رواية ثأر مهري منهاا الفصل الثاني وثلاثون 32 - بقلم اسماء ديمير

《《البارت ال29》》

#ثأر_مهري_منها

بقلمي "أسماء ديمير "

منو هاي امير ياول ..

المره الي كتلي اسوي ماطور الماي مالتهم استاذي ..

صفنت هااا اي اي شبيهم ..

امها للمره توفت وماعدها احد يقوم اليوم بالدفنه وكالت الي بالكت يسوي علينه فضل ويجي يدفنها ،

هزيت راسي ضايج :- هاي شلون شغله يالله احد كللها انا دفان واشتغل عد الخلفها ، اشرلي عمي سلامه شكوو .. هزيت راسي اله ساكت واسمع لذاك شيكول..

كتله كوللها يابه تشوف جوارين عمام خوال شنو ابتلشت بيها انا ودعمت ابنها خما بتلشت ..

- استاذي اتصلت تبجي وتتوسل تكول ماعدي احد شسوي ..

- تشوف جوارين صخام عزاا شلي لازم اناا

سديته منه ضايج مره لو لزكه .. عمي سال شكو ، سولفتله عليها وعلى ساعه كشره الي شفت ركعه وجهاا ..

ضل يحجي مو راضي عيب وانا عمك ، من شوكت مره تنخانه واحنه نغلس ، مو تكول ماعدهم احد عجل ياهو يدفن المره ، امشي يابه امشي دليني بيتهم انا اروح خليك انته هناا ..

شو مدري شلون صاير وانا عمك ، من شوكت نشوف ناس محتاجتنه ومانمد ادينه نساعد ، فكيف اذا حرمه ميته ومالها دفان بالقرعان عيب عليك ...

كام كبلي يمشي ، طلعت وراه ضايج ، اشرت لعبد عيونك على معمل ياول ، هز راسه وطلع يركض يكعد بالمكتب ..

ركبت بالسياره ، وعمي يعاتب ، ليش هيج خربان وصاير مااتحاجه وماجنت هيج ليش تزعل عالم منك وتكره الوادم بيك ..

درب كله حكم مواعض انا شبعان منها ومالي نفس اسمع ، بس اهز راسي ،

لحد ماوصلنه لمكان سكنها للمره لكيتها كاعده باب العماره تبجي ونسوان داير مدايرها يواسن بيها . حالتها حاله شعر طالع والوجهه احمر شهل منظر يامحمد..

ابنها بصفها يشهك ويبجي على بجي امه .. من شافت سياره وكفت على حيالها ، سلمت وكتلها وين ودوها للوالده ، حجت وحده من الكاعدات يمها يمه اخذوها الزلم خيره يسولوها شهاده وفاه يمه..

سالتها بيامقبره تدفنون نطتني عنوان .. اخذت عمي وتوجهت للمستشفى ، لكيت مخلصين الاجرائات كلها مال شهاده وفاه ، بس طلعنه بيها للمقبره دفناها ..

عمي سلامه وياي انقهر عليها هواي ، شلون ماتت ولا ولد ولااحد وكف بجازتها ، لليل يله فضت سالفه ، تسوكت الها وعمي شال ١٥٠ الف حطهن بالعلاكه كال اجر وثواب خطيه ، اخذتهن للشقه دكيت باب طلع ابنها سالته امك وين ،

اشرلي جوه ، عجل صيحها الي ..

طلعت الي هيه بثوبها الاسود ، عيونها حمر دم من البجي ، سلمت واشكرت مني حيل ..

نطيتها مسواك وكتلها اي شي تحتاجو دكو على عامل وتدللون ..

ماتقصر ماعرف شلون اجازيك ..

هزيت راسي ودرت ظهري امشي .. بعدين التفتت عليها ردت اسالها ، لكيتها واكفه بمكانها ادحك عليه ..

كتلها عجل زلمكم وين ، من نسوان بحدجن هان ..

همست خجلانه ماعدنه زلم ، ناس اخذتهم الكبور وناس اخذتهم دنيا ...

:- عجل وزلمتج، وينو

رفعت راسها عليه ، الي تزوجته مايستاهل ينكاله زلمه ،

عقدت حواجبي ، حرمه لوحدج وكعدتج هنا لوحدج ماترهم بعد ، شوفيلج كرايب لو احد احتمي واكعد يموو ،

عفتها ومشيت بلا ماترد عليه ..

