رواية ثأر مهري منهاا الفصل السادس 6 - بقلم اسماء ديمير

يسعد مساءكم يارب

《《البارت 5》》

#ثأر_مهري_منها

بقلمي "أسماء ديمير "

ثاني يوم الصبح .. كعدت اتحظر للدوام .. لكيت البنات كاعدات ومنضفات البيت .. والله اني اذا اضل اسبوع مانضفه هيج .. البيت يلج .

صح امي مامقصره وهند ... بس مو مثل هذني .. امي حتى خافت على السيراميك لاينشلع .. تمشي وراهن وتكللهن على كيف يمه على كيف هه ..

ابو فهد طالع للدكتور القلبيه  من صبح يحجز .. ياسر و جاسم  طالعين .. يكملون الفحوصات وسالفه سفر يخلصوها .. بابا بالدوام .. يشتغل مهندس بوزاره النفط ..

وشاف امي موضفه وياهه على الحاسبه وحبها وتزوجها .. وضل بغداد الحمدلله .. بس ماخلاه اتكمل ..بس الحلو ماتزوج من بنات عمه جان احنه هناك يمهم .. مجرد تفكير بالسالفه اجفل ..

تريكت وشلت جنطتي .. بنات عمي يباوعن عليه .. انقهر من اشوفهن هيج .. بس هنه سكتن وماكالن لاا ..

غمزتلهن شلوني ..

حجت علا بخوف  .. والله اذا شافج ابو فهد هيج الا يشككها للصدريه عليج .. انزعيها يمعوده ..

اختفت ابتسامتي .. مو صوجج صوجي اني الي اسألج ..
رقيه كالت اي صدك ضيقه بس تخبل عليج .. مطلعتج قالب ..

كالتلي علا مايعجبج حجي الصدك .. بس والله هسه يتخبل ..

:- ليش يمه شمسويه ..

:-دشوفيها شلون حصر من يم ......

انداربت اشوف ..:- لا عاديه اصلا بنات وياي يلبسن اضيك من هيج ..

رقيه كالت :-هاي شنو الفتحات بالصفاح . .

رديتها واني اتلفت على فتحات  ..:- ممبينات مو طوال ترى ..

علا هزت ايدها وراحت يم امي .. تحاول تكسب ود امي بالكت تزوجها ياسر ههه .. 

رقيه ضحكت كالت ماعاجبها الوضع .. رحت للحولي ام رشيد كاعده .. شافتني اشرتلي تعاي ..

رحت يمها بوستني وتمسد على شعري .. كالت يوم الي يصبح هالكمر بوجهه ابني امين يارب ..

:- كتلها توه جنه حلوين ياعمه شجابه بالنص  ..

:-ها ولج تحجين على ابني كبالي .. وين تلكين منه ..

:-لا والله خاله ماجذبتي وين الكه منه ايده والضرب .. والسانه يصلي سب وشتم سويه ..

:-وين شايفته انتي يسب ويضرب يمه ..

:-والله خاله ماطول من جماعه الحجي مزهر هو هيج .. هذا اخويه جاسم نسخه منهم هم ..

امي تضحك .. :-كالتها مايفيد وياهه ام رشيد اغسلي ايدج ..دوريلج على جنه غيرها ..

:-والله حتى لو اغسل ايدي هو شيغسل كلبه هو معاند وهيه هم .. مدري شلون راح تنحل وياهم ..

:-كالتها الله كريم .. بعدها زغيره .. اني كمت كتلهن راح اروح ..

طلعت اتمشى .. لمحت سجى طالعه من بيتهم ..  ابتسمت من شافتني .. ضلت واكفه تانيني اوصل يمها ...

وكفت يمها ..  كالت :-اسحاق هو راح يوصلني تجين ويانه .. كتلها لا بابا ميرضه اركب سياره احد .. بس تعاي وياي هيه خطوتين المدرسه ميرادلها سياره ..

:-هسه اكله واجي .. اسمعها صاحت راح اروح ويه صديقتي مشي  ..

:-كالها منو صديقتج ..

