ظلمات الغيهب الفصل الثالث وستون 63 - بقلم اساور حسين

<ظلمات الغيهب >
حلقة _ 10 _ الجزء الثاني ..
بقلمي : اساور حسين .

أنـت دنيّتي الصغيَرة المليِانة أمـّان ♥️.

ملكات قلبي لطفًا لا تنسون التصويت ؏ بارتات
التعليق بين الفقرات روح روحـي إنتوا +
......................><><><><><.....................
زهراء..

راح ؏ مجر سحب المسدس ثبته بالبنطلون وهو يصيح
الغيهب: اششششش تعبتوني اششششش .

ركضت ؏ باب وگفت اريد أمنعه يطلع لزم ايدي سحبني
بقوة صرخت من الوجع ورجعت المكاني
_ اسمععععع بس اسمعععع .

الغيهب: موو راح اضرب لاااااا توكفين بوجهي من اني عصبي
روحـي من وجهي رووووحي لج بابا هسة من اضربج تصيحين
ضربني .

زهراء: غيهب اذا صار شي بـ ابوك بعمرك ماراح تسامح نفسك
وبعمرك ماتگدر تتعالج من احساس تأنيب الضمير .

الغيهب: واعووفهم هيج يهجمون بحياتي .

زهراء: شعليك بيهم منو هاجم حياتك كلهم مايگدرون
نبدي صفحة جديدة اني وياك واطفالنا بعيد عنهم كلهم
حتى اذا تريد نسافر نعيش برا نروح والله بس لا تغلط هل غلط .

الغيهب: ليش مايخافون عليَّ مايگولون تعب والله تعبت .

زهراء: يفكرون والله يخافون عليك ويحبوك بس ابوكم
بين عيونهم انتَ مو تدري بي صحته مو تمام ويمكن
هسة كثر المرض عليَّ .

عافني وصار يمشي ايده ؏ راسه يفكر
رجع التفت بتجاهي وصاح : غلط عليچ موو ؟

زهراء: هسة اترك هل مواضيع دخيلك واگعد ارتاح
مو راح تمووت ومحد يخسر غيرك .

الغيهب: اتمنى امووووت اتمنى وروح امي ياريت اموت واخلص .

كلماته سجين ونبتت بكلبي ما حجيت عجزت انطق
بس دموعي شرحت حالتي للحظات ثگل الساني
واحس الغصه صارت بلعومي تجرح بيَّ
الغيهب: زهراء افتحي الباب اختنگت اريد إطلع افتحي .

زهراء: انتَ تنصحني بس بعمرك ما طبقت نصائحك ؏ نفسك
البارحة شگلت تتذكر مو گلت قبل لا تفكرين تغلطين بحقي
ونفترق اگعدي انتِ والنور والزينة ..

الغيهب: زهراء روحـي من وجهي گلت كافييي .

زهراء: روح اگعد وياهم وفكر يستاهلون ابوهم
يتمنى المووووت ويعوفهم يتامى ، لو يستاهلون
ابوهم يشيل اسلاحه ومتأكدة بس تطلع تغلط اكبر
غلط ممكن ترتكبه راح تخسر كلشي واطفالك يخسرون ابوهم .

فتح النور الباب ظل الغيهب يباوع بوجهه
النور : شكو ماما ليش تبچين ؟

اجه بتجاهي حضني نزلت حضنته لزم وجهي
يمسح بدموعي : بابا انتَ بچيت ماما .

بلع ريگ وبس يباوع بوجهم مايحجي ابد مايحچي
طلعت زينة خايفة من أصواتنا واني اعرفه كُلشي
ولا الجهال يخافون وهو مركز بزينة
همست بتوسل : اخذ من وقتك ربع ساعة بس واگعد وياهم
وفكر الموضوع يسوى تخرب حياتنا بيدك كلهم مايگدرون
يخربوها احنا بس احنا نگدر .

النور مفتهم شي بس هو حاضني يباوع ؏ ابو
ينتظر الموافقة مشى الغيهب للمجر طلع المسدس
رجعه نفس المكان وراح شال زينة ودخل للغرفة
هو دخل واني همست بـ اذن النور : روح يمهم امي ودير بالك
؏ بابا مريض دقيقة واجي وراكم .

ركض للغرفة رجعت للمطبخ جسمي من الخوف يرجف
صار سعفه ينفض نفض قويت نفسي وكملت الآكل ؏
سريع لان ؏ هل ضغط اذا ابدي ابچي بالساعة ما أسكت
آخذت الأكل ودخلت للغرفة هو گعد ياخذ شهيق وزفير
حتى يستقر النبض صار يحرك بجسمه يمنى ويسرى
زهراء: تشنج ؟

هز رأسه بتأكيد ابتسم بوجه النور لان صافن قلقان
حتى أكل ما گدر ياكل هو شوية وراح للصالة وكلتهم
واخذت الصينية غسلت كلشي آول ماطلعت همس
بألم : جهزوا نفسكم ارجعكم .

زهراء: ليش ترجعنا هو ابوية بليل يجي وهنا نتفق .

الغيهب: زهراء سوي مثل ما اگول جهزوا نفسكم.

زهراء: اذا انتَ مصمم ؏ غلط براحتك اني ما اگدر امنعك .

عدل جسمه عبالك متشنج وصاح بغضب : ياا غلط لج
زهراء اني جاي اموت .

زهراء: ؏ شنو تحرك بگلبك منو يستاهل .

الغيهب: اخواني هذولي اهلي مابيهم شريف كلهم يغدرون ليش .

بقيت صافنه بوجهه عافني وطلع بدلت للجهال ؏ سريع
ولملمت الشقة وطلعنا من شافنا ذب الجكارة واجه بتجاهي
قفل الشقة وتلفونه دگ حاول بالمصعد تأخر ترك المصعد
ونزل قبلنا لزمت الجهال ونزلت وراه رد ؏ التلفون وهو
رفع ايده يتلمس برقبته ويرفع راسه ليفوگ ، صرت
بعيده عنه هو بنهاية الدرج واني بالوسط لان الجهال بنزلون بطيء
اريد اشيل زينة حتى أنزل اسرع فزيت ؏ صوت درت وجهي
وياريت متت قبل لا اشوف هل يوم ، وگع التلفون من ايده
وهو يحچي انحنى وهو لازم گلبه وبس صوت الشهگه
يريد يجر النفس عفت ايد الجهال اريد أنزله بس ما لحگت
وگع الغيهب وگع من سابع درجة من الدرج للأرض
؏ وجهه ركضت اريد بس أوصل صار بعيد حيل بعيد
ما اعرف شلون صارت عندي القوة عدلته طبطبت بهستريا
؏ وجهه واني اصرخ بعالي صوتي : غيهب گوووووم غيهب
تسمعني افتح عيونك افتحهاااااا ..