رجعت للبيت صافن بامرها حيرتني هالبنت ، شكلها مو راحه بس السانها مايشبهه شكلها .. توه دشيت البيت تلكتني علا ، وجهه اصفر ، شبلاج انتي الاخرى ..

:- ليش ياهو قبلي مريضه حتى انا اصير الاخرى ..

:- مالي خلكج علاا شبلا وجهج تعبان ...

:- مادري دايخه وراسي يوجعني مدري شبيه ..

:- هاي شنو من شوكت هيج ..

:- من وفاه امي ، احس راسي ثكيل وخاصه من ادنج وارجع اكوم كبل ادوخ ..

:- عجل هذا ضغطج ياول ، ديربالج على نفسج لاضغطين على روحج بالشغل ..

:- لا وين بنات عمي يوميه يمي ، رقيه وسلوى يساعدني ويكضن الوكت وياي ..

:- خوش عجل لاتخلين بالي عليج يرحم اهلج الي بيه كاافيني ،

هزت راسها سالتها على فهد كالت اجه صبح والمغرب دزت عليه نغم حماها اجه اخذه ، كتلها منا وجاي نعلمه علينه ، كافيها نغم جهالها نوب فهد ، مو خوش سالفه هاي لو نغم لو يكلب البيت علينه ..

دشيت سبحت ونمت ثاني يوم صبح طلعت لبيت الحجي ، اول مادشيت تلكتني الحجيه تبوس وتعاتب ليش'مامر ،

حجتي جانت شغل ، وماعدي مجال ، عجل انته شغل واخيتك هم ماتمر عليش ياجده شمسوين الكم احنه ..

:- اساليها جده انا ياهو مالتي قابل مانعها منكم ..

هزت راسها ضايجه :- من يوم وفات امكم وانت واخياتك كطعتو عنه طلعت المحنه من امكم مو منكم ياجده الله يرحمج ياام عدنان .. سكتت ضايجه شافت العتب ماله نتيجه ..

سالتها على جدي كالت بالديوان روح دش يمه هو هم شايل على خاطره منك ..

اول مادخلت سلمت عليهم ، حجه عمي حميد :- عودن الجلب العضك اذا نلزمه نجتله شبلاك يالكطعي ..

:- شلازمته هالحجي عمي ، الي يفكدني يندل دربي ماهو بعيد عنكم ..

:- عجل ياب تريد احنه نركض وراك وندورك مو بيت جدك وتمر عليه وتسأل ..

:- عذري وياي يااعمي شغلي مامنطيني مجال ، افتر واسال الي بيه كاافيني ..

جدي كطع سالفه وكلي تعال جاي جدي ، كعد يسأل على شغل وعلى المعمل ، التهو كلمن بسالفه عاد هو دار عليه وهمس يم اذني ،

ليش بعد جدك كطعت عنه ، ادري احد مزعلك احد مسمعك انته واخياتك شي ، ليش ماتمرون علينه ..

:- ماكو شي حجي حكك عليه ، بس تعبان وكاضي من شغل ..

:- ذاب روحك على شغل حتى تنسى ، الشغل ماينسي ياجدي اذا ماالكلب كره ونسه من يمه . .

درت وجهي عنه خايف عيوني تفضحني ، يكفي لون وجهي فاضحني ، يكفي صفناتي بالشغل وسهر ليلي عليه ..

صبو الغده تغدينه ، كلها موجوده حاجاني عمي حميد ، يابه رشيد قبل كم يوم ، اجو ناس من طرف المره ، مشايه على اختك ، بس احنه اجلنه موضوع ، وكلت بس تجي واشوفك افتح الموضوع وياك هال صار وكته شتكول يابه ..

:- مو وكته هالحجي عمي ، تراب امي بعده مانشف وترديني افكر بزواج اختي ..

:-عجل ياب حلال عليك وحرام عليها ، مو انته عقدت على بت عمك شو ماكلت تراب امي ، زوج اختك يابه الي بكدها عدها ثلاث واربع جهال ..

:- انا وضعي يختلف عن وضع اختي عمي ، وانته تعرف كلش زين فهالكلام ماله لازم ..

