم: كــانـــون اريدهااااااا هل سافلة ارجعععع اربيهااا
لج مووووو عيب تجاوزين علينا قُسسسسسم .

كــانـــون : عمي هاي بنتك وهذا الكلام بگلبهاا
اسمعوووووو منهاا وما آلك حق تحاسبها لان
ما تحچي مقابيل الغرب كلنا اخوتها
وعمامها وجدها اذا احنا ما نسمع بنواتنا منو يسمع فهمني .

قُــسـم : مايسمع منك منومين مغناطيسيًا وجدي منومهم
اذا يصير عصبي يقلدون عصبيتووو واذا ضحك
يضحكون واذا يوگف ويايَّ يوگفون ويايَّ .

ابو تُــمــيم : تريدين اوگف وياچ وانتِ تهينين بزلمتچ مقابيل
الكل حقووو يضربچ ويكسرر راسچ ؏ هل لسان الطايح حظوو .

قُــسـم : لاتنقهر وتفكر دوهان ماعندو كرامة
كرامتو مداس احذية المضيف مالتكم.

ادحگ دوهان اغتاظت اعصابو وومن كثر ما وسع عيونو
حسيت راح تطلع من مكانها كور ايدو
وهجم ؏ كــانـــون گضبو من ملابسو : أنطوني هل مستهترة
اليوم احورچ مداسسسس وادوس بالقندرة ؏ راسچ .

قيد تَـــمــوز حركتو وعاط بي : مو هيج يول الله استقررو
خلونا نتفاهم ، دوهان اذكر الله يخووي جاهل هاي
وعصبية تخوط وتخربط مو بوعيها.

دوهان: ارجعها الوعيها بس اريدهااا خرب اگص السانچ
اليووووم قُسسسسسسسسم ادحگي اذا ما ازلزل الگاع عليج .

كــانـــون : تُــمــيم اخذ أختك فوگ .

صار مقابيل الباب معترض حركتنا
جدي گعد وعمي فراس طلع من المكان
امي تلطم وتصيح الله يگص السانج
يا قُسسسم ، جدتي تصيح : ربيها هل مصگوعة ام السان .

ام دوهان : يستاهل غسلت بكرامتووو الگاع وكل يوم الصبح
وبليل تگلوو اكرهك وما يقبل يطلگها ويكسرها
والله يا عمي لا الها غرض بملابسو تگول
تلعب نفسي منو ، ولا الها شغل بأكلو ، ولا بشربو ، ولا بكلمة
حلوة شايف منها ولا وجه سمح اربعة وعشرين ساعة
وجهها محتقن عليَّ لا احترام ولا خوف .

قُــسـم :أنـه جنت اكرهووو ومن تزوجتو كرهتو إضعاف بسببج
وبسبب تدخلاتچ بحياتنا تحشرين نفسج بالجبيرة والصغيرة
ولا تخلينا نتنفس ونعرف راسنا من رجلنا وهو مسلم اذنو
الحضرتچ تهدمين بحياتو اكثر .

كــانـــون : كاااافي قُــسـم تخبلتي لا تحچين حسج ما اريد اسمعووو .

دوهان: انتَ السبب كبرت روسهن على زلمهن خواتك حسرة
واحد مو زلمهن يحچي وياهن تلعب لعب وهاي المستهترة
السانها بطولي صااار من وراككككك يا اخي اطلع منها مو
راح اطلعععععع روحكككك .

كــانـــون : يول اطلع روح منوووووو
ما تستحي تحچي ويايَّ هيج هساع أنـه مجاوز عليك
تريد تضربها ، أضربها بس اذا عبالك يبرد گلبك انتَ
غلطان تكثر مشاكلكم وهمومك ،  يولوو نبينا محمد يگول
رفقاً بالقوارير حتى كلام نبينا ما طبقوا الله اكبر عليكم اذا صدگ .

دوهان: انتَ راضي ؏ كلامها والتجاوز ، تقبل مرتك
جدام اهلك وعمامك تگول كرامتو مداس .

