رواية ثأر مهري منهاا الفصل الثامن 8 - بقلم اسماء ديمير

《《البارت 7 》》

#ثأر_مهري_منها

بقلمي  :- " أسماء ديمير  "

سبحت ونزعت ملابسي .. احس جسمي مكسر .. انجطلت ناكل كرزات ونسولف .. نعست حيل ضليت اتثاوب .. توه اغفه .. وجفتت علا .. كالت رشيد يصيحلج   .

شنو يصيحلي ..

- يكول يله تمشي تروح يم امها وابوها ..

- كمت على حيلي .. ليش شكو .. شنو صاير ..

- مصاير شي يمعوده .. بس يكول خلي تكوم تبات يم امها .. شعدها هنااا...

- شعلي هوو ..

- هاا بدينه شعلي وشدخله .. كومي لاتتعاركين وياهه الله يخليج ..

- شنو لاتتعاركين وياهه شنو لاتباتبن هنا .. هاي شبيج بابا .. اني كلت لاهلي هو شكو..

بنات عمو سلامه كالن امشي روحي وياهم هناء لاتسوين مشكله .. تدرين بي انتي ..

نفضت ايدي بعصبيه جمرت شعلي هو شدخله الحشري :- ماروح شعلي هو  والله يالله .. كلت ل بابا وهو راضي اخوج لايدخل  ..

:- دمشي الله عليج ولاتسوين مشكله .. هسه هيه على النومه نامي بحظن امج متكيفين ..

:- هسه هو ليش يخرب عليه اخوج .. روحي انتي شعليه بيه اني .. عدي اهل واخوان يحاسبوني .. متعب نفسه وياي ليش ..

:- هسه اكله ماتجي يعني ..

:- اي روحي ..

:- هااا ..

:- وجع ولي انتي واخوج ..

:-والله ترى اكله تغلط عليك ..

:-استغفرالله .. غطيت راسي بالغطا ونمت ..

راحت وردت بسرعه رجعت شالت الغطى .. كالت:- يكول والله الها خمس دقايق اذا مانزلت اجي اسحلها ..

:- لاخوش عليه .. خلي يجي يسحلني باله  دفعت ايدها وغطيت راسي  جنت نعسانه حيل .. اريد بس انام ..

دك موبايلي .. شلته جاسم يتصل بك ..

بس كلت .. الو كلي  :- مو ابوفهد جاي عليج ليش متجين وياهه ..

:- كلت لبابا والله وكلي ضلي باتي يمهم ..

:- لا تعاي ابو فهد منتظرج بالباب يله .. سد الموبايل بوجهي حتى منطاني مجال اعترض ..

دفرت الفراش برجلي حيل  والبنات يضحكن .. دمعتي طفرت ، بيه مرض اي والله مرض هذا ..

لبست عبا على جتافي لان لابسه دشداشه كصيره مال نوم .. طلعت ، علا تنتظرني ، رادت تحجي ، نترت بيها تسكت .

نزلنه سوه .. الدخان يطلع من اذاني من العصبيه ، جان ناطينه ظهره من سمع صوتنه التفت يباوع بوجهي وصلت يمه يفر بالسبحه ، وحاط ايده ثانيه وراه ضهره ،  ماحجيته .. طلعت كدامه .

:- كال وين موليه ياولوو تعاي هين  امشي ويانه ..

مارديت عليه .. كملت دربي .. جرني من ايدي .. موجاي احجي وياج يالرعنه ..

دفعت ايده :- وخر لا اعيط والله وخر ..

:- خدج يحكج لازم شنوو .. لاتخليني اضربج ..

:- لا مو هيه تايهه كل ماعجبك تضربني والله اكلبها للدنيا اذا ضربتني نوب ..

:- عجل اكلبيها يابه ..ضربني خفيف على خدي .. يله باله مو تهددين نفذي تهديدج ..

اني بجيت دفعت ايده :- كسر ليدك انشالله . علا كالت كافي عوفها رشيد الله عليك ماتعرف طبعك شقه ولاصدك لاتبجيها  ..

