رواية ثارهم وبنت الفقير الفصل التاسع والأربعون 49 - بقلم الكاتبة ترانيم 🤎

٤٢"

ثـارهم وبنت الفقير
.
.
.

بسول... ضرار بلع ريكه وحجى،مات

سيرين... لطمت على وجهي وعطت لاااا

مبايله وكع من أيده وراح يركض بحيث عاف السياره مفتوحه ركضت وراه من التوتر والخوف نسى الطابق الهمه بيه اول ماوصلنا واشوف الممر مكلوب كلب بالصياح
حيدري واكف ويدك باب الغرفه ويصيح

حيدري... فتتتتتحووو

درغام ورضوان كاعدين بالكاع ويبجون وهارون واكف يروح ويرجع بتوتر عجزت افسر حالتهم
بسول... شصااير احجي ياهو مات

رضوان... ماندري اهدو شوي الدكتور جوا

سيرين... واكفه ومتصنمه بمكاني اريد استوعب الموقف منو وشصاير ؟
اختل توازني ووكعت وكلبي احسه راح يطلع من مكانه غمضت عيني وتنفست بعمق رفعت عيني واشوف ضرار طلع من الغرفه المقابيلي

حيدري...
وصلت للمستشفى الاكل والاغراض بيدي جان رضوان ودرغام وهارون موجودين

حيدري... هلا بالجماعه

رضوان... اتأخرت

حيدري... رحت شفت الشغل مال انور وضرار

درغام... يلا تعال هالعارات نايمين ومكضينها وياهم مخدرات

هارون... اروح اجيبن جاي من جوا

حيدري... ولك جايب وين نازل

هارون... اشوفن الممرضه الي بالطابق الجوا راحت لوبعدها

رضوان... طاح حظك

حيدري...
رحت لغرفه ضرار جان كاعد وينافخ

ضرار... اطلع مني ضغطي معلك

حيدري... شمالك

ضرار... اريدن جكاره

حيدري... يمعود مووكتها جبتلك اكل وشبع بطنك

ضرار... اطلع احسلك واطيني مبايلك

حيدري... ها بويه جنك شتاكيت

ضرار... وتالي وياك

حيدري... نسيت اكلك أيلي مشتاكتلك لويرضون يطببوها جان جبتها وياي

ضرار... هههههههههههه طاح حظك

دخل رضوان للغرفه
رضوان... جا بسول وينه

حيدري... عفته وجيت كال شوي ويجي

رضوان... هايهيه

حيدري... اروحن اشوف انور
طلعت منهم رحت لغرفه انور جان كاعد وصافن

انور... جيبلي ملك

حيدري... تدلل ضلعي

انور... شلونها

حيدري... زينه ومرت الجبير دايره بالها عليها

انور... خويه دير بالك عليها

حيدري... ولك شمالك ياهو تشوفه وتكله دير بالك عليها انشالله تطلع بخير وسلامه وتردلها

انور... متاني لحظه لحظه حتى اردلها ولك هاي عود بعد ثلث ايام مشيتي

حيدري... نشوف غير وكت نحددها بس تطيب

انور... وانه احسب يوم يوم وابوها قطني وطاح حظي فوكاها

حيدري... ههههههه يالكلك حب

شفته جر نفس بقوه وصفن بوجهي حركته بأيدي ساكن
حيدري... انور شمالك ؟

صدره صار يصعد وينزل ويجر النفس لزمت أيده بارده مثلج وماشوفنه غير وهوه يتقيأ دم ركضت بسرعه صحت الدكتور ورديتله

حيدري... خويه فدوه اروحلك قوي نفسك

انور... بنتي ملك وفاطمه امانه عندك

حيدري... ااااسكتتتت دكتتتتور وين رحت

احى الدكتور يتفحصه وهوه من خشمه وحلكه يجري الدم شفت وعيونه ماتتحرك شفت الجهاز جر خط مستقيم مالحكت افكن حلكي طلعونا برى

