رواية ثأر مهري منهاا الفصل الخامس عشر 15 - بقلم اسماء ديمير

《《البارت 14》》

بقلمي "أسماء ديمير "

اريد ابلع ريك ماكدر .. رفعت عيوني عليه .. كلي اسمعي بابا .. الي يحب ينتظر واني اعرف ابن سلمان رايدج .. وامبين من عيونه اليوم .. بس اجه بوكت غلط .. خلصي دراسه وبذاك الوقت انطيج الهم ..

اذا رايدج من صدك ينتظرج .. لاتتهورين وتوافقين هسه وتندمين .

. هزيت راسي ..

- هذا هو بابا .. الي تشوفه ..

- يعني شنو اريد اسمع رأيج ..

كتله مموافقه .. اصلا اني ممفكره بالزواج ابتسمت بخوف ..

ضحك :- هذا هو اني هم اعرف بيج عاقله .. بس كلت اسالج ماريد اقرر عنج .. باجر نرد جواب للجماعه بالرفض ..

فاض الجاي واني على كعدتي .. كام بابا طفى .. كمت طلعت من المطبخ مكدره .. توه اصعد الدرج .. صاح وراي ..التفتت عليه ..

اسمعي بابا الي يحب من صدك ينتظر .. خليها بالج .. والولد عده استعداد ينتظر .. بس اني ماعدي استعداد افرط بيج وانتي بهل عمر ..

هزيت راسي اي .. صعدت فوك .. كلامه صح .. بس شلون بكلبي وبااسحاق ..

شراح يكول وشراح يسوي من يسمع اني رافضه ..

بس طبيت لغرفتي .. بجيت .. كعدت بالكاع .. اني شسويت .. شعملت .. شنو كلت عزاااا .. توه جنت مقرره اوافق واصر على موافقتي ..

كبل قفلت موبايلي خفت من اسحاق ورده فعله .. ليش سويت هيج اني .. مو خطيه .. اجه وخطبي ودك الباب مازاغل .. بس اني شسويت من اولها بعته ..

اليل كله افكر ومانمته .. احس شي مأذيني وممرتاحه .. حسيت سويت ذنب .. خفت من رده فعله .. انكلب منا ومنا .. شلون بهل ليله .. وشلون بيه اني وشلون سويت هيج ..

ثاني يوم صبح .. كاعدين على ريوك .. بابا حجه ويه امي .. تردلهم خبر بالرفض ..

.. جاسم من سمع رفضت ارتاح وسكت .. ياسر التزم الصمت .. شكد اتصلت على هند حتى احجي وياهه بالموضوع .. مجانت اطول تكول مشغوله .. حتى مالها خلك تحجي ويانه وتسمع مشاكلي

حتى من ندك عليها تحجج مالحك وبعدين اخابر ، حتى جيه متجي بحجه ماكدر سيف مايرضه ابات بره بيت بعيد عنه ، امي بس تكرض بروحها وابوي ساكت مايحجي يكول مااجبرت احد اني ولا هيه شاكيه الحال ..

ضليت ملازمه غرفتي .. مفضوحه .. امبين بابا يدري بشنو احس .. بقه بس جاسم يعرف وخلص انحكم اعدام ..

موبايلي ماتجرئ افتحه .. ضليت ايام اكل بروحي .. شلون رفضت .. بعدها اجاني تانيب ضمير .. وراهه شلون مابررت اله عدم موافقتي عفته هيج .. شلونه هسه شبي .. شصار عليه ..

فتحت موبايلي مالكيت غير بس اربع اتصالات من رقم سجى .. وكم رساله تسالني شلوني .. شو ماكو ... عرفته هو ..

دزيت رساله على خطه ..(( اسفه ))..

ماكو رد .. اكيد بالشغل .. اخذت الموبايل ونزلت جوه .. لكيت رواء يمنه .. جايبه جهال ..

كيفت عليهم على الاقل اكو صوت بالبيت بدل هالملل .. وهيه تكيف تجيبهم .. تنضف وتجيبهم تخلص منهم ..

كاعده تسولف على رجل اختها شلون اخذ سياره جديده .. ويعلم اختها على سواقه ..

امي كاعده وتكول اي .. الله يسعدهم .. الله يوفقهم ..يستاهلون .. ثنينهم موضفين وكلمن بدائره يحتاجوهن ..

