رواية ثأر مهري منهاا الفصل السادس والعشرون 26 - بقلم اسماء ديمير

《《البارت 24》》

#ثأر_المهري_منها

بقلمي " أسماء ديمير "

- ليش مادك علينه بوكتها ..

- على اساس خطه العراقي تالف وباقي بس التركي . مسحت على راسي وطلعت لليل اجت خالتي سعاد وبنتها ميساء  المزوجه ورجلها .. رجلها مو غريب ابن خالي الي باربيل  ...هم سوالف وشقه مالي خلك بس يونسن بسوالفهن ..

تريد تستقر يم خالي باربيل  ،  تكول شغل هنا ماكو ورجلها جايه عرض شغل هناك ،  بشركه مال معدات كهربائيه وياجرون هناك بيت ، ويستقرون بس جاي يرتبون امورهم ..

غفيت على سوالفهم مادري بنفسي .. صبح كعدتني امي اتريك واشرب دواي ،  كوه كمت جسمي منعنع من الالم والادويه .. كعدت اتريك واتصفح بالموبايل اكلب بالفيس .. شفت صور ياسر الي ناشرهن قبل سبوع واكف بصف نوارس ويضحك فدوه ربي يحفظ هالطول .. الضربه الي برجله امبينه حيل الله يشفيك ياارب ...

مدري شلون راحت ايدي على قائمه الاصدقاء ،  وشفت اسمه .. هو من يومه صديق ياسر بس عمري ،  ماتجرأت ابحث وادور عنه اخاف من كلشي يخصه ..

استغربت الحداد الي خاله دخلت للصفحه كلها تكله بقيه بحياتك ،  كلبي اذاني دخيلك ربي بس لا ابو مات ،  اخر مره امه سولفت كالت عده تلف بالكليى ..

الناس كلها معزيته بس هو ماراد على اي احد .. كلت اكول لاامي ،  بس هسه متكلي شمدريج .. هدى بنت خالي سالت هيوو مو نحجي وياج ..

- هاا ..

- جايج برد وانتي صافنه شببج ..

- ماكوو هيج جاي اشوف بصور ياسر ..

- ياصور شو وجهج غندب ..

رفعت عيوني عليها اكوللها لاا ... خفت احجي بس ردت افضفض ،  كتلها هذا صديق ياسر مسوي حداد ،  همه جوارينه خاف ابو مات ..

- صاحت يااا ياهو هذول نعرفهم لاا ..

- تلعثمت كتلها جوارينه بنتهم صديقتي اي ..

- شو وينه كامت وكفت بصفي وخلت راسها بالجهاز وينه شوو طلعي ..

- طلعت الصوره .. ياا يكلوله البقيه بحياتك بقاء لله الله يصبر الوالده . يمكن ابوو ..

- مادري اعتقد خلي اكول لاامي ..

صحت لاامي اكللها يمه شو جوارينه بيت ابو اسحاق ناشرين حداد ..

- يااا منو ناشر عزاا ..

- ابنهم ..

- ابنهم منوو ..

- اسحاق يمه شبيج صديق ياسر على فيس وشفت معزي ..

بهتت هيه هاااا خاف ابو ولج امه ذاك يوم كالت ..

اي اني هم اكول هيج خطيه الله يصبرهم ..

لعد دكول لخالج يوديني هم عيب منهم صاحبين واجب همه علينه بفاتحه ابوج ابد ماعافونه ، تذكرت سجى خطيه هيه بوفاه بابا على راسي وحاظنتني تبجي وياي ، هم جن دنيا لوت ذراعها وكسرتها مثلي ، موت الابو كسره ياناس والله  ..

صدك بس اجه خالي كال اتغده ونروح الهم ..شكد انقهرت عليه وتاذيت الله يرحمه الله ، بالي يم اسحاق ، لو سجى هسه هم ضأكت اليتم مثلي .. لو اسحاق ااخ ياااسحاق  حسره كلبي وجعه .. شلون حاله هسه وابو مات هم يحس مثلي ..

