رواية ثأر مهري منهاا الفصل الرابع 4 - بقلم اسماء ديمير

《《البارت 3》》

#ثأر_مهري_منها

بقلمي "أسماء ديمير "

شبيج متعرفين ادكين الباب .. فززتيني عبالي امي ..

اذا ممسويه شي غلط ليش تفزين ..وتخافين من امي ..

ممسويه شي غلط .. بس اعرفها ماراح ترضه على الي اسوي ..

بس حجيها صدك هند.. شعرفنه عنهم وانتي موافقه حتى لو عمامنه .. بيئتهم تختلف عنه . احنه منعرف نعيش هناك..

لوت حلكها .. وحجت معاجبها كلامي  ..:-  لج شبيها عيشتهم .. شو بيوتهم بكد بيتنه مرتين .. وعدهم بساتين وخير من الله .. وبس جمال الطبيعه يفتح نفس على دنيا ..

حجيت وياها :- لج اي جمال الطبيعه تحبي ساعه ساعتين .. يوم يومين .. مو طول العمر .. هاي عيشه للابد هناك .. بعيده عن اهلج .. شلون تكدرين تعيشين بعيد عن اهلي وعن بيئه الي تربينه بيها

:- الي يسمعج رايحه للمريخ مو ساعه زمن واكون يمكم ..

:- ودراستج شلون .. هم تعوفيها .. انتي تعرفين ماعدهم بنات تكمل .. حدهن متوسط ويبطلن ، وين انتي وكليتج،  عبالج يخلوج بكيفج ، كلها تدخل بيج عمج ومرت عمج ويمكن حتى ولد عمج ..

:- لا هو كلي اني راضي تخلصين كليه .. احب زوجتي تكون خريجه مثلي واوديج بيدي واجيبج  ... بس تعين ماكوو.. اريد تتفرغين الي ولجهالنه ابتسمت فرحانه ..

فهيت بوجهه هاي عايشه احلام ورديه وياه :- ياحبيبي تتعبين وادرسين وماتتعينين .. ولج شعاجبج بيهم .. الكليه متروسه شباب اشكال والوان ومثل عقليتنه .. شوداج على ناس عقده وعيشتهم صعبه حيل ..

تمددت بفراشها على ظهرها  .. وتنهدت كالت الحب خيه الحببب ..

شهكت :- ولج يمعزايه حبيش شلحكتي تحبين انتي ..

:- ولي ولج صارلنه اشهر واحد يعرف ثاني لحد مااجاني للكليه وكلي احبج بنت عمي ورايدج  الي ..

:- يااا عزااا ..

:- وجع لا تسمعج امي .. شبيج كبيتي .. هو غريب هو ابن عمي واني عاجبني .. شو بس طوله بعشر زلم من الكليه .. ونبي يخبل .. وشخصيته دمار .. كلبت نفسها على بطنها ..

كالت :-  وين اكو واحد يجي يصارح وحده ويكللها بالحظتها ازوجج واريد خمس جهال .. واريد تسويلي يوميه باميه لان احبها .. ومساج بليل ..

صافنه عليها وعلى كلامها وصفها .. عبالك عاشكه ولهانهه من سنين .. ياربي سترك وعافيتك .. وقدم بي الخير الها .. لان امبين الحجي ميفيد وياهه .. وقافله عليه وتحبه ..

ثاني يوم صبح امي لكطتها بالمطبخ دك رزايل ونصائح وتهددات اذا وافقت وحاولت تستعطفها انو متتركنه .. اجتها بكل طرق .. وهاي ساكته وترد ابن عمي مالكه احسن منه ..

ولج ابن عمج ماراح يكابلج طول اليوم يفزعلج من امه واخواته اذا ندارن عليج .. والله لحتى متلحكين تحجين حرف اذا هدن عليج...

تحجي مرتهي وتقنع باامي :- يمه هسه اني مزوجتهن لو مزوجه اخواته وامه .. اذا كلش كلش ضاكت بينه وحجج طلع صح نعزل ..

