رواية ثأر مهري منهاا الفصل السابع عشر 17 - بقلم اسماء ديمير

《《 البارت  16》》

#ثأر_مهري_منها

بقلمي " أسماء ديمير "

يمااا .. خاف اني عايزه .. جملوها عمامي بجيتهم .. كعدت بالكاع ابجي .. جاسم وجنت شايلتله هم جبال .. شلون بهذولي .. اكيد راح يتعاركون ويطردونهم ... سواهه صدك جاسم وخربها .. شيريد مني هذا .. ليش يسوي هيج .. ماشاف قسمت هند واتعض لو لا يطيح حظنه ثنينه ..

اصواتهم جوه .. واني اتكرضم فوك .. مانزلت ولاحتى اكلت ولاتغديت بسبب هالموضوع .. سببلي مغص .. طلعت من غرفتي للحولي اسمع شكو ..

بس صوت جدي عالي .. ويأنب باابويا شلون ماحجه ولاكال ولاسال .. ولاخذ برأيهم ..

جدي :- انته محاسبنه اهلك وناسك .. هيه متجاوزنه وممحترمنه .. بتك تريد تنخطب وانته ماتنطينه خبر .. عجل خراعين خظر احنه مو عمام ..

بابا :- حشه يابه .. بس سالفه بعدها بالاول .. محاجين .. يردون ياخذون موافقه مبدئيه و بعدين تصير مشيه زلم مال عمام ..

:- شنو موافقه مبدئيه وانا ابوك .. ليش احنه ماعدنا خبر بالموضوع .. مو بنتنه هيه ...  لو ماجاسم يكول ويحجي .. احنن مندري ولانعلم ...

عمي حميد كله :- شلون تصير خطبه وانتو مموافقين ليش مرديتوهم من اولها .. ليش خليتو الزلم تجي وتعتب الباب وتتفاشلون وياهم .. جان رفضتو من جيه نسوان ..

ياسر :-كله ليش نرفض عمي .. الولد ماعايله شي .. ابن ناس واجاويد .  وشاغول .. ونعرف اصله وفصله

عمي حميد :- ليش ولك ابن عمك مو ابن اجاويد شو ماتعرف تتحجه انته .. لو مو ابن اصول .. لو كاعد عطال بطال .. والحريم تجد عليه ..

ياسر :- ماكلت هيج عمي حشاهه .. ابن عمي على راسي .. بس ابن عمي شخصه بسالفه اسحاق ..

اسمع ابو فهد كله :- اسمه اسحاق ..

رده .. اي

جدي عاط بي :- ليش انته حسن مو تدري ابن عمها رايدها شلون تخليهم يجون وتوافق .. تفضل الغريب على ابن اخوك هاي تاليها وهاي انته زين والمثقف ..

بابا :- شجاب ثقافه على زواج يااابه  .. البنيه مرايده ابن عمها .. اجبرها خمااا اجبرهاااا ..  وهاي القسمه خوش قسمه قابل ارفض واكسر بقسمتهااا واكعدها بالبيت يمي ..

جدي نط :- شبي ابن عمها وترفضه ولك ..زينه زلم .. واجدعهم .. وتعرفه كلش زين .. هاي تاليها بناتك يمشنك برأيهن وين رايك انته ..

:- يابه حياتهن .. هند لمن وافقت على ابن عمها ماعترضت ولاحجيت لان هيه راضيه .. بس يوم اختها ترفض وماتريد .. تريدني اجبرها لا حالها حال اختها .  حياتهن هاي .. اخاف الله بيهن .. وبعد الله شوف شقاسملهن ..

جدي صاح بي :- ولك حسن نااااقص .. جاي اني وجايب اخوك ورشيد .. وجاااين اليوم نخطب منه بنتك .. تفضل الغريب علينه .. ترفضنه وتوافق على الغريب والله البنت مو راضيه .. ليش من شوكت بناتنه الهن رأي ..

:- شنو مو بشر وانطيها الك يابه .. رحمه الوالدييك لاتسوي سالفه عناد وزعل .. مو راضي على الغريب بس هم مو راضي على زواج بنتي ماتريده ..

