رواية ثأر مهري منهاا الفصل التاسع والعشرون 29 - بقلم اسماء ديمير

《《26》》

#ثأر_مهري_منها

بقلمي "أسماء ديمير "

نزلت فرحان بيومي ، عطر البيت الفواح وعطر البخور المميزه الي اوصيها من الكويت خصيصا لاامي ، وهيه تحبها لدرجه ماتشعل منه ولا تعطر البيت بي الا بالمناسبات الجبيره ، عيد لو سنويه اخويه وابويه ..

اليوم مشغلته لخاطري وتارسه البيت بكل ركن مبخره  ، مبتسم لفرحه امي وحماس اختي الي تمشي وتضحك وصوت ضحكتها واصل للطابق الثاني  ، ماني صغير ولا عند امي العشره ولدها الوحيد هذا يومه ،

وتقرب وكت غاليته تتسجل بسمه ، عطري سبكني بعدني باول درج واميمتي صاحت طشو الورد كبل اجدامه هذا وليدي وهذا يومه  ..

زادت ابتسامي ورحت حاظن راسها وبايسها ربي يحفظج ياغاليه ،

-ربي يجعل ايامك كلها فرح ويسر الك رزقك ويفتحها بوجهك دنيا واخر وينولك مناك بجاه حبيبنا محمد ..

-الله يسمع منج يالطيبه ..

صاحت  لعلا تاشر متحمسه اكثر مني .. حطي الريوك لاخوج  بساع وراه شغل وهوسه ناس هم يله نتلاكف ادينه ونجهز البيت والاكل للخطاطر .. دكي على اخيتج شوفيها ليش بطت مو تدري ورانه هوسه وعزومه ..

حطت علا الريوك وتبوس بيه .. عسل وكاهي وقشطه وخبز حار ودبس وجبن وزيتون كل الي تشتهي النفس .. وعز الله من كثر فرحتي مالي نفس احط الزاد بحلكي ..

اكلت هالقاسمه اله مستعجل وراي كومه شغل .. هساع جاسم بالطريج جايبها هيه وامها .. ابتسمت واني متخيل وجهه وضوجتها من نعقد ..

ادريها ماهاويتني بس مصيرها تهواني ، من تعاشرني راح ادللها واعيشها احسن عيشه ، الي خايفه منها ابعده عنها، واعيشها عيشه ماعاشتها يم ابوهاا .. كارهتنا بسبب عمامي وخشونه كلامهم وافعالهم .. ماتدري بيه انا حسن الثاني واحب المره وادللها عمن ادريها مثل الورد كل ماتنسكي تزهي وكل ماتنهمل تذبل ..

كملت ريوكي وضليت على كعدتي صافن ،  افر بسبحه فرحتي ماانطي لاحد،  فرحتي جنت اريد  اسولف بيها لاولادي والها ،  واتباها بيها بس منحوس الدار منحوس لو مو تضحكه لدنيا لازم تبجي يوم وتوجعه افاده ..

محد يوجع فادنه ويكسرنه غير خذلان وطعنه العزيز بس ماني داري بالي راح يجرالي  .. ساعه بثمانيه كمت لحيلي امر لشغلي واوصي العمال على معمل عبن اليوم مالي مره عليه لليل ..

طلعت شغلت سياره متوجهه للمعمل .. اتذكر لمن بنيته قبل اشهر بفضل الله شغله ماشي وبديت اصدر من انتاجه لبقيه محافظات ..

احسن ما الفواكه الي بالبستان تنتلف ، بديت اجففها والمهتري منها مصيره يصير مربا معلبات ، عمامي اول ماكتلهم على مشروع ضحكو،  وكالو بطران ، بس وره ماذبيت دم كلبي عليه ، وصرفت الوراي وجدامي ، واشتغل ومشت بضاعه بغزاره  كالو اي مبروك ..

ابتسمت مستهزء صفيت جدامه نزلت ياهو الي يشوفني يكلي مبروك عريسنه ليش جاي احنه موجودين ، اليوم مهرك وفرحتك امبينه  ...

