رواية ثأر مهري منهاا الفصل الرابع وثلاثون 34 - بقلم اسماء ديمير

《《 البارت ال31》》

#ثأر_مهري_منها

بقلمي "أسماء ديمير "

نترت بيها :- ول لا احد يعاين علينه دشي جوه ،

دفعته بخفه بايده ادخلها ليجوه ، مبتسمه ومجلبه بركبتي ماترضه تهدني ، ياول بعدي شبلاج جلبتي وخري عاد دادش جوه ..

جرت مسواك مني وابنها وراها اجه يركض عليه  ، مسحت على راسه ، شلون تفتحين باب هيج ، لو طلع غريب شلون ..

ضحكت :-  لا يعمري شفتك من بلكونه  ، شافك امير وكلي ، ليش'مانطيتني خبر جان طبخت الك شي تحبه .. 

ماريد اتعبج ، بس مره الاخرى ممنوع تفتحين باب جفت ، اذا ماتتاكدين منوو افتهمتي ..

تقربت عليه  باستني من ركبتي :-  فهمت والله فهمت ردت باستني من حنجي ، بس لاتعصب حباب ،

درت وجهي على ابنها :- ابنج ياول اثكلي جدامه ..

وخرت تضحك اخذت مسواك ودخلت للمطبخ ، تتمايل بمشيتها ، صاحت لابنها وراها ، اني كعدت بالصاله ماخذ راحتي نازع الساعه والحذاء  ..

الطفل اخذ طوبته وطلع ، صحت وين ياول بهل المغربيه كال للملعب ويه ولد جيران ..

صاحت هيه وبالغرفه خلي يروح اني دزيته يلعب وياهم خطيه ..

طلعت راسها من الغرفه ، ابتسمت خلي يروح عفيه ، روح ماما وسد باب وراك ..

طلع هو يركض ماخذ طوبه وياه ، ولابس ملابس العب ، بس طبك الباب طلعت هيه ، جنها تنتظر طلعته ،

غمضت عيوني بهدوء وانا اشوفها طالعه ، بملابس نوم ، لونهن احمر ، بلعت ريك وعدلت كعدتي اعاين عليها ، سبحان صورها ، مره ثلاثينيه تكتل كتل بانوثتها ..

لو من تمشي جنها غزال مغتر بروحه ، الي يضوجني وبنفس الوقت يريحني ، خبره تعرف شيريد رجال وشنو يهوه من دون ميطلب ، سلسه ومرنه ، تنعجن باليد ، ماتعاند ولا تجادل ، ولا تزعل ..

والي اريده بدون ماطلبه يتلبه ، احسها تكول انخلقت لراحتك ، تقربت عليه كعدت بحظنه ، صعد ثوب لفوك امبين بياض رجليها وربربه جسمها ...

خليت ايدي عليها ، ابتسمت ، عيونها بيهن فرح منين اجن ، احسها مره عاشكه ، شوكت لحكت تعشك ، لو هنه كلهن هيج ، خداعات وغدارات ..

سألتها عيونجن يلمعن سمر ..

همست يم اذني تتمايع :- من هووواك

:- شبسااع يول شايفتني جاهل جدام ..

رفعت نظرها عليها تحجي براءه ، لا حشه يكلبي وابو بيتي انته ،شلون ماتريد افرح من تدخل عليه بطولك وايدك المليانه ..

صفنت بوجهاا  كالت :- جنك مامصدكني بس احجي صدووك والله ، اول مره بحياتي اصادف رجال من صدوك ، رجال عده غيره ، يجفتني ويسترني ، ومايريد مني شي غير بس راحه بال ، واني هم ماريد غير بس رجال يصرف عليه وهم راحه بال  ..

انا بحياتي كلها ماشفت هيج دائما اني انطي وماخذ ، اني اضحى وادوس على نفسي ، محد اهتم بيه اكلت شربت لبست تمرضت تعريت ابد ، من اجيت انته هذني كلهن تغيرت ...