هيه هند وانطيها الكم .. هاي هناء صغيره متتحمل وماتريد تعيش يمكم .. حيوان واربطها وانطيها .. مو بشر .. ماالله يحاسبني عليها .. ماتكلي ليش بابا بكيفك قررت عني ..

جاسم :- يابه بعدها صغيره شمفهمها هيه .  احنه نقرر عنها .. وبعدين تقتنع وترضه ..احنه افهم منها ..

ياسر :- شنو افهم منها .. اجااي  تحجي انته .. يعني على زواج جبيره وعلى انو تاخذ قرار يخص حياتها طول العمر صغيره .. ليش هند اخذتو رأيها وهيه لاا .. ليش هند من كلنه صغيره منوافق كلتو اخذو رأيها هيه بكيفها .. ليش هناء لاا ..

بابا كال هاهيه .. يابه بدون زعل .. اصيحها واسالها .. ماعندي استتعداد اشيل خطيتها طول عمري واكسر بيها ..

عمي حميد :-  هسه من تنطيها النه .. معناها شايل خطيتها لو كاسر بيها .. خلف الله عليك .. شايف علينه انته .. لو مااحنه اهلك وناسك .. وذيج بنتك عايشه يمنه ومستقره ..

ياسر :- كله عيشتيش عمي هاي ..

عمي حميد :-  شقصدك ولك .. لبس مالابسه لو اكل ماماكله لو كاعده بشارع لو محد محترمها لو ضاربيها واجتكم مدمايه .. عايشه معززمه مكرمه ..

ياسر :- عمي سوالف نسوان مااحب ادخل بيها .. بس اذا هند سكتت عليها وعاشت ورضت هناء متتحمل .. ذاك اليوم اجت تموت بولادتتا من وره نسوان متعاجزات يودنها للمستشفه من وكت .. لو التعب الي بيها .. ولدت اسبيعي ..

جدي عاط بي .. :- طاح حظك تدخل بسوالف نسوان انته .. جان استحيت .. تفضل الغرب على عمامك من هالسوالف .. والله انك مابيك ذره حنيه علينه لا انته ولااختك هناء .. ماتتعلم من اخوك شوي ..

حاجه بابا .. كله شمربي ولك حسن خنازيز علينه .. شنو ماعاجبتهم عيشتنه ولا احنه عاجبيهم .. شو ساكت ماتكول تكسر ابنك على هالحجي ..

كبت عيطتهم .. وناس ترفع وناس تكبس .. جدي زعل وعمي حميد يلوم .. وجاسم يزيد بالنزين .. ابو فهد ماسمعت صوته اصلا ..

كاعده بمكاني ودموعي تجري .. ادري بس اني حظي هيج معثر .. بنات تزوج وتتطك ومحد اله شغل بيهن .. لو هناء حظها اعوج ..

صاح بابا هناااء هناااء ..  عدلت شعري .. ومسحت عيوني .. وحاولت انزل .. شو الرجفه سرت برجليه .. احس وحده اطخ بالثانيه ..

تلكتني امي وبنات خالتي .. واكفات جوه درج يسمعن  .. خطيه وجوهن مخطوفه اكثر مني .. امي كالت صيري سباعيه ولا تصيرين مثل اختج .. طبطب على جتافي

خالتي كالت :- حبيبه .. بدربج كولي لحميدو عود خاله سعاد هنااا ..

منو حميدو  .. قصدج عمو حميد ..

:- ليش اكو غيره .. ريحه عطره وصلت ليمي .. فدوه ريحته ..

:-عزاا باوعت على امي جرتها من دشداشتها ..

:- عمه الي يعميج سعاد مو بنتج واكفه .. جان استحيتي .. عرفتي ريحه عطره لعد شكد مركزه بي .. مزوج ومخلف وصاير جد .. والله مرته تملخج

:- الله عليج ليش المزوجها مره .. جنها عامل تشغل مال مولده .. خليني ساكته .. هذا يرادله دلال وحنيه يطلع تركي من راحه ..

:- جوزي من سوالفج ولج احنه بياا حال . رجال جاي هداده وانته تتغزلين بي جدام بنتج .. والله  خفيفه لو تصيرين جده ..

:- يمممه نوب جاي هداده .. دضربي بعد خالتج على راسه .. وخلي يزعل وانطوني اله هديه راضي بالنبي .. راضيه ..