طلعنه العصر الهم وياريت مارايحه ولا واصله ،  احس المنطقتنه  صارت سوداويه بعد بابا ، ماتنسكن شكو غالي بيها راح وعافني .. منطقه اخذت عزاز هواي اخذت شعور بالامان والوفه ..  دخلتي لهاي منطقه جان القشه الي قسمت ظهر البعير .. وصلنه لبيتهم واسمع الصراخ والعياط .. باب بيتهم هوسه وزلم واكفه ودنيا مكلوبه سيارات وجادر .. منظر يخوف

انعاد عليه العزا مال بابا كله ، صوت الصراخ المفجوع والونن مال الكلوب المتالمه .. دخلنه للطرمه صوت النسوان صراخ تارس البيت ..   عبالي عزاا واحد جبير ومات عبالي عزاا واحد شاف من دنياته على الاقل شي وتونس بشبابه  .
.

ماضنيت العزاا هذا عزاا عزاز كلب وروح .. ماضنيت عزاا شباب ورده مفتحه ماشافت من دنيا شي .. لحد ماوصلنه لبيتهم واني وامي عبالنه ابوهم من دخلت وشفت الام مدده وتنوح من دخلنه وشافتني عاطت بوجهي .. يبووووو راحت يمه اخيتج راحت !!!!

ترفع بيديها وتلوح راااحت يمه راااحت

ضليت واكفه وجسمي كله قشعر من صرختهاا ..

لبدت وره امي مجلبه بيهاا .. صاحت بيه يماا راحت ورده مفتحه يماا ماكحلت عيوني بشوفتها عروس يماا ..

استوعبت جاي تكول امي لطمت على وجها يااا عزاا العزااج خيه يبووو..

اريد افرزن شنوو صحت ابجي  يمه شنوو منو مات يماا لا يمه ..

امهم تبجي وتصيح بعد امج يسجى رحتي وعفيتي يسجى المن ضل البيت فارغ يسجى ..

لزمت بعبات امي وكعت بالكاع ابجي ،  امي على بجي امها ضلت تعيط وتصيح سوده عليج خيه ، بعدها صغيره شبسرعه تلاكفها الموت .. جن بابا توه مات اني وامي نريد نستوعب كعدت بالكاع ، وخاله راسي بحظن امي اعيط كمت اضرب على وجهي ،  اريد استوعب يااربي جنه متزاعلات اخر مره .. ماباوعت بوجهي اخر مره من شفتها ..

جانت زعلانه على زعل اخوهاا .. فقدت صديقه واخت كلها بسببهم بسبب عمامي واخويه خلوني اخسر اعز ناسي وهاي هسه ماتت اختي وصديقه طفولتي وهيه زعلانه ..

صوتي نبح من العياط حتى ايدي عضيتهاا ،  ندم اااخ من ندم بيش يفيد ،  وينفع صاحبه العمر وطفوله الي راحت وضاعت ..

بجيت لحد ماراسي بند ،  وخدرت اطرافي ،  خليت راسي بحظن امي ماطلع مني بس الون .. معزتها بعزه هند والله وجوز اكثر .. امي ضلت تضرب بخدي تصحي بيه ،  اني فقدت حتى صوت بجي ماسمعه ،  الالم الي براسي وصدري كتلني من كد العياط صدري احسه راح ينفجر ..

امي شالتني شيل كوه هيه وبنيه لخ تكابلن عليه ،  كالت فدوه دزو جاهل يصيح خالها  ، هاي تخربطت داخذها للمضمد تنك صدرها ..

سندتني امشي كوه انداريت على ام سجى ، المره فاقده الوجهه مزرك ، مادري شلون وليش وشنو صار ،  كل الي اعرفه ذيج الايام وصاحبتهم ميرجعن ابد .. وصارن ذكرى .. تطشرت الضحكه والونسه سوه ..

هيه هاي دنياا ماتضحك دوم ، وماتنطي فرصه نصحح اخطاءنا ،  ولا تحذر الوادم من فقدان عزيز .. دنيانه وكحه وصلفه ماتحسب لخواطرنه حساب ، ولا المشاعرنه ولا حتى صحتنه .. اني من كثر صدمات صحتي اول من خان بيه ..

