رواية ثأر مهري منهاا الفصل الثالث وأربعون 43 - بقلم اسماء ديمير

《《 البارت ال39》》

#ثأر_مهري_ منها

بقلمي " أسماء ديمير "

كعده بالحديقه بليل ، شابعه قهر ، التفكير اكلني ديخوني ، ديضحك عليه ، وهسه راح يعيش براحه وهنا ، عافني بنص درب وسط ملامه الاهل والاخوان ...

هو اصلا تغير وياي ، اعتقد من وره هاي البنيه عافني بسهوله ، ااخ لو جاسم وعملته وياي ، لو هذا كله تدبير رشيد ، دريت سكوته مو نسيان بس سكوته جان حقد ، راد يطبخها عدل ، مو هو الي يعوف الي ياذي ابد ..

لو اسحاااق ، منين اتلاكف الصدعه اني ، ادري قسيت وياه وزودتها ويمكن هملته ، ويمكن ضغط عليه هو وضعه تعبان ، وابو حالته خطره ،  بس مو هيج ينكت بيه ويعوف ايدي بأقل فرصه ،

صفنت ترى  تعب ياهناء تعب منج ومن السانج ، مل من طلبات اخوج وعدم تقديره لوضعه ، نوب كسر ضهره بشروط ميسويها ومينفذها بس الولد العاق ، اهله بأمس الحاجه اله قابل يعوفهم ويلحكج ، هم حب مو كلشي يهناء  ..

نوب كلبي يعارضني ويكول ، ليش ماتحمل هو الي يحب يتحمل ماتحملني ، شهل حقد شهل قسوه . صراع الي بداخلي اذاني اكثر من البشر ...

سمعت خطوات وراي مالتفتت ، من عطره ودوسه رجله الثكيله على كاع عرفته ، غمضت عيوني نزلت دموعي ،

حجيت كوه طلع الحجي مختنكه :- جاي شمات مووو ؟؟

بلعت ريك اداري دموعي مانداريت عليه فشلانه من وضعي والموقف الي نخليت بي  :- الي ردته صار وبردت نارك هسه ، اخذت ثارك مني ابن عمي ..

حاجاني وبصوته بحه حزن مو اقل مني:- مو رشيد الي ياخذ ثاره من مره ، ثاري منج مايسده دمج بنت عمي ، بس خفت الله بيج وضوكتج ذره من الي ضكته ،

ضوكتج ذره من سهر ليل ، ومن شك الي اكل كلبي توالي اليل ، ضوكتج ذره من ملامه الناس من خذلان والوجع ، من عتب المحبين وشماتت الناس ، من كسره الوجه ، وموتت رويحتي ...

ماضكتي شي بنت حسن خفت الله بيج و حبا بابوج مأذيتج ، زاد البجي وعلت شهكتي ، خليت اديه على وجهي احاول اسيطر ،.

سكت يسمع صوت البجي ، داريت دموعي ومنطيته ظهري حتى لايشوف دموعي ،  حاولت الملم الي باقي من كرامتي وعزه نفسي ،

خلصتج منه بنت عمي لازعلين ، هذا مو كفو ، بس شاف خيرج ماشاف شرج ، بس ضاك حلوج ماضاك مرج ..

باول مطب هد ايدج وعافج بنص ملامه لوحدج ، انسي وعيشي ، الوكت كفيل ينسيج ،

انداريت عليه صفن بوجهي ساكت ، 

مسحت دموعي ، وكفت لحيلي اجمع نفسي ، ابتسم مقهور :- ول يالله لهل درجه هاويته ..

بلعت ريك اجمع قوتي :- مو حب ابن عمي ، بس جان املي الوحيد ، والحبل الي راح يجرني ويطلعني منااا ، وهسه ضااع ونكطع ..

رمش بهدوء مرتخيه اعصابه :- ادريج كارهه عيشتنه ومستنكفه منها لذلك نويت ادفنج انتي وحتى عيالج بيها ..بس لهناا وفك الطلب ماتسوين اتعب نفسي بعد وياج ..

