ثمار العار بالحلال الفصل التاسع 9 - بقلم نهى

ثمار العار بالحلال
للكاتبة nuha-d-h

سهى

عدت الايام والاشهر وصرنا قريب على نهاية امتحانات
الكورس الثاني
وثائر صارلة فترة مكام يجي

اتعودت انتضرة يجي
حتى اشوفة من بعيد
اصبح بينا موعد فقط بالنظرات بدون اتفاق
بدون منحجي
لكن هالفترة مكام يجي صارلي شهر ما شايفتة
صرت ادور عليه بعيوني بكل مكان اكعد بي
افتقدت اهتمامه
صرت كل يوم اداوم بالكلية ابحث على طيفه
معقولة حبيتك يثائر
اي والله شكلي وگعت بحبك
ياربي فدوة رحتلك
زرعت حبة بگلبي
وبدت بذور عشگه تنمو بوسط روحي
شلون بية ياربي وروحي اتعلگت بي

صارت الايام تمشي وتعدي علية
واني اداري بحبة بگلبي مثل الام الي تداري بطفلها
الصغيرشايلتة بين ايديهة وتضمة جوة عباتها تخاف عليه من الشمس هذا حال حٍٍِْــًبٌٍـــِٓېٍٓ وياك يثائر
خايفة ما اعرف ليش يمكن لان الماضي يطاردني
احس روحي مو من حقي احب وانحب

بس رغم ذلك غصب عني وگعت بحبة
يوم عن يوم
صار الامل يكبر بگلبي
وحياتي صارلها طعم ثاني
انتبهت لسارة تراقبني بعيون فضولية
لان صارت تصرفاتي غريبة
والابتسامة الي على وجهي واضحة مال وحدة
عاشگة وولهانة

رجعت لبيتنا واني فرحانة اكتشفت
اني احب ثااائر اتمنى اصيح بعاااالي صوتي
واخلي الناس كلها تسمع اني احب هذا الشخص
وصلت للبيت
حسيت حتى بيتنا صار حلو بعيوني
دگيت الباب
فتحتلي نور
حظنتها وعصرتها حيل بين ايدية
وتركتها بس ترمش بعيونها
لزمت راسي عبالهة مصخنة
ودخلت للمطبخ شفت امي دتطبخ
رحت حضنتها واني ابتسم
ام سهى تباوع على بنتها
ام سهى بگلبها
يارب دوم الفرحة
صرت احب الناس كلها
يعني معقولة الحب هيج يسوي بالواحد
ويخليه يشعر بالسعادة طول الوقت

رحت صعدت فوك لغرفتي وطلعت
دفتر مذكراتي القديم حسيت رجعت ذيج البنية الي
سرقو منها احلى سنين بعمرها
لزمتة ونفضت منة التراب
تعال لحضني يا مستودع اسراري
حضنتة لصدري وصرت ابوس بي
تعال اريد ارجع ادون وياك سنين عمري الضايعة
واحجيلك عن الي بگلبي
صرت اتكلم مع دفتري
تذكر من كنت اكتبلك عن احلامي
وشلون يكون شكل مالك الگلب بذيج ايامي
تعال خل احجيلك عن اخر اخباري

يادفتري اريد اامنك على سري
بين ثنايا الورق
اني بديت احب وقلبي انسرق
حٍٍِْــًبٌٍـــِٓېٍٓ لمحبوبي ها قد اشرق
صار وكبر بنظرات عيون مملؤة بالعشق
تعبر عن الف كلمة بكلمة لها القلب قد تألق ورق
....................

نور وهي شايلة حسن
-وين صافن الحلو تعاي شوفي ابنج شمسوي
سهى وهي تحضن ابنها
-شنو شبي ابني شمسوي بس تتبلون عليه حٍٍِْــًبٌٍـــِٓېٍٓبي
- لج جان يلعب بالشكر وگالبة بالگاع ومسوي مسرح
لگيت امي تدردم عليج
ومرت قتيبة توز بيهة
لمياء-اي هسة هي دارت وجهة وصعدت فوك غير تاخذ ابنها وياهة عافيتة لوحدة جوة عودك شيسمونها
هاي
تمارة وهي تكنس الكاع
-شنو السالفة ترة هو جاهل حالة حال جهالنا باقين جوة يم خالتي يلعبون مالة داعي هالحجي الزايد
...........
سهى-عمي الله يرضى عليها تمارة شكد انسانة خلوقة
وهاي لمياء شوكت تنكسح وتسافر عابتلها والله اذا سافرت اشمر سبع حجارات وراهة حتى مترجع

