رواية ثأر مهري منهاا الفصل الحادي وثلاثون 31 - بقلم اسماء ديمير

《《27》》

#ثأر_مهري_منها

بقلمي "أسماء ديمير"

ماوكفت لعزا امي مثل الخلك الله ، كضيتها اوكع وارجع اكوم ، الضغط الي شكل عندي وانا بدايه شبابي هدني ،،

وفاه امي اخذت حيلي ، صراخ اخواتي اذاني حيل ، والملامه الي بعيونهم كتلتني كتل ..

ماحجن وياي بس صوت بجيهن وصراخهن يحجي ، شنو ذنبهن شنو مصيرهن صفن لا ام ولا اب ، بدي اروح اكابلهن وابجي وانوح واشاركهن عزاي ، بس بيا وجهه هنيالهن يبجن ويفرغن الي بداخلهن ..

اخذوها عمامي للمغيسل وراحت وياهم نغم وخالاتي ، اني طلعت من مستشفى ويه ولد عمي اسحل بروحي ، وره كم ساعه يله صحيت بسبب الضغط الي اجه يكتلني ، اريد الحكهم بس مانتظروني اخذوها دفنوها وصلو عليها ..

لمن وصلت لكيت يهلون عليها التراب ، افيييش يايمه هاهيه الله كتب بعد مالنه لقاء وياج ...

عافوني كاعد كبال كبرها وراحو يجهزون الجوادر نمت على تراب كبرها ، الي بعده اخظر ، فتحت دموع عيني وخليتهن ينزلن براحه حاظن كبرها وادهك وابجي ، جنت استحي ابجي جدامج وتشوفين دموعي هساع ابجي على كبرج  ..

وكف كلبج يالعزيزه من حزنج علي لو ادري حزني جتالج ، جان ماحزنت وداعتج عدي ، بس اظن انتي رايده ملكه ابوي هالستعجلتي على روحه ..

كعدت لحد مامليت وصدع راسي يله وخرت ، رجعت للبيت عزا نسوان صار بيت جدي ، دخلت لبيتنه فارغ ، والبيبان مدرعه ، غمضت عيني مالي حيل حتى ادش للبيت اخذت ثوب اسود من الحبل الي بالحديقه لفيت الشماغ الاسود على كل وجهي طلعت من بيت اتلكاه عزا الناس الي ..

عمامي ممقصرين ناصبين جوادر بس وكفت باب جادر ،  استقبل الناس والباقي اني مغمض عنه ، مو واعي اجه جاسم حظني مابادلته ، ضليت مرهي اديه دموعه تارسه وجهه دنج خجلان مني ..

ماحجه ولا نطق وكف بصف جدي ، هيج مرت ايام العزا بالنهار وليل بالجادر متهرب من دخله البيت ومن شوفه اخواتي ، خلص العزا وجنها خلص النفس عدي ..

رجعت للبيت بيتنه فارغ من ريحتها ، وجه امي ماكو ماشفته بدخلتي ،  اخواتي بالحولي اسمع صوت بجيهن بسكوت ماتجرات اروحلهن ، فهد طلع شافني ابتسم اشرلهم ابااا ويأشر عليه مبتسم ..

صعدت كبل لغرفتي مادرت وجهي عليه ، اريد اتمدد النوم مجافيني صار ايام جسمي يون عليه من تعب والارهاق شارد من التفكير ومن وجوه ناس بالشغل لو بالبستان ردت بس اغمض بس نوم طاير ومخليني ..

غمضت عيني حيل ،  اريد اتهرب من دنيا بالنوم ، غفيت على كعدتي ، ماداري بروحي  فزيت على صوت ونين وشهكه بجي  ، كمت لحيلي اتلفت وين صوت ، من صحيت شوي فرزنت ..

شبيدي عليج ، شلون اداويج وانا وياج نفس الجرح ..

كمت طلعت من غرفتي متوجه لغرفه علا ، اسمع صوت همسها ووبجيها وعتابها لاامي ، فتحت الباب بهدوء  ، باوعتلي لابسه اسود وجهه احمر دم باين التعب على ملامحها الجنها جثه بلا روح ،

من شافتني كبالها واكف ، عله صوت بجيها بصياح كامت تركض باتجاهي لميتها حيل لحظني ، امسد على راسها ، دافنه راسها بصدري وتدهك بالبجي وتشهك ،

نزلت دموعي وياه ، اواسيج لو تواسيني ماله غير بعضنه بعد ، كلها تعيش وتنسه ويمشي يومها ، الا انا وياج لان محد يعرف قيمتها ومكانتها النا ، كلها راح تلتهي بأهلها و عائلتها الا انا وياج خسرنه الي جانت اهلنا وعايلتنا ..

