رواية ذات العيون الناعسة الفصل الثالث وأربعون 43 - بقلم روان آل عبدالله

عطرك ياسيدي يعانقني ..
منذ متى كان للعطور صدورٌ وأذرعة ؟

الكاتبة روان عبدالله

علقوا بين الفقرات + نجمة

°°°°°°°°°°°°°°°°°°°°°°

اجاني صوت شاهين و هوا يسعل

شاهين. هاا سمسمه

مريم. اسم الله حبيبي شبيك طمني عنك رحتت للمستشفى

شاهين. اي بعد كليبي رحت

مريم. شبي كتفك

شاهين. مفتوح الجرح و رجعو خيطوه

مريم. يااا بيه ولا بيك بعد عمري

شاهين. اطلعي بره اني واكف يم باب الحوش

مريم. اوكي ثواني

سديت الخط منه كمت لبست حذائي

اباوع على ايديه يرجفن

رجفه ايدي ما تغيرت من اول مره التقيت بشاهين لحد هسه كل ما اسمع بطاريه الرجفه تحتل جسمي

طلعت بره و فتحت باب الحوش

كبل دخل جان لابس اسود و شفقه سوده و كمامه حتى عيونه ما يبينن

بتعدت شوي و وكفت بصفحه

سد الباب و سحبني بحضنه و ضمني لزكني على الحايط

لفيت ايدي على رقبته وهمست وانا ذايبه بحضنه

مريم. شبيك حبيبي شصاير

حجه بصوت مهزوز

شاهين. ضميني بحضنچ سمسمتي

خفت كلش تشبثت بي و هوا خله راسه بصدري و كعد يتنفس حيل

كمت امسح على فكه بحنيه

ما حجيت لو كلمه خليته على راحته

جان متمسك بيه حيل لدرجه صرت احس برجفته الي محتله سائر جسمه

شالني و كعد بل حديقه و كعدني بحضنه

مسحت على وجهه و همست وانا اباوع على عيونه شكد تعبانه

مريم. حبيبي شبيك يروح سمسمه ليش شايل كل هل تعب... تذكر انا موجودة و دوم يمك.... ذب تعبك عليه فرغ حزنك و طاقتك السلبيه بيه احجي الي كلشي متعب عيونك و ارتاح لتضل شايل هل حزن بداخلك

شاهين. ما اكدر احجي كل التفاصيل بس لازم نتزوج و اخذج للانبار بأسرع وقت ممكن

مريم. امم ماشي بس ليش احس اكو سبب جبير وره هذا الاستعجال

حاوط وجهي بايدينه و باسني بشفتي بخفه

شاهين. بعدين اشرح الج كل شي مو مهم هسه كل الي يهمني تكونين بخير و نتزوج بأقرب وقت

مريم. انا بخير حبيبي لتخاف... اوكي نتزوج الي تريده يصير بس لا تتوتر و تتعب

دنك و كام يحرك خشمه على سأر وجهي

غمضت عيوني وانا ذايبه من قربه و انفاسه الي تجوي خدي الترف

همس و هوا يحرك شفته فوك شفتي

شاهين. خلي نروح للشقه مريمي

فزينه ثنينه على صوت صياح من ورانه

كمت من حضن شاهين بخوف و توتر

شاهين كبل طفر و خلاني ورا و رفع المسدس

تفاجأت من وين طلع المسدس كل الي اعرفه مجان اكو بأيده مسدس من اجه

متمسكه بتيشيرت شاهين بكل قوتي و خاله راسي على ضهره و ابجي بصوت

من بين صوت بجيي سمعت صوت خالي يصيح

ابو راما. ايااا ملاعين الوجه شتسوون بنص الليل

شاهين. جاي انكي تمن شوفت عينك عمي

ابو راما. شنو حضرتك تستهزء بيه ولك

شاهين. حشاك عمي مو قصدي

ابو راما. شجنتو تسوون بنص هل ليل

شاهين. رجال و مرته يعني شيسوون بل ليل

ابو راما. لسه ما صارت مرتك و دير بالكم تعيدوها بعد و انت بعد دير بالك تخطي خطوه وحدة على بيتي... الى ما تصير مرتك جدام الناس أهلاً وسهلاً بيك... بس بتوالي اليل واحد حاضن الاخر هاذي ما تصرف عندي بناتنا مو هيج تربيتهن و هسه بلا مطرود تفضل اطلع بره... و انت مريم اطلعي من ضهره يله