؏ صراخي طلعوا الناس العايشين بالشقق
خليت ايدي ؏ رگبته بمكان النبض ماكو نبض ماكو
ما احس بنبض صرت ادگ ؏ راسي سحبتني وحده من البنات
واجه رجل كبير بالعمر قاس النبض وصار بكل سرعته
يضغط ؏ گلبه وهو يصيح : اتصلوا على إسعاف بسرعة .

_ خلونا ننقله بالسيارة.

جاوبه وهو مستمر يضغط ؏ گلبه : مايصير يتحرك اذا مو إسعاف .
تعب الرجال گعد يمسح بعرق راسه نهضت ؏ حيلي
وطبقت كُل الإسعافات اللازمة الإنعاش القلبي الرئوي
لزمت القميص فتحت الدگم بكل قوتي وبديت ضغط ؏
منتصف صدره بكل سرعتي
_ غيهب افتح عيونك لا تعوفني ميصير هيج توگع انتَ قووووي
احچيييييي ويايَّ غيهب ابووووس ايدك .

رجع الرجال يقيس بالنبضات اشر للبنية تسحبني
رفعت رأسي علية : كافي بنتي صارت بعد .

دگيت على وجهي بكل قوتي صرخت اريد يسمعني يجاوبني
جريت تلفونه من الارض صار قريب مني فتحته
ايدي ترجف رجف وعيوني من البچي ماشوف
بيهن اخذته من ايدي الأبنية : يا اسم تريدين .

زهراء: أبوية رحيم خابري .

اتصلت هي تحجي واني اعدل بيد الغيهب واتوسل بي
بي يفتح عيونه : حبيبي لا تعوفني وحدي عساني بمكانك
وانت تشيلني بيددددك ، ترررريد تعوفني ترررريد تعووووفني غيهب .

صوت الإسعاف دگ بگلبي دخلوا وما اشوف غير أبوية يركض
وايهاب وسيف أبوية من شاف الغيهب فقد ما صدگ ظل صافن
حضني سيف بكل قوته باوعت ؏ مسعف وصرت اشرح عن وضع
الغيهب الصحي اخذوا يركضون صعد ايهاب وياه
وابوية اخذني يركض للسيارة ساقها وراهم السيارات تفتح طريق
للإسعاف واحنا وراهم اول ما وصلنا وكفت سيارة
جلال وهشام نزلوا يركضون جلال بس انفتح بآب الاسعاف
انهار من البچي مشيت وره المسعف الى أن استقبلهم
الدكتور المسعف يشرح حالته عبالهم ما افتهم ؏ مصطلحاتهم
اخر جملة منه انتهيت بيها : مع الأسف ماكو استجابة للإسعافات .

گعدت بالارض ادگ ؏ راسي لزمني ابوية حاول
فقدت صرت اضرب بوجهي بكل قوتي : ما اسامح نفسي والله
مني اني السبب يابه اني السبب .

رحيم : لج بابا مايصير هيج بس خليني افتهم منهم .

زهراء: هيچ غيهب سهلة عندگ تووووگع واني اگول علية
قوووي والله قوي الغيهب يابه قووووي شلون هيج يوگع
شنووو ما يستجيب شنوووو هووو شنوووو ما يستجيب .

رحيم: اي والله بابا قوي گومي افتهمي منهم مايفيد البچي
هسة بابا صيري قوية شدي حيلچ .

رفعني من الأرض وفتح جنطتي اخذت بطاقتي
ورحت اركض دكيت الباب شوفتها للدكتور
وتوسلت بي : الله يخليك خليني افوت والله ما تضايقك
بس خليني قريبة منه .

الدكتور: دقايق ونخلص رجاءً انتظروني برا .

طلع بعد ما هلكت من الدگ والطم أخوانه وابوية وايهاب
ينتظرون يريد يحچي وفاتت هاجر تصرخ
وجهه يجري دم من الخراميش : وينه غيهب وينه لزمها
ابوية وصاح : كافي بس نريد نفتهممم شبيكم .

الدكتور : يحتاج عملية فورًا عنده الذبحة الصدرية .

زهراء: لااا ما يگدر مايتحمل بنچ هو مُدخن الله يخليك .

الدكتور : حالته جدًا خطرة جدًا واذا يستمر انخفاض تدفق الدم
إلى عضلة القلب نخسر المريض رجاءً تعاونوا ويانا وقعوا
؏ دخوله للعمليات .

رحيم : بابا المستشفى اهلي ومعروف لا تخافين بس ادعيله .

الدكتور: واذا ؏ بنج عدنا مختصين بهل مجال لا تخافون .

هشام: العملية خطرة ؟

الدكتور: جدًا وحساسة.

راح هشام يوقع والدكتور رجع يجهزون الغيهب
للعمليات نقلوا عمليات طارئة طلعوا مغطي مبين
صدره عاري رجله صايرة زرگة وأيده نفس الون وجهه
عبالك مخنوگ تلمست أيده باردة ثلچ : حبيبي اخوانك
هنا موجودين وخايفين عليك افتح عينككككك مو وگف گلبك
من القهر عليهمممم شوفهم كلنا يمك وخايفين عليك .

سحبوا ويمشون سريع واني رجلي بعد
ما تساعدني نهد حيلي والله
گعدت بالأرض مقابيل باب العمليات ابوية
لازم ايدي واني اهز بجسمي بجنون
_ ادعيله محتاج الدعاء هو بين الحياة والموت .

فتحت عيوني وسحبت ايدي اضرب ؏ گلبي
واصرخ : قبل لا يوگع هووووو گال زهراء اني جاي اموت
اكل بروحه اكل وگف گلبه من القهر ، دمرنا دماااار كُلنا نريد
منه ماكووو واحد فكرر بي .

رحيم : كافي تضررربين بنفسچ تخبلتي راح يصير بيچ شي .

ضربت راسي بالحايط بس تذكرت كلامه
_ من الصدمات والضغط يگلي اتمنى المووووت
يگلي ياريت اموووت يابه ، رفعت راسي وصرت اتوسل بربي
ياربي لا تستجيب أمنيته والله اذا يصير بي شي اموت وياه والله .

صار يتمنى الموووووووت غيهب يريد يرتاح
ويعوفني أتعذب اخخخخخ يا نارررر گلبي .