سيرين...
شفته كدامي وجن روحي ردتلي كمت لزمته قبل لايوكع

ضرار... وخرييي

سيرين... وين رايح وحالته هيج

ضرار... اششش اخذيني يم غرفه اخوي

سيرين... لزمته العكازه بيده وجروحه خفت لاتنفتح لزمته ويلكوا يجر خطواته

رضوان... ليش طلعت

ضرار... شصاااار جوا

حيدري... ماندري لحد هسه محد طلع

اجت خطيبه انور وابوها وياها دموعها تجري وفحطانه بالبجي
فاطمه... فدوه اروحلكم كلولي شصار

سيرين... اهدي انشالله مابي شي

فاطمه... خابرني حيدري كالي يريد يشوفج اوصل اشوفكم بهالحال

سيرين... فجأه الدكتور طلع راحوله التمو عليه

وخر الكمامه من وجها تنهد وحجى...
أنا لله وأنا اليه راجعون
- تاريخ الوفاه يوم 2017/3/28
- الساعه 7:28
صاير عنده تهتك بأنسجه المخ والي صاير عنده نزيف بالراس ومكدرو يسيطرون عليه

_هوه كال هيج وكأن كفخنا على راسنا المستشفى انكلب بعياط الولد فاطمه كطعت نفسها تكطع حرت عليمن اعاين حيدري يدك ويبجي ودرغام ورضوان صوت بجيهم يكطع الكلب لازمه ضرار خاف يوكع واكف ويختض
شفته وكع من طوله ضليت اعيط وانحب خرت بيمن احير
اجى رضوان وهارون شالون

هارون... امشينا خل اردج

سيرين... وضرار

هارون... مووكتها الوضع متأزم كلش

سيرين... مشيت وياه اول ماوصلنا صوت العياط واصل للشارع دخلت واشوف ام انور واخواته مكطعات ارواحهن تكطع الدك والطم يوكف الكلب

رحاب... ولييييدي اااخذوني اله وروح ابوي مابي شي البارحه جنت يمه

غمضت عيني بألم وحسره كلهن يدكن ويلطمن الولد كلهن راحو والنسوان بقت تتلاطم
دخلت جوا ادور على رهف وملك ماكو لكيتهن خاتلات جوا الدرج ويبجن
سيرين... تعاالن وين خاتلات

رهف... احاف

سيرين... حبيباتي لاتخافن

ملك... بابا

سيرين... كالت هيج لوجن سجاجين نطعنت بكلبي حظنتها وابجي شذنبها بهيج عمر تتيتم شلون راح تعيش بدون أبوها وامها
اخذتهن ووديتهن بغرفه عمتي اجت جنوب وميس مكطعات رواحهن باللطم

جنوب... ولجج شلون ماتت

ميس... الصبح مابي شي وصاحي

سيرين... الله يرحمه

عفتهن وصعدت لغرفتي سبحت ولبست اسود اخذت مبايلي لكيت رضوان متصل رجعت اتصلت عليه بسرعه جاوبني
رضوان... ام انور عدها علاج خل تشربه لاتنجلط

سيرين... المشكله حالتها حاله مابطلت بجي وون

رضوان... يالله احنا نكمل اجرأءات الوفاة ويجوز منا ونروح للدفنه

سيرين... لافدوه عالاقل خل خواته وامه وبنته يودعنه وضرار شحاله هسه

رضوان... طاك خياط عمليته وخيطو اله

سيرين... ديربالك عليه

رضوان... بعيوني

سديته منه ونزلت جوا البيت شوي ونكلب كلاب بحيث حتى مكان للنسوان ماكو

وانه البنات بأيدي اعاين لبنت انور تكسر الخاطر
شلون حتعيش بدون اب,ام
مهما حيكون اشخاص محاوطيها ودايرين بالهم عليها حتضل بحاجه سند أبوها وحنيه امها
شكد ماتكبر وهيه حتكون بحاجتهم أكثر
من راح تبجي,تنقهر,تفرح
راح تتمنى بوكتها لوعدها أهل يشاركوها

انطيت علاج ام انور لدانه تشربه الها وهيه كلساع واكعه حرنا بيها
وبالي يم ضرار شصارله هسه والولد حالتهم حاله ولاواحد بيهم يرضى يجي
لوجه الصبح واحنا على فرد كعده ولاوحده بطلت بجي ونحيب وصلني مسج من رضوان كاتب ، راح نجي
جسمي قشعر احس بلكوا واكفه على حيلي وكلبي يتكطع من الألم
ششوف بعد اكثر من هذا تعبت كلش ...