طلعت وانا مدنكه راسي و ميته خجل

اجيت يمه ردت اعتذر بس صد عني و راح فتح الباب لشاهين

شاهين خله المسدس بخاصرته و طلع

ركضت لغرفتي صعدت و انا الطم من الفشله الي خليت روحي بيها

بقيت كل الليل اتكلب من الفشله و كل ما اتذكرها اخلي ايدي على و جهي و اكوم اصيح بصوت ناصي

ستسلمت و نمت مر اليوم عادي بين الدرس و الشغل

وصيت من بيج على عنايه للجسم بكج كامل

كلت استخدمه و اجربه اذا فادني لو لا

كالت بعد ثلاث ايام هوا يمج

خلصت هاي الايام كلها اروح للمدرسه و ارجع و شاهين ما يقبل اروح بوحدي

اشترك الي يم ابو خط و صرت اروح و اجي معاه

طلعت من المدرسه انا و صديقاتي الي معاي بل خط

جنه نتناقش بل اسئله و كل وحدة مخترعه جواب من عقلها

اخر شي طلع حلي صح باوعت عليهن بتفاخر و حجيت

مريم. شوفن هاي تاليت الخصوصي

سميه. وين درستي الله عليج

مريم. درست بدون لا خصوصي و لا شي

سميه. جذابه يعني بوحدج

مريم. لاا خطيبي درسني

سميه. اللهه مخطوبه اشووو ما كلتي هوا انه اكول كل هل جمال و لحد هسه محد صادج

مريم. شنو محد صادني شايفتني بومه

سميه. حشاج حبي... خطيبج مدرس لو شنو

مريم. لا مو مدرس

سميه. جا شنو

مريم. معليج حبيبتي

نطت ماريا و وكفت بل نص صاحت

ماريا. عوفنا من خطيب مريم الصعلوك شوفن هذا الضابط اليچتل چتل شلون واكف و يباوع علينا

رفعت راسي من الفيزياء و سديتها باوعت عليها و حجيت بشك

مريم. وينه

ماريا. هذاك على الجهه اليمين

انداريت و لكيت شاهين لابس ملابس الدوام و خال ضهره على سيارته و مكتف ايدينه و يباوع عليه