حسيت اكو رجال وراي'، يسأل ويضل باله وعده غيره عليه ويخاف لايصير بيه شي ، فوك كل هذا طلباتي كلها توصل ليمي بدون مااحجي ،شريد بعد ، وبعدك تسال ليش عيونج تلمع بشوفتي ..

ماحجيت صافن بحجيها ، شكد قدمت شكد انطيت محد كال خلفه عليك لو مشكور ، كلها تحسيني هذا واجبي مامسوي شي ، ولا جن تعبان ومنكسر ظهري على احبابي ، شايل هم الكل و مراعي الكل ، بس محد راعاني ..

هاي لو اجيب علاكه فواكه تضحك بوجهي وماتخلي شبر بيه ماتبوسه ، مو تذل روحها لااا حشاها ولا اناا اذل بشر لا خلفه عليه كله رزق من الله ، بس تحس بقيمه البشر ، وماتنكر فضل احد عليها ...

جرتني وياها للغرفه ، تبوس بيها وتشم ، حظنتها حيل وجريتها عليه ..

دخلت للغرفه سمر ، رغم فقيره حال بس مره حوك ،  تعرف رجال شيريد الشقه صح جديده بعدها ممرتبه  ،  الا غرفه نوم ، ابتسمت وانا اباوع لاركان غرفه نوم ،  يوميه تغير بيها شي جنها ملها ليلي بالقرعان ..

الاضويه والمري العطر القوي يغلب عليها .. لو الفراش والبردات لو حمر لو ورديات ستن ..

سكتت وجريتها اليه حيل ، وهيه تضحك وتتهزم ، بروح امك رشيد لا مثل ذاك اليوم ، على كيف قبل لايجي امير

ابتسمت ، بعدها تحجي وجريتها من شعرها عاطت :-  يااااع خرب ..

ساند نفسي على ميز جربايه طلعت جكاره شعلتها .. بعد كل نومه يم سمر يجيني صداع وتانيب ظمير مو طبيعي .. اكرهه نفسي وهذا الكره يخليني اطلع من يمها ،  وماارجع الا بعد ايام من تواسيل والتخضع والبجي مالتها .. مابيها اذيه خانعه ساكته مطيعه وكلامها ابد ماابي اذيه ..هذا خلاني استمر وياه او ارتبط بيها واخليها مرتي  ..

خلت ايدها على صدري شبيك يكلبي ..
التفتت عليه عيوني تعبانه واريد اشكي لبشر وخجلان ياعيرني بعدين ..

سكتت وخليتها جمره تجوي بالكلب ..

كالت مالكيتها لهناء بعدك .

التفتت عليها بسرعه  متفاجئ وجهي انكلب فزيت ودفعتها عني ، تقربت وجريتها من شعرها حيل شنووو شكلتي ..

- اااخ اخ والله والله ماقصد شبيك ..

خضيت راسها حيل وشعرها نصه بيدي .. شكلتي منين جبتي هالحجايه احجيييي  ..

شبيك رشيد الله عليك اذيتني ..بده البجي مالتها كرهتني شوفتها ..

- بنت نعال انتي منو تسالين ، هاا منين جبتي هالحجي شنو ادورين وراي ...

- لا لاا والله لاا

دفعتها حيل وكعت على ضهرها ، طالع اغلب مناطق جسمها خجلت لفت نفسها بالغطا تباوعلي مدمعه ..

نكتت نفسي معص سبيتها دورين وراي بنت الكلب ، ولج بكد القندره شنو ولج تلوين ذراعي ، رفعت راسي عليها واصله لاهلي ولج واصله لبيوتهم

لا لا والله ابد بس سمعت ..

مو كتلج اريدج طرشه خرسه يالنذله ، شجاب هالموضوع يمج ، بسيطه انتن ماتنطن وجهه يفيد وياجن بس الاهانه اصبريلي ..

