رواية ثأر مهري منهاا الفصل السابع والعشرون 27 - بقلم اسماء ديمير

《《25》》

#ثأر_مهر_منها

بقلمي :- أسماء ديمير

انا وحيد امه واخواته ،

انا سند جده وعمامه ،

انا الي كافل يتامه ،

انا بسبب الضيم وشيل الصناديك تكسرت عظامه

انا الي قست ومرمرته ايامه

انا الي اتوسلت الحب من الي هواها كلبه وماحصله

انا رشيد ربيت يتيم الاب ،  وصرت اب لاهلي وبعدني مداخل عشريني ،  بعد استشهاد اخوي وعضيدي عدنان ، تجرعت المر بعد موته وغيابه عنه ، تحملت حرمته الي ماتتحملها جبال ،

تكفلت ابنه الي كل ماادحك عليه يزرف افادي بمرضه لاحس ولا صوت وهو والخبل سوه ،

تحملت ون امي ومرضها وجعها ، تحملت يتم اخواتي و حرمانهن من الاب ، تحملت وتحملت مو لان مجبور ، متحمل وانا الممنون لان هذا واجبي ومالهم احد بالدنيا غيري ، لان اعرف شنو فقد شنو العوز شنو الضعف شنو الحرمان ...

عشتهن كلهن بصغري اشتغل ويه عمامي بالكاع ، حتى اطلع صندوك مخضر لبيت اهلي بلاش ، دكيت دك الحمير في سبيل مااتعاير بمساعدتهم الي ، جدي ماقصر وياي ، بس خما يكعد ويكابل احتياجاتي واطلبات اهلي ، تكفلوني عمامي بعد استشهاد ابوي ، بس كصو حيل بحجه رجال وابو بيت انته عدنان بذاك الوكت بالجيش هم صغير وملتهي كلها ملتحق ..

وكع الحمل والشكى عليه ، ومااني شاكي لااحد لغير الي خلقني ، ماحب المذله جنت اشتغل بالبستان شغل اثنين ، مااهد الكاع والبستان الا وكركين ينكسرن بيدي اقل شي ،

المنيه تكتل حيل مااحب تكتلني بيوم ، برغم سمعت كلام من نسوان عمي على همه الي معيشينه ويصرفون علينه بس ماهتميت اعرف هذا شغلي وتعبي ،

درست وشتغلت بس بالدراسه مادبرتها لان ماعدي وكت او الاصح شفت مامنها فايده ، كطعت المدرسه بعد وفات عدنان ، شفت خلص لازم اصير رجال البيت واعتمد على نفسي ..

تركتها والتهيت بالكاع وبالزرع الي روحي هاويته ، اخذت ايدي على الكرك والفاس زين ، سبقت عمامي بالشطار كمت اغبش كبلهم للكاع ، من يشوفوني هيج يشمرون بهل شغل علي ويزيدون الحمل حملين  ،

مو كره بس لان اعتمدو علي ، وشافوني كدها عكس ولدهم ، لحد مااستلمت كلشي بالبساتين والمزارع ،  الي هيه ملك لجدي ،  ماتدخل شغله وتطلع الا وانا الي علم بيها وبرأي  وشوري تدخل وتطلع ..

رتبت بساتين وخليتهن بس لانتاج الفواكه والتمر ،  وعفت المزارع لانتاج الخظراوات الموسميه .. جبت كتب وتعلمت وقريت وفهم وبحثت ماخليت شغله ماعرفتها عن زراعه بيوت زجاجيه تقطير الرش كل انواع الرأي الحديثه تعلمتها  .

زهي البستان وخظر كبر الانتاج وزاد ، بس بعدني عد عمامي ذاك اليتيم الي ينطو يوميته صناديك مخظر لاهلو ،  وكم فلس يسد يومه بيهن ،

كبرت والوضع ماعجبني ،  مو طمع بس حقي ، وشفت حقي انغبن ، اشتغل واتعب واسهر تالي بخت الي اديه ماشافت كرك ولا خشنت من ضربه فاس ، وانا نجر بحقي ، اشلع حقي من عين الجبير قبل الصغير ، حاجيتهم وكتلهم نص محصول البستان الي بكوات عين ..