:-هناء ..

:-هاا كليلها اني اوصلكم ..

:-اهلها ميرضون .. يله اروح باي ..

طلعنه نتمشى واني ادعي يطلع واشوفه .. مااكول احبه لا بس شكله حلو حيل يجذب شكد متباوعله ماتشبع  ..

ابيض و شعره جوزي .. ونوب عده طبره يمه والله يجلط كثر ماحلو .. افكر بي وابتسمت ..

سمعت صوت هورن ورانه .. سجى رفعت ايدها سلمت عليه .. التفتت عليه .. لان هو .. ابتسمت لا اراديا من شفته ..

هو هم .. وكف كبالنه كال شلونج هناء ..

همست خجلانه :- بخير الحمدلله ..

:-واني هم الحمدلله تسلمين ..

ابتسمت ..

كال :- ماتجين اوصلكم ..

التفتت على بيتنه كتله :- لا والله اهلي ميرضون ..

:- ماشي توكلن بالله ياله واني وراجن لحد ماتوصلن ..

هزيت راسي ومشيت .. سجى ضحكت .. شبيج .. اخوي يمكن معجب بيج ..

:-انجبي ..

:- والله شبيج ..

كل مايشوفج الضحكه تترس وجهه .. هو نادرا مايضحك لو يحجي ويانه .. ومن تجي سالفه يمج .. يسولف ويضحك ..

مارديت عليها .  هيه منو ماتتمنى اسحاق ينعجب بيها .. شو بس شكله يملخ .. ورزن وهادئ .. الدرب كله متوتره لان هو ورانه ويباوع علينه .. وصلت للمدرسه .. قبل لا ادخل التفتت ..

شفته واكف وينتظر ادخل .. اباوع على البنات شلون وكفن يباوعن عليه ..

هو وكشخه وسيارته العاليه .. نوب لابس ملابس جامعيه .. خلتهن يصيرن ذبان كباله ..

بوكتها صدك ضجت .. بس دخلت ليجوه .. فكرت خاف وحده من هالخفاف تلوف عليه ويصادقها .. همه شباب هالوكت يردون البنيه تركض وراهم .. واني ماعدي هيج شي ..

بس يله هو اذا صدك معجب بيه ماتترس عينه غيري .. وان جان راعي نسوان فاني مااريده شلي بهيج واحد يوميه وحده واني من ضمنهن ..

دخلت للصف وهم كضيتها صفنات بي .. شدعي عليج سجى .. ضليت هيج لنهايه دوام..

رجعت وياهه هم مشي وكضت طول الدرب حجي بي .. واني مااكول لا .. اريد اعرف عنه كلشي ..

ضحكتني من كالت يكرهه الحشرات وزواحف .. يمه فدوه نوب نازك ههه .. وصلت لباب بيتهم .. فتحها هو عبالك جان منتظرنا ..

كال سايحه خدودج من الحر هناء ..

ابتسمت اي والله ضهر حاره ..

:- ههه اصيرلج شمسيه ..

سجى كالته :- اي صير لاختك بالاول لو بس شاطر تصير لبنات العالم ..

:- اجيب الي يصيرلج انتي .. شدخلج بالنص هسه ..

ضحكت  ..

كلي عاشت ضحكه ..

:- يله اروح باي ...

كملت دربي مبتسمه.. توه ارفع راسي ..ابو فهد  واكف بابنه .. يمه انخمط كلبي خمطه .. حتى نفسي تخربط .. وشكله زاد خوفي .. واكف بالباب وحاط ايده وره ضهره والايد ثانيه جكاره..

يباوع عليه عبالك منتظر اجي .. عيوني مركزها عليه .. بلعت ريك و كملت مشي .. نوب صدريه ضاكت لو اني احسها ضيكه .. توه مابيها شي .. لو لان يباوع عليه من فوك ليجوه هيج احسهاا .. نوب احس دنيا جمرت من التوتر ..

والله جنت اشوف بعيونه توعد .. وصلت يمه كلت سلام عليكم .. وطبيت بسرعه  ..