كــانـــون : إذا أضربها مثل ضربك القسم استاهل تسبني
واذا أهين كرامتها واستهين بمشاعرها استاهل تسبني
واذا أدخل فلان وعلان بخصوصيات حياتنا استاهل تسبني
واذا ما احتويها وأسمع السوالف المضيقة صدرها استاهل تسبني
أنـه ما اگول أنـه مثالي بس يا دوهان ماكو أوجه شبه بيناتنا
أزين شاربي إذا أوصل أختي او حرمتي لمرحلة فقدان اعصاب
بحيث تحچي كلام عني بدون ماتفكر آني استحق لو ما أستحق
اليوم قُــسـم اذا أسألها عليش تسبين دوهان تگول يستحق
ومن وجهة نظري انتَ تستحق منتهين لهنا عزيزي .

دوهان: كــانـــون سلمني قُــسـم .

كــانـــون : دماغك شنو تركيبتو يا اخي افهممممم .

دوهان: كاااااااااااااانون سلمني قُسسسسسسم فورًا.

قُــسـم : ما أمشي وياك خطوة وحدة افتهمت لو لا .

دوهان: كــانـــون تسلمني قُسسسسسم لو أفصل عليكم الله شاهد ...

ركز كــانـــون بعيونو للحظات
گلبي نبضاتو ارتفعت من الخوف
ولا تصورت كــانـــون يخلي أيدي
بيد دوهان : ما اروووحححح ولا امشي
عوف ايدي اعتقني دووووهااااان گلت عوفنييييي .

كــانـــون : متخلف مايصير براسك خيرررر
المشكلة مو بس بدوهان المشكلة الكبرى بعمي
قابل ؏ بنتو تعيش هل مهزلة .

اخر كلمات سمعتها من كــانـــون واني انسحب
من ايدي وأصعد الدرج بالإكراه ، دفر باب الغرفة
ودفعني بوسطها خفت يعيد الصار قبل يومين
وگفت وركضت زحلگت روحـي وفتت زروگ
جوة الجرباية صرت بالنص : الله بلاني بيچ يا مهبولة.

لدقايق سكن وما سمعت ولا صوت غير
طگت الجداحة وصوت انفاسو ، مر وگت
مو قليل بس ضهري تصلب من برودة
الگاع ، سمعت صوت خطوات تقترب
صار مقابيل الجرباية التفت وگعد
بكل هدوء صرت اسوف اقدامو : والله يا قُــسـم ردت امسح بيچ الگاع جوة بس ما رضيت عليچ ، وگلت اصعدج فوگ واخلي
كرامتچ مداس للحمام بس بيني وبينج لان اعرف
الواكفين جوة باجر عگبة يگولون دوهان سوه
كرامتج مداس حمام ، مثل ما راح يسون وياي
والكلمة والثانية يذكروني هااا قُــسـم گالت ؏ دوهان
كرامتو مداس المضيف أنـه اتحملها انتِ تخلقين مشاكل من تسمعيها منهم وتبجين ونفسيتج تدمر وترجعين تگولين بسببك .

قُــسـم : مشكلتك يا دوهان الناس تهمك
بس أنـه الناس اخر همي .

دوهان : ومن الناس اخر همچ عليش تهتمين بكلامهم
وتجاوزين وتسوين مشاكل اذا الناس اخر همچ
تجاهليهم لوو كلامچ بس سوالف .

عدلت نومتي جوة الجرباية وحسيت
الكلام عن بعد وبدون ما ادحگ وجهو
واخاف يعصب ويضربني احسن .

دوهان: سكتي موو طبعًا ماعندچ جواب .

قُــسـم : عندي جواب لكل سؤال المشكلة
ماتستاهل أتحاور وياك واتعب نفسي .

دفر طرف الجرباية وصاح بتحذير
دوهان: لا انصحچ تعبي نفسج بالكلام
حتى لا اتعبچ بطريقتي الغير اخلاقية .

بقيت ساكته وهو ساكت شغل جكارة ثانية
وتلفونو يدگ غلق المكالمة وجر نفس
واحد مخنوگ وحسرة انسان هلكان
- تعرفين قُــسـم لازم أبرد گلبي بالكلام
وأحفظ كرامتي وياچ ، اليوم اصير وياچ صريح
وبلا لف ودوران اگلج يا قُــسـم الله شاهد مثل
ما انتِ مجبورة عليَّ أنـه مجبور عليچ
ولو بيدي اطلگج هساع بهل لحظة واخلص من
خبالچ بس مو بيدي .

قُــسـم: من يوم يومك ماكو شيء بيدك .

دوهان: ههههه كلشي بيدي بس موضوعچ خارج عن السيطرة.

