رواية تجبر أحفاد الــ دليم الفصل الخامس والعشرون 25 - بقلم اسـاور حسين 🦢✨

تَــجــبـر أحفاد الــ دلــيـم🦅
بقلمي : أساور حسين          
المُلْتَقَى _31 _

ملكات قلبي لطفًا لا تنسون التصويت ؏ بارتات بوساتي
<><><><><><><><><>
ذَهــب ...

طبگت قُــسَـم الباب ودوهان نزل بقيت اني وأم تموز
نسولف على بيت العايلة وشصار بيهم اخر مرة رحت
وخلتني صافنه من گالت : ادعي ربي تطلع قُــسَـم حامل
حتى تنكسر عين ام دوهــان هل شيطانه تريدو يتزوج شدن
بنت دجلة وتحرگ گلب هل مسكينة .

أريد ارد على كلامها وطلعت قُــسَـم تلطم : هساع صدگ
مصيبة ماكو حمل .

ضحكت عمتي بعلو صوتها على شكل قُــسَـم
وهو صعد ؏ درج رافع ايدو ويصيح : أي بشريني .

قفلت الباب من ردت رضية : ماكو حمل خيرها بغيرهه .

هو صارت عيونو براسو صعد يضرب بالباب
قُــسَـم: بس لحظة نتفاهم دوهــان الوردة .

رجع يضرب الباب بكل قوتو وصاح : بس افتحي الباب اليوم
اشبعچ تفاهم ، اليوم تلعبين هيلا هب بالهوى .

ادحك ؏ تَـــمــوز بيدو علاگه شامية وياكل بيها
ويزگح من جوة: يولوووو حدر انتَ وياها نستانس ؏
مشاكلكم نغير جو تعبانين من الدوام نريد نضحك .

دوهــان: صبر هساع إلكح بت عمك من فوك واخليكم
تضحكون ؏ راحتكم هل برنو گعدتني من نومي وطلعتني
للشارع ادور صخام حمل .

قُــسَـم : شبلاك يالحنون أول وتالي لازم اتأكد واجيك وضعي .

تَـــمــوز : اوگف اجه اخوها .

تُــمــيم: ها سالمين شو اجه اخوها شصاير .

تَـــمــوز : دوهــان يريد يلكح اخيتك من فوك
بدون شكرًا فاعل خير يسموني .

كــانـــون : شبلاها عجوز العرب تفتر علينة اليوم
تگرط شامية .

تَـــمــوز : نتونس عليكم .

كــانـــون : اگلك هاي الشامية مو جانت بالمجرات لو أنـه متوهم .

تَـــمــوز : لا خوية ما متوهم هي نفسها طلعتها من المجرات.

كــانـــون : تاكل بكيفك ؟

تَـــمــوز : البيت بيتي وكلشي بهل بيت ومن ضمن الكلشي الاچل
ملكي خلف الله علية مقهور عليكم وعيشتك بيتي ولا ايجار ولا مصاريف
ودوهان وقسم همات راح يعيشون هين لو كل واحد بيكم يدفع 150 المجموع 300 بيهن سوالف يحبهن گلبي اطلع منكم راحت بالي وتعب اليالي .

دوهــان: مبين تلزم درب فراس ملاهي .

تَـــمــوز: استغفر الله ربي وأتوب أليك اني درب السجادة
يولووو غير درب ما اعرف ، اسئل امي ماخليت صلاة
تعتب علية ما صليتها قبل لا اطلع .

كــانـــون : شلالات الچذب ولا يستقر الهتلي يصلي احلف
عليك يول ماتعرف صلاة الفجر كم ركعة .

تَـــمــوز : أثنين بعدين أنـه صلاتي مميزة مو مثل صلاتكم
أنـه اصلي من احچي ؏ فوفو وادعي علية ليل مع نهار
حتى تعبت من الدعاوي حورت الدعاء.

كــانـــون : شسويت !!!

تَـــمــوز : استحي من ربي من ادعي ؏ فوفو
اتحول حرمه مبيوگ زلمتهه صرت اختصر الدعوة
ادحك ؏ غيوم واصيح بعلو صوتي
( ربي انتَ تعرف شنو اريد ) .

كــانـــون : طيح الله حظك اذا صدگ .

رضية: اي والله يحچي صدگ قبل شوية بالطريق
اول ما وصلني للباب رفع راسو وهيچ يدعي.