همست بفهاوه و غيره

مريم. شجابه

ماريا و سميه. تعرفييي

رديت عليهن و انا عيوني معلكه على شاهين

مريم. اممم هذا الصعلوك الي جنتن تحجن عنه

ماريا. عزهههه خطيبج

مريم. ايي و هسه المطلوب عيني

ماريا. رقمه

مريم. دولي عيوني خلي اروح اشوف حبيبي صكري

ماريا. الله انوب اسمه صكر اسم على مسمى

مريم. عيدي كلامج و شوفي شراح اسوي بيج

ماريا. اتشاقه وعلي

مريم. اوكي.... مع السلامة كولن لابو الخط مريم ما راح ترجع اليوم معاك

عدلت جنطتي و رحت علي من شافني اجيت عليه كبل تقدم و مسك ايدي و ضمها

همست بحب

مريم. شلونك عمري

شاهين. زين بشوفتج يا بعد روح صكر و عافيته

مريم. شجابك هناا

شاهين. هيج استقبالج يول

مريم. لعد شنو والله ما يصير صديقاتي كلهن يتغزل بيك

دنكت و همست بصوت كوه ينسمع

مريم. انااا اغار

بتسم و مسح على شواربه و جر ايدي و صعدنا بل سياره

نزعت جنطتي و حجيت بملل

مريم. شكلك جاي من الدوام

شاهين. اي ما مريت على البيت

مريم. ليش عمري مو الطريق تعب

شاهين. من اشوفج يروح كل التعب الي بيه

بتسمت بخجل و دنكت سمعت ضحكته عاليه

رفعت راسي و خزرته حجيت بضوجه

مريم. لا تضحك

شاهين. يول اروح فدوه

مريم. اممم

شاهين. يمته تسوين الحنه

مريم. كلشي جاهز بكيفك انت

شاهين. هاي حنتج بكيفج انتِ

مريم. امم بعد باجر... باجر اروح احجز صالون و بعده تصير الحنه بل ليل

شاهين. وراها الزواج كبل

مريم. لاا اتعب خلي يوم على الاقل ارتاح و وراها نتزوج

شاهين. خوش حبيبي يعني هسه الثلاثاء الحنه و الخميس العرس

مريم. ماشي

شاهين. بعد لا تداومين راح اخذ نقلج للانبار و وره العرس تداومين

مريم. ماشي بس كول الابو الخط

شاهين. ماشي

سحب ايدي و باسها و همس بضحكه و هوا يلبس نضارته

شاهين. تصدكين ما مصدك راح نتزوج

مريم. ولا انا اصلى متوتره

شاهين. من شنو

مريم. من كل شي والله

شاهين. ميخالف هاي طبيعي الحاله

وكف السياره يم الباب

باوعت عليه و انا البس جنطتي

مريم. انزل اتغده يمنه

شاهين. توو هسه خالج يجيني بل تفك

مريم. صدك جذب اول مره اشوف صكر خايف من شخص

شاهين. مو خوف بس كرامتي ما تسمحلي عجل هوا طردني شلون ارجع ادخل للبيت.... الخميس اخذج و افلت و بعد اني مو ابن امي اذا ادخل هذا البيت بعد

مريم. يااا حبيبي لهل درجه... تراا هوا بمقام والدي و شي اكيد اي اب يخاف على بنته و يكون حريص عليها

