تجبر أحفاد الــ دليم الفصل الثاني وخمسون 52 - بقلم اساور حسين

تَــجــبـر أحفاد الــ دلــيـم🦅
بقلمي : أساور حسين
المُلْتَقَى _49 _

أَتعنىٰ للمَكان إلي كَعدته وياك ..
ما الگاك بَس رايد أثَر مِنَّك .

ملكات قلبي لطفًا لا تنسون التصويت ؏ بارتات
التعليق بين الفقرات روح روحـي إنتوا +
<><><><><><><><><>
قُــسَـم ..

تلمست گلبي جريت نفس بصعوبة
خطيت خطواتي بثقل أيامي وسنيني
سحبتني عمتي من أيدي همست بضياع : سمع يمه سمع .

فراش :احجي نوع الكلام شني المشوهه شني من مصيبة سويتي ..

غلقت عيوني هجست نار تطلع منهن
گضبت رضية وبحالة شتات كملت : اخذيني للبيت رجلي بعد ما تعيني
خايفة منو راح يدمرني يمهههه دوهان عصبي نار .

جرتني ودخلتني للغرفة تحت أنظار امي المرتبكة
اعرفها وأجزم هي قلقانة ومتوترة تخاف يطلكني
ماتخاف عليَّ ماتفكر نهائيًا بنتها صاحت بيها رضية
_ گضبي بنتچ وخليها تنام يمچ اياچ تطلع تره زلمتهه سمع
كلام ما ينلبس عليَّ ثوب لا يفقد ويموتها هي وألي بطنها .

بقيت بحالة ذهول لا اگدر انطق بكلمة
ولا اصبر بنفسي واگعد أيدي متكتفه
وصلت للباب ورجعت عليَّ : اذا تجين تكبرين المشكلة
أنـه وكانون نتصرف وياه لااااااا تخطين باب البيت
باجر هو مسافر عوفيها تمضي على خير سمعتيني .

قُــسَـم: استعجلي فدوة روحـي شنو حالوو هساع شصار بي بسببي .

رضية: اووووف منچ يااا قُــسَـم اوووف .

طلعت وعافتني افتر بالغرفة دحگت ؏ امي
وبس ردت افهمها: ماعندچ فضول تعرفين الصار ؟

ام قُــسَـم: ماريد اسمع وتطلع مني كلمة جدام امو وندخل بمشاكل
من وراج انتِ وزلمتچ شوو انتوا تتعاركون وتتصالحون بكيفكم
بعد ليش ادوخ نفسي خليني راسي إلف حسبه بي كافي عليه
اخوچ ومشاكلووو وسوالف الحب والعشق الجديدة .

قُــسَـم : يا عشق يا حب شبي تُــمــيم .

ام قُــسَـم : واگع بحب بنت من الناجيات من المناطق
المحتلة من داعش من مطلعيهن هنَّ واهاليهن
شايفها ووصلهم المكان يعرفو هو وصار اسبوع
يتكاون هو وابوچ وجدچ يريدهم يرحون يخطبونها
وعمچ فراس ماقابل يريدو ياخذ اخت سدن اخت شدن بنت دجلة .

قُــسَـم : بكيفكمممممم يتزوج سدن مدري سن
هو بعمر يعرف يختار شريكت حياتووو عليش
تدخلون وتكسرون گلبوو والله خبلتوني
وبعدين عليش أنـه اخر من يعلم .

ام قُــسَـم : الرأي رأي ابوچ وجدچ وعمامچ همَّ يقررون المناسب ألكم
يولوووو ضروري اطلعون عن الطريق وتعبونا وياكم
وهاي سالفة عليش ماتعرفين جدچ نبه مايطلع الموضوع
بس تُــمــيم سولف الكانون وهل كانون يرعد وتعارك هو وياهم وبعد ماندري شيصير ابوچ طرد تُــمــيم وباجر راح يسافر
وياهم ؏ انبار بلكي ينسى .

قُــسَـم: ول راح افقد عقلي ينسى شلون ينسى هذا حب حب
مو بهل سهولة ينسى يحبها ويريدها لا توگفون بطريقهم دخيل ربكم .

ام قُــسَـم : بعد انتِ اعرف بالحب وهل خرابيط
والدليل هجمتي بيتچ الخاطر انسان عايش حياتو
بوسط داعش سمعت كل يوم يقدمون سبايا وهو يختار
اي وحده تعجبو باقي عليچ وعلى شكولاتچ .

قُــسَـم : شدعوة الهل كثر ما تنقهرين ؏ بنتچ .