نور -هههههههه هسة الي يسمعج راح تشمرين سبع حجارات ورة المرية عبالهم رايحة للحج وكاعدة ترجمين الشيطان ههههه
سهى -ههههه والي يشوفني اشمرهن وراهة اكلة جاي اخذ بروفااا اتدرب عالحج
اووووف
-(((((((((()))))))))))
عدي وهو يباوع على اخوه الوحش
شنو لابس
ثائر او ثاير مثلما يسميه جده الشيخ مزاحم
بي طبع من يكون بديرتة يتخلة عن ملابس الحضارة
ويلبس ملابسة المعتادة
بنطرون جينز تعبان كاحت وبدي اسود حاضن ثنايا الجسم
مفصل لياقة جسمة
بحيث يلفت الانضار لعرض اكتافه وسع صدره
وكان دائما يلبس الشماغ على راسه ويلفة
بالطريقة العمانية المعتادة.
ملابسه وطبرة الحاجب
كانت الطابع الي يميز الوحش بالسلف
الي مايعرفة يعتقدة واحد من قطاع الطرق (سلاّبة)
........
ثائر يرفع تك حاجب بتسائل
-شنهي راح تظل صافن بوجهي لو تصيد يالله راوينة
شطارتك يالضبع
عدى وهو يرفع البندقية
-والله ياخوي شوفت عينك ماكو خضيري بالجو
(الخضيري نوع من الطيور)
ناصر ابن عمتهم ساجدة
البالغ من العمر ٢٦سنة
ناصر -ليش انت حول جا موش الوحش صادلة اربعة خضيري
عدي وهو مغتاظ منة - خايب ما توخر منا لا افرغ البندقية براسك انت واختك
ناصر وهو يعرف بالسالفة مال اختة وابن خالة
-ههههههههههههههه شوف هاذ كل ححاية والثانية
يدور الحجة حتى يبطل وما يتزوج اختي
خايب لو تموت ما تلكة مثل عذيرة
عدي -استغفر الله ونوب بعد گالبين الاسم جانت اسمها عذراء هسة حتى الاسم طكوه كمياوي وتشوه
خرب حظي ((استغفر الله جنان)) هم دگت
ناصر- بوووووية جنان منهي شنو لايكون جبت مرة براس اختي والله افرغ الشاجور براسك
واخلي اختي تعيش ارملة ولا زوجها يتزوج عليها
عدي وهو يهز بيدة ويحجي وية ثائر
-هاااااك يالله استلم بالله هذولي شحجي وياهم
والتخلف راكبهم من ساسهم لراسهم اذا اخوها هيج
دلخ الاخت شلون راح تصير
ناصر بغضب
-شوف ياولد الخال مو شفتني ساكت عدالك ما افهم عليك لا تستهان بولد ديرتك تراك انت واحد منهم
مو تشوف نفسك علينا عدالك ابن مدينة ودارس
ترة كلنا ولد تسعة
ناصر ياخذ بندقيتة ويتوجه لسيارتة
-يالله شباب انة اترخص
منتصر اخو ثائر الصغير العمر ٢٤سنة
-ناصر ناصر انتظر اخذني وياك
بس قبل لا يروح التفت على عدي
-اشو جنك يخوي نسيت نفسك تراك ابن هاي الگاع الملحة ماهي شيم رجال يستعار من اصله
عافهم وراح
ثائر-شجاك يعدي مو على بعضك هذا موش انت شغيرك لاتكون الولاية غيرت اطباعك
......................................

