رواية ثأر مهري منهاا الفصل الثاني وأربعون 42 - بقلم اسماء ديمير

《《البارت ال38 》》

#ثار_مهري_منها

بقلمي "اسماء ديمير "

ماحسيت نفسي غير انربدت بالارض ، اسمع صوت بيبي عاطت وتهز بيه وتكله الحك البنت ازركت يمه جنها اختنكت ..

ماجنت واعيه غير بس على الالم بجسمي ، ورجفه صلت على عظامي صل ، حسيت احد شالني وركض بيه ..
ريد اسيطر ماكو ، واعيه بس لااكدر افتح عيوني ولا احرك ، صدري احسه خلص قبط ونفس انكطع ..

صوت بيبي تحجي وتتلمس بيه رخيت نفسي وستسلمت .. حسيت بعدها بفتره على الالم بايدي ، رفعت راسي'ثكيل رجعت نفسي ليوره ماكدرت ارفع نفسي ، ضليت مغمضه ماكدر افتح ..

بس حس بيبي يمي ،  تكله بعدها نايمه ، الله لايوفقها اجت تموت البنيه هاي منو مسلطها عليها الي متخاف الله ..

ماكو صوت بس صوتها ، ونيت بالم ، اجت بيبي تقربت عليه تتبسم بوجهي ، هاا يمه شبلاج صايره خركه بساع توكعين ..

فتحت عيوني دموعي جرت ، عساني متت ياريت اموت والله ، بجيت بصوت ..

حظنتني تبوس بيه :- لايمه اسم الله اذكري الله لاتكولين هيج ..

ضليت بحظنها لحد مااجت دكتوره ، شافت المغذي خلص ، شالت الاوكسجين مني كالت صدرج الحمدلله زين ، بس ماله داعي هالتعب ، لدرجه جسمج ينهار ، لا تتعبين خفي على نفسج  ، هذا شي مو زين ترى ، سالفه تصير مزمنه وتضلين طول اليوم لازم شايله جهاز وياج ..

سندتني بيبي وطلعتني بس ماكدر امشي احس بخدر برجليه وبكل طرف ، رفعت راسي رشيد كاعد باب غرفه من طلعنه كام وكف ، باوعلي ودار وجهه بساع مرتبك وضايج ..تقرب عليه سندني دفعت ايده عني ..

لزمني حيل ومشاني وياه ، ماباوعت عليه  ولا هو باوعلي ، بس عطره دك بخشمي ، ادينه دافيه مدري اني جسمي مثلج ، بس دايخه حيل ، ومجبوره استند على احد ،  ثنينه مو طايقين بعض ، لا هو عاجبه يجي ولا اني هاويه يلزمني ..

كعدني بالسياره وبيبي بصفي ، ركب وحرك وبيبي تحجي وتسولفله على بنت الي اجت ، هو ساكت ، كالت هسه احجي ويه جاسم شنو بناتنه لعبه انعل ابوهم لابو الي يطيهم  مره ...

سندت راسي على الشباك حيلي مهدود ، ماعندي وجهه ولا السان يرد او يحجي ، فشلته دنيا موجوده بوجهي ..

ردت اسأله مرتاح هسه تشفيت زين ، اجت من اخذت حقك مني ، حوبتك يمكن طلعت بينه ، بيبي دومها تكول حوبته هسه تطلع بيج  ، زين اني مو يتيمه مالي حوبه ، الله ضربني ضربه كسر ظهري بيها ..

وصلنه للبيت نزلنه وهو حرك سياره وراح ، بدون مايحجي ، ولا نطق كلمه ،  كتلني كتل بسكوته ، الي موتني بطى سكوووته احجي ياااامه الاسلام لووم اعتب اغلط اي شي ، بس لاتسكت ..

علا حجت ورزلت تالي برد كلبها وسامحتني ورضت ، هذا ماينطي مجال للرضا لو للسماح ، لو يحجي لو يضربني مثل قبل اكول برد واكو امل ينسى ماتوقعت هيج احساسه وهيج يحقد ..

