ثمار العار بالحلال الفصل الثامن عشر 18 - بقلم نهى

ثمار العار بالحلال ج٢
بقلم الكاتبة nuha-d-h

🌷🌷مساء الخيرعليكم يا احبتي 🌷🌷🌷
((تعالو معي لاحكي لكم ما في جعبتي
هناك قصة بين ثنايا كلماتها
تحكي عن قلوب محملة بالحب
وقلوب تبحث عن الحب
وقلوب حائرة لا تعرف ماذا
يخبيء لها الدرب ))

سهى
: يالله عذور خلصنا المواعين والشغل انتي مو كلتي
بعدين اخذكم واشوفكم الحديقة
سلمى بضحكة : ولج يا حديقة خايبة هاي مزرعة جبيرة
تضيعين بيها اذا طلعتي لوحدج
رشا: بالله شو اوكفو خلي اشوف ناصر طلع لو بعدة ؟؟
لان ما يقبل نتمشى بالبستان لحالنا
عذراء : هَـا بشري ناصر طلع لو بعدة
رشا: اي طالع يالله امشنا
: يالله بس بدون صوت
اني ونور بس نسمعهم مثل الاطرش بالزفة
عذراء: شنو اتحركن شبيجن فهيتن يحظي
طلعنا واحنا خربانات ضحك على حجي عذراء
عبالك مرية عجوز
عذراء بخزرة : نصن صوتجن لا يطلع وينسمع
وتجيبن اجلنا
مشينا اني وعذراء سوية ونور والبنات مشو گدامنا
سهى : عذورة امانة سولفيلي على خطيبج انتي مو كلتي هاي سالفة طويلة احجيها الج من افرغ
والله صار عندي فضول اريد اعرف ليش مخطوبة وغير مخطوبة
عذراء وهي تجر حسرة : اااايه شحجيلج
عن يا هو منهم احجيلج عن الخطيب لو عن الحبيب
سهى بتسائل : هاي شنو صارت بيها خطيب وحبيب يابة دحجيلي عنهم اثنينهم ترة موتيني
صرنا نمشي على كيف ونسولف
عذراء:
عدي ابن خالي فاضل الابن الثالث من اصل خمس اولاد
من فتحت عيوني عالدنيا الناس كلها تكول عدي لعذراء وعذراء لعدي
بس تعرفين جنت صغير وما افتهم حجيهم
فما خليت ببالي لكن السنين عدت وبديت اكبر
واحنا مثل ما تعرفين جنا جهال ونلعب سوية
بفرد لعبة ولد وبنات جنت اعاين عليه
شلون يلعب ((حلية كضة براسه ))
وجان هو يركض اسرع واحد بيهم
ومحد يكدر يلزمة
الا انا
ههه اتذكر جان وحش يخليني عليه
يگلي عديووو حصتج ماكو غيرج يكدر يلزمة
ههه بوكتها جنا جهال وانا جنت اظل اروكض وراه لحد ما اكضة (الزمة)وهو يصير عصبي ويظل يصيح
علية ويجرني من ظفيرتي
ومرة من المرات جنت اروكض وراه ولزمتة
من طرف التشيرت وانشك بيدي
وبوقتها اتذكر ظل يحجي علية ويصيح وبالاخير اتعاركنا انا وياه وصرنا من الروس
وانتقلت العركة للامهات وهم صارن من الروس
وتالي فضت بس هااا صارت هاي
عركتنا تنذكر بتاريخ العائلة
وصار ينضرب بينا المثل
ومن عهد هاي العركة تم اعلان
الحرب الباردة بيني وبين عدي
ودارت السنين وكبرنا وبلغت وعدنا هنا بالسلف
البنية اذا بلغت تحرم بعد تلعب وية الاولاد
وتكعد بالبيت تبدي تتعلم الشغل وية امها
وكمت بعد ما اطلع بباب البيت
عبالك اذا اطلع ويشوفوني الاولاد
راح يعرفون بسري الكبير وانفضح
وكلها راح تعرف عذراء بلغت وصارت مرية
اهوووو خو من كامت المعالم الانثوية تبرز
وبينت على جسمي اتخبلت
ههههههه اتذكر جنت ما افتهم
ابجي واضرب على باب المطبخ يم امي و اكلها
يمة انا ليش كبرت اريد ابقى صغيرة حتى اطلع العب وياهم
