رواية ثأر مهري منهاا الفصل السادس عشر 16 - بقلم اسماء ديمير

《《البارت 15》》

#ثأر_مهري_منها

بقلمي  " أسماء ديمير "

كله الحك هند عمي ..

عاط بي ولك شكو شبيها ..

هذا كظاها بجي بابا طلع يركض من غرفه النوم بطرك ملابسه داخليه ، صاح على ياسر ، كلنه خترعنه بذاك ليل ..

امي تكول ولكم اختكم مدري شبيها كعدت تبجي وتندب بحظها ..

ياسر يدك على عمامي محد يرد وهذا سيف ماكو الارعن ، شوي ورد اخو سيف كال احنه بالمستشفه هند صارلها ساعتين بالصاله العمليات عدها ولاده ..

امي دكت على صدرها ولك يا ولاده وهيه بالسابع ،

- والله مادري عمه كالو مفجوره جاره ماعرف بعد بسوالف نسوان ، امي وابوي تخبلو امي حتى لطم لطمت كالت ماتت ومايحجون ، نوب رجعت تتعارك ويه بابا وتكله كله صوجك زوجتها ونطيتها لذاك صوب .. 

امي تخبلت بيومها ضغط صعد وتخربطت نوب  ..

من يوم حملها لحد ماولدت هيه ماواصلتنا بس مره .. على اساس يخافون عليها .. تالي ولدت من وكت .. حمها من الاول مهدد بالاسقاط .. وهيه من اجت جان شكلها مو تمام ..

راحت امي و ابويا الهم من ال٣ الفجر امي راحت سايحه روحها عليها .. اني بوقتها جنت احظر للامتحانات .. وياسر بقه يمي ..

رجعو وره عشره ايام .. بس الوجوه متبشر بالخير ابد ..

تلكيتهم ميتين تعب محد حجه كبل اكلو ونامو ..

لحد العصر كعدت امي .. وسالتها عليه .. بس سالتها بجت .. كالت شاحجي شاكول ..

ليش هو شضال من اختج هند .. جانت مدلله واكللها لاتزوجين بس ركبت راسها لو هو لو ماريد .. دشوفي حظها وضعها ..

عمليه وطفل سبيعي .. وحالتها حاله ، جابت بولاده مبكره والرحم متضرر بسبب جاره جان ماتت ، وطفل شلون حاله سوده عليه ..

:- ليش شبي الطفل .. خما بي شي ..

- مابي شي بس منومي خدج .. ولازم تروح كل كم يوم ترضعه وهيه اصلا عمليتها ملتهبه .. من العضم للعضم مسويها العمليه ..هو شضال بيها ..

- داعيه جلد وعظم ..وعمتها راضيه لو حمواتها .. لا وربج ما راضيات ..ابد عبالك الخدامه مالتهن مريضه مو جنتهم ..

- سكتت شاحجي بعد .. وهيه امي ميته قهر عليها . كالت لو تشوفي الطفل .. بكد جف اليد .. هيه ضعيفه ومريضه بحملها بي .. وحليب مابيها يادوب كوه حتى مايطلع برضاعه  ..

- ماعرف شلون راح تدبر وياهه ويه هالطفل .. كتلها تعاي يمنه رجلها مارضه عند .. وهيه ساكته وماتحجي بس تبجي ..

فوك ولادتها من وكت بسبب شغل ونازل الطفل ومفجور مي راس .. جان ماتت بذاك اليل علمود منو ومنو يستاهل ويقدر .. ولاعاجبهن فوكاهه ..

يكولن مهمله وتالي جابت اسبيعي .. ماحصلت شي .. لا من عيال براسهم خير ولا من طفل صحته زينه ولا من هيه زينه وعدها عافيه .. ماكدرت اتحمل قهرها اني وابوج .. نكللها تعاي ويانه انداريج احنه .. تعاند .. ورجلها يكول درب وطفل خدج ماكدر ..

ضلت تحجي بحركه وشابعه قهر .. وره يومين دكينه عليه .. زينه وتحجي كوه .. بس مشي متكدر .. رجلها ياخذ الحليب منها ويودي للخدج .. وره شهر ونص طلعو ابنها .. دزت صوره النه ..