دنجت ابجي ، همس رااح تنسين الوكت راح ينسيج

رفعت راسي عليه صفنت بوجهه ، تعب باين عليه كتله :-  ليش الوكت نساك  ؟؟ ..

سكت ماحجه رمشت عيونه بهدوء وسكينه ، صح يباوعلى بقهر بس هادئ حيل ، تحس ميت الف فكره وصوت براسي بس خااانس ... كأنو يريد يحس بالي حوالي بالاول ..

همس تناسيت ياهناء ..

دار ظهره بتعب ومشه متجه لبيته ...

ضليت اباوعله لحد ما ابتعد ودخل لحوشهم ، اني كمت من مكاني اجر بذيال الخيبه واداري خذلاني من واحد جان عزيز كلبي ..

دخلت للهول ، كلها كاعد ، الي ضايج والي متشمت ، ماوكفت هواي دخلت لغرفه بيبي تعبانه ، باوعت للمكياج دنجت على الكشخه الي اني بيها ..

مسحت مكياجي ونزعت فستان شمرت بالكاع ، رحت تمدتت بفراش بيبي وغطيت حتى راسي ..

لميت نفسي حيل ، مهزومه من ملامه والعتب ، اسمع باب تنفتح وتنسد ، وخطوات قريبه عليه ، انشال الغطاا ، غمضت عيوني حيل من خلت ايدها على كصتي ...

اجاني صوت هند ، هناء يعيوني انتي ، لو بيها خير جان صارت ، ميت الف واحد يتمناج هذا مو نصيبج والله ..

دمعت ، ضليت مغمضه ، مااريد ابجي...

لاتبجين ياوول ، كالت انسي خلي يولي ،

اسمع بيبي اجت كلتلها شعندج هناا عوفيها تنام ..

كالتها شتنام بيبي بعد وكت خلي تكعد شسوي بالنوم ..

عوفيها مالج لازم واحد يريد ينام متخلو ..

لاتتخربط بيبي وهيه نايمه خلي تكعد ..

اجت بيبي تقربت مني ، جلب وراح لحاله يجي الف مكانه عليش زعلانه ولج الي يشوفج يكول رجلها ميت ومخلفه منه العشره  ..

ماحجيت دخلت نوب خالتي كالت ياااا صدوك عود نايمه كومي ولج خلي نكمل الحفله ، والنبي الا نركص للصبح شنوو قله زلم زعلانه على هذاا دكومي ...

ماحجيت ولاةرديت جرتني من فراشي جرر ..

هند وبيبي يضحكن يلطفن جوو .. اني دمعتي بطرف عيني ، صاره دمعه رخيصه اقل شي ابجي ، كالت امشي جيبيلها جبه خلي تجي يمي ، اليوم نكمل حفلتنه هناك بيتي ..

بببي نترت بيها عليش تكملنها هناك ليش مو هناا ولج ..

يااا تردين اكابل هذني جنهم معلف مال بقر عوووع ..

بيبي صاحت بيها متفاجئه ولج منو معلف مال بكرر يالبكره ..

مو عليج عمه والله على ضرتي وبناتها ومرت علي ، سمن بدنه سم على شنو هالخبث مااعروف شلون عايشين وياهن زلمهم مادري ..

لا خيه تدرين مو لكفتي زلمه وحده بيهن لو نسيتي ..

والله مااخذت رجال من مرته ، هو رجال عاف مرته واجاني لو بيها خير ماطفر مناا ...

عاب حلكج ام زلم ولي مناا يله مالي خلكجن ..

عافتنه وطلعت بيبي وهند تضحك على خالتي تكللها تكلج ام زلم جن اخذتي عمي ..

انجبي انتي ،  مو هو اغوو واخذها عابت والله ..

عتتني من ايدي كومي انتي ثانيه جنج عجوز اويلي عليجن بنات حسنه شكد غبرات دومجن ..

والله لو منج اطلع الهن بمكياج ولبس واتمركص شنو فد نمونه الرجال ، هند جابلتي جبه وطلعنه يجرن بيه جرر'، اني داعيه خركه بيدهن يودن ويجيبن ..