خليت راسي على باب انتظر خالي ، دخل اسحاق ساند ابوو ماشافني ،  شايل ابو شيل مثل طفل .. الوجهه تعبان حيل وملابسه سود معتمه حتى على وجهه .. فات من يمي ملتهي بابو هو واخو شايلي شيل صاير عباره عن هيكل عضمي من ضعف ..

بجيت على وضعه وعلى حالهم .. الله يعينكم الله يصبركم ربي يفرجها عنكم .. المصايب من تلتم على بشر تلتم مره وحده ..

دخلو ليجوه وطلعو بسرعه على عالم الي بالجادر .. تلكاهم  خالي وسلم مره لاخرى وترخص منهم ..

حاجاني يله بابا لزمني من زندي ساندني هو وامي .. امي حاجته لاسحاق وراي " بقيه بحياتكم يمه الله يصبركم  ..

رد عليها وصوته مبحوح " حياتج الباقيه ام جاسم ...

انداريت عليه دموعي تارسه عيني نزل قهر عليه هو .. ماكدرت احجي ولا انطق .. رفع حواجبه ثنين مبتسم بقهر كال " وهاي صاحبتج هم راحت وعافتنه !!

درت وجهي ماعندي جواب  ، شحجي وشأكول واني الغلط راكبني ، والحجي ماعد بي فايده ، ولايطيب الخواطر .. ذببت ثكلي كله على خالي هو صاح الله خالو شبيج تعاي هاي انتهت يمعود ليش جبتيها وياج وهيه اصلا مريضه ..

امي اجت بسرعه شالتني وياه،  رجلي سحلتهن سحل .. احس اطرافي خدرن مشكله من اختنك اطرافي اول اجزاء جسمي تبطل حركه ..

صعدوني بالسياره وغمضت عيني ،  اجر نفس كوه اغمض وافتح ،  اريد اصحه ماكوو دنيا تفتر،  غفيت بمكاني مادري وين اخذوني ،  لو وين ودوني ، كل الي حسيت عليه اديه ثلج ، رفعت نظري خالين كانونه بيدي ، نزلتني امي من سياره دخلتني كبل للصاله  هدى فرشتلي فراش وتمددت بمكاني ،  خالي شكل المغذي كللها بقيها هنا لحد مايخلص المغذي ..

ضليت بملابسي جسمي يرجف من برد .. هيه حست عليه دثرتني بطاطين .. هدأت شوي وغفيت بمكاني .. غفيت على الالم وخنكه ، وعلى فراك صحبه حلوه ،  وعلى حسره وقهر على عزيز الكلب شلون بي وشلون حاله ..

فتحت عيوني مادري وين وشوكت ، بس ضلمه حيل ، دنيا ضلمه والبيت هدوء يكتل  .. اباوع للساعه ب٣ الفجر .. امي نايمه يمي بالصاله .. اريد اروح للحمام .. ماكدر راسي ثكيل من الالم ..

سندت نفسي كوه كمت على حيلي الارض تفتر بيه .. تمشيت ولازمه حايط احس شايل جبال على جتافي تعب هم قهر الالم حسره ندم .. الندم اكثرهم اذاني .. ندمت على كلشي على ضعفي على استسلامي على خضوعي للحواليه .. مشيت للحمام ابجي اريد ارتاح يكولون البجي يريح شو ماجاي ارتاح نوب جاي اتعب بالزايد ..

دخلت للحمام كعدت بالارض اشهك بصدري صرخه تفزز الموته ، بس منو يسمع منو يحس ،  خليها بالكلب تجرح احسن ماتطلع وتفضح ..

جن واحد من اهلي مات ، جن نص روحي ودعتني ،  سندت نفسي وكمت على مغسله اغسل بوجهي ،  واكول هذا يومها هذا قدرها هاي خبزتها انتهت مو بيدنه سالفه ..

رجعت لفراشي اقنع بنفسي ،  هذا الله كاتبه ولازم يصير راحت لمكان افضل .. رفعت بطانيه على وجهي ابجي حيل كلبي شيقنعه روحي شيصبرها .. ايامنه احلامنه ضحكتنه روحتنه للمدرسه سوه هاي كلها صارت ذكره؟؟!!