عبالك لعابه جده مسمي عبد الله .. صدك بكد جف اليد .. وهيه وجهه مصفر كركم .. ولاهند البيضه ام وجهه مدور

خلصت امتحاناتي .. بس ماضل بيه لاحيل ولا عيون .. خمس ساعات انام بس .. وباقي قرايه .. حتى اسحاق قطع عني .. وكل مااتصل بي يرزلني اروح اقره .. ابجي واشكي من الكأبه ويله يحجي وياي ربع ساعه ويسده مني ..

حتى وزني خف .. اجت هند وجايبه ابنها كيفت عليه ..صرت خاله .. بس ناعم حيل برغم طلع الاربعين مالته بس اصغير وناعم .. وهيه ولاعبالك هيه ..

امي خلت الطفل يمي وحظرت المميه مالته وعلمتني شلون اغير حفاظته .. واخذت هند وطلعن للصالون ..

اباوع عليه .. هذا شلون اتصرف وياهه .. كاعده اراقب بهل المخلوق .. الي امبين اسمر على ابو .. دك عليه اسحاق  .. شلته وفتحت كامره وياهه وجهت على عبدالله ..

من شافه كال منو هذا ..

- هذا ابني شوفه شكد حلوو ..

-منو فحل مالتج اقصد الي حبلج بي

- ههههه اجه هيج من الله بدون زواج ..

- دكعدي مريم العذراء منين اجه ابنج طايحه  حظج  .. اجي اكسرج ترة .. بيج خير خلي نزوج وخلفي شكد ماتردين  ..

- ههههه هذا ابن هند شوفه شكد حلو .. ترى هذا سبيعي ..

- الله يحفظه انشالله .. شو ماخذه راحتج وفاتحه كامره وين الاهل لعد ..

- طالعين كلهم .. ابويا و ياسر بالشغل وامي وهند طالعات ..

- هاا لعد حظري روحج هالسبوع داز العمام وكباريتنه الاهلج ..اني هم اريد طفل .. واريد استقرر عاااد ..

- ههه صدك تحجي عود ..

- اي والله شوكت متشاقي وياج اني بهل موضوع ..بس هالمره وربي يا هناء اذا خفتي او تراجعتي .. لااجي لنص بيتكم احط طلقه براسج .. واخلص منج ..

- لا هالمره .. اهددهم اشمر روحي من سطح اذا ماوافقو ..

- هيه لو اطخها لو اطلع مخها .. اذا سالوج وافقي وكولي راضيه وخوش ولد .. وخلص .. واني راح اوافق على كل شروطهم .. بدون تردد دنشوف شلون تاليتها باله ..

- الله كريم ..

اجت هند وامي .. كبل سديته منه .. طبت هند .. وجهه يلمع .. ضعفانه هيه  بس وجهه بي رونق مو مثل اول ماولدت صفره ، اعرف تحبل تنفخ الا هيه دعت جلد وعظم ، حتى كرش ماعدها ، برغم مسويه عمليه بطنها لاطشه بظهرها ،

..

شوفتني شعرها .. ميشته ثلجي .. وجهه حافته ومغيره رسمه حواجبها مسويتها على شكار .. و مشتريه غراض وملابس فرحانه بيهم حيل ..

صدك انقهرت عليها .. يااالله هااي هند .. ام تنوره كصيره ام شعر منثور .. والضحكه تارسه الوجهه ..

هسه تعبانه وطفل بحظنها وكله متحملته لخاطر شي اسمه حب وحبيب ..

الله يسعدهااا  بليل كعدنه سهرنه اني وياها وياسر ، بعد مااهلي نامو ، ابنها حيل هادء ماله حس تكول لان سبيعي ، اخاف اشيله من نعومته ..

ياسر يكللها هذا سواني خال والله عيب ، هم عود باجر عكبه ينحسب رجال ..

ضحكت اني  ردته هيه :- شبي لعد اصلا يكولون سبيعي يصير اوكح من ابو ال٩ اشهر  ونجر .

- سولفيلي عود اذا صار نجر وهو ابو سيف ضحك عليها والله خواته انجر منه  ..

- شبي سيف ، ترى سيف ساكت وتشوفه ماله اذيه ولا مشاكل بسبب عمي ماريد يزعله منه ..

- هسه احنه كلنه خلي يزعله .. بس شوي غيره على مرته ماكوو ، هم حشاج الحيوان من مرته تحبل يتخبل عليها والبشر اذا راد يتقرب منها يملخه ، وانتي رجلج ماكو الحجر ينطق ويكول كاافي ورجلج لااا .

