رواية ثأر مهري منهاا الفصل الحادي وأربعون 41 - بقلم اسماء ديمير

حجه بضوجه تقبل الله حجيه ..

منه ومنك يمه .

كمت على حيلي اروح من يمهم .. صاح سويلي جاي بدربج ...

انداريت عليه مصدومه هاي اول مره يحاجيني ..

ماندار عليه ، راح كعد يم بيبي ، انداريت اباوعله ، هاي حاجاني الي ، اي قابل اكو غيري ،

مشيت مستغربه من يمهم ، رحت خليت الجاي على نار ولابسه مشمر مانزعنه كوه اتحرك بي مزعج بس لابسه ثوب جواه ربع ردن ماكدر انزعه وين ابدل ..

تمشيت اكول بيبي تردون كعك ويه جاي ، اسمع مهامسهم بس صوتهم ماواضح ، تقربت من باب هو وياها نفس طينه ، ابد ماينطون نجده ويخلوك تفهم ..

من اجي يسكنون من اروح يحجون ، عبالي تحجي وياه بسالفتي لو عني ، بس انتبهت تكله اذا خوش ولد وانته تعرفه وصاحبك شكو بيها علا هم مو صغيره ، وانته بعد فتره اخذ بت عمك هم تخدمك احسن ماضل بحدك بهل بيت اطارد لحالك ..

يرد عليها :- شاخذ حجيه جاهل كلشي ماتعرف ماريدها ، شلون تكضب بيتي وهيه من توكف يمي ترجف ماتعرف تحجي ..

حرت وياك اناا ، عجل شتريد ، عطيناك جاهل وكلنه تربه على ايده مارضيت ، جنك هاوي شكه ياجده وتريد الي تمرمر افادك ..

لا هاي ولاهاي ماناوي اصلا على حرمه ..

شو احسك مزوج ورانه يجده ..

افااا انااا؟؟

عجل وين اكو رجال يضل هالكثر بلا حرمه ...

خير جنج سامعه شي وتفترين علي ..

ياااع جن سمعته صدك ياول ..

شسامعه ..

كول انته صدك الحجي لو لااا ..

يا حجي حجيه غير اعرف شسامعه ..

والله اذا صدك الا ازعل ، ابن عمك حسين حجه لجدك ، وجدك مارضه ورزله وكله لاتجيب حجي من يمك ، ومن سالني كتله ماكو هيج حجي يلفقون عليه ، رويشد خوش ولد ماعده دغش ..

عجل من تعرفين خوش ولد وماعدي دغش عليش تساليني ..

ياجده مارتاحيت الك بالقرعان ، كول مزوج منهي هااي ..

ماكو حجيه هيج حجي قابل اجذب عليج ...

شوو احلف بداعت امك ممزوج ..

لا وداعت امي ممزوج ابد هسه ...

ابد ابد ..

ضحك شجاج حجيه ماعدي مره هسه والله كاعد خالي مختلي ..

عجل وبت سلامه مو حرمتك ..

هاا بمحمد نسيتها بس هاي ماتتسمى حرمه حجيه لاتحسبيها علي مره ...

بالقرعان مزوج يارويشد وماتحجي الا يجي جدك واخلي الحجايه بحلكه ماطول تجذب ..

بصلات محمد ممجذب ، عليش اجذب ، جنت قبل جنت هساع لاا ماكوو ...

.
يااااا طبت على صدرها منهي هااي مزوجها ياول صخام صخمك ..

والله راحت سالفها باهلها ، حجيه اسكتي لافضحينه ، ضل يضحك ويسولف وهيه تخبلت ، ويحلف الها مطلكهاا طلع سرسري مزوج بالسر الفيسد بس عليه من حبيت وكلني نعل هو يزوج بالسر ..

وخرت من يم باب ورجعت للمطبخ لكيت الجاي محترك خرب اي والله كلبته بالسنك وسويت جديد .. نوب صفنت عززز طلع مزوج هاي منو تزوجها ياامسكينه ، بس شوو يكللها هاي قبل ...