اكو بشر ماينسه ولا يسامح يقفل وهذا قافل ، نمت بوكتها يومين اكل واشرب وارجع انام ، كضيتها نوم ، هربت من دنيا بالنوم ..

بيبي حاجت جاسم على اسحاق والبنت ، كالها سالفه منتهي منها وخلص ماامشي وره نسوان اني ، وهذا ياسر جابه ياسر يتحمل ، رجعت حجت لياسر كالها لعب نسوان ونفاق نسوان ، الولد اعرفه ماعدي هيج سوالف حاير بابو بيا حال ويصاحب هو هناء الي كتل روحه عليها ماعنده خلك لو وكت يحجي وياها ...

انسدت سالفه بلا امل ولا جواب ، ضليت مثل الكره بملعب ياهو جاي هافها جلاق ..

بسبب نوم والادويه والاكل زاد وزني وصلت لل٦٠ بينما جنت قبل اشهر جنت دوب ٥٠ ، حسيت نفسي انفخت بيبي تكول هاي صحه ومن اكل الحم وتشريب ، واني اكول الادويه نفختني ..

تاخذني بين يوم ويوم ، تضربني ابره بالعضله نوبات حسين ياخذنه ، نوبات سيف ، المضمد رجال جبير يعرف جدي ، نوبات يرحون عنده يقيسون ضغطهم ، لو من يصعد سكر ، وياه ابنه توه متخرج صيدلاني ، يكعد ينكت ويضحك وياي حتى مااحس بالم ..

يكول بيبي حفيدتج نكديه مبينه من وجهاا .. تكله لا والله لسان وتضحك للهوى بس الربو تعبها وهلكها هلاك ..

مابين عليهاا الله يعين الياخذهاا ..

بيبي تضحك وتندار عليه ، كال دارسه متخرجه بنتي ..

بيبي حاجته اي دكتوره مثلكم ماشالله عليها ...

التفت عليه مستغرب دكتوره .. همست رديت عليه طالبه صيدله وتركت ...

صاح متفاجئ :- لاااا حراامات ليش صاح لابنه تعال يول هاي مثلك هم صيدله ..

ابنه واكف ويراقب بينه مبتسم .. كال ليش تركتي حرامات 

ردت بضوجه :-  ضروف ..

مجتف ادي واكف كبالنه يحجي بهدوء : - امبين عندج طموح والا ماتوصلين للصيدله لو ما طموحج جبير ...

بيبي كالت بعد حظها شسوي ، خلصنه ضرب الابر وقياس ضغط وطلعنه اجه اخذنا سيف ..كتله دز هند شوي مشتاقتلها كال بليل عود اجي واجيبها وياي ..

صدك بليل جابها واجه ، حظر بالحديقه نركيله والكعده مالتهم ، جاسم جاب عايلته واجه ولد عمي التمو بالحديقه على نراكيل والحب والفواكه سوالف ضحكهم ليمنه واصله ،

متلفلفه بالبطانيه وكاعده وهند ورواء التهن يودن جاي لو فحم .. رواء ماتحجي وياي اصلا كلمه ماتنطق ، يحسسوني بيه مرض معدي عن طريق كلام ..

مثل الاستحقار ، والله عشت ايام بسببهم ماتسولف ، ومانسيتها ابد ولا راح انساها ، بس مشيت وره بيبي عيشي يومج وغلسي لاصحتج ولا جسمج ينطيج حيل تتحملين ..

مالج لازم اهتمي بصحتج والباقي طبهم مرض  ، شما حجو وشما كالو منو يفيدج لو نعليتي ،

صافنه على رواء ودخل ابو فهد هف الباب الديوان انركعت حيل وصار صوت عالي جفلنه كلنه  .. واتجه للحديقه كبل ، وراه عمي سلامه يركض ..

مافتهمنه شبي غير  من جر حسين ابن عمي من كرسي ، وهبده بوكس على وجهه نومه بااكاع ، نوب من نام فوك حسين وضل يهبد بي  ، وذاك كام يصيح ويغلط تالي سب عمي الشهيد ..