خالتي كالت راح اخذهن لبيتي ويباتن يمي اليوم ، هاي اول مره اطلع من بيت جدي واشوف شارع ، من عدا المضمد .. اني هم كيفت راح انهزم من نسوان ومن كلامهن ، ردت بس مكان اشرد بي ، اصلا كرهت حتى بيت جدي   .

اخذنه ياسر وصلنه لبيت خالتي ، ميساء'وميس وامي وهند ..

كالت اليوم حتى حميد اطرده مااخلي يوصل ، جابن كيك وعصاير وياهن ماخلن شي ، ميساء حتى الزينه شلعتها ونفاخات طكتهن كالت مااخليهن يتهنن بيهن ..

فرشن بالهول وخلن المخاد والكرزات وكعدن يصفكن ويغنن ، وميساء اطك اصبع ، اني جريت مخده وتمددت اباوع الهن ، صدك جني عجوز حتى الحيويه مال شباب جن ماتت عدي ،

سمعنه صوت عمي حميد يكح ، تعدلن هنه واني على نومتي ، صاح سعاده وينج ..

تعال بعد بتي تعاال هنا ..

دخل تفاجئ من شافنه كال يااهلا لامه الحبايب ..

اي والله نتونس هناا .  ماناخذ راحتنه هناك بيت اهلك ..

ضحك يحرك بشواربه :- عجل اني شلون اخذ راحتي ..

طكتها ضحكه :-  يكلبي اصبر اليوم واجلهاا ، اليوم ونسه نسوان مالك مجال عدي ..

هنه يضحكن عليهم ، هو واكف بطوله يصجم بخالتي مايستحي ، نوب يتغمز الها ويحرك بشواربه جنه صرصر ، وهيه تتمضحك وتضرب بي بسامير ،..

تالي كالته روح شوفلك جمعه زلم واكعد تونس وياهم ، ماتبات هناا لاتفضحنه ،

مارضه يروح جلب خرب ، كامت لحيلها راحت عليه ندفع بي هو مايقبل يطلع ، تالي طلعته وسدت باب ، كالها اكضبج لو مااكضبج الله كريم ..

رجعت تتمضحك ، مخبلته لحميد خبال ماخالته يشوف دربه ، جنه زعطوط يمهاا ، نوب كله كلبي وعيني ، ماينطي كلبه يرفع حتى صوته عليها  ..

هاي لو ام سيف جان هبدها بدفره اذا دافعته وساده باب ..

كعدت يمنه تكول ياله لخاطرجن طردته سوده عليه وين يبات اليوم ، يااا بس لا يم ام الوصخ  والحنه ، عزاااا ..

درت وجهي عليها شعجب بي لهذاا خاله ..

ياا ولج انجي وين اكوو منه والله ماشفت دلال والغنج الا عنده ..

هذا منو يدلل وغنج هذا ثور ..

ولج يااا حسنه حاجي بتج لا اضربها بجمع والنبي ..

امي تضحك تكللها والله صدك منيله حميد دلال ، اخبل منه مااشفنه ..

لاحبي يعروف كولشي يعروف ، بس يريد المره الحوك الي تمشي وياها ، مو غبره وعنوديه مثل مرته ، يريد التدلل وتتغنج عليه والله يصير مثل العجينه بالايد ..

كلامها خلاني ، اصفن ، ليش هيج بشر حله وعلاجه دلال والغنج يعني ، يردون مره مثل خالتي تتمضحك وتدلل وتكله كلبي وعمري ، وترافكه وين ميروح وماتاكل الا وياه ومايسبح الا تدخل تليفه بيدها ..

معقوله هاي العقول الحجريه رجعيه حلها هيج بسيط ، وهذا صوت الي يرعد ، يجي بهيج طريق ..

غمضت عيوني وحسيت  على عسه من خالتي ياا راح تنامين توه ليل شبيج كومي اسبحي وتعاي اكلي ويانه دنسولف ياحظي شبيج اندفستي ..

رفعت راسي وكعدت خاله اذا ملاحظه ترى اليوم ، عقدي ومهري والعريس مااجه ، بسبب اخويه ورشيد وشابهه قهر بكد دنيا وشايله هم شماته وحقاره نسوان عمي ..