بنتها تضحك .. وتباوع لاامها ..

ماضحكت ولا حجيت .. لان بطرانه اني بياا حال وهيه كاتله روحها على ابو الفواين  ..

فزيت على فتحت الباب وياسر كبالي .. مو جاي نصيحج وينج تعااي يمعوده ..

حسيت نفسي رايحه لحرب لو لاعدام .. وهنه يدكن على جتفي يواسن بيه ..

طبيت للستقبال .. كلت سلام عليكم .. كوه طلعت .. محد رد بس بابا .. باوعو عليه .. وجهم حمرر .. كلها مفحمه ومعصبه .. عيني راحت على ابوفهد رفع راسه على لبسي ورجع دنج ماخله عيني بعيني .. خفت لا يحجي وخاصتا بعد ماسمع بااسم اسحاق وهو جاي يخطب .. خفت يبتزني بالموضوع  .. اباوعله
لكيته مدنج راسه ..

اشرلي بابا تعااي يمي  .. تمشيت وكفت بصفه ..

جدي ينافخ ويستغفر .. باوعت على جاسم .. مخنزر عليه .. وامبينه العصبيه عليه .. ولد عمي كاعدين وامبين ضايجين .. اراقب بالوجوه وازداد خوف وتوتر ..

اجاني صوت بابا :-  كال اسمعي بابا .. هذا ابن عمج اشر على ابو فهد ... واني الله يشهد احبه حب اب لابنه .. وعزيز عليه حيل .. يحفر بالحجر ويطلع الكمه .. شايل امه واخواته .. وناس كلها تشهد باخلاقه .. وجايب جده وعمه ولد عمه وجاي يخطبخ ..

و هم هسه الجاي يخطبخ غريب .. وهم ابن ناس ومعروفين اهله .. واخته صديقتج وتعرفيهم وطابتلهم انتي .. صاحب شهاده وصاحب اخلاق .. وقريب علينه بنفس شارع ..

هاي حياتج وزواج مو لعب جهال .. مسؤليه وتعب وضيم .. واخذي هند على سبيل المثال الج .. شنو تقررين اني وياج .. هسه منو توافقين عليه .. 

حطي موقف لا احسد عليه ابد .. موقف جنت شايله همه جبال .. وخايفه من جاسم خوف الموت .. بس الوضع اختلف وزداد سوء .. وخوفي كبر ..

والله لا يملخوني اذا رضيت .. من صدك هالمره اموت اذا وافقت .. ابو فهد لمحني وياهه لمح ممتأكد وجان متت بيده .. و جاسم هو يريد حجه عليه حتى يطبني .. نوب اطي لزمه عليه ..

دموعي جرت برهبه .. اباوع لبابا مدنج اريده يرفع عينه عليه حتى اكله مااريد انقذني من الموقف بس ماكوو .. ياسر كاعد بعيد عني .. يعني حتى لو فزعلي ميلحك يوصلني .. لمن يوصل يلكاني مكسره بيدهم ..

اعصر بيدي وافرك بصابعي .. نوب عركت .. جاي كال ماتحجين بوياا .. تفضلين الغريب علينه .. ماتعرفي شنهو ماشنو  ..

تحمحمت .. رفع بابا راسه .. باوعتله بتوسل .. بعيونه نظره حيره وهم مو بيده شي .. يريدني احجي ..

كال احجي بابا واني واكف وياج .. انطيني رأيج حتى اعرف اتصرف .. اذا رفضتي ابن ناس معناهه موافقه على ابن عمج .. لان محد يتقدملج بعد .. لان رفضتي اسحاق وابن عمج جاي خطابه .. معناه رافضه واحد و موافقه على واحد ..

باوعت على ياسر .. بالكت يحجي او يسوي شي .. هز راسه مبتسم عود يله احجي ..

كتله بكيفك بابا .. الي تكوله اني راضيه عليه ..

خزرني .. لااااا احجي رأيج كولي .. مو اني راح ازوج انتيييي ..

غمضت عيني وحجيت بسرعه :- ابن عمي على عيني وراسي واحترمه وحبه مثل اخويه بس اني وياهه منتوالم .

رفع راسه عليه ابو فهد .. عيونه بيها حجي .. بس مافتهمته .. دنجت بساع ..