وهيه تلف ودووور .. امبين تريد جاسم هم يسوي هيج .. بس تعرف كلش زين .. يجيب سياره بس ميخليها تركبها وتسوقها .. لا يحطها جواهه ويدوسها بيها يطلع مخها ..

بس امبينه تريد تحاول .. دخل جاسم من بره جايب مسواك للعشه .. كالته ليش جبت جان احنه سوينه ..ليش مكلف نفسك ياعيوني ..

لا مشتهي كباب وجبت .. اشرلي اجي اخذه .. كمت بدون مااباوع بوجهه .. اخذته من ايده ..

لزم راسي وباسني من كصتي .. كال زعلانه شنوو ..

هزيت راسي لااا ..

عجل ليش ماسلمين على اخوج .. لو بس ياسر عزيز .. واني لا .. اهجسج ماتحبيني .. مو عزيز عليج مثل ياسر ..

:- لا والله .. بس انته عصبي واني اتجنبك.. ماريد احجي شي وتتضايق .. وتتعارك وياي .

يعني مو زعلانه مني ..

لا انته اخويه وسندي وحزام ضهري من بعد ابوي .. بس ماريد تصيح عليه وتعيط لخاطر هيج ماصير بوجهك ولااحجي وياك ..

حظني ... لابعد اخوج .. كم هنو عدنه احنه .. بس بالقران اخاف عليج .. لان انتي عزيزه .. هسه دروحي حظري العشه لان ميت جوع ..

ابتسمت تدلل .. صاح برواء تكوم وراي تساعدني ..كالته مو تشوفني ارضع بالطفله .. هيه كباب وتحظره وخلص ..

صاح بيها .. كووومي ..

شمرت طفله على امي وكامت ادردم .. طفله ضلت تصرخ .. وهو يعيط بيها .:- ايااا طايحه الحظ .. شلون تشمريها هيج .. غبييييه ..

:- هسه مو ردت عشااا وكمت شتريد بعد .. شو كمت صحت غبيه وطاح حظج .. حرت وياك شلون مااجيت تطلع صفح ..

:- لجججج لاتراددين لا بالقران اكوم اسكطج .. تعااي سكتي الطفله يللله ..

امي كالته :- استهدي بالرحمن يمه شجاكم .. هسه طفله بحظني اني اسكتها ..

:- لاعمه خلي هو هذا الكادر عليه بس غلط وتكفخ بيه .. حصره عليه احجي ياكلني اكل ..

:- لابالقران انتي رايده كتله عمن جلدج يحكج .. كام عليها الريموت بيده هفه بي .. اني واكفه باب الحولي واباوع .. امي ذبت طفله على التخم وكامت عليهم تخلصها من ايده ..

عاطت وهذا انته شاطر بي .. مكفخه مالته .. بزعت منك والله .. على شنو ظاله وياك اني . على احترامك على تقديرك الي .. كل كلمه وثانيه تغلط وتضرب .. دروح شوف العالم شتسوي نسوانها .. زلمه مدلليهن دلال وهنه يتعنطزن ..

اجه بابا وشاف عياطهم وصياحهم .. عاط بي يحل شعرها .. كوه فكو منها ..هيه ضلت تبجي وتعدد سوالفه وشلون يضرب بيها وتشوفع الاثار وذاك اليوم هافها دفره بيت اهلها واخوانها متعاركين وياه ..

هو ضل يكمز شلون طلعت سوالف بيتهم يمنه وتشكي عليه يم ابويا .. ابويا باس راسها كالها .. اطيح حظه الج .. كافي بابا لاتبجين ..

طلع وركع الباب وراه .. وهيه كعدت تشكي منه .. نوب فرتها عليه .. اني عفتهم وطلعت للمطبخ سويت خفايف ويه الكباب.. لبن و زلاطه و طماطه تكلا ..

اجه ياسر من بره سمع صوت بجيها كال منو .. كتله مرت اخوك .. جاي تحرك عليه .. فوك شينها كولت عينها ..

:- ليش شكو شصاير .. مايبطول طلايب همه .. صارلهم عمر سوه ماتعودو واحد عرف الثاني ..

:- مو كلها ياسر وعقلهم جبير وهادئين يااعينيييي ..

:- تقشمرين حظرت جنابج .. موو ..