ام قُــسَـم : باطل بنتي باطل وأنانية من ماتريدين دوهــان
عليش لعبتي لعبتچ وخليتي يعادي اهلوو ويفسخ خصبتو
من شدن عوفي يعيش حياتو ويطلكچ بدل هل عذاب
البنية شدن تموت على تراب رجلو وتتمنى رضاتو عوفي
خلي يتزوج بنية تحبو تسعدو بحياتو بدل هل نكد .

قُــسَـم : انام اي انام قبل لا انفجر بيچ واهج منكم بليلة ظلمة
وبعد حلم تلگوني هلكت منكم الى درجة وصلتوني المرحلة
اتمنى الموووت تعرفين شنو يعني إنسانه بعز شبابها تتمنى الموت ؟

ام قُــسَـم : متعافية يمه زلمتچ زين ويشتري ضحكتچ
ويطلب رضاچ لو يضرب بيچ وما يحترمچ تحبي
بس مع الاسف دوهــان خوش دوهــان .

سحبت الكرسي صعدت اخذت فراش من الملحق بالكنتور
وفرشت وانه اتذمر من طريقتها بالكلام استفزازية الأبعد الحدود
تمددت ردت بس اهرب من الواقع بالنوم فشلت وصعب
علية حتى النوم دخلني بدوامه بالتأنيب والضعف رجعت اضعف ياربي
كل مرة اگول اعبر المراحل الصعبة ارجع النقطة الصفر والحل شنو
ما أدري والله ما ادري .

للساعة بالخمسة الفجر سمعت صوت طگطگه بالبيت
فكيت الباب صار تُــمــيم جدامي ابتسم واشر بيدو
_ يابه هلا ومرحبا قُــسَـم عدنا .

خزرت بوجهو وبعيد اتقدم واعتب عليَّ
_ أنـه أختك واخر من يعلم بيك ولهان بالعشگ .

تگرب مني أخذ أيدي ودنج لمستواي
_ تعرفين شكثر احبچ ؟

قُــسَـم: أنـه أحبك إضعاف وفديك بروحي .

تُــمــيم : تكاونت الخاطرچ وما هان عليَّ يكسرون بيچ
وضربت وغلطت وتهسترت كلو لجل عيونچ لآن احبچ .

قُــسَـم : شبلاك شصاير عليش تحچي هيچ ويايَّ .

تُــمــيم: بنفس الوقت أنـه امشي ويه ألحق اذا بيوم
ادحگ ؏ اختي باطل اوگف ضدها لان دوهــان
أخوي وعضيدي مثلما ما أقبل عليچ ما اقبل تكسري
واوگف بوجهچ اذا تطلعين عن مسار الحق .

قُــسَـم : سامع شي ؟

تُــمــيم : ياريت اسمع وابطل الشكوك بداخلي
أنـه بس دحگت وضع دوهــان مخربط وكانون
يحجي وياه عرفت الموضوع يخصكم
توغر صدري ومحمد وصبرت ؏ روحـي
دوهــان مايريد اعرف يخاف اصير عصبي عليچ
لو اضربچ تتخيلين شكثر يحبچ .

قُــسَـم : لا ينشل بالك ولا توغر صدرك
مشاكل تصير بين المتزوجين وتنحل
تعرفني هل فترة هرمونات حمل
وأصير عصبية ودوهان عصبي ما يتحمل .

ابتسم وهو يگرص خدي : لا تذبين ألوم ؏ دوهــان
هذا بطل وين اكو منو صبرو مابي حدود وهذا اعظم شي بي .

طلع وبيدو جنطه ركضت وراه
وتسائلت: وين رايح بعد وكت ؟

تُــمــيم : امي رضية مجهزة الريوك وخابروني
منتظريني غادي ناكل ونطلع .

رفعت اصبعي أشرت وصحت : دقيقة امانة انتظرني بس البس الشال والعبايه اروح وياك بعد منو يرجعني انام بغرفتي تعودت ماعرفت
انام بالگاع ظهري يوجعني .

ركضت شلون مكان لبست وطلعت هو بعدو منتظر
بس وصلت كمل طريقو للبيت الثاني دخل قبلي
للغرفة الآخيرة گاعدين كلهم بس امي رضية بالمطبخ
من دحگت علية موجودة بقت تفرك بيدها بـ اضطراب
حايرة بين ترجعني وبين تبقيني: مو گلت ابقي غادي
الى ان يطلعون هساع اذا تصير مشكلة من الصبح ويروح
محتقن منو يفيدچ يولوو خبلتني تصرفاتچ تريدين تجلطين الزلمة .

قُــسَـم : ضروري نحجي أنـه ودوهان ميصير
يروح بعد هل موقف السخيف وهو زعلان اخاف يتخذ قرارات غلط .