وانتي جايه تردين تتمركصين على جروحي صدك عود ..

ياا شبيج انهديتي علي فوك مارايده مصلحتج ، والعريس طزز بالي والله مو نصيبج ولا الله كاتبه الج ، بلااا عوذه منه من نصيب ، لو نسوان عمج طبهن مرض ، ليش  هنه لو بناتهن واصلات للي انته واصله اله ، هنه ميتات قهر منج لخاطر هيج راح يجحن هو المايلوح العنب حامض عنه يكوول يااخاله ...

ميساء كالت اي والله ليش تهتمين ولا بالج اسمعي مناا وطلعي مناا طز بيهم ..

باوعت لاامي يماا شكد راح اضل هناا ..

سكتت وكالت الله كريم بس نحجي هسه كلها تهيج علينه خلي تبرد سالفه شوي مال عقد لان ياسر وجاسم اليوم تمالخوو .. اصلا ياسر ماضل شي ويعقد على ميس وانجيبج يمنه بهاي الحجه ..

سكتت وتمددت انام .. عفتهن يحجن ويسولفن ، خالتي بلا خجل واصلا خوالي كلهم من نوع الي عدهم كلشي عادي وبي مجال للتفاهم ، حتى خالاتي من يحجن بسوالف المزوجات ، ما يخلن حساب هاي ممزوجه او عيب ..

لا عدهم خلي تتعلم خما اتضل ثوله وماتعرف وغشيمه احسن خلي تتثقف ، وتفتهم الحياه زوجيه زين وبكل زوايها ...

صراحه هو هذا صح ، لان شفت بنات عمي شلون عدهن جهل بكلشي ، حتى دوره مايعرفنها الا تجي عليهن وينصدمن بالواقع ، لاحظت نسوان عمي من يحجن ، بسوالف النسائيه يتشاورن عبالك فد شي جبير وفضيحه ، واذا وحده من بناتهن كاعده يعيطن بيها ، ولي مناا ادب سزز ،

ويحجن بالالغاز ، خلن بناتهن جاهلات بابسط الامور حتى  بالحياه زوجيه ، من يكلولهن زواج يفرحن ، عبالهن زواج بدله بيضه وصفكه وهلهوله ومكياج ..

مايدرن هاي بس هبت العرس ، وبعدها الحمل ومسؤليات الرجال والنومه والكعده ، ولازم دلله ، واطيح حظها لخاطر العيال حتى يرضون ..

صافنه بين غافيه وبين صاحيه وصوت خالتي براسي ، تسولفلهن على مغامرات حميد وسوالفه الفاكسه وياها ، هم طلع يعرف ، صخام بوجهه ، همه كلهم هيج تشوفي ابن عرب ودشداشه ورزن وصياح وعياط ومن يوكف يم المره يفلسها تفليس ،

نمت وبالي الف فكره ، ثاني يوم راحو اهلي ، واني رجعت  يم بيبي كاره دخله للبيت ورجعه ، بيبي الضحكه شاكه الوجهه ، وكاعده من صبح دازه على باجه تركب مكيفه جن عدهاا عرس  .

ادري بيها على شنو فرحانه ، فتت من يمها عوجت حلكي واباوعتلها بطرف عيني ، كالت انزعي ملابسج وتعاي ساعديني  ،

على شنو انشالله اساعدج ،

عازمه عمامج اليوم ديصالحون حسين ورشيد يمه ..

واني شكوو ..

طايحه حظ شبيج تتهنترين ولج ..لو بتي ليله يم خالتج كلبتج علينه ..

محد كلبني بيبي شبيج فرحانه جنج مشمته بيه ..

والله عقلج عقل تيس انتي اشمت بمنو يالرعنه ..

بيه بيبي على شنو ضحكه شاكه وجهج من صبح حتى ماكتيلي حجايه اطيب خاطري ..

ضحكت والله صدك فرحانه بالقرعان ، عجل ذاك هم رجال وياخذج ، هذا اذا انتي ماماخذه من كبل ..

عقدت حاجبي شقصدج بيبي ..

ماكصدي شي ولي بدلي ملابس وتعاي وياي ..