سكتت مضايقه تدري بهل حجي صح بس ماتكدر تنطي بي ، هند من نوع المرأه شرقيه وتفكير المرأه التقليديه بحت .. عدها مراه لازم تضحى وتسند رجلها على حساب نفسها وصحتها وحريتها و حقوقها ..

مو لازم هيه شنو تريد ، وشنو الي يسعدها ، لازم حياه تمشي بتضحيتها ، تنبني على جتافها لان هيه مره وام الجهال ...

عافنه ياسر بعد مادك جهازه باسم (حبي ) ابتسمت بوجهه يدري بينه نعرف بس ابد مااعترف لو حاجاها جدامنه ، بس كلنه متفقين بس تتخرج ميسم ياخذها ...

تركنه مايس من هند  انو تحس جاي تدفن نفسها بالحياه على خالي بلاش ،

كعدت تسولف على عمليتها وشلون طك مي راس عليها بالبيت ، ومحد موجود وضاله تعيط تالي بيت عمي سامعيها وجايين عليها ، لان حظرتهم كلهم جانو بيت جدي ، تكول والله بالاربع ساعات اطلك وماعرف هاي طلوعه ..

كل مااكللها عمه الالم موتني من صبح تكول تشاليع هاي ، تقلصات اتحركي امشي اشتغلي من كعده هاي ، تالي اني غبره من كل عقلي عود صدكت والزم بيت جلف لحد ماباوع جواي بركه مااي ودم ..

اجو وشافو دم كعدت بالكاع كلت طفل راح يطلع ، عمتي تكلاهم نجيب الها جده هنا ، احسن داريها افضل ..

- عمتج غير رعنه سبيعي ومفجور جاره وتريدج تولدين بالبيت هاي صدك بلا عقل لا ظمير والله ..

ضحكت والله لو تشوفين سيف من دزو عليه ، اجاني وجهه كركم عبالك ماضاله بي قطره دم ، كابلني يبجي مو يشوفني اصراخ يصرخ وياي يالللللللله ههههههه

نوب اني صفنت عليه اناشغ  هو منو يطلك اني لو هو شكيت بي هو على صراخه ويصيح راح تموت عجل يابه بسياقه راح اموت اني هم ..

تسولف مدري تضحك مدري تبجي تكول الله لا يردها من ساعه ..

نوب رفعت ملابسها وشوفتني عمليه غير ساحت روحي ياربي دخيلك ، الخياط طوله بالشبر غمضت عيني شطت يمااا ولج شلون تحملتي ..

ضحكت ولج ماخليت واحد ماسبيته وغلطت عليه ، كلبت البيت والمستشفه عليهم ،يكرم الله حتى بلت عليهن  هههههه،   اجن سسترات يكلتني ، بعدين انقهرن عليه من سمعن سبيعي وبعدني بجر وماعرف حتى اطلع بس اعيط .

شالت ابنها وصعدت تنام يمي بالغرفه ، فرشنه بالكاع دواشك ثنين ومن يم الجربايه سرير ابنها عباره عن سله صغيره اخذتها امي الها زركه تهتز خاف يكعد بليل تهزه بيها ، مصنوعه من ستن وتور ابيض ..

ضلينه نسولف ونضحك للفجر ، ماحسينه برواحنه شكد مفتقده هالكعده وهاي سوالف ، سولفت الها على اسحاق ، كالت مخابراتج غلط هناء ، ولج تخيلي لو لكفج واحد منهم ...

اول شي الثقه اطيح وبعد محد يثق لابيج ولابكلامج ، كتلها والله اصلا مقلله منها نادرا مااحاجي ، كالت هذا هو ولازم تكطعين اصلا .. سكتت ماحجيت بعد نمنه ..

ضلت يمنه يومين واجه اخذها سيف ، انصدم من شافها ضحك ، كالها راده روحج وحليانه لو ادري جايبج من زمان ، غمزلها اليوم نجدد العهود ..

كالتله مارضه الا وعشاي بالمطعم ..

ادري ماخذ مرتي لو صاحبتي ام شروط .. عمي اجيب عشه من مطعم للبيت ولا يهمج بس ضلي لليل بهل شكل عليج الله ..