قُــسـم: شوية واذب من راسي اذا تگول گلبي مانعني
اعوفج وانه احبچ وانه ولهان بيچ وانه وانه وهل خرابيط .

دوهان: تخسين أنـه احبچ ام السان هو انتِ همات تنحبين
خليني اجرع تصرفاتچ بعدين اصير ولهان بيچ المهبولة .

قُــسـم: عجل شنو موضوعك كرامتك بعدها مداس .

تفل ؏ گاع من حرگت گلبوو : ول غيرررر تتچعم راح
أدخلچ جوة الجرباية اراويچ النبي عربي .

رجعت عدلت نومتي چتفت اديناتي
وفتحت إذني استمع الو واركز بكل
حرف ينطقوا وانه ما مصدگة : تتذكرين من سويت حادث
قبل زواجنا بشهرين وطلبوا الفصل 100 مليون ؟

قُــسـم: إي أتذكر كلشش زين لو مسجون ومخلصين منك .

دوهان: لو طالبين فصلية اسلمچ الهممم وأخلص من شر السانج .

قُــسـم : شگد جلفط (خربط) بالحجي وما كمل .

دوهان: ول من جلفطو عگلج گولي امين .

قُــسـم : كمل دوهان كرامتك انخسفت.

دوهان: تربية ماكوووووو شسوي ، المهم اخخخخ يابويه شلون اتحملها اي فـ جدنا الكريم رفض يسلمني 100 مليون .

قُــسـم: يااا مو سلمك شگد چذاب .

دفر الجرباية وعاط : يولييييي منوجذاب يا مصكوعة
من مصيبة ؏ راسج ورأس السانچ .

قُــسـم: غير انتَ تچذب بعيوني دحكت جنطة
الفلوس بيدك وطلعت وياهم كلهم سلمتوا الفلوس .

دوهان: بعد توقيعي ؏ عقد يجبرني أتزوج قُــسـم
لمدة 7سنوات اذا استمرينا واحد يكره الثاني بعد
انتهاء المدة المحددة إلنا الحق اطلك واخلص منچ
ومن شرچ .

طلعت رأسي من جوة الجرباية
وهو دنج راسو يدحگ عليَّ متعجب
تكلمت بقمة الحماس والفرح : احلفففففففف ما تحبني صدگ
وتكرهني ، يعني شگد يصير عمري من اخلص منك .

طلعت اصابيعي وإني مستمره نايمة جوة الجرباية
بس راسي وأيدي طالعات: هساع أنـه عمري 20
بالله 21,22,23 .

قاطعني وهو ينزل ايدو يغم گصتي بكل قوتو
براحت ايدو الحقيره: من غمه التغمچ يالبرغوثه 
شايلة عقل من نعل عمرج 20 من تورطنا صار سنة
متحملچ هساع عمرج 21 من اخلص منج يصير عمرج 27 .

قُــسـم: يلة همات بعدني صغيرة ، بس برأيك جدي
شنو يستفاد من زواجنا.

دوهان: بالبداية دخت بالموضوع مثل حالچ هساع
بس بعدين عرفت عليش والصراحة كرهتچ بالزايد .

قُــسـم : الله يكرهك كون يالـ ..

دوهان: لاااااااااا تسبين يا دوخة راسي ومصيبتي .

قُــسـم : أحترم وأحسب احساب لكلامك تا أحترمك
وجاوبني شنو الفائدة.

دوهان: بعدين تعرفين .

گضبني من اديناتي سحبني من جوة
وشمرني ؏ جرباية ورجع سحبني گعدني
من الخوف لزكت بالتاج
اصرخ : يمهههه يمممهههه هنااااااااا يمههههه .

قيد حركتي من فتح ايدو وحطها ؏ جوانب
- اعتذري مني فورًا.

قُــسـم: ماغلطت انتَ اعتذر مني .

دوهان: يولي يالمصگوعة شمسوي وأعتذر
شنو وگفت گدام الكل وگلت قُــسـم كرامتها مداس المضيف.

قُــسـم: يولو انتَ مسوي الأكبر منها غلطتك صعب تتسامح
عليها ، سالفتك ما تترگع .

دوهان: طالع مصلخ بالشارع .

قُــسـم : ياريت ولا عملتك السودة ، يولو انتَ اغتصبتني
بكل وحشششششية وهمجية وقرف وعنف .