اخذ ابوية بطل الماي من ايهاب حاول يشربني رفضت
غسل وجهي وحضني حتى اوگف ضرب وجهي كله تخدر
من الآلم وحسيته انتفخ ، رفعت راسي هشام گاعد ؏
كرسي جسمه يهتز من البچي وجلال حالته لا توصف
سمعت صور خطوات سريعة تقترب وصوت مو غريب يستفسر
الباشا: بعده بالعمليات ؟

هز هشام رأسه وگف مقابيله وبدون تردد
صاح بوجهه : من الله لا يرضى عليكم شنو من اهل انتوا
شياطين تتأمرون علية وصلتوا للموووت والله عفية عليكم أبطال .
نزل هشام راسه ورجع يمسح بدموعه عاجز عن الكلام
مر وقت مو قليل أنفتح ألباب وطلع الدكتور
_ الحمدلله خلصنا شوية وننقله للعناية المركزة
راح يبقى بيها 24 ساعة متواصلة تحت المراقبة المكثفة .

هشام: شلونه دكتور ؟

الدكتور : بعد الـ24 ساعة اگدر ابلغكم عن وضعه .

تشكروا منه وراح لزمني ابوية گعدني ؏ كرسي
وهمس : الغيهب بطل يطلع منها .

زهراء: تعب هواي تعب .

رحيم: يعني تريدي يطلع يشوف حالتچ هيچ
غير لازم ياخذ قوته من مرته شدي حيلچ بنتي .

نمت ؏ صدره اشهگ ومنظر وصوت الوگعه تتردد براسي
بالساعة وطلعوا يمشون سريع نايم دخلوا الغرفة العناية
بدون ما نفهم شي ، راحوا إخوانا همَّ تكفلوا بكُل الإجراءات
وابوية باقي يمي ..

الى ان دگ تلفون أبوية انخطف لونه وهو يحچي إبتعد مني
مثل المتهرب ، لحظات ورجع مستعجل عليه: تعالي ويايَّ بابا .

زهراء: وين اروح واعرف الغيهب.

رحيم: مانطلع من المستشفى هنا بس تعالي .

هاجر : شكو رحيم صاير شي .

باوع عليهه مايگدر يحچي ورجع يطلب مني اروح وياه
رفضت بقيت مُصره ما اتحرك من مكاني اخذ هاجر
وراح يمشي سريع صعد بالمصعد واختفوا من نظري
انقبض گلبي حسيت صاير شي بس ما اگدر اتحرك
جلال : وينهم ؟

زهراء: ما ادري راحوا .

جلال : هذا هشام ما ادري وين راح .

باوعت ؏ ممر انفتح المصعد وسعت عيوني مصدومة
طلع عمي وام موج وياه يمشي بسرعة ويصيح
_ اخوك وين ولك غيهب شبي وين ابني ؟

جلال : خايف علية بس من وصلته لهنا ماخفت
ماحسبت حساب مووووو ؟

وگفت ؏ حيلي متعجبه من الصلافه وهاي الحقيره
تباوع بوجهي بدون خجل ولا خوف ومنا گلبي يريد
يطگ منهم ركضت بكل ماعندي من حقد هجمت
عليها ضربتها براشدي ايدي انشلت منه تهسترت
ونسيت اني وين : شنوووو هل عررامه بياااا عين تجون
هنااا اقتل القتيل وامشي بجنازته تريدون تكملوووون علينة لوو شنوو
فهموووني شنوووو براسكم .

عمي نزل راسه وگعد ؏ كرسي وهي تسب
ماشوف غير رجاء اجتها من وره سحبتها من شالها
_ هاي ؏ منووو تغلطين لچ سـ***** .

دفرتها ؏ حايط اجه الدكتور يركض مصدوم
_ شصاير هناااا شنو هل اصوات العالية الكل يطلع برا يلة طلعوا
منااا مرضى وعالم حالاتها خطرة طلعوا بسرعة گدامي فورًا.

هي من شافت الدكتور ونظرات رجاء شردت
نزلت من الدرج حتى مو من المصعد وجلال
يعتذر من الدكتور لان صار نار عفتهم ومشيت گعدت
بنهاية الممر بعيد عنهم ما اتحمل اختلط بعد اختنگت .

اجت رجاء يمي وسيف وياهه گعد يمي سيف
وبكل هدوء حاول يطلب : زهراء بس تعالي انزلي ويايَّ
عدنا موضوع وياج جوة ضروري .

رجاء: هسة ننزل كلنا .

زهراء: شبيكم بس فهموني والله مابيَّ حيل لهل غموض .

لزمت ايدي رجاء وباست راسي : تعالي يا عيني .

مگدرت استمر وارفض خفت لزمتني ونزلتني هي ورجاء
أقرأ بالتعليمات طوارئ أطفال !! تعجبت درت وجهي
؏ سيف وهمست بخوف : منو هنا .

لمحت ابوية من بعيد مكتف ايده ويروح ويرجع بالممر
قلق وحاير من شافني اجه بتجاهي : زهراء بابًا المؤمن
مبتلى هذا كله اختبار من ربچ يريد يشوف صبرچ .

خليت ايدي ؏ صدري ورجلي بعد ما تحملني
الساني انطبگ اريد احجي ما اگدر : م من منو من منهم ؟

گعدني سيف ؏ كرسي ورجاء تمسح بوجهي
وتبچي واني اباوع بالوجوه : منو احجولي منووو ؟

سيف : النور صارت عنده خوفه عباله ابو مات
لان وگع گدامهم فهمته والله وحلفت وحاولت بس يقتنع
بس هو بعد شايفه بعيونه شلون وگع .

يريد يكمل عفته وركضت اتعثر وامشي بس أريد أوصل
للغرفة هذا النور هذا عزيزي
بس دخلت صار مقابيلي حاضن هاجر ويبچي
من شافني صار يصرخ : ماما بابا مات مات .

اخذته بحضني وامسح بوجهه ودموعه
اريد انطي الأمان بوسته ورفعت راسه
يرعش وجهه صاير دم عيونه ماكو بياض عبارة عن دم
همست : اسم الله ؏ ابوك ليش تفاول مو زين بابا كلش زين
بس فقد الوعي مثلك يعني وگع وهسة هو هم فوك عنده
دكاترة وأدوية كلها كم يوم ويطلع .

افهم بي بس مايصدگ يفر براسه وبس يرجع
يصفن جسمه يصير خشبة : بابا النور شبي فهموووني شگال الدكتور .