لبست بنطروني واني اسب بيها وباهلي صوت بجيها زرف راسي .. كمت اطلع  جلبت بيه تركض عليك الله عليك العباس احلفك بكل عزيز لاتروح ،  والعباس ماقصد ازعلك ماصدكت اجيت ، لاتضوج مني ، والله مو قصدي ازعلك ،

بس ردت منك تحجي حتى ترتاح ، ضربت على حلكها هااا ياكلمه ردي لمكانج ،  عساني ماحجيت والله بعد ماانطق بحرف توبه ..

دفعت ايديها حيل انضرب ظهرها بالحايط ،  صاحت اخخخ..

- وخري لانعل ابوج لابو .. لابو الي يجي يمجن انتن نسوان خ..... وحده انكس من ثانيه ..

جريت محفظتي وسويج وطلعت ،  راكع باب وراي بكل قوه جمر يمشي بعروكي بنت كلب هم تسال شوصللها الحجي منين جابته ،

هاي هم كارت مالتها احترك عدي ، وحدتهن ماطول شهر وتزومل وتكوم تعنفص ، عبالها كل الزلم تنجر رجليها مايدرن ادوس عليهن بالقندره واشوف غير رقم ..

شخطت سياره وطلعت ، وين اروح منج مو كااافي عاد .. عارج طين عيشتي وسمعتي ..

تمنيت وصله كااع واهج بمكان مابي لا فلان ولا علان .. لا شحجه عمي ولا شكال جدي .. ردت اهج من النفاق من قال والقيل .. السالفه اذا انحطت بحلوك زلم اطش كبل النسوان ..

عود كلت وصيت سالفه ماتطلع ، اااخ ياقهرج الي عرفني ناسي ، واعدائي ، خلاني اميز بين البشر ..

نطتني درس علمتني مانطي ضهري لااحد ،  وان جان عمي اولد عمي لو رفيجي .. ابد بعد مااندار لو استند على بشر بنو ادم مالهم امان لو صويحب .. بني ادم غدار ..

تعلمت بعد مااتحشم احد يوم عازتي ..محد فادني يوم عازتي حتى جفن اجنازتي ،  شريته وخليته بيتي حتى بموتي ماريد احد او  اعتاز احد ...

هجيت بالبر قريب النهران ، اريد اهوه اتنفسه ، هوه مابي نفس النفاق ، اسمع بس صوت الواويه والحيوانات بريه ، شغلت ضوه سياره ، غمضت عيوني ناوي انام بالسياره ، بس غيرت راي شبلاني تخبلت انام هناا ، والوكت موامان ..

فريت سياره ورجعت للبيت ، صح تعبان بس مالي بالنوم نصيبب'، حتى نوم مجافيني ومايريدني ، ادحك على بيت اضلم هندس ، مشيت على كيف متوجهه لغرفه امي ، محتاجها حيل ..

مددت بغرفه على فراش امي على ريحتها ، مشاق اشكيلها حالي محتاج دعوتها الي ..

لو لزمه ايدها وقراتها للقران على راسي ، غمضت عيوني استجدي راحه بال من الله ..

اجت بخيالي ، مدري بحلمي ، نفسها ماتغيرت ، شعر المنثور ، والي اطرافه تحظن خدها ، وكل شوي زايحته من وجهاا ، لو اديها واصابعها الناعمه ، نظرتها الهادئه الزعلانه ..

مافاركت حلمي ابد بس دومها مطيتني ظهرها .. بس هالمره مدت ايدها الي ، مديت ايدي اجرها لحظني  اختفت .. فجأه طلعتلي امي لزمت ايدي تبتسم هاا يمه ؟؟

حاجيتها تعبان متعبتني دنياا :-'تأذيت يمه ..

باست جف ايدي :- صبر يمه صبر .. اجاك الفرج بس صبر ..

كعدت على حيلي التفتت منا مناا ، استغفرت ربي رجعت راسي للفراش مأيس من راحه ، ماراح تلكاها للراحه يرشيد لا بليل ولا نهار اذا مالزمتها لزم يد ..

غمضت عيوني حيل ، ثاني يوم ، جنت ناوي نيه سوده على سمر ، بس تأجلت ..

