رواية ثأر مهري منهاا الفصل التاسع 9 - بقلم اسماء ديمير

《《البارت 8》》

#ثأر_مهري_منها

بقلمي "أسماء ديمير "

فزينه على صوت عياطهن وصياحهن .. ام رشيد مره مريضه كوه تمشي وتحجي نوب وجهه صوفر وكعت تخربطت علينه ..

ناس تسال شكو وناس ركضت على ام رشيد تصحي بيها ، ابو فهد طفر على امه خلاها بحظنها ، يبوس براسها ويعيط يشغلون سياره دياخذوها للمستشفى لان وجهه اصفر و شفايفها بيضن ..

علا تبجي تكله فهد ماكو رشيد فهد ضايع ، دورنه عليه ماكوو ، اباوعله ضل صافن  بوجها حاير  يباوع لاامه و يباوع ل علا ، ضناه وامه ،شال امه بحظنه وركض بيها للسياره .. رقيه ركضت بالعبا وراهم ..

جدي صاح بجاسم وعمامي يلحكو للمستشفى ، والبقيه يشوفون ابنه وين ، اني من الخوف ورهبه كعدت بالزويه ابجي ، صياحهم وعياطهم يخوف ، شلون عرس اسود طلع ..

شافني ياسر كعد يمي وحظني .. لاتخافين شبيج جبانه .. ماكو شي انشالله هسه يلكو انشالله وين يروح  ..

ابن رشيد حتى مشايفته اني ولا اعرف ، البيت فرغ من ناس الكل ادور والكل تفتش عليه ، نوب جديتي تخبلت  كالت امشو للبستان لو للنهر هساع تلكو واكع هناك

والله ماكالو باطل اخذو لايتات ومشو للبستان يشوفو هناك لايكون رايح يمشي وحده ، ومتيهه ..

دورو يم عمته نغم مالكو ، ابو كل شوي يدك ويخابر جدي هاا مالكيتو ماشفتو ، وين راح ، ماخميتو البير القديم خاف واكع هناك ،زين بيتنه الي بالبستان دورتو خاف رايح هناك يلعب ..

جدي يرد ولد عمك جاي يدورون لايضل بالك خليك يم امك ماخلو مكان ماخمو ماينامون ليل الا ولاكي انشالله  ..

نوب طامه الكبرى اخرس يعني لايسمع ولايحجي .. شلون يلكو ، حتى اذا ضاع مايندل بيته ولايعرف يوصفه ،  قريتهم صغيره وكلها اهل بس ماكوو ،  ميعرفو ابن رشيد ..

لاخلو تانكيات الماي ، لا غرف لا سيارات لاحدايق لا بساتين ،  كلشي جدامهم دورو ،  متعارك ويه جهال وضارب واحد منهم وشارد زعلان منهم ،  نغم وعلا كطعن نفسهن عليه ..

مجطوله على تخم كل شوي اغفه وارجع افز على صياحهم ، حسيت على امي تخلي عليه بطانيه ، غطتني زين :- كالت نامي امي الله كريم ..

غفيت بس نومتي خفيفه بسبب اصواتهم وبجي البنات للفجر هو ماكوو ..

كاعده بيبي وجدو ،  بالصاله ، وامي وابويا هم ،  كل شوي يصيحون بواحد هاا مالكيتو ، وين طار وين راح ، شجاكم عليه و زعلتو ..

طبت علينه مره نطت باب دفعه لزكتها بالحايط تصيح وتغلط على علا ونغم ، لابسه دشداشه ولافه العبا لف وشايله نصها بيدها ..

ومتعصبه بشال عبالك جاي تهد وتتمالخ ..

عاطت :- فوك ضلمكم نوب رديتو على هالسكطط الله ياخذكككم .. شنو تردون منه هيج مخرعيييي ومخلي يشرد منكم ومن ضلمككككممم  ..

بيبي نترت بيها ، انجبي ونصي حسج ، هذني التغلطين عليهن هنه ربنه ودارنه ، بوكت انتي تزوجتي وخلفتي وعفتي ، لاتجين هساع اطلعين نفسج خوش مره جان كعدتي عليه لو عزيز  ، لو عدج ذره رحمه ماتزوجتي وعفتي ..