كــانـــون : حرام يولوووو .

تَـــمــوز : علاقتي أنـه وربي لا تدخلون بيها .

تُــمــيم : انتَ دوهــان انزل وعوف اختي لا اصعد أنـه
إلكحك من فوك يهدد بيها ابو راس .

دوهــان : انتَ تعرف اختك شسوت بيَّ .

نزلت الدرج ورضية أخذت دوهــان نزلتو وياها
دخلت للمطبخ رتبت صينية عصير وكيك ودخلت
عليهم بعدهم يسولفون ، ماكو اقل الربع ساعة وگفت
قُــسَـم بالباب تدحك ؏ دوهــان وتأشر ؏ تخم الفارغ
_ عادي اگعد وياكم ؟

دوهــان: لاااااااااااااااا مفورتلي دمي يالبرنووووو .

بدون نقاش رجعت للمطبخ هو ظل يحوس اسمعو يوشوش
التموز : خليهه تجي تگعد ويانه بس لا تگول أنـه گلت .

تَـــمــوز : ول قزوم حدري دوهــان يگول خليهه
تجي تجعد جدامي اشبع منها شوف قبل لا ارجع
للدوام .

دوهــان : الله لا يرضى عليككككككك يوووولوووو أنـه
شوكت حجيت هيج تمووووززززز خرب بيك يول
يالغبي هاي تصدگ بكلامكم وترفع خشمهه .

تَـــمــوز : حدري اتقشمر وياچ بس
گال خليها تجي تگعد ويانه مشتاقلهه  .

كــانـــون : كافي يالمزرعد كافي مو گاعدين نسولف .

تَـــمــوز : سوالفكم مال شياب واني بعدني شاب .

كــانـــون : يمه رضية هذا عليش صار ابنچ انتِ وياه مختلفين .

تَـــمــوز : مثلك انتَ وفراس همات مختلفين
حالكم حال المخضر والفواكه بيتنجان وتفاح .

تُــمــيم : يول تموز ؏ طاري فراس خبلني يريد اراقب بيتكم
يلعن بليسووو يحب امك .

شمر علية التلفون گمز علية وهو يلوي ايدو
تَـــمــوز : يولووووووو انجعم  لا اكسر سنونك
وانتووووا هيوووووو لا تضحكون الموضوع مايضحك.

تُــمــيم : يول هاي الحقيقية .

تَـــمــوز: يخسي هل سافل ما بحليف يگرب من امي
لو يدحك عليهه بعد امووووتوووووو .

كــانـــون : اثگل عوف تُــمــيم راح اگوم اگضبك الشارع
يالمهرفل ابو رجفة بطل سوالفك بطلهه .

تَـــمــوز : يمههههه امشي نروح من هين
هذولي ما وراهم غير المغثه .

كــانـــون : اربز لحظة بعدني ما مكمل
يمه رضية جهزوا ملابسكم هل يومين
نطلع من الأنبار متوجهين البغداد .

تَـــمــوز : أنـه وامي مانروح وياكم ولو امووووت
ما ارجع واگعد بيت واحد أنـه وفراس العار .

كــانـــون : أولًا من تحچي احجي عدل
ثانيًا نروح بسياراتنا وهو بسيارتو وهناك
من نوصل ناخذ بيت ثاني غير بيتهم .

رضية: اذا هيچ نروح وياكم معليكم بي .

تَـــمــوز : الله كريم منا اليومين .

طلع وامو راحت وياه ، وتميم شوية وراح
دوهــان رجع نام وقسم شغلت التلفزيون هي
وكانون گاعدين ، اني راسي ثگل عفتهم
وصعدت غيرت ملابسي ونمت بفراشي
مر وكت مو قصير وسمعت كــانـــون دخل
الغرفة بقيت امثل النوم مثل كل يوم صرت
ابتعد عنو وهو متجاهل تصرفاتي ويتعامل طبيعي
ولا كأنو صاير شي بس نظراتو مراقبتني .