ضليت حاظنها حيل كعدت بالكاع مرجع راسي للحايط ،  وهيه بحظني دموعي يجرن وياها بلا صوت ، لا العتب يفيد ولا الحجي ، مابيدنه شي غير بس ندعيلها ونصدق على روحه ..

سكتت وسكنت روحها ، غفيت بمكاني مو داري بروحي من تعب والسهر ، حسيت على حركتها فتحت عيوني بعدها نايمه ، جريت مخده بصفي خليتها بصفي حطيت راسها عليها وكمت من يمها غطيتها وطلعت ...

سبحت وبدلت ملابسي توجهت اصلي واقرالها قران ، طولت كعدتي واني اطلب من الله يريح كلبي ويصبرني ويرحمها برحمه ، دعيت من ربي تكون راضيه عليه مو غاضبه ،

غفيت على سجادتي طالب رحمه وراحه من ربي ، جوز الاطلبه صعب احققه انا ، بس على وجهه الكريم مو صعب ، نمت براحه نمت نومه عميقه ، نومه يتمناها الحزنان على العافو ماطولت شوي وحسيت على سده باب كمت لحيلي ،

تلفتت ماهو احد بالغرفه الشمس طالعه ، من شوكت تنام لهل حد يارشيد ، شجاك من شوكت شمس تطلع للحوش قبلك ، كمت بساعيتي اروح لشغلي ، لبست دشداشتي سوده ولفيت الغتره على وجهي ونزلت بساع حاجتني علا تتريك ،

حاجيتها بدون ماادحك عليها :- لا مستعجل ،

:- كالت جدي دز معتز ابن عمي سلامه عليك لان جاي يدك وماترد وكال يروح يدحك وين ،

حجيت وانا اطلع من بيت :- امرلو وره ماخلص شغل

طلعت للبستان اشوفه صار اسابيع عايفه مو عارف حلالي بيا ايد ،  صاير خنكه والعشب والثيل متلتل خانك الشجر والنخل خنك ، راح يدمرلي البستان هيج ولا عندي وكت اكمله صار فوك شهر ممنظفه ، عاينت للكاع الي وره المعمل يرادلها حراثه ولازم اذب بيها دمن حتى تصحها وتزرع زين .

.

جريت نفس تعبان كنبصت بالارض اعاين على الزرع والكاع ، وحيد يارشيد موو وحيد لااخ ولا اب الي يعينك ، ولد عمك اذا راد يشيل كرك لو فارس يحرث وياك يريد اجره هم ..

قررت بعد مارجع من يم الحجي اكعد احرثها للكاع ،  اذب تعبي بيها حتى لافكر ، بس لازم امر للسوك اشتري كراكه جديد الي عندي تلفت الخشب مالتهن ،  يطكن بايد بساع مايتحملن ضغطه الايد  ..

مشيت لبيت الحجي، ترددت لحظات امر عليه اعرف راح يتسمم بدني ويضيك خلكي ، لان اعرف النواياه شنهي وشنهو الي ينكال  ..

وفريت سياره متجه لبيت جدي جن عدهم حجي  .. خلي ينكال الي يراد ينكال هساع حتى بعدها يندفن كلشي ..

ومحد يجيب طاري واكطع الحيه من راسها اذا تجاهلتهم وعفتهم وراي ،راح يطول الكلام ويكثر ،  وماكدر بعد الملم سالفه ولا احط عيني بعينهم ..واجههم يارشيد واكسر عيونهم وكص السان الي يعيرك  ..

مشيت لبيت الحجي داز عليه مالي نفس ولا وجهه اشوفهم نفسي .. دخلت لبيت وكلبي مقبوض شفت باب ديوان مفتوح وهوسه بي ترددت ادخل لحظات بس صوت ابن عمي الي صاح اجه جدي هيانه ..

شميت ريحه الحجيه التفتت لان جديتي كاعده على قنفه بالحولي عيونها مدمعه ،

مشت خطواتي بثكل دخلت سلمت الوجوه مو احسن من وجهي .. جدي صاح كوه الله وليدي ..