شاهين. ادري بس هاي هيه

مريم. براحتك حب

دخل ايده بجيبه و طلع كندر

مريم. يااا مايعه من الحر

شاهين. مثل خدودج هههه

مريم. يااا صكرري

كربني عليه و عض خدودي بقوه

زول مني و هوا يبتسم صاح

شاهين. شنو هل فراولة الطيبه يول

مريم. موووو هيج خدودي راحن

شاهين. من تجين يمي ارجع اكبرهن

مريم. شايل همهن خايفه لا تعضهن هواي و انوب اصير اخاف منك

شاهين. من تجين يصير اهتمامي غير شي خدودج يصيرن مجرد تحليه هههه

مريم. شايفني كدامك كيكه يعيني

شاهين. احلى كيكه و علي هههه

مريم. مع السلامة حروح خلي الكيكه تفيدك و هاك هاي الكندر مالتك ما اريدها

شاهين. افاا تعالي يول هاي الج اني ما اكل اصطناعي كله طبيعي هههه

مريم. شنو يعني

شاهين. هسه اعلمج

بعد الكرسي و بحركه سريعه جرني و باسني من شفتي بقوه

بعد عني و هوا يمسح بخدي بابهامه و يبتسم حجه

شاهين. هذا العسل الطبيعي الي راح اكله يوميه هههه

حجيت بفهاوه و انا كوه افتح عيوني

مريم. مستحيل صكر اخليك تعيدها

شاهين. اسوي الاكبر من هذا كبدبد

مريم. بطلت ما اتزوج.... ترا اخاف

شاهين. اتشاقه يمعوده و سحبت كلامي حرف حرف.... نبقه على الفراولة شعدنا

مريم. زول عني منتف

شاهين. مريمم

مريم. زول عفيه خلي اروح

مسكني من وجهي و عصره حيل

شاهين. كولي اسف و بعد ما اكول منتف

مريم. اسفه يل منتف

شاهين. كولي اسف شاهين تاج راسي

مريم. اسفه المنتف تاج راسي

شاهين بصياح. عوفييي كلمه منتففف يمته تجوزين منهاا

مريم. هههههههه

باوعت على ملامح وجهه ارتخت من ضحكت

شاهين بابتسامة. اي عفيه هيج اريدج من الاول تضحكين ليش تشلعين كليبي الي يحبج

كربت عليه و همست بفحيح

مريم. تستاهل

شاهين. تعالي عجل هم انتِ تستاهلين

مريم. والله جنت اريد اكول تستاهل العافيه يل طيب والله

شاهين. ههههه جبانه

مريم. اصلا هاي شهاده اعتز بيها

شاهين. انطيني حبه يل جبانه

مريم. ماااا يل منتف

شاهين. اني الج يل مصكوعه

مريم. رجعني لمكاني لو سمحت

رجعت لمكاني و مديت ايدي بجيبه طلعت كندر و فتحتها خليت وحده بحلكي و صحت

مريم. مع السلامة صكري بوسات و اشواق الك صكوري

شاهين. بعد كلبي سمسمه اني الاشوق والله كربي بوسيني

مريم. موو حلكي وصخ متروس ككو

شاهين. قابل بويه

كربت بسته بخده تا ازول عنه جرني و باسني بشفتي

زول عني و صاح

شاهين. شهل ضيم

بتعدت عنه و حسيت ككو نزل من حلكي خليت راسي على الكرسي بفهاوه و حجيت بهمس

مريم. مو كلت لا تعيدها

كرب ايده و مسح الككو باصبعه الابهام و خلاه بحلكه

شاهين. جنت اتشاقه معاج

مريم. تحجي صدك هيه مال شقه.... الله لا ينطيك رجليه بادن معد احس بيهن

شاهين. لهل درجه حبتي الها مفعول

مريم. اي مو هوا علاج حبتك.... اصلا انا ترفه ما اتحمل كبل اذوب و اوكع بل كاع

شاهين. ولعباس صح

مريم. زول عني شدعي عليك شاهينوو خلي انزل

شاهين. ادعي الله يزوجني اربعه

مريم. هههه تتذكر ايام الشقه

شاهين. من كلتي السالفه كبل تذكرت ايام الشقه ههه الله احلى ايام

مريم. بل نسبه الك شاهينووو... يله مع السلامه اخر مره اكولها

نزلت و سحبت جنطتي لبستها و صحت

مريم. انطيني كندر بعد بداعت امك

شاهين. خلصن ههه

مريم. صدك تحجي امانه كول تمثيل ههه

شاهين. ربي صبرني شكد تتأثرين بهل سوالف

مريم. شعليك حبيبي انطيني كندر و توكل

شاهين. تعالي انتِ اخذي بل جيب الاخر

مريم. لااا والله سيد شاهينووو تحسب ما اعرف سوالفك

شاهين. اي و شنو هنه سوالفي

مريم. معليك كبدي.... حروح لا ردت هل كندر كون

شاهين. تعالي يمعوده جبت الج كرتون كامل

مريم. اوييي لطيف كلشش انت ونبي ماكو مثلك

طلع الكرتون من الجكمجه و رفعه باتجاهي

ركضت اخذته و شمرت اله بوسه و صحت

مريم. بوسه عطوانيه لاحلى شاهينوو بل دنيه كلها.... حبيبي والله

خله ايده على جبهته و كام يستغفر

ضحكت و دخلت جوه

لكيتهم هتو صابين الغده كبل سلمت و كعدت

راما. طززز بامتحان الفيزياء اهم شي واحد يونس روحه

مريم. شلون عرفتي كلت هيج بداخلي

راما. انه حافظك يا كميل

مريم. هااا حولتي على المصريين

راما. لااا الهنود الاصل و الفصل

تغديت و رحت نمت كعدت العصر لبست عبايه اسلاميه و طلعنا للسوك

حجزت صالون يكولون حلو مكياجه و افتريت بل سوك اشترينه عصير و رجعنا

اجه يوم الحنه كعدت الصبح و كله ماسكات و عنايه بل بشره قبل المكياج

خلصت عنايه و نزلت جوه صبيت غده

ضحى. من يمته العروس تشتهي

مريم. شنوو خالتو تردين اموت جوع

ضحى. هههه با عافيه عمري... شوفي هاذي المسودنه

رفعت راسي و انا بحلكي اللكمه شفت راما رافعه راس البصل و تركص سلو و دندن بنغمه بهمس

