٤٩"
ثـارهم وبنت الـفقير
أنه شناسي ؟
أحط راسي وأريد أغفىٰ ..
وألف شغلة تجي براسي ،
أضّل أتلمس بگلبي
أضل أحسب ..
عددهن كامل جروحي
كلشي أتذكرت
ما ناسي بس روحي !
_ولادتها صعبه جانت ،صاير عدها نزيف
ومجاي نكدر نسيطر عليه
كالت هيج وكان صاعقه ونزلت علينه عمتي وكعت على طولها
ماكدرت حتى أعينها النسوان شالنها
كعدنا ننتظر والمبايل انرج رج من المكالمات
رفعته جان ضرار يتصل جاوبته واجاني صوته عصبي
ضرار... شصااار وين رحتي جنوب شلونها
ميس... م مابيها شي
ضرار... بنتي وانه مربيها كلبي مامرتاح لوضعها هسه ااااحجي
ميس... شهكت بدموعي مكدرت احبس غصتي،صاير عدها نزيف ومجاي يسيطرون عليه لحد هسه مانعرف شحالها
سداه مني وشوي ماشوف غير ضرار وانمار جايين الأمن يمنع بيهم وهمه عياطهم وصوتهم دوى المستشفى شفت الدكتوره طلعت ركضت عليها وعفتهم يتعايطون
ميس... فدوه شصاار وجنوب شلونها
_الحمد الله على سلامتها كدرنا نوقف النزيف خسرت هواي دم بس انشالله تصير بخير وهالكم ساعه حنعوفها تحت المراقبه
ميس... الله يخلييج يعني هسه مابيها شي
_يامي بخير البنت والطفل بأحسن صحه هم
ميس... شكراً
رحت لانمار وضرار باقي شعرايه ويصيرون مكاتل وي الامن سحبتهم بلكوا
ميس... جنننوووب بخيير يمعودين
ضرار... وخررري اشوفن ياااهو اليمنعي ولد ال
ميس... راد يكمل وسديت حلكه قبل لاننفضح
،والله ببخير شببيكم اهدو
طلعونا برا وهمه ينافخون من العصبيه عاينت من بعيد اجو الولد صفت سيارتين
بسول وعزام وياهم رضوان وحيدري ودرغام
اجو ووجوهم صفر ويلهثون
بسول... هااا شصار بالبت
ميس... ولدت بخير وسلامه
عزام... جا وينها غير تطلع
رضوان... شتطلع يمعود وهيه ستوها ولدت
حيدري... جا شفرخت ؟
ميس... هههههه ولد
درغام... هسه معلينه المهم صحتها شلونها
ضرار... اخذها وياي واشوفنها شلون ترد
انمار... شسوووي ماخذها
يسول... احسن شلها بهالتعب ماتتحمل الالم وهالعار يخلف براسها
انمار... يااااعالم مرررتي هااي والله سالفه
عزام... واحنه اخوتها ومربينها لاتزامط
رضوان... يمعودين اصواتكم العالم تعاين علينه
حيدري... امشونا خل نفوت
ميس... ويين رايحين ميقبلون قسم خاص لولاده النساء انتو وين داخلين
درغام... رايحين لاختنا شني وين داخلين هيه بكيفهم
ميس... ضرار احجي وياهم
ضرار... شكو اجيتتو ؟
حيدري... خوما نعوفها بحدها لازم احنه يمها
ضرار... رجعو منين ماجيتو
درغام... لايكون المستشفى تسجلت باسمك وتمنعنا
ضرار... وبعديييين
ميس... من يعوفوها بغرفه خاصه تكدرون تشوفوها هسه مايصير
حيدري... اي نتاني ماعدنا شي
عفتهم يتحاجون ورحت نقلوها على غرفه خاصه والطفل بالخدج حتى يتأكدون من وضعه وصحته خلال 24 ساعه كعدت وحالتها كلش زينه هيه والطفل
أبد ماعفناها والولد ولاتزحزحو من مكانهم
دخلت الها جانت متمدده يمها امي وعمتي
ميس... حمد لله على السلامه
جنوب... اوف الله يسلمج ابني وينه ليش لحد هسه ماجابو
ميس... ماعرف والله انمار راح يشوفه
وماشوف غير انمار جاي بيده الطفل واتتبعو الولد شايلين نفاخ ازرق وكل واحد بيده علبه مال هديه والورد ترسو الغرفه بيه
راحو سلمو عليها ومحاوطينها
ضرار... حمد لله على السلامه بويه
جنوب... بعد روحي الله يخليكم
حيدري... جيب الفرخ خل نشوفه
انمار... هسه انتو نطيتونه مجال اشو مسوين اقتحام عليه
درغام... جيب الفرخ
انمار... الله واااكبر وخرو من مرتي متجمعين فوك راسها
عاف الطفل بيدها وهيه تبوس وتحظن بيه
حيدري... طالع على امه حلو
بسول... شوفه شلون ناعم مثل امه
عزام... اي ونفس سمارها
درغام... مثل نعومتها