ذبيت عباتي والشال وأخذت الصينية مثل
السبرنكه اهتز وارجف نزلتها وعيني بالارض
ذَهــب: وأخيرًا رجعت قُــسَـم جمالية البيت بيچ ومحمد ما بنجرع بدونج .

ترددت اجاوبها بس همست : صباح الخير ؏ الجميع .

كلهم ردوا اجت امي رضية گعدت وياهم وسألت
_شوكت تقريبًا وترجعون ؟

رد كــانـــون بدوم مقدمات : الصراحة يمه بعد صعب ننزل كلنا
عدنا انذار طلقنا صفارات الإنذار الوطن بحاجة كل شخص بينا
كل انسان عندو غيره ؏ وطنو يحتاجو موجود بساحة الحرب
ارضنا انباعت بدون موافقة منا نرجعها بيدنا .

رضية: ديلة بالله شلون ماتنزلون ونسوانكم
حوامل اذا تصير ولادة منو بحالنا يا امي .

كــانـــون : فهمتيني غلط ، صح نروح بس نرجع بين فترة وفترة متباعدة
مثلًا كل فترة ارجع ارتاح وأظل فد يومين اكمل احتياجاتكم
كلها وارجع وينزل واحد ثاني بمكاني وبس تقرب ولادة قُــسَـم
وذهب نرجع احنا لا نريد نتعبچ ولا اتعب البنات .

رضية: خوش اذا هيچ تروحون وترجعون بالسلامة.

رفعت راسي ركزت بدوهان منزل راسو يفر بالحلقة
وتموز هو ياكل يأشر علينة اني وذهب يمثل التعجب
_ هذني الضيم وينهن وين الحمل والولادة
ادحگي الحظ هذا تزوج بمهمة وحرمتو كلها كم شهر وتولد
والثاني الحرب العالمية عدهم سنة تالي ما تالي عبرت خمس اشهر
وماباقي شي وتولد وانه لا من المتزوجين ولا من الحوامل
تالي ما تالي اصير دريول جهالهم وتعال يا تمووز حير بيهم انتَ عمهممم .

كــانـــون : يولوووو مو لابس عسكري احترم النجمات ؏ اقل
جنك عجوووز عرب ادردم وتاكل من الصبح ماراضي ؏ احد .

تَـــمــوز : انجعم يولووو محظوظ انتَ همات مهمة وهم استقرار
أنـه مفلس من المهمة ومن الحب ومن التقليدي حظي ما گاعد .

ذَهــب: نحتاج تبخير بعد هل كم من الحسد يولووووو
عبرت مراحل جدتك بالكلام المسموم وحسد العيشة .

كــانـــون : اگوم ألعب ألبسطال ؏ ظهروووو ومحمد
گووووول ما شاء الله گوووول عينك تكتل ليگول ساحرة غدي .

ذهب : الله يساعدكم شلون تتحملون هل نكدي بالدوام .

كــانـــون : بساحة الحرب بالمقدمة لا ادحگ القرد
ولا القرد يدحگ عليَّ اخلص منووو ومن شرووو .

تَـــمــوز : وانتَ لگط مهمات زينة وعود اريد أعرف
ليششششش ما استلم مهمات بعد منا وجاي تنطيني مهمات
أنـه قوي وذكي وصاحب خبرة اعرف أتعامل ومحمد
ما ابقي بنت بالمهمات ما تعشگ النقيب تَـــمــوز المحترم .

كــانـــون : المحترم جواها خطين حمر مشكوك فيها .

ضرب ؏ ظهر دوهــان وصاح بعلو صوتو
عبالك ولا گاعد من الصبح ووراهم طريق سفر : بس لا تحولت معقد
نفس كــانـــون ابو سمرة لا ضحكة ولا سالفة مكتول وبالع موس ؟

تُــمــيم : يولووو بس كافي دقيقة سد اثمك صرعتني اريد اچل
مو بزعتني بكثر ما تذمرت من الصبح لو أنـه مرتك اطلگك .

عافهم دوهــان وطلع للكراج سحبت نفس وطلعت
بقمة التردد والخوف وگفت جدامو دنج راسو ركز
بيَّ وبكل تفاصيل ملامحي : تريد تروح بدون ما تودعني ؟

أبتسم إبتسامة مصطنعة وهو يتگرب علية اكثر
يبين لطفو : مايهون عليَّ تگعدين من نومچ المحروم أنـه منوو .

تجرأت گضبت ايدو رسمت دوائر بخفة
_ ادور ادور الدنيا وترجعني يمك .