شيقصد قابل مطلكها مثلا ، يمته تزوجها ، شو اني مادري ، ليش هو منو يدري اذا بيبي وجدي ميدرون ، هاي منو اهلها نطوها الواحد حتى اهله ميدرون ادري زواج نص ردن ..

بنات هالوكت كبر شامره نفسها على واحد مثله ، نوب بالسر ممعترف بيها ، خطيه سلوى مسكينه باولها واخذ عليها وحده ، كلت بس يروح احاول ابوك السان بيبي ، بس علي كدرتها هذا حفيدها طلع ابو نسوان ماتطي بي بكد شعره ...

خلصت جاي وديته الهم من دخلت سكتو ماحجو ثنينهم ، دنجت اخلي الجاي بالكاع ، المشكر شكببره جنه عباا كوه مسيطره عليه ، كل شوي يصير جوه رجليه واعثر بي ، خليت جاي ، ليش ما توه ارفع نفسي وينزع المشمر كله من راسي ويتكوم بالكاع وتطلع دشداشه نوم ربع ردان .

شهكت ياا عزاا ..
بيبي طكتها ضحكه كرت عينج ، عود تردين تتحجبين ، هاي من اولها وكع وتعريتي ، جريت الحجاب ورجعت لبسته ، ترى هو هذا المشمر مو مال لبس اكو واحد يسوي حجاب جنه كونيه مال حطب ..

رجعت اخذت ثوب طويل وطلعت من يمهم فشلانه ، بدلت بدشداشه طويله ،
هو اجه يروح صاحت وراه الحجيه اخذني يم علاا صار هواي ماماره عليهاا ، اخذها وطلع ..

اني كملت شغل البيت مرت عمي مموجوده كاضيتها يم مرت عمي حميد تعوف شغل وتروح ، تدري اكو ماري الخأدمه وراها تكمل ، لزمت مطلخ جلف ، والمواعين التهي بيهن ..

دك جهازي جانت ايدي كلها زاهي بين ماغسلت ايدي انكطع ، اسمع صوت رسائل ..

شلته اشوف شنو ، اجت رساله على جهازي فتحته صوره من رقم غريب على الوتساب جاي تحمل .. عقدت حاجبي واني اشوف صوره قميص ..

هاي شنوو .. ركزي بي بنت خاله ايده علي القميص ، ولازمته مصبغه اضافرها اسود وعدها وشم باصبعها الصغير حرف s فوكاه تاج ..

قربت موبايل من وجهي اركز زين ، هاي شنوو .. خاف بالغلط منو هاي دزيت علامه استفهاممم ..

طلعلي.. جاي الرد .. جريت الكرسي وكعدت ..

دازه ههههههههههههاااااييي

ماعرفتي قميص حبيبي الروح طلع صدك اكو نسوان ماتسوه نعال بسوك نسوان ...

فزيت ، شهل الفاض ، احس كلبي تخربت حسيت من صدك راح يوكف .. اريد اكتب ماعرف ايدي ترجف .. اكتب وامسح ياربي اصابعي شبيها اريد اكتب منو انتي وحبيب كلب منو تقصدين ..

رجعت للصوره لكيتها ماسحتهاا الكلبه .. ياقميص ماركزت بي بس لونه سمائي وبي علامه تايكر ..

دزيت بصمه كوه احجي .. منو انتي شنو حبيب كلب شجاي تخربطين ..

دزت حبيبج يكلي خطيبتي ماتسوه نعال بسوك نسوان .. اثبتيلي العكس واتصلي عليه شوفي يرد لاااا هههااي ..

كتلها خطيبي شنو شجابه عليج انتي منين تعرفي خطيبي ..

شلون ماعرفه هو متريش بحظني اعرف كل تفصيله بي حبي ..