دوهان: هو أنـه وحش ديري بالج مني لا اكلچ ، اعتذري .

قُــسـم : انتَ تعتذر وتطلع برة الغرفة ممنوع تدخلها
بعد الى ان ننفصل واخلص منك يا مغتصب يا ....

رجعني ؏ سرير وصار فوگ جسمي
رفع ايدي ؏  راسي وضربني راشدي
خفيف عودددد ؏ وجهي : شبلاك دووووهان لا تضرب
وگوم مني اختنكت ايدي توجعني خرب دوووهان كافي .

دوهان: ركزي ويايَّ واعوفچ ركزي كلششش زين
آول شي أنـه ما اغتصبتچ لان انتِ زوجتي ؏ سنة
الله ورسولة وصار سنة متزوجين ولا بيوم ضايقتچ
لو جبرتچ ؏ قرب صح مرات أضعف واقترب وتنفريني
واگول ميخالف مجبورة عليَّ ، بس أنـه زلمة ادحگ
حلالي يمشي مقابيلي وما اگدر اتقرب تره كفررررر
ورغم هذا اكول عادي هل برغوثه ما اريدهاااااا
بس ذاك اليوم جبرتيني بتصرفاتچ وجنت مناك متحلف
؏ اخلاقج الطايح حظها وصار الصار عادي وطبيعي يصير بين
كل المزوجين وتره اخذتج طبيعي لا أذيتچ ولا جرحتچ بس
انتِ عيارة وعيارتچ زيادة عن الزوم .

قُــسـم : هو غير موتتني طبعا روحـي تخلص
من الضرب والصدمة ، يا چذاب متحلف لو خفت
صدگ أنفذ التهديد واشرد منكم .

دوهان: لااا تجاوزين مو راح اتصرف وياچ تصرف غير اخلاقي .

قُــسـم : دوهان اياك والله صدگ افصل عليك .

دوهان : عجل نتفق ؏ كم نقطة برضاتچ تا لا تصير
غصب عنچ وتگعدين تبچين وتونين حالچ حال البرغوث.

قُــسـم : اسمعك بس من هساع ما أسلمك روحـي بعد لو تموووت .

دوهان: دولي يولي يا دوخة راسي ما اريدچ
قابل بس انتِ بنية بالعراق ماشاءالله بنوات الحلال چثير .

قُــسـم : اي عفية روح الهن وخلصني منك .

دوهان : طبعًا اروح قابل آخذ أذن منچ .

قُــسـم : لا شلي دخل بيك ، بس اذا مو هذا
طلبك شنو تريد بعددد .

دوهان: من اليوم تقومين بواجبي من ملابس اكل
حَمامي جاهز ملابسي جاهزة اكلي جاهز
جنطة الدوام جاهزة وكلشي يخصني انتِ مسؤولة عنو .

قُــسـم : هههههههه يعني ولا راح تتغيرررر
من سمعت امك گالت معليها بي ولا بملابسو
ولا بأكلو گلت اريد تكونين مسؤولة عليهن
تحفظ كلامهاا نصًا .

دوهان: يولو امي شكووووو كلمة والثانية وصحتي
امك تره مو حالة هااييييي غير محروگ گلبها
؏ ابنها تدحگ حالي مخربط حالي حال العزابي
هي تهير (تحضر) كلشي احتاجو وانتِ ولا ؏ بالچ
كل ام بمكانها تسوي مثلهاااا لو تعرفچ بيچ
خير ما تسوي مشاكل بس انتِ سوالفچ خايسة.

قُــسـم : من الأخير أنـه مابيَّ خيرر .

دوهان : بس وية تُــمــيم وتموز وكانون بيچ خير
بس يمي مابيچ خير والمفروض أنـه زوجچ أولهم
تقومين بواجباتي صح لو غلطان .

قُــسـم : اعتزل من كل شي يخصك من البداية گلتها وأرجع أعيدها.

سحب ايدي اكثر وقيد حركتي أقوى من قبل
وايدو الثانية ضغط بيها ؏ رگبتي : دوهان اختنكت ايدك .

دوهان: اخر مرة تعبت وحلگي يبسسسسس من الحچي
تگومين بكل واجباتي لو اتعامل وياچ تعامل غير اخلاقي
واعيد الصار ذاك اليوم بس بطريقة خفيفة لطيفة بحيث
منها واخليچ تمشين وياي مسطرة ، وكلها من يلاحظون
التغير يگولون هذا خوشششش مشتغلها شغل درجة أولى.

