رواية ثأر مهري منهاا الفصل الثامن وثلاثون 38 - بقلم اسماء ديمير

《《البارت ال35》》

#ثار_مهري_منها

بقلمي " أسماء ديمير"

منو هذا بيبي ..

ماحجت ضلت تشتغل بعصبيه وتركع بالجدريه ، حجيت بيبي شكال ياسر ..

- انا مو كتلج لاتلعبين بذيلج ياول يالجلبه لو ماكلت ليش ماتجعدين عاقله انتي ..

- ليش شمسويه بيبي ؟؟ والله كلشي ممسويه !!..

- عجل اخوج ليش يريد يجي هان ، يكول بعد مااخليها ، سامع شي هو ليش يريد يجي ...

- قابل يبقوني هناا شنو ضلتي هناا

- عجل كلتيلي شنو لازمه ضلتج هنااا ، خوش عجل انا منا ورايح مالي غرض ، تصافي انتي واخوتج .. كامت لحيلها معصه وعافتني ومشت ..

ضليت على كعدتي شسويت اني ؟! كمت خليت جدر دولمه على نار وعفته وطلعت ..

وره يومين اجه ياسر هو وخالي جبير ، بيبي دفعتني بالغرفه وسدت باب ، كالت لو يكسرون باب مطلعين ، دزت على عمي سلامه كلتله تعال هذول ولد حسن باين اليوم يتمالخون ..

ياستار عليش شكوو خيرر ..

دتعال وانته تفهم يمه ، بس'بروح اخيك هدي الموضوع واسعه بيها خير يمه لخاطر اخوك ..

انشالله خير جاي اني جاي .

اسمع اصواتهم بره واتكرضم ، خفت لاينعاد ذاك اليوم عليه وهم يجفت عليه جاسم ، تاكدت من باب مقفوله لو لاا رحت ركض تلفلفت فراشي خايفه ..

جاسم صوته واصل ليمي ، يكله بالقران مالها طلعه منا الا لكبرها ، هيه اصلا ضلتها هنا عله عليه بس تجي قسمتها انطيها لو لواحد سكط المهم اخليها بركبه رجال واخلص منها ..

وياسر يرد عليه :- يكله اني رجعت واخذها يمي نفس مانته اخوها انا هم اخوها شنو تخاف عليها اكثر مني مثلا مريضه وصحتها كو شي بيش طالبها ..

ماعليها شي عرج ميدكها ذيج وينه تاكل وتنام ، جديتك توصل صينيه لحلكها مالك لازم حير بروحك وبامي اذا حنين ..

ولك انته شو صاير فرد نوب بلا كلب وبلا حنيه ، داكلك اختك مريضه اريدها يمي ..

قاطعه وين تخليها يم خوالك ، خوالي بعد هناء متوصلهم مادام اني عايش بالقران ...

خالي كله ليش بعد خالك هاي جزاتنه خلفه عليك كام زعلانه يريد يطلع جلب بيه عمي حميد وجدي يتعذرون منه .. عمي حلف ميطلع وهو زعلانه ويكعدون يتفاهمون وانشالله خير ، وانتو نسابتنه وخوال ولدنا ، مانريد زعل بينه

غطيت راسي ابجي من قهري ، هذا اخوي ياناس عود ، هذا حق يتكفل بيه وبعلاجي وبحمايتي مو بيبي هيه الي تحميني منهم ..

ضليت متلفلفه وخانسه وصامه اذني حتى ماسمع صوتهم ، ضليت اشهك جوه الفراش شابعه قهر من كلامهم ..

وره شكد يله بعدت فراش عن راسي ، صوت اختفه وجنهم راحو ، فزيت من باب انفتحت دخلت بيبي وراه ياسر وجهه مطعون احمر ..

بس دخل بجيت اجه حظني ، شبيج ليش هيج ليش البجي ..

- مابيه شي ليش تعاركتو مو كتلك اضل هنا يم بيبي ..

- شتضلين هنا ماعدج اهل ، وكاعده بيت عمي ماعدج اخوان لو فقره مانكدر نعيشج ..