رحيم: بابا من الصدمة والموقف والبچي ما متحمل
مو تعرفين نور شگد يحب ابو صاير عنده انحباس بالتنفس
وفاقد الوعي واخوچ ركض بي ؏ مستشفى والحمدلله مابيَّ
شي صار احسن مغذيات وعلاج وفد ساعة ساعتين ويطلع .

اريد ابچي اصرخ اطلع كُل طاقتي ابني وابو بيوم واحد
ومصيبة بعد مصيبة والله صعبة ، طلبت تحاليل كاملة
نزل هشام من عرف بالموضوع هو وجلال لا تركوا
تحاليل لا اجراءات كملت من تأكدنا صار احسن
سمح الدكتور يطلع لزم ايدي وصار يصرخ يريدني وياه
لا اگدر اعوفه ولا اعوف ابو .

سيف : أخوانه كلهم عند اخوهم وانتِ ابنچ تعبان
ارجعي هو بالحالتين ماكو دخول ولا حتى تشوفي
باجر قبل الوقت اجي اخذچ وترجعين للغيهب تشوفي .

انجبرت ارجع بعد ما الكل ضغط عليَّ
رجعت البيت اهلي النور بحضني ما عافني لحظة
وزينة اول ما وصلت اجتني من بيت جدي تركض
بوستها عيونها حمرة مورمات من البچي .

غسلت بديتول واخذتهم بحضني قلقانة بالي وتفكيري
عنده وكل ما اسمع رن تلفون افز مرعوبة خايفة
بوحدة من الدگات اسمع خبر مو حلو غفيت
بدون ما احس ؏ نفسي الثاني يوم فزيت اباوع الساعة
متعجبه ولا واحد گعدني الجهال گاعدين رحت غسلت
وطلعت أركض شفت رجاء توكل بزينة وجهالهه
والنور نايم ؏ رجلهه وعلى راسه لاصق حرارة .

زهراء: ليش عايفيني نايمة ؟

رجاء: جنتي تعبانة ابوية ماقبل تگعدين .

زهراء: شبي نور ؟

رجاء: رجعنا للمستشفى حرارته صعدت بس هسة شوية احسن
واكل شوربة وابوية حلف اله بس يگعد الغيهب يجي علية وياخذه .

رحت گعدت قريب منه مسحت ؏ راسه وهمست : نور ماما شنو يوجعك
حبيبي بس فهمني احجي ويايَّ .

شهگ وهو يهتز رفعته رجاء وحضنته وهو يشكي
بصوت تعبان : تجذبون عليَّ اني شفت بابا مات .

زهراء: والله ما ماتوالقران ما مات ابوك
مو تدري بابا گلب تعبان وحتاج عملية
وهسة هو تحت المراقبة اليوم يفتح عيونه لو باجر والله
العظيم وداعتك ماما اخذك عنده وظل گاعد عنده الى ان ينام .

مايقتنع ولا يصدگ عفته ورحت ركض بدلت وطلعت
بعدني بالباب وابوية خابرني : راح تجين ؟

زهراء: اي هسة راح اطلع گعد الدكتور شنو يگول ؟

رحيم : مانعرف هسة الدكاترة دخلوا منتظرين يطلعون
المهم مو تسوقين سيارة ديري بالچ ، خابرت امين ينتظرچ بالباب هو يوصلچ .

سديت الخط وطلعت سلمت ؏ امين وصعدت
_ ام النور ماتشوفون شر ان شاء الله شدة وتمر .

زهراء: تسلم اخي اشكرك .

وصلني للمستشفى ورجع لگيت سيف يخابر بالباب
من وصلت هو دخلني جوة : منو موجود ؟

سيف : آهله كلهم وعمهم اول مرة اشوفه
وابوية وهاجر واختها وزوجها والباشا قبل شوية اجه هو ونسايبه .

اول ماوصلت للعناية صار دوهان اخو اساور هو وتميم مقابيلي
بعد ماسلمت عليهم رجع تميم گال
تميم : ام النور الحمدلله ؏ سلامتكم .

زهراء:الله يسلمك عيوني .

دوهان: اي شي تحتاجين أحنا هنا مثل اخوچ سيف
عد عيناچ بس اطلبي .

زهراء: هي بس وكفتكم هنا تسوى الدنيا والله ، الدكتور طلع لو بعده .

تميم : بعدهم والله صار هواي داخلين..

كملت طريقي الباشا واگف هو وابوية يسولفون
من وصلت يمهم سلم : شلونچ خوية ؟

زهراء: عايشين ..

الباشا: النور مصار شوية احسن ؟

زهراء: ظل بالبيت يبچي وطلعت مصدوم
الى درجة من احجي يكذبني .

الباشا : حجزت اله عند دكتور صديقي اختصاص فد ساعة واخذه
اني وسيف واحجي وياه .

زهراء: لا تعب نفسك امانة اختي وزوجها يروحون
انطيهم العنوان .

الباشا: ابن الغالي هذا مابيها اي تعب اني اخذه
واختچ عوفيها الزينة .

رحيم : عوفي حتى يحجي وياه .

عافنا نحچي وراح يسولف هو وتميم ودوهان اباوع
؏ ملاك تباوعلي من بعيد عبالك تريد تاكلني
وعمي منزل رأسه مايحچي ابد بس امير گاعد يمه
اما جلال بعيد عنهم وبعده مثل ما عفتهم گاعد بالأرض
الى ان طلع الدكتور بيده أوراق: الحمدلله المريض احسن
الصار مو سهل وكان اكو خطر ؏ حياته والمشكلة هو مو كبير
الصار ضغط نفسي وتعصيب وبالمرتبة الأولى الحق ؏ الصيدلاني
الي صارف اله ادوية الـ***** مهدئات ومنومات خطرة ؏ صاحب القلب .

زهراء: بس هو صار كلش هواي تارك حبوب الـ****

الدكتور: غلطانة موجودة بدمه بنسبة عالية وهي السبب
الرئيسي لتدهور حالته الصحية .

جلال : هو هسة شلونه گاعد لو نايم نگدر ندخل نشوفه .

الدكتور: الحمدلله نگدر نگول احسن وگاعد بس
بعده تعبان من المهدئات ، افضل يظل بعيد عن التوتر والعصبية
هل كم ساعة وادخلكم .

كمل ويريد ينزل مشيت بسرعة وحجيت وهو واگف ؏
درج قبل لا ينزل وبصوت ناصي : دكتور اني اعرف حالته
الصحية وعندي تطلع ؏ هل مواضيع والله العظيم ما يصير
شي اذا ادخل اني زوجته وبس اريد اشوفه حتى لو بس دقيقة.