:- لا والله .. بس مرت اخوك محيله .. تريده يشتريلها سياره ويعلمها عليها .. بس ماتعرف شلون .. وهالتشوف شافتلها حجه وزعله .. حتى المراضاهه تصير بالسياره ..

:- نسوان لو يهود .. عزه بعينجن ..اخذ خيار ويكرط بي .. كال زلم ممدبريها للسواقه نوب نسوان .. هز ايده وراح لغرفته فوك ...

كملت العشه بحدي .. شكد لئيمه .. اسمع صوتها بعدها تعدد عليهم مساؤه .. والله محد طلع عينها عليه غير بابا وامي ، كل ماشكت شكوها ، وكعدو يوسوها ، امي شوي بيها مجال وتحجي وتنتر بيها اذا تجاوزت ، الا بابا يتخبل يكول الي مانرضاه لبناتنا مارضاه على بنات ناس ..

صبيت العشه .. وصحت للكل .. التمينه على العشه كلنه .. كلت لياسر دك على جاسم يجي يتعشه .. سوده عليه جان مشتهي الكباب .. طلع عليه سم ..

باوعت بطرف عيني على رواء .. عشر دقايق وطب للبيت .. امبين جان بره واكف ..

حتى سلام ماسلم .. كعد على سفره .. واشرلي على رغيف خبز .. نطيته اله .. تصرفاته جنهن تصرفات ابو فهد .. حبايه ومفشوكه ..

ياسر ضل ينافخ .. ويستغفر .. بابا كله شبيك جنك طلي داخله بخشمه ذبانه ..

من دونهم اني ضحكت .. ياسر كوه كاتم الضحكه سوه نفسه جدي .. حكك حجي تحجي هيج غير ماشفت شوفه الي شفتها اليوم ..

بابا :- خير شفت ولك ..

:- لايمعود كملو اكلكم داكول .. سالفه تسد نفس الله وكيلكم .. صفك ايد بيد لاحول الله ..

اني من يمي خفت هذا شايف يمه .. امي سالته شكو يمه لتخوفنه خيرر ..

:- شحجي يايمه ماكول غير الله يعينهم ويصبرهم

امي طبت على صدرها :- يااا عزاا شكو يمه اسم الله

جر نفس ضايج مدنج :- استغفرالله لا حول ولا قوه الا بالله لا مو وكتها اكلو

جاسم نتر بي :- ماتنجب وتلغي ، شبيك شكوو سممت النه الاكل وتكول ماكول غير نفتهم شكوو ..

جر نفس :- غير اليوم واني راجع بالدرب .. طابك سياره يم اشاره المرور .. شو بس فتح سير ، واسمع فحيط مال سياره وربده الله وكيلكم ربه تجفل

اشر الجاسم ، يابه جاسم عبالك انفجار ، اني كبل تشاهدت على روحي ، طلعت سياره ضاربه الاشاره .. مال سايد ثاني وطافره بنص الكوسر فلشت الصفحه مالتها داخله على عبريه ..

وصار مصايح العالم والمعايط .. والمحرك نفجر .. كوه طلعو المره من سياره ، شايليها زلم غرب نوب رجليها وكراعينها طالعات يلجن جنهن كزاز والعياذو بالله ،

كام ياهو جاي يريد يشيلها اني هم شالتني الغيره كلت اساعدها خطيه خربانه ، بس تذكرت رجلي هو انا اريد واحد يشيلني ، حط لكمه بحلكه يلوك بيها :- لحم صارو يابه لحم ، العبريه مال الكوستر مجرحين .

امي دكت على خدها .. صخااام يمه اسم الله ..

:- اي يمه وانتي مامحلفتني .. طلعو المره غركانه بدمها .. ركضو بيها للمستشفه كبل ، والعبريه ناس مكسره وناس دمها بطولها ،

هيه هاي الي يطي سياره للمره .. ممحصل منها بس اذيه .. والله العالم .. فوك اصابتها نوب تخسر فلوس تصليح الكوستر وفصل للعبريه الي تجرحوو .. دكعدن بالبيت واسكتن الا تركبن سياره امهات البصل والثوم .

:- بابا كله شو ماسمعت اني .. هاي شوكت ..

:- قبل لااجي يابه .. همزين ماشفت والله شوفه ماتراد ..

