رواية ☆ ذنـــــبٌ بـــلا ذنـــــب ☆ الفصل الخامس عشر 15 - بقلم Hend_AlBoor

بالم يردها - مجد ؟ رونق ليش هيج ؟ ليش تتقصدين تأذيني

- فهد انت الي دتأذي روحك ماعتقد اني انطيتك امل

ينفعل - داگولج احبج افهمي والله اموت روحي في سبيل بس كلمة منج

- و اني اعزك كصديق و ارتاح من اسولف وياك

- و تحبيه رونق

تنزل راسها و تسكت

فهد - سكتي

- لو مموجود هو بحياتي يمكن جان حبيتك

- حاولي فدوة بس حاولي

- ماگدر لا تضغط علية ، احبه هو

يتركها و يمشي بانفعال تدمع عيونه يفركهن يحاول يمنع دموعها تنزل يحجي وية روحها
- انت دتذل روحك فهد ، دتذلها كافي

انتهت المحاضرة و فهد ما رجع اعرف كلما يروح الها ينغث ادك عليه ميرد

- استغفرك ربي رد عاد

ريام- على شنو شايفة روحها و ما تختلط راح تخلص السنة و هي تمشي و خشمها بالسما

بيان : حلوة عيني حقها متعبرنا

- خليني ساكتة

- ريام البنية هادئة معليها باحد ، الي معجبني يا شلة بنات اوگف يمهن يحجن عليها ، زين ليش

- من تصرفاتها عبالك بس هي بنية بالكلية

- ترا احنا الي مبتعدات مو هي

- دگومي خو انتي حتى ابليس اذا حجينه عليه اتدافعيله

تضحك - غير احجي الحق عابتلج

تمر الايام باستقرار يدخل رامي للقاعة شايل بيده اوراق - هاي اوراق امتحان تشريح الاسنان

ذاع اسمي گمت اخذتها استغربت من درجتي هواي قليله و اني جاوبت گعدت اراجع التصحيح جمعت الدرجات
- غلطان بالجمع مو داگول

بيان - ها جنة بشري ناجحة

- اي الحمدلله

ريام بسخرية - اكيد عمري يم استاذ ماهر و ما تنجحين مو عيب

- مافهمت و ليش يعني

- لا اقصد انتي زينة اصلا بكل المواد درجاتج فول

سحبتها صديقتها و راحن عرفت قصدها ، مراهقته جابتلي هيج كلام ، اتجاهلت ، خلصت المحاضرة الاخيرة دالم كتبي اجاني رامي

- جنة

- ها

- استاذ ماهر طالبج بالقسم

باستغراب - و ليش

- والله مادري

- تمام شكرا

اخذت جنطتي و رحت للقسم لگيت السكرتيرة گاعدة سلمت و گتلها - العفو وين استاذ ماهر

- بغرفته

- شكرا

رحت للغرفة دگيت الباب و سلمت گام فرحان و يرحب بية

- استاذ طالبني؟

- اي نعم تفضلي

- طبيت گعدت على التخم ابعد شي عن ميزه

- شفتي درجتج

- بلي استاذ

- بيها غلط

- اي

- و ليش ما اجيتي هذا حقج

- استاذ جنت بمحاضرة مصارتلي فرصة

دخل مضر طالب وياية سلم ردينا السلام

ماهر - تفضل مضر

- العفو استاذ رئيس القسم دزلك هاي القوائم

- ليش مو رامي جابهن

- مو كلف رامي بشغلة المكتبة

- ماشي ماشي خليهن على الميز

طلع من الغرفة و هو يباوعلي بنظرة استغراب و استحقار

- اي جنونة بصراحة تقصدت بالغلط ردت تجيني

وية كلامه راسا وگفت - استاذ اتأخرت

- اگعدي خمس دقايق رايدج بموضوع

- گول استاذ و اني واگفة

- بدون لف و دوران اني رايدج بالحلال

- اعتذر استاذ

- ليش شنو بية و ترفضين

- حشاك بس بعدني صغيرة و ما مفكرة بالزواج

گام وگف يتمشى مثل الثعلب و يبتسم

- سالت عنج و عن اهلج ، اصلج و فصلج

انصدمت من كلامه يعني يعرف كلشي

- اي لا تستغربين اعرف انتي خدامة

- و المطلوب

- لاتخافين ماحجي و ميهمني شنو انتي و شنو جنتي ، و اذا وافقتي علية نحتاج وقت نفهم نطلع نطب ، فكري بالموضوع و رديلي خبر

- اعتذر منك استاذ بعدني مصرة

عفته و طلعت الدنيا كلها تدور بية ديفهمني هو لازم لازمة ضدي و ديستغلها هددني و راد علاقه مقابل سكوته ، وصلت للبيت اريد انعزل و ابجي