صاح وراي .  تعاي تعااي ..

التفتت عليه .  هاا ..

اشرلي بيده :- انداري باله ..

سويت نفسي ماسمعه :- شنووو ؟!..

:-انداري باله لفي دشوف ..

:- ش.. شتشوف شنوو ...

:-داكلج لفي باله ...

بلعت ريك :- ماا ..

:- عاط بيه لفييي ..

:-ماا ..

:-ها بره بشارع تفرين بجسمج عادي .. ومن اكلج لفي استحيتي وعاندتي ..

سكتت ..

:-تعااي جاي هاي شنوو ..

:-شنوو ...

:-عاط هاي الفتحات شنوو ..

:- شبيهاا ..

:- ولج شنو شبيهاا .. شعر طالع . الصدريه ضيكه جنها مال ك .... و الفتحات واصله لركبتج هاااي اشنوو .. اشنو لبس هذا مال بنات شارع .. محد مربيج انتي ..

جيت انهزم من يمه ..

عتني من ايدي حيل ودخلني للبيت .. جنت احاول افلت منه .. بس مجلب بيه حيل ..

لزمت ايده اريد افكها منه .. دموعي نزلت من الخوف من مدري من الموقف فشله  ..

دخلني للحولي .. ياسر كاعد .. دفعني حيل .. جاسم .. جاي ينطي مي و دوه ل ياسر ..

دفعني عليهم .. كلهم باله اختكم طالعه للشارع بهل شكل ماعدكم غيره عليها انتو .. لو عيشه بغداد خلتكم تكرنون ..

ياسر كله:- شنو هالحجي رشيد .. شبيك ..

:-شنو شبيه ياولوو  .. دحك اختك شلابسه .. دحك لبسها لبس بنت اوادم هاي . 

هناء :- شعليك انته بيه بابا راضي .. من فشله دموعي نزلت اباوع لاخواني متفاجئين بي

.. مالك شغل بيه اخواني راضين .. بعدني ممكمله .. جابني براشدي .. اني ضربني لو تهسترت ..

عاط بي ياسر رشيد شلون تضربها .. مالك شغل بيهاا .. احنه اهلها نحاسبهاا .

:-ولك دشوف اختك لو لا .. دشوف لبسها لبس كحبه ..

عطت بي احترم نفسك .. طفر يريد يلزمني .. ختلت وره جاسم ..

جاسم كله على كيفك يمعود هاي شبيك ..امي طبت من بره ..

كالته:- شبيك خاله شنو هالصياح ..

:-ام جاسم انتي متشوفين بنتج من تطلع .. شايفه رجليها طالعه لو لا .. انتو متحسبون حساب الوادم الي بشارع الي تناظر  عليهاا .. ماتخافون تنخطف من وره لبسها وشكلها .. وشعر ناثرته . هذا شكل بنت بيت باله ..

ياسر .. كله كافي رشيد لهنا حدك زودتها احنه اهلها ونعملها على صح كل ماتكبر تلتزم بملابسها مالك شغل  ..

:- على شنو راضين على طيحان الحظ ..

جاسم كله :-هاهيه يمعود اهدء شنو القصه  .. التفت عليه هاي صدريه ممنوع بعد تلبسيها افتهمتي ..

ماحجيت .. امي اشرتلي تعاي .. خفت افوت من يمه ويرجع يضربني ..

هزيت راسي لااا ..

:-عاط مو امج تصيحلج امشي .. امشي انزعي هذني الملابس وكطيهن بالزبل يله ..

باوعت على ياسر .. كلي روحي لغرفتج امشي ..

:-نتر بياسر لاتايدها ياسر .. لاومحمد اكسر بيها عظم ..

:-نتر بي ياسر كوه لازم نفسه  مايكوم .. شنو تايهه بكيفك هيه تكفخ رشيد مو واكفين احنه اخوتها شو ماتخلي احترام ..

همست اني ..:- اي والله شعلي هو

طفر ..ولج بكيفي .. اجه يلزمني .. طفرت على رجل ياسر ولجمته .. كام يعيط .. اشتلعو اهلكم ..