البنات دخلتهن بغرفه عمتي خفت يخترعن من الهوسه والعياط شوي وصاحو كالو الجنازه وصلت بلعت ريكي بألم والنغزات البكلبي تروح وتجي
سحبت عباتي ولبستها
رحاب... يمه اجى وليدي خلني اتلكاه

عفت ايدي على حلكي احبس شهكتي واني اشوفها بهالحاله

دخلو الجنازه والنسوان التمن العياط والطم يقشعر البدن امه واخواته وكعن عالتابوت يبجن
ويلطمن
حالهن مايسر عدو صغير وجبير دموعه بعينه
دانه... خويهههه افديك بروحي بس رد بننننتك منو الهاا

رحاب... ولييدي فدوه اروحلج اكعد وشوفني طولك

دخلت فاطمه من برى تدك وتلطم وكعت عالتابوت تعيط وتبجي حتى صوتها رايح
فاطمه... بعد ثلث اااايااام لمشيتنا هذا وعدك الي كتلي اااروح واجي وواسويلج احلى عرررس ااااااكعد ووووكلي وينهه وعدك شوووو رحت وعفتني اااااكعد وجاااااوبنني مااااقبل تروح بهالسهوله مااااارضى عليك والله فدوووه اروحلك رددلي

زها... خوويه وين رايح وعااايفنا اااااااكعد

رحاب... وخرررن منههه ولجن لايختنك صيييحولي اخوته خل يجون يوخررررونه من التابوت مومكانه هذا

صاحو علينه حتى  يدخلو ياخذون التابوت وعمتي عاطت بعلو صوتها

رحاب... لااااا لاااحد يجي وللليدي خلوه يممممي وين ماخذينه

دخلو الولد لابسين دشاديش سود والغترهه والغترات شفت ضرار اجى العكازه بيده موجرحه مفتوح شلون يجي وشلون قبلو يطلعونه
اجى حيدري واوس شمرو روحهم عالتابوت ويدكون عليه

حيدري... كووووم اااكعد وين رااايححح هاااذا وعدككك من تكوول انه بظهررررك ااااكعد

اوس... خويه اااكعد لااتحركنا بموووتتك چا هيج يهون عليك تشوف ااامك فحطانه من البجي وماتمسح دمعتها

كعد ضرار يم التابوت وحركته ثكيله من ورى رجله

ضرار... عليك بداعه امك ارجع خويه

اجى رضوان كومهم بلكوا من التابوت وهمه حالهم يكسر الخاطر
دخل عمي والحجي ودرغام اجو يردون يشيلون التابوت وعمتي توخر بيهم

رحاب... لاااايمه فدووه عووفو مااشابعه منهه ولك حيدري رااايح تدفن اخييييك بحده دفنوني وياه
ااانور وييين عايف بتك بعدها بعمر الورد وعايفها لاام ولاااب
سحبها ضرار ووحظنتها هيه حظنته وتعيط

ضرااار يردون ياخذون اااخيك يمممه بعدني اريدن افرح بيه ردددت اهلهل بعرسه وافرحن بيه  كاالي يمه اروحن وارد حتى اخذ مشيه للاحبها اكعدد يمه اااخذلك التحبها وافرح بيها وللللك يممممه اكععععد سوده عليه شبسرعه رحت
اااريد رباااي ردووه لحظني بيااا حق يروح مني ولكممم وليدي اريدنه ااافنوني ويااه بس مااعوفه وحيد بكبرره

ضرار... شلللعتي كلبي فدووه اروحلجج

رحاب... ولللك يمهه انه كلبي ااانشلع وليدي رااح ردت ازفه عريس مووازفنه بتابوت

وخر منها وشالو التابوت كتلن نفسهن باللطم والصياح الولد يبجونن يكسرون الخاطر ابد ماتخيل مدى قوه علاقتهم وهمه رابين سوا وهيج يموت بيوم وليله