بيبي نترت بي :- ولك بيت عمها بيت ابوها يعني ، قابل غربه احنه ، جاي تحجي ولك ، ليش زعلني منك ..

مو هيج حجيه على راسي ، انتي وكفتج مانساها والله ، بس صعبه ضلتها هناا ، مأمن عليها قريبه من جاسم ،

كعدت بالكاع ساكته ، عجل شسوي يمه ربك رايد هيج ، مابيدك شي عوفها هساع خلي تهدي نفوس ، وينسه اخيك ..

اندار عليها ، حجيه زواج مازوجها كل صار لان ردتو تزوجوها غصب عنها ، جاسم اذا باله احد ينطيها اله والله لو اعرف نتكاتل هم ماخليها تصير ، مو اختي تزوج غصب وانا عايش واشم الهوى ..

اكول يالغم هو منو رايد اختك ، لو اكو احد رايدها جان اجيت ومالكيتها تلكاها يم رجلها كاعده ، انا بنفسي توسلت برشيد ياخذها وماقبل ..

- وجدك حجه وياه وكله الي تريده يصير ، بس اعقد عليها ومارضه . ياخبل بعد يقبل باختج جايز من روحه هذا اختك جنها زيبك ياجده ماتركد ، يوميه طافره لمكان وشترده لو السانها الي متبري منها ...

هاي تاليها حجيه ، ضالين تعرضون بيها على الي يسوه ومايسوه وتتوسلون بعد ، احد شامرها عليكم ومو داري ..

- ياا تريد البنت تبور وتعنس علينه ، ياهو يكلبها بعد منو راضي بيها هيه ..

- ليش شبيها شناقصها ، حجيه لاترخصوها وهيه غاليه ، والله وكت بنت حسن ادللون عليها ، عوفيها حجيه مارايده زواج هيه بس جوزو منها ..

- عجل بالك جاسم يسكت لو يكف عنها الا اذا انكتبت باسم رجال الا يعوفها ..

- وهاي اني اضل وره جاسم وره مشاكله ..

- غير اخوك جبير ، اقنع رشيد يجده خلي يعقد عليها وين تلكه احسن منه ..

- ماتريده هيه مو كوه ، ولاتنسين هو مو عاقد على بنت عمي سلامه ، شنو ناوين تزوجو ثنين نوب حجيه شبيكم ..

- عجل الكه حل لاختك لوحدك ، طبكم مرض منك الها ..

- خلفه عليج هيج صارت ..

- منين مااجيك تطلعلي صفح عجل شسويلك ..

- كله بيدج ام علي ، اقنعي جدي يقنع باسحاق وخلي يحجي ويه جاسم ويقنعه ..

- هذا منوو اسحاق الاخر ..

-واحد مشه عليها بايام ابوي ، وهساع رجع تقدم الها يمنه بالمنطقه ..

التفتت عليه بيبي حجت :- هذا موو الي خطبها قبل رشيد ، وتالي نهى عليها رويشد ويله كف عنكم ..

- ااي بالضبط هوو ، انا اعرفه خوش ولد ، كلها بيدج سالفه حجيه وبعد بكيفج ..

سكتت وضلت خانسه تباوعلي مو راضيه ، ياسر كلي محتاجه شي ، هزيت راسي لاا ، همست اله مر على هند صارلها كم يوم ماجايه ضل بالي عليها ، كال قبل لاارجع امر عليها باسني من راسي وطلع ..

بس طلع التفتت عليه بيبي كولي بالقرعان مالج غرض بهل سالفه ومو انتي ساعيه الها ..

-شنو هيه بيبي ..

سالفه صويحبج هذاا ..

انصدمت كلتها :- ياااا بيبي لااا والله شبيج ، وين طالعه اني مو جدامج محبوسه ليل ونهار ، حتى موبايل ماعدي ..

كامت من يمي ضايجه ، التفتت عليه كبل لاتطلع من باب ، والله ياجده خسرتي جوهره ، راحت بخت جايفات ، جنت متمنيته الج ، هو ماتلوكله وحده بس انتي ، بس عبنج رعنه ضيعتي بس يله باين هاي قسمتكم هيج ..