عمي كال :-  لااااا .. ول ياب هذا العايزنه جاهل تفرض رأيها علينه ..

جدي زمخ بيه   :- شنو هالحجي جدي ..ياولوو  عيب تحجين هيج معناه راضيه بالغريب موو .. تفضلي على هالزلمه الكاعد كباااالج ..

جاسم :- انجبي لجججج حقيررره .. شنو مموافقه عليج .. جهااال كبالج احنه ونمشي بحجيييي الزعط .. ابن عمج تاج راسي .. كاعدين ومحترميج ونسالج تالي تجاوبين بعين وكحههه .. اكسر ضهرج والله ..

سكتت ومارديت .. بابا كال كااافي مايخصك .. شو ماتحترم .. لاتخليني اتجاوز عليك جااااسم .. بكيفااا كم مره اعيدهااا .. احجييي انتيييي .. يعني موافقه على اسحااااق ..

:- بلعت ريك .. اي بابا موافقه عليه .. اني حجيت وجنت متوقعه الجاي ..بس تفاجئت  بطفره  جاسم عليه بدفره اجت بخاصرتي .. وكعت ليوره ونضرب راسي بحافه التخم .. عطت اااخ .. بابا كام دفعه عني .. وهو تلاكفني بكفخات .. بابا دفعه وهفه راشدي .. امي على صوت العياط  جفتت للستقبال وحظنتي ..:- ولك جاسم كسرت ايدك بيش طالب اختك ولك .. اسم الله يمه كومي ..

كمت اشهك من الالم .. احس كليتي انشلعت ..لازمتها وابجي .. جاسم بس يطفر يريد يتلاكفني .. تخبل شلون بابا ضربه .. وولج كلبببببه والله موتج على ايدي .. اني اضرب من وراااج .. تعاااي هاان  .. ام عين صلفههه ترفضين بعين كووويه ..

ياسر ولد عمي جروو جر .. كاعده بالكاع واباوع عليهم ..  ابو فهد كاعد بمكانه ماكام يلعب بالسبحه .. جدي عاط بجاسم .. ياولو من هيج الحجي .. اركد .. احنه كاعدين عجل انته تحترم .. اركددد .. ختلت بحظن امي اشهك .. هو تلاكفني يريد يدفرني واني بالكاع .. اجت دفره باامي ..

بابا شافه هيج لو تخبل .. تلازم هو وياهه .. وجر لباب الاستقبال يطرده بره .
كلب تمد ايدك عليهاااا واني واكف .. الله ياخذك ابن عااااق .. هاي اني عايشششش وراسي يشم الهوى وانته تضرب وتغلط .. اطلع برااا يله برااا ..

كام ابو فهد جتف جاسم هو كام يلزك نفسه بالكاع .. جره وكاله كاافي اهدء مو هيج .. لخاطر الوجوه الطيبه ..

بذيج الحظه شكد كرهته .. احنه احتركنه وهو كاعد هادء ويحجي بهدوء ..

جدي :-كله شلون تسوي هيج جااسمم .. ماتستحي مو احنه كاعدين ياولوو

جاسم عاط  :- متشوفه هالصلفهههه كله صوج ابويا طلععع عينها علينه .. بطول القندره وماتحترم .. تاليتنه جاهل تفرض رأيها عليناااا .. والله ماطلع جاسم هذا ماااكسرت هالراااس ..

التفت على بابا .:- صوجك انته .. هالتشوف متخاف وحجت بعين كويه .. شعدج ويه ابن سليمان وهيج موافقه عليه ولج شعدددددج كلبه .. من رواء حجت ماصدكتها بس امببين مااعرفنه نررربي ..

ياسر صاح بي :- كاافي شننو شعدها شنو هالحجي احترم نفسك .. رايحه بدربها وتجي بدربها .. شلون ترضه مرتك تحجي على عرض اختك ياكرن ...

عمي :- عجل ليش موافقه عليه .. ليش رفضت ابن عمها .. شنو شايفه من الغريب وعجبها بي ومالكته بابن عمهاا ..

بس اسمع وابجي .. صواتهم تعالت .. وكلها تصيح وناس تغلط ..