الله يعين امها لو اسحاق ااخ يااسحاق شلون بيك هسه شلون حالك .. فكرت لحظات ادك عليه واحاجي وابجي واعتذر ، بس مو وقتها هو بيا حال واني اريد سماح .. جريت موبايل طلعت رقمه اتصل لو اعوف الايام اداوي جرحه وتنسي ..

غفيت واني افكر بيني وبين نفسي .. غفيت وصوره سجى بالي واخر لقاء'بينه شلون كان وشلون شايله عليه ..

صحيت صبح على صوت امي تكعد بيه ، وتكلي كومي تريكي يمه حتى تاخذين دواج .. كعدت على حيلي مسويتلي لفه جبن وكلاص حليت شربت شوي و اكلت ربع لفه وذبيتها .. نفسي تلعب واصلا مالي نفس ..

جريت جهاز بالكت متصل لو اكو رساله .. كلشي ماكوو .. ذبيتهم ورجعت لفراشي انام انهزم من الواقع .. ماكعدت غير المغرب .  احس امراض دنيا كلها بيه ..

الاحساس الي عندي يموت الصاحي .. كمت تمشيت بالحديقه شوي كعدت على مرجوحه صافنه على زرع .. حديقتنه هسه شخبارها اكيد الي اشتره بيت مايعتني بيها مثلنا .. هو شنو ضل النه بذيج المنطقه غير بس الذكريات سوده ..

كطعت صفتني هدى .. اجت كعدت بصفي وخلت ايدي على رجلي تواسيني .. كاافي هناء لاتسوين هيج مو اول ولا اخر شابه تموت هذا قضاء الله وقدره ..

دمعت عيني دنجت راسي ابجي ..

حظنتني :- خالتي راح تموت من قهرها عليج ياعيني على كيفج ويه نفسج  ..

ماكدر مو بيدي،  صورها وذكرياتنا وسوالفنه،  كلها تمر جدامي جنها البارحه صارت .. شبسرعه ماتت ماتلاحكت اشبع من صداقتها والله ..سجى نعمه صديقه خسرتها اني بسبب افعالي وغبائي جانت زعلانه مني اخر مره من شفتها كاره روحي عمري كلها ماشفت منها شي سيئ.

- لاتكولين هيج ظروف جانت اقوه منكم ، كلشي صارر موبيدج ، كومي غسلي واكلي لكمه من بارحه كلشي مماكله ودواج مماخذته،  داري صحتج لخاطر امج مو لخاطرج ..

- مالي نفس اجر الهوه ،  مو عاد اكل واشرب دواي مالله ياخذني دارتاح والله كارهه حتى جسمي وروحي ..

- اسم الله تريدين تموتين امج وراج ، شبيج ليش هيج تفكرين بهل سلبيه ..كومي اقريلها قران ادعيلها اهديلها سوره .. لاضلين تحجين هيج قوي ايمانج .

دنجت ابجي واجر النفس كوه .. بعدها مادكت العشرين كليلي شافت من حياتها شنو حققت من احلامها ..

-المكتوب على جبين لازم تشوفه عين مو بكيفنه.. ادعي الله يصبر اهلها وامهاا الله يعين كلبهم ..

-هذا الي قاهرني اهلها .. اني صديقتها راح اموت من قهر شلون باهلها ..

-الله يصبرهم هذا حظهم بعد ..

الموبايل بيدي اباوع للشاشه كل شوي اريد اتصل واخاف .. دخلنه جوه وصعدت فوك للغرفه اتمدد .. من كثر دموعي مخده احسها لزكت بوجهي .. امي جابلتي العشه وماقبلت اكل مااشتهي العسل .. ضلت تحجي راح تموتين نفسج ادري الله يرحمها شنسوي يعني هذا يومها ياامي حرام جاي تسوي .. شنو ناويه تنتحرين مثلا اكلي لكمه عاد وراج دوه ويرادله اكل ..

اجت هدى يمي تسولف وتضحك وشغلت فلم وجابت كرزات .. حجت حجت وماتجاوبت تالي ملت طفت التلفويون وطلعت .. نمت وبالي كوم افكار وحجي وملامه لنفسي .