انمار... اي وانه هناه الطرطور مو ؟
ضرار... ههههههاي انت الاب الكريم
جنوب... خل نسمي خوما يضل بدون اسم
حجى بعصبيه وبصوت
انمار... ابني ياااناااس راح احرك روحي حتى اسمه همه يحددو
جنوب... حبيبي شبيك خلونا نتفق على اسم
انمار... شنسمي؟
جنوب... مثل مجنا متفقين اذا ولد نسمي فقار
انمار... هذا هوه يبا ام فقار
جنوب... أبو فقار
ضرار... يتربى بعزكم
جنوب... لييش هالكد ناعم وصغير يربي وانه جنت اكل هواي
بدور... يمه بعده بدايته هستوه اجى للدنيا خوما تردي يطلع جنه ثور
جنوب... هههههههههه
شالو الطفل ويناغوله يمكن همه فرحانين بيه اكثر من أمه وابوه
انمار... وانت عمه تعال شيله
رضوان... ومره عمه
جنوب... كااافي فكو الزعل
حيدري... ميييس لا تدلعيين لاجرج واشمرج عليه
ضرار... شتجر ولك ؟؟؟؟
حيدري... خووويه شبيك خلونه نصير ناس خيره ونجمعهم
ميس... مابينا شي والاحسن كلمن يروح بحاله
أجى تقدم عليه حظني وباسني
رضوان... مااعوفج بويه احبج وماكدر بدونج
عزام... شو ماخذك الواهس واخوتها جدامك
رضوان... تعبت بدونها ضرار انت تعرف لوعه الكلب ترضاها هيج كلبي يتلوع
فرك وجها وحجى بعصبيه
ضرار... اعرفنك س*** و*** ماتستاهلها
رضوان... استاهلها وروح ابوك بس اطيني فرصه
اجى ضرار سحبني وحظني من كتفي
ضرار... ماجبرها على شي والتريده يجرالها
حيدري... حبهاا ولك حبها ولاتخاف من اخوتها
صارو يصيحون بصوت ناصي حتى عزام وبسول صفو وياهم جرني من ضرار وحظني
رضوان... ولج وعللي ااحبج وراايدج وروحي تتلوع بدونج
ميس... بعدني مراضيه
رضوان... اعرف شلون اراضيج
ضرار... وخر منها لاتلطش
رضوان... لاتخرب هالحظه يمعود
ميس... ههههههه
جنوب... واااخيرا يمه فدوه شلون جيه على ابني فاله حلو وانشالله يجي دور ضرار
ضرار... انه مطوله سالفتي يمعود
رضوان... اذا الله رايدها تصير الك خليها عليه
ضرار... والله يابوي بيج وماتكثرين دعاء
اتصلت على سيرين كامرا شوي وجاوبتني عفت الكامره على جهه حتى تبين وهمه مكيفين يسولفون ويضحكون وياها
حيدري... خويه ايلي تسلم عليج
تكول وينها اختي
سيرين... ههههههه سلملي عليها وكلها خل توفرلي زيت للشعر
فك حلكه وعاين لضرار
حيدري... وحك علي لوكتيله يكتلها ويجيبلج زيتها اكصكصهن لعطوبج
ضرار... شسوي كلت ؟
حيدري... خويه شبيك نشاقه
كامت راحت يم عمي جابر ووجه الكام عليه جان كاعد يقرا قران ويسبح سلم على جنوب والولد اخذو يسولفون وياه
_لثالث يوم خرجوها من المستشفى راحت لبيتها وانه رجعت لبيت اهلي
هواي لح عليه ارد بس لحد هسه متردده انطي فرصه ،اتصالاته ابد مسكتت وكلما يحجي وياي اكله بعدين
_نزلت جوا وانه كفشتي شكبرها ودشداشه كصيفه حالتي حاله ومخليه ماسك لوجهي
ميس... يمهههه وينكم ،جوعاااانه حتى مامتغديه
رحت للصاله محد مشيت للاستقبال ويافشلتي
كلهم كاعدين أهل رضوان وجده
واخواني كلهم امي وعمتي ،اشوف غيث وليث كاعدين بصف رضوان سادين حلوكهم واكتافهم تهتز
رضوان فاتح عينه على وسعهن مصدوم من منظري من فشلتي ضليت متصنمه بمكاني
بديعه... تلكين الاكل عالطباخ
غيث... هههههههههههه
ضرار... اششش امشي بويه اكلي
طبكت الباب بقوه ورحت للمطبخ اغم بنفسي واكتم بصوت شهكتي ردت حتى اركع راسي بالحايط صبيت اكل وكعدت بالكاع اكل وابجي وانه كلما اتذكر الموقف دموعي تزيد هاي هم حاله
ميس... خرب حظي يايمه يافشلتاه
رضوان... شبعتي لوبعدج
ميس... انداريت واشوفه مكتف أيده واكف وكاتم ضحكته اجى تقدم عليه كعد بمستواي اخذ الخاشوكه وياكل
واني دموعي ماتوقفت والاكل بحلكي
رضوان... يله بويه كملي حتى نروح