لو تخبل رشيد اريدون يفكوه منه ، وذاك طاح عليه هبد على راسه خله خشمه من حلكه ماينشاف ..

جاسم وسيف جتفو تجتف يشيلو من فوكاه ، بيبي تعيط شلون تمالخو نسوان عمي اجن يتراكضن ، نوب مرت عمي ام حسين فضحتنه فضيحه بصياحها ويبووو موت ابني يبووو جتل ابني الله لايوفقك . .

ردت عليها بيبي غلط وتكلها اسكتي لا انوم القوري هذا براسج ..

سحبو منه ومافتهمنه شبيهم ، وليش انضرب ، بس حسين يصيح يكمز ويغلط ورشيد يريد يلوحه ويتلاوه ويه سيف وعمي سلامه  ..

تالي جدي عاط بيهم شلون يتعاركون ورجع على رشيد شلون تضرب ابن عمك بيتي ماتسحتي ولك شو صاير ماتحشم احد .

صاح بيهم بصوت عالي عجل انااا انااا رشيد الي فااتح بيوتكم تبوكوني ولك حسين الا اطلع كل فلس اخذته من خشمك يالردي ..

صاح بي جدي شهل حجي ولك منو بايكك ..

دفع ولد عمي الي لازمي  ، وكعد على كرسي فاحط باوع على حسين :-  ولك ماهامني الفلوس بالقرعان اخذت مني قبل وسكتت كلت خاف محتاج واستحه يكول ، واني نفسي خجلت اكله ليش ماخذ .. بس توصل بيك تاخذ فلوس سجاد وطلعني وجهه الكباحه يالنذل لا بالقرعان اسكطك وترجع كل فلس اليوم ..

عاط بي :- ماماخذ شي شوف انته وين موديهم وجاي تتبله عليه ..

سكت وباوع بوجهه متحلف حجه بهدوء :- رجعهم ابن عمي ، مو مالتي ، واذا تريد وتحتاج ، اني انطيك  بس الي اخذتهن ترجعهن،  ماناقص منهن كون فلس . 

كتلك مو عدي شوف منو استغفلك وباكك ،  وجاي تذب بلاك عليه ، عبن حايط انصيص مالتك اناا ...

جدي حجه وياه معصب شلون تتبلى على ابن عمك وانا جدك مو عيب صارلهم سنين وياك محد مد ايده هساع من نقصن فلوسك جيت تشمر حجي على ولد عمك ليش هيج اناا هيج ربيتكم ..

عمي سلامه كله :- يابه موهيج الحجي ، الفلوس الي رايحات يهجمن بيوت ، فلوس بضاعه كامله مأمنهن سجاد صاحبو عندوو ، يافشله منو من فلوسه ماموجوده ..

عجل يدورهن وين وداهن ، جوز ضمهن بمكان ، ونسى سبحان الي ماينسه  ..

يابه جاهل هو وينسى ،لو اول مره اطيح فلوس بيده ، لخاطر يضيعهن ، جااي اكلك هجمان بيوت فلوس بضاعه كامله لا مليون ولا عشره كوووم ...

حجه رشيد بهدوء يعني ماترجعهن حسين مووو..

ذاك ضل يكمزز  ويحلف ماعدي ، وجاي تتبلى عليه ، واني مااسكت شلون تضربني،  وتتبلى عليه وبالقران الا اشتكي عليك ، و اشمرك وره شمس .. نوب طبك جدي وياه هو عمامي كلوله انته فلوس عمت عينك ونستك اهلك ونحس خلاك تتهم حتى ولد عمك ..

فوك مايعينوك بالشغل وشايلين عنك ، وسادين مكانك ،  نوب تبوكهم ماتبوك الغريب لو ولد عمك مايهمك .. 

هو يسمع ويهز براسه ، وجهه غده احمر دم ، بس ساكت ويباوعلهم بقهر ..