اني واكفه شايله جاهل ، وهمه يتفقون على اليله السعيده ، كتلهم اي وراه هاي سالفه بيبي انشالله ،،

التفتو عليه متفاجئين ، نطيتها ابنها وكتلها ضحك عليج مره عيب يضحك عليج مره ثانيه ..

رد الافندي والله عيب عليه اذا مازرعت خلفتي اليوم .. تالي سلمو وراحو ثاني يوم من صبح كعدتني امي انظف بالبيت ومسويه حمله عليه .. جاسم جاب مرته وجهاله واجه .. مسوين سمج .. والبيت كله زفر .. لزمت المطبخ وجلف .. سيراميك و طباخ وحتى ساحبه جلفتها.. مو من طباعي ..

بس حسنه واكفهه فوك راسي .. وتكلي هااي اي وهااي .. دشوفي دهن هذاا لحي بعد عليه لحي .. لاخلت اضافر ولا ادين  من عد الجروح ، الي كامت تحركني .. شفت سياره بابا طبكت بالكراج  .. كيفت ..

هسه اشكي من امي واخلي يفزعلي وانهزم من شغل .. نزل منها ضايج .. استغربت شكله .. اباوعله من شباك المطبخ .. طب سلم و دخل للغرفه حتى مارفع راسه علينه .. امي لحكته من شافته هيج ..

رجعت كالت غسلي اديج وحظري الغده ..

رواء كاعده توكل بنتها سيريلاك .. :- شبي عمي .. شو مو على بعضه خير ..

:- والله مادري .. حظري الغده بساع  يله ابوج جوعان  .. عافتني وطلعت للحولي ..

:- هسه يله .. غسلت بقاصر وزاهي حرك اديه المجرحه من سيم المواعين .. غسلتهم بمي بارد ..
احظر بالمواعين و الزلايط .. ورواء كاعده ..

كتلها مدي ايدج وساعدي لو لا نحجي ..

:- مدتشوفين حايره بالطفله .. دصبي هنه ماعونين صعبن عليج .. واذا ماتكدرين عوفيهن اخلص البيدي واني اصب ..

:- لا على شنو هو العده غيره يكوم بحده ميحتاج ياكل ويمسح ايده بالحايط .. خما الا اني اكول ..

:- مدتشوفين طفله بحظني واذا اذبها تبجي .. هسه غده مدبرتي .. الله يعين العيال تاخذج  ..

مارديت حرت بالغده .. تريدها حجه حتى تكب علينه وعلى جاسم .. ولا تاكل كتله ويله تنعدل شوي ..

صبيته وديته .. اخر شي لبن و المي ضلن .. توه ارجع اجيبهن .. طبت هيه شايلتهن .. وتلهث .. عبالك شايله تنكر مي .. مو سراحيتين ..

بابا كاعد وطابك حواجبه .. كتله شلونك حبيبي ..

رفع راسه عليه .. هز راسه زين ..

جاسم ومرته كعدو بصفحه همه وجهالهم .. واني وامي و ياسر بصفحه .. ابويا مترأس السفره .. حجو بشغل مال ياسر .. يريد ينقله الغير سوك .  سوك تعبان وماكو شغل ..

بابا يحجي بثكل وضايج .. ساله جاسم شكو يابه خير ..

كله اليوم اجاني سلمان ابو اسحاق للشغل يريد موعد ..يردون يجددون الخطبه وياخذ اذني ..

:- شهكت رواء .. عزاا هذا متاب .. شنو قصته لزك ..

نداريت عليها الله لاينطيج العافيه .. لو تسكتين لو تكفرين دلصميييي ..

جاسم كله شنو يابه مو رفضنه شنو هالملحه .. شكتله انته خما نطيته مجال .. هيه شغله كوه خما كوه .. بنتنه ومنرضه ننطيها شنو لزكو  ..

ياسر :- على كيفك جاسم .  هذا زواج والقسمه .. تصير مره ومرتين .. انته مره خطبو وهاي ثانيه وهيج ضايج لو كثرو شتسوي  .. العالم تخطب عشر مرات خمسطعش مره ..

جاسم التفت عليه :- لا واني اضل اتاني هالكد يخطب ورايح جاي علينه .. كنالهم لااا يعني لاا ..

كاعده اسمع وابلع بريكي .. هسه واكف بقسمتي شكوو .. شو هند انتي ركضتلها ركض .. ومكيف .. وياريت خوش قسمه .. اعوج من العوجه .. يريدنه نندفن يم بيت عمه الهمج ..