صحيح الجسد كبر بس العقل بعدة مال طفلة
وعدت الايام والكل يعرفني اني اكره عدي
وعدي يكرهني بحيث اني اذا البنات جابو طاري عدي يمي اظل اعيب واحجي عليه واقلد واصنف كدامهم
بسسسسسسسسسسس عودك انا شنو
ليس كل ما تراه الاعين تدركه القلوب
اما السر الي يكمن بصدري
هو طوفان هائج من الحب المكنون لعدي
كل دكة بكلبي تهتف بحب عدي كنت اتنفس هواه. واعشق كل اطباعه
وصرت اتعمد اجيب طاريه بالشين گدام البنات
حتى بلكت اسمع اخباره
واسوي حالي كدامهن ما مهتمة
بس بالحقيقة گلبي
يظل يدك مثل طبول الحرب
اذا مر علية طاريه
كبرت وصرت بعمر الشباب وعرفت معنى الحب
عرفت اليحب يحلم بشوفة المحبوب
ايه يا خيتي صرت خبيرة بالحب
وعرفت للحب درجات
واختج تسلقت كل هذني وبلغت بحب عدي اعلى
درجات الحب
خليني اعلمج ترة العشق هو درجة اعلى من الحب
بس حايز على تقدير جيد جدا
لكن وانا وصلت بحٍٍِْــًبٌٍـــِٓېٍٓ لعدي
لأعلى درجة بالحب
وهي الجنون عاااد هاي
درجة الامتياز اي انا صرت مجنونة هواه
وشباك غرفتي شاهد على عشقي لعدي
ياما عدت علية ليالي طوال
وانا سهرانة يم الشباك (النافذة)
لحتى انتظرة يمر واكحل عيوني بشوفتة
اعاين عليه من الشباك من يوكف يم اخوي ناصر
واشوفة من يضحك عندة غمازة
واعاين على طوله يمة من فدوة رحت لطوله
اي لا تظلين فاكة حلكج وتعاينين علية مستغربة
ادري بيج راح تكولين هاي مخبلة (مجنونة)
بس شسوي هو الحب مو بيدي ولا بيد احد
هذا مثل الغازي يحتل الگلب فجأة بدون استأذان
ووالي يقهرج
هذا حٍٍِْــًبٌٍـــِٓېٍٓ كلة وهو ولا داري بحالي
واعرف كلش زين ابد ما اطري على باله
واحتمال اصلاً ما خالني بحسابه
بس تدرين بيوم
الي سمعت جدي طلبني من ابوي لعدي
طرت من الفرحة اجيت اموت ما مصدكة
واخيراً راح يصير عدي من نصيبي ونصير
فرد بيت يجمعنا سوية
كمت اكمز وصرت اعاين عالدنيا
صارت بعيني شكد حلوة وجبيرة
والله كان شعورحلو تتمنيه لعزاز گلبج
بس مرت الايام والشهور والسنين
وانا عاكفة ومنتظرة كلمة جدي شوكت تتنفذ
بس يوم عن يوم بدة يكبر بگلبي شعور الخوف
من عدم موافقة عدي علية
اي فعلاً اني من حبيتة ما سألت نفسي
هل يا ترى عدي يحب عذراء لو هذا حب من طرف واحد لكن الايام ثبتت لي
ان هذا الحب من طرف واحد
والدليل مماطلة عدي وتأخير موعد الخطوبة
واختلاق الاعذار والحجج لتأخير سالفة
الزواج
لا تظلين تعاينين علية بصدمة
وتكليلي ليش ما اعترضتي
وتركتيه وشفتي حياتج الي مثل عمري بسلفنا تعتبر
جبيرة عالزواج يعني المفروض انا الي الحق
اعترض على تأخير عدي
ولازم اشوف حياتي واتزوج
بس تعاي قنعي هذا
وهي تأشر على گلبها
القلب وما يهوى
ظليت فاتحة حلكي على كلام عذراء
كانت تحجي وعيونها تلمع وتنطق قبلها بالشغف
يالله اشكد جميل الحب بعيونها من وشفت خلال
لمعة العين ونبرة الصوت المرهفة
وهي تهمسلي عن مدى حبها لعدي
خلتني اشوف بيها لوحة خاصة تصلح تصير منفذ
للعاشقين ااااااااااخ من كلامج يا عذراء