يوم يجر يوم وكلها متشابهه عيوني كمت ماشوف بيها زين جنها تغوش من كثر البجي .. الغرفه ماطلع منها بس على كد الحمام واكلي قل او وجبه وحده لو ماااكل مو عقاب لنفسي انما كرهت دنيا من صدك .. حياتي انكلبت كلاب كلشي تدمر كلشي ماعاد مثل قبل ..

خالاتي اجن كلهن يردن يغيرن علينه جو ، لان امي هم تعبت من وراي .. بنت خالتي سعاد سفرها لاربيل هاليومين ، وجاي تودع الكل كعدت يسولفن ويضحكن وياحولن وياي اتجاوب وياهن بكلمتين واسكت .. الكلام كمت ماشوف اله فايده او معنى ..

عفتهن يسولفن ويضحكن وغطيت راسي اتهرب من اصوات بشر كرهت حتى الحجي والكلام .. اتمنى اغمض ويطلع كله حلم وارجع لحظن بابا لدفو حظنه وحنيته ..

ثاني يوم كعدت على اصوات بره مو غريبه بس ماميزتها منو .. لمن صحيت وره ربع ساعه عرفت صوت منو غمضت عيني بتعب .. ماريد اكوم ياريت فد يوم مااصحى واموت بمكاني .. الموت شو ياخذ الزين والمرتاح ويخللي الناس الي مثلي ..

ماكمت من فراشي تهربت منهم كلهم حتى من نفسي بالثلاث ساعات نايمه بمكاني واتصنع نوم .. لحد مادخلت امي تكعدني تكلي ابو فهد وامه هناا كومي سلمي   ...

كتلها مابيه يمه تعباانه ارحميني لخاطر الله ..

كومي امي عيب من ام فهد مره مريضه وجاي لبغداد تتعالج ومن سمعت بيج مريضه مرت لخاطرج كومي ..

كمت كوه جسمي مطحون طحن من الوجع .. لبست شال على راسي وطلعت امشي بتعب .. دخلت للصاله كاعده على كرسي متحرك بوستلها وهيه خطيه لزمت وجهي بأثنين اديها تدعيلي بالصحه .. والله كون يعافيني .. ريحتها شكد طيبه نبره الحنيه الي شايلتها تهد جبال من الهم .. ابتسمت الها بتعب الله يحفظج خاله تسلمين .

هيه هم خطيه مو احسن مني وجهه اصفر كركم وتعب باين عليها والمرض هاد حيلها ..

اجاني صوته بنتره .. البقيه بحياتج يابه .. سمعنه صاحبتج ماتت ..

رفعت راسي عليه حياتك باقيه ..

رحتي للفاتحه موو ..

بلعت ريكي اي لعد شلون ..

فر سبحته مخنزر عليه . عجل عليش ماحجيتي وماسالتي ..لو انتي كلها من راسج شور ماتاخذين شور الي وراج ..

صارت بسرعه ..

امه حجتها شبيك يمه فاتحه هاي البنت انخبصت غير صاحبتها مثل اخيتها .. اندارت عليه الله يعين اميمتها اي والله ضنى غالي شحالها هساع ..

حاجني هو ويامن وليتي للفاتحه ..لو لوحدج انشالله  

باوعتله ضايجه من نبره صورته ولهجته .. 

مو احاجيج اناا ..

ويه امي وخالي ...

هز راسه متحلف خير انشالله ..

دخلت امي شايله الجاي سألت ام رشيد على الطبيب الي راحت اله وشنو كللها على قسطره مال كلبها .

كمت لحيلي وجسمي يرجف كتلها اترخص منج خاله مريضه اروح اتمدد .. عفتهم وطلعت جسمي احسه راح يخر واكع من طولي .. اجاني صوته هناااء ..

التفتت عليه كام وطلع للجديقه صاح تعاي وراي  ...

باوعت لاامي كالت روحي شوفي امي .. امه ابتسمت بوجهي تعبان يمه بسبب الاطباء واخبارهم اتحملي فدوه لعيونج . 

عفتهن وطلعت وراه ماعدي اي طاقه تحمل والله لانفسيتي تتحمله ولاجسمي بي عافيه .. كعد على ميز واشرلي اكعد يمه ..

كعدت كباله عاقد حواجبي ..

كال فوكاه انتي ام راهي فوك ماطالعه من بيت بدون اذني ..

