رواية ثأر مهري منهاا الفصل السابع وثلاثون 37 - بقلم اسماء ديمير

《《البارت 34》》

#ثار مهري منها

بقلمي : " أسماء ديمير "

فزيت بذكر امي :- امي شبيها هاا احجي ..

سكتت كالت شنو ماحجتلج بيبيتي ..

دمعت عيوني شبيها الله عليج ، خما بيها شي ..

كالت مابيها الحمدلله هسه زينه ، تكدر تحجي وشوي تتحرك ..

ليش شبيها هيه شصار كولي ..

دمعت عينها :- كالت غير كالو كتلوج ، جدي كال غسلنه عارها من سمع طكه الطلقه ، وابو فهد اجه مدمه وملابسه وايده ، امي من شافتهم هيج وكعت على وجها ضربتها جلطه ،

بس الحمدلله زينه هسه،  اخذوها خوالي يمهم ومراجعين بيها بالخاص،  وزينه بس تعبانه ماتتحمل درب وتجيج ..

هسه ياسر راجع عليها يحير بيها هو وخالتي سعاد ، حيري بنفسج وصحتج انتي ،

دنجت راسي دموعي تنزل ، شصار بيكم بسببي ياهند شسويت بيكم اني ، اذيتكم هواي مااستحق زعلكم والله  ،

حظنتني حيل وتبجي وياي :-  جنه زعلانين عليج حيل بس من كالو كتلوها والله كلبنه مات عليج ، ياول اختي انتي وبنتنه شلون ماتردين ننقهر عليج .. غلطتي بس المهم ماتنعادد يهناء ، وصلحي غلطج كسبي ثقتهم مره ثانيه بالكت يرحمون بيج ..

- جاسم حاولي تصالحي يبقه اخونه الجبير وسندنه ، مالنه احد غيره لا عمام ولا جد ، محد يفيدنه ماكو بيت ينفتح النه بوبه غير باب بيت اخونه ..

ضلت تحجي وتنصح بيه ، تالي كامت تغسل الي ، تغسل واني روحي تشوط من الالم ، عندي ضربه بصفتي قريب القفص صدري موتتني ،

هيه تفرك على كيف وتبجي وياي ، تكلي شراح يطيبج ياول جسمج مصبوغ صبغ .. وبدلت الي وطلعتني من حمام ، دخلتني جوه للغرفه ، كالت اني هم يالله اروح طلعت من دون علم سيف هسه يعصب علي ..

كتلها عمتج هسه توزه عليج ،،

شنو جديد يمعوده ،

دخلت جديتي شايله صينيه الاكل بيدها خلتها كبالي ، يله كلها تاكليها جدامي بساع ..

شلت خاشوكه تشريب ، كوه جرعتها ماتنبلع من زفره مال شحم ، التفتت عليها سالتها :- ماعزلتي مو كملتي بيتج ليش'ماطلعتي من حكمها عليج ..

دارت وجها ، تنهدت :- عمي ماقبل بعد صار يكول بنات حسن مالهن امان وينعافن بحدهن ..

مره مزوجه شعلي بيج ،  سيف ليش ماحجه ..

مايريد يتعارك ويه ابو ، وهو هم خايف من عمامي لايهيجون علي وجاسم من حاجيته سكتني وكلي اسكتي هسه ، الحجي مو وكته ،

جديتي تباوعلي حاجتني بنتره :- شفتي'شعملتي ياول ، شسويتي باهلج ، هجمتي بيوت ، هاي اختج بعدها كم يوم وتعزل وتكعد بحدها  وبيتها ، وخربتي سالفه عليها ،

ذاك بيتها كامل والكمال لله مركون على صفحه ، ذبت دم كلبها علي هيه ورجلها وتتمنى تكعد وترتاح من العمه تالي عميتي عليها بسوايتج ..

لو اخوج ياسر الي تكاتل ويه عمامي واهله بسببج ، ماله بعد عزه ولا سند خرب علاقته بيهم لخاطرج،

لو امج الي اجت تموت من وراج ، لو ابو فهد وكسرت فاده وموتت اميمته من قهرها عليه .. اوووووف يابنت حسن والله لو مايتيمه واخاف الله ،  الا بكرك وانا ادمغج ..

سكتت بس عيوني تجري ساكته ..

هند حاجتها جده ليش ماتصيرين حقانيه ، كلهن تردين حقهم وفكرتي بيهم ومافكرتي بيها ، من جانت تنكتل وتنهان منهم ومحد يحجي ويدافع ويخاف الله ..

لو رقيه كل حجايه وثانيه ذمتكم وحركت عليكم يمها ، وماخلت صغيره وجبيره الا وشمرتها بوجهه هناء وكعدت تذم بيهم واطلع سوالفهم ومشاكلهم ،

- هاي ياهي رقيه ، غير جانت صويحبه اختج ، فوك زينه مالتها وياج نوب تذميها ولج ...
وتعرف خياس اختج كله ، وتعرف طلعاتها وطباتها  من بيت خالج وساكته اطمطم  الها ، ماحجت نطقت ...