باوعلها وخزرها وهيه خنست .. عافتنته راحت دخلت لبيتهم ..

اني كملت دربي لبيت عمي علي امشي بسرعه وامسح بدموعي  .. هاي شبيج يابه متتحملين شقه .. ضربني على راسي ..

زمخت بي ونكتت ايده عني :- وخر شبيك بابا بس تكفخ وخر عني ، زاد بجي وكمت اشهك ، جرني من ايدي قوي ،  لفني بديه وحظني .، فززني بحركته هاي دفعته مجلب ، لعبت نفسي من ريحه عطره .. راسي صار على صدره خنكني ..

دفعته جلب حيل .. كلي اشششش ...

:- عطت بي وخررر ..

:- ماوخر شبيج ياولوو .. اهجعي ..

:- كافي وخرر شبيك عيب عليك ..

:- ول اسكتي الااحد يسمعج حسج ..

ادفع بي مجلب عبالك جاي ادفع بدنكه نوب نزل راسه على شعري يشم بي خرب راح انفضح والله نوب يتهموني اني حاظنته ومجلبه بي مو هو يتحرش بيه ..

:- الاكول ال بابا والله ابعد عني ، دوخررر يمعود شجاك

:- كوليله شنو يعني .. حاظن مرتي قابل غريبه عني ..

دفعته .. هو فلتني هم .. ابتعدت عنه بسرعه بركضه .. التفتت عليها .. صحت بي :- لاتحجي بشي مراح يصير .. منو كلك اقبل ..

يمشي وراي برهاوه ويضحك :-  لااتقبلين بنت عمي المهم يصير ونتزوج وعن قريب انشالله ..

شطت من وره استهزائه بيه ، ماريد اتزوج هيه مو كوه ، اريد اكمل دراسه واشتغل مو هدفي زواج .. افهمت ..

طفر ، جرني من ايدي حيل ، صوتج لاتعلي .الصبر اله حد ، لاتخليني امد ايدي ياولوو .. خليني صابر وياج واكو صغيره وماتعرف تتحجه  ..

دفعته عني .. وخر الله ..  بعدني ممكمله .. وكف كبالي يريدني اكمل ..

سكتت وابتعدت عنه .. خفت يضرب .. لان شفت وجهه شلون نكلب وعيونه مو مثل الاول امبين عصب حيل ..

كال  وصلت حدها وياج ..لحد هسه رفضج ماخذه شقه ودلال ، بس بعدين من يصير الحجي جد تنكلب سالفه غير والحجي لازم توزني ، لان مو انا الي امشي بحجي الصغار كون الحجي ينكلب غير ، والفعل غير فعل .. افتهمتي ..

هد ايدي حيل عفته وطلعت اركض ، مريض مو صاحي ابد،  صاح وراي اوكف ،  وصلت لبيت عمي علي ، هو يمشي ورايه ، كل شوي التفت عليه.. خوفني منه ..

دخلت للبيت هو دخل .. لكيت بابا كاعد هو وجدي وعمو علي ،  سلمت وفتت ، بابا كلي ها شو اجيتي شعجب مضليتي يم بنات عمج .

ماحجيت ضل وجهي مكلوب اشرتله علي همست ماخلاني ،  ودخلت للحولي ..

اسمع بابا كله .. انته جبتها ..

اي عمي .. شعدها بايته هناك ...عدهم ولد وبيتهم متروس ناس غرب تكعد هين وتسكت .

طلعت راسي من الباب .. مو البارحه بتت هناك  ..

التفت عليه :- البارحه استخطيتج كلت خطيه ، وضوجتها بالنهار ، خلي تبات ،  بس مو معناهه تاخذيلج يومين .. ماعدي هيج شي اني ..

خنزرت عليه :- ومنو انته .. باوعت ل بابا بترجي بابا حاجي الله عليك  ...