الثاني يوم من الصبح گعدت ارتب بملابسنا
بالجنط ما اخذت چثير وبالأصل ماعندي
ملابس چثير ، اخذت المهمات وقسم راحت
البيتهم وقت ظهرية لملمت ملابسها هي ودوهان
ورجعت ، قُــسَـم جهزت الآكل وانه وياهه
الى ان رجعوا ادحك ؏ كــانـــون متغير 180
درجة تعجبت من نظرات الغضب بعيونو واعصابو
التالفة وما يطيق وجهي ترك الآكل وصعد فوك قفل
الباب علية واسمع صوت طگطگه .

قُــسَـم : اسم الله شصاير الصبح طلع كلشي مابي .

دوهــان : ذَهــب اصعدي ادحگي شبي .

اخذت بكلامو وصعدت بس ايدي ؏ گلبي
دگيت علية مقفول : كــانـــون بيك شي .

فتح الباب وسحبني من ايدي شمرني بنص الغرفة
وگفت ادحك برعب آول مرة يعاملني بهل طريقة
ذَهــب: شبلاك كانـ ..

كــانـــون : اششششششش ولا حرف حاليًا ضابط اعصابي وياچ
وبكل إحترام أوجه سؤال وأضح أنـه اعرف الجواب بس منتظرو
منچ .

ذَهــب: شصاير يا ستار اول تالي تعاملني بهل طريقة ؟

كــانـــون : عندچ تواصل انتِ واختچ ؟

ذَهــب: لا .

كــانـــون : ذههههههههههب .

ذَهــب: گلت ماعندي .

كــانـــون : اكرر سؤالي للمرة الثانية
ذَهــب عندچ تواصل انتِ واختچ ؟

ذَهــب: لاااا من يوم عرسهه بعد ماتواصلت وياهه .

كــانـــون : انتِ غبية اگلچ أنـه اعرف كلشيييييييي
جوابچ لايقدم ولا يأخر بس اريد اسمع منچ ما اريد
احقددددددد عليچ ذَهــب اعترفي .

ذَهــب: ماعندي .

كــانـــون : للمرة الأخيرة اكرر السؤال عندچ تواصل انتِ واختچ .

ذَهــب: ماعندي .

فقد والأول مرة ادحك كــانـــون بهل حالة
شكو عطر كزاز شالو ويلكح بي جوة رجلي
سديت اذني بيدي ومن منظرو ومنظر الگزاز
ظليت ارجف وأصرخ ، والنوبة اجتني وسعت عيوني
من گضبني من ايدي ورفع وجهي بيدو صرخت موجوعه
ذَهــب: كــانـــون تخبلت .

كــانـــون : اليوم لو مو نوبة تشكل عندچ تجاوبيني
ادحگي عدل يولو أنـه الرائد كــانـــون مجرمين اشكال
الوان ماتوا جوة ايدي يعني ايدي والمووووووت .

صرخت وگضبت ايدو ألي خلعت ايدي من مكانهه
وهو ما يدحك جدامو بعد عيونو حمرة واعصابو ترجف
كانون : لا يغريچ هدوئي أنـه من افصل بعد اهلي ما اعرفهممممم
سالفة الاستغفال لعبتي .

ذَهــب: بس نتفاهم الله يخليك .

كانون : صار فترة عندي علم بكل الموضوع
وانتظرت ما تغلطين مثل اول مرة من قررتي تسلمين
راسي للدواعش گلت هل مرة أخذت عبرة وبعد ماتكررالغلططططططط .

ذَهــب: ما كررت والله العظيم ما كررت رفضت كلشي
حتى اختي رفضتهه .

كانون : طلعتي غبية رجعتي تغطين وتدحكين بوجهي بدون خجل
وانتِ تخططين من ورايَّ .

ذَهــب: ما خططت والله وغلاتك عندي ما خططت
رفضت كلشي واختاريت طريقك .

كــانـــون : چذابة ذَهــب انتِ چذابة
خلصصصص لهنا وخلص صبري وياچ
ما احب اعيش أنـه وانسانة مخادعة مثلچ .

ذَهــب: لا أبوس ايدك والله ألي نقلك الكلام يريد يخرب
أنـه اختاريتك ميصير تعووووفني .

زادت النوبة وراسي افتر منهه ولا إراديًا
ارفع ايدي واضرب براسي : لا تصير مثلهم افتهم مني .

كــانـــون : افتهم منچ ذَهــب شلون افتهم بعد اجيت
واحترمتچ وسألت وانتِ تنكرين شلون اثق بيچ بعد شلون .

