رواية ثأر مهري منهاا الفصل الرابع والعشرون 24 - بقلم اسماء ديمير

《《البارت 23》》

#ثأر_مهري_منها

بقلمي "أسماء ديمير"

طلعنه من البيت  ، خالتي شايطه وامي مكسوره اكثر مني .. صفت لا رجال ولا ابن براسه خير .. جاسم جلب بيها بس دفعته وحلفت بس يلزمها اتهج ،  وماتخلي احد يعرف وينها .. سحبتني وراهه ..

خالتي اجرت تكسي وطلعت بينه لبيت خالي  ال جبير ،بعد عن بيتنه  ٢٠ دقيقه بنفس المنطقه .. امي على شهكتها تبجي على ايام بابا ودلاله ، و شلون جان لازم البيت ،  ومحد يفك حلكه ، تالي هسه رواء هججتنه بظهريه وحده ، ولعبت على جاسم فلك ..

بيت شكبره شكده صفه الهاا .. خالتي شكد تكرها ودوم تحجي عليها ،  بس احنه جنه غافلين عنها حيه من تحت تبن .. كعدت خالتي تسولف لخالي على جاسم ومرته .. وزادتها فوكاه هم حبتين ..

خالي تخبل شلون امي تنطرد وفوكاهه مضروبات ، وجوارين شاهدين على ضربه مالتي .. كبل خابر جاسم ونزل عليه غلط بدون تفاهم .. ودك على ياسر يكله عوف عمليتك وارجع هذا اخوك صاير بيد مرته ، ووامك طالعه من بيت زعلانه هيه واختك ..

ليل والموبايلات تركع ، التمن خالاتي ،  وناس تأيد امي على طلعه ، وتكللها لو منج اروح اطلعهم هو ومرته واطرد بالشارع ، وناس تلكلها اروح اكعد بالبيت واسود عيشتهم ،  وناس تتكلها خلي يزوج عليها ويكسر ركبتها ..

ياسر دك على امي شاط .. كالها يومين واني يمكم دشوف شنو قصته عفتكم شهر لعب بيكم جوله ، وصار وصله مسح لمرته .. كاللها حظرو نفسكم والله كريم جااي ..

ثاني يوم صبح جدي وعمي حميد وجديتي وجاسم اجو ،  لخوالي يحلون سالفه .. خوالي مالهم حجايه غير اختنه عدناا ومالكم يمنه شي ابنكم عاق وطرد امه لخاطر مرته وفوكاهه مرته ضاربه هناء  ..

جاسم يكللهم هناء اختي ومالكم شغل بيها ، مو انتو تاخذون حقها لو تحاسبونه عليهاا .. وامي محد يمها هيه عافت البيت وتركته واني جلبت بيها بس هيه حلفت متدخل ..

جفتت عليهم خالتي سعاد وانهدت بي .. كرت عينها لامك من جاي بكوات عين تحجي ، وادافع عن نفسك ، امه تبجي وتشكي من مرته ، وبالجذب ماكتلها  مايكون خاطرج الا طيب ،  لا رحت تطرد بيه و تتهنتر علينه .

. حتى الولد الي ودانه للمضمد كعدت تسب بي وتشتم ، ماعدك حشمه ، لا على جار ولا على خوال  ،ولا اهل ادري شراضع انته ..

جاسم وكف لحيله وكللها :- حجي مو وياج ويه خوالي ، دخلتي للبيت ساعه هجمتي شعلتي نار بي . ولا نوب طالعه بشارع تصارخين ،  لامه دنيه علينه ، شتردين شكلج واانتي فاضحتني بنص شارع ..

- حجي مرتك هذا ، مو حجيك شمدريك طلعت بشارع ، شمدريك ضليت اتراكض ادور سياره داوي اختك ،  لو مامرتك الحيه تكلك ،  فوك ماتكسر حلكها ،  كاعد تذم بيه ،  فوك ماراكضه بختك عند مضمد ،  موو والله صدك انته بلا غيره ...

:- حددددج اكول مره جبيره وماريد اتجاوز ..

- لا تجاوز شو باله تجاوز ، اذا ماخليت سحلك يصير على ايد نسوان ..