:- زلمتج ياولوو .. كالها بخباثه  .. يله روحي تغطي ونامي يله ..

:- لاخوووش .

بابا كال روحي بابا نامي  ..

:- موجاي تسمعه جاي يكول بابا نوب يتصرف على هالاساس .. هاي مو حاله والله .. خانكني خنك .. دموعي نزلت ..

:- كالي روحي هسه بعدين نتفاهم ..

جنت اتمنى واحد من اخواني يكوم يضربه وياذي  .. ويكله اختي خط احمر مالك شغل بيها ولاتتجاوزنه .. بس جاسم اصلا مأيدهم ويحبه ..

وياسر مريض سوده عليه ..واذا حجه كلها تهيج عليه وتسكته على ابن عمها مو غريب هم اله حق يحاسبها ، قابل يكرهه هذا من خوفه وحرصه ...

طلعت ، واسمعه بابا كله وراي ،  رشيد ترى زودتها ، تعرف شكد احبك واعزك وانته ريحه اخويه المرحوم ، بس بنتي اعز اكثر  ، لاعبالك انطيها الك بدون رضاها ، وان جانت ماراضيه ماانطيها خليها بالك  ..

يمكن اضغط عليها واحاول اقنعها بس مال اجبرها ماسويها ، هاي الصغيره ماكسر بخاطرها واني ابوهاا ، وانته هم لا تضل تضغط عليها راح تكرخا بيك ، كثر الدك يطك الحديد ، وصلت ابني لااا  .

ماسمعت جوابه ، طلعت اركض جن ماي بارد ونزل على صدري ، حجي بابا كافي عليه .. اكيد هو راح يصر ويضل يجادل ، بس اي دونت كير ،  تمددت ضايجه من تصرفاته الرعنه وياي  ...

نمت يم ماما دحست روحي بحظنها .. لل1 حسيت بابا اجه ينام يمنه .. التفتت عليه وحظنته ..

:- ها ولج شسوين هناا ..

:- مو جبتوني من بيت عمي سلامه كوه تحملوني هنا هههه ..

:- كومي ولج عيب صايره بطولي وبعدج تنامين يمنه ..

:- ههه مااا ..

:- هه لاتراددين ابن عمج بابا ، ابن العم شيال هم ترى ، مدايملج اني مالج غير اخوانج ولد عمج ، فلا تكرهين العالم بيج ، وماتختلطين ،  خلي نفسج محبين ،. ماضل طول عمري وياج واشاكفلج ، خليلج ناس تشاكفلج غيري ،  واولهم ابو فهد  ..

:- هه هاا دزك تقنعني ..

:- شنو دزك ولج .. ضحكت اني ..

:- ولد شاريج وانا ابوج ، ماضغط عليج ،  بس تعلمي عليه . وابن عمج احسن من غيره ،  انتي لاتفكرين بالزواج هسه وانا ماانطيج هسه مو لان موخوش رجال ،  لا والله زينه زلم ،  بس انتي حبيبت كلبي اريدج تكبرين وتاخذين شهاده ويله تتزوجين .. ماريد اشيل خطيتج بزواج بالصغرر مثل اختج..

بس مثل رشيد متلكين ، محد يتحملج بكدي وبكد رشيد ، انتي مدلله وتشلعين الكلب ، يرادلج حوصله شكبرها . ورشيد لان يحبج راح يتحمل ، فكري بحجي ، ولاضلين تصيحين ماريدك ومازوجك ..

:- بس باباوالله اني ماريده عقله قافل ماتحمله ..

:- عجل تردين منو  ..

:- ماريد احد ماريد ازوج اصلا ..

:- خوش حجي هذا الكلام الزين لاتفكرين بهل سالفه ، حتى لو عماتجن حجن لو جديتج اسمعي منا وطلعي منا ،

:- بدون متكلي والله اني زواج ماخالته بالي ابد ..

:- اذا انتي عندج مشكله بفكره زواج مو ابو فهد .. ماتردين زواج مو متردين ابو فهد ..