سهى
اشو طول غيابة علية هالمرة المشكلة اني ما اعرف
عنة اي شي
يا ربي اشتاقيت لعيونة
اتعلمت على نظراته وبمراقبتة الي
طبعاً بنظراتة ايقض بداخلي شعور
واحساس جميل على گلبي
وصار هذا الشعور يوم عن يوم يكبر
بعدما كانت حياتي عبارة عن صحراء قاحلةً
ما انكر اني مثلي مثل اي بنية تحلم تشوف
الاهتمام بعيون الرجل
انتبهت على نفسي غركانة بحبة و بهواه وحبة
صرت ادور عليه اريد اسمع بطاريه اريد اعرف اخباره

اتمنى اسأل سارة عنة لان هي عندها تواصل مع عساف بس والله استحي

-اكول سارة فد سؤال هو صدگ مسافر مثل مگال عساف وشيسوي مسافر هو اصلاً وين ساكن

سارة -هلة هلة بدة شغل الفضول
ترة الفضول باتجاه حياة شخص اخر احد علامات الحب
ترة حسو من وراج انتي واستاذ ثائر صرنا اني وعساف مرسال الغرام
بس احلى مرسال غرام
سهى-هاي شنو اشم ريحة خيانة من وراي
سارة ببتسامة- اي سكتي لتخجليني يعني هو احنا صحيح حلقة الوصل بينج وبين الاستاذ ثائر
بس خو منخلص وقتنا نحجي بيكم لا هم مرات نحجي
باشياء خاصة بينا
سهى-هلة هلة وهاي من شوكت
-هاي من شمرتي نفسج كدام سيارة الاخ عبالك شايفتلج ربع دينار بالگاع وفضحتينا

............
رجعت للبيت مثل الي مضيعة شي او فاقدة شي مهم
يعني هي مجرد نظرات
ليش هيج گلبت كياني احس بدخولة بحياتي
صار بيها الوان مثل الامل
دخلت على بيتنا وشفت ابني حسوني الدبدوب فديتة
ركضلي
من شفت ابني اتذكرت الماضي وحسيت بشعور مثل الي جان يحلم حلم جميل ويگعدونة منة

يعني اني بكل عقلي جاي افكر بشخص واحلم بي
واني عندي طفل والماضي كلة اظلم
اقترب مني وشلتة طبعاً عمة جابة النا وبقى عندي اربع اشهر واني طايرة من الفرح لان جدتة اجرت عملية للقلب والتهو وياهة صار حسن
الشي الوحيد الي يدخل البهجة على قلبي
-هلة بحبيب امة
امجد-يا حبيب امة كولي مجرم الامة
لج سگط ولدي بالعظ شمخلفة كلب خرب
والله لوما عيونج جان هسة معلكة بالبنكة
طبعاً حسن ابني كلش حلو ودبدوب
وكلماتة وتصرفاتة خلت الكل يتعلق بي
امي امجد نور ريم حتى قتيبة
بالله احمد ملتهي راسة والف سيف الا يطلك مرتة

طبعاً
لا زلت اعاني من كلام الناس علية
ابد مينسون تاريخي مرات اتمنى اسويلهم غسيل دماغ حتى ينسون الي صار بس وين هيهات
شكل الماضي راح يظل يطاردني
نزلت من غرفتي وسمعت صوت امي
ام سهى-لك يمة قتيبة لاتشلع گلبي وتهاجر
اكعد واسكت الغربة صعبة يايمة