باوع لحسين ، كله هذا اخر كلام عدك ابن عمي ، وتحلف جاي اتبله عليك ..

ذاك صاح بي ، موو عدي جااي اكلك موعدي ، شكد عينك كويه يااابه ، وتجي تتهني واناا ابن عمك وعايف الغريب ماتتهمه ولا تشكك بي ..

وفوكاها تضربي ، يابه بالله الا اشتكي عليك ، وابهذلك بالحبوس ، حتى تعرف الله حق ، ولاتتكبر علينه مو عبالك صار عدك كم فلس شفت نفسك ، لاااا يابه لهناا وحدك ، فلوسك هاي ماتفيدك ، من اشمرك جوه وابهذل اهله ...

جدي كله لا ابني مايكون خاطرك الا طيب ، خلي يولي ، باوع لرشيد طاح حظك اي والله ياووسفه عليك ، عبالك كلشي بالدنيا فلوس خلي فلوسك تفيدك زين ..

عمامي كلها طبكو ويه حسين ، نوب اخوه احسين يردون يهدون عليه و يعاركوو ، اباوع علا تبجي خاله اديها على حلكها وتشهك ، اسمعها تحجي تعااي يمه تكاثرو علينه تعاي شوفي فوك مابايكي . بجيت على بجيها شكد انقهرت ، اكثر شخص ممكن يحس بيهم اني ، لان عشت الظلم نفسه ، تشهك وتصيح تعاي يمه شوفي وحيدج ، تقربت عليها حظنتها ، ..

هو رفع راسه عليهم ، عيونه دم من القهر صايره ، باوع عليهم باسف هز راسه ضرب ايده برجله ..ويهزز راسه متأسف . 

جر جهازه ، وحط موبايل بوجه جدي كله شوف حفيدك ، ابن ابنك العود ، شلون ياخذ من حلال ابن عمه ويفشله ويه الوادم ..

احاجي ينكر ، كتله اذا محتاج انطيك نوب تجاوز عليه ، عاركته يكلي اشتكي عليك ، ولد عمي يجدي عيونهم فارغه حتى مو مثل الغريب ..

الغريب ماسوه سوايتهم سنين عايف فلوسي يمهم مانقص الف دينار ، حافظ على مالي بغيابي ، وابن عمي يغدرني ويخجلني ويه الوادم وبحظووري ... رفعه نظره عليهم اعتب وكارهم كلهم ..

تريدلك واحد ياجدي مو ردي بين احفادك ماكوو ،

الكل خنس ويباوعون على حسين الي سكت وضل يبلعم ، عمي علي جر الجهاز من ايد رشيد يتأكد ، وجهه انصدم ، عمي سلامه جر الجهاز  من ايد عمي علي ونطا لرشيد ، كللهم استهدو بالرحمن خلي نكعد نحلها احنه اهل واخوه ولد عم لاطلعون صوته عيب من عالم الغرب  ..

كللهم :-  باجر الفلوس يمي ، وتلم جوالاتك وبعد ماشوف ركعه وجهك يمي ، لا انته ولا اي واحد من ولد عمي كلكم تلزمون الباب ...

كال هيج ودار ظهره وكام ، اجه تقدم علينه جر علا من حظني وحظنها ومشه ، عافهم وراه متفاجئين بحسين ، جدي شال النركيله وشمرها على حسين، لزمه من ركبته تولاه راشديات ، ولد عمي كوه وخره من ايده ..

خافو علي لايوكع ، جرو حسين وطلعو بره بيت جدي ، عمامي فشلانيين جدي كعد مهدود حيله بينهم ..

رفع نظره عليهم ماعرفت اربي ، لو انتو ماعرفتو تربون ، بايك ابن عمه ، ابن عمه شغله وياه وترس جيبه وخلاه يكون نفسه وباكه ..

اندار على عمي علي صاح بي ، ولك ابنك بايكك كبل وانت ساكت وهالتجرأء وسواها وعادها عبن متعود احجي ؟؟؟ ...