اني فهيت بوجهاا ، خياسيج حجيه شهل حجي ، ياطلعات وين طالعه وداعت بابا ماطالعه باب البيت عدا الكليه والخط جان ياخذني ويردني ...

- ياااع ولج اتجذبيني ، سمع اذني حجتها رقيه لامها ، تكللها طالعه بلا حجاب للمطاعم ، مدري وين ويه بنات خالتج تفترن ...

شهكت اني يااااايمه انيي ؟؟؟

- عجل ابوي ، لاتنكرين ولج ، مو عظامج منعنعه من جتل وتجذبين ..

دمعت باوعت على هند ، كالت شفتي مو كتلج لاتصدكين بيها ولاتحجين شي الها هاي جذابه ، والله حيه من جوه تبن نوب تتبله عليج عساها بحظها وبختها انشالله ،

جديتي كالت مو جانن ربع وتتختلن سوه ، وتسولفن ماتظمن سالفه وحده على ثانيه هساع خربتن سوه ..

ماحجيت بس ضليت ابجي واشهك متفاجئه ، بيش اذيتها اني ، والله مااذيتها بحجايه مو عاد بفعل ، صخام بوجها جان متت بسببها جان رحت بيها بسببها ، ضلت تزن براسي مثل شيطان اكلت راسي اكل وتحش بيه عليهم ..

لحد ماخبلتني خلتني اشوف موت اهون ولا عيشتهم ، طلعت يمي تحجي ويمهم تحجي عليه ، واني اكول شبي ابو فهد يجي مثل خبل عليه ويتعارك ويضرب ويكلي لاعبالج مادري بسوالف وغافل ،

كم مره يجي ليمنه مزنبر ومايتحاجه اثاري سامع حجيها ، اكيد يصدكوها لان شافونه ربع ، ونمشي سوه ، اذا اني انخدعت بيها كيف ماهمه اهلها وناسها قابل يجذبوها ..

هند ماسكتت كعدت تحجي لبيبي عليها ، وشنو كالت الي بيوم طرحت هند وشحجت على رشيد ، كالت الله يشهد تخابر هناء منا اشوفها تمشي تروح لبيت ام رشيد منا كبل ، اني عبالي يم علا ، اثاري توزهم عليها وتكلهم هناء كالتلي ، حتى عليكم تحجي ماخلت احد يسلم منها ..

جديتي تفاجئت :- هاي ياهي تحجي علينه ولج  ..

:- رقيه حجيه ، بسمع اذني سمعتها الله شاهد ، مايوم كعدت الا وحجت بيكم بشر ..

التفتت عليه كالتلي':-  صدك هالحجي ولج ، جانت تكول علينه بنت سعيده ..

- كتلها اي والله بيبي هيه جانت تحجي براسي ، كعدت اسولف الها جانت تكول الي ، والله جهازي لو عندي الا اشوفج اتصالاتها ورسايلها الي بس مادري وينه ..

سكتت بييتي وهزت راسها متحلفه اناا الها دشوف وين تريد توصل ، بنت جلب هجمت بيتنه بكد قندره بلا تربيه ..

هند كالت اروح انا هم بطيت ، هسه سيف يجي ، بطلعتها سمعت تحجي ويه عمتها ، نترت بيها ليش جايه مو سيف مايقبل ، ومنعج ليش تعاندي ، شو كلمه زلم كامت ماتمشي عليجن ، بنات حسنه وحدجن عينها كويه وماتخاف ..

طلعت الها الحجيه تتعارك وياها ،  انا مو جدامج دزيت عليها ،  ولج سعيده شو ماتحترمين ، امشي لبيتج مالي خلكج ، وخلك الهذره مالتج يله ،

وهند من ادز عليها تخليها تجي لا ومحمد اهج الحجي عليج يالله شوفيني كفه ظهرج ..

دفعت صينيه وتمددت بمكاني ، الى متى اضلين هيج هناء ، شوكت تكومين على حيلج ، راح اضلين جوه الادين تخدمج عالم ..

دورت موبايل ياسر وينه ، اخابر امي هو خلاه جوه فراشي ، كمت على كيف مكسره ، رفعت مخده ، ماكو جديتي دخلت جاي ادورين ..

- موبايل ياسر وينه نطى الي ..

- انا اخذته  شسوين بي ..

- اخابر امي حجيه وينه اريده ..

- عوفي مالج غرض بي موبايل بعد ماكوو كومي بسلامه هسه وسالفه الموبايل وبغداد تنسيها ..

- تردين تحبسيني بيبي ، موتيني احسن من هالعيشه حتى انتي ماترحمين ..

