رواية ثأر مهري منهاا الفصل الخامس 5 - بقلم اسماء ديمير

《《البارت 4》》

#ثأر_مهري_منها

بقلمي "أسماء ديمير"

مدده بفراشي والم معدتي فضيع .. دموعي نزلت من الالم .. كورت نفسي .. وضعيه جنين .. بالكت الالم يخف .. هاي كل شهر هالمعاناه .. ادري بس اني هيج لو كل البنات تعاني مثلي ..

احس سجاجين تكطع بيه .. اااخ نوب دنيا بارده والالم مكيف على هيج جو ..لفيت نفسي حيل بالبطانيه .. صار يومين على هالوضع حتى ياسر سوده عليه مانزلت اسأل عليه ..

من تجيني البيت كله يعرف .. خرب بحظي حتى بهاي مفضوحه .. نوب بيتنه متروس خطار ..وكله تسال عليه وينها .. باله شيكلولهم .. جايتها ومريضه والله فشله ...

سمعت خطوات على درج سويت نفسي نايمه اكيد وحده من بنات عمي الجايات البارحه بيبي سمعتها تكول لهند باجر عمج ومرته وبناته جايين .. يمكن وحده منهن وواجت تشوفني .. انفتحت الباب .. اجاني صوت امي ..

:-هناء يمه ..

تنفست براحه .. رفعت البطانيه .. هاا يوم ...

:- كومي عاد لاضلين نايمه عيب كله تسال بنتج وين صارلها يومين .. عماتج من الصبح هنا .. وكل شوي وحده تريد تصعد ومااخليهن ..

كمزت :- وانشالله كتيلهن جايتها وفضحتيني يمهن ...

:-حتى لو مااكلهن هنه من كتلهن مريضه عرفن .. شنو بس انتي تجيج ..

:- يماااا .. ليش هيج شكد عيب .. والله انتي مينحط بحلكج حجايه ..

:-عاب حلكج ولج شنو متنحط بحلكي حجايه شنو بس انتي تجيج قابل  .. شلون تحجين وياي هيج ضربتي على راسي ..

:- اااي هاي سوايه لعد تفشليني هيج .. شينزلني اني هسه ..

:- دنزلي ولاتكبريها .. تعاي ساعديني مجاي الحك على شغل وحدي .. و مرت اخوج هم ملتهيه بجهالها .. يله العالم كلها على جيه .. وعمج سلامه هم .. ابوج كال ساعه زمن ونوصل جايبن ياسر وجااين ..

من سمعت بياسر  .. كمت ..هاا صدك...

:- اي يله خفي ايدج وبدلي ملابس بدشداشه مو لابسه برموده وتنزلين وتسويلي مشكله . اخوج ياسر ماله خلك مناقص مشاكل وزن براسه ..

فتحت البردات مال الغرفه على حيلهن وفكت شباك  وطلعت .. ضلين بفراشي احس نفسي مفضوحه .. حتى مشي ماعرف امشي من تجيني اخاف يبين شي .. 

كمت من فراشي .. انداريت
ادور خاف مدمر لو هاي .. الواهس البيه فضيع .. ماكو شي الحمدلله .. نضيف .. رتب الفراش وكمت .. اخذت حبايه مسكن ام الخمسميه .. بالكت يقل الالم ..

طلعت دشداشه مشتريتها هيه ومجموعه دشاديش من يجون عمامي النه همه ولدهم لازم تلبس ..

بابا ميحجي ولا ياسر .. بس الضيم يم امي وجاسم ..  هذول كوم .. وعمامي ولدهم كوم .. اذا طلعت بالبجامه الهم عبالك مصلخه ..

كله تعيط بنتك ممستوره .. وتعال بابا تناقش و تجارش وياهم .. اكطع السانهم من اوله .. والبس دشداشه من يجون .. احسن مااشبع نصائح وحكم وعبر ..

على ملابسي من الكل .. نسوان و زلم .. عبالك يهوديه وجاي يهدوها للاسلام .. لو مفضوحه وجاي يستروها .. اغلب هداياهم الي دشاديش لو شالات عقدوني ..

طلعت دشداشه مارونيه طوخ .. حتى لايبين شي بيها .. لو عدي اسود البس بس ماكوو .. غيرت ملابسي وغسلت وطلعت ..

توه افتح الباب اسمع اصوات سلام وتبوس .. اكيد علا ورقيه اجن .. رجعت اباوع على روحي بالمرايه .. امبين مريضه .. بس بيه مجال  .. عدلت شعري .. وكرصت خدودي لان وجهي مصفر ..

طلعت فازلين وحطيت شفتي اليابسه .. عبالك صحراء قاحله .. ادري دوره لو غضب تمص مونتي مص ..