بابا يلهث .. فحط سوده عليه :-كله بره والله مضل يانذل  .. انكلعع برااا ولااشوف وجهك كلب .. حقير وهاي انته اخوها وهيج ضربتها وتتهما .. عجل شخليت للولد شارع .. اطلع ماااشوف وجهككك ..

عمي كاله ..بنتك غلطت ياحسن شلون توكف وبوجهنه وترفض ابن عمهاا .. تستاهل عجل ماتستحي وهيه ترفض بعين وكحه .. شعرفها بابن جيران وعجبها بي وفضلته علينه ..

جدي دنج عليه :- ليش مفضله الغريب على ابن عمج ولجج .. ماتستحي انتي ماعدج ذره حياا .. مو مثل اختج ابد انتي.. جاين بعكلنه وشيباتنه وتردينه وتفشلينه ..

جاسم :- ماعاااش الي يردك جدي والله اكسر ضهرها واخليها تكعد هنااا .. وماانطيها لابن سليمان ..

عمي حميد .. كال هاهيه حجي لاتعب نفسك وياهه . التفت على رشيد كله نهى عليها واحنه بظهرك ..

امي عاطت لاا حرام عليك خاف الله حميد ترضاهه على بناتك .. شلون تكسر بنتي خاف ربك .. اذا رشيد عزيز عليك انطي من بناتك لادمر مستقبل بنتي ..

بابا كله ولك حميد شنو هالحجي بكيفكم هيه .. تقررون .. جوز من بنتي احسلك ولاتحش براسه هيج حجي .. عدك بنات اطي منهن اني مجاز من بنتي واجبرهااا ..

جدي :- هااا جدي رشيد مالك حس وانا ابوك .. احجي الي بخاطر خلينه نفهم دنحلها هالسالفه ..

اباوعله كل هذا ..  ساكت و هااااادئ .. كعد على تخم .. يكلب بالخرز مالسبحه الي يشوفه يكول كاعد يسبح .. كعد جدي بصفه ..

عمي كله كول الي تريده مالك غرض بعمك حسن غصب عنه ينطيها الك ..

بابا :- شنو انطيها اله حميد ليش سالفه كوتره  ليش ماتوزن كلامك وانته بيتي .. توز برشيد على بنتي كبالي تريدني اكسرها ..

:- عجل ماكسرت بابن اخوك من رضيت بحجي بنتك .. بنتك العايقه الي تجي تكول بصلافه ماريد ابن عمي واوافق على الغريب ..

:- اناا سالتهااا .. مو جدامك سالتها .. ماراضيه بييي شنو اجبرهاااا ...

جدي صاح :- ولك حسن نسيت الاصول انته ..  عوزها بنتك تجي تكول اريد الغريب بدون متسالها .. ول ياااب على تربيتك الضايعه .. تربيتك تربيه اخررر وكت .. وسفه عليك واللله ..

ابوفهد ... كالهم كاافي .. بسكم عاد .. .

عمي كله كول .. بس والله ان ماكسرت خشم هالصلفه ولا اناا عمك ..

عاط بي ابويا .. حميدددد ووصلت حدها وياااك خويااا ..

جدي :- كاافي انته وياااه.. جهال انتووو كااافي .. احجي جدي ومايكون خاطرك الا طيب ..

مدنج ويحجي بهدووء .. وسبحه بيده يسبح بيها  :- طول عمري عزيز قومي واحسن شبابها .. دوم رافع راسي ومانزلته لااحد ..

كلها صاحت ونعم منك .. شحده الي ينزل راسك .. رفع ايده :- كلت لااحد يقاطع  ... وانشالله مايتنزل بس للي خلقه .. بنت عمي عزيزه عليه مو اناا الي اكسر بيها وانهي عليها .. مو رشيد الي تكسره مره وينزل راسه الها .. ولارشيد عزيز ناسه ينذل الها حتى لو جان هاويها ..

بنت عمي ازفها بيدي للي الله قاسمه الهاا  .. عمي عاط بي ولك شلون تتطيهااا .. منك والله مااخليها تطلع الباب .. انهي واخليها تعنس .. وازوج واكسرهاا ..