رجع قتيبة وفتح مرة ثانية موضوع سفره
يريد يقدم على لوجوء خارج العراق هو وعائلتة
وامي ظلت تدك وتلطم
قتيبة-يوم والله اطلع واسحبج وراي
احنا النا الاولوية بتقديم اللجوء لان بابا كان قاضي واغتالوه
واحنا كعائلتة تعتبر سلامتنا مهددة
انطرح الموضوع وكان بين من يشجع الفكرة وبين الرافض للفكرة
بس اني انقهرت لان مو سهلة على الواحد يعيش بالغربة ولاسهلة على الاهل يفاركون ابنهم علمود يحافظ على سلامتة وسلامة عائلتة ببحثة عن حياة افضل هناك
امجد -احسن شي تسويه
والله العيشة هنا. متنراد لا بلد بي خير لافرص عمل
متاحة للشباب
هذا انة صارلي شكد من استلمت شهادتي وهسة اريد افتح مشروع بس مشكوك حلكي لحد الان مطلعت الموافقة وبعد وراي كومة عراقيل يالله تخلص
منا لحد ما انفذ المشروع يكون ممسوح بية الكاع مسح
سمعت نقال امي دك
ورحت عليه شفت سارة صديقتي تتصل
اخذت النقال وصعدت اني وحسن فوك لغرفتي
-الو هلو سارونة شلونج
-لج جبتلج اخبار عن الحبيب الا بشدة
قبل شوية جنت احجي وية عساف وبأثناء الكلام
كلي تدرين ثأئر يوصيني كل يوم اراقب سهى وينتظر مني كل يوم اتصل عليه واحجيلة شنو تسوي ووين تگعد وويامن تحجي
-عزة بعينة شنو قصدة يخلي عساف مراقب على تصرفاتي وحركاتي هذا الظاهر ميقبل بكلمة لاا كجواب
طبعاً من سمعت كلام سارة گلبي صار مثل الفراشة
بس يرفرف احس بروحي فوك الغيم يعني مناسي سهى
بهالفترة اوووووف
-هههههههه لج يكلج عشيرتة يسمونهم قبيلة حرس الحدود
سهى -اي وهو شنو عرفتي عنة
سارة-بالله شو علي صوتج عدل
اشو صرنا نحجي بصوت رقيق ام كفشة
عيني ترة اني سارة صديقتج مو ثائر
- ترة عاتي اني من الله هشكل سوتي ناعم
سارة- ههههه لاحبي هذا شلل باللسان مو دلع
هسة على كلٍ عمرة ٣٠سنة هو الاخ الثاني وعندة اربع اخوان واثنين خوات
وهو لازم حلال اهلة ويجي هنا لبغداد حتى يشرف على
حلالهم هنا من ضمنهن محطة تعبئة الوقود القريبة عالكلية

-
سارة تحجي واني وية كل كلمة تنطقها اگطع الرجاء
واحس بخيبة امل
لان مستحيل واحد يملك هيج مواصفات
راح يقبل يربط اسمة بية
اتمنيتة شخص عادي وبسيط حتى يكون سهل الارتباط
اهووو شوف اني والله بطرانة يا ارتباط
هسة الي مثلة راح يشوفني نزوة عابرة بحياتة
استغفر الله هسة هو ليش ظهر بحياتي وخلاني
ابني امال واحلام وهمية مالهة اساس

-شوف الحظ ادري هذا منين طلعلي
-انتي صدك مو وجه نعمة وين شايفة هيج شخص مهتم بيج ويسأل عنج
-عمي دتطيري انتي الثانية يا اهتمام يابطيخ هو اني البية كافيني ترة صدكي هذا مبين عليه يريد يلعب وياي
عبالة بنية سهلة بس هذا ميرتاح
الا يبطلوني اخوتي من وراه
خلصت المكالمة وية سارة
ورحت نمت بصف حسوني حضنتة وشميت ريحتة
يمكن احلى شي صار بحياتي من هاي المعانات هو حسوني
نمت وعقلي وگلبي لاول مرة بدة يخفق للرجل الي
التهمني بنظراته وصرت اسيرتة بمجرد ما وقعت عينه علية
احس بنظرة وحدة منة صرت ملكه روحاً
وعقلا ً وقلباً
هذا يمكن لو يفكر يقترب مني احتمال يغمى علية
هههه اوووف
نمت ومحسيت على صوت المنبه من دك
وفزيت على صوت امي تكعد بية لان فاتني الوقت
كعدت مثل المخروعة
بحيث ما اعرف شلون حضرت ملابسي بسرعة بسرعة وگوة البس بيهم شنو السالفة حشرت
ولا انتبهت على نفسي شنو لبست
بس ركزت على روحي لابسة الزي الصحيح بس احس بروحي مبهذلة من الخبصة
ونزلت اركض وصعدت بالسيارة
وسارة تباوع علية بتسائل
-مو من عوايدج تتأخرين
عدلي شالج مهوس شعرج طالع
سهى وهي تعدل بشالهة بالسيارة
- سكتي نمت متأخرة البارحة ومسمعت المنبه من دك