من شفت شكلها شلون مندمجه كبل غصيت بل لكمه و ختنكت

خالتي اجته عليه وجهها احمر كد ما كاتمه ضحكتها و كامت تضرب على ضهري

باوعت بعيونها و طكيناها ضحكه عاليه

راما كبل فزت و كامت تباوع علينه بتعجب

هديت بعد نوبه ضحك مفرطه و صحت

مريم. الله لا يوفقج شسويتي بيه

راما. شسويت

مريم. شجنتي تسوين قبل شوي

راما. جنت اركص مع النهدي

مريم. ياا هندي ههه

راما. هذا راس البصل بابا يكول مستورد من الهند

ضحى. يضحك عليج هههه تا يشوفج شتسوين

مريم. يمه احس كلبي راح يوكف كد ما ضحكت

راما. يمعوده اسم الله شيفكنا من شاهين
.......

صارت الساعه ثنتين و نص اخذت فستاني و كلشي احتاجه اجن معاي البنات و خالو وصلنا

البنات كل الطريق يركصن و يغنن مع الاغنيه

وانا ضامه نفسي و صافنه على الشباك

و الرجفه ما فكتني عبالك اليوم عرسي

دخلنا للصالون و اجه دوري و تحضرنا انا و البنات

اختاريت مكياج مناسب لشكلي شوفتها الصوره و فعلا سوت مثله طبق الاصل

كلش فرحت بشكلي و مكياج كلش نظيف و مرتب

باوعت عليه ام الصالون و حجت بتعجب

ام الصالون. رغم شكد صارلي اسوي مكياج بس ولا مره ضبط هيج فا هسه اكتشفت السر جمال المكياج هوا صفاء البشره... ما شاء الله هنيال خطيبج على هل جمال الي شايلته

مريم. اويي فدوه لكلبج... زين عمري بعد باجر عرسي عادي هم اجي عليج تحظريني

ام الصالون. اي عادي حبيبتي... تقبلين اكص الج صور و انشرهم على الصفحه الرسميه و اسوي الج خصم بل اسعار

مريم. لااا اسفه ما اقبل و كذالك زوجي ما يقبل

ام الصالون. زوجج مبين غيور من وين

مريم. اي والله كلش يغار هوا من الانبار

ام الصالون. اممم وين ملتقين

مريم. بل موصل هوا ضابط فا شافني بوكت التحرير

ام الصالون. شلون قصه حب انه متأكده اذا كتبتيها راح يحبوها الناس

مريم. ههه اي ليش لا اكتبها بس معرف وين

ام الصالون. ربي يحفظكم حبيبتي والف مبارك زواج الدهر

مريم. بعد عمري ربي يبارك بعمرج يروحي

طلعنا من الصالون و البنات يحجن عليه شكد تجاملين و معرف شنو

و انا فعلا ما جنت اجامل بل عكس جان كلامها كلش حلو

شفت سياره سوده واكفه يم الصالون

مريم. بنات هاي سياره شاهين

راما. دمشي خلي نصعد اريد اشوفه

مريم. اوكفي يجوز مو هوا

راما. اتفضل استاذ حسين... اكو وحده ما تعرف سياره زواجها

مريم. ههه اي اناا ما اعرف سيارته اذا هوا كل جيه جايني بسياره شكل

راما. طاك خرب يومه

مريم. امم طاك من القهر و الضيم حبيبتي... دمشي هذاك واكف

رحنه اتجاهه حس علينا كبل رفع راسه

من شافني كبل اجه عليه و عدل عبايتي و حجابي و دخل شعري

شاهين بهمس. ليش شعرج طالع نصه و عبايتج مفتوحه

مريم. اسفه عمري

شاهين. سهله نتفاهم بعدين

سكتت و كوه هديت نفسي ضجت عبالي تا يبوسني لو يحضني اشو هذا فشلني

وصلنا للبيت و انا كل الطريق مطنكره نزلت و سديت الباب بقوه

دخلت جوه لكيت الاجواء تخبل جايين اهل شاهين و اقاربه و اقارب خالتي و هويه ما اسمع الي يحجي معاي من صوت الاغاني