هزيت راسي الله يكويك حجي ..

اشرلي اكعد قريب منه ، رفعت راسي على جاسم وجهه مطعون احمر وساكت ..

عرفت سالفه متبشر حجه جدي :- اكعد جاي مني وانا جدك ، اسمع ابني انا اتفقت ويه عمامك و اخذنه قرار بنت عمك وين نلكاها تنكتل وهذا الحجي جدام اخوها ، وسالفه منتهين منها ، وانته ننطيك وحده من بنواتنه تاج راسها مره الحوك الي تسندك ...

مدنج راسي رفعت عيني على جاسم من كال نكتلها مانطق بس وجهه مصوفر ادري بس ينطق ياكلو بالسانهم ويعيرو بيها ...

عمي سلامه حاجاه يابه لاتظلم بخت البنيه يمكن مخطوفه ..يمكن راحت خايفه لاحد قرايب ...

عاط بي جدي معصب ويزمخ بي ياخايفه ، من شنهو تخاف ولك بعد عملتها هاي تخوف ماتخاف .. ياامخطوفه وهيه ماخذه اوراقها وشارده لاطمطم ول بنت حسنه عرمه من يومهاا ..

عمي حميد وعمي علي ايدو كلام جدي ،  سالفه لازم تنتهي بكتلتها ، وهم سالفه تضل بينه ماتطلع ، لان اذا انفضح المستور معناه الطشار وسمعه الرديه تلوح باقي بناتنه ..

افر بالسبحه واني اسمع شلون يفاصلون بينهم ، و يدبرون بسالفه ، الحجي عندي اختفه وماله اي نفع ، الي قبض كلبي قرارهم بكتلتها شلون اذا لكاها واحد من ولد عمي كبلي وهو الي الغسل عارها عني ،

شلون اذا تولوها همه واني اجيت على تالي ، شلون بعد اثق بمره واسلمها بيتي واسمي وعيالي ..

كمت لحيلي كتله سوي الي تريده حجي هيه مو بس تابعه الي بالاخر انتو هم عمامها والسالفه واكعه عليكم هم .. توجهت اطلع من المظيف صاح جدي وراي تعال جاي بعدني ماكملت كلامي ياول ..

انداريت عليها تم حجي ..

هساع دزيت على الشيخ مشاري يعقد الك ،  على وحده من بنات عمك ، وانشالله تاخذها بعد اربعين امك ، هذا حك الله ماينزعل عليه ،  وامك يم ربها رحمه الله عليها ،  وبنت عمك حسن تنساها وتسوي نفسك جنك ماعرفت ولاخطبت قبل  ..

- مو هيج الحجي ، جدي سالفه زواج شلتها من راسي مالي خلك مره ، مو وكتها خلي اخلص الي بيدي وافض مصيبتي والله كريم ..

مصيبتك مصيبتنه كلنه وانا جدك ، بس هم تعقد على بنت عمك ،  وتشوف دربك ،  ياله تعال جاي اكعد عيب من الوادم جايه تشهد على العقد مايلكوك ..

رجعت لمكاني مأيس مو ضعيف حال لا بس الوادم وجماعتي كلها تعرف ،  اني ناوي اعقد هالكم يوم ،  وراي زواج مصيبه انو درو بالي صاير ،

هذا الحل الوحيد الي يلملم الموضوع و يعمي عيون الشمات عني .. اصلا محد راح يرضى اعارض هذه موسمعتي لوحدي هاي سمعه بيوت كامله ..

دقأيق صافن بالارض واصواتهم تتعالى ونوب تتهامس داري بالي حوالي وجاي يصير بس مالي نفس افك حلكي ،

كمت من مكان مختنك كاره اصواتهم ، صاح جدي وين ، كتله بره شوي حجي اكو شي ..

باوعلي بأسف :- روح ابني روح الله يبرد كلبك ..

طلعت بالحديقه ادخن ، احرك بالجكاره جني احرك بروحي اريد اطفي نار الي بصدري ، على منو احقد على ابن عمي الي ماله خبر وماحجه بسالفه اخته مغلس ، لو بنت عمي نفسها الي عافت كلشي وراهه ونهزمت مني ومافكرت هذا رجال شراح يصير بي وسمعت اخوها واهلها  ،

عبالهم ناسي سالفتها لو عايفها ،  والله ماعوفها ، الا ودمها بيدي وروح امي العزيزه ، ماعوفها الا اسمع صراخها تطلب رحمه وماتشوفها ، والله االا اخلي دمها ودموعها يصيرن سوه ..