- اكول انجبي ، وماكو موبايل انخدمي هسه يله ، شالت صينه وطلعت كوه تمشي ، جديتي مو صغيره جبيره بس بيها حيل كبل بس بثكل ، اذا دنجت مابيها تكوم بعد ، وماتكوم الا واحد يساعدها ..

رجعت لفراشي انام ، ومشت هيج الايام ، الاكل تجيبه جديتي ليمي ، مانسه وكفتها طوول عمري ابد ، هند  دزت عليها مره حتى تسبحني ومااجت سيف متعارك وياها ومانعها ، وزازين عمي حميد عليها ..

كايللها تردين اختج ذبي ابنج ولي يمها مالج رجعه يمنه ، ضاله تبحي وشاكيه لجاسم ونفس الحجي اسكتي وضلي يم رجلج ، هناء بيش تفيدج خلي تفيد نفسها بعد عملتها ..

الحجيه مابيها تكومني اصلا ، اني بيه امشي اذا انتجيت على حايط ، بس رجلي مفصوخه ولان مارحت لاطبيب ولا مضمد يسويها الي ضلت  ، ورمت وماطابت وضلعي الموتني من الالم ماهجع ولا هود علي ...

صاحت لمرت عمي علي ، تساعدها كالت هم هذا العايزني اخدم بنت حسنه تالي عمري ، يسون الفواين واحنه نخدم ، والله لو اشوفها جنازه مااشيلها ...

تالي كالت امشي انا اسبحج كومي ، طلعتلي ملابس وراحت للحمام بطت بالربع ساعه ورجعت شايله موبايل ياسر تلهث سوده عليه ، كالت هسه دزيت عليهم يجوج ..

عبالي تقصد هند ، كوه مشتني طلعت من باب ، سمعت حس فهد ، درت وجهي وراي ، شفت  علا وراي واكفه ..

ماباوعت بوجهي حاجت الحجيه :- هاا جده دزيتي عليه كالو ..

- اي جده تعاي فدوه لعينج ، ماكدر على بنت عمج لوحدي  عينيني بيها ..

حجت بزعل : - ماكدر حجيه مستعجله عبالي تردين شي .

باوعت عليها :-  يااا هيج صارت يجده روحي روحي يمه ،  هيه البشر ماضلت رحمه بفادها روحي بقت عليج  ..

سكتت ماحجت بعدين كالت :-  اذا تردين انتي شي كولي اركب لو اخبز الج ، اي شي اسوي الج  ..

جرت نفس'ضايجه :- ماريد يجده سلامتج ،  ردي لبيتكم،  هاي وانتي يتيمه مثلها ، ماحن كلبج عود انتي زينه وتربيه ام رشيد ..

لزمتني من ايدي واخذتني لحمام ، شكد كرهت روحي بوقتها دمعتي وكعت من عيني ، بيبي شافتني كالت عمت عينهم اي والله الي سوو بيج هيج ، تالي وكت بتك ياحسن تضل جوه الادين معلعله  ..

حسيت واحد لزمني من ذراعي ثانيه وسندني ، انداريت عليها علاا وجها كله دموع ، ماتباوعلي مدنجه راسها وساندتني .. 

دخلتني للحمام ماعدي وجهه احجي وياها ، لو افهمها وضعي ،  كالت لبيبي اطلعي اني اسبحها بس ناوشيني المنشفه والملابس .. لاحجت وياي ولا حجيت ، نزعتني ثوبي بس اسمع شهكتها ، رفعت راسي عليها تباوع لجسمي ..

كالت شوو كومي ولج كومي يماا هاي شنوو ...

دنجت اشوف شنوو ، صفحه من جسمي زركه نيل من صدري لحد الصفحه جهه القفص الصدري كلها من دفرات الي اكلتها منهم ذاك اليوم ..

رجعت كعدت على التخته مال حمام تعبانه  ، حاجتني بهمس ، كالت هذا فهد ضربج هيج ..

رفعت راسي عليها ، ابتسمت ، وجهي كله دموع لا خيه مو اخوج هذا اخوي ابن امي وابوي ..

سكتت تبجي وياي ، اباوع عليها تكلب بيه تشوف الضربات وين تكلي هاي توجعج ، هذا تحسي بي كسر ، هاي رجلج يمكن مفصوخه ، يرادلج مضمد يجي للبيت مراح ياخذوج للعياده اكيد ميقبلون ..

ماحجيت ضليت ساكته هيه غسلت شعري ، يايمه موت احمر شاطت روحي ، الفروه مال راسي تون علي من الالم ، غمضت ابجي وهيه تكول خلصت بس خلي اوخر دم يابس بالفروه خلصت والله ...

ساعه ونص وهيه تغسل وتليف ، جسمي هاج عليه من الالم بس ارتاحيت من ريحه دم زفره كتلتني ..

لفت راسي وطلعت استند عليها ، دخلتني للمطبخ كالت على شمس خلي تضربج شوي ..

راحت جابت مشطت وزيت مال شعر ، نص شعري وكع والله نصه ، كومه بكد جف الادين ، الشعره من جذر توكع ..