نطت رواء :- لاعيوني خما كل نسوان هيج .. هاي مستعجله وهيج صار .. هسه بس نسوان يسون حوادث .. ماكو زلم تسوي .. شو اغلب سواق سيارات زلم ..وكومه حوادث ..

:- حجيج صدك خويه .. بس المره غير . المره تخاف اذا احد دكلها هورن كبل تجفل ودوس بانزين ولان طابه بسياره بيها عالم وموتتهم .. المره ترتبك بسرعه .. الزلمه يسيطر .. يتعارك .. يدك هورن .. هذا شارع ميوللم نزاكه المره ياام معين يااختي ..

اني غصيت بالكمه .. مدري اضحك مدري اكح .. هيه سكتت وحتى حجي ماحجت بعد .. جاسم مدنج وياكل بس اذاناته يمنه ..

امي حجت ويه بابا على هند .. صارلها سبوع مداكه علينه .. ومن زواجه لي هسه مجايه علينه ..

كالها ادك على رجلها واشوف يجيبه ..

اي ياعيني دشوفها . لادك ولاتكول اهلي .. كل مادك عليها تحجي كلمتين وتشرد .. ماتخلينه نفتهم شي منها ..

عوفي البنيه .. عدها مسؤليه ورجال وعيال .. الله هاديهم ..

كاعدين يسولفون .. وياسر كلي موبايلج يضوي .. باوعت عليه مخليته على طبله ..

ااا ..اي هاي اشعارات مال يوتيوب .. اخلص عشه واشوفه ..

خلصت عشه على اعصابي .. اريد اكوم على تلفون .. بالشافعات كام بابا وكمت راسا وراه غسلت .. وشلت جهاز .. توه اصعد .. امي صاحت تعاي شيلي نعمه .. استغفرالله .. هاي شلون شغله .. جبت صينيه .. وحطيت المواعين كلهن .. امي كال شصاااار شايلتهن كلهن ..

اريد اشوف المسلسله راح تبدي ..

:- هاي ياهو ..

:- على النت ماما على النت .. شلتهن كوه بالشافعات .. وهاي ولا حركت ساكن حتى اديها ماغسلتهن .. ذبيتهم بالمطبخ .. ياربي اغسلهم واصعد لو اصعد ورجع اغسلهم .. خفت من امي تهيج عليه .. حطيت زاهي بالجلافه .. وكعدت اجلف .. نص ساعه وفضيت المطبخ على سرعه ..

وصعدت لغرفتي ركض .. فتحته الرسائل .. خايفه من اسحاق و كلامه ومن تأنيبه الي ومعاتبته .. كلبي يدك.حيل ..

كاتبلي .. تتوقعين الاسف يشفي جرح ..

راسلته بسرعه .. غصب عني والله ..

مارد .. ضليت احوص .. كمت على حيلي .. ادك عليه باله .. لااخاف احد يسمعني .. شوي وسمعت جهاز طن ..

كاتب .. فهميني شلون يعني .. ابوج رفض لو جاسم حتى اعرف راسي من رجليه .. اعرف شلون اتصرف ..؟؟

عزاا شاكله هسه ياربي .. ترددت بجوابي .. بس لازم احجي .. ماريد اكذب اكثر .. كتله لااا بس صارت مشكله وضغطو عليه واني خفت ورفضت ..

دك عليه رأسا ..

جاوبته اجاني صوت صيحه .. عفيه عليج يالسباعيه عفيييييييه ..

كمت قفلت باب الغرفه .. همست عفيه بس افهمك ..

ولج شتفهميني .. ليش تخليني اطلعععع من طوووري .. اني مشتعل ابو ابوووي واكول هسه انضربت و اذوها وهسه لكو المراسلات وهسه جبروها ..

وهمه بكيفهم قررو عنها وردولنا الخبر .. وميت الف حسبه باااالي تالي طلعتي انتي بطرااانه وخايفه .. من اولها انتي خايفه .. من اولها انتي بايعههههه ..

صوجي اني الكلب الكاتل روحي عليج .. اني نذل .. مو مثل شباب اضحك على بنات العاااالم ومتونس لاقهر ولاضيم ولاشايل هم وحده .. تلعبين عليييييه انتي ..