نترت بيها :- لا مو هيه العزاله هينه ياعين امج .. ولج هذول مو حسن  وياخذ مرته ويطلع علمود راحتهم .  جان طلع اخو الاكبر منه .. مو مخلف اربعه وبعده يم اهله .. وبعدها مرته تكعد من فجريه تخبز سفطت خبز وتالي متكفي وترجع تخبز المغرب حتى بطنها مشابعتهاا .. تعرفين وين تردين تشمرين نفسج لو لااا ولج بس شغل البيت يسكطج لوحده ..

:- يمه سيف غير سيف مثقف ويحبني ..

:-.. ولج بس تصيرين يمه يصيرلج نسخه من اهله .. ينسه الحب ووعوده  .. لج متاخذين الحجي .. ماطول باولها ارفضي لاتتورطين يمه .. ترى والله عيشتهم متراد.. جان عاشت القبلج عدهم .. يراد بنيه السان و كحه خما مثلج جنجن دجاجه مصلحه ..

:- يمه والله الولد خوش ولد وشاريني .. هسه اني شعليه باهله .. ولاتنسين جدي طلبني من ابويه يعني عيب نرده .. وحنه كوه تصالحنه ..

:- اي اي انتي طلعي حجج حتى تصير هالزواجه .. بس اني بعد نصحتج وانتي بكيفج .. لاتجين بعد كم يوم تتبجبجين من وره اذيتهم الج .

اني صافنه عليهن .. طلعت هند من المطبخ .. وضلت امي ادردم . امي حجيها صح وحقها .. العيشه يمهم متراد . شودي .. بنت مدينه ومدلله لريف وناس عقد ..

بس هند امبين الحب مأثر عليها وعامي عيونها .. وعارف شلون يقنعها ..

بيومها بابا سأل هند على قرارها .. وافقت .. بعدها امي وابويا ماكدرو يحجون شي ..لان امبين بوجها واصرارها هيه تحبه .. بس بابا كال .. نسوي خطوبه .. وبعد.متخلصين كليه تعقدون .. وره سنه زواج احسن .. حتى تتفاهمون وتتعرفون اكثر ..

دك بابا على جدو نطاهه الموافقه وعن قرار بتاجيل العقد وزواج بسبب الدرسه ..

من خلال كلامه تبين جدي معترض ومحاول وياهه الزواج يصير بس تخلص هالسنه وبابا رفض وضل يماطل ويحاول يتفاهم وياهم ..

كله نجي ونتفاهم احسن .. الخطوبه قرر جدي يسوه يمهم لان هو جدها مثل ولي امرها .. وراح يخطبها منه .. وبابا ما كال لا .. برغم من اصرار امي تنخطب من بيتنه بس بابا خجل يرفض طلب جدي ..

خصلت اني متحاناتي .. ورحنه لديالى .. اباوع امي ميته قهر والوجهه مطعون احمر  .. عكس هند الي طايره من فرح.. وضحكه مرافكتها ..

صارلي اشهر مرايحه الهم .. ومشتاقه ل علا ورقيه .. وصلنالهم .. تلكتنه بيبي بهلاهل وجكليت .. عبالك اليوم العرس ..

لكينه البيت هوسه من العالم كله تحظر .. احنه جايبات حجاتنه ويانه وكل شي يلزمنه ..

بليل صارت الخطوبه بيومها لبست هند فستان طويل .. واني هم لان الكل موجود .. عمامي ولدهم وعماتي هم .. وعيب منهم .. بيت عمي ابو رشيد .. اجو اخر ناس المغرب كلش ..لان ام رشيد مو زينه .. وعلا ضاله يمها .. شكد طيبه هالانسانه حتى حس مالها وفوكاهه صحتها على كدها ..

كاعدين كلنه .. وعمي حميد حجه و طلبها من جدي .. جدي كله من بعد موافقتها وموافقه البنت  كبع واخذ .. تعالت هلاهل .. والاثنين مستحين وخجلانين .. ههه اني من يمي اخذت على روحي وستحيت  ..

. انتبهت على بابا الي مدنج ويريد يبجي .. احنه عزيزات عليه .. ومن كثر معزتنه ما كال لا لهند .. رغم زواجه مو مقنع بالنسبه اله .. بس كال هاي حياتها هيه .. واختارت الي تريده ماكدر اجبرها تعوفه وبعدين تلومني ..