- اي تردون تكسرون ضهري بجهال سكطاء نوب ،  تردون خلفتي بس خرسان ، شنو انتو من بشر ماعدكم مخافه الله طغيتو فرد نوب ..

- عجل ماخفتي الله قبل كم سنه من جلب بذيالج  ،وانتي ادفعين بي وترحين بيت اهلج ، ولج اسمعي زين باب يتعذرج لا بالقران اخلي البنات يكلبن ثوبج فوك راسج يله باب يوسع جمل  ..

تلاغن بالحجي ، ذيج تصيح وتدعي وتغلط على بنات وبيبي تنتر بيها وتسب بيها وباهلها  ..

رافعه اديها وتصيح اللللللله واكبر عليكم ظلام متخافون الله .. الله يسكككككطكم ..

- جدي كللها ولي من هان يالعرمه ،  لااجي ظهرج اكسرو ، ادب سزز .. امشي لابارك الله بيج ولابتربيتج ..

-ضلام والله ضلام ، شايفين نفسكم على خلك الله ليش .. بشنو احسن من البشر انتو الحمدلله نص خلفتكم تطلع مريضه عبن من سمكم الي عام عليكم ..

ردها جدي والله دنعل ابوج لابو الي جابج علينه بنت سكط تعايرينه بلاء الله ..

بيبي ردتها :- انتي جايه تردين ابنج ودورين عليه ، و تفتحين دفاتر عتك ولج ،  امشي اطلعي منا يله ..

- جدي عاط بيها .. اطلعي لا ادك على ثور الي اخذج ولفاج يله امشي ولي اطلعي ..

ابويا  كالها :- ام فهد تجفي شر بنتي وروحي لبيتج ، هسه يلكو وين يروح يعني ، توكلي باله بنتي لاتكبرين الامور ، احنه اهل ..

طب ابو فهد وساند امه هو مرت عمي سلامه ، المره داعيه خركه بيدهم ، والكانونه بيدها ، تلكتها امي وبناتها يبجن عليها ،  وجهه كركم ..

دخل هو الوجهه مكلوب منا ابنه ماكو ومنا امه صايره فرد نوب داعيه جنازه بيدهم  وهاي تلكته بعده توه طب عاطت هيه  ..

- حاير بامك وابنه ماكو ضايع متخاف الله فوك ضيمه ، نوب هاملي ، حاير بهل عجوز الله مجاي ياخذها ،

بعدها ممكمله هو شال المزهريه جبيره بصف الباب صايره ، وشمرها عليها .. صوت الهفه مال شمره المزهريه وحده يخوف ..

اجت ترس على صدرها وصفحتها ، ضلت تعيط وتربش ،  هد عليها ،  لزمه جدي و كالها امشي اطلعي بره ، حسج واصل ليغاد من البيت . امشي ولي طايحه حظ ..

عاط بيها ابو فهد دنعل ابوج لابو لفاج علينه ول ياب حرمه ماوراه زلم جايه تتهددين هنا علينه ول يابه بالقران اليوم اجتلج خلاص ..

كوه لزمه بابا وجدي ماخلو يلوحها ..

تمددت بالكاع وتسب باام رشيد ، هيه ضخمه مو ناعمه وصوتها عالي ، صوت صياحه وعياطها هرجنه هرج ..

ابو فهد :- صاح بيها بيج خيررر ماعفتي لحمه حمررره .. وماسالتي عليه .. جايه حسه تصيحين ضلاااام ومنخااااف الللللله .. الا اليوم من صدك انسه مخافه الله واكتلج خلاص .. ودشوف ياناقص يطلع وراج ..

جدي وابويا مجلبين بي ، ماكدروله ، وهيه كاعده بالكاع لازمه صفحتها تعيط وتغلط ، شكد شفت نسوان عرمات وكحات بس مثل هاي ابد ماشفت   ..

رغم الضربه الاكلتها وخلتها تمدد بالكاع ، وكلها تهد عليها وهيه ما سكتت ،  تنتر بهذا وتغلط على هذا ، وتسب هذا .. وتتحدى بابو فهد... هو طكن خبالاته عليها ..