صاح :- .عمييييي .. شايفني قليل حيا .. لو ناقص عكل .. واكسر بنت عمي .. هاي دمي ولحمي .. البنت رفضت وخلص .. حبيتها محبتا لابوها .. وعزيتها معزتا باخوها .. ونسيت فارق العمر البينه .. نسيت عدها عقل مراهق وماتعرف شنو دنيا وشنو يلزمها ..

اني الي غلطت وماعرفت اختار الي تناسبني .. نسيت هيه جاهل وتربيه دلال .. وانا هيج مره ماتنفع وياي .. رايدلهاا سعاده ربي يشهد ..

كام على حيله .. همه هم كامو وراهه .. كال ماراضي بنت عمي تنخطب واناا ماموجود .. لا الزوم احظر .. والي جاي يخطب هيه راضيه بي ..  بس انااا مو  راضي عليه ..

كمت من الكاع .. اباوعله مايباوع عليه ابد .. كاله ياسر ليش باله .. لان قبلت بي ..

لا ابن عمي .. بس مايفيدها .. بنتكم طلعت من خاطري .. بس الي ماتعرفه ياعمي الولد شراب .. رفع راسه عليه .. خليه عينه بعيني .. تعرفون شنو شررراب لوو لاا .. شتتوقعون من واحد يواعد بنات العالم بالمكاتب .. شتتوقعون من واحد يخابر بنات العالم وره اهلهن .. يمكن بجيته الكم تاب ويريد يمشي صح .. بس عمره الشراب مابطل .. وذيل الجلب ماينعدل ..

ياسر :-  وانته شعرفك عنه وتحجي هيج رشيد .. الولد جوارينه سنين .. ونعرفه ونعرف اهله .. ابد ماسمعنه لو شفنه عنه شراب .. الولد محترم . شعرفك بهل معلومات ..

ابو فهد :- عجل غير جاي يخطب بنت عمي ماتريد ابحوش وراهه .. لا والله ماني زلمه ان ماعرفت اصله وفصله وشياكل وشيشرب ..

جاسم .. كله وشنو سالفه شرب و مخابرات ويه البنات ويقابلهن ..

ابتسم .. كله شنو على بالك ابن عمي .. انا اول ماخطب منكم وانا ادور وراهه .. شنو بالكم ماعرفت من خطب اول مره ..  سكتت لاجل ماردت استعجل الامور وهيه باولها ..

بابا :-كله شنو هالحجي رشيد .. هالحجي بي هجمان قسمه .. شنو دليلك على الولد ..

عمي حميد :- ول ياب تريد دليل .. عجل حجي رشيد مو دليل .. تكذب ابو فهد وتصدك بالجيران .. شبيك انته شجرالك خوويه .. 

:- حشه ياخوي .. بس هذا كلام واتهام .. ولازم اكو شهود ولو دليل .. عجل من نرفضه مايكول عليش رفضتوني .. شنو جيه العالم لبيتي وارفضها لعبه عدي .. تردون اطلعوني بسواد الوجهه ..

ابو فهد :- لا حقك عمي .. كلامك حق .. سالفه بيها كسران خواطر وانا موضالم واكسر خاطر احد ..

طلع الموبايل مالته وشغل فديو بي .. تعمد مايطي بيدهم .. وجهه على بابا وخلاه بوجهي .. باوع لياسر كله .. مو هذا اسحاااق لو انا غلطان .. كالها بستهزاء ..

ركزت بالموبايل .. اسحاق اي والله هوو ..  منظر اسحاق جان مثير للشمئزاز .. يطوطح ويركص هو وجماعته .. نازع ستره ودكم قميصه نصها مفتحه ..

جدي وعمي زمخو بابويااا .. هوو  هذا وللللل ..

كمت اني ماردت اسمع اكثر .. احس راسي طابوكه .. عبالك مدعومه .. صدمه بيه خلت جسمي يختل  .. ماحطني بموقف محرج .. لا حطني بموقف زباله .. تمنيت ميته ولا هالموقف .. عيوني غوشن .. استندت على امي وكمت .. اريد بس اوصل لباب الاستقبال داطلع .. صياحهم وعياطهم كمت اسمعه همس ومغوش .. لحد مافقدت ماكمت اسمع شي ...

فتحت عيوني .. جفني ثكيل وعيوني يحركني .. بجيت واني اشوف امي وفوكي .. خالتي وبناتها .. جنت اتمنى حلم لو كابوس .. بس من شفتهم تاكدت الي ديصير واقع .. طلعت امي تبجي .. ورجعت وراها بابا ..