طلعت وخلتني بحيره ، ليش هالكد يحبو ، شنو البي زين ، والله ماشفت منه خير ابد من يوم الي شفته اول مره لحد هسه .

وره كم يوم اجه ياسر وياه امي واسحاق واهله ، امي اول ماشافتني اباوعلها ترجف ، شهكت تبجي فاتحه اديها ، ركضت عليها احظن وابوس حتى ابدها بستاها سوده عليه ترجف واتدهك وتبجي ..

دخلت ليمي بالغغرفه حظنتني وتبوس بيه نوب شافت وجهي شاغت روحها هاي عود اني طبت شوي ، لو شايفتني اول سبوع جان شسوت ..

ضلت تمسح بوجهي وتبجي عليه نوب اجت هند ، تكابلن يبجن عليمن مادري ، بس عجبهن يبجن كلمن شايله هم وظيم بكد جبال ، نمت بحظنه صافنه اريد ارجع صغيره بلا هم بلا نفاق ناس ولا حساب لباجر .. احس باديها ترجف من تعب باين التعب ماخذ من صحتها هواي ..

رفعت راسي عليها حاجيتها :- كتلها يمه اسحاق شجابه شلون رجع يخطبني ..

اخوج ياسر محاجي وكايله بعدها بنفسك لو لاا ، اذا تريدها تعال تقدم الها واني اوكف وياك هو خطيه ماصدك جاب اهلع واجه ويانه ..

- جاسم مراح يقبل مو تدرون بي قافل شلون اجيتوو..

سكتت رفعت اديها بالكت الله يهدي يايمه ، ماامن عليج هنا اني كلبي لايب ، لا اكدر اخذج يمي مايقبلون ولا بيه اعوفج هناا بحدج ..

رجعت راسي لحظنها اجت بيبي كعدت يمها ، هم ساكته وجنها شايله هم ، باوعت عليه متحسفه ، كالت ضيعتي يابيبي حرامات والله ..

جان يحبج على حب ابوج وكتل نفسه ، يدري بيج رعنه وبلا عقل وكال ميخالف راضي من تجي يمي اغيرها واعلمها عليه واتحمل منها كلشي لخاطر ابوها ، بس انتي ضيعتي وكرهتي بيج .. ماله نفس بيج بعد ..

على ساس اني الي نفس بي والله يالله . ماحجيت ضليت ساكته وهيه شابعه قهر وضايجه ، هاي عود ياسر كللها قنعي جدي واحجي وياه ، وهيه نفسها ماقانعه .. هند وامي يحجن بيتها وشلون كملته وحتى الاثاث سوته وفرشته بس عمي مايخليهم ..

حالف بس ينتقلون اله الا يقاطعهم ، ويتبره من سيف ، عاجبه يحبسهم بغرفه يمه ، خالهم بهارات على كلبه كبر اي والله ، حظج ياهند ماشمرج الا يم حميد النحس ، شبي عمي سلامه ولده والله دره مال الله .. بس حظوظ ، على كولت بيبي بخت جايفات ..

اسمع صوت جدي صاح لبيبي وطلعت عليه .. شوي ودخل ياسر وراها وجهه مغندب ..

كعد يمنه ، امي كالت هاا جماعه وين ..

رجعو لبغداد ، ابنج جاسم تخبل عمامي خبلو علينه صاير عربانه الهم ..

- ليش هو عمامك منو سلم منهم، حتى جاسم يسلم ، شسويتو هسه حجيت وياها لاا ..

- اي رضه حجه ويه جدي ورشيد همه قنعو ، بس بشروط فوكاها تكسر الظهر .

- شراد قابل ليش هو شباقي باختك ..

- حصتها بالورث تتنازل عنها النه ، ماتاخذ فلس حتى راتب ابوي تتنازل عنها ،

- الي يسمعه يكول غركانه الفلوس هيه ، شو حتى مصروف ماعدها ، خلفله على بيبيتك حايره بيها وبمصاريف علاجها ، فوك مايطيها هو حتى لاتمد ايدها لاحد وتنذل ..