نزلت جوه .. صوات نسوان تجي من الحولي .. دخلت سلمت .. بعدني ممكمله السلام ونجريت تبوس وتمطك ..

اريد افك منهن ماكوو .. عماتي ونسوان عمي وبنات عمي وبنات عمتي .. اني اضحك .. كله تصيح بذاته ماتسالين  .

كعدت يم روان بنت عمي سلامه .. كتلهن فلاونزه مريضه والله ..

مرت عمي علي كالت :- يااا عبالنه دوره خيه ..

التفتت على امي ..:- كتلها هم مريضه خاله شنو الفراق ..

كالت :- سلامات يمه سلامات بس انتي عضمج فاهي على امج ..

كتلها فاهيه مفاهيه  .. المهم لازمه بيت ومخلفه كوم جهال ..

عمتي سليمه  .. :- فرت حلكها الي يسمعج يكول مخلفه عشيره .. مو اربع نفرات بالشافعات  ..

بيبي كالت :- عشيره .. او نفر واحد .. المهم تربيتها زينه .. دشوفي هالشكره اليمج .. منو بيجن خلفت مثلها لو مثل صوتها الي ماينسمع .. ابتسمت اني بفرح .. مدري شعجب مدحتني ..

اشرتلي تعاي  يمي.. كمت .. حطيت راسي بحظنها .. كالت:-  ماتجوزين من هالطبع .. ضحكت .. عمتي سليمه .. كالت جنها بزون ياهو الي يمسدلها تروحله ..

تفر احظان البيت كله .. هنياله الي ياخذها والله .. تلكيها طول اليوم مجطوله بحظنه . هو مكيف ..

ردت مرت عمي ام رشيد .. اي والله هنايله يستاهل  ..

طكنها ضحكه .. يصنفن ويضحكن عليه .. عبالك المضحكه مالتهن .. ليش ماحب جمعاتهن ..

من وره هالسالفه .. ماعدهن غير علان وفلتان .. واني اذا كاعده يمهن كون متصدره القائمه خير او شر لازم يغثني  .. امي مكروهه بينهن .. واني بنتها الفلتانه على كولتهم ..

.. فوك دورتي الي مطلعه روحي نوب حجيهن .. ماضحكت ولارديت .. ضليت بحظن بيبي وغمضت عيني .. بيبي مسدت راسي ..

رفعت عيوني عليها .. لكيتها مبتسمه .. هاا بيبي شكوو ..

:-السانج ولج تادبي .. ضحكت .. شمسويه ..

:-هو انتي خنوسيه  ..لو تحجين جان احنه بخير بس اخنوسيه ..

كلتلها :- مو تشوفيهن .. كل جمعه لازم يقهرني  ..

تحجي على كيف .. وتكلي:- انتي يابيبي متحببين روحج .. منعزله عنهن .. والي تحجي ترديها .. عيب مايجوز ..

:- مو تشوفيهن يحجن على امي مايحبنها .. خما اسكت .. واشوفهن يغثنها ويقهرنها ..

:- امج عدها السان وترد وهاي بينه نسوان حمى انتي شلج لازم  .. من تردين عليهن انتي تكرهين روحج .. ويكومن يضوجن منج .. امج هيه دبر روحها وترد ماهي صغيره ...

:- بس هاي امي .. تشوفيهن كل وحده مصطره بناتها يمها و تحجي على امي .. عبالك اختهن الصغيره مو مرت حماهن حاله حالهن .. وبناتهن يضحكن ..

دمغتني على راسي وحجت بصوت ناصي حتى لايسمعنه .. :- يابيبي اسمعي مني .. عوفي الكبار تحل مشاكلها بحدها لاتدخلين .. امج تفتهم تسمع منا وطلع منا .. لان تعرف نفسها ربحانه .. هيه الوحيده الي براسها خير بيهن ..

لخاطر هيج يضوجن منها .. انتي مالج لازم بسوالف الكبار .. هاي مو اختج .. سلمت وطفرت يم خطيبها .. بس انتي شاده حزامج .. افتهمتي لو اعيد .

ضحكت ..

:- اي اضحكي هو انتي شعدج غير الضحك ..

:- شاسوي لعد .. مايعجبج ..

:- انجبي واسكتي ..

ههه ..

كالت:- سوده عليه ياسر ماشفته شلونه .. ماخلوني اوصل للمستشفى ..

:- اني هم شكد توسلت بس ماقبلو اروح واشوفه ..

:- سوده عليه يابيبي منين اجتك هاي المصيبه .. التفتت على امي وكالتها .. ام جاسم شكال الطبيب على رجل ياسر ..