وجهه دعه احمر دم .. وعروك وجهه وركبه كلهن بينن ..

ماكدروله الا جلب بي جاسم وحسين ولد عمي وجتفو ، ام رشيد طببنها بناتها للغرفه ، المره فاقده ، وبناتها يبجن عليها وخايفات و على ابن اخوهن ماكوو ..

نسوان عمي ، شالن ام فهد ، من الكاع شيول وماترضه تكوم ، تريد تكمل عركتها وياهم ، تالي مرت عمي حميد جرتها من شالها جر ، وسحلتها ليبره مرت عمي سلامه لفتها بالعبا تستر بيها حتى لاتطلعن كراعينها وجرنها ..

ويدفعن بيها يطلعنها  ، مرت عمي سلامه كالت راح اوديها لاهلها خما نعوفها هيج متخبله بنص شارع .. جدي كللها لخاطر ابوها عيب منه وديها وكليلهم اذا عتبت باب بيتنه مره لاخرى اجتلها خلاص والله  ..

امي بصفي صافنه عليهن متفاجئه :- يااصدوك عود ،

باوعت على هند :- شفتي يالغمه شفتي عمتج هاي راح تعاشريها يالثوله ، هاي البيئه الي كاتله نفسج عليها مابيها لا ليل ولا نهار بس مالخ وعرك ،

هند ماحجت اصلا متفاجئه اكثر من عدنا وجها جامد حايره شترد ..بس عيونها يفترن علينه ...

ابو فهد ركب سيارته وطلع يدور على ابنه ..

لحكو الولد يدورن يم المزارع والبيار القديمه ،  بيبي لزم راسها وصاحت برقيه تجيب عصابه الها ،  جدي نبش عشيرتها بالسب ولغلط عليها ..

لازمه بيد ابويا وكاعده اباوع عليهم  ، بنات عمي نضفن الصاله الي نص غراضها تطشرن ، وتكسرن ، حتى ياسر طلع يدور  ، بحظن بابا غفيت من الهوسه ..

ما حسيت غير بس صبح على هوسه ، صواتهم يصيحون اي يالله .. اي يمه خطيه غير خاف ..

اني نايمه بصاله ، ومغطيني ، وهمه للفجر ايدورون عليه .. سمعت حجيهم رفعت الغطا ..

باوعت على رقيه الي كاعده على صينيه الريوك هيه وبيبي وامي يسولفن ..

كتلها ها يوم ..

ها يومه صباح الخير ..

صباح نور .. لكيتو الطفل لا ..

اي يمه لاكي ابو خطيه ..

بيبي كالت :-  اي يالخايبه لكو وانتي كضيتها نوم .. ماحركتي لشتش شوي ويه العالم يالفاهيه ،  ادري من شنو الله خالكج ..

:- بيبي غير تعبانه ، البارحه عرس ونهار كله نركض وليل كله هبطنه من وره طفل عرشيس طلع   .. تثاوبت ..

:- الي يسمعج طابخه ومعزبه العالم .. مو كضيتها من حظن ابوج لحظن اخوج..

:- وين لكيتو ..

رقيه كالت :- لاكي رشيد بيتهم ،  من خوفه نايم جوه جربايه ابو مصخن خطيه ..

:- ياعيني هسه وينه جبتو هنا ..

:- لا وين اخذه رشيد للمضمد يضربه ابره ليل كله هو مجمر لا كماده لا دوه همزين مانشمر هم حظه خطيه لام ابراسها خير وعماته هم لاهيات بامهن مريضه ..

بيبي كالتها  :- والله مدارياته مثل ماي بس حظ ماعده مثل ابو ، والا وين اكو بحنيه عماته ، شو نغم مزوجه وبعدها تجي لخاطره داري وتسبحه وتقرض اضافره .

اباوع بوجوه الكل تعبانين ، ومهبوطين ،  ناس مدده بصاله وناس بالحولي ، صايره خبط ، وناس تاكل ..

كمت نايمه بملابسي مال بارحه مال عرس  ،  غسلت بالمغسله الجوه وصعدت اسبح واغير ملابسي ..