غمضت عيوني ، دموعي جرن ناوي يذلني ابن امي ، هاي مو سوالفه اخوي ماعده هيج حقد والله ...

- كالها هو هذا الي يريده تنذل ، لا ورث ولاحصه ولامصروف ، ويدري بسحاق ماعنده ، مفلس بسبب مرض ابو كعدو على حديده.. نوب مايعقد عليها الا وره سنويه مال ام رشيد ابنج حاد سنونه حيل وكعد يتشرط نوب ..

- هذا تعلوم عمامك يمه ، اخوك ماعده هيج دروب ، مو كال لو يجي سكط هم اطيها بلاش ، هساع كام يتشرط ..

- لا والله مو تعلوم عمامي هذا تعلوم رشيد ، شفته ماخذه على صفحه قبل لا نكعد بالديوان ، ويكله تحجي كيت وكيت ، ابنج الاغبر سمع مناا ونفذ مناا ..

- نوب يكله تجي كون تاجر وتكعد يمنه اختي متروح بعيد ..

- صار حنين اخيك هسه ..

- جارتج بعد كليلي منين اجيهم بعد حيروني ، شلون واطلعها مناا ،

سكتت حايره امر منه ، وشحجه الولد شكال ، شنو قابل ايعوف اهله ويجي يسكن ديالى من وراه اخوك ،

باجر احجي وياه حتى لو بس ياجر ، وره ميزوجون يرجع لبغداد ، هو كله الي تريده يصير وراي ، وخواله كالو احنه علينه مصاريف زواجه كلها ، بس انطو لان كم مره مشه عليكم ومانطيتو هو موافق بشروطكم ..

هسه سالفه اسحاق سهله بس داشوف شلون احلها ويه هالارعن الي اسمه اخوي ..

حتى غده ماتغدو ، صبت بيبي ، ومااكلو لا هو ولاامي شابعين قهر من وره جاسم ، اصلا ميحجون وياه ، بس هند تكول احجي وياه بس مو هالكد حتى بيته ماطبه من وره مرته ، هو اصلا لايسال عليه ولا يمر ، كلش خربان ولا يتحاجه ..

المغرب ياسر اخذ امي وخله بيدي مصروف ، كال شتردين دكي علي اجيج ولا تخافين ، اجيج بساع مااتأخر عليج بس مسافه درب ، ودعتهم بدمع العين ، هاي تاليتني انحبست هناا ..

كضت ايامي هيج شوي اطلع بالحديقه وارجع ادخل ، جدي مااشوفه وجهي ابد ولا عمي ، كاضيتها سم بدن من نسوان عمي ، يرزلن بيها ويعيرني ام زلم الي اشردت ،

بيبي نوبات تسمع وتعارك ونوبات تكلي طبج مرض مو ضيعتي رشيد من ايدج جان هسه خلصانه منهن من خدامتهن ، شابعه قهر وميته نوب بس تتصفن وتكول حرامات ولج روحي بوسي اديه ورجليه خلي يقبل بيج ،

هم عايزه والله يالله ماصدكت الله التفتلي شوي وراح اطلع من هالنكره واخلص ..

لبست عباتها وتريد تطلع جلبت بيها وين بيبي عليج الله وياج متت من البيت ، رايحه للكبور تجين ..

- شبيج بيبي ، والله متت من بيت محبوسه ..

- طالعه للبستان افتر بارض الله لاتجين .

- الله يخليج بيبي شوي ، اختنكت والله دمعت عيوني توسل ..

- امشي حطي شي عليج ، وتعاي بالعجل يله لاتبطين ..

طلعت ركض للغرفه لبست جبه سوده وشمرت شال على راسي ، تلكتني مرت عمي وين موليه ولج ناويه هم تشردين انشالله .. ماحاجيتها طلعت اركض لبيبي ، هيه تباوع من شافت بيبي وياي سكتت ودخلت ليجوه ،

تمشي واني وراها اتعثر ، وين رايحين بيبي ..

- للبستان وين يعني ، نولي ليش اكو مكان نروحله يعني ،

- شنسوي بالبستان ..

- نعاين على خلك الله على هالزرع ..

- ليش عود هو شكو بالزرع .