صعدت فوك ركض و نزعت العبايه و الحجاب رتبت فستاني و شعري

جان الفستان لون اسود قصير بي نفشه بسيطه و بدون اردانات و لبست عليه كعب اسود فخم عالي و سويت شعري كيرلي بس من جوه مو كله لبست طوق كرستال فضي و عقد فضي و مكياج اسود و فضي بس الحمره حمره

الاسود برز لون عيوني و جسمي بشكل مو طبيعي

اتصلت على شاهين كبل جاوب حجيت بدون ما اسمع اله

مريم. تعال اصعد للغرفه مالتي خلي ننزل سوه فدوه

شاهين. ماشي

كعدت على الجربايه و كمت افرك بايديني بتوتر

ثواني انفتح الباب و دخل شاهين

كبل وكفت و باوعت عليه

جان لابس زي عربي و بشت

ضليت صافنه على جمال شكله اول مره اشوفه بهيج لبس

تقدم و سحب ايدي و باسها كربني عليه و خله ايده على خصري دنك على رقبتي و باسها بخفه

شواربه دغدغتني كبل غمض عيوني بنفر

حسيت بهوا حار لفح خدي فتحت عيوني ببطئ

شاهين. شهل جمال شخليتي للعرس يول.... ما راح اخليج تنزلين اخاف يطكنج بعين الحيايه مالتنه و انتِ ترفه ما تتحملين

مريم. يااا شنو من حيايه

شاهين. من تجين راح اعرفج على وحده وحده

مريم. يعني انتو مربين ثعابين بل بيت

شاهين. ههههه ايي من كبل لا اجيت على الدنيا هنه منورات البيت كوبرا هرمات هههه

مريم. ويعع شلون عايشين معاهن

شاهين. الله موجود يحمينا

مريم. ما تخاف عليه شلون تخليني اعيش معاهن

شاهين. وعلي شايل همج

مريم. خوفتني شاهين

شاهين. هههه جاعد اتشاقه يول

مريم. يااا هذا شقه الي يشوفك تحجي بجديه ولا جن شقه.... بس ضحكتك حلوه حبيبي كلش

شاهين. من الله حلوو لا لبخ ولا شي شوفي غسلت وجهي بصابونه ام الالف و اجيت ههه.

مريم. ياا ههههه..... خلي ننزل صكري

مسكت ايد صكر و نزلنا من الدرج كلها سكتت بس صوت الاغنيه عالي كلش

وصلنا اخر بايه و تلكنه اقارب صكر يهلهلن

اباوع عليهن من يهلهن فوك العشر دقايق ولا يتعبن هذا لو انا كبل يغمى عليه

كعدنا على الكوشه و شاهين كضاها مطنكر و خال ايده بضهري كل شوي يكرصني و انا افز

بدن مراسيم الحنه و اجو تا يخلون النا حنه

شاهين ما قبل يخلي على ايده كبل طلع

خلت على ايدي حنه و ورده حمره

اخذت الحنه من عمه شاهين و كعدت اخلي للبنات

خلصنا و كمنه نركص و انصور

ساعتين متواصله نركص و انغني

رغم العيون اقارب شاهين الي تريد تفترسني كد ما يخزرن

كل ما اباوع عليهن اتوتر لا إرادياً

خلصت الحفله و النسوان كعدو يتعشن

طلعت بل مرر و مسكت موبايلي و اتصلت على شاهين

مريم. هلا صكري

شاهين. هااا يا بعد روح صكر.. يروحلج فدوه فهد ابو سنون مطعوجه و يروحلج فدوه علي النونه

مريم. يااا ليش هيج عليهم خطيه الظاهر فهد يمك

شاهين. ايي

مريم. كوله مريم تكول حصتك من كيك الحفله مضمومه يمته ما تريد تعال اخذها

سمعت صوت فهد يصيح

فهد. لككك عاشت منقذتي المحتحته من يوم يومج تضمين الي بهل كيك من ايام السجن و لحد هسه