صاحت امي راح نطلع نودي ريوك للعرسان تجين ، صحت لاا ،سبحت وطلعت ابدلت ملابسي مشطت و ضفرت شعري ضفيره بعده رطب ينكط ماي نوب لاشسوار لاصخام انشفه ..

لفيته وطلعت اتريك ، عيوني مقفله والبيت فارغ ، ومحد بي ،  هسه شجاني وكلت لا ، جان على الاقل اتريك هناك ، بالمطبخ اكلب بالثلاجه وادردم ..

اشكال موجوده بيها بس مااشتهي اكل وحدي ، وماكل الا اجبان لو كيمر ، مو نفس نوع الي احبه عدهم ، خدرت جاي وطلعت الصمون احمي على طباخ على المهدره  ، انفتحت باب المطبخ ، التفتت ابو فهد ..

باوعت على ايده شايل علاكه بيده .. ابتسم من شافني اباوع على علاكه .. كال صباح الخير ..

:- صباح نور ..

:- ممتريكه مو باله ..

:- هزيت راسي اي .. وانته ..

:- متريك بس جوعان .. وجبت كاهي وكيمر تاكلين..

:- محد موجود ..

:- ادري ..  حط العلاكه على الكاونتر .. كال صبينه ريوك من اديج يله يابه ..

اكو مندر بالمطبخ مفروش ، كعد عليه متربع ، رفعت حاجبي ، حطيت صينيه ،  فردشت العلاكه ، جايب كاهي وكيمر ومربي وحليب جاموس ويع ..

من حشه نعمه الله ، مااحبه اموت من ريحته ، كعدت ارتب بصينيه ، كل شوي اباوع عليه الكاه يباوعلي ..

مو اجتماعيه واحجي وياهه وافتح مواضيع ، ولا هو عقله مثلي ويكدر يفتح موضوع يحجي وياي  . الكل الي يسوي .. يبتسم بوجهي واني مفهيه بوجهه طلع يعرف يبتسم هالرجال ..

:- كتله ابنك شلونه ..

:- الحمدلله على الله ، عفته بالبيت نايم صخونته نزلت شكر لله  ..

:- خما كتلته لان ختل منكم ..

ابتسم :-  لا ..

:-اي خطيه لان ايدك ثكيله ..

ضحك :- مو قصدي اضربج ترى يابه ولا الي نيه امد ايدي واذيج بس انتي عنوديه و تلاسنين وهالشي ممقبول عدنه لان عيب ، عندج ملاحظه او اعتراض على معاملتي وياج كليلي فهميني وعاتبيني ، ان طلعت غلطان بحقج اشلع عيوني وانطيهن الج ،

بس مال توكفين بوجهي وتتعاركين وتزاكطين مثل الزمال وماتخلين احترام  لا والله ادوس بطنج رفع حاجبه فهمتي يابه ...

:- خلفله عليك توه اكول حجه شكد حلو ، تالي ختمتها ازاكط مثل زمال ...

ضحك :- مو قصدج اقلل من قيمتج بس هاي انتي ليش جذب ...

هزيت راسي ماله علاج هل بشر لا والله حراام . . شلت صينيه وحطيتها كدامه ..

:- كال متتريكين ..

:-عافيات ماريد ..

:- انتي ممتريكه .. تعاي اكلي تره جبت هذا ريوك الج ، اعرف متاكلين اي شي ، جرني من ايدي حتى اكعد ، يله سلمي بسم الله ومدي ايدج .

كعدت كباله ، صبيت جاي وقدمتله الستكان بس الجاي شو لونه يلعب نفس ، ادري حتى الجاي مالتهم مختلف عنه ، اني بيه طبع الشكر احطه ويه جاي بالقوري وافوره ، فبالريوك بس اصبه ..

اخذ الستكان باوع عليه ، ونضره بوجهه اسمئزاز ، بس ابتسم واخذه ، توه شرب منه شويه ، شو هذا شرك بي وكام يكح .

:- خرب بليسج اي والله ..

انصدمت :- ها شبيك ..

:- ينعل لشتج هذا شنو شخاله وياه ياولوو  ..