كبت عيطه بالصاله ، وخوالي عاطو بجاسم شلون ينتر بخالتي ، وعمي حميد مدري شعجب رجع على جاسم يرزل بي ، ويكول لخالتي اكسر راسه هو مرته ، غصب عنه يحترمج .. احترامج محفوظ فوك راسي انتي ...

خالتي نصت حسها وكعدت تشكي ، ترضاها ابو سيف ترضاها ننطرد من بيت اخوك .. نسوان ومالنه احد بذيج ظهريه تبهذلنه بالتكاسي ،  وابن اخوك يم مرته ، بالجذب ماكال اوصلكم  .. لو جلب بينه ويكول وين طالعات ..

صاحو الاامي يحجون وياها ، امي حلفت مكان الي بي جاسم متدخله ولا تفوت ابد .. جاسم تخبل شلون امي تكول هيج عليه وتشرط عليهم .. كاللهم مستعد اجيب مرتي تحلف على القران كل سالفه من جوه راس خالتي ،  وهيه الي سوت العركه حتى اطرد رواء من البيت .. وعمي ينتر بي'يسكت ويلزم السانه ..

تالي سوو درب لجدي وجديتي ،  يدخلون لاامي يقنعهوها ترجع للبيت .. كالت مادام مرت جاسم بالبيت مارجع ابد .. لو اني لو هيه حاولو وياه شكد ابد ، جديتي باوعت بوجهي لطمت على صدرها ،  تخبلت باوعت لجدي كالت والله مايلامن يابو حميد ،  دشوف شمسويه بالبنيه لو لاا هاك شوف وجهه نصه ازرك الله لايطيها عافيه ..

كاللها مو وكتج تزوديها نوب حجيه احنه نريد نهدي سالفه ..

يانهدي يارجال  ، مرت جاسم الله مايجرعها ، تجي يمنه يوم خطار تذب سمها ،  جنها حيه صفره على صغير وجبير .. كيف لعد همه عايشين وياهه ..

امي ردت عليهم :- هيه رادت البيت يصفه بس الها ، خلي تاخذه بالعافيه عليها ، مسلتمتهم بيد الله ، يرجع ياسر باجر والله كريم ماسكت بعد لا والله ...

راحو عمامي ،  وامي وخوالي مصرين على موقفهم ، امي مالها رجعه لبيت ،  ومرت جاسم موجوده ،  يجي ياسر ونتفاهم .. بعد يومين ياسر رجع ، ضعفان مسلول سل سوده عليه ..

سمع سالفه من خوالي نوب شبع قهر .. دخل للغرفه محنى ضهره من المرض والم رجله .. نام ولثاني يوم يله كعد تعبان ..

خابرو عمامي كلوله جيب امك واختك ،  وتعاي لبيت ابوك نتفاهم ، الغرب مالهم دخل ببنكم  ، انتو اخوان وعيب ادخلون خوالكم مهما يكن همه غرب ..

خوالي مارضو شلون يتجاوزونهم ، شنو غرب اختهم مطروده ، ويردوها ترجع هيج .. ماقبلو بس ياسر قنعهم الكعده تصير بيت ابويا وخالي جبير هو يروح ويانه ...

وصدك لكيناهم مجموعين بيتنه ، ورواء'مضيفتهم وصايره ام البيت .. امي شاطت من القهر تكول تالي عمري اصير خطار بيتي واتضيف .. كعد ياسر يصيح على جاسم ويكله اخذ مرتك وروح عيش بيتك الي بديالى هاهيه مألكم شغل بيهن بعد امي وهناء راح اخذهم واطلع للخارج .. 

تخبلو عمامي شنو تاخذهن شنو اختك مو خاطبيها احنه شنو بكيفك تحجي ..

والله خطبتها اني مارضي عليها لا اني ولا المرحوم ابويا .. هاي البنيه جدامكم راضيه ماراضيه ..

عاط بي جاسم انته مالك غرض ،  اني اخوها جبير واقرر ونطيتها الهم ،  مالك كلمه بعد واختك سكتت ماحجت ، وان جانت مراضيه مصيرها ترضه بعدين مو بكيفكم ..

هذا الحجي قنع روحك بي .. امي وهناء هالكم يوم اخذهم واطلع ، ودشوف منو يوكف بوجهي .. كلمه منا وكلمه من عمامي ..   تلازم هو وجاسم بالصاله وكبت العيطه من وكع ياسر بالكاع وانضرب على رجله ضل يتلوه من الالم..