فزيت على طبه ايد على جتفي ، التفتت لان جدي وراي ، جر نفس مضايق اكثر مني ، متضايق عليه مدري على حفيدته الي هدر دمها كبل شواي بنت ابنه العزيز ، الي ماشبع منه شوف هم بسبب نسوان ، مدري على جاسم الي راح يفقد اخته ..

جدي شاف الحزن بوجهي ، و عيوني الي انكلبن حمر من يوم العزا ، يباوعلي بأسى ويهز راسه ساكت لايكدر يحجي ولا يكدر يباوعلي وانا بهل حاله .. حالي تغير ..ولا اكدر اداري وجعي .. بياض عيوني الي انكلب احمر لو بحه صوتي الي صارت مرافكتني .. لو وجهي الي زاد سماره ..

حاجانها هو ينصحني او الاصح يواسيني ، مايدري الكلمات ماعادت تشفي الجمات ، :- اخذ بنت عمك يجدي اخذ الي يحبك ويشتهيك وانسه ودوس على الفاركوك برضاتهم .. باعت برخص .. اشمرها وره ضهرك ياابني وعيش حياتك ..

رديت عليه ضايج والنار بصدري مستعره :- بنت عمي يا جدي مارتاح اذا ماجيب راسها لحد بسطالي ودست عليها ، وداعت الغاليه امي الي ماتت بقهرها.. اذا ماكسرتها وذليتها واضوكها الي ضكته ..

:- بنت عمك هجت وانا جدك  جوز يم اخوها حتى حك ماعدنا يمها .. اذا اخوها تكفلها وين تكضبها بعد ، داري روحك وشوف نفسك   ..

باوعتله متفاجئ ، شسامع يجدي ، اكو شي ، ، هز راسه يباوعلي مو راضي :- شعبالك يارويشد ادور وتخم وراهه بحدك وانا مو عارف ، هذا شيب مااجه من فراغ وانا جدك اجه من ظيم وظلايم وسهر ليل وطلايب ،

انته جنت اظن انو تهرب البت ، وانا انام  مرتاح وانا بنت ابني مو داري ارضها وين وبيها مجان ، لو اعوفك اداري مصيبتك لحالك ، وانا اغلس عليك ، شوف ياابني اخذها مني اعتبرني غريب بس فاهم دنيا زين وجاي ينصحك ،

ضربه الي تأذيك وتحس بوجعها افرح لان مادامك حسيت بوجعها معناه هاي درس ، صير شاطر وتجنب الضربات الي بعدها وتلاكفها زين ، ودير بالك تعاين على ضربك لان صار ماضي يكفي اخذ ماضيك لاتنطي لاحاظرك ولا مستقببلك ..

انساه يجدي الفات مات ، اعتبرها ماتت هيه واخوها ، وحتى بالنسبه النه هيه وياسر ماتو متبرين منهم ..

:- حتى اخوها وداعت امي جايب راسه وين يروح مني .. اني  انطعن بظهري تالي الوكت من ولد عمي ..

- لا اله الا الله .. اكتفي لهيج ابني وعوف سالفه ..انحرمت من ورثها ومن شوفت اخوتها وامها كافيها هيج راح اضل طول عمرها ندمانه وخايفه من الثار ..

اتوكل وتزوج وجيب مره تنسيك الي ماقدرتك بنت عمك
خوش بنت سباعيه ، انا اختاريتها الك بنت مطيعه وتسمع جلمه زين ، وابوها كال كبع واخذها بساعتها ، بس انا محترم حزنك على امك وكلت انطر تطلع الاربعين واخذها ..

توكل نعقدلكم انشالله لاتكسر جلمتي وانا جدك وتقهرني عليك تالي عمري ..

هزيت راسي بلا رد دش الشيخ وياه زلم البقيه ، جدي طبطب على جتفي وراه يستقبلهم ، مشيت وراه ماعادت تفرق عندي ، واصلا محد يفهمني ، عبالهم اني هامني مره ، عجل وكرامتي هاي هم تردها مره ، وجرحي هم اداوي مره ، قهرتي على امي تعوضه مره .. مايداوي جرحي غير من اشوفها تبجي دم طالبه رحمه ..