ميس... ماروح بطلت
رضوان... بعدين نتحاسب واذا ماكمتي هسه اخذج بهذا حالج
ميس... رضوااان
رضوان... ههههههه ولايهمج تصير بارقى العوائل بس مشطي شعرج
ميس... وبعدييين
رضوان... نشف هذا البوجهج كافي غسلي مصخمه شمالج
ميس... طكيتها بجيه هوه حظني ويهدي بيها وبلكوا كاتم ضحكته
رضوان... بعد روحي ولجج كافي ليش البجي
ميس... بهذا حالي كلها شافتني
رضوان... والله تخبلين ولايهمج يكبرون وينسون هههههههه
ميس... عوووفني
رضوان... اهلي هسه راح يرحون اتانيجج علما تخلصين حتى اخذج ونروح
ميس... ماااروح
رضوان... ميس بله عناد ترى صبرت هواي صالج شهور وانتي هناه وتااليها ها
ميس... مامستعده اردلك لحد هسه انه مغثوثه ومجروحه منك
رضوان... ولايهمج عود انه اضمدلج جروحج
ميس... صدك
رضوان... بويه احبنج
ميس... صدك
رضوان... وداعتج
ميس... شو ممصدكتك
جر نفس بخيبه وألم
رضوان... براحتج يله خلصي بسرعه
ميس... عافني وراح كمت شلت الاكل وطكيتها ركضه لغرفتي اخذت مبايلي واتصلت على سيرين بسرعه جاوبتني وتقنع بيه حتى ارد
سيرين... لشوكت يصبر يمعوده
ميس... جا اخوي موصبر عليج
سيرين... الله انطا صبر يعقوب رضوان بس تطك فيوزاته ياخذج غصب وصير موزينه
ميس... والله شني ياخذني غصب اخواني موجودين
سيرين... ههههههه لخاطرهم صابر عليج لاتخلي ينتظرج هواي ورديله وعود عاقبي وشلعي كلبه عالسواه وانتي قريبه منه
ميس... اي اي يلهه رايحه
سيرين... الله وياج
ميس... سديته منها رحت لميت اغراضي ورتبتهن دخلت اسبح جلفت نفسي جلف خلصت ونزلت اغراضي جوا اخوي ورضوان كاعدين بالصاله جانو كام ضرار اجى عليه حظني من كتفي وباسني
ضرار... بويه اذا مارايده ترحين ماجبرج على شي
كام رضوان سحبني وخزره
رضوان... شهل طائفيه كعدت هواي يمك لاتلزك
ضرار... ههههاي لوضلت كاعده كل عمرها يمي خلها بويه تدلل عليه
رضوان... يمعود صلح الخراب وعمره وخر بالله انه ومرتي تريد نتناقش
ميس... اوف وجن غيرت رأيي
ماحس غير لازمني من زندي وساحبني طلع بسول ورانه وجرني منه
بسول... شمااالك شخطت يمعود
رضوان... وخررر خويه هاي ناويه تجلطني
طلع ضرار وجها احمر من الضحك ويكح
ضرار... اخذ اغراضها بالاول
رضوان... مايحتاج هناك عدها هواي
ميس... اوي وخرر اغراضي خل اجيبهن
وخرت منه اخذت الجنط وبسول ساعدني
لزمني من ايدي ومشينا ابد ماعاف أيدي مشغل اغنيه ويدندن وياها وصلنا جان هارون وازان موجودين يمنا
طلعت شذر وجنوب يهلهلن
شذر... خايبه وأخيراً نفكت الچبسه
ميس... هههههه وليش الهلاهل
جنوب... جا غير عرسان وراديلنا
هارون... خايبه يالبطه هاي عود المثلج لازم تكعد وترتاح شو جنج حصان
جنوب... مليت من الكعده خو بليل ولاينام مشغلنه حراسه
بشائر... هوه الطفل باول وكعته هيجي علما يكبر شوي شوي تتعدل نومته
جنوب... كعدت حتى ارتاح واسمع صوت بجي,ستوني عفته وهاااكم خايبين هيه هاي التزوج يطيح حظها
ميس... راحت دردم وتحجي صعد رضوان الجنط وصعدت وراه دخلت للغرفه انصدمت من مغيرها كلها ومخليه صور عرسنه عالحيطان والديكور والاخشاب كلهن مغيرات
رضوان... عجبتج
ميس... تخبببل بس ليش غيرتها
رضوان... جا انه ادري
ميس... هههههههه شنو
رضوان... سيرين اقترحت اغير الغرفه بدايه حلوه النه وهم غيرنا جوها جانت مصخمه هسه مضويه
ميس... عاشت ايدك
شفته سد الباب اجى عليه اجى سحبني وخر العبايه وباسني ابد ماتزحزح ولاتحرك مثل واحد عطشن التهم شفتي وخر مني خلا جبينه على جبيني ويتنفس بقوه
رضوان... وين جنتي عني ؟
ميس... ش شنو
رضوان... بويه احبنج
ميس... احبك
ضرار...