لا يارب شجاي تحجي ، بجيت لاارادياا ، اريد اسيطر على نفسي ، هالكلبه جااي تحجي ،

اتصلت عليها اليوم انعل اهلها . بسيطه منو سلطج علي ..

سدته ونوب نطتني حظر .. عطت يابنت الكلب .. زاد البجي واديه ترجف اريد اسيطر على نفسي اديه مايعينني ابد ...يارب لاتخلني اختنك مو وكتهاا ابد ..

اريد اشوف هاي منوو ، ياررب لاتعاديني انته هم ، صحتي يارب صحتي .. كمت كوه اتنفس نوب جسمي يرجف .. مشيت للجرار كوه فتحته طلعت بخاخ .. جريت منه نفس .. بيدي موبايل اريد اطلع رقم اسحاق ايدي ترجف وعيوني غوشن ..

طلعت رقمه ودكيت استندت على ميزز .. دك مايرد ..

رجعت دكيت مره ثانيه ماكوو ..

دكيت مره وثنين وااربعه وخمسه مادري شكد بس لحد ماردت عطت بوجهه وين جنت واني ادك عليه ..

هاي شبيك ..

وين انته ياااحقير ...

هااي شبيج طايحه الحظ شبيج تخبلتي ..

وين انته هااا احجي ادك عليك ليش ماترد وين انته يانذل ، كمت اشهك ابجي ..

بالبيت مدفوس وين يعني الله ياخذني كون انشالله .. شبيج ..

افتح كامره يله شوو افتح كامره ..

لااااا انتي تخبلتي رسمي ..

افتح كامره اسحاق لاتخبلني وين بالبيت وربي مو بالبيت يالنذل ووووين انته ..

بنت الكلب لاتتجاوزين شبيج لاتصيحين شنوو اخوج صغير شجاااي تخبلتي ..

لزمتني رجفه ، بجيت من قهري نوب يسب بابا ، حجيت منهاره افتح كامره اسحاق ..

سد بوجهي .. نوب تخبلت كعدت بالكاع ابجي .. دك عليه واتساب كامره فتحته ..

باوعت عليه وجهه احمر ويفرك بي عصبي كال وجع شبيج .. يباوع عليه مستغرب هاي شبيج .

بجيت وين جنت باوعت لقميص نفسه اي والله نفس قميص .. سمائي ..

وين جنت اسحاق لاتخبلني وين جنت لاتكذب عليه .. هذا نفسه قميص انته لابسه هو اي نفسه والله ..

شبي قميص .. ماخذه دواج انتي ليش هيج منهاره ماخذه شي زايد ويه دواج ..

عطت بي لاتستغفلني اسحااق ، لاتسوي هيج موجاهل تضحك عليه ، بهل كلمتين ، بجيت كتتله تكلي خطيبج يكول ماتسوين نعال بسوك نسوان ، اني مااسوه انعال منووو هاااي منو هااي الي جنت يمهااا..

صفن بوجهي يفر بركبته و يسغفر .. حجت كتله كوول كلبي كام يوجعني ، جاي تأذيني والله ، منو هاي لاجذب توه دزت صوره قميصك هذا لابسه انته ..

تنهد كال شبيج بابا اني بالبيت توه جاي من شغل ، وانتي هريتيني اتصالات ، هسه انطيج امي تحلف الج توه اني جااي من الكبر من شغل ، تلكيتني عياط وغلط ليش هيج شبيج ..

منو هاي لعد دزتلي صوره قميصك وتكلي خطيبج يمي ..

يااصوره ياااقميص ..

وحده دزتهم على وتساب توه والله ..

صوريلي محادثه بالله ..

رجعت على محادثه لكيتها فارغه ماسحه كلشي النذله .. بس مكتوب تم الغاء رساله ..

صورت المحادثه .. دزبتهن اله .
كال هااي شنوو فارغه شبيها ..

مسحته والله جانت رسايل موجوده ..

شاربه دواج ..

نترت اي اي ..