شبعت قهر عليه ، ضفرت شعري وشدته ، جديتي كالت خلي ادش جوه جدج على جيه لايشوفها هو منع تطلع باب الغرفه ..

رجعتني للغرفه واسمع صوت القفل انقفل ، باله هذا وجهه وحيل وحده تنهزم حتى يسدون باب عليها ، نوب من انحصر اريد اروح للحمام اضل احوص لا بيه اكوم ولا اصيحهم  ..

وراها بايام ، دخلت بيبي وراها بنت ، من جنطتها عرفت مضمده جايبتها بيبي ، من شافتني تفاجئت ضلت واكفه بمكانها ، ندارت على بيبي كالت هيه هاي ..

اي يعيني هيه ..

بس ابو فهد كلي مفصوخه رجلها وعدها وكعه بصفحتها .. مو هيج البنيه يرادلها اشعه من فوك ليجوه خاله ..

اكلج حبيبه شوفي شغلج ، واخذي اجرج وتوكلي ، احنه عود ناخذها للخاص هساع شوفي'شغلج ..

البنيه بهتت وضلت تباوعلي ، كالت شو باله وين الضربه .. كمت على كيه وهيه ساعدتني ، بيبي واكفه فوك راسها ، رفعت تيشيرت شافت الضربه ،  انصدمت ولج هاي شنوو يمكن عدج ضلع مكسور عيني ..

بيبي كالت يااا صدك ..

اي حجيه يمكن ممتاكده بس لونه عبالك عدها كسر واذا مو كسر اقل شي فطر .. ضلت تضغط عليه واني اتلوى جوه ايدها متت بيومها من الالم ..

اندارت علي بيبي مبتسمه كالت الها :- كلاص مي حجيه على الاقل شنو قصه ماضيفون خطاركم ..

لا يمه تدللين على شربت ، لس التهيت وياج .. عافتنه وطلعت هيه تباوع لبيبي منوطلعت اندارت علي بسرعه ..

هاي منو سوه بيج هيج منو ضربج ، تردين اتصل بالشرطه عندي رقم مال منظمه ضد العنف على المراه والطفل ، هذول اهلج  ..اهلج وين امج ابوج ..

ضلت تخرط وتحجي وتسأل ، من سالت على بابا شهكت ابجي ، اووف ياذكراك يابابا ، اويلي تعال شوف حالي ،

هيه من شافتني ابجي تخبلت كالت راح اتصل بالمنظمه وانجيب شرطه هاهيه اخلصج مناا لاتبجين . هزيت راسي لاا ،

شنو لاا لاتسكتين لاتخافين والله يساعدوج ..

لا هذول عمامي واخوي يسوو هيج بيه ،  شرطه ماتكدر تسوي شي الي اصلا ، اخويه ثاني جابهم واجه وكلولهم غسل عار مالكم حق تدخلون  ..

سكتت صافنه بوجهي مقهوره ، كالت ليش غسل عار شسويتي ..

هزيت راسي ماسويت شي والله همه اتهموني لان نهزمت منهم ..

دمعت عيونها حسبي الله عليهم الله على ظالم ، طيبي واشتكي عليهم عود لاتخافين ، طلعت كرت من الجنطه شوفي هذا كرت مالتي ، من تردين شي اتصلي عليه اساعدج وادزج لمنظمات ، هيه تحجي ودخلت بيبي شايله صينيه ..

كارت بيد البنيه مااخذته مالحكت ، ضلت تنضف بالجرح ، شدت رجلي باند قوي وطكتها ، ضلت بس صفحتي كالت لازم اشعه ، واذا ضلت هيج ترة ماطيب التفت علي بيبي اخذوها لطبيب خاص على الاقل ، هم واحد يخلي الله بين عيونه ..

بيبي فكت عيونها عليها يااا شبيج انتي الاخرى ..

خلت الغراض بالجنطه بعصبيه ودردم حاجتها بيبي شربت يايمه ماتشربي ، حجت ماريد حجيه انسدت نفسي ، كبل لاتطلع تقربت يمي عود تعدل الي ملابسي وخلت كارت بخظني وغطته بالبطانيه ..

كالت تحسبي على ظالم والله كريم يطلع حقج ..

بيبي حجت وياها شبيج يمه انهديتي ، ترة احنه اهلها والبنت واكعه من درج وجبناج تعالجيها ، خما تاكلنه بكشورنه  ..

- حجيه اني جاهل جدامج ، لو جايبيني فيتريه وماعرف بالمريض شنو بي ، ترى مضمده ومساعده طبيه صارلي سنين ، اعرف الضربه من نظره مو عاد اتفحصها بيدي ، البنت متعنفه منكم وماكله ضرب مال موت ، لو تشتكي عليكم توديكم وره شمس .. بس ماكول غير حسبي الله ، ناس وين وصلت وانتو بعدكم على غسل عار ماغسل عار ..