:- شنو جاي شبي ، اخذته منه اضوكه ، ضكته لان مر دفله على ملوحه على طعم يلعب نفس ..

:- ياا هاي شنوو ..

:- اسالي روحج ياول ،

كام على حيله للسنك يتمضمض ويغسل  .. كام يضحك ،

:- كلاص جاي مدبرتي ، لزم الاستكان يخوط بي ، شو كام يطلع فقاعات ، هذا شاف الفقاعات لو خرب ضحك ..

:- شبيك ..اني شكو ..

:- عجل منهو خدر الجاي ابوي ، وجهه صار احمر من ضحك ، والله اجيت متكدر وضحكتيني ، شخاله وياهه زاهي لو تايت ..

رفعت راسي :- لا والله ،شكر لكيته على سنك بعلبه بصف علبه جاي ..

:- عجل يالمعثره ماعرفتي تفركين بين شكر و التايت .. خرب بحظج اي والله ..

:- غير انته سطرتني بس تحجي وياي ..

:- افاا هساع انا السبب هو المايعرف يركص شيكول ..
كمل ضحك وكل شوي شايل الستكان ويخوط بي ويطلع فقاعات ويضحك يكول.. هاي فقاعات حمام ابوج ..

كمت من يمه متنرفزه ، فوك مامسويتله ريوك نوب يقشمر ، شلت القوري والستكاين وحطيتهم على السنك ، كعدت يمه وهو بعدها الضحكه بوجهه .. كتله اضحك ليش كاتمها .. اضحك بعد ..

ابتسم :-  شنو نتريك بدون جاي ..

:- يابه والله ماسوي بعد صار ساعه اسوي ريوك تالي تضحك عليه وتقشمر

:- ول يالمعثره ماعرف اتريك بدون جاي

حركت جتفي ماا ..

:- عجل  دكلي تاكلين وجع  .. واول مره اتريك بدون جاي بس ميخالف ماريد اثكل عليج ..

كعدت اكطع بالصمون واكل ، استحي اكل جدام احد . ومن اطلع من بيتنه ماشتهي ، بس رغم هذا ماردت افشل نفسي اكثر ، كعدت اكل ..

كل شوي ارفع عيني عليه الكاه مبتسم يباوع عليه ، خلاني اغص بالكمه ، ول يابه مربا وتاكل مربا ، باوع لشفتي اباوع عليه بلع ريك رفع عيونه خلاهن بعيوني ..

بلعت ريك مارديت ..

:- تدرين جاي على بالي هساع ..

رديت عليه  :- شنو؟!

:- اسوي مربا مشكله بكل الاذواق ،

عقدت حاجبي شيقصد هالمستهتر ، كتله :- مفتهمت ؟؟

جر نفس عوفي سالفه بعدين عود اكولها ، ضليت صافنه بوجهه ، كال هاا شنهي الا تعرفين بالسالفه .

:- لا ماريد دنجت بساع اتهرب

حجه هو :- عندي بيتنه قديم بالبستان وقريب على شارع العام  ناوي اسوي معمل بس بعدني مامخمخ سالفه زين يرادلها صفنه وراس مال وعمال تشتغل وعناصر انتاج ..

سكتت صافنه هااا ...

:- شبلاج ،

سكتت ، كال شنو ماعجبتج فكره ،

:- لاشعليه اني هذا شغلك وانته اعرف بي الله يوفقك اذا يشتغل هنا وامو وارد زين توكل على الله ..

دنج راسه يكمل اكل كال الله كريم ...

شويه وكام هو ، كلي ، يله  كومي حطي شي عليج داخذج لبيت عمج سلامه كلهم هناك ،  ترى مايجون منا للضهر ويمكن عمج يجلب بيهم على الغده ..

شلت صينيه وحطيتها على الكاونتر .. كتله هسه ..

كال مو تتاخرين ترى اعوفج وحدج هنا بالبيت واطلع ..

لا دقايق ، طلعت اركض ليفوك ، لبست فستان عادي لون نيلي مذهب ، وحذاء ابو الاصبع فلات ..شعري ضفراته زين  ، نزلت اضفري بي  ...

تلكاني واكف بالصاله.. باوع عليه من فوك ليجوه ..