لايابه مشكورين ماتقصرون بس جيت اشيك وارد للبيت ..

جيكت الحسابات وصيت يوصلون الطلبات للتجار وشددت عليهم يستلمون الفلوس الباقيه بذمتهم ، اليوم لان هذا وكت استلام الباقي ، ومامقبول اي عذر او تاخير اذا تاخر معناه راح عليه ، وانا مااحب انغبن وينوكل تعبي وحقي هم وراي اهل وعيال ورواتب عمال وعوايلهم وبيوتهم كلها بركبتي ..

رجعت ساعه ب١١ كلت هبابني اسبح واتجهز ، هساع اكيد هم بالبيت ينطرون ، دخلت للبيت وتلكني خواتي بهلاهلهن وهوساتهن مشيت اضحك على فرحن الي خطيت من يمهن لغرفتي لكيت مجهزات الي غتره ودشداشه نيليه طلعت وياه ساعه وسبحه الذهبيه ..

دخلت للحمام توه مكمل وطالع سمعت صوت امي جوه واخواتي عالي استغربت نبره صوت توه اطلع دك جهازي .. رجعت عليه شلت عمي حميد ..

اول مارديت  اجاني صوته بصياح " الحك وانا عمك بنت عمك نهبت ضاع عرضك ول ياب انفضحنه بين ناس ومحمد "

جفلت على حجايته :- ول يالله جاي تحجي عمي شنهو هالحجي منهو نهبت ..

صاح بذني :- ولك بنت حسن بنت الكلب ، طيحت ماي وجهنه ، ماهي بيت خالها راحلها اخوها ومالكاها بالبيت ..

احس دمي كلها نزل لرجليه :- لا يالله شتحجي عمي اذكر الله "

- ول بالقرعان اكلو البنت ماهي بالبيت يكولون مختفيه ولك البنت انهزمت وانا عمك الحك ..

ضربت على كصتي لا ياامحمد ماتسويها هاي جبانه ،  تخاف ماتسويها ، عمامي يكرهوها هيه وامها  ،جاي يوزوني عليها ماتسويها ابد ..

تلاكفت دشداشتي وغترتي ونزلت اركض درج سويته شبختين امي تصيح وراي يمااا رشيد شبلاك اوكف وانا امك ..

دكيت كبل على جاسم .. ماشاله مشغول ضليت ادك عليه واصيح رد من خرب لشتكم رد ..ركبت سياره وشخطت بيها  ضربت الاسترين اجه ينشلع بيدي دايس بانزين متجه لبغداد ياابه كلبي قابضني ..

.
رد جاسم يلهث هاا رشيد .. عطت شنو سمعته شهل حجي شجاي يهذري عمي حميد هاا احجي ..

رد عليه خايف اكثر مني :- ماكوو رشيد ماكوو ماموجوده بيت خالي يحلفون اخر مره شافوها بليل بغرفتها . ماموجوده ماعرف وين اختفت ..

عطت بي شنوو ماكوو عجل وين ولت جاهل وتضيع لو البيت مابي بيبان تنسد عليها ومايدرون وين .. ولك اليوم احرك بغداد عليكم والله وين راااحت الا سمعتي ياجاسم بعز الله احرك الاحظر واليابس  ..

شمرت جهاز اسب واغلط عليهم جنها نار واستعرت بصدري،  حتى عيوني غوشت من الحروره الي بيه ، دايس بانزين وكل شوي تفحط سياره مني وافقد سيطره عليها ازابك بين سيارات اريدن بس اوصل جنها دهر مو ساعه  ..

موبايلي يدك ماشلته مالي خلك حجيهم ، اريد بس اوصل لبيت خالها طبكت سياره وباب بيتهم .. سياره جاسم واكفه نزلت ركض .. دكيت باب ناوي اشلعها من مكانها .. طلعلي جاسم وجهه اصفر  ..