عمي علي ابو حسين .. كال ماطول احنه كاعدين اني هم اريد اخطب ليزن مره .. حتى يصير عرسين بدل العرس الواحد...

جدي كله كبع واخذ .. جدي طبعه صعب وحتى مياخذ رأي احد من ينطي بنات عمي .. انقهرت على الي راح يطيها هسه ..

:- كله غير تعرفها منهو ..

:- كول واطلب واحنه ناطين .. عجل اكو احسن من ولد العم ..

:- لا اني اريد اطلبها من حسن .. لان بنته هيه ..

كله التفتت على بابا .. كالهم .. توه انخطبت بعد ماعندي بنات للزواج وشلت هههه .. صفك بيديه ثنينهن  ..

:- لا يابه عدك هاي الواكفه حدك.. هناء مو عمي لو غلطان بأسمج ..

اني فهيت بسد بابا ..عليه عموو .

ضحك كال اي عمي عليج .. التفت علي بابا بسرعه .. كله اي حسن رايدها ليزن .. شتكول .. حتى نقره الفاتحه كلنه ..

بابا :- كله شنو هالحجي علي وينها وين زواج هناء بعدها جاهل جاي تحجي .. بنات اخوك كومه اخطب منهم ميردوك بس هناء ماانطيها .. بعدها صغيره ..

:- ياصغيره وانا اخوك .. مو هاي روان بت سلامه بكدها ومخطوبه ..

:- اي خويه هاي بنت سلامه مو بنتي .. اني هند واشوفها بعدها صغيره على الزواج .. واريد تخلص دراسه ويله ازوجها .. عاد هناء هاي كلاص مي متعرف تجيب النفسهاا ..

:- شلون حجي يابه هذا ..نخطبها و خلي تخلص سادس وناخذهاا ..

جدي:- كله لاا ابو حسين .. مو اليزن راده انا هاي ..

التفت عليه المن حجي لعد ..

التفت جدي على واحد كاعد .. كله الابو فهد  رايدها .. ماتلوك الا ال رشيد هاي ..

اباوع عليهم يقسمون وينطون بكيفهم.. ولاعبالك اني كاعده ولاا بابا ..

عمي من سمع جدي حجه هيج كله بكيفك حجي الي تشوفه .. انته ادره بمصلحه الكل ..

بابا كاله :- ماانطيها حجي كتلكم صغيره.. هاي صغيره .. شلون انطيها الرشيد الي بكد جاسم .. لو مزوج جان هسه جهاله بطولها واظلم بختها ..

:- مو بل عمر وانا ابوك .. رشيد رجال حوك لو تفتر دنيا ماتلكه احسن منه .. رجال اخو خيته .. مايعيبه عمره ترة..

:- ونعم منه اعرف كل زيناته وليدي الثالث هذا بس حجي صدك تحجي .. هناء ماانطيها بعدها طفله .. توه خلصت متوسطه .. شجابها على زواج ..

:- وانه كتلك انطيها هسه .. حالها حال اخته تكبر شوي وانطيها النه .. لو بنات عمهن بكدها وتزوجن .. بس ماريد اقهرك عليهن ..

مادري شلون طلعت من الحجايه .. بس من رهبتي لحجيهم .. عبالك راح يزوجوني بكيفهم بدون اذن لو سؤال .. حجيت همس من خوفي ..

كتله بس اني مموافقه جدو .. شنو ازوج اني ماريد ..

ضحك كال شوف هاي حجت .. ولا وحده من بناتنه تجرات تكول لاا .. وبنتك الي تكول عليها صغيره تجرأت لاتخاف ابني هاي هيه ينخاف منها .. وكول مزهر كال ..

بابا باوع عليه .. كتله بابا اني ماريد ازوج .. شنو بكيفهم .. هز راسه وسكت ..

قرو فاتحه سيف و هند .. ونص فرحان ونص زعلان .. ام حسين معاجبها .. والعرسان طايرين .. بيبي وجدو فرحانين .. لان ضمنو احفادهم سوه .. وماكو شي يفرق الاخوه بعد ماطول الابناء توحدت .. وناس اخذت من ناس .. بس بابا جان الوحيد ممطي ومماخذ وهسه نطاهم هند ..