ردتها والله عمليته الا بالهند .. ابو جاسم كال نشوف هالاسبوعين نقدم المعامله والله كريم ..

كالتها الله يفرجها .. سمعت صوت فتحت الباب جبيره .. سياره بره .. كمت من حظن بيبي اشوف ياسر .. فتحت باب الصاله .. صوات بره .. عمامي وابويا ..
دخلو جاسم و سيف .. ساندين ياسر نزلو من سياره ..

بيبي هلهلت امي تبجي عليه .. نزل كوه سوده عليه .. وجهه تعبان واصفر .. ورجله تخوف .. متروسه بلاتين .. نابته بيهاا ..

من شفته دمعت عيوني .. وكفت يم امي .. فتحوله مجال دخلو للصاله .. امي فارشتله جربايه ومرتبته اله الكعده ..

كعدو .. هو حتى صوت ماله .. بابا حط الادويه يم راسه .. اخو علا علكله المغذي وشده بيده .. هو ساكت .. الصاله انترست ترس .  حتى مالك كعده بعد .. صاحتني مرت جاسم رواء اساعدها بالضيافه..

بنات عمي ممقصرات .. بس هيه من تشوفني لازم تصخرني عبالك الصغيره مالتها .. حظرت الصينيه والكلاصات .. هنه صبن ..

علا واكفه بصفي .. وصافنه .. ابتسمت من شفته صفنتها .. صفنت مجدي باكو فلوسه وحاير بزمانه وشلون يدبر يومه  .. ادري بيها مقهوره على ياسر وكلبها يوجعها عليه ..

تقربت يمها مانتبهت عليه .. تقربت من اذنها وكتلها بسيطه عمليته ترى بابا كال ..

فزت ..هااا ..

:- عمليت ياسر بابا يكول بسيطه وسهله متخوف .. 

:- اي خطيه ..الله يكومه بسلامه ميستاهل ..

ابتسمت :- اي خطيه يكسر الكلب ..

:- شبيج ..

:- ماكو  ..

:- هاا ..

:- اي ..

:- وجع ..

:-ههه .. تحبي الله عليج ..

:-خرب ولج عزززه بعينج لايسمعوج .. هذا منو .. شنو هالحجي ..

:-يسوري اكو غيره ..

:-انجبي هناء عيب هالحجي ..

:-اكول جذبي على الكل الا عليه ماتمشي هالسالفه .. ماشفتي نفسج من كتلج سوه حادثه والبجي البجيتي عبالك رجلج ابو جهالج وهيج تخبلتي عليه ..

ضحكت كالت :- الله يسمع منج ويصير ابو جهالي ..

:-كبر يالعوبه وتوه تصيحين عيب وشنو هالحجي ونكرتي  .. هسه بعتي المستحه ...

:-غير ابيع ثكل وانتي حماتي ...

:-ههه هاي شبسرعه .. تزوجتي وصرت حماتج ..

:- الله عليج خليني باله .. انتي موصديقتي كليله عليه ..سولفي بيه جدامه .. كليله ام بيت وشاطره وحلوه وتعرف تطيخ واداريك تشيلك من الكاع شيل  .. اي شي امدحي بيه ..

:- هههه عمه يالخفيفه اثكلي ادري رايد مره هو لو فلبينيه .. وانتي شنو تسويلي اذا كتله ..

:- اكول لابو فهد  عليج ..

:- طاح حظج .. طلعيني من راس رجال بداعت ابوج الغالي ..

:- كبر وين تلكين منه انتي .. شفايتلي اكله واحد يحبني هيج وكاتل روحه عليه ..

:- منو هذا يحبني ..

:- غير رشيد .. ونبي يحبج بس انتي متحسين بي .. يوم نجيب طاريج على النعمه .. والله يعوف الخبزه بيده ويسمع شنو نكول .. خاف تفوته حجايه تخصج ..

:- صفنت بوجهه .. عليج الله .. عاف بنات عمي كلهن الي يمه .. وجاي عليه .. عمن لكاني على كد ايده وخوش مكفخه .. لاراعيه السان وصوت عالي ولاوكحه ..

:- امداج اي والله .. صدك من يكول عليج بلا حساس .. بس اولها وتاليها انتي اله .. والله متطلعين الغيره وكلنه نعرف ..

:- لاتحلفين بكيفج .. ماطول بابا عايش محد يجبرني على شي .. لا رشيد ولاغيره ..

:- كالنها قبلج وجانن اشطر منج  ..جدي حطج براسه بعد .. وحجايه جدي مترجع .. غيرج  بطلوهن من دراستهن  وكعدوهن بالبيت .. وفوكاهه زوجوهن .. وهالتشوفين كلهن خلفن وسكتن .. عاد انتي يلتمون عمامي وجدي .. ويزنون براس عمي عليج لحد مايوافق .. تدرين بي يحب ابو فهد  .. بس مايريد يكسر خاطرج يكول تكبر و تفتهم وتحبه .. بس اذا ضليتي هيج .. والله تنجبربن وتنكسر ركبج ..