ضل يبلعم ويباوع لمرته سااكت ..

هذا عود مزوج ثنين يعني ماهو جاهل ونكول غلط ، نوب مكررها اكثر من مره ، والله زين من رشيد ماجتله .. سكت عن حكه والله ...

ضل يضرب على رجله شابع قهر ، كلنه خفنه من موقف  ، حسين طلع وراه ولد عمي يتعااركون وياه ، لؤي ابن عمي سلامه ، صوته وصل ليمنه يكله رزقي انكطع بسببك يالنذل ..

عمامي يهدون بجدي الي كعد على كرسي ونهد حيله مصدوم باحفاده ..

نسوان عمي حجن شصار عليه مو يدري حالته لحسين مو شي ، واذا نقص منه ليش هو بعازتهم شكد حقنه وابو فليس ، ونفسه دنيا ، بخل على هالمسكين  جم فلس ، لو ماشايلي بالشغل ومعاوني ..

انداريت عليهن ، كاره صوتهم وحقارتهن ، ماعدهن رحمه ابد .. صح اني وياه ممتفاهمين مو صلح ، بس الحق ينكال،  شنو لاكيهن بالشارع ، دائما اشوفه تعبان جاي من معمل لو بملابس الشغل ومترب ويجي من بستان ..

لايروح سفر ولا مزوج ولا يطلع يتونس ، لو بستان لو معمل لو شورجه ، يعني لامهن بتعب وبعرك جبين ، وهذا ابو ايد الطويله هابد من عنده هبده تكسر الظهر ، نوب ينكر ابو النسوان ،

نوب انقهرت عليه ، من شفت هدو عليه اخوان حسين ، وعلا تبجي عليه ، صدك وحيد وماله احد ، شفت القهر بعيونه من يتعاركون وياه .. .

كعدت اباوع الهم ، اثاري الله هم يسلط ، ناس تاكل بناس ، عبالي بس علينه خبثهم ونحسهم ، طلع حتى على بيت ابو فهد هيج ...

ضل البيت متوتر ، وبيبي تدعي الله يهديهم ومايتكاتلون ، تتوسل بجدي يهدي نفوس ومايطبك ويه احد بيهم ، نوب خابرت عمي سلامه تكله صير محظر خير ، ولا تطبك ويه رشيد وتأيده اذا راد يشتكي على ابن عمك ، ...

خلي نحلها بينه ، عيب من ناس اذا سمعت تتشمت ، هو يرد مالي لازم طبه مرض ليش مافكر قبل ماياخذ الفلوس ، مافكر بابن عمه لو خسر شغله وصحبانه ومحد يأمن بي بعد ..

ثاني يوم جدي اتصل على عمامي ، وكاللهم جيبو حسين وتعالو ، نص ساعه وكلها اجت ، عمي علي شحط حسين شحط ..

سويت جاي بقوري جبير وخليت الستكاين  ودته بيبيتي وكعدت يمهم ،

ام حسين تبجي وتدعي على رشيد فوكاها ، تكول استخصر بي جم فلس ..

جم فلس يالمنافقه يامتخافين الله ، فوك الخميسن مليوم عزه بعينج ، فوك ماابنها هاجم بيت الولد ، تريد ياخذ تعبه ويفشله ويه ناس ويسكت لابنها ، كرت عينج اي والله ، هاي تربيتج العوجه ،

خلي نوب تعايرني ، اذا مالطيتها على حلكها ، على الاقل اني مابكت ابن عمي ، الي تارس حلكي وبطني ، وفاتح الي بيتين بدل بيت الواحد .. 

جدي سال عمي سلامه شكد المبلغ ، كله بالخمسين ، اندار على حسين المبلغ وين يالنذل ..

خميس يالردي تبوك ابن عمك بخميسن مليون ، شكالت ايدك من اخذت هيج مبلغ بلا وجع كلب ، تعب  يتيم هذاا ، شكه عمره ..

عاط بي وين الفلوس ولك موجاي احجي ويااك ..