الدكتور : ماشي بس انتظري ربع ساعة وتجي الممرضة وياج .

تشكرت منه ورجعت گعدت انتظر الربع ساعة تخلص
؏ نار رن تلفوني ابتعدت وصرت احجي اني وصديقتي
بالمختبر افهمها ؏ كم نقطة لان صار فترة تاركة الشغل
وباقي كلشي عليهه ، كملت المكالمة ورجعت لگيت
الممرضة بالباب ابتسمت ورحت بتجاهه بلهفة: أدخل ؟

الممرضة: دقيقة وتدخلين اكو شخص عنده .

درت وجهي اباوع ؏ جهة اهله معقولة ابو لان ماكو
هشام وامير موجودين : رجاءً افتحي الباب ماراح اطلع صوت .

فتحت الباب بكل هدوء وبدون صوت
آول مادخلت سمعت شهگات خشنه
وصوت جلال يضرب ؏ صدره ويصيح: كون البيك بيه غيهب
استاهل اصير بمكانك اني السبب دمرتك گوم اضربني موتني
والله ما اتنفس واگول لا والله .

توجهت نظراتي ؏ غيهب لازم ايد جلال
يطبطب عليهه وبصوت تعبان يحچي وياه: قبل حچيت وياك وارجع
واگول مسامحك وروح امي مسامحك واني هنا مو بسببك
لا تظل تعذب بنفسك كافي عيش وانسى .

مسحت دموعي هو لمحني ابتسم بوجهي
تقدمت وجلال نهض وطلع بلحظتها تلمست
ايده بعدها بيها زراق : لو عفتني وبعد هل عيون ماتشوف النور
والله اروح وياك بعد ماعيش يوم زيادة من بعدك .

بلع ريگه بصعوبة يحاول يحچي بس الوجع اخذ من حيله
بست رأسه وهمست : الحمدلله ؏ سلامتك غيهبي الحلو .

ضحك بوجع وجبر نفسه ينطق: بعدني حلو .

زهراء: بعدك احلى ما شافت عيوني بعدك ذاك
ألي جنت أنتظر عند الباب ساعات حتى املي عيوني
بشوفت جماله وبعدك اكبر أحلامي إلي حققتها .

رفع حاجبة بغرور ويريد يحجي قاطعته: بس تحتاج تعديلات بسيطة.

قلب عيونه وهو يضحك رفعت ايده بستها
وهمست : عساني ما انحرم منك خوفتني عليك وهل
كم يوم اخذوا من حيلي ما اتحمل اشوفك فاقد وتعبان .

الأدوية قوية بحيث يريد يركز ويايَّ بس عيونه تغمض
ويرجع يفتحها ، تلمست حواجبه وهمست : نام حبيبي لاتعب نفسك .

الغيهب: ابقي يمي .

زهراء: ما اعوفك بعد والله .

تمسك بيدي ونام خليت راسي ؏ ايده ما مصدگة رجع
الغيهب وشفت عيونه وسمعت صوته ، طلعت بعد ربع
ساعة سألوني عني جاوبتهم : بعد يحتاج راحة .

وتركتهم وطلعت ابوية اجه ورايَّ : وين رايحة.

زهراء: اريد اصلي صلاة الشكر ، اريد ازور راح اروح
المرقد الإمام الكاظم ( علية السلام ) .

رحيم: اني اخذچ امشي .

طلعت وياه لزمني من ايدي وهو يضحك: الحمدلله ؏ سلامته .

زهراء: شكرًا بابا وگفتك ويايَّ ما أنساها شكرًا
لان انتَ موجود بحياتي .

باس راسي وصعدنا السيارة وصلني ونزل ويايَّ اشترين
عباية صلاة ودخلت توضئت ورحت للتفتيش لبست عياتي
وزرت تعب الأيام الفاتت كلها وگع ؏ شكل دموع فرح بداخل
الضريح ، صليت وقريت قران هوواي وطلعت الأبوية
خابر ابوية ؏ سيف وعرف راجعين من الدكتور للمستشفى
اول ماوصلت شفت النور ينتظرني.
النور : صدك رايحين البابا ؟

زهراء: مو حلفت الك وانت متعود اذا احلف اوفي وياك
وهاي وصلنا وراح ادخلك تشوف ابوك وتطمئن.

صعدنا للطابق الموجود بي الغيهب وسيف والباشا
ويايَّ وابوية يحجي وياهم لمحت باب غرفته مفتوح
والكل داخل الغرفة اخوانه واخواته بس ابو ماكو
باوعت ؏ نور يدور بالوجوه أخذته
من ايده وقربته ؏ ابو ظل جامد يباوع وموسع عيونه
صاح بي سيف : ها ولك خبلتني ابوية مات وانتوا جذابين
هذا ابوك عايش وكلشي مابي .

مد الغيهب ايده تلمسها النور وحضنها وهو يبچي
_ شفتك من وگعت وطلع منك دم عبالي متت .

الغيهب: لا تبچي نور عيوني انتَ مابيَّ شي والله صرت زين .

رفعه سيف گعد قريب منه ما ترك أيده بعد ويباوع
علية ما شال عيونه ، امير يسولف عن العملية
وجلال ينصح يغير نظام حياته وضروري يصير صحي
وهاجر دارت وجهه وهمست : بعد زهراء تلتزمه هي مسؤولة
عن صحته وأكله وعلاجه ماكو شخص يخاف ؏ الغيهب بگدها .

زهراء: بعيوني بدون توصية .

رحيم: ان شاء الله يستقرون بيت جديد وبعيد عن الهم
والغم والتوتر والناس الي تفتعل مشاكل بينهم
ويعيشون حياتهم لنفسهم ولأطفالهم .

هاجر: هو احسن شي .

ملاك: مفهمت يعني شنو بيت جديد وبعيد ؟

رحيم: مثل ماسمعتي ..

ملاك : عفوًا وبما انو صار الحل والقرار بيدك
وبيت اهلي شنو مصيره ؟

امير : بلاااا كلام زايد بسم الله هسة دخلنا نشوف اخوكم
امشي جلال وصل اختك الظاهر تعبت ورجعت تخربط .

باوعت ؏ غيهب غمض عيونه بتعب متجاهل
كُل كلامهم ونقاشهم والمشاحنات ، باس ايد النور
وحضنها : بابا شوكت نروح من المستشفى اكره ريحتها ؟

الغيهب: انتَ روح واني يوم يومين واطلع وتجي يمي .

طلع جلال هو وملاك دخلت الممرضة ضربت إبره بالمغذي
ماكو دقايق وتقدم الباشا يريد ياخذ النور : يلة عمو عوف
بابا يرتاح وانت ارجع للبيت ارتاح واشرب علاجك .