ركضت عليه اني وامي .. ضليت ابجي واعيط كافي اني راضيه ياسر اني والله راضيه،  هاهيه اسكتو كاافي ..
امي كامت تعيط و تملخ بشعرها من وراهم .. ناس تصيح وناس تهدي ..

كوه فاككوهم امي ضلت تغلط وتدعي على جاسم ،  تكله ماراضيه عليك لادنيا ولا اخره ، روح متبريه منك يابن بطني كامشه ياسر وتبجي ، وتمسد على رجله .. وجهه انطعن احمر . .

عمامي كالو لجاسم اخذ مرتك وامشي ويانه لبيتك الي بديالى يله .. خلي اخوك يم امك واختك هسه .. خلي يهدي الوضع ..

خالتي ماصدكت شالت غراضهم وطلعتها بالطرمه بعدهم ممكملين حجي وشمرت  نص الغراض بالطرمه .. كاعده على درج واباوع البيت هوسه وناس تقرر وناس تنفذ وناس تتشمت وناس تبجي وناس مكسوره الخاطر .. ماادري البيت من دون ابوو هيج يضيع ..

بيتنه ضاع من بعدك يكلبي ضاااع   وضاعت حتى محنتنه على بعض .. ضاعت الاخوه ضاعت الايام والكعدات الحلوه .. من يومها عرفت علاقتنه كأخوه ماراح ترجع مثل قبل النفوس تتغير والمعادن تبين .. كسره الاخ صعبه مثل كسره الضلع الي مالها علاج منك وبيك ويوجع بس ماله علاج ..

صافنه عليهم جدي ضل ينتر شلون ماله كلمه عليهم وشلون ميحترمو .. ياسر وامي ثنينهم قررو جاسم ماله  حق بالبيت واخذ المحلات اذا خلص حتى بالورث ماله حق .. هذا حق هند وياسر وامي واني .. واحنه كلنه منريده لا هو ولا مرته بالبيت ..

- عجل ياسر يابه انته تضل يمهم خما يضلن نسوان بحدهم بالبيت .وسالفه سفر تنساها ..

- سفر ماانساه حجي ، اني راجع كم يوم ، وارجع اكمل علاجي ، وامي واختي وياي ،  محد اله كلمه عليهم بعد لهناا حدكم بس ..

- اختك مخطوبه مو بكيفك تقرر يابه ..

- اختي مغصوووبه ..

- محد غصبه يابه جانت كاعده وراضيه وساكته ،  من قرينه فاتحه .. وابو فهد لاتنسه منهي عليها مو بكيفك تقرر ...

- حجي هذا الحجي مايفيد اصلا مو وكته .. دز على ابو فهد نتفاهم وياه باجر ..

- الرجال مو فارغ امه مريضه والبارحه ضاربتها جلطه ،  وحاير بيها لو هو جان رايد يجي ، بس امه مخطره ، وماكدر يعوفهاا .. وهاي البنت كاعده كبالك كالت راضيه .. اندار يباوعليها يخرز بيه احجي ماتحجين ،  مو راضيه احد ضاربج مهددج من خطبناج من اخوج  ، مو ساكته و ماكلتي لاا ..

وهسه كلتيها راضيه عجل شنهي تريد تطلع بالشارع ونكول موافقه كاافي زودتها ياسر ..

ياسر ممقتنع يباوعلي يريد احجي .. كتله اي جدي موافقه والله هاهيه .. غمض عيونه ياسر بتعب وبنفاذ صبر .. دنج راسه وسكت مامقتنع  وامي بعد اكثر ..

جدي شاف ماكو نتيجه وماكو امل للصلح .. اخذ عمامي وجاسم وطلع .. خالي اقترح على ياسر يبيع البيت وياخذنه ويطلع لتركيا هم يتعالج وهم نعيش هناك وعود خالي باربيل يساعده عنده معارف بتركيا ..

امي مارضت على بيعه البيت .. بس خالتي زنت براسها اي هو شضل شو البشر وديموت مقهوره على حياطين ولدج راح يتكاتلون ..

- هيه بس حياطين يسعاد هاي سنين عمر ،  ذكريات الي راحو .. ريحيه الميتين بيهن .. اعز من ولدي يخيه اعزز ..

