رواية ثأر مهري منهاا الفصل الثلاثون 30 - بقلم اسماء ديمير

تكمله بارت ال ٢٦ ...

#ثأر_مهري_منها

بقلمي"أسماء ديمير "

ركضت على جداحه ونفط الي بالترك .. يمكن غباء مني لو وزه شيطان بس هذا الي صار ماكدرت اكضم غيضي .. صعدت ركض للغرفه رشيت النفط على ثوب وجربايه ..اخواتي حاولن يلزمني ماكدرن ...

اسمع اصوات صراخهم وعياط ولد عمي بس جنت معمي ..ركضت علا تفتح باب دخلو ولد عمي راكضين عليه ومجتفيني ونايمين عليه ..ويعاتبوني شجاني تخبلت ..

امك راح تموت يمعود هذا انته العاقل شجاك ..

دفعتهم ابن عمي جبير حسين ، تلاوه وياي على جداحه والبقيه نامو على ايديه عطت بيهم ، رفست بس ماكدرت عليهم ..دفعتهم عني وكمت تعبان مكسور الظهر ولا ناوي اسمع شي ماعدي بال صافي افرزن اصواتهم اصلا ، جن شايل جبال ، حيلي انهد وكوه اجر نفس مختنك ..

تركوني على راحتي من شافوني بهل حاله ، نزلت طلعت من بيت كلو حاولو يصعدون وياي سياره صرخت بيهم ، وشلت سلاحي الي يلحكني ارمي ..صعدت سياره حاير وين اولي المن انطي وجهي المن اشكي ..

مالكيت غير البستان .. توجهت اله دخلت بين الاشجار ظلمه هندس بس ضوه الجكاره المورثه باين عندي .. نزلت اهبد اعمى كلب مو اعمى عيون دايس على نص الورد والزرع الي بالارض بالي مو يمي ابد ...

دخلت لبستان ، رايد هوه جسمي مستعر نار ، اريد ابرد ماكوو ، وكعدت كبال ضفه نهر ..

اريد اشم هوى جن حتى الهوى مو نظيف وخنكني كعدت بالكاع مكنبص ، اريد اريح اجدامي حيلي مهدود من هبطه ، من صبح ليهسه ، غمضت حيلي اريد انام واصحه والكاه حلم مو حقيقه .. كون كابوس واصحه منه واتعوذ من شيطان ، ضربت على راسي حيل اهبد بي كون حلم يارب البشر ..

كعدت بالساعات مو داري بالوكت ، صافن شوصلني لهناا شوداني شجابني شنو اليخلاني اوصل لهل مواصيل .. كله صوج كلبي الي سلمته بيد جاهل كلت اترسها حنيه ودلال ..

رغم اني من داخلي فارغ لا شفت حنيه ولا دلال ، كلت اعوضها ابوها وانا ماوعيت على اب .. كلت احن عليها اكثر من اخوها وانا مالحكت على اخ تاليته كله تفرهد وتطشر بستهتارها واستخفافها بيه ...

كله صوج كلبي ضربت حيل على صدري ااااخ منك لو مانته مو هذا حالي ، انا تاليتني اسهر ليالي بقهر ، شوازاك ياكلبي وهيج حبيت وعميت على عينك كمت ماتشوف صح من الغلط ، شوداك لذاك صوب وردت الي مو من ثوبك ، ولا بعقليتك ولا تربت مثل تربيتي ، بنات عمك سنين كبالك ، ليش ماطاحت عيونك عليهن ..

لو انا مكتوبلي شكه والضيم طول عمري ، حتى بهاي لازم مارتاح ، شيجبر خاطري هساع ، شلون اداوي جراحي وفشلتي بين عمامي .

طلعت باكيت جكاير شفت ضاله بي بس وحده هذا ثاني باكيت من مغرب ليهسه ورثتها وخلصتها بجره وحده كون روحي تحترك مثلها دارتاح ويهده ونيني ..

شراح يكظي العمر بعد الي سوته وياي راحت هيبتي وسمعتي وين الكاها وين ادورها شلون اباوع بوجه شماتي ..
دمعت عيني ماهانت عليه روحي وانا عزيز ناسي ورخصتني ،

رمشت حيل دير بالك يارشيد تخلي دمعه اطيح دير بالك ضربت على رجلي حيل ديربالك لا اطيح دمعتك مره ماوفت وياك ..

غلطه وصارت وماتنعاد نوب ،
انساهم يكلبي بطل مسويهم غوالي طلعهم من ذاك الركن الي ماقدرو طلعهم وادفنهم دفنه الموته بلا رجعه .. كوم على حيلك واجهه ناس كبل لايضيع اسمك مو وكت تعب و ضعف ..

اخذني الوكت بالصفنات والاهات ماحسيت غير بس على طره الفجر ، اعاين على الشمس بده تكشف بلون احمر ،

والبستان الجان اظلم يخبي حزنه هسه بده يكشف علينه ويظهر خيباتنه ،

شبساع طر الضوه ،جن اليل كصير والنهار اجه بساع ، ماتمنيت يجي نهار راح اتبالش ويه ناس ويه عمامي هساع ، كمت من مجاني طك بيه دمار، خلاني انحني لازم ظهري ،

كعدتي صارلها ساعات مو حاس على دم الي تجمد بعروكي ، ولا رجلي الي خدرت ، رجعت دنجت للكاع وثاني رجليه اريد الالم يخف ، فركت ظهري حيل غمضت عيني الالم روحي شلون الوحها وافركها ديخف االالم الي بيها ..