لان الحق ينكال ، ربع هذا الانتاج قبل كم سنه مجانو يكدرون ينتجو ،  من اجيت انا وكسرت ظهري عليه وسهرت ليل ، على اسكي الزرع وكت نومه فلاليح ، و فيضه الماي بالنهر استغله واسكي الزرع كله ، والباقي اخزنه بالبير القديم للبستان، نستفاد منه بوكت شحه الماي علينه ،

وتحملت صكعه الشمس بظهري وبراسي ، بس حتى ازبر ( قطع الحشائش الصغيره ) الزرع ومايموت وينكتل بيها، كل هذا همه مالهم ايد بي ولا درين عنه ، جن زرع يطلع ويكبر الحاله ، لو البساتين تكبر وتنطي محصول من كيفها ،

محد كال مشكور والف رحمه على ابوك ، عمي مارايدها بس رايد حق عرك جبيني وتعب جدامي بالضحويات وارجع اون تالي ليل من رجليه ، وامي تفرك الفركاص الي بين اصابعي .. 

صارت مقارش ويه عمامي وعمي العود استكوه عليه هو ولده ، بذاك الوكت من صدك حسيت باليتم وتكومو علي الي اسميهم هلي ، ماسكتت وصحت وهددت وعليت صوتي على جبيرهم ، وكلت حكي وضربت ولد عمي الى هدو عليه..

زادت عصبيتي و اصراري ، من مد ايده عليه عمي جبير ولده جتفوني ينطون فرصه لابوهم يزيد بضربه ،   شلون دفعت عمي وتجرأت ، اتمرد عليهم ،

وصلت سالفه لبيت جدي ، على انو رشيد وعمه متمالخين بالبستان ، انا اتعارك وانضرب واسمع صراخ امه ، يمااا وحيد امه وخواته الي ماعدهم حنيه تكاتفو عليك ، وراهه نغم شايله العبا وتركض بلا نعال عليه تفزعلي ..

من حلات رواحهن ماكدرن يفكني وهمه بيهم بالسبعه ، اني اهبد هذا تجيني ضربتين من هذا وذاك ، امي بعد عيني شاطت روحها وفرفحت عليه ،  من شافت دمي ساح ، شالت كسر حجار من الكاع واهبدي رأس عمي بيها وخلي دمو بطولو ،،

ولدو حايرين بي واني نمت على امي لايضربوها ، ونغم وياه تولنهم بالحجار والصراخ لمن الاهل عليهم ،  اجه جدي يركض من بعيد شايل العوجيه وجديتي وراه بالعبا تهفي كوه ..

بذيج المغربيه زعل جدي ، وتولانه غلط وفشار ويزحك بيه ، واحنه دمنه بعده مانشف على ملابسنه ، واكفين ناس تريد تمرعد ناس ،  ودخلو ناس ولد عم ابوي والحجي ماراضين على الي سويناه اني وامي ، وشلون تضرب عمك ، وامك مره شلون تضرب حماها  ،

طلعت زعلان منهم مو راضي بالي نكال ولا نطوني حقي ، ولا لامو عمي وعاتبو وكلوله ليش ، لا تحملنه احنه كامل الوم والزعل ، رجعت لبيت ابوي اغسل دمي الي سيحو ولد عمي ، صدك من كال الاقارب عقارب ،

امي وراي تبجي وتدعي وتكول مسلمتهم بيد الله ، تنظفت من دمي وطلعت لبغداد لعمي الصغير اشكيله ظلم عمامي الي ، ماحجه عليهم ولا انتقد لان مر بالي مريت بي وهم انظلم من اخوته مو جديده عليه عمايلهم  ،

كلي انطيك فلوس اني جامعهم شامرهم على صفحه ،  واشتري بستان وكاع وانا وياك بالنص ، واذا تريد الي ربع هم خلفه عليك احسن ماضالات مركونات على صفحه مالها فايده ..

صفنت بيها خوش شغله بس هذا دين ودين يكسر الظهر ، دين ثكيل واذا متت ماتسدد يثكل عليه كبري بوكتها ، كتله صعبه يابو جاسم خاف اشتري واتصرف بيهم وبعدها ماكدر اسددهن حلف الي كال محالل وموهوب ،

انا لو كايلك اساعدك واخذهن مني واحسبني ابوك جان مارضيت تفكر بيهم اصلا وتعز عليك نفسك احد ينطيك ويساعدك ، بس اعتبرها شغل وجاي تشغلهن وشكد ماتنطي خلفله عليك  ..

سكتت عرضه مغري واعرف عمي ابو جاسم الخير طالع من عينه ، ونيته يساعد وانا هساع امس حاجه للفلس ، خاصه بعد ماعمامي راح يشدون وياي هسه ويشدون حزم بمحاربتي ،

كتله هاهيه عمي الفلوس نكتب بيها ورقه بعد مااشتري الكاع ب٤ اشهر ، تبدي تستلم فلوسك بس من هسه اكلك ياعمي ، اجذب عليك لو اكلك انطيك من اول شهر مبلغ جبير ، راح يكون على كد الحال وشوي شوي اسددهن الك ..