دوهــان: وانه رايح بس أرجع چثير أمور أغيرها
وبالأصل تأخرت المفروض من زمان اخطي هيج خطوة مهمة بحقنا.

قُــسَـم : نكمل بيتنا ونستقر بي وانه بنفسي إختار الأثاث .

دوهــان: طابت نفسي ماريدو اكوو امور چثير أهم .

قُــسَـم : لاااا دوهــان امانة الله لاا .

سحب ايدو مني كسر ابتسامتو فشل ملامحو
_ ظنيت ما تجين تركت مصروفچ عند امي رضية
واي شي تحتاجي خابريني وكل شهر ادز مصروف
بيد كــانـــون هل اربع اشهر من الحمل ماريد اكون
موجود خلصيهن ؏ خير واطلعي منهن بسلامة
وبس تقرب ولادتچ ارجع واخلي النقط ؏ الحروف الصحيحة .

سحب الجنطة وطلع مستعجل تقربت اراقب تحركاتو
يشرب جكارة وره جكارة بدون توقف ذب الجنطة
وشغل السيارة وعافها ونزل الى ان طلع كــانـــون
باس رأس ذهب ودع امي رضية وطلع
تُــمــيم سلم ؏ سريع وراح
تَـــمــوز ختمها يتعارك هو وذهب بكثر ما غثها
ركضت للصونده مال ماي فتحتها ورشت علية
وكانون بره اول ما طلع ضربو ؏ رگبتو
_ شبلاك وياهه هي عار عوفهاااااا .

تَـــمــوز : يولو ماعدها شعر ومسويه ذيل حصان
جنه دندول جلب اگلهه عيب ضحكتي العالم علينة
ولااااا يمهاااااا ولا عبالك احجي .

كــانـــون : ومحمد عگلك بي چلب ينبح
ما تتعب ماتمل لوك لوك لوك من الخمسة الصبح
وهساع راح نطلع تخلص الطريق سوالف ادري بيك .

تَـــمــوز : وقميص يوزر سيف تره اروح بسيارتي وحدي .

سحبو من ايدو وصعدو بالسيارة وعاط بتميم
كانون : اذا واحد بيكم يسولف وياه بالطريق اعدم اخلاقووووو .

وتموز بكل برود لبس البيريه العسكرية
ونكت الرتب وهو يرد : بعد النفسيه شلون يصير ازرگ احمر
الله يساعدني عليكم ، تذكرت قبل لا تحركون اشتري فد كرزات حب
حلويات ببسي للطريق نسولف أنـه وعقلي .

كــانـــون : الله يساعد عقلك .

تَـــمــوز : نايم بي چلب .

دوهــان : ما تشتري اگعد واسكت سيارتي نظيفة
انوب تتوصخ امسحها بيكككك .

ظل مصمهر عليهم ونزل من السيارة يصرخ
_ انعل ابهاتكم چلاب ولد چلاب شني هل ذله
ولااااا اروح وياكممممم ادخل للبيت فد شوية
اطلع بسيارتي لا خلف الله عليكمممم .

رضية: يولوو اصعد وانتوا شبلاكم ويااااه مو اطلع
اطيح حظكم امشي تُــمــيم اشتري التموز كرزات
وببسي وحلويات .

ذَهــب: ايععععع زعطوط شنووو ..

رضية: انچعمي لا انعم اضلوعچ .

دحگ عليهم بثقة ورجع صعد سند جسمو
؏ كرسي وايدو وره ضهرو من القهر
يريد دوهــان يسد الباب ضربو بيدو ؏ بطنوو
هو گضب بطنو وصاح : يمههههه بيض امي طلع من خشمي .

كــانـــون صعد ودار وجهو ؏ مرايا
وهذا تَـــمــوز سد الباب مدري شنو
يحجي وياه بحيث طلع روحو كل شوية
يدير وجهو ويضربو ويرجع يدير
الى ان رجع تُــمــيم بيدو علاگة متروسة
شمرها بحضنو هو التفت ؏ امي رضية
شمر بوسه بالهوا وتحركت السيارة
ذبت عمتي وراهم الماي ونزلت دموعها
_ تروحون وترجعون سالمين غانمين يا يمه
يا إبطال الله يحفظكم ويحرسكم وينصركم ؏ الأعداء
گلبي وعقلي عدهم يا حبايبي .