طلعت بالسياره ومشغل صوتها وبصماتها من تحجي وصلت للشط نزلت
وانه رويحتي متلعله لفراكها اخذت مبايلي واتصلت عليها جاوبتني
وصوتها اليذوبني ويخدرني حـد الثمالـه
سيرين... ها يالمسربت كليبي
ضرار... يابعد كلهن شحالج بويه
سيرين... هانت ماضل شي
ضرار... شتهون وانه روحي طكت من وراج
سيرين... اصبر
ضرار... اي اي اصبر شعدي جا الله اطاني صبر يعقوب شلون ماصبر
سيرين... يمه يالشويب
ضرار... بـعد روحـه
سيرين... ممم جاي سوي هسه ووين انت
ضرار... عاينت بالمحفظه البيدي وبيها صورتها
،مصبر روحي بصوره الج وصوتج المسربتني
سيرين... ضرار
ضرار... ضحكتِي ضيَاعي ,ضَمادي وضِلوعي احجي سربوت
حسيت كلبي حيطلع من مكانه
جاوبته بتوتر وانه حتى نسيت شرد اگله
سيرين... احبك
ضرار... بويه عااشكج يالفصمه
سيرين... اوي خرربتها يالشويب
ضرار... اي موطيحتي حظه للشويب يله بويه روحي صار وكت الجرعه
سيرين... شعرفك ؟
ضرار... اعرف
سيرين... بـاي
ضرار... الله وياج
سديته منها وكعدت على جهه المحفظه بيدي
وصورتها جدامي
ضرار... شلعبتـي بحـالي يالفصمه
مـصر / 5:15
امشي بممرات المستشفى وجسمي يختض
وصلت لباب غرفتها ،صوت البجي,الصراخ
صوت العذاب,والمعاناه
فتحت الباب ودخلت الدكتوره يمها حتى تنطيها الجرعه وابوي لازمها ويبجي
رحت يمها لزمت أيدها وبستها
نهايه... ربببي اخذ امانتك ولاهالعذاااب
سيرين... يمه إسم الله عليييج فدوه اصبري ماضل شي
نهايه... سييرين تعبت من الألم ينهش بروحي شتحممل يايمه كليلي شتحمل
سيرين... ضلت روحها تتحرمص منا علما خلصت الجرع ولاواحد ضل بي حيل من البجي والألم طلعت انه وابوي وعفناها
جراحات,الاشعه,الادويه,الجرع,والعلاج الكيميائي
هذا بحد ذاته يدمر الانسان تغيرت كلش عن اخر فتره اجينا بيها ماضل شعر براسها ولاضللها حيل من الألم
رحنا كعدنا ابوي يسبح ويقرا ايات وانه مخليه راسي على كتفه
اجى زكريه والدكتور وياه طول ماحنى هناه ابد ماعافنا عايف شغله واكثر من مره ابوي راده يرد بس مقبل
زكريا... عمي كوم رد للشقه انه اضلن هناه
جابر... لابويه ماكدر اعوفنها خليني يمها
سيرين... يابه شوف حالتك تعبانه كلش ارجع ارتاح وانه اضل هناه
جابر... بنيتي عوفوني هناه صحتي زينه كلش
عساف... الله يساعدكم انشالله ماضل شي
اسبوع ورى اسبوع وتخلص
زكريا... المرض جان بدايته وهمزين تلاحكنا وحالتها احسن من غيرها
سيرين... يرببي قهر والله اطفال ديعانون شلون بيهم
عساف... بيد ربج بـعد مكتوبلهم يعانون
سيرين... ديموتون
عساف... خطير كلش اكو بعض الحالات تشفى من السرطان لكن عاده الغايه من العلاج ايقاف انتشار المرض وليش الشفاء منه تماماً
سيرين... زين الجرع والادويه شنو حاجتهم اذا المرض مايشفى منه
عساف... احنه كاطباء نعالج السرطان بابطاء نموه وتخفيف اعراض المرض ،المريض يكدر يعيش اشهر وسنوات مع انواع السرطان بعد انتشاره وعلاجه وتعامل معه تعتمد على عده حالات
سيرين... شنو هنه ؟
عساف... نوعه,سرعه انتشاره,طريقه العلاج,استجابه السرطان للعلاج
سيرين... اذا هييج ليش الي يعانون منهم يشفى تماماً ومنهم ميشفى وتنتهي حياته ؟
عساف... اكو عده حالات تكون فيها الخلايا السرطانيه ضئيله وقليل عددها من بعد مانتشرت وهيج حيسهل علاجها وشفاءه واكو عده حالات سرطانيه يمكن الشفاء منها تماماً
سيرين... ربي يشافيهم ويصبرهم عالجاي يتحملو من الم
مياده...