لزمته من ياختته ولزكته بالباب وينه ول جاسم لاتلعبون وياي هيج لعبه نكسه ، ومعزه شهداء الي عدي مايشفع عندي كلمه ولد عمي ، احركم مو اني الي ينلعب علي ، مو انا جاهل تطيح وجهي بين ناس اختك الكلبه وين ؟؟!

ماحجه بس وجهه احمر ، يمتمت يمعود اهدء دنشوف وين ..

:- ولك احجي ولك برد كلبي اخيتك وين ..

اجت امها تبجي وتنوح خالهم طلع يهدي بيه ويفك اديه عن جاسم ..  " على كيفك ابني يمكن تطلع بيت واحد من خوالها وين تولي خايفه من زواج لهل راحت يمهم "..

عاط جاسم بخاله :- وين يعني منو منهم .. ياهو الي ادك عليه يحلف ماهي ماعدهم ، لزمت راسي وين راحت درت وجهي للبيت كتله لخالها اخذلي درب حتى افتش البيت يله جدامي ..

ذاك نط شنو يابه جاي تحجي عيب هالحجي يابه شنو تفتش البيت ..

ديني طفر لراسي كوه لازم اعصابي بدي الزمه امرده بيدي مصيبتي مصيبع وهذا مرهي .. لزمته من ملابسه وجطتله بالكاع مادري شلون هفيته بضربه لان خليت وجهه وخشمه يفلت دم .. اسمع بس صوت نسوان تتعايط .

جرني جاسم من فوكاه ومجتف اديه عنه ،  واني مابردت ناري عايف يمه بنت ، وهو مو داري وين ولت ، ادري رجال لو ثور بهل بيت ..

عاطت اخته ومرته جاسم حظني مرجعني ليوره ..

امشي داكلك اخذلي درب ، لا بالقران ادش جوه احرك البيت بالي بي امشي يله .. بنتنه خليناها امانه يمك شلون بنت طول بعرض ماااهي وين رااحت هاي اذا ماانته موديها لمكان بيدك ..

درت وجهي على امهاا بنتج وييين وين وديتيهاا عبالج مراح الكاها يعني ..

- لك يمه بالي عليها اكثر منك ، واللع هجت بسببكم من وراكم حسبي الله عليكم ..

جاسم جرني على صفحه كول يالله ماموجوده فتشت البيت والله ..

اذا مااادوره بيدي مااطلع دفعته ناوي ادخل .. اول ماهفيت باب الصاله دفره خليت الي بالبيت يصارخن كتلهن اخذلي درب وتسترن .. جاسم دش كبلي يحجي وياهن وخالهم كال راح اتصل بالشرطه سالفه مو تايه جاي تهدد عليه بيتي وتخوف اهل البيت ..

دشيت وصعدت ركض للغرفه .. هفيت باب غرفتها  دفره الفراش مخربط والكنتور مفتوح .. دورت بي على اوراقها ومستمسكاتها ..ماكو كلشي ماخاله وراها تلفونها ماهوو ..

ملابسها موجوده وادويتها موجوده نكتت الفراش اريد شي يدليني وين ماكو  ..

نزلت اركض عطت بيهم شوكت طلعت من بيت اني عفتكم البارحه مغرب شوكت طلعت متكلولي .. انداريت على امهاا احجي ام جاسم بنتج عملتها جايده خلي الملم سالفه قبل لايجون عمامي وجدي ومحد يكدر يشفعلها عدهم احجي بغلات عمي ..

ضلت تشهكت وتبجي وادك على وجها .. خوفه المره ونوحها مو خاليه كالت وداعت غوالي مادري يمه جوز انتحرت جوز ذبت نفسها من جسر انتو خبلوتوها شديتو وياها خليتوها تكره حتى نفسها .. حتى حجي كامت متحجي ويانه كطعت كلشي بسببكم ..

هيه جانت نهارها وليلها بس تبجي ونوب صديقتها منا ماتت قبل فتره وهيه تخبلت حتى اكل متاكل وكل شوي واكعه علينه .. وين تروح يعني حتى صحتها على كدها ماصار كم يوم من طلعناها من المستشفه ،  ..