:- اكول اسكتي لااهفج كف على وجهه .. نحسه ..

:- هههه خفتي موو ..

:- لا .. وصدكي حتى مااكول الياسر عليج ولا اجيب طاريج واذمج ذم اليهود  ..

:- لا الله عليج .. اشاقه وياج شبيج .. ولج والله احجي المصلحتج ..

قاطعتنه صوت رواء .. سمعنه وياجن كاعدات تتبسبسن ..  رفعت عيوني عليهاا .. شكوو

رواء :- لا تنترين خفه حلكج ..م تحجن بينجن سمعنه .. شنو عازلات نفسجن وحد عنه  ..

هناء :- ماكو سلامتج .. جنه بطاري الدوام  والمدارس ..

:- بيش تحجن يحظي وهيه امبطله لو جاي تتحصر خطيه ..

اباوع علا وجهه غندب .. :- كتلها على شنو تتحصر خما كلها مثلج تتحصر من ماتنول شغله الي تريدها عيوني ..

سحبت علا من ايدها وكومتها وياي ..دخلنه للصاله عمامي وجدي .. طبيت بستهم وسلمت عليهم .. التفت على ابو فهد.. كتله شلونك خويه ..

كال هلا ..
باوعت على ياسر .. رحت بسته وحظنته حيل .. افيش يالعزيز .. رفع البطانيه كال تعاي .. ضحكت .. كتله لاتتاذه رجلك ..

بابا كله :- يمعود لاتتعور ابني .. تروح تمردك ..

ضحك كله والله مشتاقلها صارلي اربعه ايام مشايفها ليش مااجيتي للمستشفى تشوفيني ..

كتله:- بابا مخلاني ..

رده ابو فهد وين تجي خالي  من كل عكلك .. المستشفى متروسه اوادم غربه وتريدها تدخللها تشوفك ..

كاله افتكدتها والله ..

رفعت البطانيه اني وكعدت يمه حظنته .. كالو لاتعوري .. مارديت على احد .. حطيت راسي على صدره .. كالهم شتعورني وهيه جنه عصفور ..

رفعت راسي عليه كتله .. محد مشتريلي صارلهم سبوع ..

:-ضحك كال يا استغلاليه .. جاي عليه على مشتره ..

:-كتله والله حلكي صاره سبوع مضايك نستله لو جبس ههه نسوني وحارو بيك ..

:- ههههه .. اليوم ادزلج بيد الولد مشتره مال سبوعين .
هه ..

بابا كاله :- شكوو تضحكون ولكم ...

:- كاله جاي تشتكي منكم ..

:- هاا شمسويلها ..

ردت مرت عمي علي ..:-عياره بنات مدلله هاي  ..

ضليت على كعدتي يم ياسر .. ادري راح تبدي ذم بيه ..

بابا كالها :- هاي صغيره .. خلي تدلل شعدنه غيرها .. ابتسمت اله من كال هيج .. الله لايحرمني منك ..يارب ..

ياسر صاح لابن جاسم الجبير معين .. نطاهه خمسه كله روح اشتري لعمتك ..

:- كاله والله عبالي الي ولاخواني تالي يطلعن العمتي ..

يابه فد فشلت فشله .. وجهي صار احمر .. غطيت راسي باببطانيه .. كامو يضحكون ..

كاله جاسم هيه هم جاهل مثلكم روحي بابا جيبليه لاتبجي علينه .. بس طب ياسر شكتله علينه هاي ..

رده ياسر لو ما اني انتو تنسوها بلا اكل ..

:-اي مو خرسه وننساهه .. كافي تتعاملون وياهه مثل الجاهل .  حتى كلاص مي متجيب النفسها .. شوكت تكبر عاد ..

رده عمي علي .. بناتي بكدها مزوجات ومخلفات .. بس هاي تربيه حسن شتترجه منها ..

حديثهم مزعج حيل .. بس ضليت مغطيه راسي .. دمعت عيوني بس ماطلعت .. اسمع بابا يردهم ..

كللهم :-مدلله مالتي مالكم شغل بيها .. الي يسمعكم يكول عدي العشره .. وهاي نسخه الصغيره مال ام جاسم العزيزه .. شلون مااحبه وادللها ..

كاله ابن عمي علي:- هيه شعامه علينه غير ام جاسم وشكل ام جاسم .. خلفتو هالوحيده .. وخلتو العالم تنفتن وتتكاتل عليهاا ..