على سيره هند عاشكه ولهانه .. ياسر ماخذ ركن يم بابا ومبين عليه العصبيه .. على حجي جدي .. علا جلبت بيه .. على راح تصيرين جنتنه ..

اباوع ام رشيد .. مره ونعمه المره .. لازمه سبحه وتسبح . وجهه يضحك وبشوش ماعرف ليش حبيتها .. رغم سمعها لحجي جدي بس ماحجت ولا كالت شي ..

رقيه جرتني كالت امشن نطلع للحديقه .. بنات عمي ابتعدن عني عدا رقيه و علا اخذن زاويه وكعدت يسولفن ويه هند . اني اصلا طبعي جاف و مو اجتماعيه .. 

طلعنه كعدنه بره بالحديقه ويانه ماعون فواكه فرشت رقيه بالكاع دوشك وكعدنه .. حط على ماعون على ثيل وكالت اكلي ست حسن بعد فتره نخدمج بعرسج

:- وييع كلت مازوج بعدني صغيره ..

ضحكت رقيه ..:- لا مو هو بكيفج جدي خلاج بعد هنا اشرت على راسها عمامي كلهم مايكلوله  لاا

علا كالت :- انجي رقيه شبيج خوفتيها ..لا والله ترى جدي طيب حيل ويحبنه .. ترى حتى اخويه حباب والله ونشمي وين تلكين احسن منه ..

:- هاي شبيجن والله ماخذ هنا حتى لو عمامي وجدي اصرو بابا ميجبرني واني ماريد ازوج هنا

رقيه كالت:-  هااا ليش شبينه احنه ولج ليش ماعاجبتج عيشه شو ناس والبنات غرب تتحصر علينه وعلى ولدنا شبيج تبطرتي

:- مو تبطر والله بس اني ماعرف اعيش بعيد عن اهلي ولا اكدر اطلع بعيد عنهم

علا ..:- هاهيه حبيبه خلي كلشي لوكته جوز تغيرين رايج وانتي الي تردي هههه

كملنه سوالفنه عنهم علا تحجي عن امها واخواتها واخوها طلع شايفني ويعرفني هوو..

سألتها .. ليش هو وين شايفني ولج .

:- من اجتي قبل كم شهر ولج سالني عليج ..

:- كولي والله ..

:- والله شبيج . واني رحت سولفت لامي ..

تنرفزت من جديتهن بالموضوع ومكيفه وتسولف .. بس اني والله مموافقه شبيج تضحكين وتسولفين .. عبالك باجر عرسي شو اخذتنها صدك شنو سالفه هيج تيهه بدون راي ولا رأي اهلي  ..

علا :- انجبي ولج .. منو انتي وترفضين رشيد ترحيله فدوه لاخويه ..

هناء :- كبر اي والله ليش اروحله فدوه قله زلم يمه ..

علا :- ليش هو مثل الزلم .. بس طوله عدال الف زلمه .. بس صوته يجيب تايهه .. حتى جدي يكول ماكو مثل رشيد ثنين ..

هناء :- على كيفج راح اطيرين من الجذب .. شالت المخده تريد تضربني عفتها وطفرت ونهزمت .. طلعت ركض للمطبخ .. تفاجئت بأخووعلا صار كبالي .. من شافني وكف .. باوع عليه .. ورد دنج .. صاح بصوت . علاااااا ...

طلعت علا تركض .. من شافته ضحكت .. وكاله هلا كلبي هلا بيك .. حظنته .. مافتهمت هذا منوو.. عفتهم وطلعت ..

طبيت للصاله يم امي .. كاعده هيه وبيبي وام رشيد وعماتي .. شويه وطبت علا كالتها يمه اجه رشيد يله نمشي ..

بيبي كالتها :- عجل .. خلي يدخل يسلم على مرت عمه ..ليش من الباب جاي ..

راحت وطب وياهه .. اني اباوع عليه .. هو هذا ابو فهد .. ولا مابي اي صفه شبابيه .. شو لابس دشداشه ويع .. وغتره  .. عقدت حواجبي من شفته .. والله جيت ابجي .. بربك جدي هو هذا تريدني اخذه .. والله لو ياخذ
بدريه ام المخظر بسوك يمنه هواي عليه  ..

