رواية ثأر مهري منهاا الفصل الخامس وثلاثون 35 - بقلم اسماء ديمير

《《البارت 32》》

#ثأر_مهري_منها

بقلمي "أسماء ديمير"

انصدمت عجل ليش محد كلي ومحد نطاني خبر ..

طلعت اركض للسياره ، جديتي تصيح على وتحجي ماسمعتها ، كبل دكيت على جاسم اريد اعرف وين رايحين وين لكوها ..

مايرد علي ، دكيت على عمامي هم ماكو محد يرد ، ضليت ادك لحد مارد عليه عمي سلامه ، كال لاتجي يابه ، احنه نجيبها ونجي ، عطت بي وين انتو عمي ..

كال يابه داكلك لاتجي ولاتوصل ، هساع يم خوالها متعاركين وياهم مايرضون يطوها الناا الا يجي اخوها ياسر ، لاتجي بعد عمك لاتنسى انته كاتب تعهد كبل تنحبس اذا دشيت المنطقه ديربالك تجي  ...

سديت جهاز بوجه وشخطت سياره متوجهه لبغداد ، ااخ يابغداد شكد شفت بيج ضيم وانا ماساكنج بس ازورج كل فتره ،

مايوم توجهت الها الا وراها مصيبه ، صفتنتي واهسي وضحكتي كلها تطشرت ، جنها خرز ترس كاع ، شيلمه وشيلضمه بعد ، جني خرزه من خرزات ثوابها الي ترسن غرفتي ، والكاهن بصدف جدامي ،

شكد مر على غيابها وهروبها ثلاث اشهر ، ثلاث اشهر و١٧ يوم ، ماتجرعت الي سوته ولا نسيته ، الكل جدامي يسكت عن طاريها ويمثلون نسو ، بس عارف بكفاي يحجون بينه ،

عارف صاير الهم سالوفه ينكعد عليها بعصريه ، وبكل جمعه ، من زمان ضايع بين ناس ادور الي يحن علي ويحبني على الله مو المصلحه ، جن الناس نست الله واختفه ذكره من كلوبها ..

سيارات ماتنطي مجال وازدحامات وانا روحي طافره اريد بس الحك عليها ، لا تطلع من يم خوالها وين الكاها بعد ..

والسيارات ادك هورن طرشتني البوابه مال بغداد تكتل كتل بازدحاماتها  ، وما اني ممركز وكل شوي اشخط سياره وارفع ايدي اسب ،

والله طحتي بيدي يالطيحتي سمعتي بمهري وبيوم عقدي عليج ..  مادري شلون فلتت من ايدي سياره وفقدت سيطره عليها من سرعه مالكيت نفسي الا ضارب ستاركس بيها عايله ومفلش دعاميه  ..

نزلت دايخ ومسطور ، ابو سياره نزل يصيح ويشتم ، انا روحي ماطايقها وهذا نزل يكمز تلاغيت وياها ونوب تضاربنه ، الناس نزلت من سيارت تفزع ،  طبكت علينه سياره جيش وهم نزلو يصيحون علينه يفاككون ..

انا وضعي مو مال اتفاهم ولا اخذ وانطي فتحت باب سياره ،ورجعت كعدت بيها دايخ جن ضغطي صعد ، هذاك ضل يلغي وجيش يحاول يحل موضوع ويتفاهم وياه ، خليت اديه على راسي استجمع قوتي الي بادت ،

نوب شافوني خنست ومالي حيل احجي ، كالو رجال باين مريض يابه كول يالله جوز داخ وهالضرب سياره . جابولي بطل ماي اغسل ماخذته كاره روحي شبلاك ياول شبيك انهاريت كوم جيبها واشحطها ليم رجليك  .

رفعت راسي على هوسه ، وناس الي بدت تنجمع وتتفرج ،  دكو على مرور واجه يخطط ، دك عليه عمي سلامه كال وين انته يابه كتله سويت حادث بالبوابه ، كال احنه رجعنه ، وهساع جايك انااا ...

طلعت انا كاسر على زلمه وهذا يريد فلوس تصليح سياره نوب يحلف الا تنحجز سيارتي ، يله يفك سالفه .. اني احس جسمي مو الي سرت الرجفه بيه ودوخه سطرتني سطر ...

طبك عمي سلامه واجه يركض على هوسه ، عبالي بيه شي ، من شافني هدء ، الله يسامح ياول وكعت كلبي ، هاي'شمسوي بسياره الوادم ، الحمدلله مانجتل واحد منهم ...

كاللهم عمي شتامرون انا حاظر ، وفلوس تصليح هساع احطهن بيدكم ،   عدنا حاله وفاه ببغداد والولد مستعجل تالي مالحك علينه ..