امشي واجر النفس بلكوا حركتي ثكيله وبطني بارزه بشكل ايد موطبيعي وشرايين صارت
تبرز ببطني اكثر من قبل
خلصت وطلعت لكيته كاعد ومنتظرني هوه وعمتي كام لزمني من ايدي وباسني
ايهاب... يله نروح
مياده... اي ماعندي شي
طلعنا وانه دكات كلبي ابد مومنتظمه
وصلنا جان اكو كم مراجعه قبلي منا علما وصل دوري احس حتى صبري خلص
_شلونه الحمل وياج
مياده... متعبني كلش فدوه حتى حركتي بطيئه وبطني باخر شهر برزت كلش
_ياشهر صرتي
مياده... دخلت بالرابع
_الفحوصات والسونار وينهن ؟
مياده... مامسويه الدكتوره الكبلج كالت ميحتاج
_اوف امي ميصير هيج كومي خل افحصج
مياده... دكتوره زوجي بره عادي يدخل ،استأذنت منها ودخل ايهاب وياي يرجف ويبلع بريكه لزمت ايده عاينلي وابتسم
كمت فحصتني عمتي بقت برى عافت مثل الجل على بطني غمضت
عيني لحظه واسمع صوت دقات قلب،
فتحت عيني عاينت للجهاز
قشعر جسمي من فرحتي حسيت روحي طايره بالسما
_مبين اطفالج من هسه وكحين بحيث منطيني ظهرهم وممبينين
مياده... ش شنو اطفالي ؟
_حبيبتي انتي حامل بتؤام وهناه مبين واحد منهم ولد بس الثاني ممبين
ايهاب... يعني حامل بتؤام فدوه متأكده
_اي عيني
مياده... حركت الجهاز على بطني رفعت عيني ودموعي ابد ماتوقفت ابد ممبين شي بس ركزت نظري عليهم
ايهاب شوفهم يربي شكد صغار
باسني من راسي نزلت دمعه من عينه بسرعه مسحها خلصنا وطلعنه ابد ماحجينا كلمه
لحد هسه ممستوعبين يمشي ولازمتي ويعاين لخطوتي الاخطيها
مياده... ايهاب شبيك ؟
ايهاب... مامصدك ماتتخيلين فرحتي بهالحظه اطفال ومن حبيبه عمري
مياده... ربي عوضنا وانشالله يكونون عون وسند الك
ايهاب... اريدنهم سند الج من بعدي
مياده... حياه بدونك ماريدنها
ايهاب... ابويه انتي محد ضامن حياته وبطلي بجي
مياده... اوف جيبلي خيار اريد
ايهاب... خيار ؟
مياده... اي شطيباته اكصكصه واخلي عليه الملح والمندوزي وبصفه شياف ليمون
ايهاب... امشي انجيب شهيتيني وياج
مياده... هههههههه اي يله
ميس ...
مر كم يوم على جيتي رضوان كلش متغير واحسن من قبل مدللني وتعامله وتصرفاته احلى من قبل
صار حتى اذا يروح للشغل المبايل مالازم يطفى واضل احجي وياه
مر سنه على وفاه انور بسنويته مارحنا لانه ولاجنوب طفلها صغير ومومال روحه بقيت يمها
وهيه طايره بيه بحيث
من فرحتها بيه متخلي شوي بالكاع
بس ياويله لوتعبها لو يخرب نومتها تقيم القيامه وتتبرى منه اينها وابوه
اساعدها بيه لواجيبه يمي وهوه بسرعه تعود وصرت ادير بالي عليه
بيومها جان يمي وجنوب بغرفتها ترتب بالغرفه وتعزلها صايره هوسه من الحليب والملابس
اخذته ورحت خليته بفراشه
وماسمع غير صوت رضوان دخل من برى
رحتله جان مبين مستعجل والمبايل بيده يخابر
بشائر... ها يمه خير شصاير
رضوان... ماكو شي يمه ميس بدلي خل نروح لاهلج
ميس... شكو ؟
رضوان... بسرعه
ميس... عفته ورحت بدلت بسرعه وانه الف حسبه اجت ببالي
طلعنا اول ماوصلنا اخوتي كلهم متجمعين وعمامي ستوهم رايحين مبين ضرار مموجود لوجان خبصها للدنيا
فتنا جانو كاعدين وبسول راسه ملفوف بشاش
ركضتله واتلمس بيه مدخن وتعبان حاله
ميس... يرببي هاي شبيك منو مسوي هيج
بسول... خيتي لاتخافين مابيه شي
دخل ضرار من برى عيونه بكصته من العصبيه وقابض على أيده اجى بدون سابق انذار لزم بسول من طرف قميصه وخازره
ضرار... ولك شششلون سوي هييج
بديعه... يمه على كيفك وي اخييك
ضرار... خلني اشوفن علته مبين عكلك شخط
راح ضرار ومشى وراه بسول ورضوان مشيت وراهم لغرفه بسول
جان كاعد وضرار يعد ويصفط
ضرار... ياااافيهيم يسوي هيج ولك ماااافكرت بسمعتها
بسول... عاند وياي حجيت بطيب مافاد وياه طيحت حظه يالله استجن مايستاهلها وربك