:- لا بابا حتى هو  ماريده ، يضربني ويخنكني ، وبكلشي يدخل نفسه ياذيني حيل ، دشوف وجهي لحد هسه يوجعني ، صار كم مره ضربني على شغلات متسوه ، اذا صرت يمه شيسوي بيه ،  والله يكسر بيه عظم على كولته ..

:- لاتلاسني يابه  هم يبقه ابن عمج عيب وبكد اخوج جبير ، اسكتي ولاتجادلي ، وكل شي اله وكته ..
شاسكت بابا وهو حتى ملابسي يدخل بيها ، طلعتي طبتي هم يدخل وبكيفه تعاي وارجعي ،  بيت عمو سلامه مخلاني ابات يمهم ..

:- كل الزلم هيج بابا ، كيف ما ابو فهد ابن عرب ودمه حامي هو اصلا ابن عمج  ، يغار على عرضه ما يريد احد يلمحج ، يخاف عليج حتى من ولد عمج ، هذا الرجال الزين الي أمن على بنتي يمه ..

اكو زلم حتى ميدرون بنسوانهم وين ما وين ماعدهم غيره على عرضهم ،  وهذا طول بعرض يركض بنصاص اليالي عليج ويدور عليج ..

وين اكو هيج رجال .. يكفي لحد هسه ممزوج ينتظرج تكبرين .. جاسم بكده وابنه هسه بطوله ..

هناء :- منو كله لاتزوج هو عاجبه ، والله غريبه شعاجبه بجاهل ،  لو مزوج مو وكت جان ابنه بطولي ، بس على حظي ضال بدون زواج من شافني انفتحت جبسته ..

بابا خرب ضحك ، الله كاتبه الج ،  بعد ماعجبته غير الشكره بنت حسن ههه ، شنسويله ،  ناهبه ولد العالم انتي ...

:- جاي تقنعي بابا شنو جنك راضي على كلامهم ..

:-ماراضي ولا راح ارضى بس مااذم ابن اخوي هذا تربى جدام عيني رجال حوك وينشد بي الظهر ، وكفلي وكفات حتى عمامج ماوكفوها الي ،

بوكت زعلي ويه عمامج كلها كطعت عني يخافون من غضب جدج ،  الا هو يجي ويمر عليه بشغلي ويسالني اذا محتاج شي وهو بالخدمه بس كون امر ،

هذا يابابا مايتعوض اخليج يمه وانا مامن وبالي صافي ، رجال يخاف الله ومايرضه كلمه احد تمشي عليه شوره من راسه ، ومن صغره حامل بيت بوحده محد يعينه  ومسؤليه كوم نسوان بركبته مااشتكه ولا تذمر  ،

اشوف بي ابو المرحوم ، واتذكر دلاله لام رشيد ، خله نسوان تغار منها من كثر دلاله الها حافظ عليها مثل نظر العين ، صح عصبي بس دقايق ويفك ..

تنفس مقهور جنه تذكر عمي المرحوم فرك وجهه بيده :-.. همس صح مو وكتها وانا ماجبرج على شي بس احبه من الله معزته بكلبي محفوره مثلكم .. سكت واني هم سكتت  ..

نمت بحظنه افكر بكلامه ، بابا عقلاني وهادئ ومسالم ، عكس عمامي تماما ، تحسه نسمه هو بارده بعز الصيف ، وعمامي ولدهم ، لهيب الحار الي يكب بتموز واب ..

ثاني يوم كعدنه تريكنه بيت عمي ، صبو ريوك للكل ، كاعده بصف بابا الف لفات صغار وانطي ياكل ، هند مموجوده اصلا ماشفتها من يوم الحنه مختفيه .. محد اله شغل بيها بس حظي ..

جدي كال للولد استعجلو بويا بالتحضيرات العالم على جيه ..

ابو فهد وجاسم وعريس طلعو يحظرون للاكل .. والبقيه يحضرون جادر و الكراسي والميوزه .. ووو هوسه كلها تصيح وتعيط ..