بابا كاله :- مااطيه غير بس للي يستحقها .. لو مو تتكاتلون عليها ..

جدي كله :- هو اكو غير خيالها ابو فهد ..

رفعت البطانيه اباوع على بابا شيكول بعد ..

من رفعت الغطى سكت .. ضحك كال روح ولك جيب حلويات عمتك شو صفنت ..

كمت من يم ياسر .. ها وين رايحه ..

يم البنات .. كال مالج شغل بيهم .. غمزلي .. ابتسمت بوجهه ..

صعدت للغرفه اشرت ل علا وتعاي .. رقيه طفرت ويانه ..

عمامي بيومها للمغرب رجعو لديالى بقو بس بيت عمي ابو رشيد .. ام رشيد كلبها تعبان وتريد تراجع هنا بغداد .. وضلو ورقيه جلبت وياهم ..

عمي ابو رشيد شهيد من حرب ايران .. استشهد .. وخله وراهه رشيد وعلا و نغم ..

نغم مزوجه ابن خالها .. وعلا بعده مقرر نصيبها المن .. ام رشيد .. انسانه صالحه بمعنه الكلمه ..

مايوم سمعت منها كلمه تغث لو كلمه غلط .. تخاف الله وكلامها من كلبها .. عكس نسوان عمي .. حميد و علي .. عبالك سم .. مرت عمي سلامه شويه احسن صح وكحه .. بس يبقه عمي سلامه كلمته ماشيه ..

باتت يمي علا .. ورقيه جلبت الا تبات يمنه على الواهس ..

اليل كله .. نكرز حب و ناكل شاميه .. كتلهن  مال صعده فوك سطح وناكل ونتعلل هناك الجو بي بروده حلو .. ناخذ بطانياتنه .. والحليب وجاي .. والكرزات ونصعد نباوع فلم لو مسرحيه ...

رقيه :-  كالت .. ولج الجو بارد  ..

:- اي بي بروده بس ناخذ بطانيات نتلفلف ..

علا :-. دنيا ليل يمصخمه خاف يطفر علينه شي حرامي ..

لاولج شيطفر سياج مالتنه عالي ..اصلا دائما اني وياسر نصعد فوك نتعلل .. بس هسه سوده عليه ميكدر ..

كالن ماطول هيج يله .. شلت دوشك اني .. كتلهن انتن سون الجاي وحليب .. وحظرن الكرزات بين مااصعد الدواشك .. واجيب الابتوب هم .. لبست الجاكيت مال التراك ..

شلت دوشك وصعدت .. فرشته بالكاع وغطيته بجرجف .. ادري بيهن راح يترسنه كشور مال حب .. نزلت اجيب البطانيات هم .. شللتهم وصعدت رتبتهم .. بقه الابتوب

نزلت سحبته من الشحن .. صعدت فوك فتحته اشوف اكو نت يوصل لا .. نوبات ضعف .. اكلب بي .. جفلت على صوت كح وراي .. التفتت بسرعه .. لان كاعد اخو علا على صفحه يدخن ..

كتله منو ابو فهد ؟؟! ..

هلا ..

بلعت ريكي من شوكت هناا .؟؟!.

مو هواي .. كاعد بالضلمه ماينشاف منه بس بياض دشداشته ..

سكتت .. كال شتسوين صاعده هنا وتفرشين وتحضرين اجواء .. نوب جايبه الابتوب هم ..

عقدت حواجبي .. كتله اني والبنات نريد نسهر ..

:-ماتحلالجن السهره الا بالسطح .. دنيا ليل انزلن جوه اسهرن داخل الغرفه يله ..

ماجنت اريد اعانده .. وهم ماريد انزل .. :-كتله مانتاخر شوي وننزل ..

:-لااا شيليهن وانزلي يله ..

سكتت .. ضليت اباوع بعيونه معانده ..

رفع حواجبه :-انزلي يله ..

:- مااا  ..

كام على حيلج :- شنو تعانديني انتي ..

:- لاا بس خلينه ضايجات من جوه اريد نغير جو .. وكتلك بس شوي منتاخر ..

تقدم عليه .. شايل الجكاره بيده .  الي اموت منها .. واكرهه الي يشربهاا .. كال شنو هالابتوب لعد ..

باوعت هاا .  نشوف فلم ..

فلميش ..

اي فلم ندور ونشوف ..

شو باله اشوف شنو تتفرجن . ثنه تك رجل وكعد على الفراش ..

ابتسمت هذا شبي صدك عود .. بس لا عباله اني مراهقه واشوف شي مخلل بالاخلاق .. رفع عينه عليه .. اكعدي شبيج تحنطتي ..