امي ركضت على ياسر الي ضل يلوب من الالم .. هيه وجاسم .. وهذا بعده واكف يريد يلزمني ..

امي جرتني وطلعتني بره .. رقيه واكف بالباب تباوع .. وام رشيد وعلا بالمطبخ يسمعن .. صعدت ركض لغرفتي لازمه خدي ابجي  .. سديت الباب وكفت وراهه الهث .. .. نزعت ملابس انتر بيهن واعت .. والله انعل ابوك لابو اغلط عليه واشهك  .. لاخطيه عمو الله يرحمه شهل الابن جلب الي عندك ياعمو .  كبر متخلف همجي .. باوعت بالمرايه .. صفحه وجهي حمره .. وخطوط اصابعه معلمه ..

الله يكسر ايدك بجاهه محمد .. شكد حقير ..

مانزلت على الغده ضليت بفراشي متلفلفه فشله من الي جوه شهكه بصدري بعدها مال بجي والله الا اكول لبابا شلون يضربني شعلي هو خلي يحير باخواته مو بيه ..

ادري بعده موجود من صوته الي يلعلع .. من يحجون هو الوحيد صوته طالع .. عبالك عده عركه .. امه واخته و رقيه تغدن ورجعن لديالى .. هو باقي على شنو مادري .. نوب رقيه الحقيره ماخذه دشداشتي وكتبلتلي بورقه .. عجبتني واخذتها ..

العصر سمعت صوت سياره مال بابا .. باوعت على نفسي لابسه بجامه .. عناد بي ..

طلعت تراك ضيك .. لبسته ونزلت بسكوت لا احد يشوفني .. انتظر بابا بالمطبخ.. بس طب دموعي جرت .. وحظنته .. سولفتله شلون ضربني وعتني من ايدي  ..

شوفته وجهي وشلون ايده طابعه .. هو ضاج خطيه .. توه جاي من شغل وشافني هيج ..وجهه نكلب ..

كال :- وينه هوو ..

:- بالحولي يم ياسر ..

:- انتي خما طولتي لسانج عليه ..

:- لا والله بس كتله شعليك بابا هو يحاسبني وضربني ..

:- هاهيه بابا طبي جوه اني احجي وياهه ..

:- لا بابا اخذ حقي جدامي شلون يضربني ..دشوف شكد اذاني باع خدي ..

:- دتعاي اني اعلمه الج .. شلون يضرب هنائي ..لزمت بي  ... طب للحولي .. سلم .. اني مشيت وراهه .. خاتله وره ضهره بس نص وجهي طالع ..

رفع راسه رشيد من بابا سلم .. لمحني خاتله .. وراهه ..

كال :- ها شو خاتله لو تدرين بنفسج غلطانه ..

:-مغلطانه وبابا هسه يعلمك شلون تضربني ..

:-ههه اشنو شكيتيله مني ياولو ..  مو اجي اشلع اذاناتج من وراهه شتكولين هاا ...

جلبت بابا حيل ... بابا كله.. :-ولك شنو تشلع اذانتتها وهيه محتميه بيه .. وهاا شلون تضربهاا ..
ليش هيج ماذي خده تروحلها فدوه .. ولك ..

ضحكت اني ..

:-عجل كيفتي رزلني  .. التفت على بابا .. باله عمي بدينك .. طالعه بنتك هيه وصدريتها جنها فستان مال سهره .. وشعرها ناثرته .. ونوب من توصل قريب منك .. يطلعن رجليها من فتحات ثنين ..

باله هاي صدريه مال مدرسه محترمه .. لو ثوب سهره مال ليل .. جنه وحده من هذني استغفرالله

ابويا كله :-شنو هالحجي رشيد لاتحجي هيج جدامها ..

:-هاا عمي تخاف على اخلاقها .. ومتخاف عليها من ولد شارع من يشوفوها هيج .. الشارع بي اشكال عمي وهيه وحدها تمشي بهل شكل شيصير بيهاا ..