كامت امه لزمت شيلتها دموعها مثل الشلال صارت تدبج وتهلهل كدام التابوت وهمه شايلي

شلع كلبي الولد من حمل وشال
شيرد الوكت ونرد للاحباب
ويصير المسى نتفكد الباب
يهد الحيل اه يفراك الاحباب
ولاواحد يمر ويكعد يمنه

طلعو همه وانه وصيت ميس عالبنات جانو يردون يرحون مارضو ياخذون وحده من النسوان
شفت رضوان واكف والغتره على وجها عيونه حمر مبين باجي
رضوان... وين جايه

سيرين... ماكدر اضل فدوه اخذني وياك

رضوان... امشي صعدي بسيارتي هذيج وراج

سيرين... أشرلي على سيارته رحت صعدت وانتظرهم اعاينلهم صعدو التابوت فوك السياره ويشدون بيه حيدري كاعد وحاضنه مايقبل يهده بقى فوك يم التابوت ملو وهوه مارضى
اخرها عافو

اجى رضوان ووياه واحد الغتره على وجها كلشي مامبين منه صعدو اول ماشافتي حسيته نصدم

زكريا... هيه هاي

رضوان... اي

زكريا... شلونج خويه

سيرين... هلا

رضوان... يلا نمشي

زكريا... اتوكل

سيرين... ضرار وينه

رضوان... راح وي درغام

سيرين... شلون قبلو يطلع وهوه بهالحاله

رضوان... ماقبل خبص المستشفى خبص اخرها طلعنا على مسؤليتنا

مشينا وانه طول الطريق ادعي واقرالها الفاتحه بالي يم ضرار وشلون لعمليته اذا نفتحت
الصبح بدى يظهر واحنا بعدنا ماواصلين احسه الطريق مايخلص أبد وجه الصبح وصلنا للمغيسل رضوان ماقبل انزل بقيت كاعده بالسياره سفت ضرار من بعيد حالته كلش تعبانه ولازم عمليته مكدرت ابقى نزلت ورحت يمه هوه شافني اتفاجأ
سيرين... البقيه بحياتك

ضرار... حياتج الباقيه

سيرين... ضرار اكعد شوي شوف حالتك

ضرار... سيرين اخوي وضلعي راح مني

سيرين... بلعت غصتي حتى معرفت شجاوبه

دنك راسه وحجى بخيبه وألم

ضرار... بشيله التابوت نشال ضلع من ضلوعي

سيرين... خليت ايدي على حلكي وحبست شهكتي
شوي وطلعو للجنازه حتى يدفنو
ضرار... امشي بسياره رضوان ولاتنزلين

سيرين... وانت

ضرار... مابيه شي امشي

سيرين... عفته ورجعت للسياره شوي ومشينا اعاين للقبور ساكنه,هادئه
ماكو احد ميقترب يومه وينام هالنومه
ترى شلون عاشو,شلون كانت حياتهم
كل شخص نايم بهالمقبره اله احباب يفتقدو
ترى,ام,اخت,اخ,ابن,ابنه,او زوجه ,زوج
شكد عاشو,والهم شكد,وشلون ماتو

تنهدت بألم وحسره
سيرين... هخخ يتراب النجف شكد ضميتي اعزاز

السياره تمشي وانه صافنه عالجام بجيتي وي ضرار هواي شفت اشياء
كل حياتي جنت عليشتها بهدوء وي اهلي لابجي,لالم,لاحزن,لاموت,ولافقدان
تغيرت حياتي كلش واولهن انه الي تغيرت صرت اتحمل الوجع والالم من بعد ماجنت اذا نغزتني ابره اضل ابجي واعيط
هسه صرت كليوم اتوقع الالم تغيرت لدرجه صرت اتحمل الصدمات الي اتلقاها
ترى شتحمل بعد,بشنو راح انصدم,وروحي تضل بهالقوه والصلابه وتتحمل ؟ 

وصلنا الدفان جان حافر الحفره ومكمل كلشي عاينتله بحيره
سيرين... انـتـهـه هسه جاي تدفن عزاز غيرك شلون اذا اجى يوم واطريت تدفن عزيز على كلبك ؟