عذراء : عزة بعينج يسهوة شوفي شلون نسينا نفسنا بالحجي ووين ودتنا رجلينا بأخر البستان كلة من وراجً
: اني شلي غرض ليش ما تكولين كلة من ورة الحبيب
: خايبة امشينا لا تغرب علينا الشمس
فجاءة سمعنا صوت صيااااح عالي
ركزت عرفت هذا صوت عياط نور اختي والبنات
عذراء بشهكة وتضرب على صدرها
: عززة العزاني هذا بس لا هد عليهن الجلب (الكلب)
سهى بخوف : لج يا جلب لا عفية شنو عدكم جلب
شفت عذراء ركضت
: خايبة اي عدنا جلب بوليسي مال حراسة
هذا بس لا ناصر هدة من السلسلة
يمة صار صوت صياح البنات قريب علينا
التفتت على جهة الصياح
ما لحكت اشوف بس سلمى ورشا ونور يركضن ويعيطن : لحكووو اجانة الجلب
لمحت نور اختي مرت من يمي تركض
تصيح بعالي صوتها
(انجووووو بأروااااحكم )
ما اشوف الا غبارها
عذراء وهي تلزم حجارة وتركض
: خايبة ركضي يالفاهية لايعضج الجلب
وتنجلبين
والله حسيت رجلية من الخوف بادن اركض ونعالي
زلك مني وسمعت صوت زلم يركضون بتجاهنا
ولمحت بطرف عيني خيال اسود هو اني شفتة
وتخبلت و طلعت من فروع ديني
وظليت اركض واصيح يبووووووووو
ما حسيت الا على كزازة شكت رجلي ووكعت بالكاع
التفتت وشفت جلب لونة اسود اجة يركض بتجاهي
ومطلع لسانه و يلهث غمضت عيوني وتشاهدت
ربي شردت من بغداد لهنا علمود الامان
اجي هنا واموت على ايد كلب
فجاءة سمعت صوت رجال شحت الكلب
مدري شنو صاحلة يمكن هذا صاحب الكلب
لان اشو هذا سمع صوت الرجال وكعد بمكانه
اقتربت خطوات الشخص من عندي
وبديت افتح عيوني
وية كل خطوة افتح شوية
رفعت راسي واجتي عيني بعين اخر شخص كنت اتوقعة اشوفة هنااا
: ثائرررررر!!!!!!!
ثائر صدمة العالم كلها متجمعة بعيونة
: سهوووووة !!!!!!!
شفتة اقترب مني وهو متعجب على وجودي هنا
واني الي راح انشل من الصدمة هذا شيسوي هنا
وبهذا المكان بالذات
: سهوة شجابج هنا شعندج شتسوين
انتبهت على وضعي جنت گاعدة بالگاع ولازمة رجلي الي نزفت دم من اثر الكزاز (زجاج مكسور)
وحسيت بألم واتجمعت الدموع بعيوني
وضاعت علية السالفة ما اعرفهن دموع الصدمة لو دموع الوجع
سهى : المفروض اني اسألك انت شتسوي ببستان عمو قاسم