بابا التفت عليه .. :-شنو سالفه الصدريه بابا ..

:-والله بابا هنه نفسهن صداري الي شتريتهن بدايه سنه.. بس يمكن اني سمنانه شوي ..

حجه هو .. :-شنو شوي تريد اطك الصدريه عمي ..

:-لا بابا لاتصدكه بس شوي .. بس حاجي هو فشر عليه الضهر ..

:-هااا ..

:-والله  .. حطيت ايدي على حلكي .. كلي حجايه محلوه واخواني شهود عليه حتى ياسر مارضه واذه ياسر هم داس على رجله ..

ضحك رشيد .. :- لاتخليني احجي .. شيريد يسوي ابوج هسه من تشكيله يعني .. يطهرني مثلا ..

اني شهكت عزاا بابا .

بابا كلي امشي يابه كولي لاختج تصبلي غده امشي .. باوعت عليه مو ضربني هذا ..

:- هسه اطيح حظه مالج لازم روحي هسه   ..

بس اسمع ضحكهم وراي .. بابا يكله ولك رشيد جوز منها لاتخليني ازعل عليك ..

اجيت اشكلي لابويا ياخذ حقي تالي فشلني .. هو محد يكدر للسانه .. لخاطر هيج كلها متنطي بي .. حاشر روحه حتى بملابسي ..

ثاني يوم هو راح .. ودز خبر بيد امي مالبس هذني بعد واذا لمحني بيهن يشككهن ويبطلني .. مو اخته الصغيره ومادري بنفسي ..

امي اخذتني للسوك العصر سحل جابتلي صداري لارج .. شبعت قهر .. كضيت درب ابجي وادعي عليه .. كون عسى مكرم حتى بعد لايوصلنه .. اخواني مالهم شغل بيه .  الا هو يتعنه مناك علمود يتدخل بيه وبلبسي ..

الصداري احسهن مخازي .. بس لعبت بيهن شوي من يم الخصر ..
ياسر ضل كل سبوع مراجعه على رجله .. لحد مااخذه جاسم وسافرو سبوع لايران ورجعو ..

صح بعده يعرج بس احسن من السيامه الي نابته برجله ..

بعد فتره عمي سلامه عزمنه على عرس ابنه معتز  .. اخذ بنت عمو علي الصغيره  ...  اني خلصت متحاناتي وحضرت نفسي ..رواء قبل اسبوع راحت هيه وجاسم ..

احنه رتبنه امورنه ويله .. اخذت جنطه ملابس وغراض لان ادري بنات عمي راح يفرهدني .. ومايخلن عليه شي .. لذلك اخذت كلشي زايد ..

طلعنه صبح ساعه وحده وصلنه .. بوكتها لبس .. بنطرون وياهه شي طويل ..  لان ادري بالقوات مكافحه اليهود الموجوده هناك .. وشعري عفته مفلول ..

درب كله ياسر يغني ماخلانه نحس بالدرب .. صوته حلو ويحب رياض احمد  .. بعد الحادثه الصاره صار اغلب وقته مكتئب من وره وجع رجله خطيه صعبه عليه الكومه والكعده وخاصه حمام نوبات احنه نساعده ونوبات مايرضه باحد يريد يعتمد على نفسه لان ضلت مشكله وتوجعه مارجعت طبيعيه  ..

هند طريق كله تراسل سيف .. ماعرف الحب هيج لو اختي خفيفه كل شوي التفت عليها الكاها مبتسمه نوب متسولف ابد عنه جدامي او لامي كانو معلمها ماتحجي عن حبهم يم احد .. ولا تسولف باسرارهم يمنه تخاف لا ننتقد لو نعيب لو ننصح ..

خفت لا اختي تبتعد عنه وره زواج وتصير نسخه منهم بدل ماتعلمه وتغيره يكوم هو يعلمها ويغيرها علينه  .. درت وجهي عنها من  دخلنه للمنطقه مالتهم ..

تلكانه ابن عمي .. كال العرس بيت عمي علي ابو حسين ..

والحنه بيت عمي حميد كونه هو ثاني بعد عمي علي ..