ضليت اباوع عليه بشمئزاز سلم على امي وبيبي وباس راسهاا .. دنج على امه باسها وحظنها ..

. رفع نضره .. شافني اباوعله بستنكار .. هو وجهه جامد مبي ملامح ..

بيبي كالته .. اكول يمه حاجتك مقضيه انشالله .. ماطول جدك وراه .. ميكون خاطرك الا طيب ..

التفت عليها .. ونعم منج ومن جدي .. عجل نترخص احنه ..

بعد وكت جده .. خليك ماشفناك صارالنه بالاسبوع مفتكديك .. ادري هالسفر شلك بي خلي غيرك . يودي الحلال .. عايف امك واهلك شلك بهل تعب ..

:- حلالنه حجيه مااخلي احد بتصرف بي بكيفه .. عينك على مالك... اذا ما مشيت وراهم وتابعت نص حلالي يضيع .. وهذا تعب ليل وشكه نهار اخلي بيد ناس الغرب ..

:- اي يجده باجر عكبه ..تجيك المره .. غصب عنك تعوفه بيد الغرب .. وتبات يمها .. عود ذكرني

ضحك كالها :- اني الحبيبه ماخلتني اعوف حلالي بيد ناس ..باوع على امه ..

امه كالته .. اي صدكت والله .. بس من اتمرض تعوفه وتكعد تبجي يمي ..

ضحك كالها وفر بسبحته :-  ليش شاسوه من دون نفسج اني والحلال .. نغديلج فدوه احنه .. بس كومي يمه الله يرضه عليج لان تعبان ..

بيبي كالته بعد وكت يمه وين رايح ..

:- باجر انشالله امر عليج صبح .. هسه تعبان واريد اريح... من البارحه منايم من وره البضاعه .. التفت على امه كالها يله احنه نتوكل ..

توجت على ايدها تريد تكوم .. نطاهه ايده ورفعاا .. كاده كود ومشه بيها ..

بيبي كالته مودع باله يمه ..

اخذ امه وعلا وطلع .. والله هذول اكو بعقلهم شي .. بكد جاسم ونوب عدال جاسم عشر مرات بالضخامه ويردوني اله .. والله ظلم ..

اجاني صوت بيبي .. وهيه تكلي .. ها بيبي شفتي ابو فهد شلون رجال .. رجال حوك ماشالله عليه ..

اي بيبي الله يطول بعمره بكد ابوياا خطيه ليش مازوج وخلفله طفل يشيله بكبرته ..

امي كوه كتمت الضحكه ..

بيبي كالت :- ولج يخايبه شنو بكد ابوج .. شبي زينه الزلم هذا  .. بس هو متعوب يرادله مره ..  تنسي ضيمه ..

مرت عمي حميد .. كالتها :- حجيه شلج بالحجي ويه المدللات يردن رجال مسرح والدهن تارس شعره .. شلج بيها اخذيله وحده من بنانتنه .. ينشد بيهن الضهر ...

ضحكت اني :- كتلها ويييع عمه شنو دهن قصدج جل .. وشكو بي حلات الرجال المرتب وشعره يلمع من نظافه  ..

بيبي تخبلت ..:-  ياا الماتستحين ياجليله الحياا .. اتجبين  الزلم الفاهيه ب رويشد ترحيله فدوه اي والله .. 

:- اي بيبي زوجي يمعوده من هسه .. ماطول بي روح ترى بعد كم سنه مابي حيل زواج ..

امي ماكدرت تكتم اكثر طكتها ضحكه هيه وعمتي نشام .. بيبي شالت العصا تريد تضربني بيهاا .. نسوان عمي تخبلن كامن يحجن .. على شلون تحجي هيج ماتستحين .. وين اكو منه هو .. بس جدج رادج اله ولا انتي ماتستاهلينه .. لو علينه ننطي من بناتنه ..

خليتهن يشعوطن وطلعت اركض ..

ضلينه يم عمامي يومين ورجعنه .. سالفه رشيد اخذتهاا ضحك وشقه .. وبابا هم .. بوقتها انسد الموضوع ومحد فتحه .. زواج هند تاجل لحد ماتخلص سنه ثانيه بالكليه ..

عكس عمامي .. الي ماخذين الشغله جد .. وخاصتا سالفه ياسر يردو ل علاا .. ههه .. وهيه هم مصدكه خطيه ..