طلعت من يمهم ناوي اشوف كامره شي بالشارع ، اكيد اكو كامرات بالشارع وصورت باب بيت ، جاسم طلع وراي يركض ويصيح الي ماسمعته حاير بزماني ومصيبتي ،

لزمني من زندي رشيد شبلاك انطي مجال دنشوف وين راح ننفضحك بالشارع تهدا ، دفعته من صدره ولك شهدء اختك ماعرف وين مهزومه وتكلي اهدء ولك عرضي هذا ..

هيه اختي كبل متصير بأسمك  ترى وخايف اكثر منك بس مو هيج ناس بشارع بدت تحس اكو شي غريب يمعود راح ننفضح ..

امشي وديني لبيت خوالك ، اخذني حتى ندورهم ، صعد وياي بالسياره وصلني لعند بيت خالتهم بس دكينه باب باين عدها خبر بالسالفه رفضت ندخل بس الصياح وعياط والمدافع  ويله قبلت ..

دشيت ماخليت حتى حمامات دورت بيها ماكوو بيت خالاتها الثلاثه فتشته غرفه غرفه حتى ترك وره بيوتهم هم فتت الها ، ماكو وين ولت وين اختفت ..

ياهو الي اسأله عليها يحلف ماشايفها ولايعرف عنها شي ، رجعت لشارعهم حاير ياربي عونك البشر ماجاي يعيني ، عمامي اتصالاتهم خبلتني ناس تسب بيها وباهلها وناس تزيد فوك النار حطب ويصيحون روح شوف صاحبها خاف نهبت وياه .. 

اجذب نفسي واجذبهم اكللهم ماتسويها ماعدنا بنات يسون هيج هاي تربيه حسن ، ضليت لاخر لحظه قافل اكول مانهبت مو ثقه بيها بس ثقه بالي رباها وباخوها ...

عمامي رايحين لمحل اسحاق يسالون عنه بحجه شغل وزباين وكالو مسافر من اسبوع للسليمانيه يشتغل ونادر مايلفي بغداد واصلا محل تاركه لان شغل ضعيف ..

اتجهت للشارع الي ساكنين بي ادور على بيت بي كامره مصور شي ،  يابيت اباوع علي مابي كامرات ، امشي بالشارع واتلفت اخر شي بيت صاير نهايه فرعهم ركن بي كامره مطل على شارعين فرعيات ..

دكيت الباب مستعجل وياي جاسم وجوهنه مكلوبه من فتح رجال الباب فز من منظرنه المخربط  .. كالت تفضلو وجهه باهت ..

سلمنه عليه حاجه جاسم عدنا مره مريضه وعقلها مو شي،  طالعه من بيت بليل ، وماندري وين بالكت كامره عدكم مصورتها ..

هو ماكال لاا تعاطف ويانه من شاف حالنه المتوتر والمخربط .. طلع تصوير من مغرب للفجر ..

جن الدنيا وكعت على راسي وانا اشوف طولها ساعه بالخمسه فجر ، فاتت من باب بيتهم تتلفت ومكرصه روحه هذا طولها وضعفها ، اي والله هيه وكفت لغاد من شارع جنها تنتظر شي ، 

فاتت سياره بس ممبينه تصوير مالايح بس تايرات هيه مشت ليمها وصعدت  .. بهت وجهي واحس دنيا افترت بيه .. حسيت الكل غدر بيه والكل مالهم امان ..

ياطيحه عرضي ياول كسرتيني جدام شمات ، ياعزاك يارشيد ويافضيحتك التفتت لجاسم مو اقل مني وجهه صفر وحتى مايعرف شيكول ..

طلعنه من يمه ولا نطقت كلمه ، سوتها بنت عمي طيحتي وجهي جدام الوادم ،

اريد ارمش مو كادر ، عيوني جفت من صدمه ، امشي بثكل ممتوازن ،  ماسمع صوت ولا اهيس اي بشر يمي ،  من صدمتي بيها ،

جانت خايفه بس شلون تجرءت مشيتها مشيه وحده متردده وخايفه ..