ذَهــب: ادري تعبتك بس ممنوع تعوفني .

كــانـــون : قبل غلطتي وتعاقبتي وبكلامچ أقتنعت
انتِ مو وياهم وبالخصوص بعد موت اهلچ اقتنعت
انتِ تستحقين حبي ، بسسسس عليش تكررين الغلط عليش
تبعديني عنچ عليش ما تبلغيني عندج تواصل بـ اختچ
ثقتي بيچ معدومة اذا بيوم من الأيام تساومين علية
شلون اثق ما تسلميني بعد هل تمثيل ، يعني تدحكين
بعيوني وتتصرفين طبيعي ولا عبالك متواصلة
بحلاد ألي يدفع عمرو ويموتچ ويمووووووتني .

نزلت راسي ودموعي توگع مني شلون ابلغو ابوك
هو خلاني أتواصل معقولة تتحمل هل صدمة بلعت
الغصة وتحملت الكلام بس ما گدرت إعترف .
ذَهــب: مثلت اي والله صح مثلت بس لمصلحتك
اخاف تنجرح من كلامي وغلاتك عندي
كــانـــون ما اريد اجرحك .

ضربة من ضربات النوبة صارت ؏ خشمي
صرت اناشغ من الوجع ومنظر الدم هو يدحك
من بعيد ما إقترب واستمر بالتحقيق : وين التلفون ؟

مسحت الدم ورديت مخنوگه : يا تلفون .

كــانـــون : التلفون المتواصلة بي انتِ واختچ ؟

عرفتو هو يعرف أنـه حجيت وفوك كل هذا مفكر أنـه
عندي تلفون ، گعدت ؏ سرير وبيدي كلينكس امسح
بالدم : ماعندي تلفون .

كــانـــون : هذا النكران يعدم حبي الچ ذَهــب
عليش توصليني المرحلة أسحب ايدي منچ .

ذَهــب: وغلاتك عندي ماعندي تلفون .

كــانـــون : سهلة ذَهــب سهلة لان انتِ أمانة
عندي راح اظل محافظ عليچ بس لا تلوميني
؏ افعالي وياچ بالأيام الجاية وخليهه ابالچ زعلي
مو هين ابد مو هين .

طلع وعافني بنص الگزاز والدم ظليت بمكاني أرتعش
بكلبي هذا گلبي صار بركان وبـأي ثانية ينفجر رفعت راسي
للسماء وصرخت : ربي أنـه اعرف كل هذا امتحان ولأ أعتراض
على حكمك وامتحانك بس كــانـــون ملاذي لا تحرمني منووو
لا تمتحني بكانون ربي .

ضعت بكل معنى الكلمة ضعفت لملمت نفسي
وطلعت للحمام غسلت والنوبات تروح وترجع
كل گزاز شلتو ومسحت الأرضية ودموعي اوف
يا دموعي مانشفت لحظة نظرات الحقد بعيونو
ما فارگتني براسي ادگ براسي .

لليل نزلت مريض متلازمة توريت اذا يفكر ويقلق
من المستحيل تخف نوباتو لو أحاول الآلف المرات
ماكو امل تروح ، عدلت شعري ورسمت إبتسامة
خفيفة ؏ وجهي من دحكت قُــسَـم تهير العشاء
مديت راسي ؏ استقبال كــانـــون ودوهان نايمين .

قُــسَـم : من الظهر نايمين بدون اچل اكيد بس
يگعدون جوعانين .

ذَهــب: اساعدچ ، شتعسوين ؟

قُــسَـم : ثلاجتكم فارغة مابيها لا كبب ولا بورك
بس مخضر ولحوم ودجاج گعدت الظهر لفيت
كبب وبورك .

ذَهــب: مو اني بالطبخ صفر حدي بيضة ومرات تطلع مو طيبة .

قُــسَـم : عادي اني اعلمچ ، المهم لفيت ؏ گد العشاء
لان باجر من الصبح نطلع من الأنبار يعني نكمل
اچل ونفرغ الثلاجات ونغسل البيت حتى الصبح بس نقفل .

گضبت راسي وگعدت والأفكار برأسي إشكال ألوان
رجف گلبي بلحظة تخيلي كــانـــون يتخلى عني
واحتمال جبير ما ياخذني وياهم وما ألومو اذا يسويهه .

قُــسَـم : اسم الله شبلاچ ذهب .