عاقده حواجبي وساكته .. اشوفه بكيفه يرفض ويقرر حياتي .. ياسر شافني ضايجه .. يحاول يرده .. ميخلي يقرر بكيفه ..

بابا كالهم خلصو غده وبعدين نحجي .. عوفو الموضوع والتهو بالنعمه .. سكت الكل .. بس على اعصابهم ..بس صوت الخواشيك ضلت .. وصوت عقلي الي يكلي لو تاكلين طن كتل كولي اريده .. هذا اسحاق مو اي شخص ..

خلصو شلت المواعين .. دخلت للمطبخ اغسل بيهم .. باب المطبخ مفتوحه .. اغسل وكل شوي اميل راسي للحولي حتى اسمع  ..

وجاسم حاجه بابا :- على سالفه وشنو القصه .. وخلي نكللهم سد الموضوت بعد لاتجون احنه مراضين وخلص .. واذا لحو اكثر من مره نسويها عشاير وياهم .. شنو خلصت بناتهم ولزكو على بنتنه ..

بس بابا فاجئه برده .. وخلاه يتخبل .. كله اني راضي بالولد .. مالك لازم بابا .. يجي ونحط شروطنه اذا وافقو نسال اختك والله يسهل ..

شو هذا شال روحه ولزكها بالكاع :- شنو مواافق شنو انته راااضي .. اني هم اخوها مراااضي .. منو همه وننطيهم .. مو عمامي يردوها تريد تفشلنه وياهم .. تريد جدي يزعل .. فضلنه الغررريب عليهم .. ودخلنه بيناتنه .. شتحجي ياابه ..

نتر بي بابا وسكته :- اختك مراضيه بعمامك واصلا متكدر تعيش يمهم . هاي مو هند شفت عيشته يمهم لو لا شفت حالها لو لا .. لاتغشم نفسك جاسم .. اخواتك هنه يقررن مصيرهن .. هند اختارت وطلع اختياره غلط وتشوف حياته شلونها مخربطه ..

زمخ بي معصب وروحه طالعه اشر بيده :-  بعد سالفت هند ماانطي لاخواني لو تنكلب الدنيا .. نوب اختك مراضيه .. شنو اجبرها لخاطر منو .. لخاطرك .. ليش يابه لحمهن رخيص عدي ولحمكم غالي .. مالك لازم .. اني ولي امرهن .. وحدك هنااا .. انطيها ماانطيها بكيفي .. الموضوع سدهههه كافي تخرب بالقسمه ..

عفت المواعين ونهزمت لغرفتي .. خفت من جاسم ..

بوكتها بابا حدد موعد وياهم يجون يتفاهمون .. محد يحجي كبالي .. وحتى اسحاق كطع اتصاله .. خاف اهلي ياخذون الموبابل مني ويلكونه مراسل لو متصل فيحسب ..

ثاني يوم صبح بابا كال لاامي اليوم المغرب يجون العالم ..  حظري الظيافه .. وشنو تحتاجين كتبي ل ياسر يجيبه من بره الج ..

امي سوت لازم ودكت على خالتي سعاد وبناتها يساعدنه  .. جاسم جان موجود .. وهم يفتر مثل العتوي بالبيت ومعصب ويصيح وينتر ..

بيومها ماشوفته وجهي .. صدك جنت مادري بهل يوم يجون .. ماكلي يا يوم .. تفاجئت بجيته ..

اسمع بس الهوسه جوه .. للظهر واني اكل بروحي .. احاول الهي نفسي بااي شي .. اكتب اكلب بالنت . بس مالي واهس وبالي شارد يم اسحاق .. خايفه من جاسم يخرب الامه عليه ...

سمعت اصوات سيارات صفت باب البيت .. و هوسه زلم تركع بوب سياره  .. اريد افتح شباك وخايفه .. بس الاصوات مو غريبه عليه .. تقدمت على شباك بخوف من الي راح اشوفه ..

صخااام .. لاياربي دخيييلك .. لان جدي وعمي حميد نزلو من سياره .. والي وراهه نزل ابو فهد .. جاسم فتح الباب تلكاهم محاظن جمدت بمكاني احس وجهي نار لا يارب ليش هيج  ....

دوسو نجمه 😁