شجلبت انته كله اذني واذني وشوري ومتساليني وتكسرين حجايتي  .. ترى بعدم ماصرت رجلي ماتسجلت ببظهر جنسيتك ماكلت لقد قبلت بك زوجا ترى .. بعدني يالله توه قريتنه فاتحه وعساه على جثتي انقرت اي ولله .. موتنتي  خنكتني شحال لو تزوجنه تموتني تدفني بالبيت مو باله ..

اي بعد شكد متحمله عليه انتي .. شكد شايله شبلاج بوياا شجاج ..

دمعت لخاطر االه اعتقني رشيد بداعت عزاز كلبك كااافي متت والله كاافي ..

جر نفس ضايج ..دار وجهه عني ..

كعدت منتظر رد يبرد كلبي ..

اندار عليه .. اناا ابن عرب وتربيه زلم خشنه تربيت على عيب الحرام والمايصير وتقاليد وعادات .. صعبه من بنت متسمه بااسمي اسمع رايحه لفاتحه اخت واحد جان رايدها وداخله بيته وحاجيه وياه ..

سكتت عقد حاجبي شنوو .شهل حجي ..

رفع ايده بمعناه اسكتي .. الجدامج ماهو جاهل يااهناء .. زلم معكله ماتكدر على لساني وعلى نظرتي للناس .. تردين تقنعيني وروحتج لذاك لبيت للفاتحه بس ..

اي والله لخاطر صديقتي ..

لاتحلفين ياولوو وتشيلين اثم جيت احجي قاطعني ..

اسمعي يابه ساكت ومتغاطي مو جهل مني لو غباء بس لان امي ماهي بعافيه وملتهي بيها من طبيب لطبيب وبناء معمل والعمال ماخذ وكتي وتفكيري وماني فاضيلج بس انشالله باجر العقد وره سبوع الزواج باذن الله وتجين يمي .. انا مكمل كلشي وكلت انطيج خبر بنفسي ليش تكولين ماخبرني بنفسه هالحجيت وياج هسه ..

بهتت شنو زواج .. بعد وكت ..

بعد وكت على شنو ليش شنو عندج انتي هناا بعد  ..

طلع جهازه دشوفي يابه محظر كل شي اناا .. طلع البيت زجاجي شلون مرتبه والحديقه والكعده الصايره بكراسي بيض ورد تسلق صاعد على بيت زجاجي وداخل بيت تور ابيض مغطي الاضلاع حتى مابيبن الي داخله شنوو  .

ابتسم عجبج عقدت حاجبي'ضايجه دمعتي بعيني .. كتله صديقتي بعده ترابها مانشف احترم حزني على الاقل ..

قاطعني كال شوفي هاي'صوره رفع جهاز بوجهي فستان ابيض ناعم وبي ردن طويل صدره بي شغل يدوي مطرز بشذر ذهبي ناعم ومن خصر وجوه كلوشه بسيطه ..

عجبج ابتسم وصيته الج من اربيل جابو قبل يومين شغل يدوي هذا عجبني اشوفه عليج ..

غمضت عيوني درت وجهي متاذيه من بروده دموعي يردن يوكعن بس جاي اكافح بيهن ماراح يحس بيه  .كمت من يمه مأيسه ..

حاجاني هاا وين  ..

باوعتله تعبانه اروح ارتاح ..

موافقه هسه على باجر ..

هاهيه بكيفك بعد وبكيف جاسم ..

صفن بوجهي ركز زين بملامحي .. راضيه بيه لو دفعه بلا كلتي اي ..

ابتسمت بسخريه ..  لا موافقه ليش تحجي هيج ..

ابتسم كال عيونج يكولن ايامج وياي كصار ..بس انا اصدك بكلبي دنجت خوف منه .. رشيد.ذكي ونبهه كتله خايفه بس .. بس راح اجرب امشي وياك وعلى شورك وانشالله خير ..

درت ضهري ومشيت تمنيت يصيحني يكلي على راحتج بنت عمي هاهيه ..بس مااحاجاني .. قبل لاادخل باوعت عليه لكيته عاكد حاجبه بضوجه من شافني رخه وجهه وابتسم شكد احاول افهمه بس مافهمت من طبعه شي مره عصبي وخبل ومره طيب وحنين .. يم امه واخواته ماكو منه ويمنه عبالك اعدائه ..