اباوعله ضايج .. كال شلون صرتي .. وجهه ثكيل عليه ..

هزيت راسي زينه ..

يباوعلي بزعل وياهن عتب .. اني شعليه .. حظي اعوج لو اني سبب بالي يصير بيه .. كال :- حظري الغده حسنه ..ساعه بال2  وماصابيلهم غده للجماعه استعجلي يله ياابه ..

خالتي كالت وين اكو واحد اله نفس يتغده هسه .. بعد هالطلابه هااي ..

بابا .:- صبن والي ياكل ياكل والي مايكل مشكلته .. المهم سون الواجب يله .. عافنه وراح يمهم  ..

امي وخالتي طلعن للمطبخ .. جفت وراهن  جاسم وركع الباب .. صاح وين موبايلج ولجج ..

سكتت ..

احججيييي ..

فوك ..فوك .

خله وطلع  .. خفت لايشوف شي .. برغم ماسحه كلشي موبابلي نضيف متوقعه راح يدور وره الخطوبه .. بس خفت يراسلون اسحاق من موبايلي ويوهمونه على اساس اني  .. بذلك الوكت اروح بالرجلين .. حاجيت بنت خالتي بعيوني .. عرفت عدي شي وخايفه ..

تقربت مني .. عود تعدل كعدتي .. كالت بس رديلي رقمه واني اتصرف ..

.. رديتلها رقمه سجلته بجهازها .. كالت اخابره واحذره واجيج ... بقيت وحدي .. اباوعلهم من الباب كاعدين بالاستقبال يحجون .. طب عليه جاسم شمر جهاز بوجهي .. افتحي خااانم ..

كوه عدلت نفسي وشلت جهاز .. اديه يرجفن .. فتحت الرمز و خمطه من ايدي ..

طلع وهف الباب وراهه .. كعدت ابجي .. عليمن اتحسب .. على الي جذب عليه .. وطلع يشرب .. لو على ابن عمي .. الي تستر عليه بمواقف وحطني  بالي اسوء منها ..

غمضت عيوني اهرب من الواقع .. سمعت الباب انفتحت .. مافتحت هو كل شوي واحد جافت عليه وهاف الباب  ..

:- اكعدي ياول دحاجييج ..

:-  فتحت عيوني بعتب وبكره عليه ..

واكف بثقه عفيه بشر شكد لئيم .. وعدك كوه .. رفع حواجبه ويحجي بأنفيه :- جنت اكول جاهل وماتفهم دنيا عدل .. بس اعرفت انتي اخت ابليس .. تسترت عليج مو حبا ..هز راسه لاااا .. بس مو انا اطعن بعرضي ..

قرب وجهه عليه ولاا رشيد الي يتفضل عليه واحد خيخه مااايع .. وكعتي من نظري يوم الي فضلتي عليه خنثه ..

ماحجيت ولااتجرء ارد عليه .. الي صارلي اليوم هوايه .. وصدمات كثرن .. والضرب الي اكلته مال سنه .. ماريد ازيد الموضوع ..  وامبين هو جاي وناويلي نيه .. استغربت سكوته اصلا .. بس عرفته مايسبق العاصفه هذاا ..

:- عجبج ابو طبره موو .. بشنو احسن مني .. فر سبحه يمنه .. مالبس بنطرون ضيك مثله.. فر سبحه يسره ..  لو ماادهن شعري مثله .. طلعتي ادورين خنثيه مو زلم ..

قرب وجهه يم وجهي ..دك باصبعه على راسي .. همس ..  ان مامشيتج على مرامي يابنت عمي ماطلع انااا رشيد الي مشي زلم مشوربه على تك رجل ..

عافني وطلع .. بجيت برعب منه .. طلع شكد حقييييير يالله .. هذاا شنوووو .. كمت على حيلي داتلاحك لجهازي لا يودو لابو حاسبه ويطلع الاول وتالي .. والله لا انعدم بوقتها ..

ردت اسوي اي شي .. بس حتى تنسد سالفه .. صخااام شسويت اني .. شلون حطيت نفسي بهيج موقف .. عزااا بعيني عزااا ..