:- ليش ياول ماتلبسين حجاب .. ترا حلو عليج شناقصج وماتلبسي ..

همست :- مااحبه ..

:- اكو بنيه ماتحب ستر ..

:- ليش تحجي هيج عبالك اني لابسه شي عيب ..

شعر زينه وماتطلع هالزينه بس للزوج يابه ، ليش تخلين رايح وجاي يدحك عليج ، روحي البسي حجاب يله يابه ..

سكتت ..

امشي بويا تاخرنه ترى .. واذا مالبستي ماطلعين صدكي بالله ..

ماردت اعاند اعرفه من يطكن عده ، صعدت جبت شال من ملات امي ونزلت خليته على راسي ..

لو الله يهديج وتلتزمين بي ، بس اعرفج بس ترجعين لبغداد تنزعي ، بس الله كريم .. تنهد يفر بالسبحه ..

ابتسمت .. ركبنه سيارته وذبني باب بيت عمي سلامه..

نزلت اني وهو وراي صف السياره ، طبيت لبيت عمي ، الكل موجود حتى جدي .. سلمت ودخلت ..

بابا كال منو جابج ، كتله ابو فهد . جابني  ..

صاحت بيبي :- وين راح جان نزل تريك يمنه

:- هسه يصف سياره بيبي ..

طب سلم .. بيبي كالته :- شلون امك يمه ..

:- الحمدلله بخير حجه احسن من البارحه ..

:- يايمه غير انهبطنه هبطه ..

:- اجت سلامات حجيه ..

:- دتعال يمه مد ايدك وكول بسم الله يله ..

:- الف عافيه توه كام من صينيه ريوك .. ماشتهي والله ..

:- والله هال علا شايلتكم شيول مدري شلون تزوج وتعوفكم منو يداريكم بعد .. حايره باامك وبيك ..

ضحك كالها :- اي حجيه صدك .. باوع عليه بس شلون تريكت ريوك .. توه .. جاي بطعم التايت مو الهيل ..

:- هاي شلك بيها رويشد ..تايتيش يمه ..

:- اي بالقرعان .. رجع يضحك .. نوب حجيه كام يبقبق الجاي بيدي ...

:- ويا غمه سوته الك هاي .. كلت هسه يفضحكني ..ماحجه .. كالها دصبولي جاي يرحم والديكم ..

صبتله رقيه ونطته كلاص .. كالها :- متاكده شكر مو تايت  .

ضحكت :- متاكده شكر .. شبيه عميه لو فاهيه ..

سكت مارد عليها ..

بداخلي ضجت من نفسي ومنه ،صدك اني فاهيه لو هيه اخطاء وتصير عادي ، لو همه على كولت ياسر يضخمون الامور ..

كعدت يم امي ، ضلينه بحدود الاربعه ايام ورجعنه ، بهل فتره الي رحنه بيها ، طلع جدي قانع بابا ، يقدمون العقد بعد انتهاء المرحله ثانيه ل هند ، سيف متوسل بابا، . وهند مأيدته ومكيفه ..

والله بروحتي الهم ، ماشفت اي شي مثير ويخلي الواحد يفرح بزواج منهم والعيشه هناك ،  غير بس الهوسه والهيطه ..

من عدا نسوان عمي الي عبالك حيايه تلتف على ركبه .. وهيه رايحه يم وحده منهن ، استغرب على هند الي ماخذت نصيحه اهلي ومشت وره كلبها ، بحجه الحب ..

الي ماراح يوكلها خبز ولايفيدها بوكت مشاكل والخلافات .. بس حياتها بعد الحجي ميفيد وياهه ..

رجعنه للدوام ، وبابا يطلع من صبح خطيه اول واحد بينه ، ياسر رجله بعدها تصل عليه ، المحل مالته فتحه مره لخ وصلحه ،  ورجله يرادلها راحه وهو معاند ..

وره الامتحانات ، حددو يوم العقد ، اني طلعت اعفاء بابا بوكتها فرح ، موجديده عليه بس هو يفرح بيه ، يكلي بس انتي و جاسم درجاتكم خلتي افرح وافتخر ،  جاسم خريج هندسه مكانيك .. وعده ورشه تصليح ..