سرّي - هاا يمةة شلونج بالدوام

- الحمدلله يمة بس تعبانه

- اسم الله بنيتي ليش

جنة : ضغط الدراسة يمة و الامتحانات

- ارتاحي و الله يوفقج و يسهلج يارب

- بستها و طبيت صليت و گعدت ابجي راح انفجر من التعب و القلق دگيت ع سينا

سينا - الو

- سينا

- عيوني شبيج ليش تبجين

- راح اتخبل سينا تعبانة

- احجي شصاير

- اكو استاذ ديضايقني

بانفعال : وج شگي حلگه شنو يضايقج شسوالج ، انعلي اهل اهله

- ميفيد بعد سينا هي مو عركه الله يخليج

- بابة انتي ليش فاهية شبيج

بانفعال - لاان يعرف اني شنو

- شنو

- اي سينا يعرف

- لا تبجين اهدي
كافي خلي افتهم يعني يعرف انتي مجدية

- ماعتقد بس يعرف اني خدامه هذا الي حجاه

تصرخ - ينجب زين قابل دتشتغلين بيت دعارة و خايفة منه

- شلون ما اخاف لازم علية لزمة و هددني

- و شيگدر يسوي يوگف و يحجي للطلاب مو من حقه يسيء لحرمة طالبه وج بشكوى وحده تضيعين مستقبله

- صدك

- شعبالج هي تايهه

- و هو يدري

- يالثولة مو اكو بكليتكم وحدة شؤون الطلب

- اي

- هي هاي للشكاوى و كلشي يخص الطلاب ، و هذا فارغ ميگدر يسوي شي بس ديضغط عليج

- گولي والله و مدتحجين هيج بس حتى تهدئيني

- جيبي خبزة و احلفلج يالفاهية لا تخافين
باجر اضرب محاضرة و اجيج افتهم منج اكثر

- لا اني اجيج على مجالي حتى براحتي احجي

- تماام ماكو فرق حب

قفلت خط و رحت نمت حتى ارتاح

ام سينا - سينا

- جاية يمة جاية

- طبي جهزي الحمام للمرة اروح اشوف الحجي شمحتاج گال جوعان

- صار يمة

ثاني يوم

مجد - وينك بثمانية و نص راح تبدي المحاضرة

- ازدحام دقايق و اوصل

وصل رحنا اخذنا كاستين جاي و رحنا للقاعة شفنا رونق بالممر
- هلا رونق اليوم يمنة

تضحك - هلو مجد ، اي ردت اسويلك مفاجأة

فهد بتعالي - لو ندري جان حسبنا حسابج بالجاي

- لا شوفتكم كافية

بسخرية - شوفتنا

واگفين ظهرنا ع باب القاعه و گبالنا رونق اشرب جاي و استمع لبساميرهم

رونق - شلونكم وية المواد

مجد - ماشية

- تقريبا نفس موادنا لان مرحلة او

دتحجي فجاءة سكتت من فاتت جنة

فهد - جنة

مجد يبتسم - شبيج صفنتي

- لا بس شفتها حلوة

فهد - جمال ملكات مو

- لا مو لهاي الدرجة

- و اكثر

تبتسم - بالخير اذا عاجبتك تستاهلها

يضحك - هاي ما ينوصللها رونق و انتي تعرفين گلبي وين ، متهزني جنة

- هممم يلة اترخص يادوب الحگ اوصل لكليتي

- نورينا مرة لخ عيوني

- ان شاء الله

جنة : طبيت گعدت بستولي فكري شارد احس ثقل على صدري خانگني منين طلعلي ماهر ، من بداية السنة اتفقنا اني و سينا منجذب اي بشر لا ندخل بعلاقات حتى ميجي و يسأل و ينكشف المستور ، دك فوني

- الو سينا

- ها جنوني شوكت تجيني

- ورا هاي المحاضرة

- اوك لعد خلي افرش الكاع ورد

تضحك - يكفيني انتي كل الورد بالتربية

- فديتج دتعالي اليوم اكشخ بيج

- اجةبروف عوني يلة سدي ، سلم جان تردله

سينا - وعليكم السلام بروف شلونك اخبارك اشلونها جنة كسوله شاطرة

تضحك و تهمس - على اساس سمعج

قفلت خط و فتحت كتابي

بروف عوني - تطلعتوا على المصادر الي ذكرتها الكم

رامي - استاذ لحد هسه لگيت مصدر واحد اسحب منه الي ذكرتهن و استنسخ للطلاب

- ابني ليش كله انت

بيان - استاذ مو هو ممثل القاعة

- اعرف بس اني غايتي انتو كل واحد بنفسه يبحث و يكتشف ، العلم ماي اعتماد واحد يقوم عن واحد ابحثو اكتشفو بنفسكم ميصير كله على رامي

ريام - استاذ والله ماعدنا وقت اقتربت الامتحانات والله ضغط علينا

يبتسم و يسكت دقيقه - ذكرتوني بوعد جنت اشوفه مستحيل

قبل مايقارب عشر سنين طلعت ورا ما خلص الدوام و التقيت بطفلة تتسول ماكو داعي اوصفلكم لبسها لان كلنا نعرف شلونهم و اشكالهم ظاهريا

جلدي قشعر رجعت عشر سنين ليورا رجعت بهذاك الاحساس باوعت على اصبعي الصغير

هذاك الاستاذ ، هذاك الاتفاق

خفت حيل بسلا عرفني اني هي