رد عمي علي مايد كلام عمي حميد :- عليش ماتزوجها ، شنو معناه ضلتها يمك ، وشو بيتكم فرغ والبت تكظي نهار بوحدها زوجها يابه ، خلي تفتح بيت وتكون عايله ، قابل تضل طول عمرها شاكل رشيد وشنهو شرب رشيد وتخدم بيك ..

نداريت عليه ضايج :- شاكيتلك الحال هيه عمي وجاي تحجي هيج ومستثكل اكلتي وشربي ..

نط عمي حميد :- لا عمي شنو تشكي ، بس كعدتها بيتك غلط يابه بنت طول نهار لحالها عليش ، وانته منا خاطب هم فتره وتتزوج وتجيب الحرمه لبيتك ، وتخدمك بس اختك ضلتها يمك ماترهم خلي تروح بحال سبيلها ...

:- وهذا منو اصله من وين ابن منو شنو يشتغل ..

حجه عمي حميد :- اهله خوش ناس ، يصير ابن اخوها للحرمه ، طالب كليه مثغف يعني ..

: عجل كتلي طالب ، يعني لاشغله ولا عمله ، لكمته ومصروفه من اهلو ، شلون راح يفتح بيت و يدبر مصاريف مره ..

:- انته كول اي وانا عمك وهيه تلم انشالله ، اهلو وعمامو كلها تفزعله وشغل سهل ،

:- الله كريم عمي

:- يعني ننطيهم خبر بالموافقه

:- ياموافقه يرحم اهلك عمي'شبلاك مستعجل ، خلي افر'سالفه براسي واسال عنو وعن اصلو ومن اقتنع بي اسال البنت وياله ..

:- تسال البنت نوب ول ياب شجاك انته ، من شوكت بنات عدهم راي فوك راينه ، جنك صاير حسن ثاني ياولوو

رفعت نظري عليه غضبان :- والله عداه العيب لعمي حسن ، بالقرعان محد طلع يفتهم كدو ، ماغلط يوم اخذ شور بنتو ، بس احنه ركبنه غلط من ساسنه راسنه ..

همه ماسكتو وانا هم ، تالي جدي هده الموضوع وكال سدو مو وكته ، اشرلي اهدء ابني شجاك متحمل علينه ..

ضجت حيل منهم :- مو وكته هالحجي ، خلي تمر فتره على وفاه امي ، والله كريم ..

كمت لحيلي اطلع صاح جدي وين يابه تعال ، بعده جاي ماصبو ، رديت عليه جايه شاحنات اليوم تحمل بضاعه ولازم اوكف على روسهم ..

اسمع دردم مال عمامي ياهل شغل الاسود الي مايخلص ..

صميت عيني واذني وسكتت ، انداريت عليهم ، ولدكم خلي يلتزمون بشغلهم لا الزمهم الباب ، ولد الغرب يركضون ركض ، ولد عمي يسختون ، محد حجه عفتهم و طلعت من يمهم مغثوث حتى مامريت ودعت الحجيه ، كعداتهم تسم البدن سم ..

مريت على معمل اريد ابن كلب يفك حلكه داشكه اله ، ادحك لؤي ابن عمي سلامه لازم القائمه ويتبع البضاعه ويرقم ، ضنيت اليوم هم مايجي حتى طردته تصير حلال ..

بقه حسين دشوف الارعن هذا وين ..

دشيت للمكتب ضايج ، راجعت لحسابات وعدد شاحنات ، وكم عدد المخازن الي توزعت عليهم بضايع ..

طلعت ظرف اشيل الفلوس من خزنه واضمهم بالبيت ، لان اليوم يوم تسليم فلوس مال البضائع ، عقدت حاجبي مستغرب ..!!

الحسابات تختلف عن المبلغ الموجود ، رجعت اكلب وادقق الحسابات مضبوطه ، بس المبلغ الي بالخزنه ناقص ، بلعت ريك مزوهر من الي جاي يصير ، قبل فتره طارت بالتسعميت الف وسكتت ..

بس هالمره المبلغ ثلاثه ونص يعني مو قليل ، شنو يارشيد بدو يبوكون بيك ، وانته مثل الاطرش بالزفه حاط اديك بحلوكهم وفاتح بيوتهم ويبوكوك ..