مشيت للغرفه تمددت من دخلت حاجتني خالتي هاا وين الرجال اشرتلها بره بالحديقه .. دخلت للغرفه تمددت بفراشي وغطيت حتى راسي طلعت موبايلي اتصل لو لاا .. احاجي لاخر مره ..

.. دست اتصال وكلني ندم بس اتصلت خلي يحجي الي يريده دك ماشاله

درت وجهي على حايط متكأبه غمضت عيوني عبث اريد انام كوه ، دخلت امي عليه كالت كبل شكالج هذا رشيد ..

ماحجيت بس'صافنه بوجها

كالت مالج شغل بي هذا يحجي بكيفه شنو باجر المهر مو على كيفهم ..

سكتت وغمضت عيوني يأست حتى من محاولات الرفض وكلمه لاا ادري مامنها فايده ..

اجت كعدت بصفي كافي ماما موزين هيج عليج وعلى صحتج ادري اشيل همج لو هم اختج لو اخوج الي بالغربه ماتكولولي  ..

دمعت عيوني بجيت صرت حمل ثكيل عليج موو ..

لايمه لاتكولين هيج مسدت على شعري فدوه لعيونج اروح ، بس لاتقهرين نفسج ولاتشيلين هم هسه احاجي خالج مو كيفهم يمشونه ، وحتى لو عقد عليج نحاول نخلي ياجل زواج ..

مارديت عليها ادري هيه هم مثلي لاحول ولاقوه اكثر شي بيدي تعارك جاسم وبس ..

غمضت عيوني اتهرب من كلشي ، كامت من يمي وشعور اليأس متملكها ، راح نستسلم بالاخر راح نخضع الهم اني ادري ..

بليل دك جهازي رفعت ماصدكت من شفت رقمه ، فتحت الخط ماحجيت ، انتظرت هو يحجي ، انتظرت عتاب يوجع يبرد كلبي ويريح ضميري ..

بس ماحجه ساكت والهدوء يخوف ، وره دقايق حجه ليش داكه شرايده بعد مني ..

سكتت خجلانه شحجي ..

احجي لو انتي ماتعترفين بالحجي بس بالافعال ..

دمعت عيوني بجيت بسكته ..

جر نفس ساكت ويستغفر ربه ..

همست بقيه بحياتك الله يصبرك ..

ويصبرج ..

جانت مثل اختي والله اعز هم من هند .. بجيت ، صديقه طفولتي هاي احبه كلش انته تدري  ، ادري الحجي مايفيد بس ماعندي غيره ضميري يأنبني جانت زعلانه مني اخر مره من شفتها ماباوعت بوجهي كارهتني كلش ..

لاتحجين هيج كالت مره خسرت صاحبتي بسببك ..

شلون توفت اني ماسالت ماعندي كلب اسأل ..

جر نفس طك الطباخ عليها ولهبت نار بالدشداشه بساع .. مالحت عليها لا اني ولاامي ، طبك صوته احتركت جدامنه لحد ماوكعت يله كدرنه نطفيها ..

بجيت بقهر هو وياي ، صرختها بعدها باذني هناء صراخها توجع تفززني كل مااغمض عيني ، جنها بعدها عايشه عطرها بعده بالبيت صوتها كلشي احس روحها تفتر بعدها ..

الله يرحمها ويصبركم ، ماكدرت امر عليكم بعد لان تمرضت وصدري جاي يتنك وماتحمل ..

ادري كالت امج من اجت ،

سكتنه ثنينه كانو ضاع كلام ..

همس شخبار زواجج ..

سكتت حايره شارد ..

وياي ..

اي ..

ماتردين تحجين ..

لا خجلانه منك ..

على شنو ..

على كلشي اسحاق ادري الي سويته مو سهل بس مو بيدي ..

تحبيني  ...

مارديت ..

احجي ..

باجر المهر مالتي ..ماحجه ومارد عليه ،

وره بسبوع زواج ، جاسم وعمامي متفقين على كلشي ماعندي علم بشي اني والله ..

موافقه انتي ...