اني نزلت اركض لبيت عمي حميد .. يم البنات  .. ياسر نزل بحده بس بصعوبه .. والعكازه بيده .. الجنط ضلت بالسياره .. هند طلعت ويه اهلي ..

ماما وبابا وراي .. ياسر راح ويه ابن عمي يم شباب .. دخلت لكيت الامه مكلوبه .. البنات كلها هنا .. ونسوان .. وكله تصيح وتعيط .. جيوش من الناس والنساء بكل الاعمار والاشكال والالون ..

لمحت علا .. اصلا محد انتبهه عليه من دخلت .. ملتهيات يحفن ويحظرن .. وناس بالمطبخ تطبخ .. وناس تنضف .. وناس تصيح شعري ورجلي .. هند تلكنها اخوات سيف المزوجات هيه وياهن ربع صايرات ..

رحت على علا سلمت عليها .. اجت رقيه باوستني .. كالت شجبتي وياج ملابس ..

:-كلشي ماجبت واذا مديتي ايدج على ملابس اكسرها والله ..

:- شكد خبيثه ونحسه ..

:- نحسه بعينج ولج .. دشداشتي شلون تاخذيها بدون متكللي ..

:- هههه والله عجبني لونها نوب مارونيه تخبل ..

:-كلبه مره ثانيه كليلي ويله ترى مااحاللج واواهبج ..

:-ميخالف بس هسه شنو جبتي وياج الله عليج ..

:-جبت زايد مناقص .. من اصعد الجنط اشوفج .. هسه جنطه بالسياره ..

جرتني من ايدي تعت :-دمشي نجيبها باجر الحنه يادوب انلحك نحظر شعرنا و جسمنا ..

:-هههه هذا الحجي كولي النفسج اني مجهزه نفسي ياماما ..غمزتلها ..

:- لا الله عليج .. ليش مااجيتي هنا على الواهس ..

:-لاع استحي شنوو تردين انزع جدامجن ..

:-لا عيني استحي حقج .  بس ماتستحين اطلعين شعرج ..

:-شعر شعلي بالنزع ولج ..

:- اوو دمشي نجيب الجنطه الله عليج ..

جرتني من ايدي و اخذتني لي بره .. كتلها المفاتيح عد بابا .. وهو يم بيت عمو علي ..

كالت امشي نسلم ونجيبهن .. طبيت للبيت نفس الهوسه واكبر هم .. لان ولد عمي هنا والجهال .. وكله ملتمه يم بيبي وجدو ..

ادور على امي ماكوو .. وبابا هم .. رحت لغرفي ببيبي .. سالت كالو بالحولي موجودين ..

طبيت خلق الله كلها مجموعه .. سلمت وباوست عمامي وجدو .. رحت يم بيبي حظنتها .. وبوستها ..

ريحتها شكد حلوه .. ريحتها حنينه تحسها دافيه .. كالت ليش ماجيتي سلمتي عليه ولج ..

كالو طلعت تركض لبيت عمها حميد علمود البنات ..

ضحكت كتله :- اي والله لخاطر علا ورقيه .. جدي كلي شلونج جدي ..

رفعت راسي عليه .. ابتسمت .. الحمدلله بخير جدو  ..

:- ليش محاطه وصله على راسج جدي كبرتي بعد عيب ..

سكتت ماحجيت .. بس ابتسمت وباوعت على بابا ..

رده بابا كله يباوعلي :- بعدها تكبر شوي وتلبس من وحدها .. ماجبرها على شي .. الحجاب يلبسنه بقناعه ..

:- كله مايلبسنه من كيفهن هذن .. مو اختها لبسته .. مو هاي بنت علي مو باجر زواجه .. بشنو هيه اقل منها .. لاتصغر البنت وهيه جبيره بعمر زواج .. افرض عليها تلبسه بوياا ..