العروس اخذنه اخواتها وهند للصالون .  واني والبقيه رتبنه نفسنه بالبيت .. العرس جان جبير اكبر من الحنه بهواي ..

صوات وصياح وهوسه و ناس طابه وناس طالعه .. وكلها تصيح ابني عباتي جبتي .. حذائي .. اني لابسه وكاعده يم امي عبالك اخاف لااضيع ..

جابو العروس ، حلوه حيل طالعه ، تلكتها امها وبيبي بهلاهل وجكليت ، كعدنه شوي ركص وغنه ،  لحد مااجو كالو يله زفه اجت ..

زفه اجت من العصر كالو يزفوهم شوي بالمدينه وياخذوهم للمصور ويرجعون بساع ،  لحتى يلحكون يعشون العالم من وكت ،  بيبي وام رشيد ونسوان كبار ضلن بلبيت ،

احنه ركبت سياره ويه بابا وياسر وماما ويانه .. هند ويه خطيبها وجاسم اخذ عائلته بسيارته ..

فرو بعقوبه فر .. دخلوهم للاستوديو ، ورجعو ، وكفت سيارات زفه كبال القريه نزلو يركصون جوبي نزلو عريس سحل من يم العروس ..

بابا فاتح باب سياره والاغاني تتعالى ، اول مره اشوف عرس بهل هوسه ، رجعنه المغرب للقريه ..

المصور طالع من جامه من سياره ولد عمي ويصور ،  وصلنه للبيت ،  هوسه بهوسه واغاني صواتها عاليه حيل عمي الجبير طلع سلاحه وبده يضرب طلق فرغ الشاجور ويله بطل  ، جلبت بابا خايفه من هاي الاجواء الغريبه ،

بابا صاح يمعود حميد لاتجي طلقه باحد وينكلب عزاا شيلها ليغاد ..

:- كله خلص الشاجور ول ياب  ..

دخلو للبيت بس الاهل ..وعمام ولدهم وعماتي .. ناس الغربه بره تبارك و تدبج ..

جدي كال صيحو المصور ياخذلنه صور جماعيه ، ماشالله احنه مو عايله ،  كل عم مخلفت سيت كلاصات ،  من عدا عماتي ، جنه فيران ندبي بالكاع من كثرنا مالك محطك رجل ..

عمامي وكفو على يمنه جدي وناس على يسرته .. بابا حاظني حيل ومكيف ..

حسيت بيدي انمدت على خصري رعشه سرت بجسمي  .. التفتت ابو فهد مبتسم بمكر مايباوع بوجهي نظره ليجدام  ، خزرته ،  ولطشت بابا ..

حرك اصبعه على نحته الفستان جن كهرباء والله كزبر جسمي اريده يوخر انزعجت حيل ، حتى نفس كتمته خفت لاحد ينتبه ، ضليت كل شوي التفت عليه اريده يشيل ايده جاي تتحرك ،  ماكوو 

وخر ليغاد من صاحو المصور ياخذلهم صور خاصه كلمن وعائلته جريت نفس اخيرا ، مستهتر بلا خجل  ..

بعدت من يم بابا ومشيت لعند ياسر ماخذ ركن ادري بي دايخ ودنيه مفتره بي حقه هو اني صاحيه ولامريضه وهيج .. الله يعينه هو الي يشرب كومه ادويه ومسكنات من وره رجله ..

كال جدي اشر للشباب يله زفو العريس ،  نسوان عمي اخذن العروس صعدنها ،  وراهه بربع ساعه زفو هو  كلشي لازم يتم جدام الكبار ، والزفه تصير برأسه الكبار ومعتز بدل ماينزف بيت اهله انزف بيت عمي لان هو جبير واحترام اله .

بعد مزفو ،  صبو العشه ، اني كعدت بحظن ياسر داعين ثنينه خركه ، برغم لاركصنه ولاساعدنه ولاصيحنه ولاسوينه هوسه،  بس من المنظر والصوت دخنه .. على ريحه التعب تعبنه وهلكنه  ..