ضليت ساكنه وبس اشاهد قواي بادت تضعف احس حيلي راح منظرهم وهمه يبجون
وشلون يودعون أخوهم حيدري تمدد بصفه ويشمر التراب درغام وكع يبجي وينحب بصوت
الولد كاعدين وغتراتهم على وجوهم
ابوه احسه بلكوا واكف على حيله حتى ماينهار
على منو اعاين ياتـرى ؟

ردينا خالين والالم بكلوبنا صدمه ماممكن احد بيوم يتخطاها حضل ذكراه بكلوبنا
سوالفهم,ضحكتهم,كعدتهك,شقاهم,مشاكلهم
كلهم ربو سوا
كعدو نفس الكعده
اكلو نفس الاكله
ضحكو على سالفه وحده
وكفو واحد بظهر الاخ
صارو واحد سند للثاني
وهسه سند منهم وكع
شلون راح يتخطوه ..... ؟

ميس...
النسوان يرحن ويجن حتى يعزن البيت مكلوب كلاب الفاتحه نصبوها
طلعت اشوف عمتي لكيتها كاعده برى السبحه بيدها ودانه وزها واكفات بعيد عنها رحت يمعا واعاينلها حالتها تكسر الخاطر
ميس... عمه ليش كاعده هناه كومي دخلي

رحاب... اتاني وليداتي شوكت يردون

ميس... بعدهم ماجايين

رحاب... يمه راحو يردون انور وياهم خلني اتاني هناه اريدن اتلكاه

بلعت ريكي ماعرفت شجاوبها اجت بت انور مبرطمه شمرت نفسها بحظن بيبيتها

رحاب...
خلصانه ياروحي بيش اكويها
بتك تبجي يمه ابيش اسليها
ياعيوني شلون تغرب

حظنتها وضلت تبجي كعدت يمها ابجي وانحب
حرت شلون اواسيها وهيه بهالحال
رحاب... ولك يمه مافكرت بتك شلون راح تعيش يتمتها وهيه صغير

اجت زها ودانه كومنها ودخلنها جوا شوي واجو ولازاحد منهم شفته اجت سيرين تبلع بريكها وجها اصفر وعيونها بلكوا مفتحتهن
سيرين... ميس فدوه سنديني حوكع

ميس...  تعالي شنو هذا حالج

سيرين... اريد علاجي

ميس... تعالي وياي

سيرين... اخذتني لغرفه عمتي تمددت وايدي على كلبي متت وجع احس سجاجين وتنغز بيه
جابتلي ميس علاجي شربته شوي ارتاحيت
غمضت عيني ودموعي تجري اجت يمي غيد وجنوب وحده دلك برجلي وحده تفرك بصدري وتذب مي

جنوب... روحي صيحي احد لاتموت

سيرين... لا مابيه شي بس اريد ارتاح تعبت

غيد... وفففف منين نتلكاها علكيفج وي روحج شخذج وياهم

سيرين... شفتهم شلون دفنوه بحفره كلش صغيره ضخامته وطوله معقوله بهالحفره الي حجمها كلش صغير حينام كل عمره بيها

جنوب... هذا يومه بعد

سيرين... وصاني على بنته شفته شلون جان متحمس حتى ياخذ اليريدها جان هسه هوه لازم يحظر لمشيته

درت وجهي ودموعي تجري ماعرف منين اتلكى الصدمات
شهدت موت رباب,وموت انور
شلون اتخطاهم كل حياتي موكد الالم حتى اتحمل تعبت كلش
سيرين... تحملي ياروحي هذا نصيبج من الدنيا

ميس...
مر يومين للفاتحه واحنا حالتنا حاله اليوم الثالث ختاميه حظرنا كلشي والملايه موجوده
اجت رهف وملك يمي نطيتهن حلويات وراحن يلعبن اجتي سيرين
وجها شاحب ومابي اي لون

سيرين... خلصتي

ميس... اي انتي روحي ارتاحي

سيرين... عمتي وينها

ميس... برى كاعده

سيرين... عفتها ورحت شفتها كاعده بيدها السبحه وتبجي رحت يمها كعدت كدامها مارفعت عينها عليه