ردت ادز على ابو شركه يشد الاجهزه والكامرات ، بس تعذر مااكدر ، وكال :-  انتظرني فد اسبوعين لان عندي بضاعه من شمال واريد اجيبها ومااكدر امر عليك ، كتله عجل انتظرك لاتبطي علي يرحم موتاك  ..

الدخل جاي ينسحب منه هم ، وينوخذ وانا اعرف حلالي ، اذا  طارت كشايه لازم اعرف  وين ولت ، ولمنو وشوكت وشكد ..

بس هالمره سالفه جايده الدخل جاي ينهبد منه هبدات جبيره  وجاي تكرر بدون خوف ..

صح مو بوعي وبدل كسره عندي كسرتين ،  بس بعدني صاحي وماتخبلت ،  واعرف احسب حلالي والي اليه والي عليه ..

عفت سالفه وكلت روشيد هون سالفه وخلها تبرد مو وكتها ، الزم دليل وحاسب الي وراها ...

فوكاها انا لازم من جيبي اجمل الدخل ،  واسد حك العمال والبضاعه والخساير تتضاعف عليه اضعاف ..

بس تعال تحجي لمنو تتهم منو تعاتب منو ، كلهم ولد عمي وكرابتي ابوك منو وانا ماعندي دليل .. ضليت مثل بلاع الموس ..

بس ماكدرت احجي شما اصير ابقى وحيد ماعندي اخوه احجيلهم واسند ظهري عليهم  مايحجون ومايطلعون سالفه  ..

كلهم كرايب ، يعني ان همست لواحد ، يروح يطشها لاخوانه واهله وكرابته ، ويكول رشيد بوكني لو اتهمني باطل . بدل ماصير ابو الحك اصير المحكوك ..

مالكيت غير صديقي سجاد ، احاجي ، واشوره الحال .. 

:- خاف غلطان رشيد شمعنه هسه حسيت ، مو معقوله هسه يله مدو اديهم خاف غلطان..

:- مادري هذا الي صادمني ،  محد ماد ايده على حلالي قبل .. وانا متوكد فلس مرايح مني الا وانه اعرف وين مجانه .. بس هسه وانا اخوك لامليون ولامليونين هسه ٦ ملايين ايدي والكاع ..

:- خاف مضيعهم لو مداينهم لو رايحات بمجان ماتذكره ..

التفتت عليه وسكتت شاحجي شكول .. شنو قابل ابن يوم ويروح هيج مبلغ من ايدي بلا ماادري ..

:- دورهن يابه وين يرحن تاليتك تلكاهن بمكان وانت ناسي ..

فدوه هنه وتراب ،  بس خايف تتكرر سالفه والا هيه تكررت ، بس جاي تكبر وانا اخوك ،  هنا مراح اسكت .. وان عرفت احد بايكي معناه مو اول مره يمد ايده على حلالي ،  وانا غافل ...

بس الله هسه طيحه ببدي ، وخلاني اوكع علي  ، خايف لايطلع كرابتي وياقهري والله ان طلع كرايب مو غريب الي يبوكني ..

:- كول الله رشيد انت ذيب امعط ،  منو يجرء يمد ايده على حلالك ،  والله هسه تشوف انته غلطان ، ومضيعهم بمجان بيتك . خيي جاا شنهو هينه مد الايد على دخل ابو فهد ،  جاا هو مايعرف انته موغشيم ماتفوتك فايتك ويهبد منك هالكد ..

وصافن بالارض .. وانا اعرف نفسي مغلطان .. واعرف الي حوالي شنو .. وكعتي ياصويحبي وكعتي خلت ناس تكول عني اغبر وينضحك علي بساع عبالهم كلمن ضاع مني ما ادوره  ، عبالهم كلمن ضاع مني مالكاه ،  بس الله كريم ..

سكتنه ثنينه والكلام خلص او مامنه فايده

الفلوس ان لكيتها وان لا تهون بس ذيج الضاعت مني وين الكاها وان لكيتها ماي وجهي شيرده ..