عافت بيبي متفاجئه بمكانها وطلعت حتى ماسلمت ، بيبي كالت ياااا والتفتت عليه ولج يالصفره شحاجيه شنو كايله الها وهيج انهدت مثل الططوه عليه ..

والله ماحجيت شي ...

ولج صخام بوجهج تحلفين جذب بعد ، عجل شدراها سالفه غسل عار هااا ..

ماحجيت بيبي وداعتج ، بس سالتني ليش مضروبه منو ضربج كتلها اخوي وابن عمي ضربوني  ..

- بالقرعان ماتنطين وجهه انتي ، عليش تحجين انتي جدامها ولج ، فوك مارشيد جابها تشوفج عبن انكسر خاطره انوب تحجين جدامها عليهم ..

درت وجهي ضايجه منها :-'قابل مجذبه ..

ضلت تحجي وترزل بيه ، وتكول لو اعرف تموتين مره الاخرى ، مااخلي احد يدش بعد ويشوفج ، وضلت زعلانه يومين ماتحجي وياي ، تباوعلي بطرف عينها ، بس جذب والله من تشوفني اتلوى من صفحتي ورجلي ، خطيه جابتلي مضمد جبير بالعمر يشوفها شبيها ، وكفت على راسنه ماترضه تتحرك ..

اسمع صوت ابو فهد يحجي وياه ويساله ، كال مابيج شي بس تمزق بصفحتج ويرادلها شد ودهن مرتين باليوم ، ولاتنامين على صفحتج ، رجلي فلها كال بعد مالها داعي بس لاتضغطين عليها  ،

الي استغربته ابو فهد يجيب المضمدين وياخذهم بيده ، عبالي جدي لو جاسم ، من سألت بيبي كتلها منو يجيبهم ..

انهدت بيه ، ابن عمج الي تردين تشتكين عليه يالغبره ..

منو كلج اريد اشتكي ، شنو هالحجي بيبي ، لاتتبلين عليه بيه حيل ضرب اني نوب تتبلين ..

هاا منو شاكيه للمضمد علينه ولج ،

ماحجيت هيه سالت ، على شنو تضوجين قابل جذبت مو همه ضربوني ،

بالقرعان انتي نذله ، رشيد منين ضربج ياول ، تردين تبلي للرجال ترحيله فدوه ، اخوج ضربج وعمامج من عملتج سوده ..

مو كطع شعري ، مو سحلني جدامج ، وشحطني للبستان مو اجه يكتلني خلاص ..

اثاري حقج رويشد من جان يكعدج بهبده ويكومج بهبده ، ولج لو ما هو ، جان انتي هسه حتى كبر مالج ، مشموره بالزبل تاكل بيج الجلاب ، لزمج بيده ، وكلوله اجتلها واحنه نشيل سالفه عنك،  وماسواها ومامد ايده وطكج واخذج يمه يومين يخاف عليج منهم ، من اتفق وياه جاسم ويه عمامج  ، سالفه غسل العار ينسوها لان مامسويه شي البنت ،

وامن بعد مالهم لازم بيج ، يله جابج ، وانتي تحجين عليه ، وتردين تشتكين عليه وتحبسي فوكاها بنت حسن ، والج حتى جلب مايسوي سوايتج ..

درت وجهي ضايجه والله ماتنطي بي بكد شعره ، كلهم ماتنطي بيهم بس عليه فالحه ، كالت ترى هو جاي يجيب المضمدين عليج حتى فلوس علاجج منه ،

عبن جاسم شال ايده حتى علاجج ماله شغل بي ، بس جهاز الاوكسجين جابه من بغداد بذاك الحساب ، مارايد منج شكر بس جفي شرج ياجده اذيتي هواي هو بحياته ماشايف راحه وانتي جملتيها عليه بموتت امه ، ونكتي بي ...

دمعت عيوني ، شكد حسيت بذله ، تاليتني انذل بعلاجي ومرضي ، كرهت حتى الدوه الي اشربه ، من اذكر الي اذاني نفسه يصرف فلوس على علاجي ، مادري شنو غايته ، ولافكرت بيها اصلا جنت اريد بس اكوم على حيلي مليت ومتت قهر  من ذلتهم ...

ياسر يخابر وتجيب جهاز الي بيبي احجي وياه ، يحلفني خما احد ياذيني احلف اله ويله يصدك ، من يسمع صوتي زين واحجي عادي يطمن ، يكلي والله حاير بامج مالها خلك تعبانه ، ولا اكدر اجي واكابلج ، بس خلي تبرد سالفه اخذج يمي واذا ماقبلو اجر بديالى عود ونكعد واخذج بعد شنو عذرهم  ،

امي حجيت وياها سوده عليه بس تبجي ،

تكول ماكدر اجي خوالج مايرضون وحالفين ماوصل ليمكم ، واصلا تعبانه مابيه حيل اجي مسافه طويله كلبي يتعب ، كتلها لاتجين مابيه شي بيبي يمي مو مقصره وياي ...