أخذت حبابة وكلاص ماي وتقربت منه : اشربها.

الغيهب: مو هسة انطوني علاج هي طلابه .

زهراء: اي يا عيني غير علاجك .

رحيم: لو الممرضة چان بدون نقاش يشربها .

الغيهب: رحيم تدري چان نفسي اتزوج ممرضة .

الباشا : هو انتَ خليت شي بنفسك .

زهراء: نفسه ماتشبع .

الغيهب: لا هي بقت بس الممرضة قبل لا احقق طلب نفسي
اجت بنت رحيم وبعد مارحمت بحالي .

الباشا: مسحوها بوجهي هذا يهلوس من العلاج .

رحيم: الظاهر بنت رحيم ما عاجبتك ؟

الغيهب: بنت رحيم استلمتني تفشخ بالگلاصات
طبرتني طبر لليوم معلم بوجهي .

الباشا: والله وزين تسوي وياك لان بيومها
ماطلعت دم ، غسلت دماغك .

زهراء: وهسة اذا يكمل ان شاء الله انطي بهل فازة
مال ورد افلش المخ .

الباشا : بعلي حتى بطارية القلب بعد ماتفيد استر ؏ روحك
وسد مصيبتك لا طشارك يعبر الحدود .

الغيهب: هاي الممرضة بنت **** كثرت علاج
خلتني اهلوس اني وين ، المحللة مالتي وينها ؟

هاجر رفعت ايدها ضربت ؏ خدها تضحك وهي تباوع ؏ أبوية
ألي خزر الغيهب بنظرات الشر .

سيف : يا اخي جفصاته ثگال .

الباشا: تحتار شلون ترگع بيهن .

امير : يخليك تضرب دقلات .

رحيم: علاجه عندي ، كلها ماتكلف خمس آلاف عصارتين
خبط اميري اصلي الزگ حلگه واخلص منه .

هاجر : دخيلك كلشي ولا علاجك .

الغيهب: بس يحچي بالفلوس ، مطبق مثل حياته حساب وكتاب .

رحيم: ياريتك تتعلم مني وتحسب حياتك حساب وكتاب .

الباشا : اني اترخص جو المشاحنات مو جوي .

سيف : اخذني وياك لك عيني ابراهيم ارحمني دخت .

اخذوا النور وطلعوا بسرعة وماشوف غير عمي ابو الغيهب
دخل الغيهب داخل بحوار عميق هو وابوية قطعه وصفن
مصدوم لثواني : الحمدلله ؏ سلامتك .

الغيهب: الله يسلمك وشكرًا ؏ زيارتك تگدر تاخذ راحتك
لان اريد انام تعبان .

ابو الغيهب: اجيت حتى ابقى يمك .

الغيهب: امير اخذ ابوك بسرعة .

هشام: غيهب ابونا يريد يظل هنااااااا .

الغيهب: اي براحته لا الغرفة غرفتي ولا المستشفى مالتي
هو يريد يظل براحته ، بالنسبة أليه مكان موجود بي ابوكم ما ابقى بي .

ابو الغيهب: حقك ..

الغيهب: هشام راح تجبرني اهينك والله اطلعوا مصختوها.

ابو الغيهب: تخيل نفسك بمكاني وبيوم من الايام النور
يعاملك نفس معاملتك أليه .

الغيهب: دائمًا أدعي يطلع النور مثلي يحب ويخاف ويحترم اهله
اما اذا قصدك ؏ تعاملي هسة انتَ متخيل اسوي مصايب بالنور
مثل ما انتَ سويت بيَّ ؟

رحيم: الظاهر انتوا ما ناوين يطلع بسلامة .

هشام: يابه كافي خلينا نطلع مو ردت تشوفه وهاي شفت
امشي كافي لازم ترتاح مو زين عليك التعب .

ابو الغيهب: لازم تعرف احنا اهلك مهما صار بس اي شي
تريد واذا تحتاج هذولي إخوتك احزام ظهرك انخاهم وهمَّ عد عيناك .

الغيهب: احتاج تكفوني شركم .

التزموا السكوت وطلعوا من الغرفة ابوسة اخذ هاجر
وراحوا يشربون چاي بقيت بس اني وياه : اليوم بليل تطلع .

الغيهب: عرفت من الدكتور .

زهراء: وين مقرر تروح ؟

الغيهب: مافهمت ؟

زهراء: من تطلع وين تروح ؟

الغيهب: للبيت .

زهراء: البيت القديم .

الغيهب: شنو متعجبه وين يعني ابقى بالشارع .

زهراء: ليش ماتجي البيت اهلي حتى گدام عيوني
انت تحتاج اهتمام خاص .

الغيهب: افتهم من كلامچ اذا رحت للبيت ماتجين ؟

زهراء: ذاك البيت ما أدخل بي وانت تعرف بهل موضوع.

الغيهب: المشكلة اني ماعندي طاقة اتناقش واخذ وانطي
حيلي ؏ گدي واحتاج انام من يصير وقت طلعتي گعديني .

عدل جسمه وغمض عيونه بقيت ؏ گعدتي ؏ تخم
صافنه الى أن انتظمت أنفاسه عرفته نام ، بقيت
بحيرة لا اگدر اروح وياه النفس ذاك البيت
وصعب أتركه وحده وهو بأمس الحاجة اليه .

رجع ابوية وهاجر بقيت ساكته من تذكرت كلام الغيب
من نبهني مايريد شخص كأن من يكن يدخل بحياتنا
بقيت بيني وبين نفسي افكر الى ان صار الوقت والدكتور
وافق ؏ خروجنا ، گعدت الغيهب وامير وجلال رجعوا
ساعدوا الغيهب يبدل ونزلنا بالمصعد ؏ سيارة جلال
وابوية وهاجر وحدهم بالسيارة .

اول ما دخلنا المنطقة ونزلنا قبل لا ادخل ابوية صاحني
تقرب عليَّ وهمس : راح تدخلين ؟

باوعت ؏ الغيهب جلال يساعده ينزل من السيارة ويمشي
يدخل للبيت وعينه عليَّ يريد يشوف ادخل لو لا
زهراء : اي ادخل ما أكدر اعوف الغيهب وحده .

رحيم: براحتچ ..

بس دخلنا للبيت طلع جلال يدخل سيارته الغيهب
گعد ؏ تخم بصعوبة سند نفسه بالكوشات
وگف ابوية مقابيل الباب يريد يروح : تظل يمك العافية
اي شي تحتاجون خابروني وانتِ بابا زهراء راح اخابر سيف
يجي يبات يمچ .