- ذكري الله ولدج اهم .. بيعي واخلصي ،  هذا جاسم طماع ومرته تزن براسه ماتخليكم .. ولاتتنسين بنتج هند تريد كم فلس تبني بيتها ،  هم تخلص من العيال ذيج هم ضيمها ضيم .. بيعه البيت تحل مشاكل يابو مشاكل  ..

امي سكتت حايره وياسر مقتنع بس يريد امي تكول اي ديبلش .. اني عن نفسي فرحت حيل وكلت يالله  راح تفرج .. مادريت هاي بدايه الضيم الحقيقي بدايه الضيااع احنه الاخوه  ..

خالتي وخالي كالو لاتكولون تريدون تسافرون ،  كولو نريد بس نبيع البيت ،  وننطي هند حصتها تبني وياسر يريدهم للعلاج وفلوس امك وهناء بالبنك .. بس انته انطي حصه هند ومال امك واختك وحصتك اشتري بيهم شقه بتركيا ودور على شغل حتى تستقرون هناك .. بس سالفه خلوها بينه لايخربها جاسم ..

واذا سالو امك واختك وين يرحن من ينباع البيت ..

سكتو  .. امي كالت عود انكللهم هناء كم شهر وتزوج واني اكعد يم اخواني مالي كعده يم جاسم ..

حاجاها ياسر .. تتوقعين تفوت عليهم هيج فوته .. شلون اني منا ماراضي على خطبه وشلون هسه ارضه على زواجها مره وحده ..

اي يمه تفوت .. يابه نريد نبيع البيت ياسر يريد حصته للعلاج وسفر .. وهند هم تريد حصتها دتبني .. وهناء موافقه وماتريد تكسر كلام اخوها .. وفضت راحت وهناء كلها كم شهر وتتزوج ونتهت ..

انتفقو على هيج سيناريو .. وره كم يوم ياسر حاجه جدي على بيعه وسولفله على الباله كله كم يوم واحنه يمكم ..

كل يوم افتر بالبيت ودموعي تجري .. بيت طفوله والمراهقه بيت ضحكه والبسمه بيت دافي .. شما صار بي من الالم يبقه بيت ابوي يكفي اسمه باسم بابا وريحه بابا .. اجه جدي وابو فهد .. حاجاهم ياسر هو وامي .. كللهم هناء وامي يكعدن بيت خالي وره مابيع البيت واني اريد اسافر ومستعجل رجلي راح تسكت ..

كاعده بالمطبخ واسمع .. صعب تسمع ناس تقرر عنك وانته لاتحل ولاتربط .. حتى بالجذب مالي رأي بيعه بيتنه لو عليه مابيعه لا والله .. بيت الغالي هذا .. مشغوله بمسح دموعي .. شفت خيال فوكي .. رفعت راسي ابو فهد ..

دنجت .. كال كووه ..

همست الله يكويك ..

همس شهل دموع يابه شبيج ..

رفعت نظري عليه .. وجهه تعبان حيل ..

اهلي يردون يبيعون البيت ..

اي شنو جديد ليش ماتردين ينباع ..

بيت بابا هذا ذكرياتنه كلها بي راح يروح وتروح وياه حتى لمتنه وخوتنه هم .. بسبب الناس احنه تطشرنه ..

هاي سنه الحياه كلمن تاليته بدرب ..تبقه بس المحنه ..

ماضلت محنه .. بابا راح واخذها وياه ..

جر كرسي وكعد كبالي ..

هسه تبحين على ابوج لو على بيت ..

على الاثنين شهكت ابجي على الاثنين .. بابا الي عافنه وهسه احنه وراه متمالخين والبيت جان يجمعنه راح ينباع ..

سكت .. تنهد وحجه بهمس ..  البيت جبنتو وبلوك هناء .. المحنه بالكلوب .. الحنيه والحب البشر يزرعها وين ميروح .. ماتزرعها بيوت وشوارع ولا حاجه ..

سكتت ماراح يفهمني ابد .. كال ابنيلج اغاته .. رفعت نظري عليه ابتسم ابتسامه خفيفه ..

اسويلج الي تردي بس اشري .. تردين نفس تصميم حتى نفس لون الصبغ حتى ديكور نفسه بس لاضوجين .. باوعت عليه يتامل بوجهي ..