هاي مزرعة عمي
ثائر
بدت اللمور تتوضح كدامة وعرف سبب وجود سهى
بسلفهم
لااااااااا يالله معقولة يعني
خلصت الدنيا وما بقى بيها مكان الا هذا
ولا بقى ناس الا قاسم
حتى هاي البنية بالذات تصير بنت اخوه
والله راح اتخبل ما جاي اكدر اصدك
غير حظ اغبر جابها گدامي
: ولج يسهوة هو انا جنت گوة لازم روحي عنج
جنت اصبر روحي اكول
الحمدلله انتي مويمي وبعيدة عني
يعني لا اشوفج ولا تشوفيني
وهسة الدهر جابج وشمرج جدامي
جا هسة من اسوي بيج سواية هنا
اكو واحد يلومني
سهى
اتملكني الخوف من اول لحضة شفت بيها عيون ثائر
الي صايرة نار كبرة من الغضب
بس اتصنعت القوة كدامه
: شوف اذا اتجرأت واقتربت مني والله اصيح واخلي
عمي قاسم وابن عمي واخوي يجون يكسرون ايدك
مو عبالك تايهتلك
طبعاً هي تحجي ورجفة صوتها الخايفة خانتها
اقترب مني بلمحة بصر مثل الزوبعة
وشفتة صار وجهة قريب على وجهي
ولزم راسي بين ايديه
وصرنا متواجهين بالجبهات
: هَـا يسهوة اشو جنك السانج طويل
تراج حجيتي بكلام اكبر من راسج
منهو الي يكسرون ايدة
: اااا ةة محد
ضغط عليها وزمخ بيها بصوت عالي
: احجي منوووو
سهى والعيون انترست دمع
: اة اة اة على الكلب كنت اقصد الكلب
ثائر صدمني ردها
اااخ الله ما اعرف اضحك على ردها الطفولي
لو اخنكها
: شعندج جاية هنا تنشدين الامان من عند عمج قاسم
جا انتي خيالج موش رجال ولازم يوفرلج الامان
لو جبتي رجلج الشيبة وياج هنا
وحق الحق اذا جايبة الشايب وياج هنا
والله ادفنج بارضج انتي وياه فاهمة
حسيت صرت خرسة وما كدرت احجي شي
رفعت ايدي الي جنت لازمة بيها رجلي
ومسحت دموعي
شفتة اتسعت عيونة ودنك وجهة وباوع لرجلي
: سهووة رجليج مجروحة !!!!
رجعت لزمت رجلي
وانتبهت على ايدي متروسة دم
شفتة مد ايدة على خدي بدون ميحس على نفسه
ومسح خدي من دموع ممزوجة بالدم
كانت لمست اصابع ايديه خشنة على خدي بس بحلضتها حسيت سرة بجسمي تيار الكهربائي
صرت ارجف من لمست ايده
بس هاااا مو رجفة خوف لا هاي رجفة نوع اخر كانت طعمها بي حنان وامان
لزم رجلي وكعد ينظفها من الكزاز على كيف وبهدوء
فجأءة سمعنا صوت عذراء هي وسلمى يصيحن باسمي