دمعت عيني بيبي مو تكولين مايسويهاا شقصدج هاا كولي الله عليج ..

داحجي ودخلت مرت عمي كالت شرفتي خانم يله خفي ايدج يانه ..

واكفه ومارضه اتحرك احجي بيبي كولي .. ماحجت ضلت تشتغل ودايره وجهه ، عفتها وطلعت مزنبره من مطبخ ، مرت عمي صاحت وراي مارديت دخلت للغرفه وركعت باب وراي ..

ماكفاه السواه بيه ماشفهه غليله ، معناه الي بالي صدك والله ، شيريد بعد مني ، دمرني دمر كلشي بحياتي، كعدت بالكاع لا هو كلي هاهيه وياج خلصت سالفه ..

لا هو هم كلي راح ادفنج انتي وعيالج هناا ، شيقصد ، دموعي نزلت خليت راسي على رجليه ابجي شيقصد ، هذا راح يخبلني شيريد بعد هو شباقي بيه ..

حسيت صدري بده يقفل عليه ، كمت نفس كوه اجره ، رحت لاجرار اطلع بخاف ، مابي بس شوي ، سحبت نفس منه ، اريد اصحه ماكو اتجهت للباب اروح لببيبي تلحكلي ..

طلعت عليها اشرلها ، هيه صاحت ياا شبيج ..

أشرتلها اختنك ..

عززا العزاا صحت ولج دكي على واحد من ولد هاي اختنكت ..

كعدت بالكاع بالمطبخ وهيه تشيل ماي وترش عليه نوب خنكتني بالزايد ، شالتني شيل هيه ومرت عمي يطلعني للطرمه بين ماتجي سياره ..

نوب انهضمت وضليت ابجي ، دخلت سياره رشيد بيبي عاطت بي الحك عيني جده بت عمك قبط صدرها ..

نزل من سياره عاقد حاجبه اجه بسرعه سندني وياها ..

مرت عمي شمرت عليه العباا وشال ، دخلت للسياره وخليت راسي بحظن بيبي ابجي ..

ياا بيبي هساع على شنو تبجين ، لاتبجين بعد بيتي صدرج تنك ياجده كاافي ..

ابجي من فشله ، صحتي مفشلتني ، فوك ظيم الوادم نوب صحتي عالت بيه ، كثر الحسبات الي بالبالي ماخلتني اعرف راسي من رجليه ...

نزلنه يم مضمد وتلكاني الرجال كل مره نروحله بشوش ويضحك ، من شافني ابجي ..

يداهر وياي ويكلي على شنو تبجين تردين عريس واناا موجود لاضوجين قابل بيج ..

بيبي تضحك وانا خانسه خله الاوكسجين على خشمي ورد راسي على سديه يثبته ..

طرفت عيني على رشيد واكف على صفحه ضايج ويباوع عليه بطرف عينه .. ما زحت نظري عنه ، ضليت مركزه عليه ، هو هم ..

ماشفت كره بعيونه ، بس هم ماشفت ذيج نظرات قديمه ، عيونه فارغه مثل كلبه اعرف ، اعرف اني بالنسبه انتهيت وهذا الي اريده ..

يمكن دمر حياتي للابد ويمكن طول عمري اضل بلا زواج ، بس المهم هو يبعد عني اذاني حيل ، وهو ماله حق  يأذيني ..

ساعه وفك صدري وكمت ، المضمد يحجي ويه بيبي ويوصي بيها ، دخل ابنه شافنه ابتسم جاب علاكه الادويه وكتب عليهن مواعيد ..

تقرب مني يفهمني عليهن ، كال والله اول مره اتمنى مريض يزورنه مره ثانيه ..

رفعت وجهي عليه هذا شبي ، وكف بصفه ابو فهد كله هاا شلون صرتي ..

ذاك ابتعد عنه يتكحكح .. همست زينه عيني عليه وعلى الولد لايكون سمعه ..

لزمني من زندي وجرني حيل وكفني عجل نمشي يله ..