كتله شنو تريد تباوع ويانه .. كال شو باله دشوف شنو تشوفن بالنت بهل ليل ..

فهيت بوجهه.. هزيت راسي ..

:-'شبيج ...

:-هاا ماكو  ...

:-لعد ليش تصنمتي فتحتي دشوف يابه  ..

:-هو نريد نباوع لو فلم لو مسلسل قابل شنشوف بهل ليل..

كال :- هااا يعني طخت عندج موو ..

ارتبكت كتله شنو ..

رفع حاجبه مدري شلون فتح الابتوب وكعد يكلب بي .. راح على صور ..

كتله صوري هنا .  ماكو شي ..

رفع راسه عقد حاجبه :- هذا مو مال ياسر شجاب صورج بي شلون تخليهن هنا ..

:- اي مو هو ميقبل يبقن صوري بالموبايل كلي .. حوليهن برام وانطيهن الي احولن بالحاسبه .. حتى لايضيعن ..

هاا .. شتريدين تشوفين .. رديت مادري .. كتله يمكن مسرحيه مدرسه المشاغبين ..

باوع عليه مبتسم تحبيها ..

ههه اي  هواي .. تموت ضحك ..

طلعها بالبحث وشغلهاا .. اسمع صوات رقيه وعلا صعدن يضحكن .. وحده شايله كلاصات الحليب وجاي .. وثانيه الكرزات والحلويات ..

كالت رقيه .. ها رشيد هناا .. شغلها وكعدت اباوع عليهاا .. هو مشغل جكارته خنكتني .. كل شوي اباوع عليها .. خلصت لو بعدهاا ..

هو باوع عليه .. ابتسم شالها ..و طفاهه بالصينيه ..   ضلو يحجون .. اني ممنتبهه .. احبها اموت على هاي المسرحيه تموت ضحك ..

من اشوفها حتى اغص بالضحك .. كالن حليبج راح يبرد .. 

شربت منه شويه ورجعته .. رقيه كالت هاا فصلتي عن العالم شنوو ..

:- كتلها مرسي الزناتي ..  مصيبه يموت ضحك ..

:- كالت اشوفها تافهه .. باوعت عليها متفاجئه .. منو تافهه هال المسرحيه .. اكبر نجوم مصر الكوميديين مشاركين بيها تاااافهه ؟؟!..

هو بس احمد قصه بحاله .. كالت الاسيود قصدج .. ضحكت من كالت هيج .. بقينه نباوع عليها .. مديت ايدي للحليب مالتي ماكوو .. اباوع بالصينيه وينه ..

ضحكت علا كالت شربه ابو فهد ..

كال :- العفو مادري بي مالتج..

:- لاعادي بالعافيه ..

رقيه كالته:-  هاك مالتي اذا تريده ..

:-ردها رحمه والديج .. يله كومن خلصنه المسرحيه جوه .. لملمنه الغراض هو واكف فوك روسنه ..

كال:- افرشلي بدربجن جوه يم ياسر .. نزلنه الفراش ورقيه كالت اني افرشله ..

نطيتها دوشك ومخده ..

فرشن هنه يمي بالغرفه .. بدلن ملابسهن .. بملابس خفيفه مني .. طلعت اغسل وجهي مدنجه على مغسله  ..

فززني صوته كلي بلا زحمه جرجف .. التفتت عليه وراي لابس تراك بيتي طلع بي شوفه احسن من دشداشه  كتله .. هسه ..

اخذت من النضيده وديتها اله .. وخرت البطانيه افرشله.. فوك الدوشك كل شوي ارفع عيوني عليه التراك كاعد عليه عبالك اول مره اشوفه  ..

جيت اضحك على الي بعقلي بس لزمت نفسي .. اول مره اشوفه هيج ..

شبيج ..

هاا ..

وجهج احمر ..

باوعت ياسر نايم .. التفتت عليه .. كتله ماكوو يله تصبح على خير ...

طلعت من يمه طبيت للغرفه .. علا تشخر .. بس رقيه كاعده .. كالت وين جنتي ..

:- غسلت واجيت ..

:-وجهج ناشف ..

:- مو فرشت جرجف ل رشيد هم بدربي ..

:-مو فرشتله اني شو مكلي ..طيني جرجف ..

:-شمدريني جوز مرتاح بالفراش بلا جرجف ..

:-ممم .. اكلج ..

:-هاا .. شلت بطانيه وتغطيت بصفها ..

:-همست هم تحبين ..

:-ههه هاي منو تحب ولج اني ..

:-عجل ابوي اكو غيرنه هناا بس هاي الجوعر الي نخمدت من وكت ..

:- لا وين ماكو هيج شي ، وانتي ، والا اكلج اعرف انتن حتى حب متعرفنه شنوو ..