من هل يوم مشت ايامنا بدونهم حتى عمي فراس متخوفين
منو بس بكثر ما الوضع خطر يمهم كسر الإجازة ورجع داوم
حتى لا ياخذون مكانو بالمنصب هو بمكان مهم والكل يحتاجون وجودو
والعجيب الكل يحمد بي وبـ اخلاقو وبقوة شخصيتو
وفعلًا بكبر قوتو وشخصيتو الرزينة والحكيمة بالدوام
بكثر ما متعب مع اهل بيتو ، بين اسبوع واسبوع
يتصلون علينة تعبانين الى درجة بس مستمرين
وكذا مرة يطلعون ؏ تلفزيون بالأخبار وعمتي
تبچي وترجع ليوره ومن نصبر عليها ترد : لأن فخورة عندي هيچ زلم
تنزل دموع الفرح غصبًا عني .

مر شهر كامل 30 يوم رجع كــانـــون بس بدون دوهــان
بدون تَـــمــوز وبدون تُــمــيم ظل يومين سلم مصاريفنا
ومصاريف البيت ودحگ امي رضية ما مقصرة بالبيت
مسواك طلعات هي قايمة بالواجب بس هو اخذني أنـه وذهب
للدكتورة مطمئن ؏ وضع الجنين
ذَهــب بنهاية الخامس ، اما أنـه بوسط السادس
هي ولد وانه ولد ، استمرينا ؏ علاج
ورجع كــانـــون للدوام بعد ما طمئن ؏ اوضاعنا
وخلال هل فترة بس كــانـــون يمر اما الباقين
مكدسين حياتهم الخدمة الوطن ...

وكانت هذهِ الأشهر الهادئة تحمل الراحة خبئت
خلفها الهموم والمصائب والخوف والرعب والخسارات..

><><><><><><><><><><
هَــيـلانـة ...

هَــيـلانـة: ؏ موتي اقبل بيك يانذل ..

گضب عزيز من ملابسو أستولى علية الغضب
_ هل تسمع كلام اختك العاهرة ؟ ترفض ابن عمها
وتختار الغريب الذي باعها لي لا يريدكم انتوا ثقيلين عليه
وهو يخلوا مسؤولية من حمايتكم .

عزيز : وانا لا اقبل نكون انا وأختي بحماية واحد منكم
احمي اختي بنفسي لا تدخلوا وان لم يعجبك كلامي
أخرجنا من هنا أو اقتلونا .

هَــيـلانـة: موافقة اموت ولا اتسجل ؏ اسمك الملعون
بمجرد ما اتخيل اريد انتحر اقرف منك ومن شكلك
وتلعب نفسي من أتذكر انت ابن عمي .

كل هذا الكلام والسفاح گاعد رجل ؏ رجل يدحگ
علينة حالو حال الباقين دحگت ؏ رجلو وتراجعت
من هجست بضربة صارت ؏ طرف وجهي
من جلاد بس ما گدر يكملها من دفعو العزيز
كان كالأسد يحميني منهم بوسط كومة من الشياطين .

جلاد : أعطيني هذهِ الساقـ**** والله سوف انحرها
وأعلق راسها ببوابة المعسكر حتى تصبحين منظر
لكل شخص داخل وخارج ولكل فتاة سافلة مثلكِ .

عزيز : انحرها وانا اقتلك بنفس لحظة موت اختي
ودع رجالك يقتلوني بعدها نكون قد صفينا الحسابات بالكامل .

ضربو بوكس ادحگ ؏ العزيز بس يجري دم
من انفو من شفايفو نهض السفاح
دفع جلاد وسحب عزيز دفعو عليَّ انضربت بي
وصاح بصوت رج المكان بكبرو : عزيزززززززز أخرج انتَ واختك .

جلاد : لا يخرجون ممنووووع اريد ان اتخلص منهممممم ألى الأبد
لا يحترمون كوني ابن عمهم لماذا اتحمل وجودهم لماذا .

الــســفــاح : مو بهل طريقة تكسب بنت عمك تصرفك غلط
اضحك ؏ عقلها هيَّ مبينة غبية أكسبها بكلمة حلوة امنها
انطيهم الحرية حتى تختارك .

جلاد : من انتَ حتى تعلمني ماذا افعل وكيف اتصرف .

الــســفــاح : تعرفني من انا وماذا استطيع ان افعل معك
لا تتجاوز حدودك حتى لا اتجاوز راسك واسحق وجودك .

جلاد : تهددني .

ضرب صدر جلاد بـ اثنين اديناتو وبكل ثقة
كمل : نعم اهددك نحن هنا كلنا نفس المقام تستطيع
ان تسحقني وانا استطيع ان اهشم راسككك .

جلاد : طفح الكيل منككككك طفح الكيل .

ابو لهب : هذا يكفي أصواتكم تصل الى خارج المعسكر هل جننتم
والله اقتلكم او انقل وجودكم وافصلكم نحن بحال خطر ؏
ماذا تتصارعون منذ ايام .