كمت على حيلي متجاهل الم ظهري واديس على روحي ، راجعت للسياره بس ركبت جهازي يدك مارديت عليه مالي خلك اي بنادم ابد ..

اتجهت كبل للمعمل ، ماريد امر للبيت ، ماريد اشوف احد من ناس الي عرفو بسالفه ، انهزمت بحزني وعايفهم وراي ، بس دكه موبايلي سطرتني سطر شلت جهاز ب٧٨ مكالمه لم يرد عليها .. تجاهلتهم كلهم دكيت على بيت اسال على امي هسه بالها يمها ماردت ..

جن كلبي كرضني عليها ، دكيت مره وثنين وماكو ، بيدي جهاز ادك على بيت ودك جدي بساعتها ، رديت عليه تعبان ..

حجه بتعب : وين انته وانا جدك متكلي وين ..

صوتي مبحوح ، مو كادر احجي ، نطقت كوه :- راجع للبيت حجي خما اكو شي ..

جر نفس ساكت ، بعدين كلي :- لا لاترجع للبيت اطلع بوجهك للمستشفى يابه الله يعينك ..

:-خير حجي احجي امي بيها شي شكوو

لشتي ثكلت وانهد حيلي من سمعته يستغفر ويكول انا لله وانا اليه لراجعون الله يصبرك يابه الله يصبرك ..

بسرعه دست بريك فجاه من قوته اجه راسي بنهبد بالستيرن صوتي رجف : شنوو حجي شنوو شكوو امي شبيها

ماحجه ولا رد شمرت جهاز دست بانزين ، طايره روحيتي على اميمي لافدواتج ام عدنان لافدواتج ام الشهيد ومرت شهيد مو وكتج والله بحاجتج بعدني ..

اريد اوصل للمستشفى ماكدر حتى سياقه ماكدر اسوق بعد كل شوي تفحط مني واسيطر عليها لمن وصلت بالشافعات طبيت ركض للطوارئ عمامي كلها موجوده

والمستشفه هوسه من الوادم ، ماندل الوجوه ، اريد وجهه غالي ، احسها كلها غرب ماكو بيهم وجهه عزيز ، تلكوني يكولون الي الله يصبرك ..

ولكم شيصبرني امي وين يالله امي وين روحيتي وين ..

فززني صراخ نغم واكعه بالكاع وتصرخ صراخها فزز روحي وعاني على مصيبتنه لايالله لادخيلك .. كمت امتمت وينها وينها ..

جدي لزم جتفي كول الله جدي المره جانت مريضه وتعبانه الله يصبرك ارتاحت يم ربها ..

عطت بوجها مابيها شي اخذتها لاحسن الاطباء مابيها شي ..

نغم تضرب براسها صرخت :- مات ولك رشيد امي راحت انجلط بسببك مانامت ليل وهيه تون عليك موتتها على ايدك صارت .. لازمها رجلها ويكللها اسكتي شهل حجي هو شله لازم يومها هذا ادعيها بالرحمه ..

ضليت اهبد مثل المخبل بالطوارئ ، اريد اشوفها لا عمامي فكوني ولاجدي ولا الامن ، الي مارضو ادخل للردهات ، تدافعت ويه الامن اريد افوت للانعاش ، والممرضين تخبلو ، ضليت اصيح بيهم هدوني ولكم امي جوه هدوني ..

ماصحيت على هزه جدي اله وهو وعمي :- ويكلي استحي ول على نفسك انته رجال جهال وتتبجى على امك المره مريضه وهذا يومها شنو تعترض على حكمه وقدر ربك كول الله انته رجال شبلاك ..

كعدت بالكاع فاحط حيلي اديه ترجف اريد اكوم مابيه بعد ولكم ماتت مقهوره مني وزعلانه كمت لحيلي دفعتهم عني طلعت بره الحديقه اريد هوه ،

والله كعدت كعده جاهل يتيم ، هساع صفيت صدك بلا اهل هيه اهلي هيه الي تحس بيه وتبجي على بجاي ، اميمتي ماتت بقهرها ..

امي ماماتت من مرضها ، ماتت من قهرها عليه ، ضليت كاعد بالكاع بالحديقه فاقد لا حس ولا جسم يتحرك ، لزمت خشمي بي رطوبه ينكط دم ودوخه سطرتني سطر ماحسيت غير واكع على وجهي بالحديقه على ثيل ....

#يتبع

بنات ترى والله اكتب وانزله بساع مو متعمده اكطع ، اني من نوع احب البارت طويل واحب الاحداث .. واكتبها بوقتها وانزلها بعد تعديل .. بس حاليا لان امتحانات كتابتي قلت .. فصبرر شوي الجاي افضل انشالله