دنجت متحسسه من نظراته الي تخجل وتربك بنفس الوقت ..

كال وره امتحاناتج انشالله نعقد ..

عقدت حاجبي ليش ؟؟!

وليش لااا؟؟ شنو الي ننتظره ليش تأجيل ..

ليش مستعجل ماصار كم اسبوع من انخطبنه ..

الخطبه مالها داعي اصلا .. احنه كرايب مو غرب علمود نكول الخطبه للتعارف ، انا اعرفج كل زين وانتي تعرفيني ،

بس المشكله ماكو موده ، وهاي وره زواج انشالله تجي ...لذلك اريد استعجل بيها .. كل ماطول الخطبه كل تكثر مشاكل ..

ساد سكوت بينه .. ماعندي حجي وياه اصلا ماعرف اتفاهم  ويه عقليته .. كمت اريد اروح .  لزم ايدي حيل .. باوعت اله .. عيوني مدمعه ..

كال ماكملت شلون تكومين ..

شلون مامكمل وانته ساكت  ..

جنت انتظرج تحجين .. عسى ولعل ينطق الحجر ..

رمشت بعيوني اخفي دموعي خايفه لايوكعن ..

- منا وهيج تلبسين حجاب .. وبيت خالج هم .. بعد ماكو شعر طالع .. حتى ممنوع تشمري شمر ، الشال ينشد  مثل ماتشده علا  خووش ..

- اوامر ثانيه ..

ابتسم مايامر عليج ظالم .. بس الحجاب زينه ويلوكلج .. وهم مارضه بعد مرتي احد يتناوع لشعرها ولطوله ..

- ماخليت الي اي قرار ولا اي رأي .. ماعرف شلون عايش انته بهيج مبدء ..

زادت ابتسامته .. اي بالله كملي ..

- شكمل ليش هو انتي خليت شي .. نطيت قراراتك وتكلي طبقي .. ابد ماتحترمون راي المره ولا ارادتهاا ..

- من تحبين يهناء ، راح تعرفين شنو يعني تنجير تفرض رأيك ، على المقابل حتى لايضيع منك .. وتحافظ عليه .. تنجبر تقسى وتغصب ،  لاجل بس تحصل عليه ، وبعدين توعد نفسك تعوضه على كل دمعه ، على  كل مغثه بدرت منك و جنت انته سببها ..

جان لازم ايدي من معصم،  نزل جف ايده لزم جف ايدي حيل .. نوبات العقل يعزل بنت عمي ،  ويصفى بس الكلب يتحكم ..  واناا هذا جاي يتحكم بيه هسه اشر على كلبه .. اعوضج وداعت ابوج اعوضج ..

سحبت ايدي منه نافرته ونافره لزمته .. صعدت فوك ..

عرض ياسر البيت للبيع وصدك خلال سبوعين البيت نباع ، بسعر ممتاز لان بمنطقه مرغوبه .. نطو هند حصتها و الباقي اخذه ياسر وخلاه بالبنك ،  كال من اسافر اشتري مطعم واسوي فوكاه شقه حتى هم نكعد ونستقر وهم شغل ..

الاثاث تم نقله كله لبيت جاسم ، امي كالت حصه هند هذا من تبني حتى متشتري اثاث ، واحنه اثاثنه اصلا فخم ونضيف خلي تستفاد منه .. طلعت للسوك وياهه نشتري شغلات حتى نصفي بيت ..

بدربنه شفت سجى ،  وامها وكفت امي تسلم وتسأل شعجب مايمرون علينه مثل قبل .. سجى تباوعلي بعتب وتجر بعيونها بزعل .. اعرف نفسي مقصره بس ماريد اذي نفسي واذي اهلي ، اني مو طايشه ولا عاطفيه كلش،  حتى اخلي مشاعري تجرفني ورهه اوهام ..

ضليت اباوعلها اريد الزعل يطيح ، بس'ماكوو دارت وجهه امي سألت عن احوالهم .. ام سحى ردت والله ياداده بالظيم الرجال مريض وحايرين بي ، يوميه منومي مستشفه والولد هم كلمن حاير بضيمه ..

- يا اسم الله شبي يااعيني سلامته ..

- اي والله كليه مالته تعبانه ، ولازم كل شهر غسل وادويه موت احمر خيه شسولفلج ..