الــســفــاح : يا مولاي من يوم موت زوجته طلب مني
ان اساعدهُ وانقذها عندما رفضت هددني ومنذ ذاك الوقت
هو يهددني والان يريد آن يآخذ زوجتي .

وضع ايدو ؏ كتف جلاد وهو يستفسر مستغرب
_ هل هذا الكلام صحيح .

نزل راسو بدون رد ابتسم الــســفــاح وابتعد وهو
يسمع ابو لهب قام بالواجب : جهز نفسك يا جلاد
سوف تستلم مهمة جديدة بعيدًا عن هذا المعسكر
فـ انا لا استطيع في الوقت الحالي أتخلى عن الــســفــاح .

جلاد : لا تتخلى عنهُ ولكن تستطيع التخلي عني
منذ أيام اردتان تقتل هذا الشخص وانا أنقذت حياتهُ .

ابو لهب : هو ذكي صاحب دهاء سفاح بكشف
الخونة والمندسين بين صفوفنا ، ويوجد الكثير
في هذا المعسكر وجوه جديدة اريدهُ ان يراقب ويكشف
من معنا ومن ضدنا ..

طلع جلاد من المكان وهو ثائر اعصابو بقمة الانفجار
عزيز ويايَّ بالممر يسب بجلاد ويرجع ليوره
اجت عطاء بيدها منشفه صغيرة اخذها منها وغسل
وجهه وظل رافع راسو بس يريد الدم يوگف
أنـه من مناظر الدم والرعب المريت بي صرت
بس هيكل واگف ويهتز : الدم ما يوگف عزيز لازم شخص يفتهم
يمكن خشمك نكسر الله يكسر ايدووو .

عزيز : لااا تعلين صوتچ موتيني ومحمد كافي هَــيـلانـة تعبتيني
أبقي ساكته ولااااا صووت ولا نفس .

الــســفــاح : لا تطلع وأبقى عند اختك الى ان ارجع
احتمال جلاد يقلب ابو لهب عليكم ويجتلونكم .

تركنا صافنين ؏ مكان مشيتو من الصدمة
راحت عطاء تركض خلفو گعدت بالأرض
لطمت بچيت صحت : مستحيل نطلععع من هين اخاف
جانت قبل شوية بيها باب وجواب هساع أنتهينا راح نموت ومحمد .

عزيز : لا تسولفين وحدچ هَــيـلانـة يمكن بـ أي لحظة نهرب .

هَــيـلانـة: وين تهرب صار اشهرر وليالي يدرس بذاك المعسكر
وما طالعين تريد نطلع بهل معسكر بي اكثر من سبع أمراء ناقصين
وجلاد وابو لهب ابليس يصفن ؏ افعالهمممم قبل بس هو وجلاد وصعبة .

مسح وجهي باس راسي وهو تعبان بس يريد
يخليني اطمئن : گولي اخوي مو زلمة ، ولا تعتبريني بعد اخوچ
اذا ماتطلعين من هل مكان سالمه وترجعين تعبشين حياة اجمل واحلى
وأنقى من حياتنا القديمة وعدد هذا وعد .

نزلت راسي انفجرت ابچي من الخوف
هو عافني وطلع بالباب اخذ سلاح ويحرس
حتى مايكون بعيد عني ، نهضت واحس جسمي مفلش
والجرح يأذيني مورم حتى ما اگدر احرك راسي بصورة صحيحة
رجعت للغرفة أطفال يتصارخون بيهم متأذي وبيهم جوعان وبيهم
عطشان وبيهم فقد امو وبيهم مرعوب ويدحگون بالوجوه
گعدت بالزاوية بس اتصفن من بعيد اركز بيهم وبكل قصة منهم

طلت النظر ببنية بعدها صغيرة بصفها اثنين اطفال
واحد تقريبًا سنتين والثاني بعدو بالگماط صغير الى درجة
واثنينهم يصرخون وهي نايمة من التعب وقلة الآكل بعد
ماعدها حيل وتقاوم انتهبت عليهه من البارحة ابد ماتنام
وياهم وياهم بس هلكت اكيد ونامت بعد ، زحفت بخفة
تقربت منهم اخذت ابنها الصغير من ايدها فزت ويحبتو
وهي تصيح : ابني ابني لاااا .

طبطبت ؏ ايدها وهمست : اريد اساعدچ اگعد يمچ
واخليهم بحمايتي لاتخافين ارتاحي ونامي آني أوكلهم وانومهم .