راجعت لحسابات للمره الرابعه وهم مابيها غلط ، بس الخزنه والي بيها مو تمام واكو نقص بيهن ، محد يعرف الرقم سري غيري ، ومحد يدخل للمكتب ويكعد بمكاني غير عبد ،

انداريت للخزنه غيرت الرقم صار بالسنه ممغيره ، خليت فلوس بالضرف بيهن بال١٠ ملايين كلت بعد مااخلي هنا شي ، غمضت عيوني بتعب ماعدك دليل عليهم وماتعرفه منوو ، الزمه لزم يد وسكطه ..

صحت عبد بصوت عالي ..

اجه يركض مفزوع .. تم تم ابو فهد ..

:- منو دش هنا قبلي ..

:- محد ابو فهد بس اناا ...

:- دققت الحسابات اليوم موو

رد عليه مرتبك :- اي والله وكلها تمام ليش اكو شي ..

:- اشرتله ولي جيبلي جاي بساع .. امشي

وكف مستغرب لهجتي وياه .. عطت بي انكلع شبيك تصنمت ،

طلع يركض ويتلفت عليه ، اهز برجلي اريد اهدء ، الله يشهد ماهامني المبلغ فدوه لتراب رجليه، بس صعبه تنغدر من ناس انته فاتح بيوتهم ، كلها طلعت تشبهج بت حسن كلها غداره مثلج ، من يوم الي غدرتي كمت مأمن حتى بنفسي ، جن فعلتج كشفت وجوه ناس الي وبينت سواد وجهم ..

دش عبد شايل الجاي وايده ترجف ، رفعت نظري عليه مركز وياه وجهه مرتبك ، سألني محتاج شي بعد ..

ماحجيت وياه دنجت راسي اخوط بالستكان .. اشرتله بيدي امشي منا ..

شربت جاي ، شلت ظرف وطلعت شفت لؤي بالباب اشرتله تعال .. اجه يركض ..

:-حيالله ابن عمي

رديت عليه بضيجه خلك :- الله محييك ، عجل وين حسين ،

:- راح يودي البضاعه للشورجه لمخزن سجاد ..

:- غياب ماريد بعد لؤي ،

رد مرتبك لا لا انشالله متنعاد ترى صار عدي ضرف وهالبطيت عليك الله شاهد .. وحسبن نفس الشي لاا تاخذ على خاطرك اخر مره انشالله ..

سالته شنو هاي كراتين المشمره على صفحه ليش ما معبيها بالشاحنات ..

كال هاي اضرار جانبيه تكسرت الشيش مال مربا اثناء التحميل ..

عجل لاضرار بالعشر كراتين ياول شبيها اديكم مكسره لو بيها شلل اطفال ماتعرفون تشيلون كارتونه بيها ١٥ علبه ..

ابتسم يخفف التوتر :- تصير ابن عمي باحسن معامل تصير

وجهي جامد وكاره دنيا ، درت وجهي ورجعت للبيت ، اول مادخلت شفت بت عمي حميد خرب هاي لو هيه تطلعلي لو ابوها ، لاحظت تفتر بالمطبخ لحالها وماخذه راحتها لاشال لاصخام عزاا ..

كحيت ودشيت مدنج ، سالتها عجل علا وين كالت دايخه ودخلت تنام شوي ..

فز كلبي بهل حجايه شبيها ليش دايخه ..

ذبيت غراض على كاونتر وطلعت بسرعه للغرفه .. دشيت عليها لكيتها مدده ونايمه مغطيه حتى راسها ..

حاجيتها خايف :- يابه علا بعد اخوج شبيج شو كومي شوفيني شبلاج .. كومتها كوه فتحت عيونها بتعب ..

عقدت حواجبي احجي شبيج ليش هيج وجهج هاي من شوكت ادوخين ..

حاجاتني كوه :- مابيه والله بس تعبانه ودخلت انجطل ..

:- يابه وجهج اصفر وكوه تحجين ، شنو هاي دوخه متكليلي منين اجتج صار كم يوم ..

:- كلشي مابيه لايضل بالك مامتريكه صبح وشتغلت ودخت هسه اكلت لكمه الحمدلله راحت والله مابيه شي ..

هزيت راسي لا كومي وياي دشوف شنو قصتج يله لبسي شي ، دنشيك وضعج .

ماقبلت دفعت ايدي على كيف :- مابيه شي والله شبيك ..