امي جرت حسره كالتها كلنه هيج كلمن همه شكل ..

اي والله ماكو بيت خالي من الهم .  ذام اليوم سمعنه صوتكم عبالك عدكم عركه ..

هيه هاي تاليتنه خيه ، تالت وكتنه طلع صوتنه من بعد المرحوم ، بسبب جاسم ومرته وطلعنه من بيت وهسه نباع وخلصنه ..

تفاجئت وباوعتلي .. يااا بعتوو ليش عود حرامات

لاحرامات ولا شي يااعيني،  بس الميت حرامات شفايده البيت واحنه ممرتاحين ...

سحى تباوعلي ، كالت اي احسن خاله منو بقالكم هناا على شنو ضلتكم بعد ..

كتلها ياكليه طلعتي ..

ابتسمت كالت بعد وكت .. تربيه بنات ..

سكتت ودنجت .. همست بأذني شيلتكم احسن شي سويتوهاا اخويه هج من وراج ومن وره اهلج واخوج ..

باوعتلها ليش شكوو ..

- ماكوو بعد ولا راح يصير شي ، لان عاف بغداد كلها احسن هيج الج واله اللي يبرد كلبه منج انشالله ..

دمعت اني .. سالتها شلونه ..

ابتسمت مستهزئه شلونه ؟؟! ليش شخليتي عليه انتي دمرتي .. هسه ديشتغل بالسليمانيه بشركه سياحه على الله يلتهي ويضل هناك ومايرجع لحد ماتزوجين ويكطع الامل منج ..

دموعي نزلت وهيه مارف كلبها وسكتت ضلت تلوم وتحجي وتذم بيه وبحبي الي مو كده ولا كد كلمتي .. مسحت دموعي .. امي باوعت عليه يااا شبيج انتي ثانيه ..

كالتها سحى لان راح تشيلون خاله وراح تشتاقلي ضحكت ..

لا انشالله نمرلكم فد يوم نشوف الحجي مهما يكن احنه عشره عمر وجوارين  الدار ..

كالت امها الله كريم يله داده احنه هم اخرناكم ..

عفناهم ومشينه ، ضليت اتلفت عليهن لحد ماختفن ،  بين ناس كلبي يحبها صديقه العمر .. بس المواقف والاحداث تغير البشر .. جوز مو للاسوء بس تغيره الى غريب .. جانت هااي اخر مره اشوف بيها سحى مادريت دنيا تاخذ عزاز فجأه ..

انتقلنه لبيت خالي جبير .. خالي ماعده احد بس هو ومرته وبنته هدى ممزوجه ، ولده كلهم مزوجين وعازلين .. ياسر رجع سافر ،  كال راح ارتب اموري شهرر وارجع .. اخذنه الغرفه الي فوك جبيره ومرتبه .. خالي حالته ماديه زينه يشتغل بوزاره صحه محاسب ..

وره كم يوم اجه ابو فهد ، جايب امه لدكتور بغداد ، كايلين اله جراح قلبيه وزين  .. مر علينه .. دزت عليه امي كالت اجه ويصيحج .. طلعت اله تعبانه وجهه مصفر .. شافني'شو وجهه نعقج وزنبر نتر بيه جدام امه شو ما خاله صخام على راسج اني شحجيت ..

رديت عليه شنوو ؟؟

- جفن حجاب ،  حجاب مو كتلج تبلسي مينزع بعد..

- ليش هو منو اكو ، بس خالتي وخالي قابل حرام  ..

- اني حجيت لو ما حجيت ، مو كتلج تبلسي شنو تضحكين عليه شتفقت وياج اناا  ..

- هاي شبيك هو منو موجود والبسه ..

نتر بيه حيل .. حتى لو ممنوع تطلعين من غرفه ومالابسته .. جدامي يله البسي بسرعه مالي خلك احجي وانطي وياج ، حجايتي بعد ماتكرر مالي خلكج يله بساع ..

باوعت لامه  تغمزلي ، روحي يمه ترى تعبان جاي من شغل وتلكيته اني،  طايحه عليه وجابني لجاي كبل ، يله فدوه لهل وجهه روحي يمه ..

- كتلها مو هيج خاله ، والقران اختنكت منه،  كاافي لهنا وبس بعد ماتحمل ..