وخرت منه لان اذه ايدي ، رحت يمي بيبي لزمتني وطلعنه للسياره هو ضل ورانه وشوي وطلع ، صعد بالسياره وضايج مزنبر ، درت وجهي للجامه هو اتجه للسوك ، نزل للماركت مدري شاخذ ربع ساعه  وطلع شايل علاليك  ، اباوع طالبات كليه يمشن ، مميزات بلبسهن ، ابيض واسود ..

جنه قريبين من كليه الاداره والاقتصاد ، رمشت بعيوني ، شبعت قهر ، جنت يوم من الايام مثلهن ، ضيعت حلمي ، وحلم والدي ، حركت سياره وتجاوزنه البنات عيني عليهن ماشلتها ، ماحسيت بالنعمه الا من ضاعت مني ، دنجت راسي مقهوره ،

عليمن اذب الوم ، المن اعتب واشكي ، رفعت راسي ، رشيد يباوعلي بالجامه دار وجهه للجدام يسوق ،   اني هم خليت راسي على جتاف بيبي وغمضت   ..

رجعنه للبيت تمددت بالغرفه ، وهنه التهن بالغده وبالعزيمه ، اسمع بس الهوسه بس ماطلعت ولاشوفت وجهي لااحد ...

اجت علا دكت باب ودخلت ، كالت كاعدات كلنه بره بالحديقه جاي نحوك بلوزات تعاي ويانه ..

ماريد تعبانه مالي خلك ..

دخلت وسدت باب وراها .. ليش عازله نفسج هناء عنه ..

درت وجهي ماعازله نفسي بي انتن متحبني ..

لاااا والله ليش تكولين هيج ، انتي متختلطين ويانه ، مو مثل هند دومج عازله نفسج ..

درت وجهي الها مو جنت اختلط بيجن ، وجنت امشي ويه رقيه ، شحصلت منها بس الاذيه ونفاق ، اغلب الي صارلي هيه سبب بي ..

منو رقيه ، ليش'شعليها هيه ..

دومها جانت توزني على اخوج وعليكم ، وعلى عمامي وجدي ، ماتصير سالفه الا ونقلتها الي فوكاها بهارات لحد ماكرهتكم وحقدت عليكم .. كرهت عيشتكم والبيئه هنا ...

وشتغير يهناء'بعدج كارهتنا وكاره عيشتنه كلنه نعرف بس تردين تطفرين مناا ..

ماكرهتكم والله ، ماعدي كلب اسود حتى اكره ، اخوي العود ، الي اذاني ماكرهته احبه واريد خاطره ، كرهت افعالكم وياي ، صارلي فتره هناا بيبي مدللتني وماخلتني محتاجه شي حتى صحتي مداريتها ، بيئتكم مابيها شي تعودت عليها وعايشه .  بس اكره افعالكم ..

سكتت ، يعني راضيه تعيشين هناا ..

على اساس لو ماراضيه راح يخلوني ارجع لبغداد ...

زين واذا خلوج تكملين كليه تبقين هناا ...

ياريت والله ، بس منو يقبل ،

الله كريم دكومي يمنه هسه والله كريم ..

كمت يمهن شوي يسولفن ويضحكن واني بس صافنه ، رقيه تضرب بيه بسامير بس علا جانت ترد وماتقبل وسلوى فطيره بس تضحك .. شوي وكمت ماتحملت كعده ،

وراها بايام التهيت ويه بيبي ، سوالف العجايز كلها علمتها الي ، حتى بالحجي خلتني احجي مثلها ، خاب طبخ ، والله خيست بطني بي ...

وزني صعد لل٦٠ بسببها ، ماتاكل الا واني مخلصه ماعون ثريد ، نوب تخلي تشريب كبالي تكلي كون تشفطي كله ..

احسها لكت لعبه تتونس بيها ، لو جاهل رجعت تربي من جده وجديد ، جدي علاقتي بي ابد مو قويه يباوعلي من بعيد بس ابد مايتقرب عليه ولا يحجي وياي ، اني هم مااحبه ، مااكره بس ماحبه ماشفت منه خير ابد ...