هاجر: ليش أتعبه خطية قابل شكو عليها زوزو بيتها.

الغيهب: لا تخاف ما ناكلها.

رحيم: للامان بعد اخوها يجي يمها تعرف ما بيناتكم
عقد وقربكم حررررررام .

الغيهب: اطمأن لا تخاف روح نام .

رحيم: لا والله ما اطمأن اخوها يجي يعني يجي .

الغيهب: خليني لازم الساني يا عيني وروح لا تخاف عليها
ما ناكلها ولا اجي يمهاااا .

رحيم: اخوها يجي آمن.

هاجر: يا عيني مو اختنگ وراح يجفص جفصات
عالمية لا تتصلح ولا تترگع امشي نروح فدوة .

رحيم: غير بنتي ومن حقي اخاف عليها شنو رجعت
لهذا البيت وتظل وياه وحدهم لا عقد ولا صخام .

زهراء: يا بابا ذاك اليوم جنت وياه بالشقة قابل شيصير
غير بيناتنا عقد محكمة وهو ابو اطفالي .

رحيم: لا تختلف وياكم اطفالكم واخذت منه كلمة
هسة گلبي ما مطمأن .

غيهب وجهه احتقن وصار احمر ضرب ؏ رجله
وعض إصبعه وهو يصيح بعالي صوته : من شنووووو تخاف
غيررررررر مسوي عملية قلب هووووو غيررررررر عطلاااااان
عطلاااااااان والله عطلاااااااان .

ضربت ؏ وجهي وصرخت : شگد عيب لكككككك غيهب .

أبوية ضرب الحايط وهو خربان ضحك
وطلع يركض هو وهاجر للسيارة واني افتر
واصيح : بالقران يجبررررني موتني هل الزلمة اله
اجفص وياه اله يعوفني هاااا شوفي من طگيتها اقتنع وراح .

زهراء: خزي يبووو يبووو يبس ريگي اروح اشرب ماي .

الغيهب: هو ابوج يبس الگلب مو بي الريگ چثري ماي .

اخذت بطل ماي من الكاونتر وهو مستمر يحچي
ويچفص : مووو تشوفين روحچ ست زهراء ترا
بعدني بعز شبابي .

زهراء: غيهب انتَ رجال صاحب عملية قلب نام رجاءً .

الغيهب: تعالي .

شربت شوية واجيت وگفت بعيد همس : عدلي المخاديد .

زهراء: همزين جلال وامير منزلين السرير جوة .

تقربت اعدل بالمخاديد ولزم ايدي : تعالي نامي بحضني .

زهراء: غيهب عوف ايدي .

الغيهب: عيونج الحلوة مورمات من البچي عليَّ
المفروض هسة بدون ما طلب تچين يمي .

اخذت ايدي منه وعدلت المخاديد ؏ سريع ورحت بعيد گعدت ؏ تخم
_ تصبح ؏ خير حبيبي .

نام بصعوبة بس يباوع ؏ سگف ماعرف بشنو يفكر
لزمت تلفوني حجيت اني ورجاء وشوية ويه اساور
الى ان غفيت گعدت على صوت الغيهب يون بوجع
گعدت قريب منه لزمت ايده وهمست : غيهب شبيك ؟

الغيهب: گلبي ..

شربته علاجه وبقيت قريب منه رفع ايدي
وهمس : اريد انام مثل قبل .

زهراء: غيهب امانة مو هسة .

الغيهب: بداعتي .

گعدت قريب منه رفع جسمه وحط راسه ؏ رجلي
بـ أطراف اصابعي لاعبت شعره وصار يحچيلي
عن إحساسه من فتح عيونه الى هل لحظة
ظل يحچي الى ان ارتاح ونام مثل قبل بالضبط يفضفض وينام .

يومين واني وياه باقين بس اخوانه ما يتركونه وحده دائمًا عنده
اي شي يحتاج يوفروا ثالث يوم باب البيت بعد ما انسد عالم
داخله وناس طالعة منهم اصدقائه ومعارف والمحامين والمحاميات
وعالم اعرفهم ونص ما اعرفهم البيت ما يفرغ ولا ساعة .

يوم أربعاء گعدت من وقت لمعت البيت تلمع قبل لا يجي
خطار ؏ گولت رجاء احد ماحود ورجعت ؏ مطبخ طلعت
كارتون عصاير خليتها بالثلاجة وكل هذا والغيهب مسدود
علية باب غرفة اهلة هو ينام بيها واني واطفالي فوك
وأخوانه عدهم مناوبة يوم هشام يبات رغم الغيهب مايحچي
ابد وياه ولا حرف ينطق حتى من هشام يسولف لو يسأل
الغيهب يجاهل الكلام، وهو يتعامل طبيعي ويقدر زعل اخو
ويعرف بنفسه غلط بحقنا ، وبعد هشام جلال يناوب يحير
شلون يخدم ويضحك اخو بحيث من يصير دوره بالمناوبة
اشكال الألعاب يلعبوها شطرنج وغيرها والأفلام يتابعون
بس بنظام وجدول صحي يتبعه ضروري الغيهب ينام من وقت
واول مايگعد يطلع يتمشى حتى يحافظ ؏ لياقته البدنية
وهم الرياضة من ضمن جدول نظام الصحة .

جهزت ريوك اطفالي وبديت ارتب صينية ريوگ ثانية
طلع امير من الاستقبال يمسح بوجهه توه گاعد
عدلت شالي وهمس : صباح الخير ام النور .

زهراء: صباح النور عيوني .

دخل للحمام يغسل واني رحت دگيت ألباب ؏ الغيهب
ماكو جواب فتحته الغرفة فارغة درت وجهي ؏ صوت
امير : ها نايم ؟

زهراء: لا وين نايم ماكو بالغرفة ، معقولة راح يتمشى وحده .

عگد حاجبه ورجع للاستقبال اخذ مبايله يدگ وماكو
امير: وين راح مو يدري ميصير يطلع وحده والله راح يخبلني .

طلع برا اتصل ؏ اخوانه مو وياهم اتصل ؏ الباشا
هم مايجاوب: يمكن وياه ؟

امير: والله ما ادري .

سمعت صوت زينة تبچي ركضت صعدت
حضنتها وبوستها ونزلنا غسلت وجهه وطلعتها بالحديقة
بقت تسولف هي وامير واني دخلت اخذت تلفوني اخابر علية
ماكو ، شگد اكره هل فقرة وأعرفه من يختفي وادگ وماكو جواب
معناها اكو مصيبة ؏ الطريق لا محال ..