بس سوتها سياره ماعرف شنو نوعها ولا موديلها ماباين منها شي بس  غير اطاراتها بسبب الضلمه وزاويه تصوير ..

صعدت سيارتي اديه ترجف ، احس ضغطي نزل جاسم مافك حلكه صافن وين اولي وين انطي وجهي المن بعد اسال عمامي يدكون مانطيتهم نجده ولا حجيت ..

التفتت عليه كتله الي شفته يضل بينه ، مايطلع لعمامي ترى الطشار يلوحك انته بالاول لان انته اخوها الي شفته يندفن هناا فهمت ...

شغلت سياره ناوي اروح لبيت هذا سكط وادخل اشحطه هو واهله بس مجرد مادخلنه للمنطقه طبكت سياره دوريه علينه وكفتنه ...

طلع خالها نذل المكرن مشتكي علي بحجه ضربه وتعدي عليه ، والله انا الغلطان الي ماجتلته بمكانه ، نايم ورجلي بالشمس ونسوان بيته يطلعن فجريات  ..

شالوني بالدوريه وجاسم وراي ساق سياره مناك داك على عمامي وحاجيلهم سالفه شكوه ، وهمه ورانه طالعين للمركز وناس طالعه لخالها يحجون وياه يتنازل  ..

وقفوني بالتوقيف ثلاث ساعات بعد تحقيق تبين انو شجار عائلي وسوء تفاهم بس خالها مارضه يتنازل ، خاصه بعد ماعمامي هادين عليه للبيت ، ومكسرين جام ومهددي عشائريا ..

ضلت سالفه يوم عن يوم تكبر وتكبر لحد ماعمامي رامين على بيته لان مارضه يتنازل ، واني طولت بالتوقيف يومين ، تدخلت ناس تفض سالفه بينه ، حذرت جدي ودزيت عليه وانا بالتوقف وحاجيت عمي سلامه يلمون الموضوع بس ماكوو ..

طلعت سالفه وفاحت ريحتها على بنتنه جانت عده ومهزومه وجاي ندور عليها ، وخالها هو المسؤل شلون جانت يمه وطلعت بليل بدون ميدري ..

ناس صفت ويانه لان هذا شرف وعرض ضاع هو مو كد الامانه ، وناس صفت وياه هو شنو ذنبه فوك مامتكفلها هيه وامها وجانن ساكنات وياه بالبيت ، وجوز ضالمين البنت ، جوز انتحرت لو صار بيها شي وانتو تتهموهم باطل ماعدكم دليل ..

لحد مانحلت عشائريا يتنازل عني و اكتب تعهد عدم التعرض اله بالمركز ولا اوصل مره الاخرى لمنطقتهم ..

كتبوني تعهد واجه خالها النذل يتنازل بس وجوه عمامي ماتبشر بالخير...

خالها جاي وياه رجل اخته ولده اثنين ماراضين على ضربي للرجال ، بحجه رجال جبير وبنتكم ماهي صغيره،  وجوز سوت بنفسها شي ليش تضنون بيها سوء ، صارلها اشهر عدنه ماطلعت ولا طبت بدون اذن ،

ولاسوت شي ينزل الرأس وهيه بنتكم وانتو اعرف بتربيتها شلون تتهموها هيج والي سوايته انا عيب ومايصير  ..

بس طلعنه المركز كبت العيطه وهم لزمته ناوي على جتلته ابن الكلب ، فوك مامضيع عرضني،  نوب يريد يسجني سحبوني منه بالشافعات ، ولده تكامشو ويه ولد عمي بنص شارع  والشرطه تفاكك بينه ،

هو اخذ ولده ونسيبهم ومشه يتوعد يشتكي وانا اريد اتلاكفه جدي هدده بس يشتكي يكعده عشاير ،  ويفضحه لان بنتنه جانت عده امانه وماصانها  ..

بعدها رجعونه للمركز كلنه ، والضابط هدد هالمره راح نعديها ، لان بدايتها حاره وزعل باين جايد ، بس اذا اجانه بلاغ ثاني محد يطلع منا الا وكل واحد بايت اسبوع بالتوقيف ..