امي تلوب من سالفه العقد ، حاولت ويه هند الي عصبت وضلت تحجي وتصيح ، كافي نفستونه اني وسيف ويوميه انتي وامه زن براسنه حتى نترك ونفصخ..

عبالك من غير دين لو بينه عاهه وجاي تريدن تخربن الزواج ، امي كالتلها طبج مرض شلعي شوكج بيدج  ، والله اذا تجيتي فد يوم وشكيتي الا اتفل بوجهج ماتاخذين الحجي طبج مرض .. عافتها وكامت معصبه ودردم ..

صدك بس اجو بالعقد الوجوه مكلوبه امه وخالاته واخواته ، بده نغز ، والكلام الي يخليك تطلع عن طورك ، هند ماهامها فرحتها بالدنيا ..

كاعدين على اعصابنه .. خالاتي اجن وبناتهم .. خالاتي ضاجن من عمتي ونسوان عمي وكلامهن جاف .. ام رشيد وعلا مااجن ..

عقدو وخلصو على خير ،  الهلاهل بس من جهتنه وبيبي وعمتي نشام والبقيه حادات سنونهن حتى صفكه من جذب ، نوب خالتهم كامت تهوس اخذاها جان صاحبها وتدبج

خالتي سعاد كالت يااا هاي شبيها بنت دبش شنو اخذها جان صاحبها ..

نزلت خالتي للميدان وتهوس هاي رادها وهاي تمناها بنت شيخ لابن شيخ جبناها .. وبنات خالتي وياه يفكن ويرددن  ..

سطرنه سطر بهوساتهن . تكعد خالتي تكوم خالته ،تكعد خالته تكوم خالتي ،  ضال بس شوي ويتناطحن ...

اشوف فرحه هند واتصالاتها وياه ،  وحسره علا على ياسر الي مو يمها اصلا ملتهي عنها ، و مشاكل بنات عمي و اذيتهن بزواجهن المبكر ..

اطفالهن بيدهن ومبهذلان وهنه ممتعديدات ال 20  عبالك عجايز ،  لافساتين مثل العالم ولا فرحتهن مثل العالم  ، يتراكضن وره جهالهن ويصيحن ،

عكس بنات خالاتي ، عبالك عرايس بليله عرسهن ، وهنه كلهن دكن الثلاثينات ومخلفات هم  ، بس اعتناء والاضافر والمكياج و راحه الي عدهن ..

هيفاء الي ما صارله كم شهر مزوجه ،  حبله وداعيه جلد وعضم والوجه مصفر ،  عدها ضغط مال حمل ومتعبها .. وهيه منا صغيره ،  تمشي كوه وتعبانه ..

ورجال ولد عمي كشخه وريحه تفوخ منهم ، عرفت الضلم والضيم بس للمره مو للرجال ، يحبلن من وكت و تجيب و تتحمل عيال ، وتربي جهالها ، وهكذا ، ورجلها ، سويج بيده .. والمحفظه بجيبه ويطلع صبح يرجع العصر ، وياولها اذا غفلت عن شغله ،  لو رجع ومالكاهه محمره مكحله ..

لتاكل طن كتل منه بحجه ماقايمه بواجبي ، وصخه وهامله البيت ، ويوديها لاهلها وهم يقومون بالواجب ، وتجي الام تنصح نصايح فاشله متعلمتهن من تجربتها الفاشله ..

عبالهم نجاح الزواج بعدم الطلاق ، شما كان الزواج وشنو بي من ضيم واذيه ومرض وتعب ميخالف اهم شي متطلك ، الي تتحمل كل هذا وتصير يضربون المثل بيها وبيتها ، يضربون المثل بوحده دفنت نفسها بالحياه يشوفو انجاز عظيم ..

والي تنفر وتحجي وتتمرد وتريد تعيش مثل الاوادم من احترام من حريه يكولون جايفه مادبرت رجال وماحوته لو بيها خير جان حافظت على بيتها ، مو يوميه زعلانه ..