ساعة بالضبط وسمعت صوته بوضوح
_ تفضلي امي ادخلوا آهلًا وسهلًا بيكم .

مديت راسي همزين الباب مفتوح شوية دخل بنية شابه وياها وحدة
متوسطة العمر : استريحوا عيوني ، دقايق اصيح ام النور
أعرفكم عليهه ..

طفرت من فتح ألباب من شافني ضحك
_ منو هذني ؟

الغيهب: شلونها الحلوة مالتي .

ضحكت وأني إرفع حاجبي واكتف ايدي
_ حبيبي دخيلك أتوسل لك ترا مو حمل مصايب جديدة دير بالك .

گرص خدي دفعت ايده بهدوء وهو يقترب
— للمرة المليون اگول لا طخ ميصير حرررام حررررام .

الغيهب: هسة الحرام عليَّ لو عليچ .

زهراء: علينة احنا الإثنين .

الغيهب: يلة اني استاهل تحصلين ذنوب من ورايَّ
وانتِ تستاهلين احصل اذنوب علمودچ .

زهراء: لا والله هو شنوو بس حچي لا انتَ تستاهل
ولا اني استاهل ، ولاااااا تغير الموضوع وجاوبني منو هذني ؟
بعدين انتَ شلون تطلع وحدك .

الغيهب: تتذكرين اكيد سما وام سما هم هذولي
خابروني الصبح رايحين للمحكمة علمودي وجماعتي
بلغوهم وخابرتني خطية تريد تچي تشوفني وتقوم بالواجب .

زهراء: وين اكو مريض يطلع يجيب الخطار لا صايرة
ولا دايرة بس عدنا حصريًا .

الغيهب: مميزين بكلشي .

زهراء: بشنو مميزين يحظي نمشي عكس التيار .

الغيهب: تيار مال رحومي دمشي گدامي ألعالم تنتظرنا .

زهراء: أدخل قبلي اغير ملابسي واجي جنت أنظف .

الغيهب: لا تتأخرين عيب اگعد وياهن وحدي .

زهراء: يا عيب غير تخرب وتتكهرب عندك عيد
شبيك وجهك ورد وبس تتبسم بالقران ترا افصل عليك .

الغيهب: بالقران مو مال عيني واغاتي امشي اصعدي
لا اشوفچ العين الحمرة السانچ يرعد صاير يحتاج
خليني اسكت عيب منا العالم ابلعها احسن .

صعدت واني افر بيدي وهو يتقدم ؏ بايات ويهمس
بصوت يسمعني : هاي ايدچ اذا ما اتوبها من هاي الحركة .

ظميت ضحكتي وصعدت ركض للغرفة لبست تراك
مرتب ولميت شعري وخليت شال ؏ راسي بدول لف
عدلت وجهي بتنت ؏ ماسكارا ورشيت عطر ونزلت
رتبت صينية العصاير وطلعت كيكة من الكيكات الي
سويتها للخطار خصيصًا حتى ما ادوخ بالتقديم
قطعت قطع ومواعين كرزات ودخلت : السلام عليكم.

وكفت ألام وبنتها وعلى وجهم إبتسامة
_ يا هلا بأم النور امانة الله صار عندي فضول اشوفچ
بگد ما يحبچ ويسولف بيچ أستاذ غيهب .

خليت الصينية ؏ طبلة ورحت بوستهم واني اجاوبها
؏ كلامها : واني مثلچ صار عندي فضول اتعرف عليچ وعلى سما
نورتونا بهل زيارة الحلوة كُل الهلا بيكم تفضلوا .

عدلت الطبلات وخليت مقابيل كُل وحدة حصتها
ومشيت گعدت بصف الغيهب ألي يوزع إبتسامات
قلقتي بيهن ، بين سؤال وموقف دار بيناتنا مبين
عليهن طيبات وعلى نياتهن حبيتهن بس بطبعي
صرت اخذ حذري من الكل فـ خليت حواجز
وقللت الكلام عن حياتي مقابيلهم .

وبعد ساعة من حديثنا سألها الغيهب: شنو سبب روحتكم للمحكمة .

ام سما: جنت ناوية اطلب منك اقابل ام النور وداخله
؏ الله وعليكم وعندي طلب منكم وخجلانه شلون احچي بي ..

زهراء: اعتبريني بنتچ واحچي واذا اگدر تشلعين عيوني وتاخذينها .

أم سما : عرفتچ بنت اصول الله شاهد من اول ما شفتچ
وماريد تاخذون نظرة ثانية علينة آو تعتبروني طمعت
بكرمكم بس اني مكسورة وهل بنية عندي وكلها لعبتها
ضدي وحاربوني بيها ..

الغيهب: منو وياكم شصاير ؟

ام سما : سما عدها عمام بس مقاطعيني من وفاة ابوها
وما احب احچي بيها طليقها تيم وصل الهم وماعرف شنو
احچي وياهم وهسة رجعوا صاروا ضده وضدنا من عرفوا
البيت صار بإسم سما متخبلين عمها يگول بعد ؏ جثتي
سما تروح للغريب اخذها لأبني وهذاك تيم من جهه ثانية
من سمع فقد عليهم وعلينا ومن الجهتين يهددون بينا
وخايفة يموتون هل بنية والله اتخبل اذا يصير بيها شي ..

هي تحجي اباوع ؏ يما ترجف ودموعها عشرة عشرة
الغيهب: شحدهم لا تخافين اني اخلي اصدقائي اثنين
يشتغلوهم واريد اشوف زلمة ابن أمة وأبو يوصل الكم .

ام سما : ما أمن صرت اظل اني وياهه بذاك البيت
؏ اي ساعة يدخلون علينة ، طلبي يمكم إني دخيله
عدكم اعتبريني امچ يمة زهراء وهاي اختچ لا تصيرين
عصبية ولا تاخذين غير نظرة ، بس اني اطلب من أستاذ الغيهب
بس هل شهر يعقد ؏ سما ويتزوجها حتى يوگف بوجهم ..

يتبع ...

البَـاقيـات الصـالحـات🖤:-..

‏- سُبحـان الله .
‏- الحَمـد لله .
‏- لا إلـه إلا الله .
‏- الله أڪبـر .
‏- أستغفِـرُ الله .
‏- لا حَـول و لا قـوة إلا بالله .
‏- سُبحـان الله و بِحمـده .
‏- سُبحـان الله العَظيـم .
‏- اللهُـمَ صَل عَـلى مُحمـد وآلِ محمد