ذَهــب: راسي أفتر .

قُــسَـم : من النوبة اكيد صارت عندچ قوية وضاربة نفسچ
جوةعيونچ صاير زراگ .

ذَهــب: اي صح ، المهم خلي نكمل قبل لا يگعدون .

وگفت اثرم بالزلاطة وفكري يودي ويجيب
حرت بزماني بين اظل هين وأحافظ ؏ كرامتي
وما أفرض نفسي عليهم وبين خوفي من فكرة اظل وحدي
احارب وابتعد عن كــانـــون ، شلون اذا هو مجبر بيه
أخاف وأكره أنفرض ؏ أنسان ملزم بيه صعبة علية صعبة .

قُــسَـم : ذَهــب مو احجي وياچ كافي صارت چثير
رتبي السفرة حتى اگعدهم .

أومأت براسي ورحت جهزت سفرة بالگاع
ورتبت المواعين وقسم راحت گعدتهم
دوهــان گعد وقسم واني وياهم ننتظر كــانـــون
طلع يغسل بالمغاسل بالگراج .

دقايق ورجع يمسح بوجهه اول ما دحك بوجهي
غير طريقو وصاح بصوت وأضح: لا تنتظروني أنـه رايح
الذاك البيت امي رجعت .

بس هو حركاتو غير عن كلامو بحيث نظراتو عبارة عن قرف
دوهــان واحد يدحك بوجهه الثاني ونزلوا راسهم عفتهم وصعدت
من الفشله ، قفلت الباب بعد ما أتحمل موقف ثاني يهيني بي
للصبح گعدت ؏ ضربات خفيفة فكيت الباب ودخلت قُــسَـم
بحماسهه المعتاد : يولووو يعدچ ما مبدلة يمصگوعة .

ذَهــب: ليش بيش الساعة ؟

قُــسَـم: بالخمسة الفجر نطلع هساع الساعة 4 ونص
انتِ بدلي وانه انزل ازكح على واحد من الولد ينزل الجنط .

طلعت الجنط اني وياها بالممر وفتت سبحت بسرعة
ونشفت الحمام ورتبتو وطلعت للغرفة ابدل وارتب بيهه
ركض ركض لبست فستان اسود وشعري عدلتو بالماشات
وهو قصير بسرعة ينلم ، نزلت لگيت الكل طالعين .

تَـــمــوز : بسرعة طلعي اريد اقفل البوب اربزي برة .

طلعت وهو قفل وطلع يأشر ؏ سيارتو : اصعدي روحـي
بصف امي وقسم .

رديت متعجبه: وكانون ؟

دحك ؏ قُــسَـم وهمس بصوت ناصي بس
سمعتو: شنو ماتعرف بالموضوع ؟

قُــسَـم : يمكن البارحة بلغهه وصارت بيناتهم مشكلة .

ذَهــب: شكو شصاير .

رد بمراوغة وصوت عالي يريد يضيع
السالفة : امشي يا عيني امشي اصعدي بالسيارة نتفاهم .

اول ما صعدت فات كــانـــون هو وامو من سيارتنه
وصعد بسيارتو بس هو وامو ماكو احد وياهم ، واشر للكل يتحركون
هو يمشي بالمقدمة ، اخذ الأفرع وما يمشي بطريق الخروج
من الأنبار استغربت بس بقيت ساكته ملتهيه اسولف
اني وقسم ؏ غراض واسئل بيهه عليش ما راحت
صعدت بسيارة دوهــان ؟

قُــسَـم : يمعودة اخذ امو ودجلة وبناتها وهاي البنية الجديدة
ما اريد اروح وياهم الطريق كلو يخلصونه يضخون سممممم .

ذَهــب: وابوچ ؟

قُــسَـم : ابوية وامي بسيارة فراس هو وجدتي وجدي .

بعدني اريد اسئل ؏ سيارة كــانـــون والسيارات وگفت
مقابيل بيت صغير ظليت ادحك بس بعيوني اريد اعرف
شصاير ، نزلت كــانـــون وامو سلموا ؏ زلمة جبير وحرمه
ودخل كــانـــون وهو يضحك طلع جنط رتبهن بصندوگ
السيارة طلعت بنية بعمري اخذ منها طفل نايم يجي عمرو
سنتين باسو وظل يسولف هو والرجال ويهز براسو للحرمه
واخذ الطفل وامو صعدهم بالسيارة .