جريتها اكومها ماتقبل دفعتني وضلت تبجي :- جاي اكلك مابيه شي شبيك بس مامتريكه صبح ودخت عادي يمعود لاتلح عوفني ..

صفنت بوجهه خايف عليها ، بس خفت اكثر من شفتها تبجي ماريد اضغط عليها ، هيه تعبت حيل بوفاه امي ، لوحدها بالبيت لا ونسه لا شي ، لااحد يفكدها ، هيه هم كطعت رجلها من بيت جدي وبعد ماكامت تمر عليهم مااعرف ليش ، بس الي اعرفه نفسيتها تعبانه ..

ماضغطت عليها عفتها وطلعت .. توه ادش للمطبخ اخذ غراض شفت بنت عمي تكلب بالضرف وتفتش بي وكفت بمكاني اشوف ..

اباوع لوجها انصدمت من شافت الفلوس نوب تكلب بالسويج والمحفظه ، طلعت صوت هيه بسرعه وخرت ، شافتني واكف كالت الكاونتر علي مااي وبعدتهم خليتهم على ميز خفت لا يتبلللون ...

ماحاجيتها اخذتهم صعدتهم فوك وقفلت كنتور عليهم . طلعت شفت علا اذا محتاجه شي هزت راسها لااا وابتسمت بوجهي اطمني عليها عود ..

ماهجع كلبي وضل خايف عليها ، دكيت على نغم سوالفت الها كالت باجر امر عليكم ، واشوف شبيها ، كتلها تمرين على بيت جدي لو لاا

كبل كالت لاا مامر الي يريدنه هو يمر علينه ، استغربت لهجتها ، ليش اكو شي احد مضايقكم ، ماحجت وكالت لاا سالتها اذا محتاجه شي كالت لا سلامتك ..

سديته منها ونهزمت من دنيا كلها للبستان عفيه هم وتعب مايخلص ، عمري راح يكظي ويخلص وضيمي بعده . .

وكفت سياره كبال النهر تمشيت للبيت القديم مالتنه صاير بوسط بستان ، فتحت مخزن خال بي مندر ومخدات وشغلات قديمه مال البيت قديم ، اثاث بيت قديم كلهن بي ، ماخذت شي منه من بينت بيتنه جديد ..

حبيت افرح امي عودن بي تالي مالحكت تتهنى بي بعد عيني ..

فرشت قريب نهر وخليت مخاد ورجيت ظهري صافن بدنياي ،

التفتت وراي اعاين على مرجوحه الي سويته الها . الكعده جنت اباوعلها .. الكعده الي سويتها بيدي ودكدكتها بسمار بسمار واني اتخيل كاعده بيها وجايبتلي استكان جان وتتمايل بخصرها كلها راحت بمهب الريح ..

منظر الكعده جنت كل ماضوج او اتعب أروح يمه واتخايلها حتى ارتاح وانفهه عن نفسي هسه صار يخنك جنه حبل اعدام ..

بس ماضنت طعنتها الي اتكويني .. اي انوجعت اي انكسر ظهري اي مريت بليالي مايعلم بيها الا الله وجع غدرها وصل للعظم .. ون عليه وانا واكف بطولي بس رجعت اصلب من قبل اقسى من كبل ..

غمضت عيوني وتمددت على مندر اهدي جدامي ، بس شوفتها وطرواها ماعافني ، اجذب واكول نسيت ، ماشفت منها خير ، ولا كلمه طيبه ، ولا وجهه مبتسم ، بس حبيتها على هذا شكلها ..

احسها ماتنزل راس جنها ابوها حنينه بس عنوديه ، انا الكل يريد راضي ، وهيه مارادت مني بس ابتعد ومااشوفها وجهي ، خبلتني برفضها ونفرانها عليش يابه شبيه وتكهرهني ونهزمت مني ..

يمكن يكولون قليل كرامه ، بس كرامتي محفوظه لاني توسلت بيها ، ولا بجيت على بعدها ، ولا شكيت البشر الي سوته بيه ..

حبيتها وردتها حتى لو غصب ، سالفه مو قسمتك الي نكالت الي مامقتنع بيها ، هاي تنكال للي ضعيف وماعده شخصيه ، انا الي احبها اخذها لو على ذبح ركبتي لو اخذنها غصب عن اهلها ..