- هواه الله كله بي عجل شبي مثلا ..

- هسه هوه بالبيت عود مايشبهه الهوه الي بالبستان يعني ..

بالقرعان راح اهبدج .. بطابكوه اذا ماعاجبج شكو جلبتي وياي ..

سكتت هااج هااا اهااا . خليت ايدي على حلكي مشيت وراها اهبد واتعثر .. فتنه من يم بيت قديم ، درت وجهي عنه جن شايفته بس ماذكره تالي عثرت جيت اوكع على وجهي ..

بيبي عاطت ثوول يالعميه ماتعرفين تمشين شجاج ،

عثرت بيبي'شبيج هذا بيت شايفته بس ماذكر ..

ياهو هذاا بيت عمج المرحوم هذا ابو رشيد ، من بنو بيتهم جديد عافو هذاا ..

عقدت حاجبي واناا اشوف حديقه ، شلون مااعرفها هاي هيه نفسهاا اي والله هاي حديقه مال بيت الي نحبست بي ..

عفتها وتقدمت اشوفه وتاكد صاحت وراي مارديت عليها ..ولج تعااي جاي يالمصخمه وين موليه ..

ماسمعت الها مشيت اهبد متجهه عليه ، دخلت للحديقه تقربت يم الباب مايبين شي ، هو البيت لو لاا ، من شفت كراتين مغطايه شبابيك تأكدت هوو ، تقربت من باب المطبخ ، باوعت من جام وصخ مايبين شي ، مغوشه كلش ..

مسحته بطرف الاردان مال الجبه ، باوعت هذا سنك والكاونتر اي والله ، حتى الفلتر الي اخذت منه الماي ، من غسلت ، فزيت على جره من وره ونعتت جبتي ، وبيبي تحجي عليه وتغلط شلون عفتها وتحجي واجيت هناا ، اهبد ..

دمغتني على راسي ، بالقرعان انتي مال جتل ، ليش ماتاخذين بالحجي ..

اجر بهدومي منها واعت واريد تفكني ماكوو ، تالي هدتني فحطانه خطيه ، بيبي من اخذني ابو فهد وياه شلون رجعتوني ليمكم منو جابني ..

- شجاب هالسالفه بالج ولج ماتجوزين انتي ..

- بيبي والله اني جنت هناا .. بهذا بيت .. اشرتلها عليه

- يابيت هذا بيت عمج .. اندارت تباوع علي ..

اي بيبي والله متأكده جنت بي بس مادري شلون اجيت يمكم ماذكر ..

- غير رشيد جابج سايحه بدمج ولج ، ماتنشاف منج لا ايد ولا رجل ، ملابسج حمر من دم ..

- هااا ،

- وجعاا الله شكفلج منهم ومامتي، والله بسبع ارواح انتي ، الي يشوفج يكول بضربه تموت تالي كل هذا كتل وبعدج تمشين ،

-'من تشريب الحم بيبي ،هذا وشحم الي زقيتني بي صار اسابيع ،

- النه افضال عليج اني ورويشد ، طول عمرج ماتسديها وكلها لاجل عين ابوج ، الا انتي ماتستاهلين عظمه جلب والله ..

- ليش هيج تحجين بيبي جني عدوتج ..

- سوايتج ماتنحجي ياجده ، رغم الي سويتي بس ماجتلج ، خلاج يمه يومين لمن هدء الوضع ويله جابج ، حتى من اخوج خاف عليج ، هو مايحجي بس اعرفه كل زين ، لو اله نيه يموتج مايرفله جفن بالقرعان ..

- جاي نحجي واسمع صوت ، بالبستان حاجيتها بيبي تسمعين شنو هذا ..

هذا ماطور الماي مال البير ، يمكن رويشد هناا عاب كلبي يسكي بالزرع ، تعاي جاي دانسلم عليه ونرجع بساع للبيت كبل لاجدج يجي .

حجيت كبل بخوف :-'لا لا ماريد خلي نرجع وين نروح لاا ..

امشي ولج وصلنه لهنا وماامر عليه ، مادامه هنا صار شكثر مشايفته ، كاطع رجله منه من وراج ..