:-ضربتني انجبي ليش ولج مو بشر هم حبيت بس ماصارت قسمه ..

:- يااا صدك والله شو من اسالج تنكرين ..

:- لا مانكر بس اذا سمعن بنات عمي يفضحني فضيحه خالتها بالكلب احسن ..

:-منو هذا بالله سعيد الحظ

:- واحد شلج شغل بهل سالفه ، يعني هسه انتي ماعدج احد بالج

:- ولج جاوبي بالاول انتي منو هذا والله سرج بير مااحجي اني ابد كولي شوقتيني داعرف عشتي قصه حب يعني ..ليش ماتزوجتو .

:-ياافلك طرج على كيفج وحسج لاطلعي شبيج ..

:- دحجي عليج الله مادام نوم طار وهاي انخمدت تشوخر

:-ضحكت اي والله نامت من وكت خطيه تعبانه بسبب امها ومرضها

:-احجي عاد تريد تضيع سالفه جلبت بعلا وامهاا

:- ابن خالتي ولج اكبر مني بخمس سنوات من جان عمري سبعطعش حجزوني اله وهو تخبل عليه خطيه وانا هم حبيته هواي جان يهتم بيه ويشتريلي هدايه بس سبحان الله توفه ابو  وتاجل زواجنه وراهه خطبني وكال ابني واخذها وابوي هم ماكال لا من شافني راغبته وامي هم زنت وحجت وقنعته

:-وتاالي شصار وياكم

:- الله الوالي حبيبه كلشي ماصار هالكعدتي كبالج وين اولي

:- يااا ولج ليش مااخذج بس لايضحك عليج طلع نذل

:- شوف هاي شنو يضحك عليه غير اخواني يشكو نصين ..بس هو ماعنده عودن يريد يبني فوك بيتهم غرفه وحمام وهو يله يشتغل بعقد بالتربيه وطول سنتين يلملم فلوسهن .. تالي شالهن ونطاهن لاخو يعالج ابنه بيهن الي طلع اخرس وامي ضاجت وحجت لابوي وكلبو عليه

وابوي ضاج من هالسالفه ، تالي دك عليه ورزله وكله لو تداين وتاخذها لو حتى الخطوبه نفصخها ..

:- يااعيني شدعواهم اهلج هيج خطيه غير اخوو

:- عجل اخو يعالج ابنه براسنه خيه خطبه ثلاث سنوات لو غيرنه متزوج ومخلف اثنين بس هو مسربت وشال تعب سنين ونطاهن لاخو ومافكر بيه

:- هاي انتي تحبي وتحجين هيج عليه خطيه والله كسر خاطري شبيده قابل

:- اني ماجذب عليج كلبي وكلني عليه وبجيت بس غير امي اكلت راسي راح تعنسين وراح تبورين وطبيتي ال٢٤ سنه محد ياخذج ونسوان عمي اكلن وجهي لان احبنه تالي سبحان الله بس فسخت منا واني قسمتي صارلها سنين واكفه عبالك حوبته ..

:- اي والله حوبته خطيه زين مامشه عليج بهل سنين فاتت مارجع حاجاج

تافأفت ضايجه :-لاخيه وين باين كارهني كلش بسبب الكلام الي كلته اله وسمعته اله كتله انته ابن فكر وايدك مو الك ومبذر وماعدك غيره عليه من علكتني سنين وتالي ماخذتني وخليت عالم تحجي عليه وتاكل بيه وصفيت ويه اهلي وطلع هو وامه ضايجين لحد هسه خالتي ماادش النه برغم هو خطب وتزوج بس هم بعدهم شايلين علينه ..

:- يااافلك اي والله شهل كلب الي عدج وتحجين وياه هيج

:- عوفج مني مايفيدني شسوي بي اكضي عمري بضيم وهم وعوز ماريد هيج عيشه خيه الحب ميوكل خبز بهل وكت ..

:-شتفيدج الفلوس واني مو سعيده وماتحبين زوجج

:- كلشي بيد الله .ماكلتي انتي عليج بغلات اهلج ماحبيتي احد مااحد فات لكلبج 

:- ههه لا مو حب .. بس اعجاب ..

:- طفرت الله عليج منهوو ..

:-عمه صوتج نصي .. اخو صديقتي .. يخبل شكله يجنن وشخصيته بعد احلى ..
.

:-عدج صوره اله ددادحك..

:-شاسوي بصورته ..

:- يعني ماعدج ..

:- لا والله ..

:- شلون شفتي لعد ..

:- غير اخو صديقتي وبيوتهم قريب علينه ..

:- هو يحبج ..

:- ماعرف مايحجي وياي ولا اني  بس من يشوفني يبتسم ..