دخل الشيخ الي يعقد النه دوم يصير صديق جدي ، تسالم وياه بسالفه وضحكه جن مو صاير شي ،

سلم ودخل كعد يم جدي ويتاهمسون سوه دخلو مجموعه من زلم الخيره كرايبنه من بعيد يشهدون على عقد .. جدي صاح بسيف كله كوم كول للحريم يجهزون نفسهم للعقد ..

اشري جدي اكعد بصفه كعدت يمه وبينه الشيخ واشر لعمي سلامه يكعد من جهه الثانيه للشيخ بعد الصلاوات والتلاوات حجه شيخ ردد ابني وياي

كاعد بوسط اهلي وناسي وعمامي بس جني غريب ولا حاس بقربهم ولا حاسين بيه ، جسمي جمر من القهر بلغت ريك كوه هو هذا مهرك وعقدك الي ردته يارشيد ..

كعد الشيخ يردد ايات واحاديث عن زواج وعن قدسيته وشنو اثاره الايجابيه بده يتلي تلاوات العقد وعمي سلامه يردد وراه ماكول تفاجئت بالي عقدت عليها لان مو جديده على عمامي ..

كملت العقد وطلعت منهم دايخ جني مسطور ، هاهيه الفاس وكع بالرأس يابو فهد  روح جيب راسها لو تشوف وين ولت حتى لو بس تجيب جثه المهم تعرف وين راحت وين صفه بيها دهر وبيا مكان ..

جنت ناوي اشتغل بالبستان يراد اجيب مكافحه وكواني سميد ، من عدا الحنطات ،  انسي نفسي توجهت للسوك الانشائيه اخذ الادوات جديده القديمه تلفت ، طبكت سياره كبال مجمع توه ادخل طخت بيه حرمه ..

عقدت حاجبي من حركتها الرعنه خزرتها هيه ردتها بابتسامه اسفه وربي مو قصدي كوولش اسفه ..

ماحاجيتها دخلت للمحل ،  اخذ الي اريده واصعده انا والعامل بسياره الحمل انترست حتى ماضل مكان ، وياها طفل شايله ماطور الماي وتحاجي الولد شلون ينشد وماتعرف تشده وبالكت احد يساعدها ..

كللها احنه مجمع ادوات انشائيه وزراعيه ماعدنا عمال يطلعون يشدون ، شوفيلج احد من الكرايب ...

وكفت غاد منها اريد ادفع واطلع حاجتني :-اكوول  عفيه ماتعروف احد يطلع بكروه يشد بواري لو هذا الماطور ياهو الاسأله يكول مااعروف ..

تجر بالحجي جر لعبت روحي من هيج مره ، انا ملتهي جاي اطلع فلوس واحسب بالي مو يمها مو فاضيلها ..

:- احجي وياك هاي شنو شدعوه عيوني شو متتحاجه نزول عليك ..

التفتت عليها خزرتها شكد رعنه ،  وصلفه نسوان اخر وكت شغلتهن استهتار وصياعه ، ابتسمت بوجهي اووي لاتخزر اشااقه بس والله ماعدي احد يشده وصار ايام بلا مااي حتى ملابسنه مدنغسولها صار يومين .. باوعتلي بترجعي فدوه حتى لو بكروه شكد ميريد ..

دنجت راسي ارجع احسب مره الاخرى خربت حسابي بنت الصياع ، حاجيت الولد اعرفه وانا معاميله كتله بقيه الغراض دزهن بيد مؤيد للبستان سياره متكفي بعد ، كلت هيج ودرت ظهري وطلعت ...

صعدت سياره سوالف نسوان ماتمشي عليه ماتدري اعجنها وعاجن الاكبر منها ، كلجن نفس الصنف ونفس نكاسه تريدلك وحده نظيفه طاهره ماكوو ،،،

دست بانزين حركت سياره ثواني  واسمع صياح طفل ، وصراخها يمه ابني داس ابني يبووو

#يتبع

اذا تفاعل جيد انزل بليل بارت اذا كدرت اكمله .. 💜

اول مطب بالقصه خلصنه منه حضرو نفسكم للمطبات جايه

بس جاي افضل  انشالله تفائلو لان وقت سواء كان حزن او فرح يمضي مايطول ..