همس بضوجه:-  صرفتهن حجي ..

ضرب على رجله :- لابارك الله بيك وين صرفتهن يالرعن ..

دنج راسه يحجي متوتر :- اخذت بيهن كاع بعقوبه جديده ،

صفك جدي ايد باايد الله لاينطيك اي والله تشتري ملك الك بمال غيرك بفلوس مبيوكه ..

اندار على عمي علي ، فلوس اطلعهن يااعلي من عيون ابنك فلس مايضل ، هاليومين الفلوس كون يمي ماناقصه ربع دينار ..

التفت على حسين ، والله يالسكط بالقرعان هذا بيت بعد ماادشه ، واذا دشيت اكسر ظهرك ، معمل رشيد ماتوصله ولاتجي جاي من عنده .. والفلوس ترجعهن الكاع تنباع وفلوس ابن عمك ترجع كلها .

شيرجعها جدي الكاع اذا ابيعها اخسر بيها ...

كام لحيله جدي يضربه ،ولك خايف تخسر بيها ،وماخاف من الله ، من خال فلوس حرام بطنك ، لو متعود على فلوس حرام انته ، ولك متدني نفسك على فلوس وتاخذها لو مامسويها قبل  ..

عمامي هدو وكلوله يردهن وغصب عنه ، حتى لو خسرت بيها احنه نجملك بس فلوس ترجع ، لايشتكي عليك ويسجنك ، لاتنسى عنده تسجيل عليك ،ولك هذا رشيد عبالك تغدره ويسكت ..

اتفقو هيج ، طلع حسين من يمهم  مزنبر فوك صخام وجهه ، وامه تبجي علي ، فوكاها كبر اي والله شكد ظلام ..

يومين والفلوس انجمعت ،اخذها جدي وراحه للمعمل يرضي ، كله شنو تامر يجرالك ، بس لاضوج عمامك يحبوك والله ،  جنزو لحسين وحتى تبرو منه ، ولو تشوف عمك علي حتى خجلان يجي ليمك ،ويعتذر على صخام وجهه الي سواه ابنه ..

هذا حسين صدك ردي ، بس عبنو زمال مايفهم ، نسوان ثنين بركبته وكوم جهال ،  ويومه معاركات ورايحات ابيت اهلهن عباله يعزلهن ويخلص ، تالي وزاه شيطان ، والا انته تعرفهم مابيهم احد يبوك ولا ياخذ شي مو اله ..

يكول ماحجه ولا رد عليه وجهه ثكيل ، عافه جدي وطلع ضايج ..

البيت جان مكهرب ايام بسبب هاي سالفه ، بيبي تروح لبيتهم تحجي ويه علا وتحنن بكلب رشيد يرجع يدخل النه ويزوهم مثل قبل ولا يكطع ..

سالفه اسحاق تناسيتها غصب عني ، وغشمت نفسي وسكتت ، اصلا مابيدي شي غير بس اعوفها للزمن يحل العقد ..

وره فتره اسحاق ، داك على ياسر وكله خلي نقرب العقد ، بدت تكثر المشاكل وابوي مريض خاف يصير بي'شي ، خلي نقرب موعد احسن ..

اني بين خايفه من جاي ومن عيشتي وياه ، بديت احس ماعرفه ولااعرف اطباعه ، هم راح يخيب ضني مثلهم لو صدك هو خلاصي من هاي عيشه وهذا ضغط ، بس صرت مثل بلاع موس كلمه ماانطق ، منو يسمع اصلا ....

امي ماقصرت خطيه جهزتلي مهري احسن مايكون ، احلى فستان واحلى حذاء وتسريحه ومكياج ، حتى صواني مهر جابتهم الي من بغداد ، قبل ايام ،

واجت تجهز وياي الصاله وتزين ، اجن بنات خالتي سعاد ميساء وميسم ، هنه تولن التزيين ،

وجابن صديقتهن ام صالون من بغداد ،  حتى تمكيجني من صبح انحظر ونجهز ، هند وخالتي سعاد فرحت بلمتهن شوي توتر خف عني ..