اتفقنه هيج وجاسم ابنه جان شاهد ، ضليت يم جاسم بالاربعه ايام مارجعت لاهلي اريد اصفي بالي وادسترها ، عمي ماقصر كعد وياي وانطاني رأيه وين اخذ الكاع وشلون موصفاتها وكون قريبه على شارع العام ،

عمي سلامه يدك مارديت وجدي ، امي تبجي علي ، وجديتي تلوم بجدي وعمامي شلون هججوني من ديره واكلو حقي وزعلانه ورايحه لبيتنه يم امي تعلن زعلها ،

رديت على عمي سلامه وكتله مالي رجعه واهلي كم يوم واجي اخذهم بس ارتب البيت الي اجرته واطلع من محافظه كلها ، مكان الي مالي بي اهل وعزوه مالي ضله بي بعد   ،

تخبل جدي بوكتها وجاي لبغداد يدور عليه ، خليتهم يحتركون بقهرهم وتأنيب الظمير ، جديتي جايبها عمي سلامه هيه وامي وكاعدات بابو حنيفه يبجن يدورن عليه ،

عرفت بوكتها ناسي وعزازي ، عرفت الكلوب الي تلجم عليه لو غبت ، عرفت دمعه الحنين ، ودمعه جذاب ، عرفت سند وابو نفس الطيبه الي خله كل فلوسه وتعبه بجف ايدي بلا وعود  ولا ضمان ..

بعد ماشفيت غليلي واخذت وعد من جدي ، حقي يرجعلي والي اريده يصير ، رجعت للبيت مرتاح وجن دنيا ضاحكتلي ، كبل دشيت لبيتنه لكيت الحنينه ميته بجي والحجيه منتهه من خوفها لا فقدت حفيدها الوحيد من ريحه ولدها الشهيد ، حضنتهن معتذر منهم بس تعال شيرضيهن وعدتهن ماتكرر والهن زياره مني للكاظم ولشيخ عبد القادر بس يكفن زعلهن ..

اخذت عمي سلامه وياي لبيت جدي ،  درب كله يلوم ويرزل بيه شلون اروح لعمي حسن ، واوصل هناك هو جدي منبه علينه منوصله ،  كال سالفه تندفن بغداد وكون متوصل سالفه لجدك ، يارشيد وماتطلع لاتخسر الاول وتالي ...

امنت سري عنده وادري مايحجي لان سره عندي ، وادري بي يراجع ويزور عمي حسن وره جدي  سكتاوي ، دخلنه لبيت وعمي ولد حادين سنونهم ..

جنهم مو راضين على دخلتي فوكاه ، بعد رزاله من جدي والعتب ، قسم البستان والكاع علينه ، مغبون حقي غبنه تكتل صاحبها قهر بس مو كادر اطلع شبر بعد منهم ، راح تصير صدك دمايه وبهاي مالي فزاع الي يفزعلي ..

سكتت مقهور وانا اسمع القسمه تصير على الاحفاد مو على العمام ،  يعني ورث جدي تقسم على احفاده مو على ولده ، اكثر واحد بينه عده ولد عمي حميد حصته بالقسمه صارت اكبر ، بعده عمي سلامه وعمي علي ، عماتي حصتهن ذهب جديتي ، وعمي حسن مانذكر ابد لا هو ولا ولده ،

سكتت غمضت عيوني ، حجه عمي سلامه مادام انا مالي بالزرع ولدي بعدهم صغار مايعرفون بالكياعين انا نويت ابيع حصتي لرشيد ،،

عمامي صاحو لااا وشلون وانطيها النه وننطيك فلوسها نقدي ، رشيد.حتى  ماعنده فلوس يشتريها ،  بس مارضه ، كال اني ويه رشيد نصافه ، سكتت وجن الحجي ضاع ...

جدي نطاني اني وعمي سلامه جزء من بستان الي صاير وره بيتي ونص الكاع الي على شارع ، طلعت من يمهم على هذا الاتفاق سولفت لاامي سكتت ونقهرت اكثر مني ، كالت هاي بدل ماتكون حصتك بكد حصه عمك لان حصه ابوك ،

صارت حصتك بكد نفر واحد من ولده ، بس هاهيه يمه الحمدلله من راح تتسجل بأسمك وبعد محد اله كلمه عليك ، شالت ذهبها وخلتهم بحظني كالت بيعهم وتصرف بيهم يمه ولاتمد ايدك لاحد غريب ..