هناء :- افهمني اسحاق الله عليك .. كمت ابجي .. بس اسمع .. خلي افهمك .. بس على كيفك .. ضل يصيح ويعيط .. لحد مافحط .. تالي كال احجي فهميني .. الله يحركج مثل ما حاركتني شدعي عليج .. شسويتي بيه وللجججج ..

على كيفك .. لاتصيح حباب .. هو انته مو اجيت تعاركو اهلي ..وجاسم يهدد ويغلط .. و بابا مراضي يكول صغيره .. وكلها مراضيه ..

من اجه سالني بابا اني رفضت خفت من جاسم لايعرف الي بينه ..كلي شلون اوافق .. لو موافقه جان موتني .. قبل انتقد زواج والي يتزوجون .. وهسه اوافق و بهل عمر .. كبل يعرفون عدي شي وياك ..

ليش قفلتي جهازججج لعد .. ليش ماكتيلييي .. ليش ماشرتيني .. ليش ماحجيتي .. لييييش خليتيني اقلق واكل بروحي للليييش ..

حتى منك خفت والله .. لاتزعل اسحاق والله انته روحي من دنيا .. بس اني حقيره وجبانه ..

انتي موجبانه لو جبانه ماتحجين وياي وراهم .. بس انتي فضلتي اهلج عليه ..فضلتي ثقه اهلج على حبي الج .. ماردتي تخسرين ثقتهم .. اهلج اهم مني موو .. اني عدج لا شي .. احجيييييي

لا والله خفت اخسرك للابد .. اذا عرفو الي بينه راح يكرهوك وجاسم راح يسويها شغله عناد بيك .. وبابا راح يزعل ويمكن تصير مشاكل جبير بين اهلنه .. بس كلت ارفض بحجه صغيره بس اخلص سادس .. يخطبني وبين ما الامور هم تهدء ..

منو كلج راح اكرر الخطوبه بعد يابنت الناس .. بعد الي سويتي وبعد فشلتي ويه اهلي برفضج اليه مراح اصير غبي واكرر الخطوبه ..

اهلج اعزاز اهلي هم عزاز .. ويعز عليه ابهذلهم واجرجرهم بخطوبه معروفه نتاجها .. جنه متفقيين على كلشي وغدرتي بيه .. بسبب خوف .. ماأمن على عيشتي وحياتي وياج .. انتي حبج ضعيف اليه .. مو مثل حبي الج ..

هو يحجي واني كضيتها بجي .. اريد احجي بس الغصه مال البجي منعتني .. صدك كرهت روحي بوقتنا وشفت نفسي صدك هيج .. وكلامه الي يجرح ..

كتله اسحاق .. وداعتك عدي وداعت بابا .. ماجنت قصدي هيج .. ولاجنت ناويه اسوي هيج .. بس من انحطيت جدام امر الواقع .. انرهبت وخفت ورفضت ..لاتسوي هيج انته اكبر مني وافهم مني لاتعاقبني على غلطه صارت بغباء مو قصدي بيها ..

كال تعبان راح انام صار كم يوم منايم يله تصبحين على خير .. سده بوجهي ومارد عليه ..

ضليت على كعدتي ابجي .. استحقرت نفسي حيل .. صدك غدرت بي .. فوكاهه جذبت عليه .. للفجر اني مااجاني نوم .. خفت اخسره .. احبه واريده .. بس ممستعده ازوجه واخلف منه .. ممستعده للحياه زوجيه .. بس اسحاق اريده .. للفجر افكر .. خفت لايعوفني .. مادري شوكت نمت بس سمعت اذن الفجر ورديت غفيت بمكاني ..

كعدت صبح على دك موبايلي .. رفعته كلت الو ..

اجاني صوته ..

والله هنيال كلبج المرتاح نااايمه .. واني ماعرف اليل شنو غير بس سواده ..

كعدت على حيلي .. اسحاق ..

وجعت كلب اسحاق انتي .. تدرين لو لااا ...

كلبي مردني من حجيه .. عيوني يحركني من بجي البارحه .. وممرتاحه ابد .. وكلامه يوجع .. كتله سامحني جاهل وغلط مو يسامحو اعتبرني جاهل .. وانته اكبر مني تفتهم .. استوعبني وسامحني ..