سحلت روحي سحل .. خلاني اخاف من خيالي .. شفت ياسر  و جاسم حاطين راسهم بجهازي .. جيت اتقيئ من الخوف ..

ماردت يشوفون الرعب الي بوجهي .. اتجهت للمطبخ ..صاح وراي جاسم .. تعاااي ..

التفتت عليه ضايجه .. نتر عدلي خلقتج لاااجي اعدلها اني ..

التفتت على مطبخ .. صاح هاج موبايلج ..

مشيت اخذه منه .. مديت ايدي .. سحبها حيل ومردهاا ..

ااي ... اااااي ايدي .. دموعي جرن بسبب الالم ..

ياسر :- كاافي يمعود شبيك وياهه .. شجاك .. دعوفهاا

ابو فهد :- هدها جاسم .. شنو قصتك متوليها اليوم .. لزم ايد جاسم يبعدها عني ..

سحبت ايدي بسرعه منه جيت امشي .. صاح ابو فهد هااج .. شمر جهاز عليه ..

اخذته وطلعت.. طبيت لغرفه امي .. اسمعهن يصبن بالغده  .. فتحت موبايلي .. مسوين اعاده ضبط المصنعه .. ماسحين كلشي بي .. مصفرري .. ماعرف على شنو ابجي بيهم .. من عدا الخوف الي اكل مني .. طبت امي ..

:- ماتجين تتغدين ..

:- هزيت راسي لاا ..

:-دشوفي وجهج يمه داعي ليمونه .. وصدرج امبين راح يتنك ... امشي اكلي وواشربي دواج ونامي لاتشيلين هم حبيبتي ابوج يحلها ..اهم شي صحتج ..

انهضمت من حجيها :- ماريد يمه مااشتهي والله ..

:- قابل اضلين هيج ياامي ..  الاكل شدخله بزعل .. كومي اكليلج لكمه يمه .. وذبي حمولج على الله تنحل انشالله بس صحتج اهم هسه كومي  ..

كمت وياهه طبينه للحولي .. خالتي وبناتها اكلن وحدهن بالمطبخ .. اشرلي بابا تعاي هناا يمي ..

كعدت بصفه .. الكل ياكل ومحد حجه .. الي اجو عليه صار .. وخربو الاول وتالي عليه .. محد خسر غيري .. شنو دفعت ثمن اي ذنب .. شنو سويت وصار بيه هيج ..

هاي جزات الي تغافل اهلها وتحب من وراهم .. لو حوبت يتيم وطلعت حوبته بيه .. بس اني ماكتله حبني .. واصلا هو مايحبني .. عمري ماسمعت كلمه احبج منه .. دومه يتصرف بحقاره وياي وياذيني ..

ابد ماعملني بحنيه ..عود اذا تصرف زين وياي يعاملني عبالك اشتغل عده .. واذا عصب وضاج يتصرف عبالك عده عداوه وياي ..

اخوط بالمرك وماكلت شي .. لحد ماجدي كال :- هدي الخاشوكه جدي دوختينه بيهاا ..

تركته وجيت اكوم ..

بابا :- اكعدي اكلي بابا

:- الف عافيه مااشتهي ..

:- وراج دوه .. تكلي شوي علمود دواج ..

قدملي البن وتمر حطه كبالي .. اكل تمر ولبن ..رفعت عيني عليه .. ياااكل ولا كأنو توه حرك الجو علينه .. ولاكأنو توه خرب قسمه بين ثنين ..

مايعرف مقوله جمع راسين بالحلال .. ردنه بعض بالحلال .. ماعجبنه التختل .. ردنها حلال .. ليش خرب علينه ..

لو الي جذب عليك وسكران هذا شاكول عليه .. اكلت كم لكمه وكمت .. احس عقلي واكف واي رده فعل ماعدي .. متفاجئه وشابعه قهر .

كارهه اسحاق على منظره وهو سكران .. وشلون عده هيج شي واني ممنتبهه .. الغبيه.. ومقهوره لان خربت القسمه مره ثانيه وهالمره جااايده .. ماوراه اصلاح

# يتبع

البارت طووووويل بس تصويت ميشجع ليش هيج ؟!
باجر ماكو نشر لان اليوم نشرت بارتين💜💜