عافتني ومشت ، ضليت اسحل بروحي وراها خايفه منه ، هيه وصلت وين ، واني بعدني ماارضه اتقدم خايفه ، ضلت تاشر وتحجي ماسمعها ،

راحت عليه تمشي وتهف بعباتها ، واكف ليغاد منه لازم كرك وبملابس الشغل مترب ، لاف الغتره على راسه من شمس ، جان يشتغل ويدك بالكرك بالكاع ، من شافها ذب الكرك وكف ..

وصلت ليمه وكفت تحجي وياه ، اندار عليه يباوع عليه عاقد حاجبه ودار وجهه عني بضوجه ، ماوصلت ليمهم ولا مشيت بعد جن رجليه بندن ، خفت لا يجي يعارك لو يضرب ، لفيت شال عدل وعدلت جبتي خاف شي طالع مني ، ضليت اتلفت يمنه يسرة ..

ضلت واكفه بيبي يمه بالنص ساعه ، واني مشتوله ماتحركت اشرتلي تعاي مارحت ، نوب رجليه ماتن من الوكفه ، خفت اروح وخفت اضل واكفه لايعصب شلون بيبي تصيحني وما رحت ..

مشيت على كيف اتقدم عليهم ، هو مدري شحجه وياها كبل لا اوصل شال الكرك واعافها ومشها ..

جريت نفس براحه ، اجت تمشي باتجاهي والعبا تهف وراها من عصبيه ، صاحت بيه مو احاجيج يالنذله عليش تعاندين ولج .

- تردين اروح يمه بيبي جايزه من نفسي تردي يموتني .

- روح جلب عدج انتي شيموتج قابل خايف منج لو يريد يجتلج ، عافج ذاك اليوم وانتي بين اديه ، تردي هساع عود ياذيج ..

- خليني بعيده بيبي احسن ، مااصير بوجهه ويأذيني ادري بي شايل عليه وحاقد هسه ..

- بيج خير بردي كلبه ياجده ، ماتعرفين هو مايعوف حكه والله الا يطلعه من عينج ..

- انداريت عليها متفاجئه ، نوب شيلتني هم فوك همي ، اصلا سكوته يخوف ..

رجعنه للبيت تلكتني مرت عمي خاله الصونده بنجانه تترسها ماي كالت ماطول اجيتي هساع يجيبون النه صناديك مخضر اكعدي اغسليهن يله حتى نضمهن .. دارت ضهرها ومشت باوعت لبيبي ماحجت عافتني ودخلت ..

هاي من كل عقها عود ، نزعت جبه وضليت بطرك ثوب ولفيت شال على راسي هاي تاليتني اشتغل خدامه عد نسوان عمي ، حسبي الله عليهن ..

كعدت اترس بالسطوله ماي ، سمعت صوت طبه سياره وراي التفتت عليها سياره ابو فهد ..

رجعت ليوره بصف حايط حتى مايشوفني كام ينزل بالصناديك المخضر وينقلهن بصف المطبخ .. بيبي طلعت عليه تحجي وياه وهو ينزل ..

التفتت يمنه بسره ادور عليه ..صاحت ولج هنيوو وينج يااا عايفه ماي يجري ترس الكاع وينج ، طلعت من يم الحايط هااا بيبي .

عيني عليه خايفه اتقدم ، مو ااحجي وياج تعاي جاي كملي غسل راح تغرب دنيا ..

تقدمت اكعد بصف السطل الماي ، عيني عليه مارف جفني من خوف .. ماعبرني اصلا نزل الصناديك ومانطق كلمه رفع ايده سلم علي بيبي ومشه ..

كعدت بالكاع اغسل بالمخظر واباوع وراه هاي صدك عود شبي ، فدواتك ربي ، الصدمني والخوفني سكوته يرعب ساكت ونادرا مايباوع عليه شعجب ..

لو يحجي ويعاتب ، لو يسب ويغلط ، اكول اي برد كلبه ، الا هذا خنس ، والله خايفه منه اكثر من جاسم ، جاسم طحن عظامي وشفى غليله الا ابو فهد سااكت وهدوء عنده مرعب ..