طلاك عدهم كارثه مايعرفن طلاق هو خلاص الهن من هيج ذكور ، ماكول كل عمامي هيج ، عمي سلامه  انسان حنون ، وحتى على بناته ويا ويلاه الي يندك بيهن من لرجالهن لو ياذيهن .. ولده فرد فقره وحشاشين يضحكون للهوى ..

صدك كلمن وتربته واهله .

..خفت على هند لاتصير مثلهن ،  خفت على مستقبلها هيه مجاي تشوف الي اشوفه لو اهلي اليشوفو ..

ابتعدت عن بنات عمي  . اشوفهن ضعيفات وعاجبهن ضعفهن ، معنفات ومايحجن ، واني اضوج من هيج بشر ، رقيه احسها السان وكلاوجيه بيها مجال ، وعلا فقيره حيل .. وانقهر عليها ..

جاي انضيف بيهم ضيافه ، مرت جاسم واني وبنات عمي يساعدنه ، انتبهت على بنت عمي بثينه  ،  معصمها ازرك نيل ..

جفلت من منظره ، شلون المحترك ، اشمئزيت ، ضليت مركزه بيدها ، هيه لابسه معاصم ، جوه الثوب مالتها،  بس مبين بيدها ذاك وينه ..

استغربت محد انتبه عليها ، كوه تمشي عبالك عمرها اربعين وتجر نفس كوه ، وهيه يادوب ال26 سنه ..

استحيت اسال او اخاف اتفاجئ من جواب ، لاتكون ضربه .. مجرد ماشفته من يمي تألمت ،  اشرت لريقيه ..

اجت يمي ، كتلها :-  بثينه شبيه تعبانه . كالت مابيها شي ، بس صارلها فتره من جايبه وتمرضت وره الولاده لان عمليه ..

اكول ليش تمشي على كيف عبالك مدري شبيها ..

اي خطيه مو التهب جرحها من شغل ، وهيه ماتكعد ، بس تركض وره جهال ،  ورجعو خيطو مره لخ ..

ماردت اسال على ايدها كلت خاف متعرف وتسال بثينه وتحرجها ..

سجى تفتر يمي ،  بنات عمي يباوعن عليها من فوك ليجوه ، شلون ماخذه راحتها وتفتر بالبيت بفستان فوك الركبه ..

ضحكت من حركه رقيه ، لوت بحلكها معاجبها ، وسجى كل شوي توخر بشعرها ليوره ، اجت علا ، وكفت يمي ،  كالت اكلج خما اخوج ياسر شايف هالزرافه ..

ضحكت .. منو الزرافه هاي ولج ..

اي تفتر و تلوي بخصرها ، ورافعه راسها جنها زرافه ، والله عيب ترى وزحمه شنو ماكو حيا  ..

ضحكت من صدك :-  كتلها هاي صديقتي ولج لاتحجين عليها ..

:- واني بنت عمج عليج النبي اخوج خما شايفها لو حاط عينه عليها .

:- لا ولج منين ماكو هيج حجي ..

:- وخريها من درب اخوج لان امبين مو خوش بنيه ..

:- هااا هاي منو . لاتخافين مايباوع على هيج ياسر يريد وحده محجبه وبكده .. مو جاهل وسافره شبيج ..

اجت سجى وكفت يمي كالت كولي جيززز .. ولازمه موبايل تريد اطك سلفي ابتسمت اطك النه  .. هذني من يمي طفرن عبالك وكعت عليهن صاروخ  ..

ضلت تمشي وتاخذ صور النفسها متعجبه بشكلها ههه .. هيه ماتدري لو بنات عمي يلبسن فستانها و يفلن شعرهن .. يكسرنها . بس على كولتهم الخير يخير . بنات عمي عدهن فلوس دنيا بس هتمام ماكوو..

لليل كلها راحت حتى خالاتي .. طبيت لغرفتي ابدل وانام .. لان جسمي دعه منخل من تعب ..

توه طلعت من الحمام .. اشوف موبايلي يضوي ..

فتحته بالعشر رسايل ... رقم غريب ...

قريت اخر وحده ..

ااااخ الله .. مادري بالله يخلق ملاك على هيئه بشر ...!!!

#يتبع

نجمه 😘💜