شنو ماخذه وياه غير دوه الي نطا الج دكتور ..

عقدت حاجبي معصبه حيل .. وشهكه بعدها بصدري ..

مو احجي ويااج .

ولاشي كلشي ماتسممت غير دواي ...

صايره فرد نوب بلا اخلاق وبلا اسلوب تخبلتي انتي شنوو..

شوكت اجيت من شغل ..

توه اندفست .. فر الكامره على غرفته كلها هااي شوفي خبله ارتااحي .. صاح يماااااا ..

طلع بره الغرفه يصيح ..يمااا ..

صاحت خالتي هااا اسحاق شبيك يوووم ..

كالها شوكت اجيت من شغل ..

ردت توه ليش شبيك .

ضحك كالها هاي الخبله تكول وين جنت امبين هرمون الغيره صاعد ..

اسمع سوت ضحكتها كالته سلملي عليها.. بعدك ماشفت شي يمه الغيره حراكه بعد كم يوم تغار عليك مني ومن ابوك ..

سد الكامره خلفيه وشغل الاماميه ابتسم سوه حركه يم راسه خبله ..

البحه بصوتي كتله اروح اني ..

هاا سممتيني واروح اني موو هيج ..

سكتت كتله تعبانه بااي سديت جهاز .. واني جسمي منتهي ..

رجعت لمحادثه هاي نذله ايدي والكاع كلشي ماكوو ماسحه كلشي نوب حاظرتني ...

دكيت على رقم من رصيد يطلع مغلق . بال١٠ مرات ادك مغلق .. راسي يوووش واذني طنه بيها من الالم ..

كعدت بالكاع رجفه بيه تخوف ، اول مره تصير عدي ، نوب انجمعن كلهن عليه ، حسيت جاي يكذب انا اصلا عدي شك بي وهاي زودتها عليه ، منو هاي وشتريد مني ، احد مسلطها عليه شمسويه الها وهيه تتصرف وياي بحقاره ، حاقده عبالك تعرفني ...

اسحاق دك عليه بعدها مارديت كارهته حيل ، ومنا بالي ذيج سالفه اكله لو اسكت ، زين شلون اعرف نفسي مابيه شي ، بيبي من اسالها تكول مو هذا الي ردتي انجبي واسكتي واخذي يله فوختي عليه ، واذا بيج شي هو يستر عليج ..

خلتني اتخبل بالزايد ، كرهت حتى نفسي ، ضليت بين اني بعدني بنيه وبين اكول لاا انشالله ماكو هيج حجي ، زين رشيد ليش'ماخرب خطبتي معقوله لان كرهني لو لان بيه شي وراح يكسرني ويقهرني ...

ااااخ لو بيبي تحجي وتبرد كلبي ، ماكوو بس رزايل ، واذا فكيت حلكي وسألتها واكللها تأكدي منه ، ترد خلي الي خطبج يشوفلج حل ، مو تكولين رايدني ، خلي هو يلمج ...

نوب اكل ملامه واسكت ، ضليت ايام الكأبه اكلتني اكل ، كارها دنيا ، من عد حيلي الي انهد ، ماكو طلعه عد حديقه كلش اذا رحمتني بيبي تاخذني للبستان شوي وارجع ،

هند هم لاهيه بيتها جديد ، وفرحانه بي نوب حبله كطعت رجلها ، وماتحجي تخاف لاتطرح مثل ذيج مره ، خالتي اصلا ماتوصل ولاتجي ، متجنبه نسوان عمي والمغثه ، وانا مثل جلب لا طلعه لاطبه لاكليه لا شوفه اهلي متت بمكاني ..

مو عيشه حجيم من صدك حجيم ، نوب محد راضي على رايحه وجيه اسمع مغثه ولازم اسكت ، وين جان دلال وين بابا عني ، والله من صدك انذليت ذله محد شايفها ، صعبه من انته ابن دلال وبعدين ينداس عليك ..