ثائر
نسيت نفسي نسيت اسمي نسيت المكان الي احنا بي
نسيت كلشي
ما اشوف كبال عيني بس هاي الجمارة الي
من يوم يومها مستولية على كلشي بية
ما كدرت اتمالك روحي ضعفت كدام عيونها
ربي ليش تخليها تملك السلطة علية وتتحكم بية
سمعت شهكت الم طلعت من بين شفايفها
وحسيت على روحي بديت اوجعها

كنت موجوعة وانتبهت على
صوت بنات عمو قاسم
عذراء وسلمى صار قريب علينا
كام من مكانه
: خلج انتي هنا ما يجوز يجن البنات ويشوفني كاعد يمج تجيج حجاية وانتي ما ناقصة
عايني علي وسمعيني زين
مرة ثانية ما اريد اشوفج طالعة برة بيت عمج
تلزمين مكانج وتكعدين
ترة انتي هنا مجرد خطار ظلي
مجابلة البيت وبس
مو كاعدتلي تسرحين وتمرحين بالبستان
عدالج جاية سفرة
احسنلج لا تخليني اشوفج وستري على نفسج
ما دام بعدها النفس عليج طيبة
راح ودار وجهة ومشى
ظليت اباوع وراه
صار عندي شلل باللسان
ما اعرف ليش عاند وياي ومقبل يطلق الكلام
.................................
.................................
...............................

رجعت للبيت وانا احس نار موجرة بصدري
ما راضية تنطفي ولا ناوية تخمد
صرت الوب من القهر
من احتركت عشيرتك يقاسم على هالعملة
وين جانتلي
اي مو جانت ببغداد وبعيدة عني
كلت ارجع هنا والعق الجرح
واداويه وكلها شغلة ايام
ويبرة الجرح وانسى
صحيح صعب انسى بس على الاقل البعد يصلح
مسكن لألم گلبي ويضمد جراحة
بس شكلي الله كاتبلي شلة الحال وصارت سهوة تطاردني بكل مكان
ما كفاهة نومي واحلامي لحكتني حتى لهنا بملاذي
دخلت للبيت وما شوف كدامي من القهر
اصطدمت برواء اختي كانت شايلة صينية جاي
:شبيج عمية ما تشوفين گبالج
: والله شفتك بس انت دعمتني جنك متقصد
شفتها رجعت الصينية عالكاونتر
وكعدت ترتب باستكاين الجاي
اي صدك الله جابج
: اكول رواء اريد اسألج سؤال

:كول خوية اسأل
تحجي وتعدل بالصينية
: منو اجة من بيت اخو عمي قاسم
: جا انت شنهو ما شفتهم اليوم بالعزيمة
: اكلج جاوبيني بلا اسئلة
اشو هاي اسألها تجاوبني بسؤال
: اوكف بس اصبر علية ولا تعصب
خلي احجيلك
هذولي يا محفوظ السلامة بيت اخو عمو قاسم
: لا والله حلفي والله مرتين
اكلج تحجين عدل لا اعلمج شلون تحجين
: اي دصبرلي جايتك بالحجي
شوف انا عني شفت بس امهم وثنين بنات واخوهم الي وصلهم
كالو عندهم اخو مصوب ببغداد بالمستشفى
وعندهم اخو ثالث بالخارج
واختهم الثالثة ببغداد متزوجة وباقية وية عيالها
: زين سهوة ليش ما بقت ببغداد عند عيالها مو هي هم متزوجة
رواء بتسائل
: شنهو وحش منين تعرف اسم بنتهم سهوة شنهو انت
عندك معرفة بيها
: لااااا لا ھٍَھٍُ منين اعرفها بس انتي توج كلتي اسمها بدون ما تنتبهين
حكت راسها بشك: اي بس تعال انت ياهو الكلك
سهوة متزوجة
: هااا شدراني انتي ستوج يمكن حجيتي
: لااااا عاد لهنا وحدك راح تشككني بعقلي
وحش شمالك تحجيني كلام ما حاجيتة
شوف يبن الحلال ترة همة ما عندهم بنية متزوجة
الا اختهم الثالثة الي هي هسة ببغداد
ونور مخطوبة لناصر
وسهوة خاف عدالك شفت عندها طفل
تراه هذا من زوجها المرحوم
ثائر بصدمة زائد شك
: شنهو يعني سهوة ما متزوجة
: لا ابد ولا متزوجة حتى انا سألتها
كالت ماكو بالطيب نصيب
: انتي متأكدة
: ما اعرف شجاك تسأل هاي الاسئلة الغريبة
بس متأكدة مليون بالمية مثل ما انت هسة واكف كدامي

تركت المطبخ وطلعت مثل المضروب على راسي
اوكف لحظة ثائر شنهو شجاي يصير وياك
شنو سهوة ما متزوجة
زين ليش من سألتها ما نكرت
اوكف اوكف لحظة عسااااااااااااف وين عن كل هاي الهوسة ليش انا اخر من يعلم معقولة عساااف يدري
وما يكلي
بس على الاكيد هو يعرف بسهى ما متزوجة لان سارة
زوجتة وصديقة سهى
لااااااااا يالله
.............................