خسرتهم كلهم اخواني واختي وامي ، كله بسبب عمامي وافعالهم بيه .. سديته وجرت موبايل مني الحجيه يله جيبي لهذا .. خلي بيبي قابل راح اكله ضايجه خلي التهي بي  ..

لايمه ماتاكلي بس هجم بيوت هالشيطان ،  مو كله بسببه انتي سويتي عملتج ماوراه بس مصايب جيبي .. اخذته وطلعت حتى ماتخلي يمي بالغرفه ، ماطلعت من غرفه ولا اتجرء حدي للحمام  ..

كمت حتى اطلع للحمام انحصرت ، مليت حتى من غرفه وريحتها ، استندت على حايط احس نفسي احسن من قبل امشي شوي  واكوم بس حركه كامله ماكدر ..

لزمت يده افتحها ماتنفتح ، على بختج بيبي صدك عود ، كعدت بالكاع يم باب دكيت عليها بالكت تسمع ، شوي ورجعت فتحتها لكتني كاعده بالارض ، هاا ولج وكعتي ؟؟؟

لا بيبي بس لاتقفلين عليه بعد الله عليج ..

باوعتلي بطرف عينها ، بيج تكومين لو اصيح احد يكومج ..

كمت كوه سندت نفسي على حايط .. بيبي خايفه انهزم صدك عود ، دمعت عيوني دباعي كوه جاي اكوم على حيلي ،  لاتسدين باب الله عليج  ، جاي انحصر واضل احوص فد يوم اسويها على روحي ..

سكتت ماحجت ، اسمعي جده هنيوه لخاطرج احجي بالقرعان ، هالتشوفين تالي عمري وشيبتي اداريج انا بعمري ماداريت لاجنه ولا بناتي ، ومكابلتج وجاعده عليش ، عبن احبج ..

باب بعد ماقفله وانتي تكعدين خوش ادميه ، والي اكول عليه تسوي ، جدج تكسبي واداري بس تكومين على حيلج ، لو يدوس على راسج تكوليله تم ،  وعمامج هم ، واخلي يحجي ويه اخوج يرضيكم سوه ويبرد الكلوب ،

افتهمتي يجده لو لاا ، انداريت عليها مامقتنعه يدوس على راسي بيبي ، بعد كل الي سوو وياي واجو يموتوني وتردين اتمنى رضاهم عليه بعد ...

فتحت زيكها ربي صبرك ربي ، غمتني انتي مو مال نصيحه بمحمد مال جتل بتوثيه وعلى راسج ..

اخذتني للحمام ادردم ، وتكول راح اموت ناكصه عمر بسببج ، اخذي نصيحه يابيبي لا تجلطيني ،

دخلت للحمام وهيه واكفتلي بالباب كملت وطلعت هيه بعدها مزنبره ادردم   ، جدي طلع من ديوان شافني ، اني كبل دنجت راسي سمعت مشه وطبك الباب ، مارفعت راسي عليهم ..

رجعتني لفراشي ، سمعت الاذان كالت امشي اتوضى واصلي والباب راح اعوفه مفكوك عووود ، سمعتي على اتفاقنه يجده موو ..

كتلها روحي توضي جده مو شوفين بعينج مشي مااكدر امشي لخاطر الله .. 

عافتني وراحت تتوضى دخلت وياها مصلايه .. فرشتها وكعدت تصلي وتدعي ، صلاه العجايز شطولهااا ، عبالك مال شهر جامعتهن ..لو طول عمرهم يكضوها رذيله وفشار وعرك وباخر ايامهم صلاه وصوم ، وزكاه ..

اندارت علي شافتني اباوع عليها،  مغطيه جسمي نصه وكاعده على حيلي صافنه عليها  ..

تسبح وتباوعلي تالي كالت : - عجل انتي ماتصلين ولج ..

حجيت بتنهيده :- لا جده

:- صخام بوجه امج اي والله ،  واناا اكول ليش شيطان راكبج ركوب ، ومايرضه يهدج شوي ،  عبن حتى كصتج ماشايفه مصلايه ..

:- امي مره مريضه بيش طالبتها حجيه لخاطر الله ..

:- عبن بس عرفت تخلف ، ماعرفت تربي بناتها على دين الله ..

:- اذكرج مره حمدتي بتربيتها جدام نسوان عمي شتغير هسه ...

:- جنت معميه على عيني، هاي كبل لاتسوين عملتج الشينه ...

:- راح اضلين جده تعايرين بيه و تذكريني ، يعني انته باعده ناس عني وحاميتني ،  ومسلتمتني انتي ..

دارت وجها عني ساكته وتبسح بعدين حجت وهيه دايره وجها :- كومي توضي وصلي ماطول بيج حيل تكومين ..

- مابيه منو كلج بيه تعبانه ..