ساعه بال٢  تمكيجت وسويت تسريحه بسيطه ، حفله جانت بسيطه بس كرايب ماعزمنه احد لان  ام رشيد ماصارلها هواي ، علا مااجت ولا نغم ...

بيبي شابعه قهر وماخذه ركن ساكته ماتحجي ، بس لازمه سبحه وتباوعلي ، ماكدرت اغلس عليها وكفتلي وكفات محد يوكفها الي ، حمتني واني باشد الحاجه للحمايه ، خافت عليه واني بوسط ازمتي راعتني بوكت جنت محتاجه امي ...

رحت ليمها شبيج يكلبي ،، جنج مو راضيه .. دمعت عيني ..

عجل انتي راضيه يابنت حسنه انتي هم تورطتي   .

لاتحجين هيج بيبي خوف البيه مكفيني ..

من شنو خايفه ، مو انتي جتلتي نفسج عليه ..ودودتي لو هو لو مااركب ..

سكتت مدنجه ، كلبي يوجعني حجيه والله ممرتاحه لاتزوديها عليه ...

الله يهنيج ياجده ، اذا بيها صالح ربي يتممها عليج عجل اناا شريد غير سعادتكم ، واذا مابيها الله لايكتبها انشالله كملت تسبيح وسكتت ..

كمت من يمها جن شلت هم جبال..  باوعت بالمرايه ، والله مو مبالغه بس ايه من جمال شعر على شكار ومكياج بنفسجي فاتج يجنن ..

كالت حرامات يبيبي تطلعين لغريب مو لوليداتناا ..

ولدكم مابيهم واحد بي خير جده لازعلين .. ويمكن حتى الي راح اخذه هم نفس طينه بس حظي بعد شبيدي قابل ..

هزت راسها ودنجت ...

اخذتني امي وكالت اكعدي لاضلين تفترين ، راسي صار يطن من الهوسه ،  كابلني خالاتي و بناتهم يغنن بسكوت جدي مو راضي وحده اطلع صوت ولا تهلهل ..

احترام لابو فهد ، سلوى مكابلتني ومبتسمه وكل شوي جاره خصله من شعري تكول يخبل ليش هيج ..

بزواجج انشالله اخلي ميساء هم تجيب صديقتها وتمكيجج مثلي .

ضحكت والله ..

انشالله تدللين .. صاحتها رقيه تعاي هناا شكعدج هناك ..عقدت حواجبي ضايجه منها ، كامت من يمي خجلانه ..

دخل ياسر ضايج من شافني نصدم وكف ، زادت ابتسامه ، تحرسج عين رحمن ياول شطالعه ..

ضحكت ، يوم الالك يارب ..

ابتسم وندار يدور على ميس ..   امين الله يسمع منج كلبي فحم والله  ..

خف ايدك انته ، هم يله ..

جر نفس الله كريم ماضل شي ...

تقرب مني عندج طلبات شي ، هزيت راسي لاا ، ماعندج شروط ..

بس دراستي ..

سالفه دراسه منتهين منهاا بس غير شي ..

لااا  ..

خوش لعد  ،جاسم او اي واحد يسالج كولي ماريد شي ، شنو يكلولج كولي واطلبي كليلهم لا  ابد ماريد شي .  فاهمه ..

هزيت راسي قلقه خايفه من جاسم لايخربها ..

رجع للديوان وصدك الي خفت منه صار ، مافاتت ساعه وسمعت كبت العيطه وياسر هاج يصيح وينتر وجاسم يرد عليه هذا الي عدي مايريد طبه سطعش مرض ...

جدي ماله حس .. بس صوت ياسر و جاسم طالع وعمامي يكولولهم كولو يالله شجاكم ..

عاط ياسر لعد هذا حجي ، ليش هسه حجيت هسه فطنت ، شنو تلعب علينه احنه لعبه مالتك ..