ضرار... بسك البت انه مسؤل عنها موانت التجي وتحدد ياهو اليستاهلها يووولا كلي بالله اذا هوه مايستاهلها منو اااحسن الها
بسول... انه رايدها
هوه كال هيج وضرار وجهه انطعن احمر
كام تقدم عليه سحبه من طرف قميصه يخزر بيه ويعيط
ضرار... انهيك بالعباس كبرت انت موطايش ولامراهق حتى اضلن وراك
بسول... انه مامسوي شي وكتلك من كبل رايدها وارجع اكولها الك
ضرار... ولكككك لوتريدها ليش تزوجت جيتني بدم بارد وتريد تاااخذها على مررتك لاااشوف مالها ااب وكايلك كبل انهي اليكربلها لو يمسها بشي
رضوان... ضرااار اهداء شووي مايفيد الصياح
دفعه ووخر منه
ضرار... فهمه وخل يرد عكله لراسه البت ماطيها اله دامها ماراضيه ويستحيل اجبرها على شي هيه ماتريده
ميس... منيه ؟
بسول... غيد
ميس... غ غيد شجابها عليك وشرايد منها
بسول... فرك وجها بعصبيه واتنهد، احبنها وروح ابوي رايدها انه جنت كبل رايد اخذها
وحجيت وي اخوج مارضى
ومن ردت احجي لرباب ماتت الله يرحمها والبت عفتها بحالها وماتكربتلها ولاضوجتها
بس اخوج يدري انه رايدها وتجي الخطابه مايردهم
ضرار... وليش اردهم قسمه زينه للبت وتستاهل اوكف قسمتها علمود حضرتك شوكت تحن وتخطبها ؟
بسول... ومرتي ؟
ميس... الله يرحمها ماتت العمر كدامك طويل ورباب هسه يم ربها
بسول... ماعرف حاااير والله
رضوان... وشنهي المحيرك اطلبها كبل لاتروح منك
عاين لضرار وحجى
بسول... اطلبها منك تطينياها
رضوان... لاتعااند ولك وانت تعرف لوعه العشك ليش تلوعه هييج
ضرار... الاشوفنه زين وهيه راضيه بيه مامانع واذا البت رضت نتوكل على الله
بسول... وهسه انه منين اخطبها ؟
ضرار... حسب الاصول تاخذ امك واختك يخطبنها ونشوف ردها
بسول... خلنا نحجي وياها واذا قبلت نحدد المشيه
جاوبه بعصبيه وحده
ضرار... كلتتتت حسب الاصول
بسول... اي سمعت
ميس... عافنا ومشى رحت لغرفتي اتصلت على غيد ومتجاوب اخرها جاوبتني وهيه تشهك
جنوب...
اخذت الملابس حتى اغسلهن وفقار يم عمتي عفته
اعاين للباب لحد هسه ميس ورضوان ماكو
اندك الباب ركضت فتحته عبالي همه
ازان... جنوب
جنوب... هلا محتاج شي
ازان... احجي وياج رايد
جنوب... مالك حجي وياي
ازان... بس كم كلمه واروحن
جنوب... دخل راح كعد بالحديقه أشرلي
رحت وكفت وسله الملابس بأيدي
ازان... ادري جرحتج وأذيتج هواي غلطت بيوم التخليت عنج وماحاربت حتى احصلنج
انه هسه حسافر وماعرف اذا بيوم راح اردن يو لا بس اعذريني على كلشي
السويته مايغتفر واعرفن صعبه تسامحيني
بس ياجنوب وداعتج ليلي مانامه من الندم حوبتج وحركه دموعج دمرني وماعشت حياتي
الله وفقج وهناج وي اليستاهلج وصارلج منه
أبن يشيل اسمج واسمه وانتي تستاهلين
جنوب... انه الصار نسيته ومو على بالي وانت بالنسبه انتهيت وشفت حياتي بدونك
انه الله وفقني وي زوج يحبني وماكو منه وطفل منه هذا كل كافي بالنسبه الي
وصدك ماشايله بكلبي ولاحاقده عليك
روح والله يوفقك ولاطول بغيبتك لخاطر امك الي كلساع واكعه من وراك
ازان... لو ماهيه جان هسه انتي مرتي
جنوب... قسمه ونصيب ولاتنسى انه هسه مره ابن عمك
ازان... اي بويه
دخل انمار من برى بيده علاليك شافنا اجى
حضني من كتفي وابتسامه على ثغره
انمار... ابو الزون جاي تموت وجيتنا
ازان... اموتن واعوفنك لاهاي واكفه اجيت اشوفن ابنك ولو لحد هسه ماصدك صار عدك ابن حاير شلون تربي
انمار... امشي امشي دشوفنه رجال من هسه
راحو همه جوا خلصت ودخلت لكيتهم كاعدين وفقار بأيد ازان يبوس ويشم بيه
انمار... خايب شفطته شمالك
ازان... ولك ريحته ماينشبع منها
انمار... عوفه راح تخنكه حتى اخنكك وراه
ازان... اخذنه واروح
انمار... ههههههههه جربب وشوف
ميس....