جنت نايمة وسمعت صوت نقالي يدك
رديت بدون ما اشوف الاسم
فجاءة اجاني صوت صياااح سارة المفزوع
: لج سهى لحكي ثائر عرف بيج ما متزوجة وحرك الدنيا على راس عساف
ولج اتضارب هو وعساف بباب البيت
كمزت من مكاني بشهكة
وخوف مصدومة من الي جاي اسمعة
اريد استوعب كلامها

: اوكفي اوكفي بس لحظة
احجيلي وحدة وحدة
مدا افتهم كلامج بس عياط منو هجم عليكم
وعساف شبي وية ثائر
سارة وهي تجر نفس عميق

: شوفي
.................
سمعنا صوت نقال عساف دك ورد عليه عساف
كان المتصل ثائر
وكلة انا واكف بالباب اطلعلي انتظرك
شفت عساف كام من مكانة ولبس الترواكة
وطلع بالباب ورة لحظات مو اكثر سمعت صياح مال زلم بالباب ركضت لعند باب الشارع مديت راسي
شفت ثائر زانك عساف من ياختة
ونازل دك بوكسات ورفس بعساف
بالاول ما فهمت شي بس اسمعة يگلة
: لا يالنذل لااا يالناقص ولك انت عاررر
وناكر جميل كفر سميتك صديقي
ولك انت طعنتني بظهري شلون اسميك
ظلعي وتالي اول من طعني انت
اشو جنك صرت تنبح علية مثل الجلاب التركض وراية ما هكيتها منك
ولك شلون انطاك گلبك تشوفني
انازع الموت كبال عينك وما رفلك جفن
جا ما گلت هذا صاحبي خلي ابرد گلبه
وافهمة الموضوع
بس تعرف شنو امداك يالاغم
مرتك طلعت اخير من عندك
على الاقل تعرف الاصول
وصانت العشرة
وية صديقتها
ما قبلت تفرط بصديقتها لاخر نفس
عكس صحبتك الغبرة وياي
خايب انت فشلت وياي من اول اختبار
عساف وهو يترنح من اثر الضرب
: يمعود ثاير اوكف خليني اشرحلك
احلفك بصحبتنا بس اسمعني
: اسف حلفتني بارخص شي عندي
صارت صحبتك وياي اتفهة شي على گلبي
انت خسرت فرصتك
جانت عندك سنين كدامك وما حاولت تشرحلي
جايني هسة من عرفت تريد تفهمني
ههه والله مكلف حالك واجيت متأخر
شوف يالناقص بعد انسى شي اسمة ثائر بحياتك
وامسح ارقامي من نقالك
واياني وياك تحاول
وياي وتجي تبررلي فشلك
ترة انت بعدك ما تعرفني زين ولا شايف
ثاير العدو فاحسنلك اتقي شري