كاعدين بالحولي مددين اني وياهه .. اجه جاسم محزم .. لابس دشداشه كريميه وشماغ جوزي .. طالع حلو ..

جاسم ماخذ ضخامه عمامي حتى طبعه مثلهم ،  دائما استغرب طبعه و عصبيته ، عكس بابا و ياسر هسه عرفت عليمن طالع خبل ، حتى متالف وياهم بسهوله ،  ويمشي ويطب ويطلع بكيفه  ..

شافنه مددين ضحك علينه ..

:- ها ولو سكراب انتوو ..

رده ياسر ..:-  سكراب ، تصليح ، عطل .. المهم رجلي جاي تعيط عليه وحتى مسكن مجاي يفيدها ..

:-صدك ياول ، غير تحجي تكول ، امشي اوديك للمضمد عدهم هنا مضمد ، ديشوفها الك .  كوم ..

:- لايابه ماريد باجر اني راجع .. اراجع دكتور عليها واشوف شنو علتها ..

:- باوعت عليه كتله توجع هواي ..

مسد على راسي :- لا بس احس العضم مو بمكانه ..

:- لعد شلون متوجعك وانته تحس بالعضم مو بمكانه .

:- اتحمل منا الباجر .. والله كريم ..

:- حبيبي حظنته حيل .. بيه ولا بيك ..

:- اسم الله بيش طالبه روحج ..جاسم كال لو اني ماتكليلي هيج ..

:- لا وربي انته هم اخويه واحبك .. بس انته مدري شلونك ..

:- هاا ولج السانج اجي اكصه الج بالقران ..

سكتت وغطيت راسي بحظن ياسر .. اجه ابو فهد يصيح جاسم ..

وينك ياخوي تعال انودي الغراض للمعرض ، هذول مايعتمد عليهم ، وعيب من الزلمه توعدنا وياهه نجيبهم اله بعد ساعه ..

جاسم :- والله العريس طامس بالعسل واحنه نلم الهوسه وراهه ..

:- ديله ازواج انته ..وانا اعزب بعرسك ولا تتكدر وانا اخوك ..

:- هههه لازم تريد تهجم بيتي ياولو .. خاب ازوج انته ..

:- والله عاد هاي بكيفك انطيني انته المره وانا من عين باجر مزوج .. ناقص اذا مازوج بنفس اليوم الي تطوه الي ..

حاظنه ياسر ومارضه اباوع عليه .. تذكرت حظنه ولمسته لخصري لعبت نفسي وشمأزيت .. عاد اتخيل نفسي مرته الله لايكولها ..

:- كله الله كريم .. هيه الك الك ..

باوعت على جاسم معصبه .. مو صخله وتطيني بكيفك والله مارضه ..

خنزر عليه :- لاترددين .. ليش وين تلكين مثل ابو فهد تاج راسج ..

ماحجيت .. ياسر كله ،  ونعم منه  ابن عمنه ، بس ماطول ماهيه راضيه زواج ميصير ..

جاسم :- يصير يصير انشالله

فززني صوت الطلق .. ضحك جاسم كال هاي بشهاده .. مانداريت عليهم .. اعرف شنو يعني صوت الطلق هذا ..لذلك مارفعت راسي عليهم خجلت ..

جاسم كال شو مستعجل هذا معتز ..

رده ابو فهد :-  لا ووالله الا متاخر صارلو ٤٠ دقيقه حاسبه الو التيس هذا  ..

ضلو يضحكون ويصنفون .. يمكن سكوتي عنهم خلاهم يتجاهلون لو ينسون اني كاعده ،  وشقاهم الخشن بالغاز مزعج . يمكن عبالهم ماعرف لو تصرفاتي طفوليه ، مثل تفكيري ، مايدرون همه مزوجين نفسهم اني اعلمهم ..