حل سالفه بالمراضاه وركبنه طالعين لديالى ، عم سكوت ومالي وجهه حتى اسأل ، شنو الي اريده اسأل عنه ، وين وشلون وليش محد نطاني خبر ، جسمي يرجف ، هاي اول مره تصير بيه ، احس نفسي ممتوازن  ..

وجهي على شارع ودايس بانزين اريد الخك ارجع لديالى ، سالته :- وينهاا 

تنهدت وضل يستغفر ربه يوواش ابني لاتكلبنه يوواشك .

قريب من نوصل حجه عمي سلامه بهدوء،

-رشيد بعد عين عمك ، جوز انا اكثر واحد ادري بجرحك وبوجعك ، بس الغضب والعصبيه مو حل ولا اداوي شي من وجعك ،

هزيت راسي ساكت ، مو داري يعمي ولا راح تدري ، انا كفاي تعلم على صدعات ، وكعت بشباك صياد ماعده لاذمه ولاضمير ...

كمل كلامه بهدوء ، يحاول يهديني :- ترى شما يصير وشنو الي جرى تبقه بنت عمك حسن فكر بعمك حسن الي وكفلك بوكت انا ماوكفت وياك .. لخاطر ابوها وانا عمك ...

تجاهلت كلامه وصبري نفذ ، التفتت عليه زمخت بي :- ليش محد نطاني خبر ، جاهل اناا جدامكم ماتخلولي اعتبار ..

- جدك مارضه احد يحجي  ، عمك حميد داري اول واحد مدري منو كايله بنت حسن يم خوالها جايه تشوف امها ، واجه سولف لجدك ، وجدك منع احد يجيبلك طاري ، لاتنسى احنه نطينه تعهد ماادش منطقه هالمره تنحبس من صدك ...

- عجل وين جانت منو جابها لبغداد

- خوالها يابه كله ساس'من خوالها ،  يدون هيه وين ومحد نطك ، البت مانهبت يابه البنت نهزمت لاخوها ، ياسر باجر يرجع والله يعلم شراح يسوي اذا دره هيه عدنا ، جان ناوي يسحبها يمه بس انحبس وهالتاجلت سالفه ..

- عجل وين جان كل هاي فتره ، ليش ماحجه ليش مانطق ، ليش مانطانه خبر هيه يم خوالها وتريد تروح يمه ..

- شيكول يابه غير جاسم جان كالب دنيا عليها ، لو لازمها غير يشرب من دمها ، عمامك ناوين على جتلها لاتلوخ اديك بدمها يابه ، الي يريد يجلتها خلي هو يسويها .. البنت اذا نكتلت اخوها ياسر ماراح يسكت ، راح يسوها بالقانون ويانه وجوز عشاير هم ،

- مايخوف جلبي ، مايكفيني عمي الا دمها والله ، ماتبرد ناري الا ودمها  بيدي ، لاتكلي حاس بيك محد يحس بالوجع غير صاحبو انا تعايرت ،

و انا الي ناس تشمتت بيه ، انا الي عازم الوادم على مهر وعلى عقد  وتالي اتفاشل وياهم ، انا الي امي ماتت بقهرها عليه .. لاتكلي حااس محد يحس بيه .. 

ضل يستغفرالله ويحاول يهدي بالموضوع ويذكرني بعمي، مارف كلبي الله شاهد ، بس جنت اريد اتلاكفها والزمها ..

طبكت باب بيت جدي ، واشوف سيارات عمامي ولدهم تارسه باب ، بعدنه ماداشين واسمع اصواتهم طالعه ،  واصله ليمنه ،

اول مادشيت تلكتني الحجيه تبجي ، تبوس بوجهي بداعت عمك ياجده لاتمشي بشور عمامك وجدك ، اضل طول عمرك محمل بذنبها  ..

عاط بيها جدي دشي جوه يامره مالج لازم ، جرتها عمتي نشام جر وهيه تحجي وتحلف بيه ، جاسم واكف بعيد يم غرفه الحجيه وامها كاعده بالكاع تتوسل بابنها ، عرفتها هناك ،

جدي كال تعال جاي بالديوان نحجي ، ماسمعت اله رحت للغرفه الحجيه صاح بيه مادرت وجهي عليه ..

هناء ....

بين صاحيه وبين فاقده ، اسمع الاصوات تتعالى بره ، صوت اخوي وعود هذا سندي ، صوت جدي وعمي حميد ، ينتر ويصيح ..  الي'يصيح بجاسم ياول اجتلها انته موو اخوها عارها عليك انته ..

رشيد شنو ، رشيد حاله حال ولد عمها ، سالفه يمك ، روح واغسل عارك ياول ..

صوت نسوان تتباجه ، وجديتي ، ترد عليهم ولك حميد خاف الله بيش طالبها بختك عالي وبكيفك تقرر تجتلها ، بنت اخوك يتيمه يمه لاتشيلون خطيتها ...