بابا من نوع الي يكول عوف سالفه تبرد واحجي .. من تحجيها حار بحار يصير زعل وعناد .. خلي يمر وقت ونكول لا ..

هند ضاله مخابرات ويه سيف ويجي نوبات لبيتنه يشوفها وتشوفه .. 

نبده دوام وداومنه ثنينه ..الحلو برابع ..سهل ... صح علمي بس اشوفه سهل ..مو مثل بكلوريا طيحت حظي ..

عمامي كل فتره يجون وعمتي نشام هم .. وجدي بين مده ومده يجي .. واحنه هم نروح .. الا اني وياسر .. نتهرب من قسمتنه سوده .. بحيث من نكعد نسولف نخرب ضحك .. كون علا ورشيد اخوان .. وثنينهم ميلأمونه ..

لحد مافديوم طلعنه للدوام ..بس من رجعنه .. شفت سيارات باب بيتنه ماعرفتهن المن.. بيهن بالخمسه ..بس كلبي عصرني حيل ..

كملت دربي ركض للبيت .. توني اطب تلكاني هذا رجال اخو علا ..

وجهي مصفر من الخوف .. باوعت عليه وعلى سيارات ..

:- كال شبيج يابه على كيفج ماكو شي لاتخافين .

:- ليش هو شكو ..

:- دشي جوه يم امج وتعرفين .. يله دشي ..

طبيت ركض .. اسمع امي تبجي ..خمطني كلبي .. كبل دمعت عيوني .. تلكتني رواء مرت جاسم .. كتلها شكو ولج ..

كالت طاكه عبوه قريب سوك .. ومحل ياسر داعي طحين واخوج هسه بالمستشفى  ..

عطت يمااا .. ماعرف شلون اوصل للصاله يم امي .. من الهبطه حتى رجليه ثكال .. طبيت اركض على امي ابجي .. لكيت امي ومرت عمي سلامه يمها وبيبي يبجن ..

طبيت مهبوطه كوه احجي حلكي يمتمت  :- يمه شبي شبي ياسر ..

:- مابي شي جده لاتخافين بالمستشفه .. مابي شي ..

امي ماتحجي بس تبجي .. خوفتني بالزايد .. هند حاطه ايدها على حلكها وعيونها حمر ..

بيبي كالها خوفتي البنيه حسنه .. لاتفاولين عليه .. جايه سلامات يمه ..

لليل اجه جاسم .. وجهه مزرك من الهبطه والخوف .. وكال مابي شي .. سالفه سهله ..

حلفته امي اذا متاذي .. كالها والله بس رجله جايتها شضيه وطلعوها اله . بس يردون حالته تستقر ويطلعو..

صاح هند اطلع ملابس لياسر  .. جلبت امي تروح وياهه ماقبل . كالها مستشفى متروسه زلم .. وابوي ميرضه .. كم يوم ونطلعه ..

ضلو يرحون ويرجعون للمستشفى.. جاسم هو الي يبات ميخلون بس مرافق واحد والكل بره مستشفى

..فوك خوفنه على ياسر وقلقنه ومحد يخلينه نروح نشوفه بحجه مستشفى متروسه زلم وعيب .. نوب عليه اخو علا بالطالعه ونزله يخزرني .. ولازم اسمع نصايح بطريقه غير مباشره عن لبسي الغير محتشم ..

بيبي من جهه وعماتي من جهه .. وهو من يشوفني لو يخزرني لو ينتر بيه ..

ضليت الفتره كلها مكتئبه من وراه .. هو هم امبين على اعصابه كاعد . لان لبسي معاجبه ..  كل شوي كلي لبسي حجاب لو ملابسج ضيكه .. لو ليش لابسه بجامه .. وبيبي تأيده .. ماكدر احجي لبابا واشكيله .. لان تعبان من وره ياسر .. هو الحمدلله ميبات يمنه.. يبات بالفندق .. ويجي من صبح ياخذني اني و هند للدوام ويطلع للمستشفى يوميه هو وبابا  ..

وره يوم مادومت جانت جايه عليه هاي المصيبه وضليت بفراشي ..

النجمه تقدير لتعبي 😘