وره كم يوم دك عليه ابو الاجهزه ،  كال دزيتلك السياره مال غراض والعمال ، صحت بالولد يعزلون ويطلعون للبيوتهم واني راح اضل هنا .

ساعه وطبكت سياره ، نزلو الغراض وبلشو يشدون بيهن ، بالمكتب خليت ثنين والباقي وزعتهن بالمعمل ، كعدت بره المعمل على كرسي والعمال جوه يشتغلون ..

كل شوي التفت عليهم اشوف وين وصلو ، شغلت جكاره صافن ، ياربي كمت اخاف من خيالي ، خلتني مأمن لا بصاحب ولا بولد عم ولا حتى بجف ايدي الاخر ..

خلتني افز واكره كل الناس ، شوداني عليج ، شوكع عيوني وكلبي عليج ، غمضت عيوني كاره نفسي وضعي الي وصلت اله ، بيا حظن هسه هيه ، الشعر على يازند منثور ، الضحكه الوجهه الجسم منو يلزمه هسه ..

التفتت للعمال ، كملو بدوه يسفطون الغراض بالسياره ، نطيتهم اتعابهم وعلموني شلون اشد كامرات على موبايلي .

راحو ، واني دخلت اشيك شغلهم ، خلصت وقفلت المعمل وطلعت للبيت ،

وراها بايام اني انطر بهل نجر يمد ايده ، دالكطه ، طول هالمره جنه تاب لله  ، على ايد الكامرات ، خفت لاحس اكو شي لو مراقب الوضع ..

بس وين وره ايام ، ويله لكفته جنت شاك ، بس  ظميري مانطاني اظلم احد ، الا وعدي دليل ،  ما عدي نيه افضحه ، العيبه توكع عليه انا  مو عليه هو .. يبقه من لحمي ودمي ويااسواد الوجهه يم ربعي وصحبتي من يعرف ابن دمي هو بايكني وهابد هالهبدات مني ..

انوب ابن الكلب يهبد بالملايين ، مال عمك مايهمك ، ماخاف اشك لو افطن اكو فلوس جاي اطير ، جان يظن مطي لو مااعرف احسب حلالي مثلا ، صح ممخلص دراسه بس مو معناه جاهل ومتخلف ، عجل هالحلال منين اجه ان جنت ماعرف بالحساب .. 

ضليت ساكت مو خوفا بس خجل من ناس ، رحت وبعدته عن معمل ونقلته للشورجه يم سجاد وكتله مسختج

ي وماريد يمي ولا اريد ابطله ،

سمر من ذاك اليوم مامريت عليها ، ادك عليه مارد ، مصروفها ومسواكها يوصلها للشقه ، كاره جنس حواء تريدلك وحده تمشي عدل ماكوو ..

لحد ما دخلت فد يوم مره للمعمل ، من لبسها عرفتها سمر ، لابسه الجبه سوده ام لمعه الضيكه خرب بعشيرتي يابنت سكط ...

تحجي ويه العامل اني ادحك عليها من بعيد ، اجت تتمشي عليه ، اليوم ابتلي بيها كوه لزمت نفسي مادوس بنصها جدام الوادم ،

خليت اديه وره ظهري اصبر نفسي ، وكفت كبالي كالت شلون هنت عليك وماتمر عليه هالكد ..

واكف جدامها مااحجي ، بس وجهيي مزنبر ، اريد املخهاا ..

- بنت الكلب شجابج هناا ، شنو تلوين ذراعي ..

حجت وهيه تتوسل : -  والله نيتي هيه اجي اصالحك ، ماعدي غير نيه ، بداعت امك لاضوج ولاتزعل ، كلت للعامل اريد اشغل ابني ، وجايه اتوسل بستاذكم يشغله يمه ،  وهسه راح اروح ، بعد متشوفني هنا ولا اوصل ، بس بداعت غواليك تعاي والله بعد ماتسمع حسي توبه ..

نترت بيها : - ولي من وجهي يله .