احجي وية نفسي.....
كلة من وراه سهرت الليل كلة افكر بي وبتصرفاتة
واتسائل شنو نيتة وياي هل ياترى اني نزوة عابرة
لو فعلاً هو مهتم الي
وصلنا ونزلت من السيارة
وسمعت صوت سارة شهكت التفتت عليها اريد اعرف سبب شهكتها
-شنو شبيج خوفتيني شصاير
-لج سهى انتي شفتي روحج بالمراية قبل لتطلعين من البيت
-لا ليش شكو شبية عفية احجي خوفتيني
وجهي بي شي
-لا بس التنورة والقميص الي لابستهم كارثة الكوارث صايرات على جسمج لطش
انتبهت على روحي
عزة بعيني انتبهت على روحي كنت لابسة قميص نوراختي وتنورتها لان اثنينة نفس الزي تقريبا رصاصي وابيض
يبوووووو عزة بعيني
اجيت ابجي صحيح اني ونور اختي نفس القوام لكن اني شوية اترس منها بس عزة بعيني
حسيت على نظرات الشباب
اكلتني اكل اي لان جسمي ملفت للنظر والتنورة مبينة التضاريس الانثوية والقميص مقاصر نفس الحالة
كوة مشيت من المستحة
-سارة عفية ظلي امشي وراي وصليني للمحاضرة
-اي مو الحماية مال الخلفوج اني بالله شو امشي كدامي
سارة وهي تقلد على مشية سهى
-لج عزة بعينج سهى على هالدگة لج تجيبن التايهة اليوم بس الله يستر هههههه لج مادري بيج
من عائلة ((كرديشيان وبناتة ))
-رحمة على والديج كافي والله راح ابجي من الاحراج
جاي امشي واني مدنكة عبالك من راح ادنك وما اباوع
اختفي عن النظر
حسيت خدودي صارو نار رفعت راسي وجمدت بمكاني من الصدمة
خرب حظي هذا ثائر شجابة اليوم
بس شنو عيونة يردن يطلعن من مكانهم
سارة بضحك
-يالله هاج استلمي جانت عايزة والتمت
اتلقي وعدج شوفي الاخ عيونة تنفث نار
من ورة منظرج

لج عزة هذا جاي بتجاهنة
سهى -لج ثولة راح تموتيني من الخوف شبيج نزلتي علية
لوك لوك لوك عبالك معلق رياضي
شنو واذا اجة شسويلة امشي خلي نكمل طريقنا ماعلينا بي
بس عودك شنو اني احجي وياهة واني گلبي ظل يگمز مثل الارنب
ما اعرف فرحانة اليوم راح اشوفة لو خايفة من منظري المبهذل
لا والحظ اليوم من دون الايام طايح حظي بالملابس

ثائر بغضب وكأنه نسى نفسه بانه مايملك عليها الحق
بالتحكم بيها وبتصرفاتها بس ميعرف ليش
يحس ان هاي البنية ملك حصري بس الة
جنت منتظرها على نار بس من شفتها دخلت وكانت تمشي بارتباك نزلت عيني على تفاصيل جسمها اجيت اتخبل خرب عشيرتج هاي شلابسة
شنو اكو واحد كايللها اليوم الاغراء العالمي حتى طالعة هيج التفتت اباوع على العيون شلون تتفحص وتسرق النظرات على جسمها
غير اجيت ارتكب جريمة
-من احتركو عشرتك عساف على هالدكة
عساف-اني شكو ليش تسب عشيرتي
-مو انت الي جبتني وورطني بيها مو جنت كاعد وساكت وعايش مرتاح متهني وكافي خيري شري
هسة عاجبك القنبلة الي جاي اشوفها گبالي
شفت واحد من الشباب راح بتجاه سهى وسارة واني
عقل ما بقة براسي
حسيت برجلية اخذتني لعندهن ردت اطلع حركت گلبي كلها بيها اتمنى عندي عليها سلطة جان تحلم اخليها تعتب باب البيت
رحت اقتربت منها وسحبت نفس وانة ادعي من الله ما اتهور واسوي شي وااذيها
اقتربت منها وهمست
شوفي ولج هسة تدورين وجهج انتي وهاي صاحبتج وترجعين منين ما اجيتي فاهمة
لا والله العظيم اسوي سواية اليوم اخلي الي بالكلية كلها تسولف بيها
-ششنو قصدك وين اروح
سارة-ثائر وين تريدنا نرجع
انتبهت عليه طلع سويج السيارة من جيبة
وانطاه لسارة
-هاج لزمي هسة تاخذيها وتصعدن بالسيارة تلگيهة موجودة بالكراج
وانة وعساف شوية وجايين وراكم
سهى وهي حاصرتها البجية
انتبهت على سارة اخذت منة السويج وسحبتني وراها من زندي
وسمعت صوتة وهو يسب ويلعن التفتت عليه
باوعت اتجاه نظراته وعرفت سبب غضبه
انتبهت عليه صار يمشي وراي
ثائر -خرب يومي الاسود
هاي بكل عقلها جاية هيج للكلية
والله راح انجلط
صرت امشي وراهة واخزر بكل ولد يحاول يحط عينة عليها
بنت الاوادم وين لكت هاي التنورة
اباوع عليها هي تمشي كدامي واني اجيت اتخبل
لااااااااااً والله لوما عيب من الوادم
جان شكيت عليها التنورة
واعلمها الله حق
تمشي گبالي
بكل خطوة تخطيها احس بگلبي يريد يوكف من المنظر
والله عرگ جسمي كلة وظل يرجف
ابوابوي اشتعل من وراهة
حرت اضمها من عيون الشباب لو من عيوني
مكدرت اشيل عيوني عنها اي لان هي من حقي
ملك حصري
بس لازم اتريض شوية ميصير هيج اتصرف وياهة