قُــسـم : يبووووي دوهاااان عوفني عليش اوعدك بالچذب
افهمني يا اخي لا اطيقك ولا اطيق كلشي يخصك عوفني
الله يخليك لا توصلني المرحلة اكرهك لدرجة ادعي عليك .

دنج راسو ؏ رگبتي طبع آول بوسة
عطت بصوت ونقهرت منو اكثر
نزلت دموعي وأني ارافس برچلي : كااافي دوهان راح اتقيئ
من قربك ، دوهان ومحمد أكره نفسي بكل مرة تقترب مني
ابتعد بداعت امك وابوك ابتعد .

شمرني وگام صاح وهو متنرفز الى درجة
وجهو احتقن وصار احممر : شبلاچ قُــسـم الخاطر محمد .

قُــسـم : يعني ميصير تجبرني عليك مو گلت اكرهچ
اي كافيييي عوفني وروح وين ماتريد تروح بس خلصني منك .

عطت وجهي افتر من الراشدي
خلاني اشهك بلحظات طلع وهو يدردم : من انعل ابوچ
لابو اليقترب عليچ بنت الـ ****** ياااا *******
طبعًا اكرهج ؏ تصرفاتچ الخاايسة مثلج تفففففففففووو عليچ
اروح قابل باقي عليج ماكو سافلات مثلچ اكووو أطنان .

فتح الباب صارت امي مقابيلو
ضربت على صدرها وضربتو على
صدرو : وين بنتي شسويت بيها ؟

رفع اديناتو وصاح بعلووو صوتوو
دوهان: شسويت بيهااا بلعتهااا قابل هذيچ السانها
برنووووو ترمييي وما يخلصصص هاي تموتني وتدفني بيدها .

نزل بسرعة بحيث من العصبية اسمع بايات
الدرج شوية ويوگعن ، فاتت امي تتفحصني
دفعت ايدها وعدلت ملابسي : لا تلزميني قبل شوية
تدعين عليَّ مقابيلهم خلصتي عمرچ تخافين منهم
بالچذب ما وگفتي بوجهوو تمنعي يصعدني
ولا تخافين علية عود من يموتني ابچي ودگي ولطمي .

ام تُــمــيم : والله ابوچ لزمني هددني بس أدخل بالموضوع يطلگني
ومن دحكت كــانـــون سلمچ گلت امان لان مستحيل يسلمچ
الوو ويدري بي راح يأذيچ مو تعرفين هو قاريهم ويعرف
تصرفاتهم وتحركاتهمم .

قُــسـم : ولوووو والله يخووف عبالك هرقل وهجمممم
بيوم من الايام اموت بس من الخوف منوووو .

ام تُــمــيم: اي يا يمههه انتِ تجاوزين عليَّ مقابيل الكل
ادوسين بطنو تريدي يصفن عليچ تهينين بي ويغلس
عليچ كم مرة نبهت عليچ وگلت يولي يا غبية
سايسي عاملي زين والله حتى يسيطر ؏ اموو بعد ما يخليها
تدخل بحياتكم .

قُــسـم : مااااااااااا راح يصير البالچ وراح اطلك منووو غصبًا عنكم
مااا اريدووو ولا راح اصير الدوهان حرمة عادية
ولا نصير زوجين طبيعيين مثل باقي المتزوجين.

أم تُــمــيم: عجل أبقي بنفس الدائرة الى ان يقضي عليچ .

طلعت وانه رجعت لفراشي مثل الأيام
الفاتت اكل بروحي ؏ صار ذاك اليوم
بس اليوم دخت بموضوع جدي
ياترى شنو غايتو من زواجنا أنـه ودوهان ؟
وعلى شنو ناوي ؟
معقولة من عرف موضوعي
عززا اي ماكو غيرهااااا حاربوا
وهچ بسببوووو ، لالا قُــسـم جدي صح انسان
طاغي ومتجبر بس حنين ؏ احفادو مستحيل
يكسرني ويكسروا اكو سبب ثاني بس شنو هو ؟

هل يا ترى دوهان يعرف السبب ؟
معقولة تصرف جدي مجرد تجبر وانتقام ؟

يتبع ...