................................
: لج سهى شلون بية شسوي مو هنا المصيبة
: هاااا بعد شكو شصار فوك هاي المصايب كلها
: لج كلها بجفة وعساف الي صارلة يومين عازل نفسة بالغرفة وما يقبل يحجي وية اي واحد
ولا يقبل ياكل ولا يقبل حتى يحجي وياي
يكول استاهل كل الي جرالي اني نذل
وفرطت بعضيدي وصديقي
ومشيت ورة كلام النسوان
وما حسبت حساب لخوتنا
اااااخ الله صرت اعض بيدي من الندم واتمنى الزمن يعود بيا واغير الي صار
.....................
سهى بقلة حيلة : ما اعرف شحجي اني فكر وما عندي حظ وشكلي عميت حتى عليج وعلى زوجج
ما جنت حاطة ببالي ان الموضوع يكبر لهالدرجة
ويزيد عن حدة
سارة بحزن : لا عيني لتضوجين هذا شي الله كاتبة عليهم وانتي صرتي سبب ما بيدنا شي نسوي
نهيت الاتصال من سارة
وصرت اضرب اخماس باسداد
طبعاً اني من يوم حادث الكلب واني ما عتبت باب البيت
حتى من تطلب مني عذراء اروح وياهة حتى تخبز
جنت ادبرلي. ميت الف عذر
لحتى تعفيني من الخروج
طبعاًاخوي امجد رجع سافر لبغداد لهناك
حتى يبقى يم اخوي احمد الي ظل بالمستشفى
ومناك يكمل اجراءات السفر ويصفي شغلة
وعمام حسن الى يومنا هذا ما منهم خبر
وحسن ابني حبيبي انطلق وية الجهال
يلعب ويركض وشكلة متونس عالسالفة
وامي خطية اشوفها تعبانة ومتقيدة هنا ممرتاحة
رغم عمو قاسم وزوجتة الله يرضى عليهم كامو بينا بالصلوات وما قصرو ويانا
بس الانسان ما يرتاح الا ببيتة
وخطية امي مرية جبيرة وانجبرت تترك بيتها وراحتها

ووناصر ما كام يتواجد هواي بالبيت خطية علمود ناخذ راحتنا احنا البنات
حتى اولاد خوالهم مكامو يفوتون على البيت مثل قبل
حسب كلام سلمى
اما البنات والنسوان
لا هذني مسويات بيت عمو قاسم مزار كل ساعة جاي فوج ورايح فوج والحمدلله
الله يكثرهم ويديمهم
ما اعرف ليش احنا مستغربين واحياناً نتضايق
من هاي الاجواء احنا نسميها بمفهومنا هوسة
لكن بمفهومهم يسمونها لمة احباب
يمكن الصوج بينا احتمال
لان بابا عودنا على الوحدة والانعزل
عن الناس
فلذلك نشوف الوضع من هاي الزاوية شيء لا يطاق
لكن لو اشوفها من زاوية بيت عمي قاسم
راح اشوفها شي جميل ويشرح الصدر
اما عن عصفوري الحب نور وناصر
لاااا فهنا تكمن المفاجئة الوضع عندهم اتطور وصارت بينهم مواعيد ولقاءات
لكن كنت دائماً اراقبهم وتحت ناظري
اراقبهم ليس من باب الفضول لا
وانما كانت مراقبتي لنور تكدرون تسمونها العين الحارسة ما اريدها تقع بالخطاء الي وقعت بي اني
ماكو شي مضمون بالدنيا
غلطتي علمتني هواي اشياء
نزلت يم البنات
وكمت اشم شم اخبار عن ثائر
واطقس اريد اعرف وين اراضي
مو فضول وانما خايفة من ردت فعله
لان هذا الشخص بالذات ما تنحزر ردود
افعاله ولا اعرف شنو راح يبدر منة
اي تصرف بتجاهي
صرت اتسمع لاحاديث البنات
من غير تركيز
لفت انتباهي باثناء كلامهم يذكرون اسم الوحش
بالبداية خفت
يعني شنو عندهم وحش غير الكلب البوليسي
شنو هاي وين كاعدين بغابة
بعدين سمعت نور سألت : شنو وحش وينة شنو هذا ياكل بشر
ظلن البنات يضحكن على كلام نور
سلمى : لا ولج هذا ابن خالنة جبيرالعائلة
هذا الامر الناهي بعد جدي الشيخ مزاحم وابوه والكل يصيحلة الوحش
لان قاسي ومتوحش لو تشوفينا تموتين من الرجيف
انا لحد هذا يومي ما حاطة عيني بعينة
ولجن اختة رواء تكول اربعة وعشرين ساعة عيونة حمر من الغضب
نور : حشة هذا طلع دراكولا مصاص دماء مو ابن خالكم
هههه خرب حظج نور ولا تبطل