ذَهــب: هذولي منو ؟

رضية: ماتعرفيهم ؟

ذَهــب: يا منين اعرفهم اول مرة ادحگ أشكالهم .

رضية: يعني كــانـــون ما مسولف عنهم .

ذَهــب: عن منوووووووو ؟

تَـــمــوز : هذا الطفل ابن كــانـــون وهاي طليقتو .

ضربوني ؏ وجهي بس سمعت هل جملة
رديت بصوت يمتمت : طليقة منوو ابن منو انتَ
شحجيت تَـــمــوز واعي ؏ كلامك .

رضية: اسغفرالله ؏ هل عمله المفروض كــانـــون يبلغچ
ما توقعتها منو هيچ يجيبهه بدون ما ينطيچ علم .

فتاك الخبر فتاك نخل عقلي ما مستوعب
نزلت بلا وعي عبرت سيارات اهلو
وگفت جدام سيارتو ضربت الباب
بسرعة نزل وسدو يخاف على طفل يگعد : خيررررر .

ذَهــب: خييييييير هذا يا خير .

كــانـــون : شكوووو ؟

ذهب : صحيح هذا الكلام هذا ابنك وطليقتك ؟

كــانـــون : بعدين نحجي بهل موضوع .

ذَهــب: ركز كــانـــون شنو تدحك مقابيلك
أنـه ذَهــب ما بلحيف زلمة يكسرني ويستغل
ضعفي وقلة حيلتي أنـه إذا اغتاظ روحـي
تثور أبيع گلبي اذا يذلني أنـه ما انذل .

فراس من بعيد متابع الوضع بس ما يدخل
نزل تَـــمــوز ودوهان يريدون يسيطرون ؏ وضع .

دوهــان: خيركم يمعودين منا العالم عيب .

تَـــمــوز : امشي ذهب اصعدي لا تكبرين الموضوع
من نوصل تفاهموا بالبيت بلبلة بالشارع ما نريد .

ذَهــب: ما بيناتنا تفاهم هساع نطلك شنوووو غايتك
فهمني وينو تريد توصل والله ما انكسر والله
انه الموتت امي وابوي بيدي ما استصعبها واموت كلبي
اذا يفكر يرخصني من ابيع الكل الخاطرك ما اسمحلك
تبيعني ما اسمحلكككك .

كــانـــون : تَـــمــوز اخذهه مني ما اريد اجرحها اخذوهااااااا .

دوهــان: يول يخوي اصعد انتَ بالسيارة مو تدري بيهن
من يصيرن عصبيات ينگلبن زومبي .

صعدو بالسيارة ونزلت رضية حضنتني
وهي تعدل شعري : الخاطري تصعدين لا تخليهم
يتشمتون بيچ لا تنطين لزمه ؏ نفسچ كلهم حاقدين
عليچ لان دومچ راسچ مرفوع وروحچ ما ترخصيهه .

نشغت وانه ادحك بوجهه روحـي مذبوحة
ذَهــب: شنو بعد اتحمل من أذية ، مو راسي مرفوع بي
هو بعمرو ما رخصني جدامهم عليش يذلني وصدمني
هل صدمة ما استاهلهه منوووو ومحمد ما استاهلهه .

تَـــمــوز : ؏ هل دموع بعد شوية واروح افرغ شاجور
براس هل نغل فراسسسس وكانون ،  دمشي يا خوية نسولف
بالسيارة هذا الحقير يدحك بشماته .

ذَهــب: بعد شعندي اروح وياكم هو الوحيد مصبرني
وكفخني ؏ وجهي بدون ما ينقهر ويحسب حسابي  .

تَـــمــوز : يخوي تره كــانـــون مو هيچ اصعدي
وبس تتقابلون يفهمچ ؏ كلشي انتِ كلشي ماتعرفين
لا تسولفين وحدچ .

رضية: وداعتچ ما يريدها بس ابنو كاسر ظهرو .

ذَهــب: ومحمد گلبي يعرف هل كــانـــون متزوج قبلي .

تَـــمــوز : بلازحمة شلون عرفتي حتى ناخذ الاحتياطات اللازمة
قبل الزواج اخاف انكشفت وانشهر .

رضية: انجعم .