ماسوت شي شردت من ظلمكم ، شردت لخوالها بيا حك وبيا شرع  تجتلها هاا ، والله اتبره منكم بالقرعان الي يلوخ اديه بدم هاليتيمه ،  ماكافي مشوهين وجها من الجتل وداعيه جنازه ...

امي ترد عليهم على بختك عمي جاهل وخافت شتسوي ، جاسم ولك اخيتك يمه لا تشيل بذنبها لاتسمع حجيهم ،  تطلع حوبتها ترى بناتك باجر عكبه ، وصيت ابوك هاي مايرضه عليك ترى بكبره ..

الاصوات تعالت بينهم وانخبطتت عليه ، كمت ما اميز بينهم ، عيوني فتحتها شوي ، ماشوف بيها اصلا من كثر ضرب الي اكلته على وجهي ،

بس من جوه الباب اشوف بشر ، غمضت عيني ماهمني بعد شي ، خلي اموت والله اهون علي ، دمروني دمرو كلشي ، اخذو كلشي مني صحتي ، دارستي ، سمعتي ، حتى اخواني سلبوهم مني ،

هسه وصلت بيهم يوزون اخويه عليه حتى هو يشيل ذنب ، احسهم حاقدين علينه وعلى ابوي وعلى خلفته ،

ماعدهم لامحنه ولا رحمه ، هالمره مالي مفر ولا درب اتوجه اله ، هالمره ماعدي اي خيار ، مصيري وحياتي بيدهم ، هو درب واحد وهمه راح يمشوني بي غصب ،

كل شوي واحد يريد يدخل ، ويهد عليه ويضربني وتتلاكفهم امي والحجيه يعيطن ويتوسلن بيهم ، بيبتي خلتني بغرفتها وكعدت كبالها ماترضه احد يدخل ، اسمع حسها من تتتعارك وياهم ...

غمضت عيني ماهمني شي ، اصلا جسمي تبند من كثر الضرب ، كام ميتحرك ولا يستجيب الي  ، كل شوي افقد وارجع لوعيي ، الضربه الي اكلتها من جاسم بصدري ، خلت نفسي شبهه ينكطع ، كوه اجره ويه كل جره نفس جن سجاجين تدخل بكلبي ، قله الاوكسجين خلتني افقد ..

فجأه حسيت على جره من شعري رفعتني على طولي ..

من كثر الضرب الي اكلته منهم ،  ماكدرت ارفع ايدي لو افتح عيوني ، واشوف منو ،

بس هذا عطره هو ، اي والله هوو عطره قويه ، والله ماشايله هم لجاسم بكد ماشلت همه هو ، اسمع صوت نفسه العالي ، وقبضه ايده القويه مجلب بشعري حيل ، وينكت بي ،

وشراح يجرالي من ايده هاي ، شنو ميصيري هسه  .. اديه تعبانه مابيه ادفعه عني لو اقاوم جانت روحي خاويه وجسمي مكسر .

. اسمع صوت امي تصرخ وتحلف بي بداعت امه  يعوفني ويرحمني .. صاح بيهاا شوو محد رحمني بيكم انااا ...

من بنتج جابلتي عار مافكرت بيه وباهلهااا ..

هند مجلبه بي وتبجي وتبوس باديه حتى  يهدني .. وسيف يجر بيها ويصيح عوفيها اختج طمست روسنه خلي يغسل عاره مادام اخوج ماسوها خلي هو يسويهاا ..

سحلني من بينهم وصرخات عماتي واختي وامي ترست اذني ..صراخ امي اذتني كلش ، نفس نبره والصياح بيوم وفاه بابا جنها مفجوعه لو راح تنفجع بيه ..

من الم جسمي ،  ماحسيت بالم شعري الي تكطع بيده ، بس شفت الخصل الي ترست الارض ، شعري الي جان ينحلف بي وبجماله خلو يترس الارض ويصير مداس  .. جن شي ونهلس من راسي ..  امشي واوكع على وجهي ، ويرجع يرفعني من شعري حيل ،

امي سوده عليه جلب بيه حاظنتني ،  وعماتي جرنها عني ، وعمامي يشجعون بي عفيه سبع رجع ماي وجهنه بين ناس اخذ حقك منها ..

طلعني من الغرفه للحولي ، وياه الف ضربه من عمامي،  ومسبه ماردت منهم حنيه لو رحمه ، بس ردت اخوي يسويها ماردتهم همه ،  ادري حتى بكتلتي ماراح يرحموني ..

درت راسي ليوره ادور اخوي ابن امي وابوي من جحيمهم  صرخت بصوت كوه مسموع ، يادوب طلع مني ،  جااسم بداعت بابا انته اكتلني لاتخليهم همه يسوها بغلات بابا ..
.