:- تدرين الموقف الي انحطيت بي لو لا .. تدرين اني ايام اضغط على اهلي ومستعجلهم يجون يخطبوج .. وتالي من الم اهلي وناسي وجايج فرحان .. يجيني الرد .. وياريت من اهلج لااا منج ..

وماصدكت ردهم .. فوك قهري من رفضهم زاد همي عليج وخفت بيج شي .. تالي طلعتي حظرتج خايفه ورافضه .. شماتي تشمتو بيه .. واني ارد واصيح .. مو هيه الي رفضت .. اهللها مموافقين وذبوها براسها .. قنعت ناسي واهلي احبها وتحبني وتعالو اخطبوها الي .. ونهايتها اتفشل ويكلولي وينه حبها الك ..

اوووف اوووف تدريت كلبي شكد يوجعني منج لوو لااا ..

اني بس اسمعه .. كال :- ونااايمه عادي عدج .. عدج قدره تنامين وترتاحين .. ياريت عدي شوي من كلبج هذا المحجر ..

:- ترى جنت كاعده للفجر ابجي عليك .. ونمت بس كم ساعه بس ..

:- مسويه زحمه والله .. للفجر ..ولجججج اني صارلي ايااام مانايم من ورااج .. حقيره ..

:- ههههه احبك والله ..

:- لاتحجين هيج ماصدكج بعد .. من اول خوفه بعتي حبي الج .. شلون من تاليها ..

:-سكتت .. شرد عليه ..

:- كال احجي .. ليش ساكته تدرين بسوايتج عوجه وماينسكت عنها موو .. كون هسه كبالي والله لااجيب صونده خضره ودك وين الي يوجعج .. لااخلي ايد ولارجل صاحيه .. ابرد كلبي بيج واطفي ناري ..

:- ههههه .. لاتخوفني منك ..

:- تضحكين مو باله ..بس والله الا اسويها .. كل ما تسوين هيج بيه اضمهن الج واطلعهن بعدين ..

:- ماشي راضيه بس كافي زعل .. ماتحمل زعلك ..

:- جر حسره .. كال استغفرالله .. هسه راح ناجل سالفه الخطوبه .. خلي الامور تهدء .. واجيب عمامي وكباريه عائيلتي واجي ..

:- ههه اوكي ..

:- الله يشلع كلبج مثل مشالعه كلبي ..

:- هههههه ..

كضت هيج مراسلتنه .. وكلامنه .. لحد دوامنه .. يوميه لازم اشوفه بابهم .. تخرج و يشتغل بمحل هو وصاحبه ..

يوم جمعه اجتنه هند .. جابها رجلها وهو راح عنده ذغل باب معظم .. تلكيتها بالباب .. صارلي شكد مشايفتها .. بس تفاجئت بيهاا ..

مو هند .. متغيره حيل .. صايره سمره .. ونوب حامل وعدها دوام .. وشغل بيت وعيال .. ورجال ..

تكيتها بوستها واباوع بوجها ياااالله ..

شايله الجنط ولازمه بطنها .. اخذت جنط منها ودخلتهم .. دخلت للحولي .. تعبانه .. طلعت امي متفاجئه بجيتها ..

:- شجابج جان كلتي حتى نتلكاكم .. شو تعبانه وتلهثين .. غير تكولين جاااين ..

:- شتتلكوني يا ماما .. هو من بعد الدرب عده شغل هنا وجلبت بي اجي وياهه ..

امي تباوع عليها وتتفحص بيها :- ماطول ماتعرفين الدرب مو بعيد جان اجيتي صارلج شكد مجايتنه ولاماره .. كولي اهلي اسال .امي ابويا الهم حق عليه ..

:- عده شغل والله وميلحك .. تحجي وتفك بشالها .. وعمتي مالها خلك وكوه اجينه .. حقكم شما تكولين .. بس ملتهيه والحمل متعبني ..

امي :- شلج شغل بعمتج انتي .. عدج رجلج ونوب حامل .. حيري بروحج شضال بيج انتي .. هيه عدها بناتها يشيلنها ..

:- مره جبيره وام زوجي تردين اشوفها مريضه واشيل ايدي عنها لخاطر سيف خطيه ..

:- لعد هو ماكال خطيه .. دشوفي وجهج شلون صاير ليمونه .. ولا جايبج لاهلج .. وامبين ممرتاحه .. داعيه جلد وعظم .. ترديله راحه وانتي مشايفتها ..