رحاب... انور

سيرين... مات

رحاب... كووومي مني ولج

سيرين... اتقبلي الواااقع مااات اااانور ماااات

رحاب... مييييعوفني وليدي هسه يردلي

خلت شيلتها على وجها وبجت شهكت بدموعي والملم بالكلام
سيرين... حااسه بوجعج انه هم فقدت ابني فقدته حتى قبل لاافرح بيه
انه هم فقدت اهلي حاسه بوجعج
تغربت,انذليت,انهانيت
كلهذا وانه ضليت قويه عشت الالم بكل مافيه
شهدت على موت شخصين عشت بتأنيب ضمير
وكسران
وتحملت ضليت قويه ومانكسرت
تخيلي ابني الي ماشفته ولادريت بيه فقدته قببببل لاااشوفهه
ااانه هم ااام وحاسههه بوجعجج بس تعااايشت
خلاااص اانتي هم فقدتي ابنجج
ضلللت بنته فكرري منو الها منو راح يدير باله عليها تيتمت وهيه لسه مافتحت عينهاا عالدنيا فكررري شلون حتعيش بدون ابوها

صرت ابجي وااعيط فقدت كلش تعبت من الكتمان والوجع ماريدها تضل عايشه وبوهم على رجوعه شمرت نفسها عليه تبجي وتنحب
رحاب... اااربااي رااح مني اول فرحتي اخذته الكبور ولجج ردت افرح بيه
شوووفي شلون فرحهه صارتلي بعدني ماشابعه من سوالفه من وجها ومن رويحته
يجيني ينام بحظني يكلي يمه خليني نايم بحظنج كل عمري وينننه خل يرد ينام بحظننني مووبحظن النجف
هسه شحاله وهوه بالظلمه اعرفنه يضوج ويتكدر من الظلمه والوحده هسه هوه بحده ماكو احد يمه خل يردليي وليدي روحي بيه شلون يعوف امه
يمااااااااه وليييييدي ااريدنننه احلفكم بكل عزيز ردولياه مااريدن شي

حجت اخر كلمه وانهارت حركتها ساكنه ماتحرك لايد ولارجل عطت باعلى صوتي حتى حسيت بلعومي انجرح
سيرين... اااالحكولي

على صوتي دخل رضوان وحيدري من برى ركض عليها يتفحصها
حيدري... يمه كبل يومين دفنت اخوي كومي لاشلعين كلبي

ركضت جوا جبت مي وجيت رشيت عليها ادلك بايدها وافرك بصدرها شوي استعادت وعيها
رضوان... خذت علاجها

سيرين... هيه متاكل شلون تاخذ علاجها

حيدري... خويه بس سويلي طريق خل افوتها

راح جنوب سوت طريق شالها واخذها لغرفه عمتي رحت جبتلها شي حتى تاكله بلكوا يالله قبلت تاكل لكمه علمود علاجها
اجت بت انور تبجي وتناشغ راحت شمرت نفسها على حيدري هوه حظنتها بقوه وبجى

ملك... اليد بابا

حيدري... خويه بتتتك راايدتك ردلها

اردفت بخيبه وكسران
رحاب... جده ابوج راح ومايرد نصيبج تعيشين بدون ام ولا اب فوك راسج ...

يـــــتـــبع ....

مصكوعات البارت نزلته قصير على استعجالكم وحتى يرضي فضولكم وهوه لسه بيه احداث لذلك سويته جزىين هالبارت

نقلتلكم جزء من المعاناه وكميه الألم والقهر  الي عاشوها ابطالي 💔.

واتمناا كلش اذا تحترموني تقللون من الفشار والمشاكل والدعاء الي جاي يتوجه عالشخصيات جد والله يأثر عالكاتبه وعالقصه وموبس عليه وعالابطال متتخيلون كميه الاحباط والمغثه اذا شفنا تعليق موحلو ويسم البدن اتمنى تكونون مقدرين مواقفهم والمعاناه الي عاشوها وانه بس داسردلكم الي عاشو وعانو منه وهاي حياتهم بس ...
بالاخير ( كلها أوقات وتكظي )

والي عنده سؤال استفسار ايشي يجي
ع النستا
حسابي الانستغرام :
taranim.hadi