محد سمعني من كثر الصراخ وعياط الكبار والصغار .. بيبي جلبت برشيد ، تحجي وياه وتكله ترى تشيل ذنبها يارشيد ، ذنبها بركبتك ومحمد ياجده...

سحبوني من بينهم طلعوني بره وياهم  .. دفعو امي وبيبي جوه قفلو باب بيت بقفل ، وخلو نسوان تتصارخ جوه ،  وهمه طلعو يشهدون على غسل عارهم ..

ماما تضرب بالباب وتدعي عليهم ..  اختفت امي من جدامي من سحبني لوره البيت قريب البستان ، شمرني على الارض وكعت على ركبي سندت نفسي بأديه ما تجرأت ارفع راسي من خوف اي خوف ..

قبل من جنت اخاف عبالي هذا شعور الخوف .. لااا حسيت بي بذبج الحظات جان اسوء ،  جان رعب ، الم بالصدر ، خدر بالاطراف ،  حسيت برد بعظامي ،

هذا صدك يومي وهاي نهايتي ، يعني هاي موتي هيج تصير ،  يعني راح اشوف بابا .. اي بابا احن منهم عليه ..

علت شهكتي بالبجي وصرخات  امي الموجوعه ادك براسي .. ابجي على مبجاها ، بجيت من خوفي الموت صعب ، فكره موت بحدها تخوف ،  فكيف ماانته عايش وتموت الف موته بالحظات  .. 

جدي حط شي  بيده وكله يله ابني هذا حقك وهذا عرضك انته تغسله ..

ماشوف منهم بس اقدامهم بيهم بالسبع نفرات جرني من ايدي وسحلني للبستان ....

ماقاومت ادري مقاومتي ماتحرك شعره منه ، جارني بيد والايد ثانيه شفت شايل بيها سجين  ،  بس فكرت السجين حاده لو اعميه ، ليش مايقتلوني بطلقه ليش بسجين  .. مو ارحم طلقه موو ..

لو همه نيتهم يعذبوني اي اكيد السجين عميه .. مشه ومشه ومشه مادري وين ناوي يكتلني .. بس الاعرفه جنت انسحل مو امشي ، رجليه بذاك الوكت غدرن بيه ، من خوف ومن الالم ومن الضرب ، تبندن يعاندن يتحركن ..

وصلتنه لنهايه بستان يم بير قديم ، وغميق ، بي مااي وطين ، وبنصه ماطور ماي ،  باوعت عليه هذا كبري دفعني قريب عليه وكعت على وجهي ..

رفعت راسي وجسمي من تراب هو وراي احس بخطواته ، قريبه عليه ..  جسمي رجف شهكه الي بصدري من خوف رافكتني نفسي الي بده يقل تعبني .. حسيت بي وراي ..

سحبني من شعري من وره بقوه رفع راسي للسماا ..غمضت عيوني حيل ..

اجاني صوته بي نبره قسوه وقهر .. وينه الي نهبتي وياه عنج الحين ...؟!!

وينه خلي يجي يشكفلج يمنه ...

اهزت اجتافي وخليت اديه على وجهي ، ابجي ماكدر احجي ، والله جن نسيت الحجي شلون يصير ، اريد احجي ماكدر ،

رفسني برجله احجيييي وينه عنج هساااع ، خلي يخلصج من موت يله ...

كمت امتمت كوه طلعت مني ، وداعت بابا مانهزمت ويه احد وداعت اهلي ..

حسيت بي كبص بصفي وخرت اديه عن وجهي والتفتت عليه .. هزيت راسي مانهزمت ويه احد والله الله يشهد عليه ..

رفع حاجبه عيونه دم كوه مصبر نفسه عليه:- ياول شايفتني جاهل وعبالج ينضحك علي .. طالعه فجريات وسياره تطبك تشيلج وتكولين مو ويه احد ..

قاطعته ابجي  ويه ميساء ، بنت خالتي سعاد جانت رايحه لاربيل ورحت وياها والله ..

كام لحيله كلامج ماينفع بعد ومايرجع الي صار ، ولا يرجع سمعتي ولا اميمتي الي جتلتيها بفعلتج هاي ، .

دنجت مأيسه منه اشهك بالبجي ، حسيت روحي صدك راح تطلع ، جسمي كزبر من سمعت صوت اقسام مال سلاح ..

غمضت حيل من دوخه الي سطرتني من ثارت الطلقه ، اذني وجسمي كلها فزت وكعت على وجهي مغمى عليه  ، كصتي حسيتها انربدت بالكاع بشي قاسي ...

گمت انـولي ومآصيح وشنفعـه صوتي!
ماشـفت واحـد هـاد من صوب اخوتي

#يتبع

ماهان علي اكتب وماانزله الكم .. بليل هم ينزل بارت انشالله  اذا كملته من وكت 💜