نزلت دموعها بين تريد تأمن بيَّ وبين خايفة مني
همست بصوت خافت حتى تحس بالأمان: شگد عمرج ؟

ردت بتعب وهي ترجع راسها ؏ مخدة وتغفو: 16 سنة
هذولي اطفال الأمير عبد وانا زوجته .

نامت استداريت ادحگ ؏ أطفال حال الضيم حالهم
ملطخين بالدم وشفايفهم يابسة ، شلت الصغير والثاني
گضبت ايدو وطلعت دخلت ؏ مطبخ دحگت ؏
عطاء تنظر بصدمة: هل تستطيعين مساعدتي ؟

عطاء: بماذا اساعدكِ هل جننتي .

هَــيـلانـة: انا لأنني مضروبه لا استطيح احممهم لوحدي
ادخلي معي نغير ملابسهم ونغسل الدم من عليهم ارجوكِ عطاء .

عطاء: وتخبرين الأمير الــســفــاح بأنني ساعدتكِ ؟

هَــيـلانـة: الــســفــاح شكووووو بالنص تساعديني انتِ
لو تساعدي اوي الله لا يعوزني عليچ نحيسه .

اخذتهم للحمام طلع واحد من الرجال دحگ علية
من فوگ ليجوه همزين لابسة الزي الإسلامي بالكامل
دخلت ذبيت ملابس الصغير وسحبت سطل ماي خليت بي شوية
وعفت الولد لصغير يطبش بي والتفتت ؏ حديث الولادة بعدني
اذب ملابسو ودخلت عطاء اخذتو مني سبحتو بدقيقة وانه اسبح
بالكبير مسحتهم شلون ماكان وطلعت هي عطاء مدري منين دبرت
ملابس نظيفة الهم بدلوا واخذتهم للمطبخ صبيت اچل للولد
الصغير وعطاء سوت حليب بالممه للطفل الصغير
بعدو بحضني ودخل الــســفــاح متعجب : منين هذولي ؟

رديت عليَّ بدون ما ارفع راسي وادحگ بوجهو
هو تنرفز اجه جدامي وصاح : يعني هذولي أولاد الأمير عبد .

أومأت براسي واخذت تمن وكلت الطفل
تگرب مني اكثر يوشوش بصوت ناصي : شني زعلانة ؟

بقيت منزلة راسي ورديت اتصنع البرود
_ وليش أزعل منك شعندي وياك .

عطاء: هي فقط متعبة قبل قلبل انهينا استحمام الأطفال .

عض اصبعو وهو يصيح بيها: احلفچ بردات بيت اهلچ لا تدخلين عطاء.

ورجع عليَّ ضرب ؏ كاونتر مرتين
وكمل : مو گلت تگعدين وتسكتين وضعچ مو مستقر ومضروبة
براسچ ؏ اي ساعة توگعين وتريدين احير بيچ .

هَــيـلانـة: ابني عوفني اموت لا تحير بيَّ وتعب نفسك .

الــســفــاح: ابنچ أنـه ابنچ يالنواصه ؟
وبعدين شلون اعوفچ تموتين وحدچ .

هَــيـلانـة: اي عوفني لا تخردل روحك ويايَّ .

ادحگ عليَّ بطرف عيوني
هو غمض عيونو بنفاذ صبر وصار بمستوى إذني
_ مشكلتي اخاف عليچ هيل ..

بقيت ارمش من الصدمة واكل بشفايفي بخجل
بلعت ريگي ورفعت عيوني تقابلت نظراتنا بلهفة همست : شنو ؟

الــســفــاح : عندي مهمة ولازم إطلع المشكلة
بوسط بالي تجين والموت جدامي
ذات العيون السرمدية اتعبتني .

تراجع للخلف من وگع الگلاص من عطاء
غير كلامو وهو رافع اكتافو بثقة: بالچذب ماكو شكرًا
نقذت حياتچ وطلعتچ من حلگ الموت يالفوصه .

هَــيـلانـة: شكرًا ابني النازوكي .

الــســفــاح: راح اغيب هل ايام ماريد مشاكل متفقين
مو أرجع وتطلعين هاجمه ام المعسكر .

اخذت الطفل رجعتو بصف امو ورجعت اريد الثاني
استوقفني حديثو هو وعطاء: لا والله يا عطاء ما افتهم قصدج .

عطاء: بالأيام الفائتة لقد قلقت عليك كنت أسرق النظر
فقط ضننت نفسي مجرد فضولية وعجبتني حركاتك وشخصيتك القوية
لكن عندما رأيتك تنزف ثبت حبك بقلبي يا مولاي .