ماانكر اذا وكعت بيدي محد يفكها مني بس الي خلقها ، توكع بيدي وين تروح يعني ، فزيت من صفنتي على دوسه رجل قريبه منه رفعت راسي اشوف منوو ..

لان سجاد صاحبي اخو عبد ، صاح سلام عليكم يالسرحان ..

رديت سلام بهمس مالي خلك ..

كلت بس لاجاي يعتب لان اليوم نترت باخو جدام عمال وزعل علي ، اشرلي اكعد لو مالك خلكي انا هم ..

:- انجب واكعد ياول

:- شمالك الوجهه مكلوب ومايكصه سيف ..

:- هو الي يعيش بنصكم شلون شكله يصير ...

:- افاااا واصله للهامه همومك اشكي وانا اسمعك وانا اخوك ..

تنهدت عدلت كعدتي :- جاي على بالي اشيل برنو واخرطكم شلع قلع بالقرعان ما اخلي كواد بيكم عايش ....

صفن بوجهي متفاجئ طلع جكاره ونطاها الي :- سالفتك جايده يارشيد وماتسولف مو باله ؟!!!

دحكت عليه درت وجهي خايف عيوني يفضحني .. حجه بهدوء ...

مـو گدهه شمـوازيك گلت اني گدهه

غـير اعـلـه گـد اغـطاك رجلك تمدهه

يااخي شوداك شجابك عليها ، لا عيشتها مثلنه ولا تربيتها مثلنه ، شخذك على ذاك صوب ، وذيج الناس جان اخذيت من ناسك عمامك هواي ، وناس هنا شكثر كلها تتمنه تنطيك حرمه جان اخذيت منهم ...

صافن على ضفه نهر ، بلعت ريك مختنك ، الي زاد خنكتي من عرفت سالفه طالعه وبين راح اطش بين عالم ، شلون راح اداريها يارشيد فيضيحتك طشت وبانت ..

حاجيته :- البيه ماينحجي وانا اخوك ، ماينحجي بالقرعان اخجل احجي ، وتكلي شبلاك صرت رجيج يارشيد ، وانت الكوي بس الكلب من يهوى ياخوي من يهوى يذل صاحبو ، وادك على صدري كون اطلعه من بين ظلوعي وامرده بيدي ، .

صاحبك توجع بوسط ناسو واهلو ، خلت ناس تضحك عليه ، وانا الذيب امعط ، ااااخ لو بس اكظبها عض اصابببببعي حييييل لو بس اولاها بالله الكريم الا اخليها تشتهي موت وماتلكاه ...

سكتت هو سكت ، ضل يذب شعر ودارمي ونوبات يدندن .. لحد ماغفه بمكانه وانا كاعد ، حتى هذا الجش اجاه نوم وانا لاا..

اتوسل بنوم كوه ، ماكو جنه ودعني .. دكيت على علا ، كتلها انا قريب عليج بالبستان لايضل بالج قفلي البوب ونامي ..

تمددت وتغطيت بالمندر .. يارب الاسلام شكد نشدتك شكد طالبتك هالبت تلبي مناجاتي ودعائي ، واطيحها بيدي ، ادري فص ملح وذاب ، وين اختفت وين الكيها تسمت بسمي، العار يعني براسي براسي ، ضربت راسي بجف ايدي ياااااارب العباد وينك عني عيني شوي على عبادك اكلت وجهي...

يآلمـآخذين آلروح ويآگمـ

مـآدري عدمـن يومـ آلگآگمـ

وينگ يآصـبر آيوب سـآعدني علئ مـگتوب

آتگلب علئ نآر خلوني

خلووني !!!

توه اغمض عيوني وصوت الدندنه مال سجاد بعدها براسي ، دك جهازي ، ماشفت منو رديت كبل ، لان صوت مره ناعم ،

ماميزته بالاول لان دايخ ، مو بالي ، بس من ركزت زين فزيت وكعدت على حيلي ..

#يتبع

الي منتظر هناء اكله يوووواش خلي عدكم صبر قريبا راح تلتقون بيها بس خلي ننطي بعض شخصيات حقها ..

والي تضايقو من قصه اتركوها خلي تخلص وعود اقروها على راحتكم 💜 اني راح اختمها قبل رمضان انشالله 💜

#تفاعلكم_يهمني 💜