ابو فهد والله اشوف شماته بعيونه ، من يجي ويشوف شلون مكسور ظهري بالشغل وحجي نسوان عمي ، صح ماطخ السانه بالساني بس اشوفه متشفي ، اخوي ابن امي مامار عليه ولاسأل ولاحتى بالغلط ..

يجون يتعللون يم بيت جدي بليل كلهم بالحديقه نركيله وجاي ، واني اسوي بيدي واخلي على سنك ، بس ابد مافديوم صاح عليه، وسأل شبيه مابيه .. الوحيد الحايره بيه، بيبي خاصه مصروفي ، من علاج لو ملابس ، لو ادويه لو مضمده من تجي للبيت تضربني ابر ..

ضعفت مو مثل قبل ، حتى لاحظت شعري بده يوكع من قهر ، اسحاق ابتعدت عنه وكلام شبهه انكطع ، مليت وكرهت وضعي وياه ، مو مثل الاول اشوفه دربي الوحيد لو الشخص الي راح ينقذني من هالعيشه ..

كمت اشوفه حاله حالهم، هم مصدر اذيه وعذاب ، هو خلكه صاير ضيك مايتحمل حجايه مني ، مايوم دكيت عليه اذا ماسديته ابجي ، اكله اكو وحده دزلي رسائل وصور ، مايصدك ، واذا صدك يكلي غلسي وحده حقيره وجوز تريد تخرب لاتهتمين ...

بطلت احجي ورسائل الاستفزاز مستمره دمرت اعصابي خلتني انهار ، كمت اشوف واسكت واكل بروحي ،

علا تجي يمي شوي تنقهر عليه من شوفني مكتأبه وبس اريد سبب ابجي ، خاصه من بيبي تكللها محد يمها والكاها تبجي بحدها مثل الخبله ، مو خبله والله بس محد يفهمني مو مدلله والله بس اكو من ياذيني ومااكدر احجي ..

لان الحجي ماينفع ، بس احس بملامه محد يواسيني او يوكف وياي ، سكتت بس سكوت دمرني من داخل اكل صحتي وعافيتي ،

علا تجيب خيوط حياكه وتريد تعلمني حتى التهي وياها ، صح علاقتي بيها تحسنت بس اني جريت نفسي من تجي بس ساكته مااحجي نادرا ..

فد يوم كاعد بالكاع بالصاله ، جاي احاول احوك جواريب وماتضبط وياي وبيبي تكلي لا منا فوتيها ، لا هيج يالغبره ..

وندكت باب ، كامت بيبي تفتح ، دخلت وراها بنت من شفت هيائتها كشت روحي كمت لحيلي اشوف منو هاي ..

اجت تتماوع بمشيتها لابسه صايه سوده ، نوب مفتوحه كلها من جدام ، وجواهه دشداشه حمره ضيكه فيزون .. وشال لافته من جذب ونص صدرها طالع لعبت نفسي من شكلها وهيأتها ويييع هأي شنو شهل قرف ..

وجهي مكشر وتقربت مني اطك بعلجهاا .. باوعت لبيبي اشرت براسي ، منوو هاي ؟؟؟!!

كالت والله مادري يمه ، كالت اناا اعرف هناء وجيت عليها بسالفه ..

وكفت مخصره تحجي بمياعه :- اوو شلونج يداده .. انتي هناء ممم اي والله جنج انتي هنوو ..

رفعت ايدها تعدل كذلتها ، لفت نظري اصبعها ، ركزت بي عاقده حواجبي ، بس وشم حرف s مو غريب عليه والله شايفته بس وين ..

قطعت صفنتي بكلامها :- باع حبي جيت اكولها بوجهج وجدامج ، ليش بعدين تكولين اخذتي الرجال مني ، لاحبي مااخذ شي مو الي اني تأشر على صدرها ..

تلوك بالعلج وتكلي :- خطيبج الي هو حبيبي فدوه لعينه .. يحبني ويااابه بالعباس وانتي ممحلفتني يمووووت بيه وتفر بيدها مثل محتره ..