عيشتهم مو سيئه ماشي حالها ، هينه مادام بيببي وياي ، صح ترزلني وتغلط عليه ونوبات تدمغني بيدها بس تحبني ، يوم الي اوكع ، تتخبل تركض بيه كبل للمضمد ، وتضل مكابلتني وكاعده توكل بيه ..

امي ادك عليه يوميه خطيه من تسمع صوتي زين تتطمن ، خالتي بين يوم ويوم تجي ساعه وتطفر ، ماتضل بيبي ماتحبها ابد ابد ...

عكس عمي حميد الي فرته فرر ماخلته يشووف دربه ، يوميه ياخذها لمطعم لو لمكان ، خالها بصدر سيارته ويفتر بيها ، سليمانيه لو لدهوك ، خلته يرجع جاهل ويراهق ، كلها تحجي عليه ..

جدي كل مايشوفه يرزله ، ويتعارك وياه شلون هامل ام سيف ولده وبناته ويركض وره اخت حسنه .. بس هو يسمع مناا ويطلع منا ،، نوب ام سيف يوميه هاده على خالتي  شلون متخلين حميد يجي عليه ويبات يمنه بس يمج ،

وصلت بيها مواصيل هاده على خالتي هيه ورقيه وضاربتها ، سمع عمي ، ورجع للبيت ، يكولون متوليهن بالعكال مرته ورقيه مجنزهن تجنيز ، مرته طارها لبيت اهلها ورقيه حاسبها ، بغرفه وحدها وقافل عليها ..  هذا كله لاجل عين سعاده .. هجم بيتها على فواينه خبلت رجال ..

يوم الي اريد ادك على امي لازم اخذ جهاز من بيبي ، من يوم العقد وهيه سحبت جهاز مني ، تكلي كل الي صار والي خرب اخلاقج هذا الموبايل الفيسد ..

جنه شيطان ولازمته كلشي يعلمج ، لو مثل بنات عمج ماتعرفين شك من بك جان ماصار الي صار ، وصدك خلت شوفه موبابل حصره عليه ...

تنطيني اخابر بي دقايق وتاخذه مني تتوي ، نوب حتى فوك ثلاجه لو بالكنتور بطلت تضمه، تخلي كله بجيبها مال دشداشه جنه جيس ، كلشي ضامه بي ، عود ما اذان ومكص وخيط ومدري شنو تكول جنطه مو جيب ..

شالت سله مال فواكه وكالت تروحين تجيبين فواكه من البستان ، مو تهبدين وتمردين الامه على رشيد تخبلي علينه وتحجي ، لمي بس الي بالكاع ..

والله ماكلت باطل صار اسابيع ماطالعه ، اخذت سله وطلعت طايره صاحت وراي ولج البسي شي ، غلست طلعت اركض بطرك نعال ،  جن عصفور وهدو من قفص ..

دخلت للبستان ، صاير يخوف ، كثران الشجر بي ، بحيث اذا دخلت ليجوه حتى الضوه ينحجب عنك ، صوت عصافير يخبل

دست على الزرع اهبد اريد الكط المشمش الصاحي بالكاع والبرتقال وارجع بساع ..

ناس ممرود اكو سليم بس واكع بالارض من كثره امبين صار هواي مالامي ..

ترست صندوك الصغير ،  الم وتارسه حظني مشمش ، امطك بي طمعه حامض على حلو ..

شلت اخر كم وحده من الارض ، تارسه السله ترس يطلع بيها بالكيلوين ..

رفعت راسي من الارض فزيت ،  ورجعت ليوره عطت يمااا ، خليت ايدي على صدري فززنتي  ، ماحجه يباوع عليه عاقد حاجبه وينزل نظره على سله الي بيدي .

بلعت ريك شلتها زين جنت خالتها على خصري ،  حظنتها لصدري ، حجه ونظره على سله شجابج ليجااي لوحدج ؟؟!

#يتبع

جاي احاول اختمها قبل رمضان لان كلنه نعرف رمضان شكد متعب .. تغشيشه صغيره بده الفرج انشالله 💜

البعض يسالون هم عن نظام نشر ، بنات نظام نشر يومي ونوبات انزل بارت صغير هديه بس مو معناه تطمعون انزل اكثر ماشي 😑

#فاعلكم_يهمني