مريم.. هههه يدلل فهد

شاهين. كافي عاد ما تذكرتي زوجج

مريم. ميحتاج اتذكرك انتِ دوم بالي

شاهين. اي

مريم. تعال خلي اشوفك قبل لا ترجع

شاهين. ماشي

سديت الخط منه انداريت تا اصعد للغرفه

استوقفني منظر امه و مرت اخوه

خفت من شكلهن و حجيت بتوتر

مريم. هلا عمه شلونج ردت اسلم عليج بس ما شفتج داخل

مزنه. اممم هلا... انتِ مريم الي خابصنا بيها مريم

بتسمت مجامله و كمت العب باصابيعي

مزنه. شكد عمرج

مريم. 19 سنه

مزنه. جنتي تخابرين فهد صديق شاهين

مريم. لا يا فهد جنت اخابر شاهين و جان فهد يمه

مزنه. اي و من وين تعرفين فهد

مريم. اعرفه بس صديق شاهين المقرب لا أكثر ولا أقل

مزنه. اي زين عبالي تخونين ابني

مريم. هه شهل حجي انا شاهين بعيني مستحيل اباوع على احد غيره و لو حتى ما مرتبطه بشاهين هم مستحيل اخلي عيني على رجال... مو هيج ترباتي انزل نفسي لرجل.... عن اذنج حروح اصعد لغرفتي ثواني و انزل

تا اعبر من يمها مسكتني من ذراعي و دفعتني صرت مقابيلها

حجيت و هيه تبتسم

مزنه. يكولن ما عندج اهل ههه رابيه بل شوارع و ابني جاي و طلعج من الزباله الي جنتي بيها

غمضت عيوني امنع روحي ابجي كورت ايدي الي ترجف و همست بصوت مهزوز

مريم. شهل حجي هوا صح انا ما عندي اهل بس عندي خاله عوضتني عن اهلي و ربتني احسن تربيه و ما خلتي اعتاز احد لا ابنج ولا غيره

تركتها و صعدت الدرج و انا اسمع ضحكهن جوه

احس دمي احترك ما كدرت اسيطر على دمعتي خانتني و نزلت

كلمه ما عندج اهل احسها فتحت كل جروحي القديمه

تذكرت امي و اخوي و ابوي الي ما شفته
امي لو ما المرض جان هسه هيه واكفه يمي بحنتي هيه الي تحنيني بس دائماً الدنيا تمشي عكس ما نريد

اتصل عليه شاهين عده مرات فصلته و دزيتله رساله و انطيته علم انا بغرفتي

ثواني و انفتح الباب و دخل شاهين و بيده البشت و لابس دشداشه بيضه و عكال و شماغ و خالة حزام اسود و بداخله مسدس

اجه كعد يمي و باوع عليه باستغراب

شاهين. ليش جاي تبجين شكو

مريم. ماكو شي مجرد هيج

شاهين. هوا شنو الهيج يول.... اخاف الحيايه سمعنج شي

مريم. لا ابد خطيه كلش حبابات بس انا شتاقيت لامي... خلص انسه

رفعني و خلاني بحضنه مسح دموعي الي على خدي

شاهين. ليش هل دموع يا عيني

مريم. مو بكيفي والله... ما جنت اريدك تشوفني بهيج حاله بس بعد صارت

شاهين. اذا ما اشاركج حزنج عجل منو يشاركج.... احجي الي شبيج

مريم. موو حجيت ياا... و اصلا هاي هيه سكتت من شميت عطرك انسدت مو بس نفسي حتى مجاري دموعي

شاهين. راح احاول اصدك بجيتي بسبب هذا الشي... هسه كولي الي ليش هل رجفه

مريم. مدري حتى رجليه بادن... قربك يخليني ارتجف

رفع ايديني و حاوطهن بايده

كام يبوس بيهن رفعت راسي من صدره و بسته من عضمه فكه

دنك عليه و باسني من شفتي بخفه و نزل على رقبتي

همست و انا ازول راسه من رقبتي

مريم. كافي صكر

شاهين. نعله عله نونه علي

مريم. هههه يله حب

كومني و اتجه للكنتور طلع قطعه كندر من جيب الدشداشه و خلاها على الرف

طلع الي تراك شتوي يعرفني احب البس هيج بل ليل

خلاه يمي و راح طلع كلينس مبلل

و كعد مقابيلي و كام يمسح بل مكياج مالتي بخفه

ايد رافع وجهي بيها و ايد تمسح مكياجي

وانا صافنه عليه شلون مركز كل قوته و هوا يمسح بكل حنيه

خلص المكياج و شال التراك من كل عقله جان يريد يبدل الي بس انا رفضت رفض قاطع و طلعت للحمام يصير مقابيل غرفتي