بس يكول ماريد اكسرها ، تحبني صار سنيين وخطبتها .. وعيب افشلها جدام ناس وافسخ خطبه عنها مهما تكون خطيبتي ..

بس اني ماردت نبقه نضحك عليه وهالجيت كلتها بوجهج .. بعد انتي شوفتج دليل حبنه وشلون نحب بعض وبكيفك .. اني عليه بلغنج ليش تكولييين ..

واكف اسمع ، احس شعر راسي وكف من جرأتها ، ممصدكه اكو هيج قابليه وهيج بشر قبيح بافعاله ..

جسمي يرجف من صدمه ، اكو برد دك بعضامي ، عيوني يرمشن حيل هاي شتكول .. كوه حجيت مختنكه اريد املخها ، بس جسمي برد دعه خركه ... انتي منوو ..

حطت ايدها على صدرها وضحكت .. اني ؟؟؟

علت ضحكتها وردت مترهيه .. اني سمرمر يعمررري سمرمر

باوعت لبيبي واكفه متصنمه مثلي انداريت عليها من حجت ..

رفعت حاجبهاا تباوعلي بمكاره .. هالكد تحبي ؟!!!!

يااعيني شسوي بعد همه زلم يحبون الحاره المالحه .. مايحبون الشكر والفههاوه . لاتزعلين الله يرزقج بالاحسن منه ..

بلعت ريك كوه .. حجيت بتعب .. كتلها امشي اطلعي بره انتي وحده جذابه يله بره ..

طحتها ضحكه ومالت بخصرها جرت موبايل من صدرها و كلبت بي مدري شسوي .. اني جسمي يرجف من خوف والصدمه .. بيبي وراي تباوع بأسف .. اريدها تحجي تنقذني .. بس ساكته وتهز براسها متحسفه .

خلت جهاز بوجهي اسحاق واكف كبالها ويضحك بطرك شورت وفالينه تعلاكه بملابس البيت يعني ماخذ راحته ..

وهيه بملابس بيت دشداشه نص ردن فيزون ، جنه واحد طاكهه الهم من بعيد بس هاي بيت مو بمكان عام .. دموعي نزلت كعدت على التخم مهدود حيلي .. كتلها وشتردين هسه ..

تقربت عليه دنجت راسها واشرت باصبعها عووووفي .. انااا اريده الي .. لزمتي صدرها ..

جديتي نترت بيها والي امشي مناا لابارك الله بيج ولابالخلفج تربيه سزز ، اصلا احنه بعد منريد هيج ، نسب سكط ، يله بره تتهنين بي انتي وياه نفس النجاسه ، براا يله ولي نكستي بيتنه ، لا بارك الله بالخلفج على هالتربيه يالمعرايه ..

مشت وهيه تتمضحك .. جسمي كله منهار يررجف ..

سمعت صوت جنت اتمنى اموت ولااسمعه .. كوه الله حجيه ..

رفعت عيني عليه ، فاتت من يمه هيه تتماوع وتباوعله من فوك ليجوه ، مبتسمه هو هم ماشال عينه منهاا ، لحد ماطلعت هو لف راسه يباوعلها من طلعت من باب ، رجع باوع على حجيه خيرج حجيه جنج مو زينه ..

باوعلي مبتسم ..

كمت من يمهم بدون مااحجي لو التفت عليهم .. جسمي يخض خض بردت كلش احس راسي كام يوووش .. اريد الزم المحجر حتى استند ماكوو دنيا افترت بيها وسودت كلش ..

#يتبع

الي يريد اسرع بالاحداث اكله يووواش ياداده 🙂 قابل اكتب هلو زعلت رضاها تزوجها وعاشو عيشه سعيده ..

حلات القصص بالتفاصيل واني تفاصيل الي اكتبه مو ممله ترى والله 😕

تفاعلكم يهمني 💜