ماكلت باطل اتفقت ويه عمي سلامه انطي نص فلوس عمي حسن ، ونص باقي ارتب بي وضعي ، لحد ماسددلهم ثنينهم ..

يابه ست اشهر اشتغلت شغل ودكيت دك ماداكه مطي المعامل ، الله يشهد اذكر بوكتها انام ثلاث ساعات باليوم واكعد من ال٤ الفجر للبستان ، ماجبت عمال كله هذا صرف فلوس ، ومكاين تريد بانزين وكاز ، والعمال هم ، كله اشتغلته  بيدي لحد مانهد حيلي وخر طولي وتفركست اديه ورجليه ،

خاصه بعد ماجان عمي حميد يسد الماي عليه لان النهر عابر بكاعه كبل كاعي ، اضطر اسهر بليل واخزن الماي بالبير القديم وصبح اسكي منه وهيج مشت الايام ،

جنت ارجع البيت يكرم الله  البسطال لازك برجلي من العرك ، والطين ، لو اديه الي تجري دم من خشبه الكرك ، ست اشهر يله كدرت تطلع انتاج ومحصول وابيع واستلم فلوس تعبي ،

سددت عمي سلامه ، وبقت فلوس عمي حسن كلي على راحتك ، اشريت بالباقي سياره حمل موديل قديم بس نعمه ، وتطورت وانفتحت ابواب سما رزق بسبب رضه ربي ودعاء امي ، وره سنه ونص سددت دين عمامي كله وهم ونزاح عني ..

من سياره صغيره لسياره جبيره من نص بستان لبستان كله صار الي بعد مافشلو بي عمامي وماكدرو يديرو والاشجار والنخل اكلهن دود والمرض ، العشب الي طال وتكوم ، الاشجار مال حمضيات انهملن يرادلهن ماي مستمر ومداره ،

وهمه كلمن لاهي لو دراسه كليات لو سفر شمال لو للغربيه ، لو يزرعون مخظر هاي اسهل الهم وماتكلف تعب ، اخذته وجن اخذت الجنه يابويااااا يافرحتك يارشيد ، طلعت حيفي بي بشهر رجعته يلهث  ،

بوكتهاالحمدلله  من بيت قديم بنص بستان الى بيت جبير على شارع ومطل على بستان موقعه خرافي ، البيت قديم عفته مخزن ، ماهدمته بي ذكريات ابوي واخوي الشهداء استعزيت بي ..

وبنيت بيتنه جديد مابين قطعه الارض ومابين البستان ، بناء اماراتي جديد ، سنه ونص ويله كملته ، تزوجت نغم وراحت لحالها ، وراهه لزمت ام فهد الباب وطردتها ، مره ماريد احجي بيها واكسر بختها ، بس السانها متبري منها ، وحرامات تنحسب عليه جانت مره الي يوم من الايام ...

ادري انا كصيت بيها شوي ، بس انا ماقصرت عليها ، جنت اعرف نسوان بس عدد محدود وفتره قليله ماني صايع ولا نسونجي ولا راعي محرمات ، بس مالي نفس بيها تلعب روحي منها ، احس جن روح عدنان بيها ،

ورايد من اطبطب على جتفي ومالكيت هذا يمها ، فضليت هايم مابين بغداد ومابين ديالى عمي سلامه ماضم علي ، جنه ابوي صح مو راضي على روحتى لبغداد وفرتي بذاك درب بس ماحجه ، يدري بام بفهد غبنه وثوله ،

سكت وماحجه .. الحمدلله وديت امي للعمره ، خافت لاتموت ومازاره بيت الله ولا مسجد النبوي ،

الخير جثير والهم اكثر منه ، بسبب مرت اخوي وابنها المريض ،

بس يابه كله يهون وعبرته الا ظيمي الي بده بذاك اليوم .. زاد همي وسهري بشوفه عيونهااا ،  من يومها ودعت نوم والراحه ، اتذكر من هي زغيره بس مامنتبه عليها ..

وياريت مانتبهت والله ، لو عميانه العيون ولا لافته نظري ، تختلف عن الناس  ، جاهل بجسم حرمه ، انا الي بحياتي محد ماخذ مني حبه ولا مطكه ، وهاي كل شوي مسدحه بحظن واحد من اهلها وتتمرغل وتمطك بهذا وبذاك بلا حياه حظور ولا مستحه ، وانا ابالع برياكي..

لو لبسها الي بس الي بلا اهل واصل تلبسه ماعدنا هيج حنا ، بناتنه مستورات ، ويخافن من خيالهن ، ومطيعات بشكل والجلمه ماتصير ثنين والراي رأي اهلهن ،

الا هاي رعنه شورها من راسها ، ولبسها ماخذته بحريه ودعم من عمي ، اااخ يااعمي الي ماكدر احجي بي بالشين ، رايحه راده بشعرها ولا شايفه احد ولا تهاب احد ، بنت السكط ..