بجيت :- لا والله ابد ماريده ولااريد عيشتهم بس شسوي منو يسمع ..

تنهد جنه مايس مثلي .. حجه بهدوء باجر طالع لسليمانيه تجين وياي ..

- هااا ، شلون يعني ..

نفس ماكتلج قبل اشهر وغلستي عني تجين وياي ومناك نطلع لاخوج ياسر ونعقد ونخليهم امام امر الواقع ونستقر بالشمال منرجع اصلا بعد لبغداد ...

شهكت .. عزاا غير يموتني جاسم يماا

عااط بوجهي حيل كااافي مامليتي حسج بس يمي رفضج بس عليه راح تضلين ثوله وغبيه ويمشون بكيفكم ، بس عليه تعرفين تكولين لاااا ، عليش داكه توجعين كلبي وتاذيني فوك همي وقهري نوب انتي عليه ..

علت شهكتي .. على كيفك بس افهمك ، بس احجي وياك ..

مانطاني مجال احسه راح ينفجر من عصبيه .  كااافي لهناا وبس وصلت وياج ، مليت كرهت حتى الحب والله كمت ماصدك اكو بنت تحب ،  وتضحي تحملت هواي منج ودست على روحي ،

على شنو نذليت على شنو سمعت كلام بيت اهلج ونطردت على شنو سحلت اهلي وعمامي اكثر من اربع مرات لخاطرج ماتستاهلين ماضغطي على نفسج شوي وتصرفتي بشي الي وبصالحي ..

ماجان عندي رد غير بس البجي حجيه صدك كل الي كاله صدك ماجذب بشي دومي اخدعه واقصر وياه واخذله ..

ليش داكه عليه كليلي .. اذيتيني باتصالج وحق الله زودتي المي اضعاف ..زدتي قهري جبال منين اتلكاها منج من شارع من موتت اختي من مرض ابوي من منوو ..

ماصدر مني اي صوت غير البجي والنوح ..

هذا اخر اتصال بينه هناء ،  باجر طالع الفجر لسليمانيه اجيتي وياي خير على خير ،  مااجيتي لهناا وبس روحي لحال سبيلج ،  هذا نصيبج بعد وانتي امبين راضيه على ابن عمج  ، وهاويته بس مستحيه تكولين ، خليج لو مره وحده صاحبه قرار وسوي الي تردي كافي خاضعه للكل بس لنفسج لاا ..

بلعت ريك خايفه منه ومن نفسي .. سد جهاز بوجهي عايفني بحيره تخوف .. دموعي ماوكفت كلامه يوجع ، ونبره صوته تأذيني كارهني كلش ،  وحقه بهذا شي واني مليت من وضعي ، ومن حياتي شنو حياتي هسه كلها تدخل ويقررون عني ..

رفعت نفسي من فراش خايفه من جاي ومامستعده لاي خطوه اتمنى انام وارتاح عقلي مشوش ..

جني ناويه على مصيبه .. باوعت للكنتور .. لااا ديربالج امج شلون بيها ، لو جاسم والله يشرب من دمي ، لو عمامي محد يرحمني منهم اذا غلطت وتحديتهم ..

رجعت لفراشي خايفه من الوسواس الي براسي ، مراح ارتاح طول عمري باجر اذا عقد عليه تنتهي حياتي للابد ، خاف عندي امل بياسر ينتهي هذا الامل وراح اتسجل بأسمه وكل حق لياسر بعد ماله عليه ،

بحجه مرته وبكيفه ياسر هم تأخر وحار بروحه وبصحته،  جاسم ماله اي دخل بيه ، ويريد بس يخلص من مسؤليتي  امي ضعيفه حال شتسوي مثلا ..

للفجر اتكلب اريد اغمض ماكوو دموعي جفت بعيني ، لدرجه دخت وراسي صدك ، كمت لحيلي ناويه على نيه سوده تخوف ، فتحت الكنتور باوعت بي سويها هناء خسرتي كلشي دراستج صحتج بيت اهلي اخواني لاتخسرين حبج على الاقل ..

#يتبع ...

شوفونه تفاعلكم حبايب 💜 اذا صعد تصويت ينزل بارت بليل انشالله 😘