هذا الي عدي اختي مالها طلعه منااا ، وهاي شروطي رضه خير على خير مارضه بلاها هالزواجه اصلا انا  من الاول ما راضي ..

شنو ماراضي ، تلعب بينه ،  ولك جاسم لاتخبلني ، لاتتصرف بحقاره  هاي اختج ،  شجاك تخبلت علينه انته ...

وذاك يرد اريد مصلحتها اذا مابي حيل يدبر بيت ومره ماانطي مره ، خلي يحير بابو  ماريد ابهذل اختي بالعوز ..

من شوكت انته مهتم بيها احتاجت لو لاا ،  دز خبر الهم وجوز ، ياجاسم لاتنكلب سالفه غير شي ..

عود شسوي مثلا ، تلاغو بينهم وتكامشو امي طلعت تركض عليهم تصيح .. كوه فكوهم وجدي ضل يغلط عليهم شلون اخوه تتكامشون بينكم ..

دخل ياسر شايط والوجهه احمر دم ، تلكيته مدمعه هاا يااخوي شسوه بيه عالمره اخوك ..

دنج راسه يتنفس بقله حيله .. اخوج حاقد وصار محبس بيد  عمامج وانا اخوج ..

ماخابر العالم وكايللهم شروط تكسر الظهر رضيتو بيها هلا بيكم،  مارضيتو لاتجون ولاتعبون نفسكم .. تالي متعاركين وياه وكايليه بلا هالزواجه احنه بعد منريد ناسبكم،  واتفل بهل شوارب اذا طبنه منكم بعد ..

كعدت على كرسي حيلي مهدود من قهر مو من صدمه ، لان تعلمت على صدمات ، كتله شراد اخوك...

رايد بيت هناا يمنه بعقوبه ملك  ، كون يعوف بغداد ويسكن ديالى ، وفوكاها تعزلون بحدكم حتى مو ويه اهله  .  وكون ياخذج هااسبوع ، الولد كله ماعدي يادوب مكفي علاج الوالد ، ومااكدر اعوف اهلي  ..

كله هذا الي عدي ، ان جان ماعدك تصرف على نفسك شلون تتقدم لبنات عالم  وتخجل نفسك ويه الوادم .. 

هزيت راسي دموعي وكعن ، لاتزعلين بعد اخوج والله انتي منحوسه ، مو قسمتج جاي اتشوفين الولد ماعده قسمه ونصيب يمج ..

خلي يولي هو واهله خسرانيين ، واخوج هذا نذل والله الا ارده اله اضعااف ، لاتتكدرين لزم جتفي يهدي بيه ..

كمت من يمه شابعه قهر ، على حظي وعلى نفسي مو على القسمه ابد ،  وطلعت بره بالحديقه ماعدي وجهه،  حتى ادخل جوه واشوف وجوه ناس ، اذا ماحجو بوجهي راح يحجون وراي ، عيونهم تحجي ،

كلوبهم تحجي ، رديتها يارشيد موو ، اخذت حيفك ، اباوع للفستان ، تلمسته بيدي ، لزمت وجهي مكياجي ،..

اخذت ركن بالحديقه شارده من اصواتهم ، لليل ومااجه اسحاق لا هو ولا اهله ، غيم اليل وطلعت نجومه ومااجه ، صفيت عروس  بملابس فرح بس بلا مهر .. 

امي كل شوي تباوعلي بقلق من باب وترد ترجع للداخل ، اصواتهم طالعه بعدهم متعاركين ، عايله ماعرفت شنو سكون طول عمرنه متمالخين .. صافنه رفعت راسي للنجم ، معقوله حس نفس مجاي احس هسه ، بفشله وبقهر ، وخجل من ناس ، عندي عتب بكلبي على الي خذلني ، وحركه بكلبي وراسي مصفرر ..

‏گتلهم يجي !..
ومن خيبتي ايضحكون ..
أطفى من الخجل منهم وأحس بالعار .

#يتبع ...

البارت طووويل لعيونكم 💜

تفاعلكم يهمني 💜