وعدت يومين على اتصال سارة واني بديت اتناسة الموضوع وكعدت اقنع بروحي واكول
اهووو اني شخبصت روحي
وانطيت للموضوع اكبر من حجمة هو قابل شراح يكدر يسويلي واني بين اهلي
خلي اعلى ما بخيله يركبه
عذراء: يا حلوة وين صافنة اشو كثرانة صفناتج هاي الايام
: هاا لا والله هيج افكر اكول شكد بقى على جية اخوي احمد
: سكتي راح تنسيني على شنو انا اجيت يمج
سمعي اليوم بيت الشيخ مزاحم جدي عازمينا كلنا على الغدة وابوي كال جهزو حالكم ورة صلاة الظهر حتى نروح كلنا
والله اذن الظهر وصلينا وحضرت نفسي ولبست جوة الجبة الاسلامية مالتي دشداشة مثل البنات لكن
نوع تركي
اجة ناصر علينا واخذنا رحنا مشي للبيت الجبيرة الي
لفت انتباهي اول ما وصلنا على هنا
كان مو بعيد على بيت عمو قاسم
دخلنا واستقبلتنا مرية جبيرة بالعمر
ينادونها بيبي
عذارء: شوفي هاي جدتنا ترحين تبوسينها من راسها وايدها هاي اداب التحية الي كلنا نطبقها
راحت قبلنا عذراء وباوعت عليها شنو سوت ورحت وراها وسلمت على العجوز
الجدة: يمة يمة تعاي جدة خلي احبنج
اقتربت منها وباستني من خدي
يا ما شاء الله انتي مرت نويصر
عذراء بصوت عالي : لا بيبي مو هاي مرت ناصر ذيج
واشرت على نور
: ويعة حتى ويعة (وجعة)
طرشتي اذني يالخبلة
شنهو عدالج ما اسمع
خايبة اسمع احسن منج ومن ابوج
ظلينا نضحك على كلام جدتهم
والتفتت بعصاها وضربت عذراء على رجليها
: ويعة امي من ضحكتي بلية ضروس
(بدون اسنان)
شردت عذراء واخذتني وياهة للمطبخ يم باقي البنات الي ديساعدون بالعزيمة
سمعت صوت بنية متفاجئة
صاحت
:ست سهى ست سهى
التفتت على الصوت واتذكرت سرى طالبتي
ركضت علية وحضتنها
:لج سراوي حبيبتي شلونج ان شاء الله مرتاحة هنا
:اني بخير الحمد لله
ست شلون صدفة
طلعنا قرايب بس من بعيد
واحنا ما نعرف

كعدت اسألها عن مكانها وشنو سوة ابوها
علمود معاملة النقل
وصرت اتبادل وياهة اخبار صديقاتها
قاطعنا صوت رواء
اجتي لعندي
: خية سهاوي تعاي شوية اريدج تصعدين وياي
فوك تساعديني انزل الفرش من المخزن
: صار من عيوني
: تسلم عيونج
رحت وصعدت وراها ودخلتني بغرفة
وكالت انتظريني هنا
لا تطلعين شوية واجيج
بس قبل لا تطلع
كالت : عفية سهاوي مو تزعلين علية
والله اني عبد مأمور
راحت وتركتني
شنو قصدها ما افتهمت عليها شتقصد عبد مأمور
ما اهتميت
هو اني ثلثين كلامهم ما افهمة
التفتت اباوع على الغرفة الي اني بيها جانت كلش حلوة غرفة نوع تركي بس شكلها رجالي
كمزت من سمعت صوت الباب انسد وانقفل
التفتت ووووووووووووو

يتبع