بدلت و غسلت و جهي عدلت شعري و نزعت الطوق و الاكسوريز و دخلت الغرفه

لكيته صافن على الكاع من شافني كبل رفع راسه

كام و اجه عليه خله ايده على خده و كام يمسح بابهامه على خدي

شاهين. شلون صرتي شيهانتي

مريم. تمام اصلا ما بيه شي ابد

شاهين. اي عفيه سمسمه.... يله خلي ننزل جوه

مريم. راح تبقه بل ناصريه

شاهين. لا اروح مع اهلي باجر الحنه عدنا بس مو مثل مالتكم انتو البنات

مريم. شلون لعد

شاهين. عود اصور الج

نزلنا جوه و كلها تباوع علينا و تهمس

شاهين. بدت الإشاعات

مريم. شنو من اشاعات كبد

شاهين. اسئلي خالتج كولي الها اول ما نزلنا بشنو فكرتي

مريم. ماشي

راحو و انا تا اصعد و مسكتني خالتي

ضحى. شلون غيرتي ملابسج يمه

مريم. بل حمام الي يم غرفتي والله و اذا مو مصدكه روحي شوفي الاكسوريز بقن بل حمام

ضحى. لا مصدكتج شبيج

ترخص و رحت صعدت صليت نمت

مره اليوم عادي بين التوتر و الخوف و نصائح خالتي و راما كل ما تشوفني تضل تنصح بيها و المشكله نصائحها كلهن غلط و من المسلسلات الهنديه

اجه الليل و انا ضليت اتكلب ما اجاني نوم

بعث الي شاهين الفيديو بل عشره بل ليل كاتب عليه هيج الحنه عدنا

دخلت على الفيديو جانو زلم يدبجون جوبي كلهم لابسين ابيض و واحد واكف بل نص و يغني ما فهمت شنو يغني

نص الفيديو و يوكف فهد و علي يم المطرب و فهد يطلع سلاحه من حزام الدشداشه و يكوم يضرب طلق بل جو عشوائي و علي شايل سفطه فلوس و طشرها فوك المطرب

ايدي على كلبي و خايفه لا تجي من هذني الطلقات براس واحد و المشكلة محد خايف بس انا

و گلبي على الفلوس الي طشرت بل كاع

خلص الفيديو و بعثت اله رساله

~ حبيبي ديرر بالك من الطلق العشوائي و لا تخلي فهد بعد يضرب لا يصير شي لا سامح الله

انتظرت نص ساعه ما رد

استسلمت للنوم و نمت بعمق

كعدت على اثر كابوس صوت شاهين و هوا يصيح باسمي

فزيت و كمت و عيني صارت تتلفت بكل أرجاء الغرفه بس خاب ضني و ما لكيته

ادركت هذا حلم

سحبت موبايلي من جوه المخده و فتحت المحادثه مجان شايف الرساله

اتصلت عليه اكثر من مره ما رد عليه

خفت كلش مو من عوايده هيج يتأخر لو ما يرد

اتصلت على خطه و طلع الي مغلق

كمت الوب بل غرفه و افكر شسوي

دموعي ينزلن بغزاره و كمت افرك بايدي بتوتر و ماسكه الموبايل و اباوع عليه و أدعي كون ماكو شي

اجه على بالي فهد

رحت ركض و كعدت على الجربايه

و دخلت على حسابه الي بل انستا كبل اتصلت عليه

مره و ما رد اتصلت فوك الاربعه مرات يالله رد

اجاني صوته مبحوح و صوته مبين تعبان

فهد......

~~~~~~~~~~~~~~~~~~~~~
عمري خلو نجمة و تفاعلوا بين الفقرات

توقعكم للبارت الجاي

بعد بارتين و نختم بإذن الله

الكاتبة روان عبدالله