اباوع لصناديك المخضر بيهن بالعشره ، هذني شراح يغسلهن وينضفهن ، غمضت عيوني بنفاذ صبر ضايجه ، شراح يكملهن ، ادك براسي مرت عمي ماخلت شغله ماطلعتها براسي ، بحياتي ممشتغله هسه ادك دك زمايل ..

بالثلاث ساعات كاعده بالكاع اغسل بيهن وماخلصن ، اغسل وانظف واعبي بيهن بالنجانات وهيه بس تجي تاخذهن على الحاظر احس ظهري انقسم نصين ..

كمت على حيلي كوه ، جسمي تشنج من الكعده ، اجت بيبي كالت هذا اخوج دك عليج يريدج ..

كمت نشفت اديه بملابسي ، احس عظامي يطكطكن من كعده ..

حاجيته ياسر بتعب كوه نكطع نفسي بسبب مدكه الشغل ، يسال عليه خاف محتاجه شي كتله لا ، سالته على امي كال زينه الحمدلله حاير بايدها صابره بيها رجفه ماعرف ليش ماتكدر تلزم شي بيها ..

نوب شيلني هم ، يرادلها مداره صح خالاتي ممقصرات بس'شنو فايده اذا مو بناتها يمهاا ، كال كم يوم ونجي نتفاهم ويه جاسم على سالفه العقد ، سديته منه شابعه قهر عليها وميته خوف من جاي ، حتى فرحه ماعدي لان راح يعقد عليه اسحاق ، اصلا ماكو اي'شعور بس خوف وترقب ..

موبايل مانطيته لبيبي كتلها ماعدي شي بي بس ضايجه ، التهي بي صار اسابيع جدام عينج شسويت قابل .. حجيت وياها على كليه نوب نترت بيه كالت من تاخذين ، خلي عود رجلج يخليج تخلصين ، هناا يمي ماتجيبين سيرتها .. تالي صدك خنست وسكتت اصلا سنه راحت عليه ومعتبره راسبه ضل امتحان واحد ومارحت ..

وره كم يوم اجه ياسر ويه خالي وخالتي سعاد ، عمي حميد استقبلهم ويه جدي حجو وياه ، يهدون نفوس ويه الاخوان وخطيه يطشرون مهما يكن احفادك همه ..

عمي حميد هم كيف ، وضل يلح ويحجي ويقنع بجدي ، و يحجي ويه جاسم يصالح خواله واخوو ، ونوب طاير هو وعكاله وره خالتي ، تجي للمطبخ لحكها ، تجي للغرفه لحكها ، والله جنه طرطور تخبل عليها وهيه هم تضحك وتوكف تسولف وياه ...

تالي صاحو عليه بالديوان ويله فك منها ، نوب نسوان عمي يردن يفترسنها وهيه ولا يمها ، كاعده وتسأل بهند عليه ، وعلى خلفته وبناته ولده ، ماخلت واحد ماسالت عليه ، اندارت عليه سمعتي ولج ..

شنو خاله ،

ولج هااي خطيبه رشيد ماجايتها دوره لسه

ياهي سلوى اي يمكن بعدها صغيره خطيه ..

شلون خطبها لعد وهيه بعدها مابالغه ..

عقليتهم بعد الله يعينها طفله شمفهمها ...

هو شلون رضه بيها عزاا ..

شمدريني درت وجهي عنها هو اني خلي احير بضيمي بعدين اشيل هم سلوى والبلوغ مالتها .. اجه ياسر اشرلي تعاي ..

كمت لحيلي اروح عليه .. جرني واخذني وراه لاحديقه كال هذا اسحاق يريد يحجي وياج نطاني موبايل ..

#يتبع

بنوتات فدوه ممقصره وياكم اني نزلت صبح بارت ب٤ الاف كلمه ، وهسه بارت مفاجئه بال٣ الاف كلمه يعني اليوم النشر صار اطول من حرب ايران 😅

اريد تسوون تاك لصديقاتكم وتنشرون قصه حتى تاخذ حقها لان جاي تنظلم كلش والله

تفاعلكم 💜