رايده خراب بيتج اني قابل ياامي .. بس وين العدل وسعاده الي واعدج بيهم .. وكتلتي روحج انتي سعادتي وياهه وسعادتي وياهه .. دشوفي نفسج بالمرايه لخاطر اللله ..

شفتها سكتت .. ومالها خلك ترد .. كتلها يمه تعبانه من درب هيه تلكيتها انتي .. ترتاح ونحجي عود .. لاتزعلين هند بس حجي امي صدك .. ولاجنج هند متغيره حيل والتعب امبين عليج .. كومي اسبحي وارتاحي .. بين منحظر لكمه ناكلها .

عافتنه واخذت جنطه وصعدت فوك ..

امي تاكل بروحها .. :- كله صوجها كنالها لاتاخذ منهم مايفيدون بس ركبت راسها هسه احسن .. جنه ميته وداعيه عضام ..

سبحت ونزلت تنشف بشعرها .. شعرها خفيف من وره الحمل .. متساقط .. اني اباوع واشبع قهر عليها .. بس امي ماتسكت :- شبي السانج ماتحجين .. عاجبج حالج يمه .. رجلج خير من الله .. وعدهم همه قطع اراضي .. خلي يبني ويعزل بيج .. هسه حبله انتي مسؤليتج كبرت .. اتضلين طول عمرج تخدمين الحموات والعمه .. دشوفي حالج ياامي شبيج ساكته ..

هند :- يمه متحمله وساكته .. اكول بالنهار اريد انفجر بيهم .. واكلب البيت عليهم .. بس من يجي اليل واحجي ويه سيف يكسر خاطري .. هو شبيده يتكابح ويه ابو قابل شلون ارضاهه هو عمي .. كال احاول اقنعهم ويله .. مال اطلع بزعل مااطلع ..

وهو هم ممقصر وياي يريحني بكلامه و دلاله انسه تعب كله .. ومااندم طول عمري على زواجي منه .. لخاطر عينه تهون الف عين ..

امي شاطت من حجيها :- والله صوجي حاركه دمي واحجي ومغثوثه وانتي ولاهامج وعاجبك الوضع .. دهاج اثرمي لحم هاااج .. شمرته علينه وطلعت ..

:- عصبت حسنه هههههه

ضلت يمنه يوم وثاني يوم خابرو عليها ورجعها رجلها للبيت .. كلشي ماشفنه منها .. كضتها نوم .. ونوب تعبانه من درب .. كل مانحجي وياهه كالت نعسانه لحد ثاني يوم راحت وكلشي مافتهمنه .. امي شبعت بجي عليهاا حتى ماخلتنه ناخذها للدكتوره نطمن عليها بس تشكي من وجع بطنها وتبلع مسكنات ..

... اني التهيت بالدوام ودروس تقويه .. خاصتا هذا سادس .. طلعت اني وسجى للمدرس الخصوصي .. فاتت من يمنه سياره اسحاق .. التفتت ليوره واباوع عليه واضحك ..

دغتني سجى :- عمي على كيفكم .. عبالك صارلكم سنين واحد مشايف ثاني .. ولاعبالك البارحه تشاوفتو ..

:- هنه خمس دقايق وركض ركض انخاف نلكف .. وحاسبتهم علينه .. بابا الي يحب شكد ميشوف محبوبه ميشبع .. وهذا اسحاق شكد ماشوفه شكد مااشتاقله ..

:- هنياله لاخويه على هيج .. بس على الله يضل هذا الحب وره زواج هم .. ولاتكب عيطكتم ..

:- دخلي تصير والله كريم ..

نوبات يدك عليه ويكعد يدرسني عن طريق النت .. بس اغلب وقتي وياهه ضحك .. شكد صارلي اعرفه بس ماتجاوز وياي .. صح يغازل ونوبات بزاغل بكلامه ويجاوز .. بس عمره ماحاول او فكر يخرب عقلي ..

سادس مو لعبه ابد .. خمس او ست ساعات لازم قرايه .. والامتحانات شهريه هيه تحدد انو انته راح اطلع معدل بالبكلوريا لو لا .. لذلك ضعط حيل على نفسي بالتحظيرات والمحاظرات ..

بليل دك علينه سيف .. صوته مرتبك ويبجي عمي الحك هند ...