ياعيني هدي ليش البجي ؟
غيد... متعرفين شصار من وراي وضرار زعل عليه حتى مباوع بوجهي
ميس... شصار بالله ؟
غيد... اخوج من زمان هوه وراي بس ابد مانطيته مجال والله
ومن بعد ماصديته وحلفته مايتكربلي لو يطلع كدامي ماكلج فك ياخه عني بس اشوة من قبل
ومن ماتت مرته بعد ماشفته وحتى لواشوفنه يدور وجهه عني
بس لوسمع احد خاطبني لو حاجي باسمي تقوم القيامه
كبل اتقدملي واحد وهم سواله سالفه وطلع الرجال يشرب ويعربد و كلت هايهيه
بعدها اجى واحد غيره وهم لاعب لعب بالرجال
وحتى ضاربه وماحجيت
وهسه كبل جم يوم اجني نسوان وخطبني وامي فتحت الموضوع وي ضرار وضرار حاجي
جدام جدج وبسول هم
ميس... وشصار ؟
غيد... بسول من داري رايح ومهدد الرجال يعوفني ولوشايفه يكربلي لويدز احد صير موزينه
هوه معاند وياه وماقابل رجع دز امه
وانه حرت ارضى يو لا من اخوج
وصدك ثاني يوم واسمع الهوسه صاير ثاري متعارك وياه ومهدده هم وضرار متلاحكم
اجى ضرار لمن جنه انه وامي كاعدين
اول مره اشوفه عصبي ويصيح عليه سحبني من ايدي وشمرني بالغرفه
ضرار... احجي
غيد... شحجي
ضرار... قصرت شي يوم وياج التردي والتحبي يجرالج وكبل لاطلبي شي تلكي جدامج
اعرفنج تربايتي وكبل لاتوكعين بالغلط تفكرين الف مره اريد افهم منج السالفه وبسول شرايد منج ؟
شهكت بالبجي وايدي على وجهي
خفت كلش منه وهوه ينافخ وعصبي
عاط بيه يالله كتيتهن كت اله من البدايه
ولحد ماعرفته واجينا هناه وكلامه وحتى الرسائل الدزهن
عافنا وطلع وانه ضليت ابجي وانحب وامي تلوم بيه جيف ماحجيت
ميس... لو حاجيه مجان صار هيج
غيد... شحجي وانه هسه عود حجيت
واشوف ضرار هاج علينه كسر الغرفه تكسر ويخابر بسول يرعد ويعيط
ميس... هسه نشوف حل للسالفه
غيد... فدوه احجي وي ضرار
ميس... اي صار
غيد...