:- عجل دوامج شلونه سولفيلي عنه ..

:-تحبين دراسه شنوو ..

:-لا وين يمعوده اني ماصدكت ابطل واخلص ..

:-هه لعد ليش اتسألين ..

:-دراستج مو مثلنه انتو احلى .. دروس رياضه و طلعون سفرات والبنات اشكال .. وتلبسن الي يعجبجن .. وين احنه يمعوده .. المدرسه لعبان نفس .. والمدرسأت بعد اسوء .. وفوكاهه حوامل ويتوحمن علينه ..

:-ههههه .. الله يعينجن .. ترى هيه مو بجمال المدارس .. الحلو تحصلين شهاده لو تقدير يفيدج باجر عكبه ..

عدلت كعدته وحجت بضوجه :-ياباجر يمعوده .. هو باجر همه مقررينه عنه .. شو لبسنه بكيف امهاتنه .. و دراستنه وطلعتنه وطبتنه بكيف اخوتنه .. وزواجنه بكيف ابهاتنه .. يعني باجر عكبه شما صرت اهلي مقرري عني .. وميخلوني اقرر الي اريده ..

:-سكتت اول مره وحده بيهن تشكي وماكالت عادي هاي سنه الحياه .. كتلها يعني انتي مراضيه على تصرفات اهلج .. تشوفين هاي حياتج وانتي حره بيهاا ..

:- كالت اي هيه حياتي بس اهلي يقرروه بكيفهم ..

:- سوده عليه يعني مراضيه هيج يصير ليش متحجين ليش متعارضين .. يمكن يسمعوج ويلبون الي تردي ..

:- كالت يااااع اعارض ليش يمه ترديهم يموتوتني.. لاعيني همه ادره بمصلحتي ومايوم كالو شي الاهل وطلع غلط .. واهلي دائما على صح .. وهاي شوفي امي .. نفس الشي .. وكاعده ومرتاحه ويه ابوياا .

:- لابارك الله بيج .. عبالي عندج عقل .. فرحانه وكاعده اسمعج .. طلع فارغ .. اكول نامي لااجيبج بجف بنص خلقتج .. وامج الي تكولين عليها سعيده .. ابوج اذا عثر بحجاره .. كالها بنت الكلب لمي هدومه وروحي الاهلج .. وهيه صارت جده .. انخمدي يله ..

نامت تضحك .. واني زاد نضره السوء عليهم .. افكار ورثوها لاولادهم هم ولبناتهم .. وبناتهم هم يورثوه لجهالهم وهكذا .. ماكو اي اتطور او تحسن ..

الجهل و العادات الباليه بعدها عدهم .. اولهم زواج .. يكعدون يقسمون بكيفهم . المره تحبل تسعه اشهر .. وتكعد تطلك بساعات واول متولد .

يجي زوجهه الي هو ابن عمها .. يسمي طفل بكيفه وحتى مياخذ رأيها .. والطامه الكبرى من يجي الجد او الجده .. ويسمو همه .. اسم من العصر الحجري .. حتى من تكوله لابو البيان يسجل اسمه .. يستغرب الاسم .. يعوص عينه ويكلك هاااا ..

وهذا كوم والي جاي كوم .. اول مايفتح عينه الطفل .. ان جان ولد يكولون بالخير عليك سندك هذاا .. وان جانت بنيه .. تكول الجده او الجد .. هاي لفلان .. وتعال يفلان بوسها هاي الك .. تعال شيلها بحظنك..

ويحطوها براسه من هو صغير .. لحد مايكبر ويجلب بيها عباله صدك هاي اله .. لو لعبته .. او صارت مالته .. ان جانت البنيه محظوظه .. تحبه .. وتتزوجه وتعيش وياه بس هم جسمها مايسلم من دك الزمايل الي تاكله منه ..

لو جانت متعوسه الحظ .. وتشوفه ميناسبها .. لابشكل ولا بالعمر ولابالتفكير .. تاكل طن كتل .. لحد ماهيه تروح تبوس يده يجي يتقدملها .. وتعيش وياهه على كوللتهن .. موده ورحمه ..

والولد نفسه .. يفتح عيونه على الحب والمراهقه على هالمسكينه الي كالو عليها اله الك ..

ويضل مثل ضلها .. ويسود عيشتها ..على كولت رقيه من قبل الكبار ولازم نسمع . لان ماكو احسن من ابن العم .. وبديرتنه معروف بنت العم لابن العم غير هالحجي ماكو..

الي عبالك كتب بيه عقد بيع وشراء وتسجلت بسمه ..

بس همه نسوا انو اهلي مو مثل عمامي .. ولا اني مثل بنات عمي !!!!

نجمه 🥺😘💜