تَـــمــوز : بالخدمة .

اخذتني عمة رضية وقسم تدحك من السيارة
اول ما صعدت بقت أدلك بيدي وتواسيني
حاولت أحبس عبرتي جدامهم وما ابچي
بس صوتي وعبرتي وعيوني غدرني
صرت انتشغ وابچي بعلو صوتي
واني منا اچل ماكو بطني روحـي طلعت
معدتي تگلب الطريق كلو ، ومنا الخوف من الطريق
والوضع خطر الأبعد الحدود وكلهم بيناتهم إتصالات
وسيارة بصف سيارة واول سيارة فراس وبعدو كــانـــون
النص الطريق وطلعت سيارات لون اسود عاليات تابعات للدولة
والنداء اشتغل فتحوا مكبر صوت وصاح
_ سيدي الطريق تحت السيطرة توكلوا واحنا محاوطين السيارات .

سمعت فراس يرد عليهم من سيارتو : بارك الله بيكم يا إبطال .

_ درب السلامة سيدي .

من رهبة الموقف بقيت جامدة ، كل هل حماية والرتب
والغبي جلاد يريد ينهي عليهم الچلب ذبني بنصهم
ومتأكد هو يعرف شنو همَّ وشنو مكانتهم .

كل السيارات تمشي بسرعة فائقة گلبي ينرج
بكل مطب بالشارع ، وكل واحد منهم مجهز السلاح
جوة رجلو تحسبًا لهجمات ارهابية غير متوقعة .

استقرت السيارات وصارت تمشي طبيعي والحماية
رجعوا بعد ما عبرونا كل المناطق والمحافظات
الخطرة ، بس هبطت سرعة السيارات هجست
معدتي تعصرت أشرت التموز يوگف نزلت اركض
ذبيت من راسي روحـي طلعت نزل انطاني مي
غسلت وجهي وشربت قليل منو ورجعت للسيارة .

قُــسَـم: بطنچ فارغة من البارحة بدون اچل والسيارة
تمشي من الصبح طبيعي معدتچ تصير منخل .

بس رجع يمشي ضربني دمار من راسي البطني
شلني شل أريد أفتح عيوني بس ادحك مقابيلي
ما اگدر ، مردت معدتي مرد وصرخت بعد
ما تحملت : لااااا لاااااا عمة رضية راح اموت الوجع مو طبيعي
ابد مو طبيعي ومحمد روحـي طلعت يممممههههههه .

رضية: يمه تَـــمــوز البنية لا تتخربط اقرب مستشفى اوگف يمهم .

تَـــمــوز : الو كــانـــون يول ذَهــب وضعها تخردل فرد مرة
اقرب مستشفى أركن يمهم نحتاج تدخلات سريعة يولو
الغيرة طلعت مميته .

كــانـــون : هتلي تظل طول عمرك .

وساعة وبعدها السيارة تمشي الى ان وگفت سيارة كــانـــون
جدام مستشفى نزل وتوجه بتجاه سيارة تَـــمــوز فتح
الباب من جهتي ونزل عاقد حاجبو وعيونو
صايرة دم من العصبية : شبلاچ ؟

گضبت ايد عمة رضية ومن الوجع صرخت 
ردت بدل عنهه : يمه معدتهه فارغة من البارحة
وذبت من راسهه گضبها دمار شل حركتها .

كــانـــون : من لسانها الطووووويل طبعًا يگضبها دمار .

اخذ ايدي سحبتها وهمست بوجع  : عمة رضية اخذيني انتِ
وتموز للمستشفى فدوة .

عتني وصاح بحذر: لا تستفزيني وأمشي جدامي ذهب فورًا .

نزلت ظهري من الوجع دنج مثل العجاير الكبار
من دحك وضعي هيچ تقرب سندني تذكرت
من انتحرت وسندني بوقتها وهمس : ميلي ثگلج عليَّ .

نزلت دموعي وكملت طريقي واني أميل عليَّ بكل مرة
يزيد الوجع ، دخلت للمستشفى نقلوني ؏ طوارئ
النسائية اخذتني دكتورة شرحت حالتي نومتني ؏ سرير
وقربت السونار اخذت بعناية وتركيز شوية وفتحت الستارة
_ بلغتني انتوا من الأنبار طالعين ؟

كــانـــون : اي نعم .