- تعبانه لو ماتعرفين تصلين وتتفاشلين ويه ربج  ..

- مادري انتو شلون تضلون بساعه كاعدين على مصلايه وتسبحون والكم خلك ..

- راحه يجده  ، اندارت عليه تاشرلي بالسبحه راااحه ، عجل عبالج هاي كاعده اتعب ونكعدها ، بعد هالعمر بينه حيل شكه وكظه احنه ..

بس عبن بيها راحه ، بال وجسد ونكعد ، شمحلاها من تكعد بين ادين ورحمه ربك ، وتسوالف وتدعي الها ويستجيب الك .. شايفه كلبج وره ماتخلصين صلاه شلون يبرد لو هموم دنيا كلها عليه يشيلها عنج ...

سكتت وهيه هم سكتت تسبح وتدعي ، احنه امي وبابا يصلون بس اني وياسر لاا ولا حتى هند .. جاسم ماشايفته يصلي ..

بس برمضان نصلي سوه ، وبالاعياد .. صدك من يومها كامت تجبرني اكعد اصلي وياها جبر ، وتكعد تسولفلي عن الصلاه والحجاب وشلون وجهي منور بسبب صلاه ، جابتلي حجاب ومصلايه وماتصلي الا واني وياها صح صلاتي على كعدتي مادنج ماكدر ، بس عدها المهم البس المشمر مال صلاه واكعد على مصلايه  ..

صحتي احسن من قبل ، اكوم بحدي واروح اشرب ماي لو للحمام لو اغسل ، بس باب البيت ماشيفته حدي للمطبخ وغرفه والحمام ، عمي وجدي من موجودين ماطلع ، بس اسمع اصوات عمامي ولدهم بليل من ينجمعون ، اطلع بس من بيت فارغ مو خوف ..

بس كرها بيهم وبشوفتهم ، بيبي نطتني ثقه وامنت بيه لان شافت مالي نيه اعيدها وتبت ، بس تخاف علي منهم ، وتكضيها عرك ويه مرت عمي علي من وراي ..

كاعده بالمطبخ بصف بيبي ،  احفر بالشجر اريد اسوي دولمه ، ومرت عمي واكفه على طباخ ، دخلت رقيه وياها بنت عمي سلامه .. نسيت اسمهاا اصغر وحده بيهن هيه ..

سلمت بوست مرت عمي وبيبي وسلمت عليه من بعيد ، انا كاعده واباوعلها بحقد النذله ، ولا جن مسويه شي ، سلمت عليه بنت عمي سلامه ..

حجت رقيه يااا بعده وجهج ملون هناء ضحكت ماشالله جان خريطه هسه اهون من قبل ..

ماحجيت ضليت مدنجه مو ماعدي جواب اكدر اكوم ارعطها ، بس والله شمئزيت احجي وياها من حقارتها ..

- بيبي كالتها خير شو اليوم ماره علينه شجابج مو عوايدج ..

- مريت اشوفج جده ، وكلت اجيب سلوى وياي على واهس خاف تردين شي ..

- لا يمه روحي اخدمي امج انتي ،  اناا شايله نفسي الحمدلله وهناء هسه عدي ماحتاج شي ..

كعدت كبالي بهمه  :- هيه هناء خلي تشيل روحها بلاول ،  وبعدين تشيلج ، جرت مني المكشاره حيل  وكعدت تحفر بالشجر ..

باوعت عليها ، هاي نذله هيج من زمان لو هاي طبيعتها هيج  واني مااشوف .. شكد جنت مغفله لعد ..

باوعت عليه اشرت براسها على بنت عمي سلامه ، كالت ماعرفتي هاي منوو ،

عقدت حاجبي ، بنت عمو سلامه قابل ماعرفها شبي عقلج رقيه عبالك انتي ماكله طن كتل على راسج مو اني ...

طكتها ضحكه :- اي والله همزين تعرفين نفسج ماكله طن كتل على راسج ..  لااا ولج هاي مرت رشيد ماتدرين رشيد عقد عليها ..

باوعت عليها متفاجئه البنت صارت حمره دم من خجل ، يالله صدك عود البنيه صغيره ، العام جانت بصف اول متوسط والله ياااااا ...

كتلها شكد عمرج انتي ...

رقيه ردت علي  :- شعليج بعمرها انتي ، هسه هيه مره مزوجه هالتشوفيها كبالج ماخذه احسن زلمه بولد عمج .. شعليج بعمرها ..

- رفعت حاجبي اي والله بيش يفيد العمر هاي انتي راح اطخين ال٣٠ وبعدج بايره ،  ضحكت هم شنو نفع العمر مجرد رقم موو باله ..

- شهكت ياااااا شمرت المكشاره ، تعايريني ولج هناء نذله ..

بيبي حاجتها شبيج ولج ، لا تشمرين بنعمه الله ، لا اهبدج بالجدريه يالرعنه ..