عت ايدي حيل شنو ماتحمل ..شنو مامتني انتي منيه حجي يتنفذ مو واكفه تراددين وياي ..

دفعت ايدي :- وخرر ايدك هاي'شبيك جاي عراك شجاك ..

- شنو عبالج هناك ديالى ومادري جاي تسوين هنا لو نايم على اذني ..

- جاي تحجي انته شبيك بابا ..

- ياولوو السانك الزمي لااكصه بالقران شنو بابا جاهل اني جدامج ..

- شبيك لعد جاي متخبل ،  وتصيح عليه ، نوب  تعتعت بيه جاي عراك شنو ،  ادري خطبتيش هاي والله لو مكبوره ولا هالخطبه ..

لزمني من زندي حيل وجرني عليه لحد هسه نفس عليج طيبه ياهناء ، بالله كريم ضالج شوي واكسر بيج عظم دسمعي لج .. لزمني من شعري حيل ، هذا ازينه صفر اذا تطلعين من دون حجاب مره لاخرى .. طلعه لاكليه ماكوو هاي الاسبوعين نعقد وراها زواج .

- عطت لااا لا والله ماكو هيج شي ، شتفق وياكم ياسر ماكو عقد اذا مايجي ياسر ..

- مو اني امشي على راي ياسر موو.. عبالج جاسم اناا وتمشي علي'سوالف ياسرر  . رجع ياسر انكبر ياسر مالي غرض ..  نهايه شهر العقد هذا اخر كلام .

- مو بكيفك والله ماقبل ابد ..

- دنشوف ياهناء طلعه بره البيت ماكوو ، واذا خطت رجلج منا لوكتها انتي ابتليتي على روحج ..

امه تحجي وياه تكله صلي على محمد يمه شجاك . اندارت عليه ميخالف يمه لخاطري استهدو بالرحمن ..

طلعت لاامي اكللها تعاي شوفي شجاي يحجي .. اجت امي تسال نوب كب على امي ،  بنتج تطلع واطب وماتاخذ رأي ،  شنو خراعه خظره انا ،  هناا ونوب وصيتها على حجاب ، تعاند حتى كليه بعد ماكو تنساها ..

نوب كبت بينه وبين امي ،  وخالي تدخل وامه خطيه صفرت وتتوسل .. كامت على حيلها تبوس بيه ،  وترضي واني ابجي ، اكللها بس ضلت الامتحانات ونوب مايرضه امتحن ..

كالت عصبي هسه وروحه طالعه ،  من وره مرضي وحالتي تعبانه ،  مناك عمامج يزنون عليه ، على بنتنه يم خوالها وانته عايفها على حل شعرها .. روح جيبها ..

- واني'شنو ذنبي يااخاله ..

- ميخالف بعد امج ، اني احجي وياه ، واكسر راسه والله تمسح بدموعي،  وتبوس بيه انداريت اباوع عليه صافن علينه .. ابتسم بوجهي كال هاج تحبج اكثر مني عبالك مداريتها بكدي وتفضلج عليه ..

ضحكت امه كالت غير بنيتي هاي وجنتي الوحيده انشالله وام احفادي .. شلون مااحبها غير وجهه وجه عافيه   .. انعقج وجهي بزايد اني ..

طلعت من يمهم دموعي تجري ،  هدى شافتني سألت ماردت عليها ، صعدت كبل للغرفه وماطلعت منها .. اجت وره نص ساعه هدى كالت يصيحوج .. كتلها ماطلع كليلهم انخمدت .. 

وره يومين بلشت امتحاناتي ، لبست وطلعت ماهتميت لكلامه،  اصلا هو يتصل مارديت عليه .. امتحنت ورجعت .. بيومها لكيت خمس مكالمات من رقيه .. دكيت عليها .. كالت ضل بالي عليج من سمعت جدي يحجي ويه ابو فهد .

- خير خما كو شي .. كعدت على جربايه انتظر مصايبهم ..

كالت لعد ماتدرين ابو فهد.بده يحظر للعرس والعقد بنفس اليوم ..

شهكت كتلها شنووو
.

اي والله جدي كاله مادم السنه طلعت بلش بالعرس يله ..

شو ماكال ...

كالت هو يايوم سوه شي وكلج عليه .. جدي كله هاليومين روح جيبهم وتعال وره سبوع العرس ..