صاح بيه ابو فهد ياولو انتي ،  المجطوله وماخذه غفه بحظن اخوج كومي من هين ، وروحي يم البنات عمج شعدج هان ..

مارديت عليه الي يشوفني يكول نايمه ..

ياسر كال :- شنو نمتي ولج ترى مابيه اشيلج رجلي توجعني ..

ابتسمت واني مغمضه .. كتله :- لا حكوم .. كمت من يمهم .. و رحت ادور على بابا ..

تلكيت عماتي ونسوان عمي يم درج شايلات وصله مال عروس نيشانها ويشوفنها ناس لناس ، هاي من كل عقلهن الباب مفتوحه مال عرسات وهنا مسويات هجوم ،

لاخصوصيه ولا حيا عزاا هاي نوب عروس بطرك ملابس نوم والوجهه والمكياج مخربط وسايح كاعده على جربايه وعافسه وجهه جنها موجوعه خطيه شهل منظر مقزز وين الخصوصيه ،

رجلها ماكوو درت وجهي عنهم شمازيت خرب هاي هند هم مصيرها هيج ، ويجفتون عليها وهيه بهل منظر ، خرب اي والله شهل عقليات ،

بس امي اكيد مترضه وماتقبل بهيج شي ، بس مرت عمي شيسكتها لو بيبي ، لا سيف مثقف ماتوقع يقبل وهند هم مو معقوله لهل درجه تخضع لتقاليدهم والله عيب وحرام هم شدخلهم سالفه بين مره ورجال شنو دخلهم ..

البنات بالحولي ملتمات وروسهن متلاطخه جنهم يحجن بشي مايردن احد يسمعه ، اسمع ضحكهن وهمس مالتهن اعرف بيهن شنو يفكرن وعلى شنو ضحك طايحات حظ ، بس كلهن مخطوبات وراهن زواج لازم يحجن بهيج شي وناس تعلم ناس ،،

رقيه كاعده بالنص ومتراسه جلسه جنها قيس الخزعلي بضحكتها ههه ..

مشيت عنهن رحت يم بابا  لكيته بصاله يم عمامي  ..

حبيبي فرحان بخوته حيل ،  صارله سنين مفاركم ، بيبي وجدو كاعدين هم ، رحت يم بابا كعدت بصفه وحظنته ..

هو خطيه حط راسي يم جتفه وحظني بيده ، اني ماصدكت ، جلبت بي ، دخل وراي جاسم وابو فهد ..

صاح بيه ابو فهد :- ول انتي اشلعج من حظن تنمطلين بالثاني ، رفعت عيني عليه يحجي ضايج ومخنزر .

ماهتميت .. بابا كله شعليك منها ، ابوها غير ، بس حظن منو هذا الاول باوع عليه ..

كتله :- يسوري كلبي  اكو غيره ..

هاا .. ضحك .

كتله هذا ابو فهد يغار لان محد يحظنه .. كول لجدو يزوجه ويخلصنه منه بابا بداعتي ..

ضحك بصوت عالي ، باوع على جدي ،كله :- يابه ليش متاخذ بشور هناء ..

كله :-شنو شوره هالصفره الكاعده بحظنك وممحترمه واحد بينه وهيه مددنه بنصنه ..

اني عدلت كعدتي ، جنت ثانيه رجليه وميله راسي وجسمي على بابا ، مو مدده بس همه مكبريها ..

كله حجي عوفها تعبانه غير ، بس هيه تكول كول الجدو خلي يزوج ابو فهد ...

:- لا وهيه صادكه .. عجل خلي تحظر  روحها للعرس ..

باوعت على بابا.. :- واني شكو بالموضوع ..

بابا كله .. :- حجي بعده ديحجي واجت علا تبجي وتعيط .. ابو فهد الحك ابوفهددددد

وام رشيد تمشي وراهه وتستند على الحايط .. تكللها وين نغم دوري يم  نغم ..

نجمه 😘 تفاعلكم يكلبي حتى يصير واهس 💜