_ عندك علم بزوجتك حامل وطريق السفر خطر عليهه
وبالأخص هي بالشهر الأول من الحمل ؟

كــانـــون : متأكدة دكتورة ارجعي تأكدي من السونار
ذهب حامل من شوكت ومحمد ماعندي علم .

_ متأكدة من كلامي بدون اعادة وأضح بس مهدد
وخطر بسبب الطريق ضروري ترتاح اقل شي ساعتين
هنا وتاخذ آبر تثبيت وبعدين تطلعون هذا العلاج أريده
من الصيدلية .

اخذ الورقة وطلع بعدو بالصدمة اني اريد احجي
واجاوب الدكتورة الساني نعقد وحتى نسيت الوجع
بس بداخلي احساس بعدم الراحة لازمني من هل لحظة
عرفت ما راح اتم فرحتي وتنتظرني صدمات.

رجع كــانـــون بيدو العلاج انطتني الدكتورة وعافتني أنـه
وياه وراحت ، إقترب مني يدحك بوجهي
_ سمعتي الدكتورة .

ذَهــب: اي قابل انتَ متأثر هل شعور مو جديد عليك
لان عندك طفل وعايش هل لحظات .

كــانـــون : اول مرة اعيش هل شعور لأول مرة أفرح
برغم اني شايل بگلبي عليچ بس فرحان حبيبة روحـي
شايلة قطعة مني بداخلهه .

ذَهــب: كشفتك بعد ؏ حقيقتك انتَ أنسان متلاعب غشاش
وهمتني بحياة عبارة عن خدعة مصدومة بيك صاير عصبي
وتتهمني بالتمثيل وهذا الصار اليوم شنو تسمي لعبة
عندك حياة كاملة والكل يعرف واني اخر من بعلم
واختاريت تظهر كلشي بوقت ضعفي بوقت حاجتي آلك
يعني شنو قصدك من فعلتك تريد تضربني بـ ...

كــانـــون : اششششش ذَهــب خلي براسچ انتِ
؏ ذمة زلمة محال يأذي حرمة بحرمة لعب الجهال
مو جوي لان نهاية هيچ لعبة قذرة اوگع بيها أنـه وحدي .

ذَهــب: عجل شنو تفسير تصرفك عليش أنـه اخر من يعلم بـ ..

كــانـــون : بطبيعتي صريح وما أحب إلف وأدور
مو مثلچ بهل نقطة ما نتشابه ذَهــب .

سحب الكرسي وگعد جدامي رجع شعرو
وفهمني بصوت هادئ مسموع : تعرفتي عليَّ جنتي بمهمة
قتلي ، وتعرفت عليچ جنت بمهمة انقاذچ من إيادي الدواعش
جنتي مستعده كلشي تسوين بدافع إنقاذ اخوانچ
وانه حتى احافظ ؏ ابني ولان ماعندي ثقة بيچ
من الطبيعي ما ابلغچ هذا حقي وبعدين توضح كلشي
وقبل فترة قليلة گدرت اثق بيچ واشتغل جدامچ عادي
بس صعب اعترف بـ ابني وهو بعيد عني كلشي يصير
وكلشي أتوقع من الكل بدون استثناء .

ذَهــب: ولو تلميحات بسيطة تنطيني قبل ما تصدمني
معقولة ما خفت يصير بيَّ شي من اعرف كــانـــون
هذا اصعب موقف ممكن تمر بي الزوجة صعب
اكثر من ما تتخيل .

كــانـــون : بس بعدچ كلشي ما عرفتي حتى تنقهرين .

ذَهــب: اكثر من هذا شنو أعرف زواج ومتزوج وطفل عندك
اكو اكثر ، رجعتها لو ناوي ترجعها متأكدة رجعتها ؏ ذمتك
لان اكيد اهلهه ما قبلوا يطلعوهه وياك بدون ما تكون ؏ ذمتك
مو صحيح ؟ 

><><><><><><><><
يتبع ...

- الرساله ؛ ‏ثقل ميزانك بذكر اللّٰـه:

- سُبحان اللّٰـه
- الحمد للّٰـه
- لا إله إلا اللّٰـه
- اللّٰـه أكبر
- سُبحان اللّٰـه و بحمدهِ
- استغفر اللّٰـه
- اللهُم صلِ على محمد وعلى آل محمد