ماسمعتيها جده تكلي بايره ، هااي تالي ام زلم تكلي بايره ..

نترت بيها وشمرت عليها الشجره الي بيدي  :- هاي منو ام زلم ولج منافقه الله لايوفقج اذبين بلاج عليه ، لعد شكد مسمومه مني  ..

جديتي عاطت بينه كومن مناا ، النعمه كومن لا ادوس بنصجن .. هجمتن المطبخ ، ذيج تنتر  واني ارد عليها ..بيبي تخبلت علينه . 

رقيه :- ماسمعتيها جده ماشوفين السانها شطوله ..

انتي جبتي النفسج كومي منا يله فارجي من وجهي ،  سلوى جرت رقيه من يمنا ودخلن جوه  ..

كعدت بالكاع ، سمعتيها جده شتكول النذله عينك عينك ، مرت عمي كالت ممجذبه ترى ليش انتي هينه ، عامله عمايل يم خوالج وبحياه ابوج ...

كمت على حيلي ورجعت للغرفه الله لاينطيج يارقيه شمسويه بسمعتي بين عمامي فاضحتني فضيحه ..

دخلت للغرفه فايره ، من هذا يكرهوني وشايلين عليه مطمسنتي بالخيسه يمهم ، تعال شلون تقنعهم وتفضح الهم هاي جذابه ، منو يصدك وحده انهزمت ، قابل يطون بيها هيه بنت اخوهم ورابه على ايدهم ..

حتى بيبي لو ماهند تحجي وتحلف وتشهدلي ماتصدك ، ماطلعت الا راحن ، نوب جايبه هاي سلوى عود تغورني بيها من كبور لفتج يالعار ، مو اني مثلها بيه دوده مال زلم ..

كعدت هو صدك شعجب مااخذها لرقيه اخذ هاي .. طلعت لبيبي اسألها كعدت بصفها اكول بيبي ..

اندارت عليه بطرف عينها تباوعلي .. خيرررر

رشيد شعجب عقد على سلوى مو على غيرها هاي جاهل خطيه..

جنج حنيتي ياجده وحلالي رشيد ..

وووويع شبيه تخبلت ..

عاب حلج ام حلك الاعوج ، والله ماتستاهلين اضفره يالمصكوعه .. الله يحبه ونطا هالدره سلوى تربيه سلامه هاي مالها حس ..

:- شفتها ،  والله صدك مالها حس  ، جنها خرسه ،  هو هذا انتو تردو ، مره مالها حس خاب زوجوهم خرسات مو احسن ..

اكول جنج كويتي وطلع السانج بنت حسنه .

:- هااا شلازمتها هالحجايه جده ، شنو  بنت حسنه ،  جنج نسوان عمي من يتكومن علي ...

:- عجل اكضبي السانج احسن الج لا اطلعين جمر كلبي عليج ..

لا صدك جده شعجب زوجتو هاي ..

:- فقيره يجده ،  وصغيره تربه على ايده وعلى هواه احسن من غيرها ، مالكيت احسن منها ، شتكولين تكول تم ماتناقش بعد بيتي .

- الله يسعدهم ، اكول بيبي انطيني موبايل الله عليج اخابر امي كلبي لكفني عليها ..

كالت فوك ثلاجه اخذي .. كعدت يمها وخابرت ، صحتها الحمدلله احسن من قبل سألتني على هند كتلها والله سامعه صوتج وماسامعه صوتها .. اجت قبل كم سبوع شوي وراحت ركض تخاف من عيالها ..

كالت اني كم يوم واجيب ياسر واجي ضلتج بعد يم عمامج مالها لازم .. 

شلون يعني ماما جاسم شلون . 

مالج شغل مو على كيفه ، ياسر ورجع جاسم ماله كلمه عليج ..

راح ترجع مشاكل يمه .. بيبي اشرتلي'شنو  نطيتها جهاز تحجي ويه امي ، سمعت تكللها هاي شوكت ..

عجل تتفقين انتي وابنج لوحدكم ماتسالين عمامها خاف ميقبلون ، تعالو والله كريم وخلي بالج ولدج لايتكاتلون ام جاسم فكري بولدج ..

سدته منها تحجي وتباوعلي وتخزر ..

كتلها شكوو شمسويه اني ..

ماوراج بس البلاوي انتي والله ، جاسم متحلف بيج لو يخطبج جلب هم يطيج اله بلا مهر بس كوه كاضبته انا عنج .. هساع اخوج ياسر جايب خطابه الج ويكول مااخلي بعد هناا يمكم ..

اني ؟؟ الي خطااابه ؟!! منوو ؟؟!

الي جنتي عاشكته قبل يالادب سزز

#يتبع

توقعاتكم للبارت الجاي باله ..
الي يسال على نظام النشر ، ترى النشر يومي بس بارحه مانشرت لان جان عندي طلعه وشغل والتهيت والله ماكدرت اكتب ..

تفاعلكم يهمني ..💜