شديت وياه شده محب ياخاف على عرضه ، وشفت عدها زلات ماينسكت عليها بس عذرتها تربتها غلط ، وعقلها عقل جاهل ، وكلت اعذر واربي على مرامي عودينه ، تربت بمدينه وصعب عليها طباعنه ..

جاهل وبنت دلال ، وتضوج من قسوتنه ، بريئه وتسوي كلشي بفطاره ، كل هذني جان ظن ،

وظني طلع غلط ، والله عدها عكل يفر زلم ، من اصفن على فواينها اكولن شلون سكتت الها انا بذيج الساعه شلون ماجتلتها بمكانها ،

شلون خلتني افهه جدامها واسكت ، هاي بنت كادره وكدرت تلعبها صح ، تالي طيحتني على وجهي انا الي ماطيح ، طيحت وجهي الي ماكدروله عمامي ..

بس صدك لاكالو عمه كلب وعين  جنت ومااشوفن سوالفها ، او الصدك اشوف بس مغلس والكه اعذار ، واكول بنت عمك العزيز تغلط ياهو الي مايغلط ، اخذها وربيها بالترغيب وترهيب ، اقسه ساعه ودلل شهر ،

اذي لحظات و ، داوي يوم كامل ، راح تحبك هاي تحب دلال وتربت عليه ، انطي الها وتحبك ، شوفتني المر بدلالها وعنادها ، صح اقسي عليها واضربها بس من حبي الها ..

خطبتها و وزيت جدي واهلي كلهم على عمي حتى ينطيها الي ، صح ماداعيت بيها بالساني عبن كرامتي ماتسمحلي انرفض بشكل مباشر ، وكل مااحس اكو رفض منهم اسد الموضوع من يمي ...

جدي واهلي يدرون هاويها سعو بيها وحجو ، صح كلها ماعاجبها اخياري وعمامي شالو علي بس مايكدرون يحجون لان تبقه بنت اخوهم ، ثكلو وجهه لان بناتهم سنين كبالي ماداعيت بوحده منهم الي ، شلون عمي حسن ردت منه واصريت هم ...

ادري بعمي ماينطيها ، وراح يشلع كلبي ، بس لجئت لجدي صاحب الكلمه الاقوى والاكبر ، وانا هم ماقصرت ، لحد مانفجعنه بوفاه ابوها ..

الله يرحمه رجال ونعم منه ، وكفلي وكفات ماتنسي وتخجل من كرمه الي وحنيته ، اجتني فرصه اخطبها وصدك وصارت ، وقرينه فاتحه جنت رايد وياها عقد بس جاسم اخوها مارضه بحجه شوي شوي ماريد اقهر اختي وتراب ابوي اخظر مايرضه عليها وعلى زعلها ..

سكتت وكلت هانت ، مابقه شي وتنور بيتك وتكون عائله وياها وتعيش عيشت حسن ، براحه ودلال ، حظرت وكونت ورتبت اموري كلها على اساسها ..

من بيت و ديكورات ، حتى ثواب اخذيته الها من اربيل كلت ماتلبس ياهو جان اريد افرحها حتى لو بشي بسيط ، حتى البستان رتبته الها كلت ماتحب الريف هيه اسويلها اجواء غريبه ومريحه ومرتبه بالكت تقنع وتحب الاجواء هنا ..

جنت ناوي اسويلها مشتل صغير بصف بيت زجاجي تتسى بي وتنسى سالفه كليه ، الي كارهه وماطايقها مامتخيل مرتي ادش كليه بنص زلمه وتحجي وياهم حتى لو لاجل دراسه ، ماراح اقصر وياها شهاده مالها لازم ،

شفت بعيونها الجفه والزعل ، بالقرعان شفت بعيونها ايامي وياها كصار ومو مطولات ،

لو نكدر يروحي

نطير فوك الغيم

فوك الضيم

فوك دروبنه الضيكات

حتى الخطوه تمتد

والمسافه تطول

وتكبر بالنهايه

احلامنه الحلوات

# يتبع

بعد ساعه انزل اجوبه عن بعض الاسئله الي شفتها بالتعليقات حتى فضولكم شوي يهدء💜

وهااا بعد ماااانزل بارت لو يجي ابوووووي 😤😅😂 لان ماكاتبه حرف للبارت القادم عفيه على كيفكم

بس راح اغششكم رويشد هو بطلنه 😒