مديت راسي بدون ما اخليهم يلمحون وجودي
وهذا الــســفــاح صاير قطعة حمرة دم دم
سحب الكرسي وگعد يدحگ عليها ويرجع
يضحك : عطاء انتِ اصغر من امي بعشر سنوات يا حب يا بطيخ اصفر .

عطاء: الحب ليس بالعمر الحب مواقف .

الــســفــاح: ماريد اجرحچ ومحمد بس انتِ احلامچ
تتنافس هي واحلام العصر بويه اركدي هيدي بهداي بهداي .

هَــيـلانـة: شكو بيها عطاء حلوة وتحبك حبها ..

الــســفــاح : بنتي درب الحب مو دربي مع الآسف.

گالها وعافني وطلع وانه صار عندي عيد
_ بالله ما تستحين مو عيب عليچ شكبرچ بعد تصيربن
عينچ ؏ زوجي طيح الله حظچ وحظ كباريتچ .

عطاء: لا تتجاوزين يا فتاة آنا ألان بـ اسوء حالاتي اقتلكِ ولا يرف لي جفن .

اخذت الطفل منها وقبل لا اطلع
اردفت بكل ثبات : الــســفــاح يحبني ومن المستحيل
يحب غيري لا تقتربين للعلم كلمتي عندو تمشي لا تعبين نفسچ .

رجعت الأطفال سابحين وشبعانين ناموا يم امهم
وانه رجعت المكاني ادحگ بالفراغ الى ان نمت
من گعدت امهم تشكرتني ونوعا ما صرنا صديقات
مر يوم بعد يوم جرحي بدآ يتعافى ورجعوا يجبروني
اشتغل كل بنية عليها واجب شكل ماكو رفض ممنوع
كلمة لا بقاموسهم بين الشغل وخوفي ؏ عزيز والسفاح
وغيابهم تخردلت ونفسيتي زفت بسبب الأطفال الموجودين
من قلت الآكل صاروا يموتون واحد بعد الثاني الى ان قلت اعدادهم
وكل ما ياخذون طفل ميت وكان ولد الام تنضرب ضرب الكفار
يحملوها المسؤولية بموتو لان همَّ يكبرون اعداد الأطفال
وبمجرد مايكبرون ست سنوات وأحيانًا اقل يأخذوهم على تدريب .

الأيام تمشي بطيئ عندي قلت شوفتي الأخوية بين فترة وفترة
اگعد وياه ساعة وأحيانًا اقل ، الــســفــاح الضغط صار عليَّ من
كل الجهات مسؤوليتنا أنـه والعزيز بصفحه وتعب المهمات بصفحه
ثانية تمامًا ، بكل مرة ارجع ادحگ شكلو تعبان اكثر من المرة القبلها
صار من نلتقي يسلم وأحيانًا من كثر التعب والقلق حتى السلام ماكو
مر الشهر والثاني والثالث وضع داعش يوم يتأزم ويوم يحتفلون
بـ أنتصار جديد ، الدم بنظامهم شيء سهل هدرو
القتل كالأكل يستلذون بي ، الأرواح رخيصة الى درجة التلاشي
اكتفيت اكمل شغلي وارجع الغرفتي لا اسولف ولا اگعد مع إي شخص
بس أحيانًا اساعد الأمهات بـ اطفالهن .

جلاد ابتعد تمامًا عن المعسكر واشتغل بجلد الأبرياء والأبطال
ارتاحيت منو بس بمرور الأيام توضح هل أنسان حقود الى
درجة يحيك مؤامرة كاملة بس لأني رفضتو ..

وبعد ايام طويلة وشهور رجع الــســفــاح الابتسامة ؏ وجهو مرسومة
گضبني من عكسي تحت انظار العزيز همس بصوت خافت
_ خابرني كــانـــون بشرني اليوم ولادة ذَهــب ...

يتبع ...

(البارت القادم هو انتقالية كبيرة بالأحداث فـ استعدوا للصدمات
؏ مدار 49 بارت مستحيل مستحيل اكو احرف وكلمات توصل الأحداث القادمة صعبة بنات احداث مستحيل مستحيل مذكورة بتاريخ الواتباد)

اصحاب القلوب الضعيفة واجب التنبيه ⭕️
اذا ما تگدرون لا تقراون الأحداث القادمة

- الرساله ؛ ‏ثقل ميزانك بذكر اللّٰـه:

- سُبحان اللّٰـه
- الحمد للّٰـه
- لا إله إلا اللّٰـه
- اللّٰـه أكبر
- سُبحان اللّٰـه و بحمدهِ
- استغفر اللّٰـه
- اللهُم صلِ على محمد وال محمد