لثاني يوم كاعده على الدرج وصافنه والمبايل
ماوكع من ايدي اتصل على ضرار ومايجاوبني
كمت فتحته واشوف ميس ،امها وعمتها
بديعه... ها يمه نفوت يولا
غيد... ها وين
شفت ميس خزرتني وكاتمه ضحكتها
دخلن جوا وانه رحت حضرت الكيك والعصير وديته الهن وكعدت يم ميس
ميس... وين الخجل
غيد... وليش اخجل ؟
ميس... هههههههه سمعي السالفه وبعدين شوفينا خجلج
غيد... انه والخجل مانتصافى
صدك كعدن يسولفن وحجت ام ضرار على خطوبتي لبسول حسيت كأن واحد وكفخني
ابد مايوم توقعت اكون زوجه اله ومن صدك اصير مرته العرق صار يصب وابلع بريكي هنه راحن وانه ساكنه
وراها بشوي دخل ضرار حتى ماكمت من مكاني وهوه يعاينلي مستغرب
كمت كعدت يمه وحضنت أيده
غيد... والله ماجان قصدي اضم عليك
ماردت اصير مشاكل من وراي
ضرار... ابويه انتي شجان سويت لوحاجيه احسن هيج الامور طورت وسمعتج جان صارت بالطين
من ورى الميفهمون
غيد... وعد مااضم شي بس لاتزعل
ضرار... ماكو اب يزعل من بنته
غيد... كلشي منك انه راضيه بيه
الحجيه... الله يحفظكم يمه
ضرار... انسي الصار وكبل شوي عرفتي ليش اجت امي
غيد... احم ها اي
ضرار... بويه اعرفنج ماتتصافين انتي والخجل اكولنها الج من الاخير وفكري زين
ماجبرج ولاضغط عليج والتردي يجرالج
واذا كلتي لا الموضوع ينسد وبعد لايكربلج ولاشوفي
واذا موافقه خيراً على خير
غيد... ها
ضرار... اعوفنج تفكرين والحجيه موجوده حتى ترد خبر لامي
باسني من راسي وراح وانه سالفه تجيبني
وسالفه توديني رن المبايل بيدي رقم غريب عرفته هوه
كمت للغرفه جاوبته واجاني صوته يلهث وعصبي
بسول... اي شلونج
غيد... شلوني
بسول... شلونه لونج
غيد... ماعرف
بسول... اي شوفي هوه موضوعنه
غيد... ياموضوع
حسيت روحي نثولت وثولته وياي
بالاسئله تنهد وحجى
بسول... ماعرف بالغزل والكال والكلت بس شوفي انه احبنج ورايدج
غيد... تحبني
بسول... جا انه شكلت هسه
غيد... اي هوه كلت احبج
بسول... هسه توافقين وتردين خبر لامي
غيد... بعدني ممقرره وافكر يجوز ماوافق
بسول... لاشعلين كلبي وحك علي ااااحبجج بويه وراايدج وانه لو اضل كل عمري اعارك واعربد على خطابتج مامل وهسه وافقي احسلج
غيد... اممم
سمعته طكها ضحكه وبلكوا جر الكلمه
غيد... خير ليش تضحك ؟
بسول... يمعوده كلما اسمع احد يكول اممم
اتخايله مثل الهاشه
خليت الشال بحلكي اكتم ضحكتي
غيد... يله حروح
بسول... الله وياج ورديلنا الجواب بسرعه
غيد... اممم
غميت كصتي عالكلمه وهوه فحطان
من الضحك سديته منه ورحت يم امي
غيد... يمهههه انه موافقه ازوج رديلهم جواب
الحجيه... دهر اسود ولج اثكلي
غيد... يمه شثكل موكالو ردولنا الجواب
الحجيه... جا انتي شمالج مامصدكه جيتي تناطحين
غيد... مو هوه فكرت بالموضوع وشسمه
الحجيه... خايبه استجني وبطلي رعونيه
غيد... يمههههه
الحجيه... وغمههه
سيرين...
امشي واحس خطواتي أبد متعيني
وبراسي تجمعت كل الافكار حتى دموعي نشفت
طلعت كدامي الدكتور اجى يمي وعيونه تتفحصني
عساف... ها رايحه
سيرين... اي
عساف... ممكن تجين نحجي شوي
سيرين... موهسه فدوه أجلها
عساف... مخذ من وقتج هواي
سيرين... ماحبيت اخجله نزلنا جوا بالحديقه وهوه حاير شلون يحجي اخرها يالله كت السالفه
عساف... السالفه ومابيها سيرين انه احبج ورايدج
سيرين... شنو ؟
عساف... لاتفهميني غلط واعرف الوقت مومناسب بس ماردت اطول بالسالفه وانتو ماباقي هواي وترجعون وصدكي مشاعري صادقه وياج
سيرين... فدوه الاحسن تسد الموضوع وابد مامفكره بالسالفه وانه اح...
قبل لاكمل قاطعني زحجى بارتباك
عساف... ابد لاتستعجلين بجوابج وحنطيج مجال حتى تفكرين
عافني ومشى وانه ماحركت ساكن
اريد استوعب الموقف والسالفه احس
حتى عقلي حيوكف من التفكير رجعت للشقه
وحيلي مهدود فتحت المبايل
مكالمات ورسائل حضرت الرقم
ورجعت اتصلت عليه ميجاوب رحت تمدتت عالجربايه ودموعي مثل الشلال
وكلبي دكاته مومنتظمه
رجع اتصل عليه بسرعه جاوبته
ضرار... هلا بويه
سيرين... هلا بيك وين انت
ضرار... طالع هسه ليش اكو شي
سيرين... ماعرف
ضرار... صالج كم يوم تلوبين وكلما تردين تحجين تسكتين احجيلي شبيج !!!!
خليت ايدي على حلكي احبس صوت
شهكتي
سيرين... اريد اكلك شي
ضرار... شني ؟
سيرين... الكلام الي راح اكوله مراح يعجبك بس ماريد نستمر بعلاقتنا والاحسن كلشي ينتهي بينا
كل مشاعري وكل كلامي تجاهك مجرد تمثيل
انه مابيوم حبيتك ولاراح احبك
يـــــتـــبع ....
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!