سهى انتبهت عليه يمشي وراي اني وسارة
يبووي ونظراتة
تجدح نار والله خفت منة
صارت رجلية رجل تطك برجل
والله من وراه گمت اتعثر
ما اعرف امشي الله لاينطي بليسك
شفت سارة وصلت لسيارتة
لزمت سارة ووقفتها
-اوكفي بكل عقلج ترديني اركب بسيارة واحد غريب
والله لو تنگلب الدنيا ما اركب
ساره-لعد شنو الحل حضرتج مطفية وفاهية وجايتني بهذني ملابسج
سمعت صوتة الخشن وراي اني اتجمدت بمكاني
سارة بصوت هامس
-هاج وهذا الاستاذ صاير بركان
اليوم منين مدورين كلها ضدج
انتي لوحدج بالمعركة
اني مراح اكدر اساعدج بشي
انتبهت عليه اخذ السويج من ايد سارة وفتح باب السيارة الخلفي
ثائر وگوة مسيطر على اعصابة
بصوت حاد
-فوتي بسرعة صعدي بالسيارة
سهى وهي تضرب رجلها بالارض بالعناد
-ما اصعد لو تموت بكل عقلك تريدني اركب سيارتك
شفتة رجع شعرة على ورة ونزل ايدة على وجهة وجهة وجر نفس عميق وكأنه يهدء غضبه
-اسألج بالله هذا لبس مال وحدة محترمة
حسيت روحي فقدت الكلام
سارة-لا ثائر انت تعرف لبس سهى دائماً محتشم
بس اليوم مستعجلة
ولبست بالخطاء ملابس اختها الصغيرة
سهى-شنو سارة راح تكعدين تحجيلة قصة حياتي ترة احنة ممجبورين نبررلة
سمعتة ظل يسب ويلعن وانتبهت على عساف صاحبة كعد يهدي بي وكأنه يعرف بصاحبة
كمزت من مكاني من ضرب باب السيارة قوي
-شوفي لج لا انتي ولا عشرة منج تتحداني احسنلج لاتستفزيني
شوفي هسة مراح احجي شي
تبقين هنا ومتتحركين واياني وياج
الكاج متخطية خطوة بعيد عن السيارة
ترة والله مراح اكون مسؤل عن اي تصرف يبدر مني وانتي بكيفج تحركي وشوفي
شفتة دار وجهة ورفع نقاله وراح مشى بعيد عنة
عساف -سارة رحمة على والديج لزمي صديقتج
ولتخليهة تتحرك منا ترة هذا مخبل وكلشي اتوقع منة
شوفي سهى نصيحة الج لتتحدينة
شفت عساف هو اللاخ راح وراه
حسيت بگلبي يريد يطلع من صدري من ورة كلامه
وصرت اني وسارة نتبادل النظرات
سارة-بالله شو خل ننتظر ونشوف شنو تاليهة

يعني صدك موقف محرج ادري عقلي وين جان من جنت البس ملابسي
زين امي شبيها منتبهت على ملابسي ولو اني طلعت ركض مستعجلة حتى مسلمت عليها من طلعت
استغفر الله بالله شحجي هو اذا اني ام الانة منتبهت
اووووف غبية غبية غبية
شلون احط نفسي بهيج موقف
دنكت راسي اباوع لحذائي
الحمدلله على الاقل مطالعة بحذاء تك وتك