باوعتلي مدمعه :- تجي موو ، والله حتى امير اشتاقلك ، تعاي وبعد مااحجي توبه عمه بعيني اذا ضوجتك مره الاخ
.

- انكلعي هسه ولي يله ..

مشت من يمي كاطعه الامل ، اندارت عليه مدمعه درت وجهي عنها ، جزت نفسي منها ،

صفنت على وضعي جزت نفسك منها ، يارشيد ليش ، ليش كاره نسوان من بعدها ..

سلوى الجاهل ، الي حتى حسها لحد هسه ماسامعه زين ،  كارها ، وهاي الي حتى رجلي تبوسها كارها ، علييش ..

عجل شنو الي تريده ، شوكت تنترس عينك ، شلون راح تكمل بقيه حياتك ،

اخذت سيارتي وهمت بديره مابيها محنه علي ، عندي خير من الله عندي ناس تريد خاطري بس ماحس باحد كلبه علي ، لو يفكدني من اغيب ..

وكفت سياره كبال بستان ، نزلت اتمشى لبيتنه قديم ، فتحت القفل ودخلت ، كله تراب الارض والاثاث صارله سنين متروك ، من تركناه الخير والبركه هم تركتنه ..

اجه بالي افرغه واسوي معمل ثالث ، بس كلبي ماينطيني ، جريت كرسي طلعته بره وكعدت عليه ، صافن اشرب جكاير

ها..كظت
ها..لا بعدها
ها..كظينه
ها..بعد بينه نفس
ها..لكينه عيونه
ها..مالكينه
ها..نسينه الشوف
ها..بان الخرس
ياهم أحنه ..امنين اجينه
اليانهايه احنه ابتدينه
اتضيع بين شفافنه حروف السؤال
وتهنه وسط ابيوت اهلنه
ولاتصح جلمة تعال

اعاين للبستان العشب كبران وصاير لخه ناس فوك ناس ، صار اشهر هامله ماعدي وقت ، يراد اجي فد يوم بكرك واشيل الوصخ والحشيش الزايد ، كمت افتر اشوف الاشجار خاف متمرضه ، لو بيها دوده تاكل لب الاشجار ،

لاحظت اكو حوافر ودوسات حيوان ، من تمشيت بعد  غاد عرفت اكو خنزير هنا ماردلي المحصول  ، خرب بلشته اي والله ، هسه وكتك ..

ضليت انمشى واتفكد البستان ، اذا صارلك شي يارشيد ، هذا الي تعبت بي كله وين يروح ، حلالك ومالك المن ، وانته حتى ضنى ماعدك ، معقوله عمامك ينطون حلالك لاخواتك مااظن ، نفس مااكلو حق عمك حسن بالورث ياكلون حق اخواتك بمالك وحلالك ، ...

هنا من صدك تطلع خسران ، تفني حياتك تلمهن تالي بخت عمامك ولدهم  ، كلت بس ارجع احاجي عمي سلامه على بنته سلوى ، اخذها بعد سنه امي ، زين وسمر ، اني اتفقت ويا عمي سلامه من اريد اتمم على سلوى اطلكها لسمر ، اذا حاجيته على سلوى ، كبل يسالني ويكلي وسمر ، مراح يرضى على بنته اكيد ...

خرب هيه سلوى هم مره يالله ، هاي شلون راح ادبر العيشه والمسؤليه ، افتر راسي نوب ..

رجعت للبيت ، توني ادخل اسمع صوت فهد يعيط ، لكيته متكامش ويه علا ، تحاول تلزمه هو نزل هبد بيها ، كوه توخر بي وتصد عنه ..

عطت بي خلس مدمع يريد يبجي ، رفعت اصبعي بوجهه :- بالقرعان اذا لزمتك مره الاخرى تضرب عمتك الا اكسر ظهرك ولك حيوان شلون تلازم عمتك هااا  .

علا كالت يبجي على نغم ، مريضه وراحت للدكتوره وماتكدر تاخذه وياها ، خلته يمي هو عباله راحت لبيتها ...