:- الحجاب هيه تلبسه بقناعتها حتى لا يجي يوم وتنزعه لان ممقتنعه بي .. ابتسم يباوع بوجهي .. اعرف الي عدي تفتهم وتعرف الله فرض الحجاب حتى يحمي البنت من ناس وهيه انشالله تلبسه من ذاتها ..  ضحكت اني  من كال هيج .. اكيف من يدافع عني ..

:- خربها خربها بسوالفك .. البنت بطول اخوانها ..

:- لاجدو اكصر والله .. كتله هيج وضحكت .. جديتي ضربتي على راسي .. انستري ولج ..

:-شمسويه ..

جدي كال:- تخلص سادس وياخذها ابو فهد  انشالله .. وتلبس الحجاب .. هذا رشيد مو حسن ابو الدلال .. ماعده وحيده وصغيره .. تلبسي وتكعدين وسكتين ..

ماحجيت بس وجهي انكلب ..

اجت عيني عليه .. لكيته وجهه عادي منتظر ردي ..

. احس عيوني غرغرت بالدمع .. بابا كله ولا هاي .. زواج ماتزوج الا تلزم شهاده وتخلص .. وهم لازم توافق وتقتنع ..

جديتي كالته :- شنو يمه .. غير البنت لذاك الوكت تبور من ياخذها بعد ..

كالها :- شتحجين حجيه بنات العالم كلها تحصل شهاده وتزوج .. الا بناتنه بعدهن جهال وزوجناهن وخليناهن يخلفن .. وكلشي مافتهمن .. حتى عقلهن مو كامل لحتى يعرفن يربن .  جهال ومخلفات ويربن جهال .  شلون تربيتهم تصير ..

جدي كله .. :-شبيها تربيه حفيداتنه .. هاي لان نريد الهن الستر ونريد مصلحتهن .. غير يربن بيت رجلهن حتى ميتعبن باجر عكبه .. تكبر على مايه وعلى الي يريده رجلهاا ..

كله:- اي صح حجي حجيك تربه على مايه وعلى الي يريده .. عقلها بعده فارغ .. ليش ماتتعلم وتكبر وتثقف وتربي جهالها احسن تربيه .. ليش ماتحصل شهاده وتساند رجلها وتتفاهم وياهه .. لو لا يكللها يمنه تمشي يمنه .. ويكللها يسره تمشي يسره ..

يعني مسيره مو مخيره .. مااخلي بنتي هيج اني .. الحياه نعيشها مره وحده وتريدني اخذها منها .. لا يابه الله نطاهه الي امانه اصون هاي الامانه اني ..

ابو فهد :- كله الله كريم لهذاك الوكت .. مو وكتها هالسالفه .. مدنج ويحجي .. احسه ضاج .. لان يفر بالسبحه حيل ..

عمي علي كله:- شوكت لعد .. انته جاي تكبر لو تصغر .. مو حسين بكدك .. شوف تزوج و صار عده اربع  جهال وانته بعدك اتاني تزوج يابه اغاتها تخلفلك بسنتين ثلاث جهال  .. انته تنتظر هاي لو عمك يقبل ينطيها الك ..

عمي حميد حجه .. يابه ابو فهد تزوج ياولو ابن اخوك يرادله اخي يشيله ويسنده .. خما اضل على فهد هم هو مسكين وحيد .. بين ماعامر يطيك بنته انته مزوج ومخلف كوم جهال ..بناتنه كوم ..تخير منهم وكبعها واخذهاا ..

رفع عينه عليه .. باوعت عليه .. حط عينه بعيني  .. دعيت من الله يكللهم ماريدها وراح ازوج غيرهاا .. هاي ما وراهه شي ينفعني  ..

رد عليه .. ونعم منك عمي ومن بنات عمي .. ليش اكو احسن منهن .. بس انا ناوي اناسب عمي حسن وعمي حسن وخلفته يستاهل ننتظر لاجله  .. نفس ماهيه غزيز حسن .. هاي عزيزه كلبي تصير  ..

لو كافخني براشدي ولا هالحجايه .. ردت الكاع تنشك وتبلعني  .

النجمه يعمري 💜وياريت تشاركوها مع اصدقائكم ساعدوني بنشر القصه😘