يعني شلون حظ عاثر من دون الايام
الا بيوم وجود ثائر
والله حصرتني البجية عمري كلة مفشلانة هيج فشلة
ورة عشر دقايق شفت ثائر جاي وبيدة علاكة
وعيونة نار وشرار صدك خفت منة
جمدت بمكاني واسناني تصطك
من اثر الرجفة عبالك بردانة
مدري من الخوف مدري من الارتباك
شفتة انطاني العلاكة واني ظليت جامدة مكدرت امد ايدي واخذها مو شغلة عناد بس ما اعرف شنو اتصرف بهيج موقف
سهى بتعلثم -هااا هاي شنو
ثائر بصوتة الخشن-جبة اسلامية
هسة تلبسيها فوك ملابسج لتتوقعين اخليج تتمشين بالكلية گبال الطلبة بهاي ملابسج

شفت سارة اخذت منة العلاكة وفتحتها
-عاشت ايدك زين تسوي اني كانت نيتي ان اطلب جاكيت صديقتي حتى تلبسة سهى فوك ملابسها بس الجبة شي اكيد افضل
همة يحجون واني احس بلساني خدران مبنج
مكدرت اطلع ولا حرف
سارة بهمس-شبيج انشليتي تحركي لبسي بسرعة
ترة محاضرتي راحت علية من وراج انتي والاستاذ

والله ما اعرف شلون لبست بس انتبهت عليه انطاني ظهرة وصار الي مثل الساتر وصرت بينة وبين السيارة
وفعلا خلصت وكانت الجبة جاية علية فيت
سهى باحراج على خفقة قلب هاربة
-اة اة اة اشكرك الباجر ان شاء الله ارجعلك الجبة
التفت علية
ورفع تك حاجب وكصاني من فوك ليجوة ويباوعلي
بنظراتة الي هي سبب
المشاكل الي اني وكعت بيها لوما هو جان اني مسهرت ولاكعدت متاخرة ولا اكلت هالبهذلة
ثائر
اباوع على احراجها وخجلها وارتباكها وشفتها لبست الجبة الاسلامية
وطلعت عليها عبالك عارضة

استغفر الله بس هم بعدها تغري وتلفت الانتباه
هاي شكلي راح اعاني وياهة
بس اهون من ذيج ملابسها الي اجيت انجلط من وراهة بنت اللذين
شفت صديقتها حجت وياهة بصوت ناصي ورادت تروح وتتركها لوحدها يمي
اي والله واجت الفرصة لعندي حتى اخذ راحتي وياهة بالحجي لان اريد افاتحها
بس شفتها لزمت ايد صديقتها وكأنها ترفض البقاء
لوحدها وياي
ثائر-اخذي راحتج سارة اني بعدين اوصل سهى للمحاضرة
رفعت راسها وصارت عينها الي مليانة ارتباك
سهى-لالا ميحتاج اصلاً اني رايحة وياهة شعندي واكفة
هنا يمك
ثائر-انتظري عندي كلام وياج اريدج بموضوع خاص وباوعت على سارة
سارة-خلاص لعد اخذو راحتكم اني اروح لمحاضرتي
سهى-لالا مستحيل لتعوفيني لوحدي
التفتت على ثائر
-عفية ما اكدر اوكف وياك لوحدي ترة صدكني تصرفاتك دتحرجني
وارجع واگلك ترة اهلي ميقبلون اوكف احجي وية اي شاب تدري انت بهاي تصرفاتك راح تعم علية
وعلى مستقبلي
وصرت ابجي مثل الطفلة
انتبهت عليه ارتبك من شافني ابجي انخبص بية ومعرف شيسوي
ثائر
استغفر الله ما ادري ليش هاي البنية بالذات
ما اعرف اتصرف وياهة ودائما لقائي وياهة ينتهي
بعركة
صارت تبجي مثل الطفلة
وطبعاً ما اعرف شلون اواسي بنية جاي تبجي
شفتها اخذت سارة ومشت بس هي ممشت لوحدها
لا بوقتها گلبي مشة وياهة مكدرت احجي شي لان دموعها غلبتني وخلتني ضعيف بلا حيلة

يتبع