كتلها اصلا هسه جاي امتحن اني عرسيش انتي جاي تكولين مو اتفقنه وره الامتحانات ..

يامتحانات خيه هو مو كال ماتمتحن وبطلتها ..

هاي منو كال ..

ولج ابو فهد كايل الجدي ، والجاسم كاللهم كليه ماكوو ، بس هالكم يوم ارتب الوضع البيت ، واشتري غرفه وذهب  ، واجهز للحنه والعرس.. واجيبهم بس نعقد ونزوج ونيشان بيوم واحد يشترنه منا من ديالى ..

بهتت لا يالله .. لايارب دخيلك .. شهل مصيبه ..

كتلها .. زين جاسم شنو كله ..

والله اخوج طار من الفرح ، اصلا كله كعدتكم يم خوالي ماراضي عليها لو ماجدي يحجي ويسكتني عنهم ،  ليش بيتي مو موجود على شنو امي واختي يم خوالي مو عيب شنو ماعدنا بيوت ..

كلتلها بيأس :- ياسر اي ياسر ، مايرضه شنو بكيفهم ،  يرجع اخويه ويله ..

- والله هذا الحجي قنعي روحج بي ،  هاليومين رشيد يمكم ،  حظري نفسج ، والا اكلج جهزي للنيشان ،  والعرس من بغداد ، احسن ماتجهزي منا ،  ويجيبلج عبا راس وملابس معيد ،  ضحكت كالت فوك مازواج ركض نوب جهاز على ذوق ابو فهد تخيلي بعد .. وراج وراج العبا ..

حسيت بألم بصدري وختنكت سديته بوجهه .. خليت اديه على وجهي وضليت اشهك بالبجي .. نفس كوه اجره شو ماكلي ليش مانطاني خبر .. نزلت على امي ابجي من شافتني انصدمت شبيج ولج شكوو ..

كعدت اشهك واسولفلها هيه هم تخبلت كالت شنو يضحكون علينه شو ماعدهم كلمه .. دكت على جاسم وكالها اي صدك
هالاسبوع كلشي ينفض .

- واخوك شنو اكله .. اخوك مو كال اني من ارجع يله ..

- اخوي شنو سالفته جبير هوو ، لو ابوها شنو اني مو بعينج ، لو عدج بس ياسر اهم شي،  ببس حجايه ياسر تمشي شوو هالمره حجايتي تمشي والله ..

- شبيك يااغم تغار من اخوك الاصغر منك ، غير اخوها حاله حالك ..

- لا مو حاله حالي ، اخوي الصغير واني جبيرهم ، جدي حاجاني وكلي على موعد العرس وافقت ، وخلص فضت راحت ..

' وامتحانات اختك ولك،  ودراسته هاي'شجاك تخبلت علينه..

- يادارسه لخاطر الله،  ليش ابو فهد عايز لدراستها ، لو شهادتها ،  بيت بوحدها واكبر بيت بالمنطقه بيته ،  ومعامل اثنين من عدا المحلات ،  والله ياامي هناء بطرانه مو اكلج عقل جاهل متصدكين كل هالخير وتريد شهاده ..

- تعبها وتعب ابوك شنو بكيفك اضيعه انته .. مالك رأي لهاي يالفه افتهمت ..

س

دت موبايل بوجهه شايطه دكت على ياسر هم شاط ذاك وضل يسب ويغلط .. كاللها سدي داخابر الاغبر جبير دشوف .. دك على عمامي نفس كلام هالاسبوع زواج وانته مو الا تحظر ماله داعي اخوها جبير هو المسؤل ..جنهم استغلو غيابه ..

كال بس الكه اقرب رحله اني يمكم .. 

بقالي امتحانيين واخلص ايدي على كلبي لا صدك يسووها .. بس صار الي ماجنت اتوقعه يصير وخربت كل مخططاتي .. ضاعت وتناثرت مثل اوراق الخريف ويه الهوه ..

جن مامكتوبه النه سعاده ، ولا راحه ، وصدك من يومها ، ماشفت راحه بال جن حوبه واحد جاي تطلع بيه

#يتبع

كلبي مانطاني بين يوم ويوم 😅💜 بارت فوك ال٤ الاف كلمه يستاهل نجمه 😘

بعد بارت واحد وتنفجر قنبله ذريه توقعو بالله ..