خزرت هو بعده على سكوته ، كفخته على راسه وعفته ، اريد اصعد للغرفه سمعت شهكه صوته بالبجي غمضت عيوني ضايج ...

ادري قاسي عليه ، بس هو مدلل حيل ، كلنه مدللي ونريد خاطره ، والي يريده يصير ، وصارله سنه يم نغم عفته كلت خطيه بس بده يكبر ويتمرد علينه نوب يضرب عمته ..

رجعت عليه كتله تروح وياي للصيد اكو كم خنزير بالبستان تعال نصيدهم خربولي المحصول ..

ناخذ كسريات وسياره وندك على سجاد هم يجي ويانه شتكول ..

مافتهمت عليه ضل صافن بوجهي ، علا اشرتله بيدها ، ضحك يهز براسه كالته دتعال ابدل الك وروح وياه عمو .. مشه وياها يضحك ..

صعدت بدلت ملابسي بنطرون عسكري وفالينه ، وياهن بسطال ، شلت كسريه ودكيت على سجاد كتله تعال للبستان عدنا صيد

، اخذت تورجات كبار لان مقبلين على ليل وظلمه ، هذا احسن وقت للصيد لان وكت اليل يطلعن ..

ترست سياره غراض نحتاجهن وسفايف وطلق كسريات  وكرك حتى نحفر ندفن  الي نكتله ،

اجه يركض لابس تراكه وبيده كرك صغير ، اشرتله يصعد بالصدر ،

اخذته وطلعت لبيت الحجي كلت امر اسلم واطلع بوجهي للبستان ، دخلت كبل لبيت عمي ماعدهم بنات كلهن ماخذات ، شفت حجيه بالحديقه تشرب جاي من شافتني ابتسمت وفتحت اديها ،،.

هلا بريحه الغوالي هلا برويشد يمه ..

دنجت بست راسها هلا بيج حجيه .. شلونج عساج طيبه ...

من الله الحمدلله ، صاير تبطي جده ليش هيج شغيرك ..

ماتغير شي حجيه بس مشاغل .. وهسه اريد اطلع للبستان عندي بي'شغل ، الحيوانات تالفات الي زرع .. دشوف الهن صرفه ..

خير انشالله توها تكمل و التفتنه ثنينه فازين  على ركعه باب الحوش ،  وصوت صياح وبجي مره ، التفتت شفت هند اخت جاسم ، شامره العبا شمر عليها وشعرها طالع وحالتها حاله ..

استغربت منظرها اجت تركض من شافتني وكفت متصنمه ، خايفه تتقدم علينه ، الحجيه وكفت لحيلها ، شبلاج يمه شبيج شصاير ..

ماحجت بس ضلت تدهك وتبجي نوب رقيه بت عمي وراه اجت تركض وتجر بيها ، وتكللها والله سيف اذا سمع طالعه حجايه منج يطلكج ...

ركضت على جديتي تتوسل بيها ومدري شتحجي ، كلشي مافتهمت من بجيها وصوتها عالي ورقيه ماتخليها تحجي وتجر بيها وتسد بحلكها ..

عبالي ضاربها سيف لو ماذيها .. بس لجمني كلبي من ذكرت اسمهاا .

صحت شبيج ياابه شكوو ..

تشهك وتبجي وتحجي ، وتكول امي وهناء كلشي مافهمت ،  دفعت رقيه عنها الي تسد بحلكها اريد افتهم ، الحجيه عاطت برقيه ولج شكوو وخري عنها دنفتهم  ..

حجت هند كوه فدوه بيبي  ابوس ايدج ، نزلت تبوس بيدها ، الحكي على هناء ، جاسم لكاها هو وعمامي ورايحين الها .. ناوين يكتلوها ..  .

صحت بيها .. شنوو ؟!

رقيه كالت :- اي باربيل يكولون جانت وهسه راجعه لبغداد مدري منو جايبها ..

#يتبع

الي تكول بارت قصير اهبدها  بالكرك على راسها 🙂
جماعه هنوو اجتكم هنوو

تفاعلكم يهمني💜