سحبوني عمامي ، قبل خالهم وطلعوني من مركز من منطقه كلها ، كتلهم ارجعو انا اضل ادور واشوف .. ماقبلو بس اصريت وعفتهم ومشيت خليت جدي يصيح وراي مارديت عليه ..

بيومها همت بشوارع بغداد راد اشاره تدليني ،  لو تبرد كلبي وتخيب ضنوني ،  بس ماكوو رجعت لديالى بنص ليل خايب واديه فارغه ، وراسي مملي افكار عدا كلبي الي انترس حقد عليها وعلى الي وراها ..

تعمدت مارجع الا وجهه الفجر ، حتى لاحد يسالني لو يلومني .. دشيت لبيتنه محني الظهر خجلان من اهلي وناسي .. شراح احجي وشكول ، مالي خلك احط عيني بعيون البشر ،

دشيت للمطبخ اعاين الصاله مضوايه ، عرفت اميمتي جاعده شينومها ، وهيه تحس بوليدها وجعان  ، مشيت تعبان ومهموم عاينت لداخل صاله شافتني دموعها تارسه وجها وكاعده على الكرسي تصلي مانطقت ولا انا الحجيت ..

شهكت تبجي وعله صوت بجيها ، جنها وجدت الوجع وين وشكثر همي ، انطيتها ضهري منهزم منها ماريد تشوف قهري اكثر من هيج وكسرت وجهي ،

انا المهيوب بين عمامي انا اليهابني حتى جدي انا الي امد ايدي للصغير قبل جبير انا الي يحبني الغريب قبل القريب ، صرت محط شفقه للمحبين ومحطه شماته بين الاعداء ..

صعدت الدرج بتعب و بظهر شايل حمل جبال ، كل دبجه  يزيد ثكلي ، اعاين لاركان البيت المزينه ومرتبه للبردات الذهبيه لو الزوالي والمدات بلون البردات مذهبه ..

دشيت الغرفتي ماتقل زينه ورتابه عن البيت كامله مكمله بس ناقصه عروس المهر .. الي عافت مهرها ونهزمت ، اويلي على ثارك يارشيد ...

سديت باب الغرفه رمشت عيوني بتعب ، وانا اعاين الغرفه زين، عطر الغرفه كرهته كرهت صور الفرح والبهجه الي بالغرفه فستان المهر الي مشتري خصيصا الها ولخصرها مركون على ملكانه بسد الشباك لو الذهب ..

تمشيت لزمت الثوب وشلون مطرز بشغل ايد جبته الها مستور بردان طويله خايف عليها من عيون اهلنا اغار عليها حتى من  عيون اخوتها ونسوان كرابتنه ..

لزمته من ياخته وسردته بقوه قاسمه نصين صرخت :- اااااااخ ياكلبه يانذله ماوكف بعينج شي يالناقصه "  شلت الملكانه وشمرتها على ميز المرايه فلشت الجام .. جنت اغلط واسب بيها رايد شي يبرد افادي الموجر ...

انداريت على جربايه ، وعلى فرشه شلتها وشمرتها ..الغرفه الي ماخذها من باربع ملايين من سبوع حرت شاسوي بيها وشلون ابرد ناري الجام الي بيها كلها سويته طحين بيدي كل ضربه للجام احس روحي تشوغ وياه ...

ماحسيت غير على عياط اخواتي يدخل للغرفه حاظناتني ويهدن بيه ..وبجي امي جوه درج صدع راسي ويتوسلن بيه اوكف خوفت جهال ..

دفعتهن ونزلت للمطبخ ناوي احرك الغرفه ، والي بيها تلكتني امي جوه درج مجلبه بيه تبجي وتبوس بديه الي انترسن دم وجروح من كسرت جام .. ماسمعت الها جانت النار الي بداخلي اكبر ..

#يتيع

تفاعلكم حبايب 💜 اذا تفاعل جيد انزل برتوت عنون 👌